KSDC in Economic Blockade hilou Public Blockade pan ding
Lamka, Nov-15: Kuki State Demand Committee(KSDC) in Central leh State government ah Kuki mite ading state tuam a nget tungtang ah govt in pan lalou chi a lungkimlou in November 17, 2012(Saturday) nitaklam dak 5.00 akipan Manipur state sunga Kuki mite’ tenna munte leh Manipur khawpi Imphal kikawmna lampi(highway) teng khaktan ding uh ahihdan puang uh a, huaipen economic blocakde hilou in public blockade hizaw chi’n hilhchian uhi.

KSDC thusuakin a gendan in Manipur lifeline teng ah Economic Blockade bawl hiding in mipite’n ngaihsun mahle uh tuabang hilou in Imphal tawh kizomkha National Highway leh State Highway teng Imphal tawh kikawmtuah theilou dingin Public Blockade bawl hizaw ding chi’n gen uhi. Public blockade pen govt. in Kuki helpawlte tawh Political Dialogue neih ding tungtang KSDC tungtawn in gelhthawh a chetna a piak masiah paitou ding a, huai nunga lawhchinna a om tuan kei leh kiphinna nasazawsem in zui lai ding chi’n puang uhi. Govt. in KSDC thupuan a limsak keileh Kuki mite tenna bialteng ah educational institution telin business establishment leh Govt. office-te khak hiding a, Public Rally om tawh kiton in General Strike pat hiding chi’n KSDC thusuak in gen hi. Tuni issue a National Newspaper leh state a kisuah khenkhat ah Kuki state area diklou taka taklat a om poisakthu gen uh a, Kuki state in CCpur district pumpi, Senapati district a Sadar Hills, Chandel district, Ukhrul leh Tamenglong district sunga mun lianzaw huam hi’n leng KSDC a Indfo & Publicity Secretary in thusuah bawl hi.

Miss Kut in Sanggah Muon In pha
Lamka, Nov-15: Miss Kut, 2012 title la Gracy Kimhoihthiem Haokip in tuni’n Kuki Women Union project nuai a orphanage home ‘Sangga Muon In’ pha a, naupangte nektheih pia in Sangga Muon In adin antang leh dal bag 1 tuak pia hi. Bangkim ah Pathian a masapen koih dingin Home a omte hasuan a, Pathian laukawm panlate’ a tup uah tangtawn uh hi’n leng gen gen hi. Aman Miss Kut ahih ziak a, huai orphanage home pha hilou in Miss KUT ahihma in leng orphanage home-te veh leh panpih ut ahih dan gen a, himahleh huai hunlai in amah lam apan hihtheih neilou hi’n gen a, tutung in Miss Kut title a ngah ziaka mite panpihthei a om in tagah kepna munte pha in amau dia a hgihtheih omte sutzop zel tum ahihdan gen hi.

DC in thautui tawh kisai thusuah
Lamka, Nov-15: DC/CCpur in bandh leh blockade ziakin CCpur district ah thautui haksatna om dinga a theih ziakin Oil pump te’n thautui a zuak ding zah tangpi uh bikhiah hi. Heavy(Trucks/Buses) te’n khatvei thu in diesel litre 60 tan leithei ding uh a,LV tractors & LV 4 wheeler te’n diesel litre 20 leithei ding uhi. 3-wheeler te’n 1vei thu in petrol & diesel litre 5 tuak leithei ding uh a, LV 4-wheeler te’n petrol & diesel litre 10 tuak leithei ding uhi.LV 2-wheeler te’n petrol litre 5 tan leithei ding uhi. Thautui lei dia kuan customer te’n Oil pump ah Gari a ken uh ngai ding a,counter ah RC book a produce uh leng ngai ding chih hi. JCB & Bull dozer ading diesel deihte’n DC kiangah nget ngai ding hi.Petrol leh diesel hongtun hun leh daily stock position leng niteng in DSO(CAF & PD/CCpur ah report dingin DC in Oil pump-te theisak hi.

BRTF-te lamlian bawlna nasep paizel
Lamka, Nov-15: BRTF a 84-RCC te’n Nov. 12,2012 akipan in New Lamka leh Police Station kikal Tedim road a lamlian kuakna munte ah suanghum sungdim in black-topping in bawl uh a, tuni’n Tedim road zul Zion Street tan zou uhi. BRTF te’n Nov 16,2012 in leng Police Station lam manawh in lampi bawl sunzom ding uh hi’n kigen hi.

