Medical, Electric,Press/Media leh MU a exam dingte khahkawl, ATSUM in kiphinna tuamtuam pan ding
Lamka, June-2:All Tribal Students’Union, Manipur (ATSUM) in govt ah a thilphut uh sepkhiak ahihlouh ziaka lungkimlou in Reckoning of the Other (ROTO) chih thupi a nei in kiphinna (agitation) tuamtuam pan ding uhi. ATSUM thusuak in a gendan in June 3,2013 zingsang dak 5.00 akipan June 4, 2013 nitak dak 7:00 tan dakkal 38 sung govt in a nelhsiah theihlouh ding kiphinna khauhtak om ding chi’n puang uh a, huaizawh in ni 38 sung mah akul leh poimawh banga kintaka patguihtheih ding kiphinna in zui ding hi’n kigen hi. ATSUM bandh ding tawh kisai tuni in CDSU makaite meeting uh a, ATSUM kiphinna om sungin Medical deptt, Electric deptt, Press/Media leh Manipur University a exam ding candidate teng kia khahkawl hidingin gen uhi. Tulelin school tamtak in half yearly examination a neihlel ziakun Ccpur Dist Private Schools’ Assn ngetna pia uh , agitation hunsung kithuahpih ding leh mipi’n kithuahpih ding in President CDSU in ngen hi.

ATSUM makaite’n Nov 27, 2012 CM kiang ah memorandum pia uh a, huai ah Manipur State Commission for the Scheduled Tribes bawlkhiak ding, singtanggam district tuamtuam ah B.Ed centre hon ding, singtanggam a educational institution omte ah teacher leh vanzat kiching koih ding, singtanggam a om PHSC, PHC leh CHC om teng ah specialist doctor leh vanzat(equipments) bukim tawh kithuahsak ding , Police deptt ah singtangmite adia backlog post teng hukdim ding, Tribal rights on Land and Natural Resources kepbit ding, Manipur Women Commission a Chairperson din singtangmi koihding chih telin point tuamtuam tamkhop semkhe dingin state govt theisak uhi.

Hibang kalah ATSUM Interim Body a Convenor Haopu Khongsai leh Care Taker & Member-Secretary Emboi Serto in thusuah a bawlna uah kum 2 vel paisa akipan ATSUM omlou tawh kibang khop a om hi’n taklang uh a,ATSUM puahthakna dingin panla uh a,June 2013 sungin ATSUM Executive thak telna(election) om ding a taklang kawm in tulela ATSUM minzangte akibawltom hidan a koih in June 3, 2013 akipan kiphinna om ding chi a ATSUM min a thupuan om leng theihpihlouh banah pomlou uh hi’n taklang uhi.

Road Rules & Regulation Awareness om, Pathian thu awi i hihngal leh midangte ading leng ngaihtuah ni-SP
Lamka, June-2: Environment Friends, CCpur saina in tuni in Hiangtam Lamka a YPA Hall ah ‘One Day Awareness Programme on Road Rules & Regulations and Motor Vehicles Act 1988’ om hi. Huai ah Demmang Haokip, Vice Chairman, ADC/CCpur in Road Rules & Regulation tawh kisai Booklet kibawl hong hi. Aman a genna ah khawpi sungah gari nei tam deuhdeuh a, traffic rule hoihtak in theilehang accident omlou phialding hi’n gen hi. Naupang te’n nu-le-pa thumanglou in gari hekkhia uh a, nu-le-pa te’n a tuahsiat ding kia uh lung himawh hi’n gen hi. Gari accident hilehang ei leng sithei, midang leng sithei, aliau ding gari neite mah hihziak in booklet kibawl hoihtaka kuapeuh in sim a, theih kia a hunsamai lou in zui chiat ding in ngen hi.

L.Mangkhogin, IPS, SP/CCpur in a genna ah kha 7 vel paisa apan Traffic rule kibawl a bawhsia tunitan omlai a, khangtou loulua i hi chi’n gen hi. Gari accident hun ah luangman ding leng nei zoulou, beh-le-phung kaikhawm a luangman piakngai hialte i hihdan uh gen a, neihzawh sunsun a gari hoihtaktak leikhiate i hihdan gen hi. I lampite uh neulua a, Shaktiman gari taina ding lela hun, gari leithak kibehlapzel, mihing pung deuhdeuh lampi bawltu ding lah kuamah omlou, lungkham huailua chi’n gen a, alampi omsun bel traffic control hilel hi’n gen hi. Mahni leh midangte bitnang in traffic rule zuiht poimawh hi’n gen a, huai ding in kuapeuh pankhawm poimawh hi’n gen hi.

