ATSUM in kiphinna tuamtuam pan; Gari 20 val hihsiat in om
Lamka, June-3: All Tribal Students’ Union, Manipur (ATSUM) in govt ah thil tuamtuam a phut uh sepkhiak ahihlouh ziaka lungkimlou in tuni zingsang dak 5.00 akipan June 4, 2013 nitak dak 7:00 tan dakkal 38 sung bandh puang uh a, Lamka khawpi sung mun tuamtuam ah bandh supporter-te’n dawr/dukan khaksak (closed) uh a, bus telin gari 20 val hihsia uh hi’n thutut kingah hi. Bandh supporter-te’n lampi lai mun tuamtuam ah gari tyre leh thil tuamtuam hal uh a, police te’n phelhmit zel uhi. Bandh supporter te’n a soisak uh khenkhat Hospital kipaw tung leng omzek hi’n kigen hi. Police te’n mi 2 mankhia uh a, nitaklam in khah uh hi’n kigen hi. KSO in bandh a support louh ziakun Tuibuong bazar area lak ah dukan ngeina bangin kihong a,Imphal tawh kala line Bus service-te leng Tuibuong Bazar ah kinga uhi. Thu kizadan in June 4, 2013 in bandh khauhzaw sem ding hi’n thusuak kingah hi.

Manipur gamsung mun tuamtuam ah leng bandh tawh kisai thiltung om hi’n kigen hi. Imphal lam apan kizadan in bandh supporter te’n Police-te tunma in Senapati area ah Imphal-Senapati kala Bus service 2 hihsia uh a,Senapati district sung mah Imphal-Mao kikal National Highway ah lamlian a gari taite suanga deng leh gawphel a kap mi 9 vel Sekmai Police te’n mankhia uh a, Imphal-Moreh kikal Pallel ah leng bandh supporter pawlin Gari khenkhat hihsia uh hi’n kigen hi.Thu kizadan in Sekmai Police te’n mi 9 a matkhiakte uh lak ah All Tribals Disable Union Manipur president Momo Tatanga leng telkha hi’n kigen hi.

June 4, 2013 nitak dak 7.00 a bandh a bei nungin ATSUM pawlin “sustained agitation” kichi bandh hilou, hileleng a lemtanna mun khatpeuh ah akul leh poimawh banga kintaka action laktheih ding kiphinna in sutzop sawm uh hi’n kigen a, govt in a ngaihdau theihlouh ding in govt van leh thilneih(properties) tung hideuh ding hi’n kigen hi.

J. Lhungdim a sepna ah kaisang
Lamka, June-3:J. Lhungdim,IDAS tulelin deputation in NEC ah Planning Adviser in om mahleh a sepna Controller of Defence Accounts akipan Principal Controller of Defence Accounts in kaisang a, June 1, 2013 zinglam dak 11.00 akipan nitaklam dak 4.00 tan Shillong a DAD Colony ah Pathian kianga kipahthu genna(thanksgiving service) om a, huai ah Rev Dr Kh. Khaizakham in a thugen(message) in mi tamtak khalam vualzawlna tun hi’n kigen hi. Huai hun ah KWS, EBC, ESC, EOC, Shillong Lutheran leh saptuam pawl tuamtuam akipan mi 450 kikhawm uh a, programme zawh in vok 2 (tuk 7 vel), aksa leh ngasa tamtak meh bawl in ankuang luina om hi.Kikhawmte lakah H. Chinkhenthang, IAS (retd), Rev. Nengzakhup, Rev. David Lhouvum leh mi poimawh tuamtuam tel uhi.

J. Lhungdim,IDAS in NEC Planning Adviser dia deputation hun omlai teng semlai ding chihthu om hi. J. Lhungdim in kum 1983 in UPSC saina a Civil Services examna ah Indian Defence Accounts Service(IDAS) mu in kum 1984 akipan in sem hi. Principal Controller of Defence Accounts leh Chief Commissioner, Income Tax/Customs & Central Excise dinmun kikim hi’n kigen hi.

