Car accident in electric post phukawi
Lamka, Oct-1: Muolvaiphei field gei ah zan nitak dak 8.00 velin Saikot lam a taikoi ding a kisa lai Car (No.MN 01W-9758) accident in electric post phukawi a, Muolvaiphei field ah tailut hi. Huai Gari accident mailam naksiat sim mahmah a, vangphat huaitak in gari sung atuang te aliam kuamah omlou hi’n kigen hi. Gari accident dan theihchet hikei mahleh gari tyre puncture ziaka accident hidin muanmawh thu kigen hi.

Minister in hunkhakna uap ding
Lamka, Oct-1: SSA & RMSA/CCpur saina in Oct 3, 2013 zinglam dak 10:00 in CCpur govt College ah ‘District Level Literary Competition 2013’ om ding hi.Kidemna ah Sub Junior; Junior leh Senior chi’n category tuamtuam in kikhen ding hi. Sept 4, 2013 zinglam dak 11:00 in Hiangtam Lamka a YPA Gen.HQ Hall ah hunkhakna omding a, Phungzathang Tonsing, Minister (Health & FW, GAD, CADA) in khuallian hihna tawh uap ding hi. Huai hun ah Functional President in H.Deleep Singh, IAS, Director of Edn (S), SPD(SSA & RMSA) pang ding hi.

DC in social work nei di’n theisak
Lamka, Oct-1: Kumteng in India gam ah Oct 2 pen Gandhi Jayanti ‘National Cleanliness Day’ zat in om gige a, CCpur Dist ah leng govt office, institution, school, college te mahni office/campus hahsiang chiat ding leh Village Authority te’n mahni khawsung chiat hahsiang a social work nei ing in DC/CCpur in theisak a, nasepna tawh kisai report bawl ding in leng theisak hi.

New Bazar a Waiting Shed melsia
Lamka, Oct-1: Lamka Building Society(LBS) pawlin New Bazar a Tedim Road-Red cross road junction kiangah n mipi tawldamna ding Waiting Shed abawl uh, sawt kizang manlou in a bang(wall) leh atuang(floor) hihsia om a, LBS pawlin asiatna munte bawlthak zel mahle uh pawlkhat in zanzek in Waiting Shed bang a plastic kibawlte hihse nawn uh a, tuni’n huai Wating shed melse mahmah hi. Ms Jacintha Lazarus, IAS, DC/CCpur in huai Waiting shed a hon hi a,aman kuama’n hihselou a, phatuam taka zang dingin ngetna thugen hi.

Malaria positive 3 mukhia
Lamka, Oct-1: Dist Malaria deptt te'n September 2013 kha sung in damlou tuamtuam 1108 sisan test uh a, malaria positive 3 mukhia uh a, huaite lakah PF khawsikpii) 2 tel a, Sept khasung in Malaria ziaka misi official record omlou hi’n kigen hi.

Upa Pawl 6th Raising Day zatna om
Lamka, Oct-1: Mizo Upa pawl in tuni sunnung in Thingkangphai a Upa Pawl Community Hall ah a kiphuhkhiak nung kum 6 chinna ‘ 6th Raising day’ lopna nei uh a, Chief Guest ding Langkhanpau Guite, Chairman, ADC tulai in Shillon ah azin ziakin khuallian in azi Hoihching, Vice President Thanlon Block Mahila Congress pang hi. Aman agenna ah pitek-putek te’n ‘kei ka upa lua’, ‘kei’ ka tek lua chia kingai selou a, innkuan ading a vualzawlna tuntu ahihlam uh kiphawl din deihthu gen hi. Tulai in mitamtak tuailai hun a si tam mahmah a, Upa Pawl omtheih kipahthu genin maban ah pawlpi hoihtaka paitou zel hidia deihsakthu gen hi.

