Vengnuom Community Hall ah Biometric Awareness campaign
Lamka, June-8: 59-Saikot A/C te’ading in tuni zinglam dak 10:30 in B.Vengnuom Community Hall ah Biometric Awareness Campaign om a,TN Hoakip,ex-Minister& MLA(Saikot A/C) khuallian apang in hong hi. Huai Awareness campaign ah Maniram Sharma, IAS i/c DC; S.Kamsuanlun,EM/ADC; Hriala, MDC; Nehthang Mate, MDC; Khaipao Haokip, MDC; Ngamhao Touthang ,MDC leh LT Puii, SDO/CCpur te’n thugen uh a, 59-Saikot A/C a Village Authority makai tuamtuam ban ah mipi hunkhop kikhawm uhi.

TN Haokip in agenna ah Biometric photo kilaknung multi-identity card 1 a kigawm vekding hi’n gen a, tuhun a lak ahih kei leh tunung saupi poi ban ding hi’n gen hi. Adiak in India gamsung ah NE state-te gamkhangtou lou ahihziak in thilhoih omte laklut haksa hi’n gen a, state dang ah Biometric photo kila dingte’n vanaih thawh a, eilam ah bel akila ding leng kize awl sak hi’n gen hi. Doctor-te siam mahmah uh a, himaleh mit leh fringer print khektheilou uh hi’n gen hi. National Populaltion Census a tellou kum 5 tunglam teng akintheipen a Biometric photo kila dingin ngen hi. Aman agenbehna ah India gamsung pumpi ah tunung sawtlou in AADHAR No. neiloute India khua-le-tui hilou a kichih hun om ding a, huai neiloute’n bank account tanpha hon theihlouh hun hongtung ding chi’n gen hi. Biometric photo limlakna kum 2009 census dungzuia kibawl ahihman in huai hunlai a census a telkha nailoute’ list SDO, MDC te kiang ah pelut ding in theisak hi. Mundang adiak in state dang a omte leng kha 6 sung a omnak uleh a omna mun uah Biometric photo kila thei hi’n gen hi.
Kamsunlun in a genna ah Biometric photo kichi setan No.666 tawh i mekmat uh a, huai sang in van-gam kailouh ding lauthawng zaw leng hoihzaw ding chi’n gen hi. Biometric photo kilaloute’n AADHAR No. neilou ding a, MGNREGS nei theilou ding chihthu om hileh mi tamtak buai ding ahihziak in kuapeuh Biometric photo kilanailoute kila chiat ding in chial hi.

Naupang te’n Biakinn hihbuah
Lamka, June-8: Ngathal a Presbyterian biakinn leh a geizeka Sunday School om tuni sunnung dak 1:00 vel in pasal naupang kum 8 nuailam ding 3 leh numei naupang 1 in hihbuah uhi. Thu kizadan in Saptuam in tuni’n antangkham kaikawm uh a, huai ziak in KIginni y tengin biakinn, Sunday School leh biakinn gate kikalh lou a, huai lemchang a la in, Biakinn leh Sunday School sung ah naupangte’ lut hi’n kigen hi.

Biakinn geizek a om naupang 2 in biakinn sung ah thawmging zak ziak un enkhia uh a, biakinn sung ah pasal naupang 3 leh numei naupang 1 mu uh a, amau leng khaw mite sam pah uhi. Huchih sungin naupangte biakinn sung apan kihemkhe man uh hi’n kigen hi. Naupang honte’n biakinn sungah lehkha poimawh bangzah hiam bawtsia in thanghuai tak in koih uh a, Sunday School hall sung ah Sound box 3 hihsia in steel almirah sunga Saptuam document poimawh omte leng bawtse vek uh a, saptuam in gas stove akoih uh zang in singpi leng awm in a vanzatte uh thanghuai takin taisan uhi. Saptuam mipi’n naupangte sulnung suizui uh a, Ngathal hanmual ah saptuam labu 1 ban ah soundbox speaker 1 mukhia in ami te ahihleh mukhe zoulou uhi.