Auto in Activa phu in taisan
Lamka, Nov-15: Tuni nitaklam dak 5:30 velin Zou Veng lutna bul Old Bazar ah Diesel Auto khat in Tuibuang apan Tuinom lam zuan a tai Activa (No.MN- 06S/A5125) phu in taisan a, Activa atuang numei 2 gim mahmah in Dist Hospital puaktung nung in doctor te’n Imphal a etkol dingin refered uhi. Thukizadan in Activa atuangte Mrs. Helen (27) w/o Lathang of Tuinom, anau Thianniang(19) d/o Khualkhokam of B. Aizalon(Tuibuang leh naupang kum 2 mi khat hi uh a, amau Tuibuang apan Tuinom zuan lai Diesel Auto khat in phukha a, taisan hi’n kigen hi. Activa atuang naupang bangmah chikei mahleh Helen pen Doctor te’n asunglam a liamna om hidin gen uh a, Thianniang a bil ah si a pawt ban ah a liangguh lak na sa hi’n kigen hi. Tuni nitak dak 7:30 velin doctor in Imphal ah etkol dia a refer ziakin damloute Imphal ah puak hi uhi.

Naulak Innkuan Meet,2012 om
Lamka, Nov-15: Naulak Innkuan Committee-te saina in New Lamka YPA Hall ah tuni’n Naulak Innkuan Meet-2012 om hi. Session masa ah Naulak Innkuan Committee vaisai ding telna om hi. Hun 2na zinglam dak 11:30 in kipan nawn a, N.Khaizalian, IFS in Naulak Innkuan Meet hongkhia a, Pastor M. Ginzatun in Pathian kiang ah lan hi. N.Zam Khua Cin, President, Naulak Innkuan Committee in thugen a,huaizawh in Rev.N.Thawndoulian in Naulak suan leh pakte ading in thumsak hi. Dr.Sangching Naulak, Dr.N. Paulginthang, N.Khaizalian, IFS, N.Tuankhankhup, IFS (ex ambassador) leh N.Ginsianlal, Advocate te'n thupi tuamtuam pansan in thugen uhi.

All India Co-operative Week
Lamka, Nov-15: Manipur State Co-op Union,Imphal leh Dist Co-op Officer/CCpur kigawma vaisaina in Nov 16, 2012 zinglam dak 11.00 in Hmar Veng Community Hall ah “Co-operative Enterprises builds a better world” chih thupi a zang in ‘59th All India Co-operative Week Celebration,2012’ om ding a, Chief Guest in Langkhanpau Guite, Chairman, ADC/Ccpur pang ding hi. Huai ah Functional President in L. Tompishak Singh,President, Manipur State Co-op Union pang ding a,Guest of Honour in Jamkhosei Baite, Dist Co-op Officer/CCpur pang ding hi.

CDSU a representative 2te zukkik
Lamka, Nov-15: Hmar Students’ Association(HSA) Gen HQ in CCpur District Students’ Union(CDSU) a representative 2 a sawl uh Emmanuel L. Pulamte, Jt Secy leh Robert L. Hmar, Executive Member zukkik(withdraw) uh ahihdan President/Secy CDSU theisak uhi. HSA thusuak in a taklatdan in HSA tawh kisai issue nelhsiah ahihbanah issue poimawhte ah CDSU parent bodies-te consult hilou uh chihthu telin CDSU apan a kizukkikna uh point 5 taklang uhi.

US mi Missionary khat kivui
Lamka, Nov-15: US gam a Arizona state sung Overgaart khawmi Mrs.Dorothia E.Johnson(80) in hun sawttak heart disease(lungtang natna) a neih ziakin Nov. 6, 2012 in buaisia a, a zing in RIMS hospital puaktung a om in ICCU ah koih hi a, dam zoulou in zan nitaklam dak 5:30 velin Imphal ah si hi. Thu kizadan in Mrs.Dorothia E.Johnson ahihleh tu kha bulin Sielmat Christian Hospital ah Jews Voices Ministry International leh Bibles For The World (PMS) te’n Free Medical Camp a neih uah Nurse leh volunteer in pang a, lam paiman ding teng leng amah a kisik banah Free Medical camp om sungin mitbelh(spectacles) 7000 bawlkhia a, huaite a thawn in hawmkhia hi. A pasal in kum 2008 in sihsan a, tuanung in missionary nasem in panpih ngaite panpih zel hi’n kigen hi. Mrs.Dorothia E.Johnson luang tuni in Sielmat puaktung hi a, tuni mahin Sialmat hanmual ah kivui hi.

