Lawhchinna di’n kuhkalna, hun zatdik leh nu-le-pa’ thuman poimawh - SP
Lamka, May-23: Rayburn College ah “To Success in Life” chih thupi a nei in tuni’n Career Guidance om a, L. Mangkhogin Haokip, IPS, SP/CCpur in Special Guest apang in huai hun uap a, “Kuhkalna, hun zatdik leh nu-le-pa zahtakna tellou in hinkhua ah lawhchinna a om kei” chi hi. Aman agenzelna ah hiai thil 3-te zangsiam peuhmah in Pathian apan vualzawlna ngah ding uh a, huaite lakah kuhkalna poimawh diak ahi, chi hi. Hun zatdan siam a poimawhdan leng gen a, i society sung ua student-te’ hun mangthangsak thei ding thil tuamtuam a tamluat ziakin huaite koihkhiak theihteng koihkhia a, lam-etna sangtak neih ding ahihdan student-te hilh hi. Tuni’n Chapel ah Nangmuansang Lethil, MBA, IIM Ahmedabad in Class XII Arts leh Commerce student-te sinsak a, Auditorium ah T. Lianchinpau, Vice Principal, Rayburn College in Science student-te sinsak hi.

Addl DGP in Lamka pha
Lamka, May-23: L.M Khaute, IPS, Addl DGP in tuni’n Lamka hongpha a, Lutcha @ L.. Thanglet,BA, BT retd DI of School f/o Henglianthang Thanglet, Addl CEO/CCpur gal in huaizawh in mun tuamtuam pha a, sunnung in Imphal ah kiknawn hi.

Committee in Screening bawlding
Lamka, May-23: Maniram Sharma, IAS i/c DC/CCpur makaih in ama office chamber ah May 24, 2013 sun dak 12:00 in National Foundation for Communal Harmony (NFCH) a Dist Committee meeting om ding a, huai ah case thak 9 omte Committee member te’n screening a bawl ding ban uah NFCH akipan financial assistance tungtang leng genkhawm ding uhi.

Ngabeng tuahsia in akhut puakzak
Lamka, May-23: Kaisianlal Samte(30) s/o Soikhohau of Milongmun, Thanlon sub-divn, zan sunnung dak 1.00 velin Milongmun gam a Gamhui-lui ah bomb zanga ngabeng lai khoihkhial kha in a bomb puakzak a, ataklam khutbom teng kisia hi’n kigen hi. Thiltun nungin aman innlam zuan thei a, tuni’n Dist Hospital ah admit in om hi.

‘Meritorious Award’ peding
Lamka, May-23: New Lamka West MDC H Mangchinkhup EM/ADCC in May 26, 2013 sunnung dak 1.00 in Bungmual a a tenna inn ah a bial New Lamka West huamsung apan tutung a Class X leh XII zouthakte kipahpihna program neihpih sawm hi. Huai hun ah class X a marks percent mutampen kiang ah anu (late) Pauzaching theihgigena ding Meritorious Award pekhe ding a, Class XII(any stream) a percent sangpen kiang ah pa (late) Lianzamang Hauzel theihgigena dinga Meritorious Award a bawlkhiak peding hi. May 26 a lawhchinna ngahte kipahpihna program zat hun ah abial sunga class X leh XII passed teng teldingin chial a, Class X leh XII zouthakte’n amin uh, pa/nu min, kaina school/college leh mark muhzah New Lamka West bialsung a Village Authority Chairman/Secy te’ kiangah May 24, 2013 tan a pekhawm dingin ngen hi.

Lei (bridge) baan hihsia
Lamka, May-23: Zan nitaklam dak 3:00 vel apan Lamka khawpi ah vuah tamtak a zuk ziaka hawktui luangin Lanva-lui liansak a, Lanva leh New Lamka kawmtuahna lei(bridge) ah nin leh gawbul a awk ziakin akim leh kianga tenna inn 15 ah luitui leh buannawi luanglut hi. Maban ah Lanva-lui atam nawn hun ah lauhuai theiding a patauh ziakin phatuanngai mi bangzah hiamte'n tuni'n Lanva-New Lamka kikawmna leibaan hihsia uh a, tui tam nawn hun ah tui luangkhe thei ding hi'n kigen hi.