Presbyterian Church, Ngathal a local Secy in thiltung mawhpaihthu puang a, CCpur dist sung adia biakinn leh sunday school hibang a thanghuai taka kikhoih amasapen hidin gen a, saptuam dangte leh mipi’ panghuan a, Pathian biakinn hihbuahte mankhe ding in chial hi.

Sangaikot biala Class X & XII zoute kipahpihna
Lamka, June-8: Singngat A/C huamsung Sangaikot bial ah tukum a class-X leh XII examna a lawhching mi 140 val om uh a,huaite KSO/Sangaikot in tuni zinglam in Sangaikot Community Hall ah kipahpihna hun zatpih uhi. Huai ah Class X leh XII a top 10 chiang kipahman piak hi uh a, Class-X ah Lhunminthang Baite in 82% mu in topper in pang a, Class-XII ah Tingneingaih Haokip in 78.4% mu in sangpen hi. Chief Guest ding Ginsuanhau MLA foreign a zinlai ahihman in amah sik in Tongkhokai Baite, MDC/Sangaikot pang a, Functional President in Sasang Vaiphei, Gen. Secy, KSO/Gen HQ pang hi.

Chief Guest in a genna ah Pathian in thil omlou omsak thei a, a omsa leng omlou sak thei ahihmanin sinlai naupangte’n Pathian phawk a, Bible mah laisim madeuh a sim masa zel dingin hasuan hi. Tulai technology sangtak lakah mobile leh internet zat ziakin thilhoihlou tampi muhtheih ding om hi’n gen a, adiakin student-te’n facebook zongsat ziakin laisim naktaka niamkiak uh hi’n gen hi. Technology zongsat ziakin nu-le-pa leh innsung mite tawh hun zatkhawmna ding leng neilou khop a pumbuai theih ahi chi hi. Sangaikot mipite’n IAS, MCS leh officer tuamtuam alop theih hun ngaklah huai mahmah chi hi.

Rev. Langkhanlal, DS/MELC in student lawhchingte a thumsak zawh in hasotna thugen hi. Laisimte’n Pathian kiangah pilna leh theihsiamna ngen leng i taksapte thei pa’n hong pe mahmah ding chi hi. Agenzelna ah thumna kia hunlou in hahpanna poimawh a, maban ah thanuam taka i sim leh lawhching ding ihi chi hi. KSO/Sangaikot in huaibial a lawhchingte kipahpihna a neih uh a 10veina hita a, tuni’n KSO Gen HQ leh KSO Ccpur makaite banah mi poimawh tuamtuam in uap uhi.

Free Diabetic Detection Camp
Lamka, June-8: Chinlunthang, Advocate-cum-Social Worker leh Dr Ginzaniang saina in tuni zinglam dak 11:00 in Zouveng ah ‘Free Diabetes Detection Camp’ om a, huai ah mi 200 in sisan test uhi. Huai ah mi bangzahhiam Diabetes vei ahihlam uh mukhia uh a, USV Company apan huhna tungtawn in ‘Free Diabetes Detection Camp’ kibawl hi’n kigen hi.

World Environment Day
Lamka, June-8: M.Lhahvom khua a JB School ah tuni zinglam dak 10:00 in “Think it Save” chih thupi azang in World Environment zatna banah painting, drawing competition leh singnou suanna om hi. Huai ah Guest of Honour in Semkhomang, Chief of M.Lhahvom leh Functional President in T.Lalboi, DSSS pang uhi. S.Pauminthang, Project Manager, DRDA in Seminar hun ah sinsak a, program zawh in singnou hunkhop suan (planted) uhi.