National Seminar-cum-Workshop
Lamka, Nov-15: Zomi Language & Literature Society in Central Institute of Indian Languages tawh kithuahkhawm in Nov 19-23, 2012 sung Lamka College Examination Hall ah ‘Development of Zomi Language and Literature’chih thupi a nei in Seminar-cum-Workshop sai ding uhi.

3-days Lutheran Theology & Workshop
Lamka, Nov-15: Manipur Evangelical Lutheran Church (MELC) HQ Church, Zomi Colony ah Nov 19-21, 2012 sung “3-days Lutheran Theology & Worship” tawh kisai training om ding hi. Huai ah Rev. Dr. Jeff Truscott, USA in sinsak ding a, mun tuamtuam a MELC saptuam member-te telding uhi.

MN-02/7256 hilou MN-01W/7256 hizaw
Manipur Expess zanhal issue ah ‘Siluang khazou innlam zuanlai tuahsia in mi 4 liam’ chih kisuah ah accident-te tuanna Alto Car(No. MN02/7256) kichi khapen thu pesawntu in hong piakkhelh khak hi a, gari number MN-01W/7256 hizaw chi’n thutut kingah hi. Gari accident ziakin Boinu Tingzahat (35) d/o Chongneikim of Chiengkonpang, Kholneihkim (38) d/o Tongkhodal of Chiengkonpang leh Lamthiengin (30) s/o Rev. Mangkhokam of Chiengkonpang liam uh chih ahi hi.

Manipur Express office kisuan ding
PKT Street, Central Lamka ah Manipur Express office a kisuan ding ziakin Nov 16,2012 akipan in machine leh vanzat tuamtuam nawnkhiak kipan ding a, huaiziak in Manipur Express leng Nov 17, 2012 issue akipan in ni bangzahhiam sung hong suak theilou ding ahihman in latu leh simtute’n non theihsiam ding uh kon ngen uhi. Huaiziakin Nov 2012 kha a lakman(news fee) leng kiam ding hi.

IMPHAL NEWS
Tuni’n Ningol Chakkouba kizang
Imphal, Nov-15: Manipur gamsung adiakin phaijang bial ah tuni’n Ningol Chakkouba kizang a, nu-le-pa tamtak in a tanu pasal neisate uh annek pih uh a, innkuan tamtak ah unau numei pasal neisate ak nekpihna in zang uhi. Manipur Baptish Church (MBC) inntekna in tuni’n Ningol Chakkouba festival zat hi a, MBC complex ah numei pasal neisa an nekpih ding a chial ding sanggam pasal neiloute chial khawm in an nekpih uhi. Huai ah community tuamtuam apan numei pasal neisa 100 sanga tamzawtham tel uhi. Huailou in Kangleipak Student Assn banah ex-Minister K Ranjit in mun tuamtuam ah Ningol Chakouba bawl uhi.

Mary Kom kaisanna tamtak kipak
Imphal, Nov-15: World Boxing champion MC Mary Kom in Manipur Police a Dy Supdt of Police(DSP) akipan Supdt of Police(Sports) ah a kaisangna mi tamtak in kipahpih uhi. Manipur govt in Oct 31, 2012 a order suah in Manipur Polioce deptt ah SP(Sports) post 1 ading post creation bawlin pay Rs. 15,600-39,100+ grade pay Rs. 7600 bikhiah uh a, huai pansan in Home Deptt in Nov 3, 2012 in order dang suah in SP(Sports) dinmun ah MC Mary Kom kaisangsak uhi. Finance deptt leh DP in leng huai dingin concurrence pia uhi.

Award tuamtuam hawmkhiak hiding
Imphal, Nov-15:Information & Public Relations(IPR) saina in Nov 16, 2012 in Manipur Press Club ah ‘National Press Day 2012’ leh ‘Manipur State Journalist Award 2012’ piakkhiakna kithuah om ding hi.Panel of Judge te’n ‘Best Editor Award on National Integration & Communal Harmony’ ngah dingin Pradeep Phanjoubam, ‘Award on Rural Reporting’ ngah ding in Potsangbam Bishuakanta, ‘Award on Health & Hygine Reporting’ ngah ding in Kakching Tabam, ‘Award on Women & Children Reporting’ ngah dingin Miss Sapam Aruna, ‘Award on Science & technology Reporting’ ngah ding in Angom Ranjit, ‘Award on Parliamentary Reporting’ ngah ding in Nepram Krisuna Mohan leh ‘Award on Sports Reporting’ ngah ding in Wangkhem Rishikanta recommend bawl uh chihthu om hi.