Army Recruitment Rally kipan
Lamka, June-3: Lamka Public Ground ah tuni zingsang dak 7.00 akipan in 27-Sector, Assam Rifles-te saina in Army Recruitment Rally om a, huai ah Assam Rifles a General Duty (Riflemen) leh CAPFS a semding hunkhop lak hiding hi. Recruitment rally a telding teng gate bulh ah document hoihtak in check masak hi a, huai zawh in gate sung ah lutsak uh a, huaizawh in dinsan dan check nawn uhi. Huai a paisuak teng document check thaknawn in huai zawh in taisak hi uhi. Khatvei thu in mi 15 vel Public ground kimvel ah 15 vei taikualsak uhi. Huai recruitment rally June 8, 2013 tan sunzom ding uhi. Tuni a army recruitment rally ah khawpi sung apan tuailai tamtak tel uh a, huaite lak ah mithau leh upa mahmah 1 leng tel a, public ground kim ah 15 vei taisuak zou a, Army te’n leng upa leh thau (fat) sa in kipahpih mahmah uh a, kikou zak hial uh hi’n kigen hi.

M.Songel ah Diesel Auto flag off
Lamka, June-3: M.Songel khua a mipite apan ngetna dungzui in tuni zing dak 7:30 in Seijang, Chief of M.Songel in M.Songel Community Hall gei ah M.Songel apan ADC office- SP office-New Bazar-Phailian tan taiding Diesel Auto flag off a, Upa Jilhao in Auto te’ ading in thumsak hi. M.Songel apan Phailian khua tan taiding Diesel Auto te ahihleh Molnom line Diesel Auto Owners’ Assn te hi uh a, gari 10 velin M.Songel leh Phailian kikal kawmtuah ding uh hi’n kigen hi. Molnomline Diesel Auto Owners Assn te’n kipah etsakna in kel (goat) 2 gou in M.Songel V/A, Youth Club leh Defence Committee-te tawh nitak-an nekhawm uhi.

Lamka khawlumdan 37°C tung
Lamka, June-3: Tukum sunga khaw omdan chiamteh tham ching dingin tuni nitaklam dak 1.44 in Lamka ah khaw lumdan(temperature) 37°C degree celcius vel tung a, January 2013 apan khawlum nasat hun pen hilai a, July 2011 akipan khawlumdan etkakin tuni nitaklam pen khawlum nipen a chiamteh in om hi. Huai hun akipan khawvot ni pen a chiamteh, Jan 11, 2013 zingsang in 2.5°C tunga, kumteng a khawlum uang deuhdeuh ahihdan langsak hi.

Maiteh ziik chituam mahmah om
Lamka, June-3: Lalthangzo of Tedim Road(Lamka) in atenna inn gei uah meiteh tuh a, huai maiteh kung hoih mahmah in azi’ in maiteh ziik siktan a, huai apan adang hong dawnkhia pen feet 8 tan vel lian mahmah in chituam mahmah hi. Maiteh ziik dangte aletdan khutme chia himahleh 1 pen liantuam mahmah a, aletnapen pek dengdawng in inches 3 vel in lian a, a mukha leh theikhate’n lamdang sa in en kheukhou uhi.

Two Days Seminar om ding
Lamka, June-3: Evangelical Churches Assn(ECA),Evangelical Baptist Convention EBC) leh Glocal Volunteer(GV) kigawmte saina in June 25-26, 2013 sung Dorcas Hall, New Lamka ah saptuam, institutions leh Charitable organisation-te adingin ni 2 sung Seminar om ding a, huai ah resource persons in Prof SD Jeyakumar, Director OD,CIM leh Mr Verghese Jacob, Director, Training,CIM pang ding uhi.

