Hmar veng ah khamtheih hunkhop haltum uh
Bijang, Hmar Veng banah Tuibuong in khamtheih doudal pan uh
Lamka, Aug-4:Khamtheih in khawtang hinkhua a hihsiat banah tuailai tamtak in ahunlou in sihlawh uh a, khangthakte siatna apan humbit tupna June 10, 2013 in Bijang Women Welfare Association(BWWA) kiphutkhia uh a, Bijang area a khamtheih zuakte hihbei sawm a pan alak uh lawhching in tuni chiangin huai kimah khamtheih hih leh azuakte a husa uh dai mahmahta hi’n kigen hi.Huchi’n July14, 2013 in Hmarveng Welfare Defence Committee pawlin Women’s Wing phutkhia in huaite’n leng nasatakin khamtheih doudal uhi. Bijang leh Hmar Veng ah khamtheih doudalna lawhching touzel a, huchih lai in zan in Tuibuong a Peace Grund ah Women Welfare Association phutkhia uh a, Khaikhenthang, Chairman, Tuibuang Church Leaders Fellowship in Pathian kiangah thumna in lan hi. Women Welfare Assn, Tuibuong in amau area a khamtheih hih leh zuakte adi’n August 7, 2013 tan huntawp pia uh a, Aug 8, 2013 akipan Tuibuong leh a kimlaka khamtheih zuak leh hihte khauhtakin action lakkhum hidin puang uhi.
Hibang kalah Hmar Veng Women’s Wing pawlin kal beisa sunga khamtheih chi tuamtuam a matkhiakte uh tuni sunnung in Hmar Veng Community Hall ah mipi muh in haltum uhi.Huai khamtheihte pawlam akipan Hmar veng a lut ding a matkhiak uh hi a, heroin(No. 4) gram 40 leh zu tamtak hi’n kigen hi.Committee member khat in a gendan in
Hmar Veng ah community tuamtuam 10 tengkhawm mahle uh khamtheih doudalna lam ah kituak mahmah uh a, tuni tanpha hun bikhiah omlou in sun-le-zan duty uh a, khamtheih hihte leh a zuaktute kiam in khawsung leng nop deuhta hi’n gen hi.
Bijang leh Hmar Veng ah khamtheih doudalna a panlakna a lawhchin ziakin tulai in khamtheih hihte New Bazar area ah kinawntou uh hi’n mit a mute’n gen uhi.
Naupang 3 tui ah kelum
Lamka, Aug-4: Lammuansang (9) s/o Lamthianmang of Lingsiphai a pute khua Chongkhozou(Chiangpi) azin tuni in h Tuili-lui a kisil akuan tuahsia in kelum a, aluang Lamka a hong kipua in August 5, 2013 in Lingsiphai ah kivui ding hi. Thangminsei (13) s/o Limngam of B. Phaicham(near Tuibuong) zan zinglam dak 10 vel apan inn apan potkhia tuni sunnung dak 1.00 in sisa in Tuitha-lui tunga kilam mukhia uhi. Apa Limngam in Police ah report bawl a, mun tuamtuam zong mahle uh mukhe pahlou uhi. Sunnung dak 1.00 velin nupi khat in Zion Veng kianga Tuitha leibul ah tuitung a kilam(float) lai mu a, huainung in phatuam ngaite’n panla uh a, tui liauthei mi 2 valut uh a,Thangtinlen of Zion Veng in siluang la khethei hi. Thangminsei puansilhte Zoveng kianga Tuithalui ah kimu a, huaimun a tuiliau lai tuahsiat ziaka tui in tuahsuk hidingin gingta uhi. Tuni in B. Phaicham hanmual ah kivui hi.
Huailou in Manisha (9) d/o Vinod Shah & Ms. Mini of Muzaffarpur, Bihar, tulel a New Bazar Bus station a singpi hotel bawl tuni nitaklam dak 4.00 velin Rengkai a Tuithalui a kia in si hi. Lawmta mi 4 kisil dia kuan amah tuahsia hi’n kigen hi. Buaipihtu ding kichiantak omlouh ziakin YPA Central Lamka Unit leh C.T. Lian leh alawm te’n siluang enkai uh a, siluang halna ding Tyre leng pia ua, Ms. Chingnuam in a kihalna ding sing(firewood) thawh hi. Robert Gangte of D. Phailien in siluang kihalna ding mun tan pua in Zenhang Lamka a Tuithalui ah tuni mah in a innkuante’n hal uhi.
Nute’ adia hun sehtuam zatna om
Lamka, Aug-4: Lamka khua a biakinn tamtak ah tuni in Nute’ Ni(Mothers’ Day) kizang a, saptuam khenkhat in ‘Dorcas Day’ minvuah in zang uhi.Thugentu tamtak in innsung banah tate kepna leh etkolna ah nute poimawhna leh phattuamna gen vuallouh a poimawh hi’n gen uhi.
