CEO makaihna in dist. sunga Plantation farm enkhia
Lamka, June-1: CCpur district sunga mun poimawh leh spices plantation farm omna munte enkhe kawma hongzin Dr J.S Samra, CEO, National Rainfed Area Authority, Planning Commission, Govt. of India makaihna in Vungzagin Valte, Parliamentary Secy(Hort & SC,CADA) leh Biaklun Shoute, Chairman, ZEPADA Delhi working group leh ZEPADA teamte’n zan nitaklam akipan mun tuamtuam pha uhi. Amau zan in Tangpijol a GK Pillai Coffee Plantation leh Lemon Grass plantation farm banah C. Munpi a coffee plantation farm enkhia uh a, tuni’n D. Khozim a spices chiinna farm enkhia uhi. Huai hunah Dr. J.S. Samra in ZEPADA panlakna ‘noble mission’ nasepna lawhching sem ding leh hoihtaka bawl dingin deihsakthu gen a, zuak theih thilte mah hahbawl a, panla dingin hasuan hi.

T.N.Haokip Foundation Trust in tuni’n Meritorious Award pekhia, Jouvi Neihsial in 59-Saikot A/C ah All round topper la
Lamka, June-1: TN Haokip Foundation (TNHF) Trust saina in tuni zinglam dak 11.00 in Bijang Community Hall ah 59-Saikot A/C bial apan ‘HSLC Examination, 2013’a Topper leh Best School telkhiakte kiangah ‘TNHF 9thMeritorious Award-2013’ piak in om a, Jouvi Neihsial d/o Thangkhokam of Bazar Veng, Tuibuong(Salt Brooke School) in marks 426 a muh ziakin All round topper hihna la hi. Khuallian ding Vungzagin Valte, Parliamentary Secy (Hort & SC, CADA) a lemtanlouhna ziakin teltheilou a, Functional President in Demmang Haokip, Vice Chairman ADC/CCpur pang hi. Special Guests in Mannuamching, CEO; Rev Lalrosiem Songate, Principal, ECT leh Isaac Pakhuongte, Principal, Sielmat Christian Hr Sec School pang uhi. Rev Lalrosiem Songate in Award ngah leh student lawhchingte thumsak a, Mannuamching, CEO/ADC in Career Guidance leh student-te hanthawnna thu gen a, khualliante apan thugenna leng om hi.

TN Haokip in agenna ah tulai khawvel Information & Technology hun ahihziak in student te ading in Maths leh Science subject aloutheilou hi a, student te Match leh Science subject a hanthawnna ding a Award bawlkhia hi’n gen hi. CDPSA te’n Dist Topper pezel uh a, kumnawn in CDPSA- te tawh Award tungtang genkhawm hiding chi hi . MLA/MDC te’n amau level chiat ah Award hawm pankhia uh a, Youth Club level in class X & XII a passed te award hawmkhiat kipanleng tunung kum 10 in mipi’n a gah (fruit) louding hi’n gen a, mahni tunung hun ding mahni a kinga ahihdan gen hi. USA, Germany, UK kichi te’ Pathian in akhuak uleh theihna atuam liauliau a bawllou ahihdan gen a, amaute leng laisiamna ah khupkhe zoudia student te’n pan lathak dingin thuhilh a, Manipur level kia hilou in All India Level Competition ah student-te’ telthei dinga kuhkal, chitak leh Pathian laukawm a panla thak dingin ngen hi.

Demmang Haokip in a genna ah IAS, IPS, MCS leh Officer liantaktak bawlkhe tuding Headmaster/Principal te ahihdan gen a, maban ah naksem a student adia panlatou zel ding in ngen hi. Award ngah mi 4 te tutna mun ah student dangte leng tuthei ding a panla thak ding in hasuan a, mi 4 te’n mipi ban ah Dist akipan IAS, IPS mu zouding a panla dingin ngen hi. Aman a genbehna ah bialtu MLA TN Haokip in maban ah Maths leh Science subject poimawh sem ding ahihdan mukhol a, student -te hanthawnna ding a Award a bawlkhiatna tung ah kipahthu gen hi.

