Bangladesh ah mi 12 si, Sri Lanka ah 7 si; Cyclone ‘Mahasen’ ziakin Manipur govt patau
Imphal, May-16: Pingpei leh huihpi hattak kithuah Cyclone ‘Mahasen’ in Sri Lanka a pelh zawh in Bangladesh a tuipi piau lak nuai a,huai apan Northeast India bial lam nawt hi’n kigen a, Sintawpni(May 16,2013) zingsang akipan India malsuah bial adiakin Assam, Meghalaya, Nagaland, Manipur,Tripura leh Sikkim lak nawk thei dia patauhhuai hi’n kigen hi.Manipur govt in Cyclone ‘Mahasen’ ziaka siatna tungthei dingte ahithei tana pumpelhna dia panlak theihna tenga panlak ngai poimawh in High Level Committee in Manipur Chief Minister O. Ibobi tawh thil omdan genkhawm uh a, May 17, 2013 in Manipur state pumpi ah school teng kikhak ding chihthu om hi. Cyclone ‘Mahasen’ ziakin Bangladesh ah mi 12 si a, Sri Lanka ah 7 si hi’n thusuak in gen hi.

Ram Muivah,IAS, Principal Secretary(Relief & Disaster Management) in tuni nitaklam in Old Secretariat a a office chamber ah Press Conference sam a, huai ah thugenna ah High Level Committee ki phutkhia in Cyclone ‘Mahasen’ kichi dakkal 1 sunga km 55-65 a hat banah km 75 tan a hat thei, vuah leh huihpi kithuah in May 16, 2013 nitaklam ahih keileh zan nung apan dakkal 24 sung Manipur nawk kha theiding chih suikhiak uh ahihdan taklang a, Mahasen ziaka khawnung a buaina om theiding ah mipite’ panpihna ding in District teng a Supdt of Police-te’ tungtawn in Disaster Management a training hoihtak la staff mi 24 te’ district tuamtuam ah sawlkhiak hi’n gen hi. Manipur district tenga DC leh SP te’ kiangah leng Cyclone ‘Mahasen’ in Manipur a pelh masiah school teng khaksak dingin leng thusuah bawl ahi chi’n gen hi.
Cyclone ‘Mahasen’ dakkal 1 a km. 90 nawk pha khopa hat in tuni in Bangladesh gam a tuipi piau(coastal areas) lak nawk a,mi 12 si chihthu om hi.Tuni zinglam in Patuakhali biala Khetupara area lak ah inn asang asim leh haichi chiinna gam lianpi hihsia hi’n kigen hi. Bangladesh govt in zanhal akipan in tuipi piau laka omte mun bitzaw ah nawnkhia uh a, cyclone in Banglash gam a nawk hun ah mihing 800,000 vel mun bitzaw ah nawnkhiak khit omkhin uhi. Huaima Seppatni leh Sepnawnni in Bay of Bengal akipan Tropical cyclone ‘Mahasen’ in Sri Lanka gamsung mun khenkhat tawnkha a,huihpi leh vuah tamtak kithuah in Ratnapura leh Kurunegala bial lak nuaikha a, cyclone ziaka tuilian ziakin mi 7 si chi’n Sri Lankan Disaster Management Centre thusuak in gen hi.

Bay of Bengal akipan Cyclonic storm ‘Mahasen’ in west central akipan Northeast lam manawh hi’n kigen a,dakkal 1 a km. 55 akipan 65 km a hat huihpi tawh kithuah in tuni nitaklam ahihkei aleh zankim lai akipan in Manipur a CCpur district sung mun khenkhat leh Tamenglong district mun khenkhat nawk khathei ding a patauhhuai hi’n kigen a, May 17, 2013 nitak tan thiltung omthei ding hi’n kigen hi. Huaiziaka kivenna dingin Manipur govt in school teng May 17, 2013 kikhak dingin thupuan bawl chihthu om hi.