Copper T koihdan training
Lamka, May-23: DFWO Conference Hall ah May 24- 29, 2013 sung IUCD (Copper T koihdan ) sinsakna om ding a, huai ah Dr Binakumari, MO PPP Centre; Dr Nabakanta Sharma, JNIMS/Imphal leh Dr VC Pau Tonsing, DFWO te'n sinsak ding uh a, PHC a i/c Medical Officer teng telding uhi.

Class X & XII zoute kipahpihna
Lamka, May-23: All Tuima Seino Assn leh G.Suanchinpau, MDC (Lungthul) pangkhawm in June 10, 2013 in Lungthul block nuai a class X & XII zouthakte kipahpihna program om ding hi. Huai ah G.Suanchinpau, MDC khuallian hiding a, Guest of Honour in David Piaklian, MPS, SDPO/CCpur pang ding hi. Lungthul block nuai a class X & XII zouthak te’n June 4, 2013 tan in New Lamka a Creative Photoshop ah registration bawltheih ding hi’n kigen hi.

Sabbath ni in zekai ding
Janglenphai & Boljol area a Manipur Express agent/hawker Haokam in Sabbath ni(Saturday) zingsang tengin biakna hun zang masa ding a, huaizawh zinglam dak 9.00 velin News hawm kipan sek ding ahihziakin huai area a News late’n theisiam dingin kon ngen uhi.
-Circulation incharge
Manipur Express.

Kum 15 paisa apan omna kitheilou
Lamka, May-23: Pausonmuan(27) s/o H. Pauzalian of Gangpimual village kum 15 paisa 1998 in Rajasthan sung Raipur a orphanage a omdia kuan tunitan a innkuante tawh a kithuzaklouh ban uah a omna leng a innkuante’n theilou uh a, a zondan ding thei tuanlou uh hi’n kigen hi.

Suunna
B. Langkhothawn (85) f/o Jamkhothang of Hausa Veng, Bungmual tuni zingsang baihtakin teknat ziakin si a, Bungmual Hanmual ah kivui hi.
Chingman m/o (late) Th. Lutkhopau of Bethlehem Veng, Rengkai zan nitaklam dak 4.00 velin tekna in si a, tuni'n Rengkai Hanmual ah kivui hi.
Baby Kimnunhoih (9 months) d/o M.Thangminlun of Vengnuam, New Lamka tuni zingsang in lungtangna in si a, YPA Hanmual, New Lamka ah kivui hi.

AR te’n VIP gari minute 10 sung hihbuai

Lamka, May-21: Tuni sunnung dak 2.30 velin T. Manga Vaiphei, Chairman, MTDC banah MLA leng hikawm, escort tawh Santing pha khin innlam zuanlai Mualhoihchiang khua a Assam Rifles check gate ah khamkhawl(detained) a om in gate khak khum hi a, constable khat in registration bawl dingin theisak hi. Thutut kingahdanin check gate a duty constable khat in T. Manga Vaiphei kiangah “Sir, na gari-te registration bawl ngaiding chin gen a, “ Registration na bawl nuam uleh bawl un” chi’n aman dawng hi. Registration bawlzawh nungin duty masapen in paisuak sak a, himahleh akiangnai lamkhang a om constable dang khat in register dingin ngen nawn a, minute 10 sung hihbuai uh hi’n kigen hi. Thiltun hunin escort tawh kiton ahihbanah VIP light leng om hi a, akuanlam un leng AR te’n theikhin uh ahihbanah MLA gari pai masa hi a, anung ah akuan ua gari omzah mah in zui uh hi’n kigen hi. Thiltung lamdang sak ziakin AR constable-te, T. Manga Vaiphei, MLA in thuhilh a, huai post enkol 38-AR CO lenlel Colonel PK Singh CO omlou in Imphal ah omlel laitak ahihdan leng theikhia hi. Commanding Officer(CO) kansui in SP/Ccpur kianga theisak in amau level in sai ding uh chi a, SP/Ccpur kianga theihsak nungin aman information bangkim AR kianga piak hi’n gen a, SP in AR-te CO kiangah MLA tunga ngaihdam ngen dingin theisak hi’n gen hi.

