Catchment Area Plantation & I-Day Eve omding; DC/CCpur in singnou suanna mun ding enkhia
Lamka, Aug-8: Ms Jacintha Lazarus,IAS, DC/CCpur in  tuni zingkal dak 7:00 in Bungmual khawsak a Lanva tuilakna (intake point) kiang a catchment area ah singnou suanna mun ding enkhia hi. Lamka TD block nuai a khaw tuamtuam 32 te’n Lanva naak ah singnou lakh 1 val suanding uh chih thu om a, huaiziakin DC in amun ding tuni’n va enkhia hi.Huai ah  L T Puii MCS, SDO/BDO,CCpur; B Khamsuansiam, SO leh official tuamtuam hnkhop in DC zui uhi.

Thudang kizadan in District Administration  saina in Aug 14, 2013 zing dak 8:00 in Lalpuithluaii Foundation School’s playground ah Langkhanpau Guite, Chairman ADC/CCpur in Lanva Catchment Area Plantation honkhiatna neiding hi. Huaizawh zinglam dak 8:30 in Lanva Catchment Area Plantation tawh kisai Ms Jacintha Lazarus, IAS, DC/CCpur in thugen  ding hi.

Nitak lam dak 5:00 akipan Lamka Public Ground ah Independence Day Eve Celebration om ding a, RAV, Muan Hangzo, Pauginmuan, TT Lal apan lasakna banah  Kaihlam Heloo leh STC/BSF te’n special item tuamtuam lahna om ding hi. Nitak dak 6:30 in Cultural program om ding a, nitak dak 7:00 in Independence Day Theme: Clean & Green CCpur leh fire works in zuiding a, nitak dak 7:30 in DC’s Bungalow ah dinner om ding hi.

MOAP card thak hawmkhe ding
Lamka, Aug-8: Vungzagin Valte, Parliamentary Secretary(Hort SC /CADA) in Aug 10, 2013(Kiginni) zinglam dak 10.00 in New Lamka Dorcas Veng a a tenna inn Niangzen Khualbuk ah Social Welfare deptt tungtawn in 56-Thanlon A/C bialsung a pite/putekte’ Old Age Pension sum muhtheihna dia kibawl Identity card a thakte hawmkhiakna programme om ding hi’n thutut kingah hi.

TWWC pawlin duty kipan uh
Lamka, Aug-8: Tuibuong area ah zu leh khamtheih chituamtuam doudal dingin Tuibuong Peace Ground ah Aug 3, 2013 in Tuibuong Women Welfare Committee (TWWC) kichi kiphutkhia a, tuni apan mun tuamtuam ah nupi pawl  duty uhi. Rebecca ,Secretary TWWC in a gendan in  TWWC kiphutkhiat nungin Tuibuong khawsunga zu leh khamtheih zuaktute kiang  ni 4 sung hun pia in huai sunga zuaknawnlou ding in theisak uh a, ni 4 beizawh  tuni apan khawsung ah duty pan uhi. Aman a genbehna ah numei pawlin khawsung bawl hoihna dinga a panlakna uh thuap din niteng in mi 16 velin thumsak uh hi’n gen hi. Maban a nasep uh kuapeuh in kituahpih a, khamtheih chi tuamtuam doukhawm ding in chial hi.

Zomi Convention meeting
Lamka, Aug-8:The 3rd World Zo People’s Convention kichi Lamka ah October 25 - 27, 2013 sung om ding tawh kisai in Kiginni (Aug 10) zinglam dak 11:00 apanin Nehru Margh a Zomi Council office meeting ding uhi. Huai ah Committee member dinga guang teng telkim dingin Convenor leh Co-Convenor te’n theihsak uhi.

Co-op office tunglam plaster-na kia
Lamka, Aug-8:Tuibuong a District Co-operative office building a Accountant C.Ramzouii room tung plaster-na lianpi zan sunnung dak 2:00 velin kia a, vangphat huaitak in office staff te  room sungah a omlouh laitak uh ahihziak in kuamah deng khalou hi.