YLS ah ‘School Fete’ om ding
Lamka, Oct-1: Zenhang Lamka a om Young Learners’ School (YLS) ah Oct 2, 2013, zinglam dak 9:30 apan ‘Reach Out and Touch’ chih project a neih uh tungtawnin School Fete, 2013 om ding uhi. Huai hunah nektheih chi tuamtuam a bawlte uh zuakding uh a, huai a a sum muhkhiaikte tungtawnin Lamka a tagah-khoina leh panpihngai khenkhat te kithuahpih ding uh chihthu kiza hi. Young Learners’ School te’n kum bangzahhiam paisa in huai project ana paipihta ua, panpihngai tamta te’n hamphatpih uh hi’n kigen hi.

Khanglai Pawlpi Golden Jubilee
Lamka, Oct-1: Khanglai Pawlpi (NTBCA) kum 50 chinna Golden Jubilee lopna Oct 3-6, 2013 sung NTBCA campus, Lamka ah om ding a, Oct 3, 2013 nitaklam dak 5:30 in Rev P.Soilian, Pastor Tuibuong NTBC in Jubilee meisel dekawm in Pathian kiang ah program lan ding hi. Golden Jubilee lop hunsung in Rev Dr H.C Stephen , President Baptist Partnership Ministry, Dr Steve Overholt, USA leh Pastor David Sincock, USA te’n Pathian thu gending uh a, Seminar hun ah Dr Ginlianlal Buhril, Professor, Universal Business School, Mumbai leh Rev K.Hangnung, MA, M.Phil, M.Th te’n sinsak ding uhi. Oct 5, 2013 zinglam dak 10:00 in Jubilee Monuments honna omding a, Rev H.Hangzakam, Founder Chairman, Khanglai Pawlpi, NTBCA in Khanglai Pawlpi Golden Jubilee Hall hong ding a, Rev S.Kaikhanmang, Executive Secy NTBCA in Khanglai Pawlpi Jubilee suang hong ding a, T.Pumkhokam, Chairman GC, NTBCA in Golden Jubilee Souvenir hong in a leh Pathian kiang ah lan ding hi.

Vitamin ‘A’ damdoi dawntheih
Lamka, Oct-1: Dist Immunisation Office ah tuni’n naupang kum 2-5 kikalte ading Vitamin ‘A’ hongtung a, Oct 2, 2013 apan office ah naupangte dawnsak theih ding hi’n thusuak kingah hi.

ZYA block-te veh di’n kuankhia
Lamka, Oct-1: Lamka a 3rd World Zomi Convention om ding tawh kisai a Mobilisation mawhpua ZYA Gen HQ te’n ZYA block leh Unit khenkhat veh dingin tuni zingsang dak 7:00 in New Lamka Hebron Veng a 3WZC Information Centre ah Siamzading Valte in thumna in khakhia hi. ZYA makaite’n tuni’n Tuivai block centre; Singngat block centre; Tuivel block centre, Kapkhovung block centre leh Tuima Unit (Kangkap) veh ding uhi. Oct 2 in Raja Goukhothang block, Sinzawl block; Bukpi block leh Joutung Unit veh ding uh a, Oct 3 in Thanlon block leh Leijangphai block veh ding uhi.

Dist Level Sc Exhibition omding
Lamka, Oct-1: ZEO/CCpur office a Science Unit saina in Oct 29-31, 2013 sung Lamka ah Dist Level Science Exhibition for school children 2013 omding hi. Huai ah student class IX-XII kikal simlelte telthei ding uh a,Oct 20, 2013 tan in a telding student list ZEO office ah submit ngaiding hi. Dist Level Science Exhibition a selected student te State Level Exhibition leh Manipur State pawlam a Eastern India Science Seminar ah CCpur ai-oh in kuanding uhi.

SUUNNA
Nialzaniang (54) w/o Thanghlir of Gangpimuol zan nitaklam dak 5.00 velin sungna ziakin si a, tuni in Gangpimuol hanmual ah kivui hi. Nialzaniang bel District Hospital a parking fee collector hi a, hun bangtan hiam akipan sungna neimi hi’n kigen hi.