Mannuamching,CEO/ADC in a genna ah kum 10 paisa in singtangmite’n Maths leh Science subject haksa sa in lauthawh hial mahlehang tuhun ah huai beita hi’n gen hi. Student te’mahni kitheichian a, hinkhua a thiltup nei ngeingei din hasuan hi. Competetive tuamtuam a telna ding n class X & XII marks poimawh petmah a, lawhchin na ding in 99 % hard work ah kingah a, 1 % pen Pathian panpihna ziak hi’n gen hi. Student te’n maban ah lawhchin nang in kuhkal, chitak leh tupguh hoihtak neikawm a laisim ding in ngen a, Maths & Science subject kia hilou in Arts leh Commerce subject tungtawn in leng sepna hoihtak ngahtheih hi’n gen hi.

Jouvi Neihsial d/o Thangkhokam of Tuibuong( Salt Brook School) in total marks 426 mu in All round Topper la a, kipahman in Rs.20,000 + citation + certificate ngah hi. Thongminlun Haokip s/o Dempau Haokip of Zalenmun( St Mary’s H/S) in Maths subject ah 97 % mu a, Joel M.Thangmuanlun s/o M.Kapkhanthang of Muolvaiphei( Mount Carmel H/S) in Maths subjet ah 97 % mu in mi 2 in Maths Topper ngah uh a, kipahman in Rs.15,000 + citation + certificate ngahtuak uhi. Lhingdeihoi Haokip d/o Tongjalet Haokip( Salt Brook School) in Science subject ah 91% mu in Science Topper hihna ngah a, kipahman in Rs.15,000 + citation + certificate ngah hi. Saikot A/C a ‘School of the year’ dia telkhiak Sielmat Christian Hr Sec School in cash award Rs.10,000 banah citation & certifcate ngah hi. Tuni program ah MDC member hunkhop, hausa, student leader, nu-le-pa ban ah mipi tamtak paikhawm uhi.

Speed breaker bawlna ding enkhia
Lamka, June-1: Tipaimukh Road ah gari accident tamluatziak in Maniram Sharma, IAS i/c DC/CCpur in 80-RCC BRTF te kiang ah speed breaker bawlding in theisak hi. Huai dungzui in tuni nitaklam dak 4:30 in S.Khaikhopau Ngaihte, SDC HQ, DC’s office, 80-RCC BRTF a Commandant leh Traffic Police te’n Tipaimukh Road-Central Road junction sakdeuh ah speed breaker bawlna mun ding enkhia uhi. BRTF lam apan kizadan in June 3 a pan nasep kipan ding a, Tipaimukh road kimkhat ni1sung bawl ding uh a, ani nawn in a langkhat lam bawl in ni 2 sung in nasep zawh hiding hi. Tipaimukh Road a speed breaker bawlsung in Central Road apan Tuipaimukh Road zui in gari toutai theilou ding a, Traffic Police te Central Road ah duty ding uhi.

Patkai College ah subject topper
Lamka, June-1: Patkai Christian College ah zan in BA final result suak a, student tamtak lawhching uhi. Huaite lak ah Khual Khan Muan Suante s/o Chin Ngaih Pau Suante of LV Lane, New Lamka in 72% mu in Philosophy (Hons) ah subject topper la hi. Songchinlian s/o T.Vungzakap of Hebron Veng, New Lamka in Political Science (Hons) ah subject topper la a, 74.58% mu hi.

Traffic rule bawhsia 12 mankhia
Lamka, June-1: Lamka khawpi sunga kizang ‘One way traffic rule’ leh ‘Gari parking’ dan kuapeuh in a zuichiat deihna ziakin niteng in Police, Traffic Police leh VDF te’ duty uh a,May 27-June 1, 2013 sungin Traffic rule bawhsia mi 12 mankhia uh a, TR-5 receipt cut in liausak uhi.