S. Kaikhanthang, ARCS i/c DCO in a gen danin office building kibawlna a sawt luattak ziakin building segawp a, mun tamtak khang(crack) hi’n gen hi. Vuahzuak chiang in office staff-te room sungah om ngamlou in office room pawlam ah omzel uh  a,Imphal ah Head office office puahna ding  bangzah veihiam ngenta hi’n gen hi. Tukum in office  repairing adin  Rs 15 lakh proposal bawl mahleh Finance deptt in Rs 9 lakh pia hi’n gen hi.  Aman a genzelna ah Dist Co-op office  kum 2005 velin repairing bawl hi  a, huai nung repaire hinawn lou ahihdan gen hi.

Police Football team adingin trial-cum- selection om ding
Lamka, Aug-8: Manipur Police Sporting Club (MPSC) Football Team a telding a applicant te adin August 16-24, 2013 sung Pangei a om Manipur Police Training Centre (MPTC), a football ground ah Trial-cum- Selection om ding hi. Huai a tel ding in  CCpur dist apan mi 282 in SP’s office tungtawn in application pia uhi.

SSA School ah Uniform hawmkhia

Lamka, Aug-8: New Lamka Khominthang a om SSA Residential School a student te’n  bangtanhiam uniform neilou in school akainung un tuni zinglam dak 11:30 in Kaikhanlian Guite, DI of schools/CCpur leh M. Gouzamang, EM/ADC & Member, SMDC/SSA Residential school in student 250 te lakah  free uniform hawmkhia  uhi. Huai SSA Residentiak  school bel  April 16, 2013 in honkhiat hi a, tunitan in class I akipan class VIII sinsak uh a, student  250 om uhi.

Tamenglong leh CCpur kimawl ding
Lamka, Aug-8: Kammuanlal Simte, MCS, SDO/Tamenglong khakna program tawh kithuah  in Tamenglong Football Gound ah Aug 9, 2013 zinglam dak 11:00 in Dist Sports Assn. Tamenglong leh Dist Sports Assn. CCpur team in  ‘Unity through Sports’ chi thupi anei in Football friendly match kimawl ding uhi. DSA/CCpur-te zing dak 9:00 in CDSA office ah T. Sumlianthang, MDC & President VSAC in flag off ding a, CDSA official 15 leng kuanding uhi.

Tulai in Lamka ah Pateh thang
Lamka, Aug-8:Tulai in mun tuamtuam akipan numei tamtak in sengdim a pateh pua in Lamka khawpi ah pateh(mushroom)  hong zuaksek uh a,tulai  pateh  tamlai ahih ziak mah in bazaar ah leng seng dimdim in pateh kizuak muh ding om zou gige hi.

Zosuan map hongkhia
Aizawl, Aug-8: Zo Re-Unification Organisation (ZORO) in Zosuante’ luahna gam teng chiamtehna (MAP) a bawlthak uh Aizawl a  ZORO office  ah zan in former Underground Welfare Society a General Secretary  Vanlalhruaia  in khuallian a pangkawm in hongkhia hi.

Jamchinlam hizaw
UPSC Civil Service(Prelims) result 2013 a lawching zan issue a kisuahte laka tel puankhiak a om ah lawhchinna ngahte laka Jamchinlian Naulak kichi kha pen Jamchinlam Naulak  chih ding hizaw a, aman tulelin State Bank of India  ah sem hi.

Ni 3 akizom in holiday ding
Lamka, Aug-8: Muslim-te ni poimawh Idul-Fitr (August 9), Second Saturday (August 10) leh Sunday (August 11) ahihziak in Manipur a govt office leh institution teng akizom in ni 3 sung suti(holiday) ding uhi.