Bialtu MLA in Henglep biala innsiate langva leh antang pia

Lamka, May-21: T. Manga Vaiphei, MLA(Henglep A/C) & Chairman, MTDC in Henglep sub-division sunga huihpi in tenna inn 27 a mutsiatte dinmun enkhe kawm dingin tuni;n Henglep biala khaw tuamtuam pha a, inn kisia neitute panpihna in langva bundle 4 leh antang bag 1 chiat pia a, huai hun ah mi poimawh tuamtuam hunkhop in leng zui uhi. MLA in Santing khua a agenna ah emergency thil ahihman in govt apan huhna(fund) omkei mahleh mipite haksatna thuakpih ziakin amah sum sengin vanzat poimawhte lei in a biala haksatna thuakte veh a zinkhia hi’n gen a, tuni a step masa zawh nunginstep 2na dingin inn kisiate huhna piak hiding chi;n gen hi.

Constituency dangte sangin Henglep tuantualzaw ahihman in langva leng MLA dangte tawh in abial ah pekhe tampen ding hi’n gen a,tuni ate sim tellouh in January-April, 2013 sungin inn 57 ading langva pia hi’n leng gen hi., PMGSY suahkhiak hunchiang in Henglep mipite’n hamphatpih mahmah ding in lrng gen hi. Aman agenzelna ah langva tamtak piak hizel mahleh khawpite a innlamna dinga akizatsek ziakin Henglep bial tul hulhul a, huai deihlouhna in tuni a khawsung mahmah tawn a piak a om ahi chi hi. Langva leh antang piaknate bel Tuikot ah innkuan 1 piak hi a, Tuilaphai a New Phaisat ah innkuan 2, Old Phaisat ading 1 leh Tongkhojou ading 3 pekhia hi. P. Sejol ah innkuan 1 pia a, Tlanghoihmuol ah innkuan 2 ading S. Kholian ah pekhia a, Aina ah Nungsai ading 2, Santing ah Saichang ading 9 telin Kawnpi ading 5 pekhia hi. T. Manga Vaiphei in Kaimunnuam khawthak honna leng nei hi.

Shaktiman accident: mi 14 liam

Lamka, May-21: Lamka apan Henglep zuan Shaktiman tuni sunnung dak 1.00 velin Mualdak leh Damjol kikalah accident in lamkhang ah nihvei kilep a, asung atuang passenger 14 teng liam uhi. HQ Veng a om 46- A/R te’n Ambulance leh gari a vadelh in accident a liamte tuni nitak dak 9.20 in Lamka pawtung uh a, Dist. hospital ah admit in om uhi.

Aliamte lakah Lema (35) s/o Soilen of Sanglel(Henglep) serious pen a, a khabe guh leh veilam khut kitan in alutang vang hi. Kamminlal (33) s/o Lhunneh of Mollen in amai leh a pumpi nasa hi. Lamgin(40) s/o Lhunneh of Mollen a taklam pheipi guh kitan a, Khaijang (37) s/o Lhunneh of Mollen akawng lak liam hi.

Midang aliamte lakah Jamtinlal(35) s/o Lunkholam of Kingkin, akhe leh kawng liam a, Doulian(53) h/o Lamlhing of Henglep, alu leh khuk liam hi. Lamsemlen (23) s/o Seithang of B Kholmun, amai leh akhut naktakin liam a, Thanggin(75) h/o Kimphel of Henglep atawbou apan anuailam teng khawphawklou kichi hi. Jangkhohao Baite (61) h/o Ngamzalhun of Molnom a nakguh liam in serious lou a, Lamlhing (40) w/o Doukholen of Henglep, a taklam khe langnih nasa a, Lamminlian (17) s/o Lalpu of B Kholmun leng liam hi. Hatnu (53) d/o T.Tongkholet of Gangte Veng in alu nasa a, Hoihneithem (18) d/o Thenmang of Henglep in a nungzang nasa a, Lamneihhat (14) d/o Lalpu of B.Kholmun a taklam khut liam hi.
Aliam Hospital a omte T. Manga Vaiphei, MLA(Henglep) in veh a, MDC khenkhat in leng Henglep area tan vadelh uhi. L. Mangkhogin Haokip, IPS, SP/Ccpur; Dr. N. Paulginthang, Med. Suptd; KKL Henglep Unit; ZYA GHQ; KKL GHQ; KSO makaite banah pawl tuamtuam apan makaite’n damloute veh uhi.
Village Authority te’n khauhtakin nan sawm

