HSLC examna result suak: kum 10 sunga din pass percent tampen, Topper 3na tan numei in la;Top 25-te lakah singtangmi telkhalou
Imphal, May-20: Board of Secondary Education Manipur(BSEM) saina in Feb 27-March 20, 2013 sung HSLC examination, 2013 om tuni nitaklam in a result puankhiak hi a, examna atel candidate 33,579 lak ah 24,267 in pass uhi. Huaite lakah 1st division a pass 10,668 hi a, 2nd division a pass 12,452 leh 3rd division a pass 1,147 hi uhi. Pass zah 72% tung a,kum 10 paisa(kum 2004) akipan etin pass percent tampen kum hi’n BSEM thsuak in gen hi. Tukum a Class X(HSLC) pass-te lakah 1st akipan 3rd position tan numei ngen in la uh a, top 25-te lakah singtangmi khat leng tel banlou uhi..

Nirmalabus School,Imphal akipan Miranda Mongbujam(Roll No. 27753) d/o M. Iboyaima Singh of Thangmeiband Lairenhanjaba Leikai,Imphal West in marks 500 lakah 480 amuh banah e,E,M,Sc,S.Sc subjects ah letter marks mu in Manipur pumpi ah khatna(1st) in pang hi. Little Flower School,Imphal akai Keisham Luxmirani(Roll No. 32532) d/o K. Rojenkumar Singh of Haobam Marak Keisham Leikai,Imphal West in marks 500 lak ah 479 a muh banah e,E,M,Sc,S.Sc subject ah letter marks mu in nihna(2nd) in pang hi. Nirmalabus School,Imphal akipan Ratimanjuri Devi Hajarimayum(Roll No. 27781) d/o H. Rajesh Sharma of Khwai Brahmapur Nagamapal,Imphal West in marks 500 lakah mark 478 a muh banah e,E,M,Sc,S.Sc subject ah letter marks mu in 3na(third) position la hi.

Subject tuamtuam a letter marks mu banah marks mutampen a taklat a omte lak ah Th. Thangsanlian(Roll No. 7335) of Don Bosco H/S,CCpur in marks 100 lak ah 93 mu in Paite subject ah marks mutampen a,Amelia Lalhmellawmum(Roll No. 9118) of Happy Heart School,CCpur; Lydia Lalneihlim(Roll No. 7681) of Mt Carmel School,CCpur leh Merina Lalngaihlu(Roll No. 8052) of Sielmat Christian H/S, CCpur in Hmar subject ah marks 100 lakah 93 muchiat uh a,huai subject ah mark mutampen in pang uhi. Thadou-Kuki subject ah Francis Lian Neisiel(Roll No. 15021) of Living Water H/S, Ccpur leh L. Chongpithem Haokip(Roll No. 31754) of Children’s Training School, Langol in marks 100 lakah 97 tuak mu in mark mutampen hi uhi.

Lalduhawmi(Roll No. 7370) of Donbosco H/S CCpur in Mizo subject ah marks 100 lakah 86 mu in huai subject a mark mutampen in pang hi.Zou subject ah Vungdeiching(Roll No.7136) of Blue Star Academy,CCpur in marks 100 laka 95 mu in mark mutampen in pang hi.Commerce subject ah Dimngaihnem(Roll No. 8754) of Rayburn H/S CCpur in marks 100 lakah 84 a muh ziakin huai subject ah mark mutampen in pang hi. Vaiphei subject ah P. Felboi Vaiphei(Roll No. 14965) of Children’s Treasure H/S CCpur in marks 100 lakah 93 a muh ziakin mark mutampen in pang a, Chonghoikim Misao(Roll No. 10570) of Model Englisah Hr Sec School, Saikul in marks 100 lakah 95 mu in huai subject ah mark mutampen in pang hi.

CCpur Private Centre ah tukum a exam mi 2672 hi uh a, huaite lak ah 1st division a pass 883 hi uh a, 2nd division a passed 1067 leh 3rd division a pass 18 hi uhi. Tutung a pass teng amin uh kimtaka suah ut-huai mahleh CCpur Private Centre nuaia candidate-te’min kia a kineih ziakin huaite page 2na ah hong kisuah hi. Ahithei tana felin suah ut-huai mahleh nitak nunga nasep ahihbanah zinglam dak 1.00 tana leng kibuaipih lai ahihmanin akimlou leh hihkhelh/suahkhelh a om maithei a,huchibang a om leh office ah hong theisak le uchin bawldik ngaite bawldik a suah hiding hi.