World Tourism Day kizang ding
Imphal, Nov-15: Manipur Tourism Forum-te saina in Nov 16, 2012 in Classic Hotel, Imphal ah sunnung dak 1.30 apan World Toursim Day zatna om ding a, huai tawh kiton in Tourist Guide Training Programme leh Prize Distribution Ceremony of Photo Competition zatna leng om ding hi. Chief Guest in M. Prithviraj, Parliamentary Secretary(Tourism/YAS) pang ding hi. Functional President in Dr. Th. Dhadali Singh, President Manipur Tourism Forum pang ding a, Guest of Honour in Dr. Rajesh Kumar, IAS, Commissioner Tourism leh Hrishikesh Modali, IAS, Director Tourism pang ding hi.

Manipur University ah Fresher Meet
Imphal, Nov-15: Manipur University Tribal Students Union(MUTSU) in tuni’n Manipur University ah Freshers Meet nei uh a, huai ah Chief Guest in Vungzagin Valte, Parliamentary Secretary(Hort & SC/CADA) pang hi. Functional President in Victor Keishing, Parliamentry Secretary(TD & Hills) pang a, Guest of Honour in Nunglu Victor, MLA Chandel leh Janghemlung Panmei, MLA Tamenglong pang uhi. Chief Guest in a thugenna ah MUTSU-te motto "Learn , Unity & Serve" chih hoihtak a zil ding, huaikhit in pangkhawm a kipum khat ding, huai zawh in gam leh nam adia sep ding hi’n gen hi. 2nd Session ah student te'n tribe tuamtuam apan mi 2 telkhia in traditional round paisak uh a, Mr & Miss MUTSU telna leng nei uh hi’n kigen hi.

Tuni zankim apan petrol man kiam
New Delhi, Nov-15:International ah thautui man a kiakniam ziakin October kha apan 2veina dingin tuni zankim akipan in petrol man litre 1 ah paise 95 in keniam hi. Hileleng local sales tax leh VAT rate khawpi tuamtuam ah a kibatlouh ziakin petrol man kiamzah leng kibanglou hi. Oct 9, 2012 in petrol man litre 1 ah paise 56 in a kiam ziakin litre 1 ah Rs. 67.90 man a, hileleng huainung sawtlou in petrol pump dealer-te commission khansak ahihziakin litre 1 ah paisa 29 in khang nawn hi.

Indian Oil Corporation thusuak dungzui in international ah petrol man akiam ziakin India gam pumpi ah petrol man kiamzek thei hi’n kigen a, huai dungzui in Mumbai ah petrol man litre 12 ah Rs 1.20 a kiam in Rs. 73.53 in kizuak a, Chennai ah litre 1 a Rs. 71.77 a kizuak himahleh Nov 16,2012 akipan in Rs. 70.57 hita ding hi. Kolkata ah petrol litre 1 ah Rs. 74.55 a kizuak himahleh Rs. 1.19 in kiam ding chihthu om hi.