Khaikhopau Ngaihte, SDC HQ, DC’s office in agenna ah Awareness program saitu Environment Friends, CCpur-te pahtakthu gen a, lampi geia workshop bawlte’n blacktop tan lampi ah gari koih theilou uh ahihdan gen a, Police-te’n lamlian jula workshop bawlte check thei in Traffic Police te’n full power nei uh chi’n gen hi. Passenger gari te’n passenger lak hun in pilvang a, mawkkhawl phutphut lou ding, side deuh a khawl ding in ngen a, passenger kimawktuh lou din ngen hi. Gari teng lakah adiak in Winger gari-te hattai theilua uh a, nitak hun in light down kuamah omlou ahihdan gen a, Wingger gari te leh Diesel Auto te’n nitak hun a light down zel dingin theisak hi

Lamkhosiem, DTO/CCpur in a genna ah Motor Vehicle Acts theihkia hunlou a, zuih teitei poimawh hi’n gen hi. Motor Vehicle Acts zui chiat lehang mihing hinna tampi ki-save hi’n gen a, helmet om ziakin accident a siding tamtakte hinna humbit a om hi’n gen hi. Awareness Programme ah H.Sinzalam, Project Co-ordinator, Lamka Driving School in ‘Road Rules & Regulations’ sinsak a, Dr R.Sanga in Motor Vehicle Act, 1988 chih pansan in sinsak hi. Tuni program ah line tuamtuam atai Diesel Auto, Taxi Jeep leh School Van-te pan member tamtak paikhawm uhi.

LATSEA pawlin meeting poimawhtak nei (Photo om ding)
Lamka, June-2: Lamka Traders & Self-Employed Assn(LATSEA) pawlin tuni sunnung dak 2.00 in New Lamka a Sauliim Restautant ah meeting poimawhtak nei uh a,huai ah LATSEA atel Lamka khawpi sunga Vai mahajon lian mi 9 leng tel uhi.Huai ah LATSEA heutute’n mipi vantangte khualna in nektheih leh dawntheih thilte kia hilou dukan a van kizuakte himhim ahun bei(expired) nungin mihing damtheihna adia leng lauhuai ahihman in kuama’n zuak lou ding in genkhawmpih uh a, huailou in bandh, strike leh blockade a om hunchiang in leng van neihkholhsa(stock a omsate) himhim aman ut dandan khansak chih kuaman chinglou ding in leng thukim uhi. Huaibanah Labour law dungzui in kal 1 sungin ni 1 dukan khak ding chih ahih dungzui in Sabbath(Kiginni) a khawlte chihlouh midang in Pathianni(Sunday) in khawlna hun a zang din thukim uh a, hileleng hotel leh pharmacy-te bel huamsaklou uhi.

New Bazar a niin paite mat hita ding-CEO
Lamka, June-2: New Bazar Bus parking gei a niin paihna mun ah Dist Council-te’n Waiting Shed bawlsawm in nasepna munteng umkual hial uh a, himahleh huai kimlak ah kuate hiam in niin tamtak paizel uhi. Huai mun ah kuama’n niin painawn lou ding in CEOADC,CCpur in theisak a, niin pai a om a theihkhiat ahihleh Police-te matsak banah dan dungzui in action lak hiding chi’n leng gen hi.

Army recruitment rally kipan ding
Lamka, June-2: Lamka Public Ground ah 27-Sector, A/Rifles-te saina in June 3- 8, 2013 sung zingsang dak 7.00 zelin Army Recruitment Rally om ding a, huai ah Assam Rifles a General Duty (Riflemen) leh CAPFS nuai a semding hunkhop lak hiding hi. Recruitment rally atelding te’ siamna aniampen in class X passed ngai ding hi. Recruitment rally pen merit list tungtawn in Shillong apan select bawl hidin thusuak kingah hi. Army recruitment rally neihzawh June 9,2013 in written test om ding a, June 13, 2013 in a result suak ding a, June 15, 2013 in Medical test om ding hi. July 6, 2013 in Shillong apan select a omteng in order of merit list suahkhiat hidin kigen hi.