KZP Gen HQ in lawhchingte kipahpih
Lamka, June-8: Khangthah Zuun Pawl(KZP) Gen HQ saina in tuni in Simveng a SYO Hall ah BSEM nuaia class X & COHSEM nuaia Class XII ban ah CBSE nuai a Class X & XII pass-te kipahpihna leh Career Awareness kithuah nei uhi. Tukum in h BSEM leh CBSE nuai ah class X 44 ban ah CoHSEM leh CBSE nuai ah class XII examination 2013 ah mi 26 pass uh a, amaute’ Rev S.Kaikhanmang, Executive Secy NTBC in Pathian kiangah thumsak hi. Career Awareness hun ah B.Dongzalian, President STC GHQ; L.Dongchinthang, President SYO GHQ; T.Kammuanlal Simte, SDO/Tamenglong leh H.Jamkhanpau, MDC te’n thupi tuamtuam pansan in sinsak uhi. B.Dongzalian Simte, PresidentSTC GHQ in apa’ theigigena dingin class X a Sc topper adin B .Vumgzagin Simte Memorial Award bawlkhia a, huai award Ruthi Lalneivar d/o (late) N.Jamkholal Simte of Hmar Veng (Young Leaners’ School) kiang ah Rs 5000 leh memonto tawh kithuah piak in om hi.

CIPET form laktheih lai
Central Institute of Plastics Engineering & Technology(CIPET), Industrial Estate, Takyelpat,Imphal ah Diploma, Post Diploma, Post Graduate Diploma course tuamtuam zilnuamte ading in June 10, 2013 tan application form laktheih himahleh June 17, 2013 tan ahun behlap hi a, Manipur Express office ah manbei in form laktheih lai ding hi. Hileleng a submit hun bel June 17, 2013 tan bikhiah hi a,Imphal phak lemtangloute adin Manipur Express office mah ah June 17, 2013 in submit theih ding hi.

Lamka leh Sugnu kikawmna nawngkai
Lamka, June-8: Lamka apan gamlalou Saikot leh Sugnu kikal lampi se mahmah a, lampi lai a hawktui vungdim in gari adingin nawngkaina liantak tun a, mihing pai theihna vual hilou chihthu kiza hi. Thutut kingahdanin huaibial ah mi tamtak khawsa in Lamka akipan nekding lalut uh a, nitengin Lamka leh Sangaikot banah Sugnu area ah kileh in zinzel uh a, lampi hoihtak poimawh petmah chi’n huailam mite apan thutut kingah hi.

Elmun Council in kipahpihna nei
Lamka, June-8: Elmun Council, CCpur te’n tuni in IB Road a Synod Hall ah Elmun Council nuai a class X & XII pass-te kipahpihna hun zatpih luh a, Demmang Haokip, Vice Chairman ADC khuallian in pang hi. Functional President in Lienzakai Sitlhou, 21-BSF leh Guest of Honour in Lienkhopau Singson pang uhi. Class X pass student 37te kipahpihna in Memento 1 chiat pia uh a, Pastor Lamkhosei, ECA Bijang in amaute thumsak hi. Class XII pass student 34te kiangah kipah etsakna in Memento 1 chiat pia uh a, Rev ST Jamkhanthang, EBC New Lamka in Pathian kiangah thumsak hi. Khualliante apan leh mi tuamtuam apan thugenna om a, kipolhlimna ban ah lasiam tuamtuam apan lasak ngaikhia uhi.

IMPHAL NEWS
CLP meeting om ding
Imphal, June-8: Chief Minister O. Ibobi makain in June 9, 2013 nitaklam dak 3:30 in CM Secretariat ah Congress Legislature Party(CLP) meeting om ding hi’n kigen hi. Huai ah June 10, 2013 a kipan July 1, 2013 tan Assembly monsoon session om ding tawh kisai genkhawm ding uh hi’n kigen hi.