&&&&&&&&&&&&&&&&&&&&&&&&&&&&&&&&

IMPHAL NEWS

Governor leh CM akipan message
Imphal, Aug-8 : Muslimte adia  ni poimawh mahmah Id-Ul-Fitr  ahih tawh kiton in Manipur Governor Dr. Ashwani Kumar leh Chief Minister O Ibobi in Manipur mipite deihsakna thuchah(message) puang uhi.Governor in hiai Festival siangthou  kha 1 an-ngawl a om hi a,hiai in Manipur mipite lakah ki-unauna leh ki-itna kipsem sa omsak deihthu puang hi. Chief Minister in a thuchah ah Id-Ul-Fitr bel Ramzan bei tawh kiton a zat zel hi a, hiai in Muslimte tawndan taklang a, huai tungtawn in  Manipur ah kitanauna kiptak a om deihthu puang hi.Assembly  Speaker Th. Lokeshore leh Dy. Speaker Preshow Shimray in leng mipite deihsakna thuchah puang uhi.

Police- te’n Operation sunzom zel
Imphal, Aug-8: Imphal ah Aug 15, 2013 a Independence Day lopna helpawl khenkhat in hihbuai sawm uh hi a theihna om ziakin  Imphal khawpi Security khauh mahmah a, khawpi sung mun tuamtuam ah police leh commando kithuah te’n combing operation neitou zel uhi. Tuni in leng Governor Road lak operation bawl ua, huai ah ginlelhhuai sak ziakin  mi bangzahhiam kaikhawm in suichian uhi.Mun tuamtuam ah leng Police leh Commando pawlin operation bawl  phutphut uhi. Tuni a kaihkhawm  a omte bel matkhiak omlou in khahkhiak vek hi uhi.

Japan huhna tawh school kihong  
Imphal, Aug-8:  New Delhi a Embassy of Japan a Deputy Chief of Mission Yuhisa Kawamura leh Development Consultant , Grant Assistance for Grassroot Project Yoko Konishi in zan in ni 2 sung om ding in Manipur hongpha uhi. Amau tuni’n Chandel vapha in  Japan’s official Development Association fund a Primary School kibawl hongkhia uhi. Chandel district sung  Lambung Primary School bawlna in Japan Rs 64,67,470  seng hi’n kigen hi. Japanese official 2te leh Primcipal Secretary(Commerce & Industries) O. Nabakisore su juny yg a, Manipur Sericulture Project keh Water Supplky scheme tungtang leng genkhawm uhi. vel bei a kibawl Lambung Primary school, Chandel district hongkhia hi.

Model College a upgrade hiding
Imphal, Aug-8 : Education Minister M. Okendro in tuni in Modern College pha in huai Model College  a upgrade hiding in gen hi. Aman huai thu tuni a Golden Jubilee Celebration function hun a agen hi a, kha 3 nungin state government nuai a om college khempeuh in Principal kichiantak nei ding uh hi’n leng gen hi. District khat zel ah Model College khat zel om ding a, tua om lel Modern College-te leng Model College a loih hiding, chi hi.

NHPC in Barak river nuse di’n nawh uh  
Imphal, Aug-8:Manipur Press Club ah tuni’n United NGO Mission Manipur saina in

Tipaimukh Multipurpose Project tawh kisai Consultative meeting om hi. Huai ah Barak river  tunga Tipaimukh dam bawlkhiak deihlou pawlte’n Tipaimukh sub-divn  nuse dingin National Hydro-Electric Power Corporation (NHPC) theisak  uhi. Tuni a ‘1-day Convention’ ah 1500 Mege Watt Tipaimukh multi-purpose  ziaka Forest Advisory Committee (FAC) in singkung tamtak hihsiat dinga thupukna abawl leng mawhpaih uh a, World Commission on Dams, kichi UN declaration zui a  India govt gamtang dingin ngen uhi.   Tipaimukh Dam bawlkhiak  ding Bangladesh in leng lemsakpihlou in kihemkhe zaw dingin  nawh  hi. Tipaimukh project ziakin singkung 7.8 million vel hihsiat hiding in hi.