SP leh DTO makaih in meeting

Lamka, May-20: Tuni nitaklam dak 3:30 in L.Mangkhogin, IPS, SP/CCpur leh Lamkhosem, DTO/CCpur makaih in SP/Ccpur office ah CCpur dist sunga gari association tuamtuamte tawh joint meeting nei uh a, Traffic Police-te’ leng tel uhi. Huai ah Gangpimual-Tuibuong Diesel Auto Service Assn(GATDASA); Saikawt line Taxi Jeep Welfare Assn.; Taxi Jeep Service Welfare Assn. leh School Van Assn. makaite tel uh a,Traffic rule tawh kisai awareness program neih poimawh sakthu kikum uhi. Assn. tuamtuamte’n mawhpuakna kipia bangbang May 23, 2013 sunnung dak 2- 4 kikalin piaklut theihding in genkhawm uh a, thupiak ngaihsaklou Assn. a om leh dan(law) tawh kituak a action lakding in SP & DTO/CCpur in theisak uhi. Tuni a Assn. tellou tengin May 21, 2013 zinglam dak 10:00 in DTO/CCpur kimuhpih dingin SP & DTO/CCpur in theisak uhi.

PB sangin pukphut
Lamka, May-20: Pumkhokam(55) of Vengnuam, New Lamka tuni zinglam dak 11:00 vel in Thangjam Road a Bus parking sakzel ah BP sangin lampi lai ah pukphut in ataklam mittung tatliam hi. Huai laitak in Traffic Police te’ Gypsy a taikual te’n tuakkha in kua hihiam chih leng kanchian manlou in kintakin Dist Hospital ah pawlut uh a, huaizawh in amah theihchet hi a, a innkuante hilhthei uh hi’n kigen hi. Pumkhokam dinmun lauhthawng huailou a, mitamtak in Traffic Police-te’ phatuamngaihna leh ettontak sakthu gen uhi.

DTO in HSRP Centre hong

Lamka, May-20: Shimnit Utsch India Pvt Ltd leh DTO/CCpur pangkhawm a saina in tuni sun dak 12:00 in Lamkhosem, DTO/CCpur in Transport office ah ‘High Security Registration Plate (HSRP)’ bawlna Centre hong hi. Huai ah Shimnit Utsch India Pvt Ltd apan State Manager Paul Dami leh Management team apan mi 3 tel uh a, amau DTO/CCpur gari’ No. thak thuahsak uhi.

Shimnit Utsch India Pvt Ltd lam apan kiza dan in India gam pumpi ah tunung sawtlou in govt in gari tengah HSRP thuahsawm a, gari gu om leleng HSRP kithuah teng amau system tungtawn in zonkhiat theih hidin gen uhi April 12, 2012 in Imphal West ah HSGP patkhiat hi a, Hill Dist adia masepen di’n CCpur dist ah tuni’n honkhiat in om hi. Tukum sung in India gam pumpi ah High Security Registration Plate zatvek ding in order suah hidin gen uhi.
High Security Registration Plate kichi gari No. anung leh ma ah kithuah a, huai mun mah ah Chromium Base Hologram kichi “Chakra” tawh kibang sim om a, huai Hologram ah gari No. engine No. leh Chessis No. leng om hi. Gari glass ah leng belhtheih a, huai lakkhiat nang in gari glass teng khekkhiat vek ahihkei leh kilakhe theilou ding a kibawl hi’n kigen hi. DTO in agenna ah CCpur dist a gari registration bawlsa leh maban a registration bawl ding teng adin High Security Registration Plates alou theilou a poimawh hi’n kigen hi.