Accident ziakin liam
Lamka, June-2: Bijang khawtaw Tedim road ah zan nitak dak 9.00 velin Diesel Auto(No. MN-02A/2740) accident a, asung atuang Nimai (25) s/o Badal of Silchar liam a, Dist. hospital puaktun nungin doctor-te’n admit uhi. Huailou in tuni zingsang dak 6.00 velin Niangbiakhoih (1) d/o Khamsianlun of S. Munhoih tuni zingsang dak 6.00 velin tuisa ah kibuak kha a, amah leng Hospital ah etkol in om hi.

Sumsik valh in a gawl ah tang
Lamka, June-2: Ningzadim (3) d/o Manthang of Salem Veng, Lamka in tuni’n sum sik a muamlai valhkha in dist. hospital puaktung in om hi. Aman Re. 1 sik(coin) a valhkhak nungin nak haksa a sak ziakin a innkuante’n theikhia uh a, agawl a tang ahihdan theih nung un doctor-te’n minor operation bawlin a gawl tawnglam ah lekhe thei uh a, dist. hospital ah etkolin oml lai hi.

STC/BSF a ATM zat phallouh hun om

Lamka, June-2: SBI/Pearsonmun Branch kiang a om STC/BSF huangsung a SBI’ ATM booth ah bangtanhiam paisa akipan BSF thuneite’n mipi vantang zat dinga kibawl ATM pen ni khat in dakkal 2.30 sung 2vei mipite’n zang theilou din theisak uhi. Thutut kingahdanin security tawh kisai nawngkaina om ziakin STC/BSF huangsung ah huai ATM booth koih in om a, mipi tamtakin nitengin vanaih uh a, himahleh nitaklam dak 4.00 akipan dak 6.30 kikal civilian te’n zang theilou din BSF te’n hun bikhiah uhi. A khenchiang in zingkal leh suntanglai in leng poimawhna nei a sum lakhe dinga kisate lut saklou sek uh chihthu kiza hi. BSF te’n mipi zat theihlouh dia hun bikhiah a bawluh mi tamtakin lamdangsa ua, SBI property ATM booth leng BSF te adia kikoih hihiam chi’n dotna tamtak kingah hi.

Cl-X leh XII lawhchingte kipahpihna
Lamka, June-2:YPA Pearsonmun Unit in BSEM leh CoHSEM banah CBSE saina a tukum Class-X leh XII examna a lawhchingte June 4, 2013 nitak dak 6.00 in YPA Pearsonmun Unit Office ah kipahpihna leh pahtawina hun zang ding uhi.

Missionary Rina’ zi Vanneihthangi si
Lamka, June-2: Ms. Vanneihthangi (28) w/o Missionary D.Z. Rina, tulelin NTBCA a Missionary sem, a omna Kachherichara, Tripura ah si a, apasal leh ata kum 3 mi khat leh kha 3 lel hipan nusia hi. D.Z. Rina leh azi in hun bangtan hiam paisa in Tripura state a singtang khua ah Missionary sem in kuankhia uhi.

Compartment-te’n form fill-up ngai
Lamka, June-2: BSEM saina in Feb 27-March 20, 2013 sung HSLC examination, 2013 om
May 20, 2013 in result puankhia hi a, huai a Compartment mu student te’n akinlam in mahni kaina school thuneitute kimuhpih a, form fill-up ngai hi’n thusuak kingah hi.

Suunna
T.Vialkhongai(73) m/o T. Doulian of New Lane, Bungmual tuni zingsang dak 3.00 velin sungkhawh ziakin si a, tuni mah in Bungmual hanmual ah kivui hi.

IMPHAL NEWS
CM khuallian in pang ding
Imphal, June-2 : The 6th All India Badminton Championships-2013 kichi June 4-7, 2013 sung Khuman Lampak a Indoor stadium ah om ding hi. Huai ding tawh kisai in June 4, 2013 zinglam dak 9:00 in Chief Minister O. Ibobi khuallian a pang in hongkhe ding hi. Huai ah Functional President in PHED Minister I. Hemochandra pang ding hi. June 7, 2013 in hunkhakna leh final match kithuah om ding a, huai hun ah Chief Guest in Manipur Governor Gurbachan Jagat pang ding a, Functional President in Dy. CM Gaikhangam pang ding hi.