Army te’n  HNA cadre 3 mankhia  
Imphal, Aug-8: Red Shield Divn nuaia om army te’n Aug 6, 2013 in New Bazar ah Rajdhani Travels akipan in Hmar National Army (HNA) cadre mi 3 leh midang khat leh galvan zuak a kipei mankhia uh chi’n PIB(Defence Wing) thusuakin gen hi. Thusuak in a taklatdan in  matkhiaka omte self styled Major Hminga Hmar @ Thanga (50) of Hmar Veng;  self styled Corporal Lalrinchhana Hmar @ Sam (25) of Molnam village leh self styled Private Lalmalsawm Hmar @ Solomon, (21)  of Khomoi village hi uh a, amaute akipan 9mm pistol leh magazine banah thautang 1 leh mobile handset 3 muhkhiak hi a, a zat uh Maruti van leh Rs. 30,000 leng mukhia in Lamka  Police ah pekhia uh hi’n PIB thusuakin gen hi. Huailou in galvan zuak a kipei John Kipgen of Bhojang village leng Kwakta Bazar  ah August 5 in matkhiak a om hi’n PIB(Defence Wing) thusuak in gen hi. (UNA)

Entrance Examination hun kisuan   
Imphal, Aug-8: Directorate of Health Services leh Directorate of Family Welfare Services, in academic session 2013 akipan Female Health Worker(FHW) training course a tel dingte telkhiakna ding in Aug 11, 2013(Sunday) in entrance examination om ding chih himahleh ahun kisuan a, a ni ding bikhiah om nawn nailou chihthu om hi.

Galvan zuak a kipei 1 mankhia
Imphal, Aug-8 : Red Shield Division te’n August 5, 2013 in Kwakta bazaar ah John Kipgen s/o Mangkhohen Kipgen of Bhojang village, CCput district mankhia uh a,amah thudotna apan a kipuandan in galvan zuak a kipei hidan in theikhia uh a, KNF (P)te tawh kizom uh hidan inleng kipuang hi. Mat  a om John Kipgen bel Bishnupur police ah pekhia uh hidan in PIB (Defence Wing) thusuak in taklang.

Health Minister in Old Age card leh IAY hawmkhia
Lamka, Aug-6: Phungzathang Tonsing, Minister(Health & FW, GAD & CADA) in tuni zinglam in Hebron Veng, New Lamka a a tenna inn ‘Salem House’ ah Manipur Old Age Pension(MOAP) card leh IAY 2013-14 scheme hawmkhia hi. Minister in mi 172 kiang ah Old Age Pension card kibawlthak hawmkhia a, mi 50 kiangah IAYscheme a sum in hawmkhia hi.

Minister in  a genna ah cancer natna leh sin natna telin natna lauhuai kimukhe thak bangzah hiam a om ziakin khangthakte ahunloupi in si uh a, zanzek in UK apan mi hongpaite leh Health official-te tawh amah office a kihoukhawm in tuabang thiltungte genkhawm uh chi hi. India in hibang natnate a ngaihkhawk bangin Manipur in ngaikhawk a, Medical dept in huai dingin  panla touzel chi hi. Damlouh ziakin Delhi ah check-up in kuan a, akimuan mawh sangin  hoihzaw a, a gimselua a damlou hilou hi’n doctor-te’n result a suah in gen uh chi hi. Amah Aug 3(Kiginni) a Imphal hongtung in zan in office kai theita hi’n gen hi.Meitei gam ah taksa upa tam mahleh eilam ah tekkun tan a dam vanglua a, amaute damtheihna ding awlmawhna liantak nei hi’n leng gen hi. India govt.  hoih mahmah a, meithai leh pagong-te adia hamphatna Old Age pension chihte bang a om ziakin vangphat huai ahihdan gen hi.Congress(I) Unit makaite’n list a piak bangbang un Old Age Pension card kibawl ahihman in  tangkha nailou leng om  a,  huaite phun nailou ding leh tunung a tangthei ding uh ahihdan gen  hi.  Huailou in  tuni sunnung  a IAY ngah ding mi 50 kianga sumtang hawmkhiak hunah Minister in atanglou chih om nailou ding hi a gen in, phase dang ah atang dia kilawmte piak hi nawn ding chi hi.

