Khawsung a zuzuakna hihbei lel leng manpha: L. Hoinu Mate, khawtang hoihna dinga khamtheih doudalna in gah kilawm suang
Lamka, Oct- 6: Bijang Women’s Welfare Assn in khawtang siatna pen khauhtak a hihbei sawm in June 22, 2013 nitakin meisel tawh lampi zui uh a, police in avangkim in zu zuaknate enkhe zel mahle uh huai hunlai in khamtheih doudal dingin voluntary orgn(assn) om nailou hi. Tua hunah khawsung a khamtheih zuakte’n tawpsan dingin vau uhi. Bijang nupite’n azingchiang in khawsung a khamtheih kizuaknate luh ua, huai hun akipan Lamka khawpi sunga veng tuamtuam-te’ leng khamtheih ziaka buaina tuak ahihman un nungthuap dingin hong kisa uhi. Hmar Veng in Bijang nupite panlakna hon zom in Womens Welfare Assn hong piangkhia a, Tuibuong Womens Welfare Assn, D. Phailien Women’s Welfare Assn, HQ Veng Womens Welfare Assn, Molnom area Women’s Welfare Assn, Thingkangphai Womens Welfare Assn chihte’n leng amau area chiat a zuzuakna tamkhop omte hihbei dingin thagum(action) hon zang uh a, lawhching mahmah in tuni chiang in huai area-te ah zuzuakna, khamtheih zuakna chihte omlou a, khawsung mipite’n hamphatpih mahmah uh hi’n kigen hi.

Khamtheih doudalna a veng tuamtuam a nupite panlakna lawhching ahihdan, tuni in L Hoinu Mate, Chairperson, Tuibuong Women’s Welfare Assn in gen a, lawhchinna tuamtuamte lakah khawsung a zuzuakna, khamtheih zuaknate hihbei ahihlel leng manpha mahmah chi hi. Aman agenzelna ah, nidang in zalentak a zu leh khamtheih zuak in om a, tua hunah naupang leh tuailaite banah, a ut peuh in zalentakin leithei ua, siatna kingang mahmah hi’n gen hi. Nupite’n pan honlak nung un, athu mai a panla lou in thagum a poimawh hun ah zang ua, tua ziakin khamtheih zuakte leng maingal lou in tawpsan thei ua, huaiziakin naupang laisimte’n phatuam takin laisim thei uh a, zu addict-te’ leng nidang sang in a mel uh hoih zawta a, a mel et theih theihlouhte leng et theih zaw ahihdan gen hi. Aman agenzelna ah, naupang a guk a khamtheih test te’n leng hih thei nawnlou in, papi tamtak a zite leh innkuante tawh ann nekhawm kha theiloute’n leng anne khawm theita uh a, a tate uh hinkhua ding ngaihtuahna in hun zang zawta uh chi hi.

Huailou in vengsung ah kinak-kiselnate beita a, duty ziakin guta omlou a, nungak-tangval omdan kilawmlou a gamtat sawmte leng omtheilou in, thilsia hihte’n leng tawpsan theita uh chi hi. Party zang a tangvalnou leh nungakte mundang a pawtkhe sek te’n leng tawpsan ua, vengsung ah nute’n pankhawm dan zil khia in, amaute kalah ki-itna om zawta hi’n leng gen hi. Hibang a i gamsung a panlaknate omlou hileh, nidang tawh kibang in khawtang dinmun om ding a, siatna nasa zawsem ding hi’n gen hi. Lawhching tak a khawtang siatna hihbei ahihpen mipite leh saptuam te’n thumna tawh a panlakna gah uh hi’n gen a, tuni chiang in duty luat ngailou in thilhoih omtheita chi hi. Khawtang makaite banah Village Authority leh philantrophic orgn te’n nasatak a kithuahpihna a piak uh tungtawn a nupite’ leng thupai(lamzang) hi’n gen hi.

Veng tuamtuam a nupi duty-te’n rotation nei zel in, innkuan khat in kalkhat in khatvei duty tang ua, khaw khenkhat ah nitak dak 11.00 tan khawng duty in, akhente’n a poimawh bangbang in nitak zan sawtnung tanpha duty uhi.

ABW Union General Asembly
Lamka, Oct-6: South Korea khawpi Seoul ah Oct 8-11, 2013 sung ‘Asian Baptist Women Union 12th General Assembly’ om ding a, Lamka apan Baptist mumei pawl leh Mizoram apan mi tamtak hawh uhi. EBC saptuam apan mi 19 te’n tuni’n Lamka nusia in South Korea zuan uh a, amau South Korea apan hong kiklam un Oct 13, 2013 in Kolkota a EBC saptuam te tawh kithuah khawm ding uh hi’n kigen hi.