ADC te’n kiphinna sunzom maithei
Imphal, June-8: Autonomous District Council Co-ordination Committee apaisa Sept 29, 2013 a kibawlkhia a makaite’n tuni’n Manipur Press Club ah Press conference sam uhi. Huai ah Committee a Secretary Hemjathang Khongsai in a gendan in Council election om zawh kum 3 ching mahleh ADC member-te tuni power piak ahih tuanlouh uh poisakthu gen a, huai thu ah Governor leh Chief Minister O. Ibobi kiang ah memorandum bangzah vei hiam piak ahihdan leng gen hi. District Council 6 akipan member 26 chiat kigawmkhawm ADC member 156 in govt apan nasepkhiak a om kei leh kiphinna panthak nawn ding a masa ahihdan uh gen a, June 10, 2013 a monsoon Assembly session ah hiai thu puaklut ding in ngetna bawl uh a, Executive power neilou ADC member hih ng bangmah phatuamlou ahihdan leng taklang uhi.
Mipite’n nekgukna khek thei – Rishang Keishing
Imphal, June-8:Manipur ah bitna leh muanna omna dingin tuni’n MBC Church ah “Love Manipur” chih thupi zang in mipi thumkhawmna om a, huai ah Reshang Keishing, MP in Manipur a nekguk-takgukna omte mipi’ panlakna a khek in khantouhna thupitak tun ding hi’n gen a, singtanggam leh phaijang govt in a khentuamlouh ding in gen a, helpawlte ziak a khantouhna ding nasep tamtak dal a om in, amaute ziaka khantouhna ding nasep nawngkai hi’n gen hi. Huai hun ah Deputy CM Gaikhangam leh Pastor/Reverend tamtak tel uh hi’n kigen hi.

M/R rifleman thau tawh taikhia
Imphal, June-8:Tamenglong district a Chingphutung villlage a om Railway Tunnel 40 bawlna a security a om 5- Manipur Rifles rifleman khat zan nitak in AK rifles 1, Insas rfles 1 leh SLR 2 banah thautang hunkhop tawh taikhia hi’n kigen hi.Thusuak in a gendan in Jamkholal Lupho (Rfn. No. 022006178) of Maphou Kuki Village(Saikul sub-division) zan nitak a duty hi a, zingsang baihtak dak 2 leh dak 3:00 kikal a taikhia hiding a gintak ahi hi. Thudang kizadan in amah a galvan tawikhiakte tawh UTLA pawlte laka om hidinga gintak thu kigen hi.

Mat a om ILP activist-te kikhah
Imphal, June-8: Manipur ah Inner Line Permit (ILP) zat ding phutna in June 1-5, 2013 sung kiphinna nei Joint Committee on Inner Line Permit System (JCILP) pawla student wing te’n Dimapur apan Imphal zuan non-Manipuri mi bangzahhiamte’ a sawlkik ziakun zan in police te’n ILP activist mi 28 mankhia uh a, huaite tuni’n Porompat a SDM Court ah peace bond suai kaihsak nungin khahkhiak hi uhi. SDM court ah JCILP volunteer mi 9 ten’ peace bond suaikaih zawh in volunteer dang teng Keishampat Leimajam Leikai a Judicial Magistrate quarter ah peace bond a suaikaih zawh in khahkiak hi uhi. JCILP student wing convenor Angamba in media te kiang a gendan in JCILP kiphinna ah non-Manipuri mi bangzahhiam sawlkik ahihziak in lawhching mahmah a, mipite’ deihtelna govt. in a theih siamlouh poi pet mah a, Chief Minister in leng a genna ah Arunachal Pradesh, Mizoram leh Nagaland ah ILP zat in om a, maban a Assembly session hun ah hiaithu puaklut ding a deihthu leng gen hi.

Assembly building-lui kembit deih
Imphal, June-8: MPP adviser banah ex-MLA O. Joy in Assembly building lui pen thildang bangmah a zanglou in “Political Building” chih minvuah a kembit ding in Manipur govt ah ngetna bawl hi.Huai tawh kisai in tuni’n Manipur Governor Gurbachan Jagat kiang ah ngetna lehkha piaka om hi’n gen hi. Assembly building luipen thil dang a zat dia kilawmlou hi’n leng O. Joy in gen a, Cabinet meeting ah state govt. in department khenkhat ading banah office ding a zat awm chihthu deih huailou petmah hi’n gen a, Manipur Legislative Assembly leng huai building tungtawn in July 1, 1963 a kipankhia hi’n gen hi.