Traffic rule bawhsia 44 mankhia
Lamka, Aug-4: Traffic rule enzui kawma duty Traffic Police te’n nipikal 3 sungin mi 44 mankhia in liausak uh a, TR receipt cut zel uhi. Tukal sungin khawpi sungah gari taivelte parking diklou, ahihkeileh traffic rule zuilou mi 16 mankhia uh a, kal masa ni 6 sungin mi 16 matkhiak hi uh a, huaima nipikal khat sungin mi 12 matkhiak hi uhi.
Peace Ground ah ‘Summer Mela”
Lamka, Aug-4:KSO/CCpur district makaite’n Meni Ananda Mela tawh pangkhawm in Aug 5, 2013 akipan in Tuibuong a Peace Ground ah ‘Peace and Harmony’chih thupi a zangin ni 30 sung ‘Summer Mela’ sai ding uh chihthu om hi. Huai Mela ah kuapeuh zalentak a tel thei ding in theisak uh a, hileleng buaina bawlsawm a om leh khauhtaka thunun hiding chi’n gen uh.
Diesel-Auto tailai apan kia in liam
Lamka, Aug-4:Lunneu (4) s/o Paukam of Koite tuni zinglam dak 9.00 in Diesel-Auto a tuanglai New Bazar ah auto apan kia in amai leh amuk lak liam a, Dist. Hospital puaktung hi a, doctor te’n admit uhi.
‘Kei adin’ chih Music Video hon hiding
Lamka, Aug-4: Music Video Album thak ‘Kei a Di’n’ kichi August 7, 2013 in IB Road a Synod Hall ah Michael Ginzasuan, D.S.O(CAF & PD) i Chief Guest a pang in hongkhe ding hi. Huai ah Functional President in T. Lala Vaiphei, Special Contractor pang ding a, Guest of Honour in H. Samson, Mahajon leh Special Guest in mi tuamtuam 10 pang ding uhi.
YPA Gen HQ in a thupuan enzui
Lamka, Aug-4: YPA Gen HQ in Lamka khawpi leh akim lak ah khawtang siatna doudal dingin Block leh Unit tuamtuam in amau bial chiat enzui dingin thupia uh a, huchih dungzui in YPA Pearsonmun Unit in tuni nitak akipan khawsung tawn a pai dingte’ kiangah theihsakna bawl uhi. Huai dungzui in nitak dak 6.00 akipan zinglam dak 4.00 kikal curfew omsa tuni nitak apan khauhsak uh a, khawsung tawn a gari taite’ omdan siam dinga theisak in, mipi patausakte’ tungah action khauhtak lak hiding chi uhi. Numei-pasal kala thangtatna leh zu dawnkhawm phallou uh a, khawsung tawn a pai peuhmah khamtheih-zu puaklut phallou in, gari lian leh neu hattai louh ding, kumchinglou leh kham neikawm a gari heklouh ding chih thupuan bawl uh a, khawsung tawnte enkai gige ding uh chi’n gen uhi.
Paite.org Outdoor Photoshoot
Lamka, Aug-4: Pearsonmun khawsak ah tuni zinglam in Paite.org in Outdoor Photoshoot nei uh a, huai ah tuailai bangzah hiam traditional dress tuamtuam a kichei in, lemlak hi uh a, tunung in www.paite.org ah khahkhiak hiding hi.
SUUNNA:
Khupsianvanglian (1yr & 6 months) s/o P. Semkholal of K. Phaicham, Chiengkawnpang, tuni zinglam dak 9.00 in District Hospital ah khawsik in si a, tuni mah in a innmun uah kivui hi.
&&&&&&&&&&&&&&&&&&&&&&&&&&&&
IMPHAL NEWS :
IFCD official-te khahkhiak hi uh
Imphal, Aug-4 : Thangmeiband Lilashing Khongnangkhong mun ah Aug 1, 2013 in meltheihlouh galvantawite’n IFCD official-te tela mi 7 a pimangte uh tuni zinglam in khahkhiak in om uhi. Mi 7te bel N. Karunacharya, Supdt Engineer; N. Surchandra Singh,EE; L. Sharatchandra, driver; L. Ibobi Singh, driver; Kolkata apan hongzin M/s RM Sinha & Company akipan Abhijit Sinha (53) leh Debjit Sinha (25) banah Sanayaima Sharma,contractor hi uhi. Amau zanhal masa in Dolaithabi Multipurpose Project mun enkhia Imphal zuan a kiklam meltheihlouhten a pimang uh ahi hi.