1st SASA Tourney ah bialtu MLA khuallian in pang
Lamka, Nov-13: Singngat Area Sports Association(SASA) saina in St. Thomas Mini-stadium a (late)Khamkhohau & (late) Ngaihoihching Memorial Football Tournament,2012 tuni’n final kimawlna leh closing function kithuah om a, Chief Guest in Ginsuanhau, MLA (Singngat A/C) pang hi. Huai ah Chief Host in Rachel N. Guite,SDO/Singngat pang a, Functional President in L. Mangkhogin Haokip, SP/CCpur leh Guest of Honour in Thongkai Baite, MDC(Sangaikot) pang uhi. Football final kimawlna ah Ngailianching Memorial team in goal 8-0 in S. Phaija team zou uh a, Champion team in cash prize Rs. 30,000 + Trophy sang uh a, S. Phaija team te’n Rs. 20,000 sang uhi. Chief Guest in a genna ah Singngat area a kimawlmite’n nasataka panla dingin hasuan a, tu dinmun sanga sangzaw tung dingin panlak poimawhlai chi hi. Aman a genzelna ah Hill Model H/S bawlna din govt. in Rs. 1 crore sanction hi’n gen a, Singngat SDO office bawlna ding in Rs. 11 crores sanction hiding chi’n leng gen hi. Gamsung puahna dingin kuapeuh in panlak poimawh hi’n gen a, amah lam apan ahithei tan in gam puah ding hi’n gen hi. Chief Guest in SASA panpihna in Rs. 20,000 pia in final teamte kiangah kimawlna vanzat leng pia hi.
Chief Host Rachel N. Guite, MCS in Singngat area ading kimawlna mun hoihtak om ziakin lemtang mahmah a, huai tungtawn in kimawlmi tamtak sekkhiak ahih lam-et thu genkawm in mihing adia poimawh kimawlna hi’n leng gen hi. Functional President L. Mangkhogin Haokip, IPS, SP/Ccpur in i right kia thei mailou in i duty leng theih poimawh zaw hi ‘n gen a, govt. in gamsung hoihna dinga thil hong bawlsakte a kembittu a pang dingin mipite hasuan hi. Huailou in khawsung hoihna dingin vengsung leh mahni innkim chiat hahsiang zel leng alompi a pankhawmna himai ding chi’n gen a, SASA panpihna dingin Rs. 5,000 pia hi. Guest of Honour Tongkai Baite, MDC(Sangaikot) in a genna ah taksa adia hoih ahihziakin football ngaihnat ding hi’n gen a, kimawlmite damthei uh ahihdan leng gen hi. Aman leng SASA panpihna ding in sum pia hi.

JM Paupu in Myanmar ah thugen
Lamka, Nov-13: Rev. Dr. Ngul Khan Pau @ JM Paupu in Myanmar gamsung Kalaymo town a Galilee Church ah ‘ A cidam Pawlpi’ kichi thupi a nei in Nov 12, 2012 nitak akipan in thugen a, Nov 14, 2012 nitak tan thugen ding hi. Huai ah Hau Khen Kham, MP in leng ‘Democracy leh Zomite' Mailam’ chih thupi zangin mipi paikhawmte lak ah thugenna hun zang zel hi. Nitak hun ah gospel concert tawh kithuah in programme zang uh chihthu kiza hi.

Helmet khulou mi 7 mankhia
Lamka, Nov-13: Lamka khawpi sung ah Nov 1, 2012 apan gari neu (2-wheeler) driver teng in helmet khukvek ding chih traffic rule thak zat himahleh tunitan huai zuilou leh gari parking dan ding bikhiah zui tuanlou mi a hunkhop om a, Traffic Police te’n niteng in mankhia uhi. Tuni’n leng Traffic Police te’n 2-wheeler driver helmet khulou mi 7 mankhia in mi 1 zel Rs 100 liausak uh a, TR(receipt) cut zel uh hi’n kigen hi.

FMS anniversary lopna om ding
Lamka, Nov-13; Frontier Mission Society(FMS) 18th Anniversary lopna Nov 14, 2012 sunnung dak 1.00 akipan in KBC Centre Church, Red Cross Road, Hill Town ah om ding hi. Huai ah Special Guest in Dr Seiboi Singsit,IFS(retd) & Chairman, MPSC pang ding a,aman ‘Christiante khawvel ma ah’ chih hong ding a, Rev LB Angam, Gen Director,ECCI in lan(dedicate) ding hi. Dr Lamboi Vaiphei, Executive Director, FMS in vaidonna thu gen ding a,Rev Dr Kh. Khaizakham in Pathian thu gen ding hi.Huai hun ah meithai mi 50 vel panpihna piak hiding uhi.

Bongbal JB school room hong
Lamka, Nov-13: Grace Zamnu, MDC(Muallum) in tuni zinglam in Bongbal JB school ah SSA tungtawn a room 1 kibawlthak hong hi. Huai ah Bongbal JB school student-te tawh Advance Children Day program zangkhawm uh a, MDC in naupangte lak ah nektheih chi tuamtuam hawmkhia hi. Nursery apan class V tan a topper mi 8 kiang ah solar Led light 1 chiat pia hi’n kigen hi. Grace Zamnu in agenna ah student te’n maban ah lai hoihtaka sim a, officer lian pipi atun theihna ding un student te’n nu-le-pa leh teacher te zahtak a kuhkal, chitak leh tupguh hoihtak neia laisim dingin hasuan hi.