Minister makaih in joint meeting om
Lamka, May-16: Health Minister Phungzathang Tonsing makaih in New Lamka a a tenna inn ah tuni nitaklam in kuate hi uhiam chih suikhiak nailouhte’n pamphlet a thehdalh tawh kisai joint meeting om a, huai ah T.N. Haokip, ex-Minister; Vungzagin Valte, Parliamentary; Ginsuanhau, MLA; SP/CCpur, SDO/CCpur, MDC-te, Zomi Council, Kuki Inpi/CCpur, Meitei Society/CCpur, MPC, Hmar Inpui, ZSF, KSO/CCpur ban ah Civil Society tuamtuam a makaite tel uhi. Meeting zawh in Minister makaih in Press/Media-te kimuhpih uhi.

Minister in a genna ah May 6 & 10, 2013 in kuate hiam in pamphlet thehdalh uh a, zan in MLA-te tawh genkhawm in tuni’n joint meeting om hi’n gen hi. Pamphlet thehdalh tunitan a kipuang omlou a, min leng a kigelhlouh ziakin pamphlet kithehdalh pen diklou, quite notice hilou leh bulbal omlou chi’n la uhi. Tunitan pamphlet thehdalhtu mi kitheilou ahihman in matkhiat theihna din community teng pangkhawm a mahni community chiat dapkual a panlak din gen uhi. Tutung a thil CCpur dist ah khatveina ahihziak in minsiat huailua chi’n gen a, tuni a paikhawm tengin mawhpaihna sangpen puang uh hi’n gen hi. Manipur a tengkhawm teng akikhen thei omlou, Meitei, Kuki, Nagaland chih om theilou ahihdan gen a, pamphlet thehdalhtu hilhthei leh kawkmuh thei a om leh kipahman Rs 1 lakh piak hidin gen hi.

Maban ah hibang a kituaktaka tengkhawmte hihsiatna dia pamphlet thehdalh a om nawn leh Anti-CCpur chia ngaih hiding a, tutunga lai thehdalhte hong kipiak khiat leh khatveina ahihziakin hihnawnlou dia kichiamsak a,ngaihdam a khahkhiat hiding a, himahleh matkhiat ahihleh ngaihdam hilou in dan(law) dungzuia vaihawmkhum hidin hi. Pamphlet thehdalh ziaka kuamah lauthong lou dingin leng ngen a, Meiteite’n leng warning/quite notice a lalou ding in ngen hi.

Health Minister in Tropical Cyclone tawh kisai a gendan in CCpur dist sung adiak in Thanlon sub-divn sunga khaw tuamtuam- Zoupi, Hanship, Aibulon, Bungpilon, Palkhuang, Sumtuk, Khajang, Phaitong, Khuanggin leh Sinzawl ban ah Tipaimukh sub-divn ah Tipaimukh, Sipuikawn, Rovakot, Senvon, Sitam, Parvachom, Lungthulien leh Leisen khua nawk thei gige hi’n gen hi. Ni 2 sung loukuan omlouh ding, inn detdou(building) a omding, sing (tree) lian kim leh kiang a omlouh ding, lui(stream) kiang a omlou ding in mipite ngen hi. Aman agenbehna ah CCpur dist kichi Christian ngen ihihziak un mi malmal ban ah biakinn ah Pathian kianga thumna nei lehang Pathian in bangkim hihthei ahihziak in cyclone tungtawn a siatnate hon tuaksaklou thei ahihman in mipi’n Pathian kiangah thumna neiding in ngen hi. Imphal lama school teng kikhak ahihman in May 17 & 18, 2013 sung CCpur dist sunga school omteng leh public institution om teng khak(close) ding in ngen hi.

Cyclone tawh kisai order suah
Lamka, May-16:Pingpei hattak leh huihpi kithuah ‘tropical cyclone’ Mahasen kichi dakkal khat a km. 55-56 a hat in tuni nitaklam ahihkei leleng zankimlai akipan dakkal 24 sung CCpur district ah siatna a tut khak ding patauhhuai sak ziakin DC & Chairman, Dist Disaster Management Authority(DDMA)/CCpur in May 17, 2013 in CCpur district a school om teng kikhak ding chi’n thupuan bawl hi. Sub-divn tuamtuam a SDO/BDO/OC- Police teng in kivenna dia panla dingin theisak a, thiltung a om leh DDMA ah report dingin theisak hi.