Khupsianvanglian sihna thu ah lungkimlou  
Lamka, Aug-6: Khupsianvanglian (1 yr & 6 months) s/o  P. Semkholal of K. Phaicham, Chiengkonpang damlou(khawsik)  ziakin  Dist. Hospital ah August 4, 2013 zinglam dak 9.00 in  si a, a tapa neihsun tung ua etkolna  lungtun huailou sak ziakin  a innkuante’ khasia uh chihthu om hi. Khupsianvanglian innkuante’n Ccpur dist. hospital’ Children Ward  a thiltung tawh kisai hospital staff-te ngawh uh a, oxygen hoihlouh nunga mundang apan amau mah in a valak uh doctor-te’n ngaihsak pahlou in huaiziaka si hi’n ngawh uhi. Khupsianvanglian in khawsik natna a neih ziaka gim mahmah in Aug 3, 2013 nitaklam in hospital ah admit a om hi’n gen uhi.

Aug 4, 2013 zinglam a oxygen piak ngai dia a om man in hospital staff-te’n piaksawm uh a, himahleh  oxygen a zat theihlouh thak ziakin naupang leng gim hiaihiai in nak haksa a, amah awlmawhtute’n Kuki Khanglai Lawmpi(KKL) office  vadelh in oxygen  vakhel uh a, staff-te’n minute 25 vel huai bulhna dinga hunla in, a zawhtak un zat theihlouh di’n naupang si khinta hi.

Thiltun hunlai  a Children ward a om khat in a genna ah 10vei bang hospital staff-te’ sam mahle uh va enlou uh a, minute 20 nungin va en pan uh a, huainung in amau room a naupang pawlut dingin theisak pan phet hi’n gen hi. Khupsianvanglian bel August 4, 2013 sunnung in Chiengkonpang hanmual ah kivui hi.

Youth Integration Camp tuni’n kipan
Lamka, Aug-6: Youth Affairs & Sports deptt saina in tuni zinglam dak 11:00 in Hiangtam Lamka a Youth Hostel ah ‘Youth Integration Camp- 2013’  kipan a, DC/CCpur  in hongkhe ding chih himahleh Imphal ah meeting a neihziak in hawh theilou a, M.Chandrakumar Singh, Sr Youth Officer, YAS khuallian apang in hong hi. Huai hun ah Guest of Honour in Lalvullien Joute, President, CDSA leh Functional President in Lunkhosei Haokip, DYASO/CCpur pang uhi.

M.Chandrakumar Singh in agenna ah khawvel ah ahoihlam hi’n a hoihlou lam hileleng  kikhekna omzel a, omtou zel ding hi’n gen hi. I gamsung ah khantouhna omna dingin tuailai te’n mawhpuakna liantak nei hi’n gen a,  lemna, muanna leh ki-it tuahna omsem theihna ding in camp a telte leh mipi pangkhawm din chial hi. Lalvullien Joute in a genna ah Intregration Camp kichi poimawh mahmah a, CCpur dist ah nam(tribe) teng tengkhawm hi’n gen hi.CCpur dist  galmuanglou hi’n gen a, lemna leh muanna omna ding banah  nam khat leh khat ki-ittuah semna din tuaila te’n pan lathak ding in ngen hi.

Lunkhosei Haokip in a genna ah i gam uah development omtheihna din  lemna leh muanna poimawh petmah hi’n gen hi.I gam ah zu-le-sa, khamtheih guihtheih tamtak omte leh society kisegawp bawlhoihna dingin tuailaite’n panlak  poimawh  chi hi.

Tuni’n Dr F.Thienkhogin, DACO leh K.Vungzamawi, Associate Professor /CCpur College te’n thupi tuamtuam pansan in sinsak uh a, Aug 7, 2013 in Dr Lalzagou Neihsial, Head of Deptt(Goeg)/CCpur College, LT Puii, MCS, SDO/CCpur leh Soiminthang Doungel, Lecturer Young Pillar College te’n  sinsak ding uh a, Aug 8, 2013 in Youyh Integration Camp zou ding uhi.