Siluang khazou a innlam zuanlai accident in 4 liam
Lamka, Nov-13: Tuilumjang asem Pastor a sih ziakin siluang a khua ua khazou innlam zuan a hongkikte tuanna Alto car(No. MN02/7256) tuni nitak dak 6.00 velin Sejol khenzek lamkoina mun ah accident in lamkhang metre 150 vel ah Gari tukkhia a 7vei vel kilep hi’n kigen a, Car a tuang teng liam uh hi’n kigen hi. Amaute Boinu Tingzahat (35) d/o Chongneikim of Chiengkonpang in a mit leh awm (chest) nasa a, Kholngaihkim (38) d/o Tongkhodal of Chiengkonpang in atal(forehead) leh kawng(waist) na sa hi. Lamthiangin (30) s/o Rev. Mangkhokam of Chiengkonpang in a kawng nasa in, Khamginlun (40) s/o Haukhopau bel liam nasalou deuh a, dressing bawlzawh in doctor te’n paisak uhi. Thu kingahdan in tuni a vuahzuk ziakin lampi nal mahmah a, huai hunlai a lam koina muna gari hattak a tailai steering fail ziakin lamkhanga tuakkhia hi’n kigen hi.Aliam 4te Dist Hospital puaktung hi uh a, doctor te’n mi 3 admit uhi.

Naulak Innkuan Meet om ding
Lamka, Nov-13: Naulak Innkuan Committee-te saina in Nov 15, 2012 in YPA Hall, New Lamka ah ‘Mimtang khat kiphel hawm’ chih thupi a nei in Naulak Innkuan Meet-2012 om ding hi.Huai ah mi pomawh 4 in topic tuamtuam zang in hasotna thu gen ding uh a,vaipaw thak ding telna leh amaute thumsakna banah programme a item tuamtuam zang ding uhi. Kikhopna zawh in itna ankuang umkhawm ding uhi.

KSO Exe Member 2 khawlsak
Lamka, Nov-13: Paokai Haokip, President, KSO/CCpur distirct apan thusuak kingah dungzui in James Doungel, Secretary(External) leh Sothang Mate, Secretary(Magazine) in Executive meeting ah 3vei akizom a a tellouh ziakun explanation call hi a, hileleng huai dawnna bangmah a omlouh ziakin Executive member 2te Nov 14, 2012 akipan in a mawhpuakna uapan khawlsak hi uh chi’n puang hi.

IMPHAL NEWS
Office thak honna leh latna om
Imphal, Nov-13: Vungzagin Valte,Parliamentary Secretary in Manipur Secretariat New Building a Minister block Room No. 144 & 145 ah zan in a office ding honna leh Pathian kianga latna programme bawl a, huai ah Rev M. Zalian, DS Imphal in honna lehg latna nei hi. Vungzagin Valte in Parliamentary Secretary dinmun a let banah office thak a luah theihna mipite tungtawn a Pathian vualzawlna hi’n gen in Pathian leh mipite tung ah kipahthu gen hi. Phungzathang Tonsing, Minister(Health & FW) in leng hasotna thu saulou gen a, programme zawh in Lamphel a Vungzagin quarter ah worker-te tawh ankuang umkhawm uhi.

Estimates Committee in Moreh pha
Imphal, Nov-13: Manipur Assembly a Estimates Committee pawlin zan in Myanmar tawh gamgijul Manipur gamsung a om Moreh khua vapha uh a, huai ah ADC complex mun, water supply,Hospital leh mun poimawh tuamtuam pha in thil omdan ngentel takin enkhia uhi. Committee Chairman Dr Ng. Bijoy Singh in a gendan in tuni a a thil muhkhiak dan uh govt ah report pelut ding uh chi’n gen hi. Estimates Committee a member -Yamthong Haokip.MLA; Karam Shyam, MLA; Nunghlung Victor,MLA leh Th Biswajit Singh,MLA in Chairman Ng Bijoy Singh zui uhi.