SP/CCpur in civil defence deptt in a trained khak Police/VDF personel-te a poimawh banga panla theidia koih dingin DC in theisak a, CMO Medical assistance pethei dia mansa a om ding leh CHC/PHC/PHSC a Medical Officer-te leng kigingsa a koih din theisak hi. Dist Level Officer-te leng panla thei dia mansa a om din theisak a, mipi leh adiakin lou neite leng May 17 in lou kuanlou phot dingin DC in theisak hi.

DC office ah S.Khaikhopau Ngaihte, SDC/HQ etkaina Control Room hon hi a, phone No. 9612484009 or 8794175702 tungtawn in contact theih ding hi.

Kim Gangte in Media-te kimuhpih
Lamka, May-16: M.Songgel khua ah tuni sunnung in Kim Gangte,ex-MP & President, Manipur Pradesh Trinamool Congress in Press/Media-te kimuhpih hi. Aman a genna ah India gam Congress vaihawmna nuai ah kum 65 phial omta a, Manipur ah leng Congress vaihawmna kum 50 val omta mahleh singtangmite adia khantouhna omlou hi’n gen hi. Manipur singtanggam khantouhlouhna ziak khat geographical condition hi a, Manipur leitang seh 4 suah sehthum 3 singtanggam ahihziak in khantouhna ding fund atamtheipen piak poimawh hi’n gen hi. Manipur ah diktatna omlou in sepna (post) lak hun in bazar a thil lei banga kileithawh ahihziak in singtangmite’n lei zoulou leh tangzoulou hi’n gen hi. Trinamool Congress in Central ah vaihawmna alet hun chiangin MDC-te full power peding hi’n gen a, huai hunchiang in singtanggam kikawmtuahna teng bawlhoih vek hidin gen hi. Public Private Partnership System kichi mi zawng leh gentheite’n hamphat pihlou in mihausate kia in hamphatpih uh ahihman in Trinamool Congress in Public-Private Partnership deihlou, totally opposed hi’n gen hi. Congress govt in mipite khem a, singtanggam ah kikhekna(change) omna dingin kuapeuh pangkhawm a, mikhemtu congress kithuahpihlou ding in ngen hi. “Let us bring change in Hills districts and bing development in hill districts t” chi’n a thugen zou hi.

Tuni’n PTC 9th CWC meeting om
Lamka, May-16: PTC CWC member te’n tuni zinglam dak 11:00 apan in Hiangtam Lamka a PTC Conference Hall ah CWC meeting a 9 veina nei uh a, Vungzagin Valte, Parliamentary Secy, Langkhanpau Guite, Chairman ADC telin MDC te leh CWC member-te tel uhi. Huai hun ah Paite Cultural Society heutute’n Nampi puan design abawl uh pulak uh a, huailou in CWC post 2 awng adia nomination file 6 teng secret ballot tungtawn in vote khia uh a, L.Pumlianpau of Imphal leh LT Juan Tonsing, Hiangtam Lamka telching uhi. PTC executive member te’n June 27, 2013 a PTC 64th Raising Day thupi theipen a zatdin gen uhi. Paite Pupa Dan (Paite Customary Law & Practised) PTC Constitution thak zuak tawh kisai report leng om hi.

Knapsack sprayer hawmkhia
Lamka, May-16: H.Mangchinkhup, EM/ADC New Lamka West in tuni zingsang dak 7:00 in Bungmual a a tenna inn ah Knapsack Sprayer hunkhop hawmkhia hi. H.Mangchinkhup in a genna ah Knapsack Sprayer kihawmkhia tangkhate’n aphatuam theipen a zang ding in ngen hi.

Zan apan RCH camp om
Lamka, May-16: NRHM tungtawn leh DFWO/CCpur saina in zan apan mun tuamtuam ah Reproductive Child Health (RCH) camp om paitou lel hi. Zan in Tuining PHSC nuai a B.Kalzang khua ah camp om a, tuni’n Saikot PHC nuai a Mission Compound PHSC ah om hi. Tuni’n Dr VC Pau Tonsing, DFWO leh Dr David Gangte, MO, PHC Saikot/Pearsonmun te’n damlou tamtak en uh a, damdoi a manbei in hawmkhia uhi.