Chairman ADC in Delhi ah zin
Lamka, Aug-6: Langkhanpau Guite, Chairman ADC/CCpur in CCpur dist adia  development thu leh District Council tawh kisai in  Delhi a mi poimawh tuamtuam kimuhpih ding in tuni’n  zinkhia a, hong tungkik haklou ding hi’n kigen hi.

Oil Pump ah Petrol deih mitam
Lamka, Aug-6: Bijang a M/s Suakhnun & Son Oil Pump ah zan in Petrol litres 4000 hongtung a, tuni’n mipi lak ah  hawmkhia uh  a, Petrol deih mi tam mahmah hi. 2-wheeler gari ah petrol 5 litres, 3 & 4 wheeler gari ah petrol 10 litres hawmkhia uh a, petrol lading teng in gari RC book tawingai hi. India gamsung pumpi ah petrol leh diesel man a khanziak in petrol 1 litre ah Rs 70.23 in pia uhi.

I-Day Badmintion Match om ding
Lamka, Aug-6: Aug 2, 2013 a DLCC meeting thupukna dungzui in Aug 12-14, 2013 nitak dak 6:00 apan Hiangtam Lamka a Community Hall ah Public Leader-te leh Dist Level Officer te’n Independance Day Badminton Match kimawl ding uhi. I-Day badminton match ah men’s double team 6 leh mix double team 1 tuak telding uh hi’n kigen hi.

Parade ah contingent 505 vel telding
Lamka, Aug-6: August 15, 2013 in Lamka Public Ground a Indian Independence Day lopna ding a Parade a telding contingent  55 in tunitan in ZEO office ah list submit uhi. Parade a teldingte Aug 7, 2013 in DC/CCpur makaih in final selection bawl hiding a, selection a telkhate adin  Aug 12 & 13,2013 zing dak 7:00 in Parade Commander ding JK Suan Guite, MPS, Asst Commandant,1st IRB makaih in Parade Rehearshal nei ding uhi.

HSLC Preparation Course kihong
Lamka, Aug-6: Christopher Coaching Centre saina in CCpur Govt H/S ah tuni zingsang dak 5:30 in Elder L.S Gangte in ‘HSLC Preparation Course 2013-2014’ kichi hongkhia hi. Christopher Coaching Centre saina a HSLC Preparation Course ah HSLC examination a telding kuapeuh teltheih ding hi’n kigen hi.

NYK makaih in singnou suan ding
Lamka, Aug-6: Indian Prime Minister lui (late) Rajiv Gandhi birthday ‘Sadbhavana Diwas’ zatna kawm in  India gam pumpi a NYK omna teng ah Aug 15-20, 2013 sung in “Massive plantation Drive under My Earth My duty campaign” kichi singnou suanna omding hi. Huai hun sung in NYK makaih in singnou  atamtheipen suan hiding hi. NYK/CCpur makaih in affiliated YC/  member ten leng singnou suanding uh a, thuchian kimzaw D.Doungel, Dist Youth Co-ordinator, NYK/CCpur kiang ah kantheih ding hi.

Hunbei nailou cake nek taklou kizuak
Tuni in Lamka a dukan khat ah mi khat in ‘Cream Delite cake’ kichi sang  lei a, asung ah cake nektheihlouh, ap (spoiled) in om hi. Huai cake Rs. 10 man hi a, Manufacturing date 2nd July, 2013 hi a, Expiry date Sept 2013 ahi hi

Manipur Express a semding lakna ding hun bikhiah thakin om
Manipur Express a semding lakna ding in Aug 7, 2013 in Manipur Express office ah efficiency test/interview kipan ding chih himahleh lemtanlouhna dang om ziakin  anuai abang in ahun bikhiah thak hi a,  application pia candidate-te kimtaka tel dingin theihsak hi uhi.