Lamka, May-21: CCpur district ah MGNREGS tawh kisai gen-le-sak tam mahmah a, huchi kalah, tutung’ 3rd phase a nasepna dingin Lamka TD block adia sum paite’ lakah 25% lel a a khahkhiak(release) sawm ziakun Lamka block a Village Authority tuamtuam 53 om te’n lungkimlouh thu taklang kawmin, committee khat bawlkhe hial ua, kuama’n release order la lou ding leh hibanga kimawlpihna maban ah khauhtak a maituah dingin thupukna khauhtak la uh chihthu kiza hi.

Tuni nitaklam dak 3 in Thangzam Road a T Dongzakai Gangte’ inn ah Lamka block huamsunga Village Authority Chairman leh Secretary teng meeting in Lamka TD Block Village Authority Council(LTBVAC) dinkhia uh a, nasepna dia sum hongpai bangchidan a 25% lel piak a omdek mawk uhiam chihte ngentel taka suizui ding uh ahihdan gen kawmin, hibang kinelhsiahna pomtheilou uh ahihdan leh tu in LTBVAC makaih a masawn ding uh ahihdan puang uh a, nasepna dia sum hong pai lakah 25% lel a nasep ding chih thil hithei vuallou ahihziakin, release order/cheque-te laklouh vet ding ahi chi’n thupuk uhi.

Chief/Chairman leh VA Secy paikhawmte’n LTBVAC makai dingin Thangkhosuanmung Guite, Paupi Ngaihte, Thang Khan Kham Hatzaw, V. Pauzamawi, Solomon, Zamlian leh T Paukhanlian te Chairman, V/C, Secy, Asst Secy, Fin Secy leh Inf Secy & Asst Inf Secy dingin telching ua, Block huamsunga hausa (Village chief) teng Advisory board dingin guang uhi. “Thuthak om ma village authority kuamah in RO/cheque lak louh himhim ding” chi’n tuni meeting ah thupuk ua, huai kawm in, MDC khenkhat in Village Authority te nelhsiahtak a na asepsawm uh pomtheih hilou dinga, maban ah kiphinna thupitak om thei gige a, a poimawh leh court tanpha ah thil omdan tut hiding chi uhi.

‘SK Thadou nuaiah Army-te om’: UTLA
Lamka, May-21: United Tribal Liberation Army (UTLA) a Dy Defence & i/c Ministry of Inf. &Public Relation Franky in media tungtawna thupuan a bawldan in a cadre uh Ngambom Singson s/o Lalkeng Singson(army no.1015) leh Hencha @William (army no.1063) apaisa May 16, 2013 zankhang in Kadamtala a om Maj Anand makaihin 22- Assam Rifles pawlin Ngahmunphai village, Tamenglong District apan pimang uh a, huai tawh kisai UTLA in lamdangsa mahmah hi’n gen hi.

SoO a suaikai UTLA tungah bangziaka 22-Assam Rifles-te hichi gamtat mawk uhiam, poikhoihlou cadre 2 te bangziaka mi pimangtu a ngawh in pimang a om uhiam chi’n UTLA in dotna bawl uhi. Huailou in bangziaka SK Thadou’ khetbuk a 22-A/R te om thei uhiam chih dotna bawl uh a SK Thadou kichi UTLA member hikhalou himhim a, huai kawm in,aman UTLA chief danin kigen mahleh kuama’n a gintaklouh ding ahi chi uh a, kichiamna leng a neikei a, amah leh amah UTLA chief dan a kibawl ahi chi uhi. UPF leh KNO adia melma lianpen SK Thadou ahi chi’n Franky in athusuah ah taklang hi.S K Thadou makaihin pawlkhat in May 16, 2013 nitak dak 9 velin Phaitol a om Kimneikhol tenna inn haltum uh a, hiai pen SK Thadou in UTLA-te’ gamtatna ahi chi zawmah chi uhi.