Writtern examination result suak
Medical Directorate saina in academic session 2013 akipan Female Health Worker(FHW) course sinding lakna dingin Sept 22, 2013 a written examination om tuni’n select list leh wait list suak hi.Unreserved/General a lawhching 50 lakah ST leng bangzah hiam telkha uhi.Reserved/ST category ah mi 31 lawhching uh a, wait list ah ST 2 lel tel uhi.
Selected list:
I. UR/General Category:
Sl. No. Roll No. Name
2. 159 Chingthianmawi
5. 105 Thangsianching
9. 289 Lamneikim
10. 143 Zenngaihpar
12. 104 Hoihneihhat
13. 113 L. Jotlims
21. 114 Kimngaihlun
23. 115 Vungmuannem
24. 306 Zendeihniang
27. 109 Hoinu
28. 120 Chonlu Mawinu Vaiphei
49. 183 Themneiting Haokip
50. 259 Niangmuankim
II. ST Category
2. 260 Vungngaihsiam
3. 294 Niangngaihmawi
4. 317 Unicky Nembiakdik
5. 244 Mangte Lakmi Kom
6. 151 Chiinthiannei Suantak
7. 157 Chinngaikim Haokip
8. 288 Lamkhokim
9. 291 Lhingneithem Haokip
10. 106 Biakmalsawmi
14. 300 Manthianching
15. 281 Phaneihoi
17. 290 Lhinghoiching
19. 299 Manngaihching
20. 182 Lalbiaksiam
21. 140 Manlunniang
22. 286 Nemneilhing Haokip
23. 329 Lamjoycy
24. 111 Ngemngaihman
25. 110 M. Chiinlunniang
29. 263 Neikhovah
30. 285 Nemneichong Haokip
31. 338 Lhingneo

III. Wait list ST category
1. 287 Nengkhodei Kilong
2. 339 Lhingneihat Boinu Singson

IMPHAL NEWS
Manipur Governor apan message
Imphal, Oct-1: Manipur Governor Dr Ashwani Kumar in ‘Gandhi Jayanti’ tawh kisai in Manipur mipite deihsakna thupuan bawl hi.Governor in a genna ah Mahatma Gandhi’ lianni ahih dungzui in October 2 in inn-kim leh kiang mun tuamtuamte hahsiangthou banah i ngaihtuahna pumpi leng siangthou dingin poimawh chi’n gen hi.Mahatma Gandhi in hiamgamna tellou,itna,kilemna leh kiunauna a ngaih poimawh bangin Manipur mipite’n leng huchibang lungsim nei ding in Governor in deihthu puang hi.

National Voluntary Blood Donation
Imphal, Oct-1 : Manipur AIDS Control Society (MACS) leh State Blood Transfusion Council Manipur-te saina in tuni in DM College campus a Multipurpose Hall ah “Volunatary Blood donation will cost you nothing but it will save a life” chih thupi zang in National Voluntary Blood Donation Day-2013 zang uhi. Huai hun ah Chief Guest in Health Minister Phungzathang Tonsing pang a, Functional President in Dr. Suhel Akhtar, Principal Secretary, (Health & FW) pang in Chief Host in Shyam Lal Poonia, Project Director MACS pang hi. Guests of Honour in Dr. W. Gopimohan Singh, Superintendent JNIMS leh Dr. Ch. Ibohal Singh, Programme Co-ordinator NSS Cell Manipur University pang uhi.
Chief Guest Phungzathang Tonsing in JNIMS, RIMS leh CCpur District Hospital ah blood bank om a, maban ah Thoubal District Hospital ah Blood Bank om pahta ding hi’n gen a, blood bank ding lamna pailel hidan in gen a, maban ah Moreh leh Senapati ah leng blood bank honkhiak din govt in panla lel hi’n gen hi. Club 25 International, Manipur te saina in National Blood Donors Day 2013 tungtawn in cycle rally om hi. Huai pen RK Nimai Singh, IAS Commissioner( Art & Culture /YAS) in Kangla mun ah khahkhiak a, rally a telte Kangla akipan in Kangla Ultra Mamang tan cycle in tai uhi.