Chongkhozou ADCC ading langva hawmkhia
Lamka, June-3: 4-Chongkhojou MDC Genneihkhup, EM/ADC in ama’ constituency sung ah inn- le-lou kisiate panpihna ding in BRGF leh IAY tungtawn in langva bundle 100 leikhia a, tuni sunnung dak 2:00 in New Lamka (G) a Election Chairman Kaipu in Genneihkhup sik leh tang in inn 23 ading langva hawmkhia a, a kilhna leng tel hi. Tuma lam in Genneihkhup in bialtu MLA tawh pangkhawm in Saichang khua ah inn 9 leh Kawnpi khua ah inn 4 ading langva hawm khekhin hi’n kigen hi.

Malaria positive 1 mukhia
Lamka, June-3: Dist Malaria deptt te’n May 2013 sung in damlou mi tuamtuam 1698 te sisan test uh a, huai lak ah malaria positive 1 mukhia uh a, positive pen PF hi’n kigen hi.

CCpur ai-oh in school 2 kuan ding
Lamka, June-3: District Youth Affairs and Sports officer saina in May 28 apan Rengkai Playground ah pasal kum 14 & 17 nuailamte adin Dist Level Inter School Subroto Mukerjee Football Tournament kipan a, tuni’n zousiang uhi. Under 14-yrs ah school 47 tel uh a, tuni sunnung in final kimawlna ah Chongkhozou Jr H/S in goal 1-0 in Taithu Jr H/S zou hi. Under 17-yrs final ah Saikot H/S leh Children Treasure H/S, Tolbung kimawl uh a, full time in 1-1 in kidraw in penalty ah Saikot in 5-4 in zou uhi. Under 14 yrs & 17 yrs a Dist Champion Chongkhozou Jr H/S leh Saikat H/S te’ June 12-16 in Khuman Lampak Sports complex ah CCpur ai-oh in State Level Inter School Subroto Mukerjee Football Tournament ah kimawl ding uhi.

Suunna
Lianthianmung (2 months) s/o K. Lalmuan tuni nitaklam dak 5.00 velin sensi(awmna) in Bukpi khua ah si hi. K. Lalmuan ahihleh Bukpi CES school a teacher sem hi'n kigen a, Dorcas Veng a om Pastor K. Tualkhothang tapa ahi hi.
Ms. Vanneihthangi (28) w/o D.Z. Rina, tulel a NTBCA adia Missionary sem, a omna uh Kachherichara(Tripura state) ah si a, aman a pasal banah tate kum 3 mi khat leh kha 3 lel hipan khat nusia hi.
Lalrochara (28) s/o Lalparmawia of Hmuia Veng zanhal sunnung dak 12.15 velin sinna ziakin si a, zan in Lamka Hanmual ah kivui hi.
Thangthamuan (3) s/o Kaplam of Bethel Veng, New Lamka zan in tuikulh sungah kia in dam zoulou a, zan mah in kivui hi.

IMPHAL NEWS
College 16 ah biometric attendance
Imphal, June-4: Manipur a College tuamtuama sinsakte’n College a kuanhun leh paihun phuaktom theilou ding in Education deptt in College 16 ah niteng in biometric attendance laksawm hi.Huai dungzuiin amsapen ding in June 6, 2013 in DM College of Science ah honna(launching) om ding hi. College dangte ahihleh DM College of Arts, DM College of Commerce, DM College of Teachers’ Eucation, Modern College,Imphal College,Manipur College, GP Women’s College, Thoubal College, YK College,Moirang College, Petrigrew College, Tamenglong College,CCpur govt College leh Chandel College hi uhi.