DDT 1st round pailel
Lamka, May-20: Dist Malaria deptt te'n CCpur dist sung a khaw tuamtuam ah Malaria positive tamna diakteng DDT 1st Round kap(spray) dingin telkhia uh a, tulelin Senvon PHC nuai a khua 10, Patpuihmun PHC leh Sivapurikhal PHC nuai a khua 32 avek in khua 42 ah DDT kap uhi. Tipaimukh area a khaw tuamtuam ah DDT 1st round kapna pailel zawh siang hun in DDT 2nd round pat ding dan ngaihtuah pan ding uh hi’n kigen hi.

ASHA te’n thousilen diah ding
Lamka, May-20: Buallian leh L.Phaimual kikal a khua 21 apan ASHA member te'n May 21, 2013 in amau area chiat a inn chih ah Bed Net Implegnation (damdoi ah thousilen) diah ding uhi. Malaria deptt apan HL Khai, Male Health Superviser in May 21, 2013 in ASHA member-te'n thousilen adiah uh enkhe ding hi.

Referee physical Fitness
Lamka, May-20: All Manipur Football Assn. (AMFA) saina in June 7, 2013 in Lamka Public Ground ah Referee’s Annual Physical Fitness Test leh Theoretical Examination (Cooper Test) 2013 om ding hi. Huai atel ut mimal leh Youth Club te’n May 31, 2013 tan in CDSA office ah thuchian kantheih ding hi.

Army te’n HPC(D) 1 man
Lamka, May-20: Police thusuak kingahdan in 46-Assam Rifles te’n May 18, 2013 nitak dak 9:30 vel in Khumujamba Meitei Leikai ah HPC (D) cadre Lalthanglien Hmar(19) s/o John Hmar of Muolvaiphei mankhia uh a, amah’ akipan 9mm pistol 1, magazine 1 leh atang 8 mukhia in Lamphel PS ah pekhia uhi. CCpur Police te’n a case lasawn in tuni’n JMIC/CCpur court ah dingsak uh a, JMIC/CCpur in May 24, 2013 tan Police khut a omdi’n phalsak a, CCpur Police te’n FIR No. 46 (5) 2013 CCP-PS U/S 400 IPC & 25 (1-C) Arms Act registered uhi.

SUUNNA
Mrs Zamlianvung (45) w/o S.Liankhansuan of Mission Road, Hiangtam Lamka tuni zingsang dak 6:20 velin kalna in si a, Lamka hanmual ah kivui hi.
Kaikhoding (30) s/o Ngulhau of Bukpi village, Thanlon sub-division zan in awklum sa a muhkhiak hi a, tuni in Bukpi hanmual ah kivui hi.
Lalrongak (61) b/o Zokungpui of Zenhang Lamka tuni in sinna in si a, May 21, 2013 in Zenhang Lamka hanmual ah kivui ding hi.

IMPHAL NEWS
State govt in Rs. 10 lakhs chiat peding
Imphal, May-20: North East India Expedition team atel Mount Everest mualdawn tanpha a kalsuak Manipur mi 5 leh a team leader of Dr L. Surjit pahtakna latsakna in Manipur govt in Rs. 10 lakh chiat ding in tuni a Cabinet meeting in thupukna bawl hi. Chief Minister O. Ibobi makaihna in tuni nitaklam dak 4.00 a Cabinet meeting in Manipur min hoihsaktute sum tamzaw piak lunggulh mahleh tulela sum dinmun haksat ziakin thil haksa ahihdan govt spokesperson M. Okendro in gen hi.

Mount Everest mualdawn tan a kal Puyamcha Mohon, N. Bidyapati Devi, Nameirakpam Chingkheinganba, Expedition a team leader Dr. L. Surjit banah NCC panlakna a Mount Everest Expedition a tel cadet Chirom Shangkar leh Phairenbam Bidyachand leng Manipur govt in kipahpihna in Rs. 10 lakha tuak piak ding in thukim a, huai sumte Planning department tungtawn a piak hiding uhi. First North East India Expedition atel Dr. L. Nelson, banah Waribam James leh Athokpam Robert leng govt in Rs. 1 lakh tuak peding chihthu om hi.