Bungmual-Pearsonmun area ah electric bawl
Lamka, May-16: Electricty dept te’n tuni in Bungmual leh Pearsonmun area a electric post leh a gui adiklouhna omte bawlhoih dingin nasem uh a, electric gui niamna leh post sawi deuh omnate bawlhoih uh hi’n kigen hi

Private school teng suti puang
Lamka, May-16: CCpur Private Schools Association a President Chinsuanthang apan kiza dan in Tropical Cyclone in Lamka ah nawngkaina a tutkhak ding khualna in May 17, 2013 in Lamka a Private school teng holiday/suty puang uh hi’n thutut kingah a, Salem Veng a Donbosco Hr Sec School leng May 17, 2013 in suti hiding chi’n Principal apan thusuak in gen hi.

Pak lamdang mahmah 1 kimu
Lamka, May-16: Lamka PS apan gamlalou Monglenphai khua ah pak(flower) lamdang tak om a,huai pak amin thei leng omlou hi. Pak omna kima tengte’n leng lamdangsa mahmah uh a, chikmah in tuabang thil om ngeilou hi’n gen uhi. Tedim road apan lamsaklam metre 500 vela gamla Mimi Singson of Monglenphai’ huansung ah huai pak pou a, adunglam feet 1 velin sang a, rong san(red colour)ahihbanah zan chiangin ganhingte’n bawm lutlut in azu(juice) tawp zel uh hiding a gintak ahi hi. Pak lamdang lua khat ahihman in a mukha kuapeuh in etlawm sa mahmah uhi.

GNM te’n ANM post apply theilou
Lamka, May-16: Medical deptt in Staff Nurse/GNM post 21 leh Female Health Worker/ANM post 200 semding a laksawm lak uah GNM post atawmluat ziakin mi tamtak te’n GNM certificate nei hingal ANM apply sawm mahle uh hitheilou a, candidate tamtak in lamdang sakthu gen uhi. Matriculate post kilakna ding ah gruaduate te’n a apply theih ua leh bangziak a GNM te’n ANM post apply theilou uhiam chi’n lamdak sakthu tamtak in gen hi.

IMPHAL NEWS
NSAB te’n border fencing enkhia
Imphal, May-16:Foreign Secretary-lui Shyam Saran, Chairman, NSAB makaihna in National Security Advisory Board(NSAB) sub-group team apan PC Bhardwaj, ex- Vice Chief of Army staff; PC Haldar, ex-Director IB; Lt. Gen(retd) Prakash Menon; Dr. Prabir De, Military Adviser,NSCS leh R. Shahrawat, Chairman, Land Ports Authority of India te’n tuni’n Delhi apan Imphal hongtun zawh uh sawtlou in Helicopter zang in Moreh pha ding uh chih himahleh khua asiat ziakin gari zang in zing dak 10:00 in Moreh zuan uhi.
Amau sunnung in Moreh a Integrated Check Post, Border management, Border fencing, Border security, Border trafficking leh infiltration dinmun etkhia uh a, huai ah State Home deptt leh Army te’n border tawh kisai banah Commerce & Industry deptt in in Imphal-Mandalay bus service patkhiak ding tawh kisai briefing bawl uh a, Moreh Trade Centre ah nitaklam dak 3:00 in Local Border Trader Asste’ tawh meeting uhi. NSAB sub-group team in May 17, 2013 zing dak 10:00 in Chief Minister muding uh a, huaizawh in Governor banah DGP, Principal Secy (Commerce & Indus) leh Principal Secy (Home) mu ding uhi.

Chandel bandh ding ahun suan
Imphal, May-16: Chandel District Naga Kuki Joint Committee in Chandel District HQ a Assam Rifles camp a om MDF ki-surrender cadre-te muntuam a suankhiak ding phutna in tuni akipan Chandel district pumpi bandh a sawm uh hi 10 sung ahun suan(postponed) uh a, May 26, 2013 akipan ding in bikhiah uhi. Huai hun chiangin sub-divn HQ tuamtuam Moreh, Tengnoupal, Machi, Khengjoy, Chandel leh Chakpikarong banah Pallel akipan Moreh kikal National Highway No. 2 leng bandh hiding chi’n puang uhi.