Jiribam apan mi 17 sawlkik hi uh
Imphal, June-3 : Manipur ah gamdangmi nasem dia hongkuan akigawm in mi 17 vel tuni in Jiribam akipan sawlkik o mom uhi. Thusuak in a gendan in ‘Joint Action Committee on Inner Line Permit System (JACILPS)’ pawlin tuni’n Jiribam ah mi 15 mankhia in sawlkik uh a, tua banah Kangpokpi mun ah zan in mi 2 sawlkik uhi. Amau police-te tawh kithuah uh a, JACILPS pawl in June 1, 2013 akipan Manipur ah Inner Line Permit khauhtak a zuih sawm in panla uhi. Amau a genna uah mun tamtak ah gamdang akipan nasem dia honglut tampi om ua, amau a omna mun uah khawsungmite sangmah in tamzaw uh, chi uhi. Hiai tawh kisai kiphinna June 5, 2013 tan nei ding uh hidan in taklang uh.

Class X pass-te kipahpihna om
Imphal, June -3 : Kangpokpi Community Hall ah tuni’n Sadar Hills ah HSLC Top 10 Meritorious Award giving ceremony om a, huai ah Kangpokpi Constituency MLA Nemcha Kipgen khuallian in pang hi. Aman huai hun ah numeite laisiamna dia kuapeuh in pan ilak ding uh ahi, chi hi. Numeiten innsung leh society ah dinmun poimawhtak len ua, amau lai a siam ualeh kikhekna lianpi om ding ahi, chi hi. Huai hun ah KSO Sadar Hills President Thangminlen Kipgen telin mi tuamtuam in uap uhi. Sadar Hills Area sung a HSLC Exam a hih hoih mi 10 te kiangah award piakna om hi.

Golapati ah operation bawl din ngen uh
Imphal, June-3 : United Minuthong Golapati Development Committee-te makaihna in tuni in pawl tuamtuam 5 in press-te kimuhpihuhi. Tua hun ah amau Assamese truck driver thahna tawh kisai a tualthattu mi 3 matkhiak a om tawh kisai ah Golapati khawsung a mi 3 te matkhiak ahihna ah kipahhuai sakthu uh gen uhi. United Minuthong Golapati Dev. Committee a Secretary Haji Arafat Ali in, police ten tualthatte a matkhiak ziakun kipahhuai sakthu gen a, tua tawh kiton in Golapati khawsung hoihtak a velchian deihthu taklang hi. Aman a genbehna ah, gamdang akipan in mi tamtak honglut ua, amaute govt in hoihtak a etchetna a bawl ding ahi, chi hi. Tua banah, mat a om mi 3 te leng dan tawh kituak a gawtna piak deihthu taklang hi.

KCH ah Free Medical camp
Imphal, June-3: Kanggui Christian Hospital(KCH) a OPD ah apaisa June 1, 2013 in Dr T. Hatzaw,MS, Medical Supdt/KCH etkaina nuai ah ni 1 sung free Medical camp lawhching tak in om a, huai ah damlou mi 300 val ki-ensak uhi. Free Medical camp ah mun tuam apan doctor 3 leh KCH asem doctor 3 kigawm doctor 6 in damloute en uhi.Huai camp ah Nepali mi Amit(20) of Noonpani village a gilpeng(appendix) puaktam ahun laitakin Dr T. Hatzaw in operation bawl a, lawhching mahmah hi’n thutut kingah hi.

KCH a Medical Supdt Dr T. Hatzaw in a gendan in March 2012 apan huai Hospital ah sem a,huaima in bel defunct tawh kibang hi’n gen hi.Dr Hatzaw in a sep akipan in kong tuamtuam ah kikhekna thupitak om a,March 2012 akipan tutan in major operation 400 lawhching takin bawl hi a,X-ray machine thak koih ahihbanah Auto Analyzer machine lerng koihthak hi a,Hospital a sum muhna a kibehlap banah semtute’n leng regular takin lawh muthei uh hi’n gen hi. Dr Hatzaw in a genzel dan in huai hospital ah Gynae, goitre, gold bladder, stone, hernia, appendix leh gilpi natna tuamtuam leng akul leh poimawh dan in major leh minor operation bawl hi a, tualsung leh akima khaw tuamtuam a mipite adin nuamtuam in phatuam mahmah ahihdan gen hi.