MBBS exam cancel a om hilh chian ding in phut
Imphal, June-8: Manipur Students’ Federation (MSF) te’n tuni’n Keishampat Sega road a a office uah Press Conference sam uh a, huai ah MSF Gen. Secy. RN Koireng in June 9, 2013 a MBBS/BDS entrance examination om ding bangziaka exam hun ding ni 2 ma a cancelled hi hiam chih Medical Directorate in hilhchian phut ahihdan taklang hi. State dangte’ ah kumlui 2012 in thil omdan puankholh hi a bangziakin Manipur a omte’ adin ahun a taklat hilou in ni 2 lel hun om nunga puankhiak hipan phing hiam chih dotna bawl hi.Cabinet meeting in entrance test tawh kisai a sumsen teng lehkikdan ding ngaihtuah dingin leng ngen a, student 5,756 te’n MBBS entrance examination piak sawm a form fill-up uh hi’n leng gen hi.

Doon Public School in Manipur deihsak
Imphal June-8: N.V. Sarat Chandran,Manager of Doon Public School(DPS), New Delhi in tuni’n Imphal a Manipur Press Club ah Press conference sam in huai ah a gendan in Doon Public School in 2013-14 session akipan Manipur mi DPS a kainuamte special concession piak dia thupukna bawl hi’n gen hi. Aman a gendan in Class X passed a Class XI a admission bawlnuam Class X examna a X-CDPA a passed-te tuition fee 100% concession hiding a, 9.5- CDPA a pass te tuition fee 50% concession piak hiding uh a, 9 & above te’n tuition fee 25% concession ngah ding uh chi’n gen hi.

Health Minister in hong ding
Lamka, June-5: T. Siamlian, Ph. D in apa’ min a a bawl "Thomte Ginthiau' Laibu" kichi June 8, 2013 (Kiginni) dak 1.00 in School of Preaching Hall, Changangei, Airport Road, Imphal ah Health Minister Phungzathang Tonsing khuallian a pangin honna om ding hi.

JCB in nasepna ding khuat
Lamka, June-5: MGNREGS 2012-13 nuai ah ni 41 nasepna ding omlak ah ni 25 sung Tuibuong apan Lanva lei (bridge) kikalTedim Road zul a nullah kuak bawl kipan a, atung footpath a zattheih dingin nasepna pailel hi. Tuni’n Police Station apan Central Lamka tan JCB zang in nullah khuatkuaksak uhi. Tedim Road a nullah kuak tung footpath a kizanglel ah a kuaksung leisai dim a, huai teng JCB zangin khuatkhe vek uhi. Nullah kuak bawlthak zawh in mihing paitheihna(footpath) ding letdan feet 4 hiding a, lampi sak leh khang a khe a paite’n footpath tung zui ding uh hi’n kigen hi.

Police 1 in thau khahkha
Lamka, June -5: Tuni nitaklam in CCpur PS ah SDPO/CCpur hawh a,amah zui escort-te lak atel Police personel 1 in a tawilai AK rifles khahsuahkhia in 1 vei ging a, hileleng kuamah aliam omlou hi. Thauging thawm zakha mi tamtak in bangthu om hiam chi’n patau man mahmah uhi.

Elder H.Mangchinkhup in latna nei
Lamka, June -5: Autonomous District Council/CCpur in khawpi sung a niin paihna ding gari ‘Tipper Truck’ khat 13th Finance tungtawn in leikhia uh a, tuni sunnung dak 2:00 in Tuibuong a Dist Council Office ah Elder H.Mangchinkhup, EM/ADC in Pathian kiang ah thumna in lan hi. Tulelin ADC/CCpur nuai a Town Office te’n niin puakkhiakna ding in Tripper Truck 3 leh Sanitary Truck 1 zang uh a, June 6 a Gari thak khat zatbeh hun ah n tripper gari 4 zang in niin pawkhe ding uhi. Sanitary truck pen a luiluat ziakin repair ding in workshop ah om hi.