General strike leh Blockade puang
Imphal, May-20: KSO Gen HQ in kum 2008 a Police Constable lakna ah singtangmite’ ading (ST quota) hukdimlouh(black-log) 474 omte’ mun ah singtangmi candidate omte guan ding a nget uh govt. in a ngaihsaklouh ziaka lungkimlou in May 21, 2013 zinglam dak 5:00 akipan dakkal 24 sung General Stike puang uh a, State govt. in General Strike sungin a thilnget uh a lawhchinsak tuankei leh May 22, 2013 zankim akipan in National Highway te’ ah indefinite economic blockade om ding chi’n leng puang hi. KSO Gem HQ akipan kizadan in tuni’n Chief Minister O. Ibobi in kihou dingin chial mahleh KSO Gen HQ makaite kuamah va hawhlou uh hi’n gen uhi. UNA

Calendar Board in 5th Foundation Day zang
Imphal, May-20: Kangleipak Calender Board te’n tuni’n Manipur Press Club ah “Serve our Motherland” chih thupi zang in “the 5th Foundation Day” zang uh a, huai ah Chief Guest in Work & Transport Minister Dr. Kh. Ratankumar Singh pang hi. Functional President in Kangleipak Calendar Board President, W. Homendro Singh pang a, Guest of Honour in SEACO Vice- President, Kolomcha Achoubi Khuman leh ACOAM President, Angahal Soraisham, pang uhi. Huai tawh kizawitawn in Chief Guest in “Kanglei Khutpai-2013” book hongkhia hi’n kigen hi.

A/R-te gamtatdan mawhpaih
Imphal, May-20: United Tribal Liberation Army (UTLA) te’n May 16, 2013 nitak in Tamenglong district a Ngahmunphai Village apan 22-Assam Rifles te’n amau cadre Ngambom Singson (army no.1015) leh Hencha @William (army no.1063) a matkhiak tawh kisai mawhpaihthu a puan ban uah bangchidan a SoO nuai a om UTLA cadre- te’ thu kichian tak omlou a manthei uhiam chi’n gen uh a, khawta a lungmuang taka omlai Railway worker te’ kidnapped a ngawhziak a mat a om hi’n leng taklang uhi. Bangziak a KNO leh UPF tawh kituaklou SK Thadou in May 16, 2013 nitak dak 9:00 in Phaitol a Kimneikhol tenna inn va hal hi’n taklang uh a, himahleh aman tua UTLA cadre 2 mat a omte ngawh hi’n UTLA Deputy Defence & Ministry of Infor. & Public Relation Franky in taklang hi.

MUSU hingthak dinga nawhna nasasem ding
Imphal, May-20:Manipur University Revival Demand Committee (MURDC)te’n tuni’n University campus ah May 30, 2013 ma ngei in Manipur Uniiversity Students Union(MUSU) hingthak sakding in ngetna a bawl uh hi’n kigen a, huai ah Committee Treasurer in a genna ah University leh student-te’ hoihna ding in MUSU puahthak ding a panla uh hi’n gen hi. MU a Chancellor kiangah memorandum a piakna uah leng May 30, 2013 tan in MUSU hingthak sak dinga ngetna a bawl ban uah MU thuneite’n student body election sai dingin leng ngen l uh hi’n kigen hi. MURDC pawl in North, West leh south gate te’ May 22, 2013 ni tan a khak lou ding leh nitaklam dak 3:00 ma a khaklou dingin ngen uh a, Administrative block a cashier- pa leng nitkalam dak 3:00 tan banah counter 3 leng hong beh ding in ngetna bawl uh hi’n kigen hi. MU main gate gei a Security leh home guard te’n MU student te’ a bawl siat louh ding leh dakkal 24 sung a MU campus a SBI in leng transaction counter 2 tan bek hon ding in ngetna bawl uh a, huaiteng banah scholarship piak kim ding, contractor te’ vehicle pass hih bei ding, staff leh faculty te hoihtak a akai kim ding uh, Library a computer te leng a function ding banah internet connectivity leng May 25, 2013 ma ngei a, a om ding, hostel om te’ a ding in Wi-fi facility leh sports tuamtuam sai sak ding banah a kin thei lam a SC/ST/OBC te adia tuam vek in Hostel bawl sak ding chih te’ ngetna bawl uh hi’n kigen a, hiai demang teng ni 10 sung a suk piching keileh hiai sang a kiphinna nasa sem leh examination boycott tanpha tung ding uh hi’n leng taklang uhi.