Hills Dist Badminton Championship
Lamka, Oct-6: CCpur Dist Badminton Assn(CDBA) inntekna in Oct 21-25, 2013 sung Hiangtam Lamka a Indoor Hall (Community Hall) ah ‘11th Hills District Badminton Championship 2013’om ding a, singtanggam district 6 apan kimawlmi hunkhop telding uhi. Winners in kipahman Rs 4000 + trophy + medal ban ah runners up in kipahman Rs 2000 + trophy + medal ngah ding uh a, Open category ah winner in Rs 10000 + trophy + medal ban ah runners up in kipahman Rs 5000 + trophy + medal ngah ding uhi. Tamenglong district in kum 2014 a ‘12th Hills District Badminton Championship 2014’ zintun ding chih hi.

Bike a tailai kipuk in liam
Lamka, Oct-6: Tuni sunnung dak 1.30 velin K. Salbung ah Bike atuang a hattak a tailai i lampi nal ziaka kipuk in huai a tuang mi 2 lamlian kidenna in liam uh hi’n kigen hi. Huaite bel Bike hektu Japan Tawnlien(20) s/o Lalzolien of Lungthulien leh Job Vanlalsuong(16) s/o Dothuam of Lungthulien hi uh a, Job pen internal bleeding ziakin serious sim a, Imphal ah referred in om hi. Japan Tawnlien alu leh akhe liam in Dist. hospital ah etkol in om hi.
Huailou in Ningngaihlun(23) w/o Immanuel of IB road zan in lampi a pailai gari in phukha in alu liam a, phatuam ngaite’n hospital ah vakoih uhi. Momcha (52) h/o Mema of Kangvai zan nitaklam dak 4 velin aksa semlai tem in akhut satliam kha a, Tuansang (53) w/o Lalhmuah of Kawnpui leng accident ziakin liam hi. Tuahsia a liamte Dist hospital ah etkol in om uhi

Traffic rule bawhsia 16 mankhia
Lamka, Oct-6: Lamka khawpi a ‘One way traffic rule’ leh ‘Gari parking’ dan ban ah gari kileithak a A/F kia kigelhte Traffic Police, Police leh VDF ten nitengin enzui uh a, Sept 30-Oct 5, 2013 sung in traffic rule bawhsia leh Gari No. omlou a A/F kia kigelh 16 mankhia in liausak uhi.

Oct 9 in interview kipan ding
Lamka, Oct-6: PMEGP 2013-14 loan apply trade tuamtuam apan applicant te ading in Oct 7-25, 2013 sung DC office ah zinglam 10:00 apan interview om dingin bikhiah mahle uh lemtanlouhna omziak in Oct 9, 2013 zinglam dak 10:00 in kipan ding hi. KVIB tungtawn a loan apply-te ading in Oct 9 in Sl.1-150 tan inteview om ding chih ahi hi.

Presbytery Women Fellowship om
Lamka, Oct-3 : PCI(R) saptuam a North Lamka Presbytery Women Fellowship Conference-2013 Oct 4 2013 akipan New Lamka a Rayburn Presbyterian Church om a, huai ah Rev. G. Suanzalam Presbytery Supdt leh Pastor M. Khamlianmang Adviser NLPWF in thugen uhi. Oct. 4 nitak in Elder T. S. Mang Moderator NLPWC in khawmpi hong a, Khawmpi sung mah in “Kha Thunun Pianken Mizia & Khalam Thilpiakte” chih thupi a nei in Mrs Rithanglian Tombing in sinsak hi. Khawpi sungin PCI saptuam 12 apan nupiten kikhopna teng ah lapawl sa zel uh a, tuni nitak kikhop zawh in Elder N. Thangzamawi, Moderator NLP in khawmpi hun khak hi.

Mun khenkhat ah News zekai
Zan issue Manipur Express print lai in offset part 1 hong nawngkai ziakin ngeina bangin kizoupah theilou in Lamka leh a kimnai ate leng zekaizaw in hong kihawmkhia a,Imphal leh mun tuamtuam ate leng zan mahin hon kithon mahleh a zekai ziakin zan a hong hawmkhe manlou a tuni a tawh hong hawmkhawm a om leleng latute’n non na theihsiam uh kon ngen uhi. –Manager,Circulation.

SaS booking upto 3 Aug. Stock 306

IMPHAL NEWS
14th Finance Commission teamte, Ni 3 om din Imphal hongtung
Imphal,Oct-5:14th Finance Commission a high level team in ni 3 sung Manipur a om ding in tuni nitaklam in Kohima apan Imphal hongtung uhi. 14th Finance Commission teamte Chairman YV Reddy makaihna in member 4 leh official 11 hi uh a, Oct 7, 2012 zinglam dak 10.00 akipan in Manipur Secretariat ah Conference Hall ah Chief Minister leh state govt a official-te tawh meeting ding uhi. Commission teamte’n Loktak lake, Moirang a INA, Kangla leh Takyelpat a development scheme tuamtuamte enkhe ding uh a, nitaklam dak 6.30 in state govt in 1st M/R Banquest Hall ah Commission teamte vaidawnna in cultural programme zatpih in nitak-an nekpih ding uhi. Commission teamte’n Oct 8 in field visit in mun tuamtuam pha ding uh a, nitaklam dak 3.35 velin Imphal apan Delhi zuan in kiknwn ding uhi.