Route permit zuichiat di theisak
Lamka, June-5: Regional Transport Officer/CCpur apan thusuak kingah dan in Diesel Auto-Rickshaw tamtak in Route Permit a tellou line(route) dang ah leng service uh chih theihchet hi a,route permit zuiloute’n MV Act & Rules a kalh ziakun hiai thusuak a zuih kei ua leh a route permit uh cancel hiding chi’n theisak hi.

Grace Laltinzo in Ph.D, ngah
Lamka, June-5: Mrs. Grace Laltinzo in Manipur University(MU) a Department of Adult Continuing Education & Extension (Life Long Learning) ah “Exploring the experiences of HIV +ve pregnant women in Manipur” chih thesis agelh tungtawn in Doctor of Philosophy(Ph. D) ngah hi. Grace Laltinzo in tulelin Deptt of Social Work, Indira Gandhi National Tribal University, Regional campus,Manipur ah Asst Professor sem a, amah Dr H. Liensang,CMO/CCpur leh azi Ms. Lalthiengzo’ tanu hi a, Rev. Immanuel Lalthlenglien of Rengkai’ zi ahi hi.

Steering fail ziakin nulla kuah ah tailutkha
Lamka, June -5: Tuni sunnung dak 12:30 velin SDO/CCpur office khang ah Maruti Alto Car (No. MN 02A-6215) a steering fail in nullah kuak ah tailutkha hi. Thu kizadan in gari neitu in Employment Exchange pha hi a, akiklam engine off-sa a taisuk lai steering fail in nullah kuak ah taikhia hi’n kigen hi. Gari mailam sezek a, phatuam ngaite panpihna ziak in gari kaihkhiat theih a om hi’n kigen hi.

Khoirentak Khuman ah kipahpihna
Lamka, June -5: Kom Cultural Dance, Land Research Centre te’ intekna in June 8, 2013 sunnung dak 1:00 apan Khoirentak Khuman khua ah khawsung mi tutung a class X, XII, BA, MA, M.Th leh LLB a lawhchinna ngahte ban ah Republic Day 2013 lop lai in Imphal ah CCpur ai-oh a kuan Kom Cultural Dance, Land Research Centre te’n Folk Dance Competition ah 1st alak uh Certificate + Rs 20,000/- lopna omding hi. Huai ah T.Manga Vaiphei, MLA (Henglep A/C) & Chairman MTDC khuallian hiding a, Guest of Honour in Maniram Sharma, IAS i/c DC/CCpur leh Functional President in Thangkhomang, MDC (Khousabung) hiding hi.

Best Performance Award lawm uh
Lamka, June -5: Directorate of Family Welfare Services, Manipur in May 23, 2013 in ‘Best Performance Award for Family Planning Programme for the year 2012-13’puankhiakna uah singtanggam a district 5te lak ah CCpur district in ‘Best Performance Award’ ngah hi. Tuni sunnung in Mini Training Hall ah Award lopna om a, Chief Host in Dr. HL Liensang CMO/CCpur pang hi. Aman a thugenna ah Dr. VC Pau Tonsing in kumlui apan in District Family Welfare Officer hihna lenpan mahleh Manipur a Hill District omte lak ah amah nasep hoih ziakin Best performance Award a ngah pahtak th ugen hi. Nahoih sep himhim a vuak suak omlou a, damsunga kipahman i muh kei leleng sihnung in van gam ah kipahman muh ding hi’n gen hi.