Aug 14,2013(Nilaini)  11:00 am : Night duty-cum-Chowkider

Aug 21,2013(Nilaini) 11:00 am:Helper-cum-Printer(trainee)

Aug 28,2013(Nilaini) 11:00 am:News Editor(trainee)

&&&&&&&&&&&&&&&&&&

IMPHAL NEWS

Student-ten Edn. Minister kikoukhum
Imphal, Aug-6: DM College a Multipurpose Hall ah tuni in DM College Foundation Day 67veina  leh Multipurpose Hall honna kithuah  om a, huai hun ah Joint Committee of DM College Students’ Union pawlin Chief Guest apang Education Minister M.Okendro  kikoukhum in programme subuai uhi. Huchibang thu om phet in Imphal West SP, SDPO Modhunimai leh DSP(CDO) Ibomcha makaih in police te’n hall sung apan in students’ te pikhia uhi. Thusuak in a taklatna ah students pawlin Education Minister in thuchiam a bawlte tangtung saklou chi’n  thangpai hi uhi. Minister in a genna ah Manipur a Education system kha 6 sunga khek lamdang dia a gensa hi a, himahleh deptt tuamtuam in tua dinga panlak poimawh  hidan in gen hi. Aman  tuni a student-te lungkimlouhna tawh kisai September 5, 2013 a genkhawm hiding chi’n gen hi.

SI leh Jemadar lakna result suak
Imphal, Aug-6: Police deptt a Sub-Inspector(SI), Asst Sub-Inspector leh Jemadar lakna dingin written test a lawhchingte adin May 2013 kha in Viva voce/Interview on a, SI leh Jemadar lakna dinga Viva Voce/Interview result puankhiak in om h. Sub Inspector ding mi  285 lak hi uh a, waiting list ah  27  om ua, Jemadar ding mi  59 ching uh a, waiting list ah mi 6 om hi.(Huai a lawhching singtangmite  page 2na a Employment News column ah kisuah hi).

Food Security Bill thu genkhawm
Imphal, Aug-6 : Manipur Pradesh Youth Congress Committee saina in tuni’n Ukhrul Town Hall ah ‘One Day State Level Youth Convention & Discussion on Food Security Bill-2013’  zatna om hi. Hiai hun ah Dy. CM Gaikhangam khuallian in pang a,  Rajeev Shatav- President, IYC; Preshaw Shimray- Deputy Speaker; Victor Keishing- Parliamentary Secretary (Horticulture & IT) &Gen Secretary,MPCC (i/c Youth); Md. Amin Shah- Parliamentary Secretary (MOBC, Sc. & Tech.) &  Secretary,MPCC;  Dr. Ng. Bijoy Singh- MLA, Khurai A/C & former Director, RIMS, former VC, MU; , Smt. Deepika Pandey- IYC Secretary in Charge, Manipur State; Alfred Kanngam- PCC Member, Ukhrul A/C; P. Shashikanta Singh- Secretary, Youth in Charge, MPCC leh Md. Amir Hussain- President, MPYCC te Guests of Honour leh Functional Presidents in pang uhi. Huai hun zatna ah MPs, MLAs, PCC  Members leh  President DCC/BCC te tel uhi.

State Govt. a khut a om din phallou
Imphal, Aug-6 : Heritage Council Manipur (HERICOUN) pawl in thupuan a bawlna uah Manipur govt in Palace compound a khutnuai a koih a sawm uh phallouh thu puang uhi.

Huai tawh kisai in tuni in press-te kimuhpih ua, tua ah Vice-President L. Ratan in, Arts & Culture department a Dy. Secretary in thusuah a bawldan in Palace compound ah kum 20/50 sung Manipur Lengpa om thei ding a, huai nung State government khut a om ding hidan a thusuah a bawl  pomtheih hilou, chi hi. Huai pen Manipur history nuaisiahna hidan in gen a, State government nuai ah Palace Compound  om theilou ding hidan in gen hi.