ADC Chairman in Album hong

Lamka, May-21: Kimbawi in a sanggamte (late) Chingoulal @ Lalal, (late) Niangsuanbawi @ Niangbawi leh (late) Chinsuankham @ Khakham theihgigena ding leh YPA phuahna a Album abawl‘Baangta Ning’ Vol.-II kichi sunnung in Lanva a TCCC Hall ah Langkhanpau Guite, Chairman ADC/CCpur khuallian apang in hong hi. Huai ah Guest of Honour in L.Kamzathang, Social worker pang hi.

Chairman ADC in agenna ah Kimbawi in a sanggam sisate theihgigena dia a la(song) agelkhiat te hongsak khiat phat-huai sakthu gen hi. Gamngaihla, zawlla (itna la), Pathian ngaihlate Pathian akipan ngen hi’n gen a, ahun leh mun zil a sak poimawh hi’n gen hi. Maban ah Kimbawi in la(song) phuak zel a, Album a bawltouh zel deihthu gen hi. Album honna hun ah lasiam tuamtuam apan lasak ngaihna om hi.

Rayburn College Career Guidance
Lamka, May-21: New Lamka a Rayburn Chapel ah May 23, 2013 sunnung dak 12:30 in “To Success in Life” chih thupi a nei in Rayburn College Career Guidance 2013 om ding a, Rev Khen P.Tombing, Principal Rayburn College in vaidawnna thu gen ding hi. Huai hun ah L.Mangkhogin Haokip, IPS, SP/CCpur in career guidance tawh kisai thugen ding a, huai zawh in class XII (Arts & Commerce) student-te ading in Career talk omding a, Nangmuansang Lethil, MBA, IIM, Ahmedabad in sinsak ding hi. Science student te’ ading in Rayburn Auditorium ah career talk om ding a, T.Lianchinpau, Vice Principal Rayburn College in sinsak ding hi.

Anti-Terrorism Day zat in om

Lamka, May-21: Mannuamching, MCS, CEO, ADC/CCpur makaih in tuni sun dak 12:00 in DC’s office a Conference Hall ah ‘Anti-Terrorism Day’zatna om a, KSO Gen HQ in Manipur ah dakkal 24 sung general strike a puan ziakun DLO tamtak htel theilou uhi.

Biometric Awarenss campaign
Lamka, May-21: MLA(60-Singngat A/C) leh SDO/Singngat pangkhawma saina nuai ah May 22,2013(Nilaini) zinglam dak 11.00 akipanin Singngat Community Hall ah ‘Biometric Awareness Campaign’ om ding hi. SDO/CCpur in Singngat Sub-divn a hausa(village chief) leh mipite huaihun a telchiat ding in theisak a,huai huna tellou hausate’n amau khua a biometric capture a ginat keileh mawh apaw ding uh chi’n thupuan bawl hi.Singngat sub-divn a Deptt tuamtuam a Head-te leh staff teng leng telding in SDO in theisak a, media tungtawna thupuan chihlouh theihsakna dang bawl hilou chi’n leng SDO in taklang hi.

CCpur in Champion hihna la

Lamka, May-21: AMFA saina in Imphal a Artificial Turf Football Ground ah ‘23rd Inter Dist under-16 yrs boys football tournament’pailel a, tuni sunnung dak 1.00 in CCpur leh Kakching final kimawl uh a, CCpur in goal 4-0 a zou in Champion hihna la uhi. Tuni a Imphal akimawl dingte zinglam dak 10:00 in Hiangtam Lamka a CDSA office ah G.Suanchinpau, MDC in sawlkhia (flag- off) a, bus 1 leh 4-wheeler gari 10 in kuan uh a, nitaklam in Champion Trophy tawh hongtung uhi.

ZRO in Geneva Call tawh suai kai
Lamka, May 21: Geneva ah May15, 2013 in Zomi Re-Unification Orgn(ZRO) in Geneva Call leh “ Deed of Commitment for the Prohibition of sexual violence in situations of armed conflict and towards the elimination of Gender discrimination” ah suaikai uhi. ZRO sik-le-tang in Calvin H. Secretary, External Affairs, ZRO leh James Thangluai, Director Defence te’n May 12, 2013 in Lamka apan Geneva zuan in zinkhia uh a, ZRO sik in ‘Geneva Call’ leh ‘Deed of Commitment’ asuai kai in May 19, 2013 in Lamka hongtung kiknawn uhi.