School 40 ading vanzat hawmkhia
Lamka, June 5: ADC/CCpur nuai ah tulelin school 170 om a, huai teng lakah school kai hoih a telkhiat 40te ading in 13th Finance tungtawn in vanzat tuamtuam leikhia uhi. School 1 zel ah bench & desk 8 tuak, table 4, plastic chair 8 leh teaching aid banah game materials hunkhop piak din bikhiah uh a, school tamzaw in lata uhi.
&&&&&&&&&&&&&&&&&&&&&&&&&&&&&&&&&&&&&&
IMPHAL NEWS
Unit Congress Committee conference om
Imphal, June-5: BT Road a Congress Bhavan ah tuni’n “The 1st State Level Political Conference of Unit Congress Committee” om a, huai ah Prime Minister masapen Pandit Jawaharlal Nehru lim ah zahna in pak piakna om hi. Chief Minister O. Ibobi in a genna ah Assembly seat 60 a election om ah Congress in seat 42 luah mahleh mipite’n development nasepna tawh kisa dotna a bawl uh dawnna kichiantak paik haksa mahmah a, mipite ziaka Congress in govt bawlthei ahihman in Minister leh MLA te’n mipite’ lungkimlouhna leh a thil phutte’ uh ngai poimawh ding in gen hi. Congress party worker teng leng mipite’ khantouhna ding a nasem ding in ngen hi. Huai hun AICC Gen. Secy. Luiziho Fareilo, MPCC President & Dy CM Gaikhangam, Thangso Baite,MP(Lok Sabha) leh Parliamentary Secretary-te, MLA’s leh party leaders tuamtuam hunkhop tel uhi.

Manipur ah mihing 2,570,390 om
Imphal, June-5: Director of Census, Manipur in tuni’n Primary Census Abstract (PCA) of Census 2011 suah khia a, huai dungzui in Manipur ah March 1, 2011 tan in mihing 2,570,390 om a, huaite rural area ah 1,736,236 leh urban area ah 834,154 hi’n kigen hi. Kum 10 paisa apan Manipur ah mihing’ pundan (growth rate) 18,6% (valley ah 9.1% leh hill ah 44.8%) hi a, kum 2001-2011 sungin singtanggam dist lakah Chandel(23.2%) in mihing punghatna lam ah niampen a, phaijang bial ah Imphal East (62.2%) in mihing punghatna lam ah khatna la hi. Naupang kum 0-6 kikal mi 338,254 om a, huai apan 236,843 te’ valley apan leh 101,411 te’ Hills district apan hi’n kigen hi. Manipur ah Schedule Caste (ST) om zah mi 97042, Schedule Tribe 902,740 hi’n kigen hi. Census report dungzui in Manipur ah literates mi 1,768,181 om hi’n kigen hi.

Myanmar tawh kisai media-te kimuhpih
Imphal, June-5: Chief Minister O. Ibobi in tuni’n Congress Bhavan ah Myanmar a phakna tawh kisai mediate’ genpih hi’n kigen hi. CM in Myanmar a va hak in lawhchinna tamtak tung ding hi’n gen a, Myanmar a Manipur mi-le-sa omte’n Imphal-Mandalay kikal bus service pat ding ngaklah mahmah uh a, Myanmar govt. in sumdawnna lam ah Manipur tawh kithuah nasapen a, huai ziak mahin kizopna a khauhsem deih uh hi’n gen hi. CM in a genbehna ah Manipur a Inner Line Permit (ILP) zat ding phutna a National Highway te’ apan non-Manipuri sawlkikte’ leh school a ILP tungtang tawh kisai meeting saite’ tungah action lak hidin gen a, Manipur govt. kia in ILP zat ding thutanna a bawl theihlouh ziakin leng organisation leader tuamtuamte kiangah ILP zat dinga phulou din leng ngen a, Manipur ah ILP zat theihna dingin India dan bupi dan khek ngaiding ahihziak in ILP zat theih ahih masiah political party tuamtuamte’ pangkhawm dia kimansa a om din leng ngen hi.

Biometric attendance system kihong
Imphal, June-5: DM College of Science ah tuni zinglam dak 11.00 in teacher-te’ attendance lakna ding a system kibawl thak ‘Biometric attendance system’ kichi Education Minister M Okendra Singh in khuallian a pangin hongkhia hi. Huai ah Functional President in Vungzagin Valte, Parliamentary Secy (Hort & SC, CADA) pang a, Guests of Honour in M Prithivi Raj, Parliamentary Secy (YAS), Ng Bijoy MLA, Dikho MLA leh MK Preshow Shimrey pang uhi. Huai attendance system thak Manipur pumpi a zat hidinga, abiktakin singtangdawn a posting teacher-te leh phaizang a posting-te a school/college uah kai taktak na uhiam chih theihchetna ding vanzat hoihtak hi’n kigen hi.