68th Hiroshima Day zang uh
Imphal, Aug-6 :  Indo-Japan Friendship Association, Manipur te saina tuni in Manipur Press Club ah ‘68th Hiroshima Day, 2013’ zatna om hi. Hiai hun ah M. Prithiviraj Singh, Parliamentary Secretary(YAS) ; W. Bhumeswar Singh, President Indo-Japan Friendship Association; A. Nimai Sharma, Chairperson Imphal Municipal Council leh  Ms. Aimu Murakami from Yamagata, Japan te Chief Guest, Functional President leh Guests of Honour in pang uhi. Huai hun ah  Japan a Hiroshima leh Nagashaki ah Atom bomb khiaklai a site suunna minute 2 neiu hi.

Bomb paihkhum ziakin kiphinna om
Imphal, Aug-6 : Agriculture deptt  nuaia sem Field Assistant Pebam Sarat Singh of Khagempali Moirang Purel inn ah meltheihlouhte’n bomb ah paih uh  puakzak a, huai ah azi leh a tanu  liam uhi. Tua banah Agri. a Dy. Director Ph Rajendra Singh of Soibam Leikai inn ah July 25, 2013 in  meltheihlouhten bomb ava paih uh tawh kisai in tuni in Agriculture department a semte’n lungkimlouh taklatna in Sanjenthong mun ah sit in protest nei uhi. Huai hun ah Director of Agri  Samu Kabui in hibang thil  naktak a mawhpaih ahihdan gen in tunung a hibang thil om nawnlou dingin ngen hi.

NPO in 2011 Census etkik deih
Imphal, Aug-6 : Senapati District HQ ah tuni in Naga Peoples Organization (NPO) ten meeting nei uh a, huai ah Senapati District sung a kum  2011 a Census om  enthak dingin State sovernment ah ngen uhi. Huai hun in kum 2001 leh 2011 Census tawh kisai nounel tak in genkhawm uha, Senapati district ah mihing naktakin kiam a, huaiziakin, hiai census pen et thak ahih kei aleh kiphinna nasatak in zui ding hidan in gen uhi. Hiai hun ah NPO, Census Committee Senapati, ex-MLA Henry Paote leh civil society tuamtuam a makaite tel uhi.

Civil Service (Prelims) result zopna
UPSC saina a  Civil Services (Prelim) Exam 2013 result zanhal issue  ah  theih masakte kisuah a, tu’n theihchet thakte anuai abang ahi uhi.

1. Vungngaihlian
2. Glory Singsit
3. Joel Haokip
4. S Benjamin Vaiphei
5. Samuel S. Vaiphei
6. Salvador Baite
7. Kamlalbel Neitham
8. N. Shohkhongam Baite
9. Satlianjoy Neitham
10. Letkholun Suantak.
11. William Serto
12. Esther Laltankim
13. Michael Fimliensang
14. Fimsanglien Tuollai
15. Isaac Zodinsang
16. John Buhril
17. Jacob Buhril
18. Zosanglur Zote
19. Lalringum Pulamte..
20. Teresa Hoihniang
21. Thangchinlian Ngaihte
22. Priscilla Tuboi
23. Mangminlian Vaiphei
24. Phaltual L Vaiphei

Re-allocation of Works/Transfer and posting
1.Ramnganing Muivah,IAS, Pincipal Secretary(Works,Relief  & Disaster Management) as Principal Secretary(Works).
2.Dr Suhel Akhtar,IAS, Principal Secretary(Health & FW) as Principal Secretary(Health &
FW, Relief & Disaster Management).
3.Letkhogin Haokip,IAS, Commissioner(IPR, Transport) as Commissioner(IPR).
4.Lakshmi Kumar Singh,IAS, Director(Institutional Finance) & Manading Director,MSCB as Special Secretary(Transport).
5.Sudhan R,IAS, DC/Ukhrul as Joint Secretary(Power), Director(Vigilance) & Project Director/MACS in addition.
6.Shailesh Kumar Chourasia,IAS, Joint Secretary(Home), Director(Vigilance) & Project Director,MACS in addition as DC/Ukhrul.
7.Dr Harmit Singh Pahuja,MCS, Dy Secretary(Education-S) as Director(Institutional Finance), Managing Director,MSCB & Dy Secretary(Education-) in addition.