Imphal East district ah 144 Cr PC
Imphal, Oct-1: Jiribam sub-division telin Imphal East district pumpi ah tuni nitaklam dak 6.00 akipan in 144 Cr PC koih in om hi. District Magistrate, Imphal East in muanna leh bitna leh thil hihsiat saw mom hi a theihziakin 144 Cr PC puan a om hi’n taklang a, Oct 31, 2013 zingsang dak 6.00 tan paitou ding hi’n gen hi. 144 Cr PC koih sungin pawlam mun 1 ah mi 5 sanga tamzaw omkhawm phallouh ahih ding banah security leh law & order enforcing agency Police leh adangdang chihlouh kuamah galvan leh hiamhei tawikhia om theilou ding cvhi’n Dist Magistrate in puang hi.

Cylinder khat puakzak : mi 1 liam
Imphal, Oct-1:Imphal East District sung Wangkhei Angom Leikai a Purana Bazar a LM Ice Factory ah tuni sun dak 12:00 velin gas cylinder khat puakzak a, huai ah nasemtu khat liam hi. Akigendan in huai a liam amin Ngangom Robert (20) s/o Ng. Sanatomba of Nambol Irengbam Mamang Leikai hi a, aban veilam pang nak liamsim hidan in kigen hi.

Japanese team hongzin ding
Imphal, Oct-1: Official 2 telin Japanese team khat in Oct 9, 2013 in ni 2 sung om ding in Manipur hongpha ding uhi. Japan International Cooperation Agency (JICA) apan team hongzin dingte ahihleh Chief Minister O. Ibobi makaihna govt in Manipur sh tuisiang dawn ding haksa ziaka pan hong lakpih dia a chial hi’n kigen hi.JICA team in Thoubal Dam apan pipeline zanga tui laklut dingdan hong etpih ding uh hi’n kigen hi. Manipur govt in tuinek lam puahna ding in Rs. 690 crore ve loan la a, Imphal khawpi a mihging 7.6 lakh omte adingin Imphal, Iril leh Nambul River akipan tuisiang dawn ding niteng in million litre 25 akipan 50 million poimawh hi’n kigen hi.

International Day of older Persons Day
Imphal, Oct-1 : Shija Hospital & Research Institute a Hospital Auditorium ah tuni’n ‘International Day of Older Person Day’ zatna om hi. Huai ah Chief Guest in B. Binoy Singh, President Senior Citizens for Society pang a; Guest of Honour in Dr. M. Nara Singh, Co-ordinator Senior Citizens for Society pang in Functinal President in Dr. Kh. Palin Singh, Chairman-cum-Managing Director Shija Hospital pang hi. Huai hun ah upa lamte ading bik in free health camp leng om hi. Imhal east a Dharmalaya Hall a Brahmapur Nahabam mun ah leng International Day of Older Persons zat hi a, tua ah upate kiangah thil piak chituamtuam pia uhi.

Tuni in MUTSU election in om
Imphal, Oct-1 : Manipur University Sept 28, 22013 in Tribal Students’ Union (MUTSU) election om hi. Tua ah President in Gaikhuanlung Ngaomei (Ph.D Scholar) telching hi a, Vice-President ding in Mancha Haokip, General Secretary Pausuanlian, Jt. Secy. SD Rengwarchung Chiru, Fin. Secy. Saul Maram, Social and Cultural Secy. Searchjoy Khamrang, Games & Sports Secy. L. Lalliammawi Simte, Treasurer dingin Ngaithianmuang leh Information & Public Secretary din John Lewis telching uhi. Telching a omte Oct. 5, 2013 in kichiam ding uhi.

Tamil Nadu CM in pomlou in soisel
Imhal, Oct-1: Zan akipan in petrol man litre 1 ah Rs. 3.05 in kiam a, hileleng diesel man litre khat ah paisa 5 khang hi. Tamil Nadu Chief Minister Jayalalithaa in diesel man khang pomlou hi a genkawm in soisel a, a khangzah a niamkik ding ahi chi’n gen hi. International market ah thautui man akiam banah India sum rupees leng US dollar tawh a kikhiakna tamlam sangin tawmlam nawt ahihman in diesel man pung kichi thil theilou ahi chi’n gen hi.