Bomb puak ah army 1 liam
Imphal, Aug-4 : Chandel district sunga Khengjang mun ah tuni zinglam dak 9:00 velin helpawlte koih hidinga gintak bomb hattak khat puakzak a, huai kiangnai a pai 6th Dogra Regiment personnel khat liam hi. Huai bomb puah hun in 6th Dogra Regiment te huai mun lakah khe a patrolling a pailai tak uh hi’n kigen hi.
BPL card holder 29 paihkhiak in om
Imphal, Aug-4 : Lamshang A/C a Mayanglangjing Taning Ward No. 6 a om BPL card nei mi 29te amau theihlouh kala paikhiak in om uhi. Huai tawh kisai in tuni’n Manipur Press Club ah BPL card holders-te’n press-te kimuhpih uh a, nidang in BPL Card tungtawn a antang a muh gige uh tutunga mu nawnlou banah piak hinawnlou uh hidan in gen uhi. Thingom Ongbi Purnimashi in a gendan in tunai zekin a BPL card renew thak a, himahleh antang la dinga ava kuan leh agent te’n amin om nawnlou ahihdan gen in pe nuamlou uh, chi hi. Huai tawh kisai in Ongbi Purnimashi in agent Wanglemban Mangibabu tunga action la dingin DC/Imphal West ah ngetna pia hi. Tua banah akisaipih thuneite’n leng thil omdan suizui a felsak dingin ngetna nei hi. Tuni a press-te akimuhpihna uah BPL card holder min paihkhiakte telkim uhi.
Numei khat mei a hal in om
Imphal, Aug-4 :Bishnupur district sung Kwakta Terakhong mun ah Aug. 1 nitak in Shakila leh a pasal Fakaruddin @ Boypu kina uh a, a pasal in azi Shakila mei in hal hi. Shakila a taksa 95% vel mei a kang gawp in Imphal a RIMS hospital tut in om hi. Thiltung tawh kisai a innkuanten kuamah kiangah genlou uh a, police ah leng complaint bawllou uhi. Himahleh Shakila dinmun lauthawnghuai a a om takin theihkhiak in om hi. Thiltun nitak in Shakila pasal zukham hi’n kigen hi.
Bazar vendors te’n sit in protest nei
Imphal, Aug-4 :Manipur govt in Singjamei Bazar apan Singjamei lei (bridge) kikal approach road bawl a sawm ziakin Singjamei Bazar a lampi kianga tu vanzuakte lungkimlou in tuni in Singjamei bazaar ah sit in protest tu uhi. Phijonpham Dukan Apunba Lup(PDAL) pawl in kum 40 huai mun ah nekzong a om hi uh a, hibang thu om mahleh a omna ding mun uh govt in pelou a, tua ziakin mundang omna ding neilou uh hi’n gen uhi. Huai tawh kisai in govt in mundang a omna ding uh peding in PDAL pawl in ngen uha, CM kiangah leng memorandum pia uhi.
Block Level Meeting om
Imphal, Aug-4 : Thangmeiband Block Congress Committee (TBCC) leh Manipur Pradesh Congress Committee (MPCC) te saina in tuni in Thangmeiband Hijam Leikai a MPCC Secretary Jyotin Waikhom tenna ah Block Level Meeting om hi. Hiai hun ah Chief Guest in Dy. CM Gaikhangam pang a, Guest of Honour in Jyotin Waikhom leh Functional President in TBCC President Thangjam Ibotombi Singh pang hi
16th Manipur Integrity Day zatna om
Imphal, Aug-4 : All Manipur United Clubs’ Orgn(AMUCO) te makaihna in tuni’n Yaiskul Police Lane a MDU Hall ah 16th Manipur Intergity Day zatna om hi. Huai ah AMUCO makaite banah social leader tamtak tel uh a, Polo Ground a Integrity Pillar ah Manipur kekzak ding deihlouh ziaka site theihgigena dia kibawl munah pak pia uhi.
UCM President in a gendan in India government in divide & rule policy zang den uh a, inter-state boundary tawh kisai buaina om chiangin international boundary thu kigen zel a, huaiziakin, state government leh centre in akinlam a Manipur gamgi tawh kisai a sukfel deihthu gen hi. Huai hun ah Dr. Dhanabir Laishram in leng thugen hi.
Astrorurf ground ah Public gallery
Imphal, Aug-4 : Imphal East a Lairikyengbam Leikai a Astroturf Football Ground ah public gallery bawl hiding in chi’n Kh. Joykishan,MLA in gen hi. Huai tawh kisai Joykishan in a gendan in 13th Finance Commission nuai ah mi 7,500 tut theihna ding Gallery bawl hiding a, sum Rs. 16.12 crore bei ding hi’n gen hi. Huai Public gallery bel Manipur Development Society (MDS)ten abawl ding uh hi’n kigen hi.