Free Textbook hawmna zouding
Lamka, May-21: HQ Veng a Vimala Raina H/S ah May 16, 2013 akipan ZEO leh Dist Council nuai a school tuamtuam ah class IV & V student te’ ading Free Text book kihawmkhia a, May 22, 2013 in zou ding uhi. Free text book hawm hun a lakhalou school te’n mahni DI of schools kiang ah lak ngai ding hi’n kigen hi. Free Text book kihawmkhia 2485 pha a, huaite CCpur block ah 622, Samulamlan block ah 508, Tipaimukh block ah 97, Thanlon block ah 245, Henglep block ah 623 leh Singngat block ah 390 hi’n kigen hi.

General Strike ziakin DTO mutheilou
Lamka, May-21: Zan sunnung in SP/CCpur leh DTO/CCpur makaih in SP office ah CCpur dist sunga gari association tuamtuamte tawh Traffic Awareness neihding tawh kisai joint meeting om a, huai a telkhalou gari associationte’n tuni zinglam in DTO/Ccpur muhpih ding chih himahleh KSO Gen HQ in General Strike apuan ziakin lemtanglou a, May 22, 2013 zinglam dak 10:30 apan kimuhpih ngai ding hi’n kigen hi.

Suunna
Mrs.Vungzam(70) w/o (late) T. Khamlian of HQ Belam Veng tuni zinglam in awmna in si a, tuni mah in HQ Veng hanmual ah kivui hi.

IMPHAL NEWS
CM makaih in Myanmar pha ding
Imphal, May-21:CM Secretariat ah tuni nitaklam dak 4:30 velin “North-East India-Myanmar Business Conclave” ah Manipur Chief Minister makaihna delegation team in Myanmar a Monywa leh Mandalay a phak ding utawh kisai High Level meeting om hi. Huai hun ah Manipur leh Myanmar kal ah Trade leh Commerce tungtang leh Manipur in Myanmar ah bang sector ah investment bawlthei ding hiam chi te’ genkhawm uhi. CM O. Ibobi makaih in Manipur delegation team mi 41 te’n “North-East India-Myanmar Business Conclave” tawh kizawi tawn in May 26, 2013 in Monywa leh Mandalay pha ding uh a, June 2, 2013 tan om ding uhi’ Delegation team ah O.Landhoni, MLA;Commerce & Indus Minister K. Govindas; Education Minister M. Okendro; PHED Minister I. Hemochandra; Works Minister K. Ratankumar; Parliamentary Secy M. Prithiviraj, Manga Vaiphei, MLA; D. Korungthang, MLA leh Manipur DGP Y. Joykumar, DPG tel ding uh hi’n kigen hi.

Strike leh economic blockade khawlsak

Imphal May-21: Kuki Students’ Organisation (KSO) Gen HQ in tuni zingsang dak 5.00 akipan dakkal 24 sung General Strike a puan uleh tuni zankim a kipan hunchiam omlou ding economic blockde “temporarily” in khawlsak phot uh chihthu om hi. Thu kizadan in Chief Minister O. Ibobi leh KSO Gen HQ heutute tuni nitaklam in CM office chamber ah dakkal khat sanga sawtzaw a kihouna uah CM in KSO te thilphut Police lakna ah singtangmi(ST) te adia back-log 474 omlaite Police constable 2000 lakna ding ah telsak(lak) hidia a chiam banah Manipur Police Housing Corpn Ltd a backlog 28 omlaite leng ST candidate-te guan hiding chi’n thuchiam bawl a,meeting zawh in KSO Executive te’n thil omdan a kikhupkhawm nung un General strike leh blockade kipan ding leng khawlsak phot uh hi’n gen uhi.UNA

Anti-terrorism Day zat in om

Imphal, May-21: Prime Minister-lui Rajiv Gandhi sih champha tawh kizoi tawn in tuni’n State govt. saina in “Anti-Terrorism Day” zat in om a, huai hun ah Chief Guest in Chief Minister O. Ibobi pang a, Functional President in Dy. CM Gaikhangam pang hi. CM in a thugenna ah maban ah pal ding tamtak om a, mihing hinna pammaih mahmah a, thautawi a helna pat sangin tutkhawm a kihoukhawm zawk hoih gen a, helpawlte’ kiangah leng lasting solution om theihna dingin govt. tawh kihouna pan dingin ngen hi. Huai hun ah Minister leh top official-te telin terrorism dou dinga kichiamna nei uhi. Manipur Pradesh Congress Committee in leng Congress Bhavan ah Anti-Terrorism Day zang uhi.