Police te’n khamtheih tamtak mukhia

Imphal, June-2: Sekmai Police te’n report a muh ziakun zan nitaklam in TATA Truck (AS 11AC/6348) khat khawlsak in a checkna uah mi 2 akipan khamtheih tamtak mukhia uhi. Police te’n Md. Ziauddin @ Sana (38) s/o Md. Nizamuddin of Lilong Chingkham Makha Dam leh Md. Shiraz Khan (19) s/o Nahatomba of Thoubal Moijing mankhia uh a,amau akipan in carton box 6 akitun SP Capsules 41314; N-10 Tablets 4500, LUPICOF Codeine Syrup 380 bottles leh RCOF Codeine Syrup 100 bottles mukhia uhi. Sekmai area a nupi pawl in a theih phet un Sekmai Police station a kipunkhawm in khamtheih matkhiakte mipi ma a hal dingin nawh uh a, OC Sekmai in atung ua thuneite apan phalna lak masak hi’n ana genpih hi.

Commando te’n mikhat soisa
Imphal, June-2 : Imphal a ki-enkolsak ding a hawh Kh Paka (33) s/o (late) Modhu of Ething Mamang Leikai zan nitak dak 10:00 velin Bishnupur bazar ah Commando te’n a tuanna Gypsy No. CDO 13 akipan kaikhia in soisa uhi. Thiltung tawh kisai in tuni in Peaceland Club, Ething Heikol Leikai Secretary Deben leh Kh. Paka sanggamten media-te kiangah soisak a om Paka a khaw zakna lam buai ziakin Imphal a Raj Polyclinic ah etkol a om hidan in gen uhi. Commando te’n Gari a khawlsak lai un asung ah numei 2 telin mi 8 tuang uh hi’n kigen hi.

Gam kituh ziakin inn hihsiat in om

Imphal, June-2 : S. Bihari s/o S. Lukhoi Singh of Wangkhei Angom Leikai tenna inn tuni zingkal baihtak in Moirangthem Biren s/o (late) Ningthou of Palace Compound in JCB zang in va hihsiat sak hi. Huai hun in Moirangthem leh a sanggampa Hemanta (ex-MLA, Wangjing Tentha) a security escort-te tawh va hawhkhawm ua, va hihsiatsak vek uhi. Thiltung tawh kisai in S Bihari in Imphal East a CJM ah case file a, tua tawh kiton in Court in kintak a Moirangthem Biren man ding in thupiak bawl hi. S Bihari in tuni’n press-te kiang a genna ah, thiltung tawh kisai Porompat PS ah complaint thehlut a, Moirangthem tung a action la dingin ngen hi. Thiltung bel gam kituhna ziak hi’n kigen hi.

Mt. Everest kaltung kipahpihna om
Imphal, June-2 : NCC Group Headquarters a (M) Bn, apan Phairembam Bidyachand Singh leh UO Shangkar Singh ten May 19, 2013 in Mount Everst tangdawn a kaltung uh kipahpihna in tuni’n DM College campus programme zang uhi. Huai hun ah mi 2te leh a innkuante uh banah mipi tamtak paikhawm uhi. Huai hun ah Col. Amit Hajela, CO 14-Bn, NCC Imphal in leng uap hi.

Liberal College ah thau khah
Imphal, June-2 :Luwangsangbam a Liberal College ah tuni’n meltheihlouh mi 2 valut in round bangzahhiam thau vakhah uhi. Thiltung tawh kisai aziak thei kuamah omlou ua, bangziak a hibang thil vahih uhiam, chih leng a thei omlou hi’n kigen hi.

Lock-up ah amah leh amah kithat
Imphal, June-2 : Moirang police te’n numei tawh kitaipih a ngawh ziakin YBiren Singh (30) s/o Y. Kunjo of Lamjao Makha Leikai man in lock-up ah koih uh a, tuni zinglam dak 8:30 in Y. Biren luang muhkhiak in om hi. A kigendan in Y. Biren bel a ngaihzawngnu tawh kitaipih hi a, numei nu-leh-pa te’n a theihphet un police ah complaint bawl uh a, huai apan Y. Biren mat in om hi. Aman a numei’ nu leh pate’n police a complaint bawl uh chihthu a zak phet in kingaisia a, amah leh amah kithat hidi a gintak hi’n kigen hi. Thusuak kimu in a genna ah Y. Biren bel zi neisa hi a, a ngaihzawngnu kiangah zi neilou dan in kigen chihthu om hi.