KSO in ATSUM theihpihlou
Lamka, June-1: Kuki Students Orgn(KSO)/CCpur a President Paokai Haokip leh Gen Secy Robert Paoboi in thupuan a bawlna uah mi khenkhat in ATSUM minzang a nasem hi a taklang kawmin poisakthu puang uhi.KSO Gen HQ leh ANSAM thusuak dungzui in KSO/CCpur in lerng ATSUM theihpihlou uh hi’n puang uh a,mi khenkhat in ATSUM min gu a nasem uh hi’n leng taklang uhi.CDSU tawh kisai ah leng parent bodies tamzaw in CDSU kizukkhiaksan uh ahih dungzui in mi khenkhat in CDSU min zang in nasem uh hi’n puang uhi. Huaiziakin ATSUM kichi pawlin dakkal 38 sung kiphinna neih dia thupuan a bawl uh KSO in kalh(oppose) ding uh hi’n puang uh a,passenger Bus-te ngeina banga service ding leh office, institution leh business activities leng ngeina banga sunzom chiat idngin KSO thusuak in ngen in theisak uhi.

Lawhchingte kipahpihna
Lamka, June-1: Gangpimual a Covenant Children Home ah tuni sunnung in HSLC examination 2013 a lawhchingte kipahpihna program nei uh a, Lian C.Tombing in lawhchinna ngahte hasotna thu a gen banah Pathian kiangah thumsak hi. Tutung in Covenant Children Home apan 1st division in mi 19 leh 2nd division ah mi 3 lawhching uhi.

SUUNNA
Mrs Kamching(68) w/o G. Khamzalian of AIR Residential Qtr, Lamphelpat zan nitak dak 12.05 in cancer natna ziakin si a,tuni’n Chingmeirong a Christian Cemetry ah kivui hi.

IMPHAL NEWS
Mipi’n dukan hihsiat sak
Imphal, June-1: Lamsang P/S in a huamkhak Lamding Khunou ah tuni zinglam in mipi thangpaite’n Asangbam Tongbi’ dukan hihsiatsak uh hi’n kigen hi. Akigendan in Leitangthem Nanao in zingsang baihtak dak 3:00 in a loulam zuan a pailai niliap (umbrella) a tawi khaklouh ziakin ala din inn ah kiknawn a, azi Leitangthem Ongbi Sundari leh Asanbam Tongbi kilawmlou tak a omlai mu a, aman Asangbam Tongbi vaw mahleh taikhe thei hi’n gen hi. Lamding Khunou mipite’n a theihphet un thangpai in Asangbam Tongbi dukan hihsiat sak uh a, Asangbam Tongbi in zi leh ta neikhin hi’n kigen hi.

International airports dana a puah hiding
Imphal, June-1: Airport Authority of India (AAI) thusuak in a gendan in “Look East” policy a India leh Southeast Asia gamte’ sumdawntuah hihhat semna ding in Imphal leh Agartala a Airport leh Imphal Airport leng International Airport standard tan a puahna ding in nasep kipanta a, terminal building, air traffic control towers, runway leh mun poimawh teng keklet pah hidin kigen a, Airport 2te puahna ding in Rs. 160 crores zat hiding a, Rs. 10 crores tuak bei in Modern Air Traffice Control tower leng koih hiding hi. Northeast a International Airport omsun Guwahati hi a,. AAI Chairman VP Agarwal leh Civil Aviation Secretary KN Shivastava te’n June 6, 2013 in Agartala Airport puahdan ding tawh kisai Agartala ah high-level meeting nei ding uh hi’n kigen hi.

MLA leh PHED te’n inspection bawl
Imphal, June-1: Yaiskul A/C apan MLA E. Chan leh PHED officialte’n tuni’n Yaiskul A/C bial pha in kum 15 vel apan tui haksatna hi a kigen Yumnam Leikai, Yaiskul, Irohanba, Bambul Mapal leh Chingakham Leirak mun inspection bawl uh hi’n kigen hi. Huai ah PHED Executive Engineer Debin in tuihawm khiakna a kizang pipe-te a lui mahmah banah pipe tamtak a kek ziaka tui haksak hi’n gen a, pipe luiteng khekkhiak ahih chiangin deih banga tui piakkhiak theih hiding in gen hi. E. Chan,MLA in PHED te’n pipe khek ding a panlak a sawm uh, tui hoihtak a muhtheihna dingin mipite’n kithuahpih ding in ngen hi.