Taibang-nganba tuni’n Imphal hongtung
Imphal, Nov-13: KCP group 4 in govt tawh peace talk neih ding a thukumna om ziakin group 1 makai Haobijam Dilip @ Taibangananba(47) s/o Kunjababu of Bishnupur Ward-XI tuni’n Delhi apan Imphal puaktung hi a, Jail SP IK Muivah makaihna team khat in Delhi apan hong tonpih uh hi’n kigen hi. Taibanganba in a gendan in lemna omna dinga peace talk neihna ding ah govt in lungsim siangthou a neih leh neihlouh uh kichian ding chi’n gen hi. Tuma lam in KCP (MTF)- City Meitei leng Aug 11, 20912 in Imphal hongtung khin a, Lamphel leh Pakhanglakpa leng tunung zekin Imphal hongtung thei ding uh hi’n kigen hi. New Delhi ah July 31, 2012 in KCP-City Meitei, KCP-Lamphel, KCP-Taibanganba leh KCP-Pakhanglakpa group in govt tawh peace talk(tripartite talk) nei dingin thukimna suai kai uh hi’n kigen hi.

Electoral tawh kisai hearing
Imphal, Nov-13: Kshetrigao, Thongju,Yaiskul leh Wangkhei Assembly Constituency a Electoral Roll ah min khumlut ding leh paihkhiak ding tawh kisai in hearing om ding hi. SDO/Porompat office ah Nov 22, 2012 in Wangkhei A/C tawh kisai hearing om ding a, Nov 23 in Thongju A/C tawh kisai in hearing om ding hi.Nov 24 in Kshetrigao A/C tawh kisai hearing om ding a, Nov 26 in Yaiskul tawh kisai in hearing om ding hi. Huai hun ah elector te’n document poimawhte tawikawm in mahni taksa va kilat ngai ding chi’n SDO/Porompat in thusuah bawl hi.

Fish Fair-cum-Fish Crop Competition 2012
Imphal, Nov-13: Ningol chakkouba ding ziak in Nov 14, 2012 in Directorate of Fisheries te saina in Hapta Kangjeibung, Palace Compoundah Fish fair-cum-Fish crop competition 2012 om a, Chief Guest in Assembly Speaker Th. Lokeshwar pang ding hi. Huai ah Functional President in Fisheries Minister Md. Abdul Nasir pang ding a, Guest of Honour in Y. Jugendro, IAS Commissioner9 Fisheries) pang ding hi. Fish fair-cum-Fish crop competition 2012 hon zawh in mipite’n govt. rate in nga(fish) a deih zahzah uh lei hei ding hi’n kigen hi.

Bandminton Championship 2012 kipan ding
Imphal, Nov-13: Manipur Badminton Association saina in Khuman Lampak Sport complex, ah Nov 14, 2012 in ‘the 37th Junior National Badminton Championship 2012’ kipan ding a,zinglam dak 11.00 in a honna programme om ding hi. Huai ah Manipur Governor Gurbachan Jagat in Chief Guest a pang in hong ding a, Functional President in Manipur Olympic Association President banah Manipur Badminton Association President Bijoy Koijam, ex-MLA pang ding a, Guest of Honour in N. Prithiviraj Singh, Parliamentary Secretary(Youth Affairs & Sports, Tourism) pang ding hi.

Office of the
Kuki State Demand Committee
Head office: Sielmat, Churachandpur- 795128.
Manipur, India.
Ref. No. KSDC/CL 01-04/2010.
APPEAL LETTER
Date 12th November, 2012.
Amasan jana salam!
Ahunglhung ding nisim 15/11/2012 (Thursday) 5.00pm apat British-te vaihop masang laija pat Kuki-te jalentah a iki vaihopnao gam chu India danpi noija Kuki State avel a tundoh kitna ding leh government tawh SoO kai Kuki sepia ho government in political dialogue aneipi diu deina in Kuki State Demand Committee (KSDC) in Imphal to Senapati, Imphal to Tamenglong, Imphal to Ukhrul, Imphal to Saikul, Imphal to Moreh, Imphal to Chandel, chuleh Imphal to Churachandpur phat tep umlouva (Indefinite) kiphinna, Bandh boldin akiguong in ahi. Hiche bandh hin, Medical, Electricity, Water Supply, Media ho tilou adangse ahuom soh hiel ding ahi.
Hijeh chun nangho Organization/Association/Institution/NGO/Clubs in jong lung leh tha tawh tho a nei nitpih/kithopi/pan ana la cheh diuvin kahung tao uve.
Kakipah e,
KSDC tha lheng’a,
Sd/-(S. George Guite)
Secy. Inf & Publicity, KSDC