Bomb hihpuak ziakin protest rally
Imphal, May-16: Wangjing post a om 116-Bn BSF te’ zan nitaklam in Wangjing leh Heirok kikala foot patrolling a pai laitak un meltheihlouh pawlkhat in bomb hihpuak uh a, huai mawhpaihna in tuni zinglam dak 11:00 velin Heitupokpi a nupi pawlte’n Heitupokpi area ah sit-in-protest nei uh a, huai zawh in Wangjing a Heitupokpi apan Heirok part-2 tan rally pai uhi. Bomb puak ah asi leh liam omlou a, police leh BSF te’n bomb puaksakte zonkhiak sawm in a dapkualna uah bomb puahna mun apan metre 50 vela gamla ah bomb hidia gintak khat leng mukhia uhi.

Commando-te’ gari accident
Imphal, May-16: Imphal West Commando-te’ Gypsy gari 1 tuni’n Wangoi Police Station apan taikhia sun dak 12:15 velin Mayang Imphal Mayai Leikai ah accident a, huai ah constable 1 si hi’n kigen hi. Misi amin Ningthoukhongjam Rajesh (28) s/o M. Ingocha of Mayang Imphal Thana Awang Leikai hi’n kigen hi.

School bawl ziaka buaina ah mi 3 liam
Imphal, May-16: Ukhongsang Maning Leikai Hanuching a Kasturba Gandhi Balika residential school bawlna tawh kisai in zan nitaklam in mipi pawl 2 kal buai in kisualzak uh a, Activa gari 2 leng hihsiat ahihbanah mi 3 liam uh hi’n kigen hi.Thoubal police te’n buaina a kigolh mi 11 mankhia uh a, pawl 2te kihoulem sak sawm in tuni sunnung in SP/Thoubal in samkhawm a, aki houlem theihlouh ziakun mat a om mi 11 te’ court ah dinsak hi’n kigen hi. Akigendan in Central Govt. sponsored na a Ukhongshang Maning Leikai Hanu Ching area a residential bawlna mun ding Lai Haraoba mun tawh a kisaikhak ziakin pawl khat in dal uh a, kihouna om mahleh kihoulem theilou uh hi’n kigen hi.School bawl ding deihte’n amun ava hahsiang uapan buaina piang a, School bawl ding deihte’ Education Minister M. Okendro supporter leh school bawl ding deihloute’ election laia MPP candidate Sovakiran supporter te’ hi’n kigen hi.

Innmun ah thau vakhah
Imphal, May-16: Meltheihlouh pawl khatin zan sunnung dak 1:00 velin Lilong P/S in a huamkhak Lilong Loutar a Md. Amir Ahemd (23) s/o Md. Maniruddin inn-un ah thau 2vei va kap uh hi’n kigen a, thiltung tawh kisai police ah case file hi a, Police te’n suizui mahle uh hiai thu sutkhiak ahihtan in kuamah matkhiak om nailou hi’n kigen hi.

Awareness Programme om ding
Imphal, May-16: Manipur Women Development Corporation Ltd. te’ sponsored na nuai ah Women Development Society, Paite Veng, Imphal te’ saina in May 18, 2013 zinglam dak 10:00 in Faihth Home a Zachhung Prayer Hall ah ‘A Panel Discussion & Awareness on Issues Affecting Our Community’ om ding hi’n kigen a, mi tuamtuam in thugen ding uh hi’n leng kigen hi.

Arunachal Governor len ding
Itanagar, May-16: India President office thusuak in a gendan in Arunachal Pradesh Governor len ding in Lt. Gen. (retd) Nirbhay Sharma, PVSM, UYSM, AVSM, VSM guan a om hi’n kigen hi. Nirbhay in office aluah hun akipan in Governor hihna len pah ding hi’n kigen hi.
IMPHAL GAS NEWS
Imphal LPG Gas booking upto 25/04/13 sl.no 5400 valid from 11/4/13 stock 612
Misao Gas booking upto 17/4/13 valid from 01/04/13 stock 612
Manipur Gas booking upto 19/4/13 valid from 12/4/13 stock 918