Telthak a om AMWJU te’n charge la
Imphal, June-1: All Manipur Working Journalists’ Union (AMWJU) te’n May 1, 2013 in office bearer thak ding telna election 23veina nei uh a, huai a telching a omte’n tuni’n charge la uhi. Tulela AMWJU office bearer- te’ President -Wangkhemcha Shyamjai (Editor- Kangleipakki Meira), Vice- President -Dilip (Senior Reporter- Sangai), General Secretary- G. Naocha (Journalist-News X), Joint Secretary- Th. Lakhikanta (Reporter- Paojel), Treasurer- B. Sanjoy (Reporter- Eikhoigi Panthung), Internal Auditor- B. Sanju Sharma (Bureau- NETV) hi uh a, Sanding committee member-te Rattan Luwangcha of Hyderabad Headlines, A. Dhananjoy of Imphal Free Press, Th. Milan of Manipur Mail, Ch. Meghabarna of Mannaba, G. Gagan Sharma of ISTV leh Th. Yaiphaba of Naharolgi Thoudang, hi uhi.

Myanmar ah cleft lip operation zousiang
Imphal, June-1: Smile Train Inc., USA leh Shija Hospital & Research Insititute-te’ panlakna in Smile Train Shija Cleft Project apan mi 12 te’n May 24-27, 2013 sung Myanmar a Monywa General Hospital ah cleft (muk hem) lip operation bawl uh a, zan in Imphal hong tungkik uhi. Huai hun ah Dr. Kh. Palin Singh, Chairman-cum-Managing Director, Shija Hospital makaih in mi 12 te’n surgery 103 a neih sungun cleft lip leh palate patient mi 87 te’ operation hoihtak in zousiang uhi. Myanmar govt. in Indian Consulate kiangah Myanmar ah a thawn in cleft lip leh palate operation sai ding a ngetna a bawl dungzui in Smile Train Shija Cleft Project in Tamu DC kiangah amau vakingen in vakuan uh hi’n kigen hi.

Demand muh ziakin rally pai
Imphal, June-1: Helpawl apan demand letter muh ziak a, lungkimlouh latsakna in tuni’n Samurou a Little Master Hr Sec School a student leh teacher-te’ school apan kipankhia in Samurou Bazar tan rally pai uhi. Little Master Hr. Sec. School a governing body secretary M. Thoiba in a gendan in zan nitak in KCP(MC) a Commander-in-Chief kichi Lamyanba Khuman in school Principal kiangah Rs. 50 lakhs demand bawl a, school dangte’ tawh etkak in amau school in fee Rs. 140-220 kikal lalel uh a, sum met ding bangmah omlou hi a genkawm in KCP-MC te’n leng demand a bawl uh zukkik ding leh school te’ Free education zone a koih dingin bawl ding in ngen uhi.

Gate No. 1 ah Visa office bawl lemsa
Imphal, June-1: Ministry of Home Affairs (MHA) apan official team khat in Moreh ah immigration leh Office bawlna mun ding enkhia uh hi’n kigen a, Myanmar apan Manipur ah damlou ki-ensak dingte’ “Visa on arrival” piakna mun ding International Gate No. 1 gei a Land custom station building ah Immigration leh visa office bawl dingin lemsa uh hi’n kigen hi. National Information Centre tawh pangkhawm in Centre in internet tungtawn in kintak a visa sukfel theihna dingin Hardware leh software piakding lemsa a, Moreh a Integrated Check post bawlzawh chiangin immigration leh visa office-te’ huai ah suan hidin leng kigen hi. (UNA)

Fake admit card hawmkhiak in om
Imphal, June-1: All Manipur Muslim Students’ Organisation (AMMSO) in tuni’n a office uah media-te kimuhpih uh a, tutung a CBSE nuai a class X exam result ah student tamtakte’ Roll.No. om khalou hi’n taklang uh a, student te’n AMMSO te’ kiangah ah hiaithu a tut uh tawh kitawn in suizuina pat hi a, Canchipur a Little Rose Higher Secondar School a Principal-in-charge in student 7,000 vel dingte admit card apiak CBSE, Delhi apan hilou a, student te’n a exam theihna dingun Rs. 15,000 sung uh hi’n kigen a, hiai tungtang ah mipi leh govt. in panla a thudik suikhiak meng ding leh , dikloutaka gamtangtu gawtkin din leng ngetna bawl uhi.