Election ah EVM zat dal ding
Imphal, May-21: Opposition party 11 te’n tuni’n Manipur Press Club ah Press conference nei uh a, huai ah Convenor Dr. Nara in mediate’ kiangah Delhi a ECI office ah May 10, 2013 in opposition political party te’n meeting nei uh a, huai ah national leh local political party 35 te’n va uap in election hun ah Electronic Voting Machines(EVM) paidan khek lam dang theih ahihziak in Ballot paper mah zang dingin phut uh hi’n gen a, Verifiable Paper Audit Trial(VPAT) zat ding chih leng a deihlouh thu uh theisak uh chi’n gen hi. Election hun a EVMs zat ahihsek ziakin Manipur a opposition party-te’n kiphinna pan ding a kithukim uh hi’n leng gen hi.

Commando complex ah bomb puak
Imphal, May-21: Thoubal district sung a om Pallel a Police Commando complex ah zan nitak in bomb hattak puak hi’n kigen a, huai ah asi leh liam omlou hi’n kigen hi. Police te’ gendan in helpawl hidia gintakte’n police complex kong lak ah bomb a kam uh a hat mahmah banah bomb puak ging leng apuahna mun apan kilometre bangzah hiam tan ah leng kiza hi’n gen uh a, thiltung tung tawh kisai in Manipur a Police leh security post om teng kiangah pilvang ding a theihsak hi un kigen hi.

Medical Board sitting om ding
Imphal, May-21:Manipur state nominee a MBBS/BDS course sinding lakna ding in 3% seat reservation luah ding loco motor disorder/disability(lower limp 50%-70% kikal) enchian dinga state govt in Medical Board a bawlkhiakte’n May 23, 2013 zinglam dak 10.30 in JN Hospital a Medical Supdt office,Porompat a Board Room ah Medical Board meeting om ding chihthu om hi.

RK Sanatomba Memorial Award
Imphal, May-21: RK Sanatomba Memorial Trust-te saina in Kangla Lanpung editor-lui (late) RK Sanatomba sih champha zatni ding June 30, 2013 in nasemhoih a telkhiak Reporter khut ah ‘RK Sanatomba Memorial Journalist Award’ piakkhiak hiding hi. Huai dingin Editor te’n amau establishment apan Jan 1,2012-Dec 31, 2012 sung nasemhoih tungtuan hi a a theih uh Reporter-te’ min leh thugelh 3-5 kikal a zekaipen in May 31, 2013 a tungman dingin Dr RK Nimai Singh,IAS, Chairman, RK Sanatomba Memorial Trust kiang tung dingin thon ngai ding hi.

MG Avenue a kizuakna inn luhkhia
Imphal, May-21: Civil Society bangzah hiam kigawmkhawm in tuni’n zinglam in MG Avenue a Nirmalabas School gei a kizuakna mun “Hotel Centre Point” kichi luhkhia uh hi’n kigen a, huai apan numei 3 leh pasasl 5 mat a omte’ Uripok a Kanglei Ima Lup(KIL) te’ office ah media-te’ lah hi uh a, himahleh thuchian kimzaw puankhiak hilou hi’n kigen hi. Hotel Centre Point Manager Uttam Das in Hotel neitu Jiribam District a Fulerton apan Manoj Das hi’n gen a, nitengin police-te’ telin customer mi 10-14 vel om gige hi’n gen a, mi 1 tungah Rs. 300-400 la zel uh hi’n leng gen hi. Akigen danin huai hotel building a innluah a omte’n Manoj Das in a thilbawl tawpsan dingin tamveitak thupia uh a, Police-te’ kiangah report a bawl uh action lak ahihlouh ziakin huai thu civil society-te’ kiang tut ahihnung a ki zuakna mun luhkhiak a om hi’n kigen hi.