PDA staff-te’n drainage hahsiang uh

Imphal, Oct-6 : Planning & Development Authority(PDA) staffs te’n tuni in Paona Bazar area a drainage hahsiang uhi. Huai nasepna Sagolband A/C MLA RK Imo Singh in va enkhia a, amah apan thupiak om ziakin PDA staff te’n drainage hahsiang uh hi’n kigen hi. Huai hun ah RK Imo in Paona Bazar a drainage-te kum 20 val hahsianglouh a om hidan in gen a, tuaziakin vuah tam azuk chiangin nin atamluat ziakin drainage- te kikhaktan in lampi lai khawng leh mun tuamtuam ah hawktui luangdalh zel hi’n gen hi. Aman huai nasepna a senna teng MLA Local Area Development Fund akipan seng ding hi’n leng gen hi. Nasepna ah vanzat tuamtuam khelh ngai a, huai a sumsente leng RK Imo in sengvek ding hidan in gen a, ama Constituency sung pumpi a drainage hahsiangna nasep tuni a pat a om sutzop hiding chi’n gen hi.

Zarda, Khaini leh Talab haltum
Imphal, Oct-6: Thoubal Khunou a tang tungah tuma zekin Zarda, Khani leh Talab kihawm Rs. 2,50,000/- vel man ding kihaltum chihthu om hi. Huai khamtheih thilte June 22, 2013 in Hiyanglam Police Station a OC inspector Kh. Debkumar makaihna Police team khat in Wabagai a Pole Star College kiang ah Maruti Van khat akipan a muhkhiak uh hi’n kigen hi. Huai khamtheih chi tuamtuamte meia haltum ni in Thoubal district a officer tuamtuam leng vatel in thil omdan theihpih uh chihthu om hi.

Students Union election ding
Imphal, Oct-6: Addl Director of Univeristy & Hr Education makaihna a Principal-te meeting a thupukna bangin Govt College leh Govt Aided College teng ah Oct 18, 2013 zinglam dak 9.00 akipan sun dak 12.00 sung in Students’ Union election om ding a, sunning dak 1.00 akipan vote sim hiding hi. Huai tawh kisai in zan in election ding Notification suak a, candidate dingte’n Oct 10, 2013 nitaklam dak 3.00 tan nomination paper file thei ding uhi. Oct 14 zinglam dak 11.00 akipan scrutiny om ding a, candidate kizukkik nuamte Oct 14 mah nitaklam dak 3.00 in kizukkik thei ding uhi. Candidate nuamte’n Rs. 100 pia in nomination form laktheih ding a, security deposit Rs. 400 hiding chihthu om hi.Student-te identity card issue leh renewal himhim Oct 10, 2013 tan lel hithei ding chih ahi hi.

PLA cadre 2 kimankhia
Imphal, Oct-6 : 26-Sector Assam Rifles nuai a 9-Assam Rifles te’n Chandel district sunga om Govajang area lak zan in operation a bawlna uah PLA cadre 2 mankhia uh chihthu om hi. Matkhiak a omte bel Yenjenbam Somendro(23) leh Nilakuthi of Kamlganj, Bangladesh a Malubi Bazar a om hi uh a, amau akipan in 9mm pistol khat leh magazine 5 mukhia uhi. Mat a omte leh a galvante uh Assam Rifles te’n Imphal Police station ah pekhia uh chihthu om hi.

MU ah Workshop in Cinematography kipan
Imphal, Oct-6 : Manipur University(MU) a Educational Multimedia Reseatch Centre (EMRC) te saina in MU a Udusat Hall ah tuni’n ‘6th Days Workshop on Fundamentals of Digital Film Making (Cinematography)’ kipan hi. Padmashree Heisnam Kanhailal in Chief Guest hikawm in Workshop hong hi. Aman a thugenna ah humanity omkei leh arts omlou ding a, tuaziakin humanity kichi arts tawh a omkhawm gige ding ahi, chi hi. Workshop tungtawn in Manipur a film bawlkhiaten hamphatna tampi ngah ding uh hi’n gen hi. EMRC Director Dr. N.Premchand in maban kum 1 kum 2 nungin Manipur ah PG Diploma Course Centre hon hidin gen hi.

Consumer awareness campaign nei ding
Imphal, Oct-6 : BSNL ten Oct. 1, 2013 akipan BSNL Formation Week Celebration a neih uh tawh kiton in Oct. 7, 2013 sunnung dak 2:00 in Babupara a BSNL Bhavan Conference Hall ah ‘Consumer Awareness Campaign ‘nei ding uhi. Huai awareness campaign bel BSNL Manipur leh SSA te pangkhawm a neih hiding in kigen a, huai tungtawn in Consumers tamtakin a theihsiam louhte uh theihsiamsak hiding in AGM (Operation) BSNL, Manipur in gen hi.