Student Wing te’n ILP zat ding phut
Imphal, June-5: Manipur ah Inner Line Permit(ILP) system zat ding phutna in Student wings of ‘Joint Committee of the Inner Line Permit System’(JC-ILP) te’n June 1-5, 2013 sung in Manipur ah non-Manipuri honglut dingte check bawl din a puan bang un tuni zinglam apan pawl tuamtuam kigawmte’n Dimapur apan Imphal zuan a tai gari-te’ Sekmai New Bazar mun ah checking bawl in Maruti Van, Bolero, Bus leh van pua gari (goods vehicle) apan non-manipuri mi 40 vel ding tuni zinglam dak 11:00 velin hentang in sawtlou nung in hong kipatna mun uah sawlkik uh hi’n kigen hi. Sun dak 12:00 velin student wing te’n Luwangsangbam ah checking sunzom uh a, huai ah truck (WB-41F/0687) ging lelh huai sa in kham mahle uh truck pen taisuak in nung delh uh a, Shangakpham area ah kham khawl zou in checking a bawlna uah non-manipuri mi muhkhiak hikei mahleh truck driver leh student-te’ kalah kiselna piang in truck hihsiat a om zek hi’n kigen hi. Sekmai police te’n leng checking bawl student wing-te’ sawlkik in police leh student wing-te kalah kinakna tanpha piang a, student tamtak Imphal ah sawlkik in om mahle uh Khwairengei area mun ah checking sunzom uh hi’n kigen kigen hi.

Consultation meet ah vatel ding
Lamka, May-5: Forum of Parliamentarians on HIV/AIDS, Government of India (Ministry of Health) leh DoNER inntekna in June 7 & 8, 2013 sung Guwahati a Pragjyoti ITA Auditorium ah ‘North East Regional Consultation on HIV/AIDS’ om ding hi. Huai ah Vungzagin Valte, Parliamentary Secy (Hort. SC & CADA) chial ahih dungzui in vatel ding hi. Aman June 6, 2013 in Imphal nuse ding a, June 9 velin hongtung kik ding chihthu kiza hi. Huai program ah Chief Guest in Union Health Minister Ghulam Nabi Azad pang ding a, Assam Chief Minister Tarun Gogoi leh Union Minister khenkhat in thuugen ding uh chihthu kiza hi.

World Environment Day kizang
Imphal, June-5: Palace Compound a Manipur Film Development Corporation (MFDC) auditorium ah Environment-te saina in “World Environment Day zat a om a, huai ah Chief Guest in Dr. RK. Nimai Singh, IAS, Commissioner(YAs) pang a, Functional President in Dr. RK. Ranjan Singh, retd. Director, Academic Staff College MU, pang a, Guests of Honour in G. Tomba Sharma, retd. Principal DM College of Science, Dr. M. Homeshwar Singh, Director- Directorate of Environment, Govt. of Manipur pang uhi.

Lam Khunu Eco-club of Bhairodan Maxwell Hindi Primary School, Dharmasala, Thangal Bazar, Imphal te’n leng “World Environment Day” zang uh a, huai ah Chief Guest in T. Binodhini Devi, Monitoring officer, Education Dept. (S) pang a, Resource person in M. Lurensana Meetei, Field Inspector, Manipur Pollution Board, Dr. H.Hemananda Singh, Master Trainer, District Implementation & monitoring committee (DIMS), Imphal West, N. Shyamkishor Singh, Master Trainer, DIMS, I/W leh Kh. Sunita Devi, Head Mistress, Bhairodan Maxwell Hindi Primary School pang uhi. Biodiversity Ecology Environment Network Manipur (BEE NET) & Centre for Guidance on Higher Studies te saina in leng Manipur Press Club ah “World Environment Day” zat a om hi’n kigen hi.