Japan in Manipur ah development nasepna dia panpihna sum piak touhzel lunglut; JICA team in Manipur a Security dinmun hong enkhia
Imphal, April-29: Khantouhna leh masawnna thila tuantual mahmah lai Manipur ah Japan in tui(drinking water),lamlian leh lei(roads and bridges) banah sericulture project nasepna a zat dingin panpihna sum piaktouh zel lunglut a,hileleng Manipur a law & order dinmun tawh kisai ah lungtunhuailou hi a thei in Manipur a security dinmun enkhe ding in Japan International Corporation Agency(JICA) akipan official 3 in ni 3 sung Manipur a om dingin zan in Imphal hongtung uhi. Amaute Delhi a JICA office akipan Tomohive Ichivuchi, Deputy Chief Representatvie; Miss Yu Sasaki, Lead Administrative Officer hi uh a,Delhi a JICA office a Sr Manager Risikesh Mirala in hongzui hi.

JICA team in tuni’n a tunna uh Classic Hotel ah WL Hangsing,IAS,Principal Secretary(PHED); Ram Muivah,IAS, Principal Secretary(Works) leh O. Nabakishore,IAS, Principal Secretary(Sericulture) atuamtuam in kimuhph uh a, Manipur a development scheme tuamtuam water supply, road & bridges leh sericulture tawh kisai atuamtuam in genpih uhi. Huaizawh in Y. Joykumar,IPS, Manipur DGP tawh security tungtang genkhawm uh chihthu om hi. JICA in Manipur a Sericulture project phase-1 adin kum 2008 in Rs.134 crores seng uh a,Manipur a law & order dinmun lungtunhuai hi a a kilat leh sericulture project phase-2 adingin Rs. 356 crores hong piak lai lunglut uh hi’n kigen hi.

JICA team in April 30, 2013 in Maibam Lokpaching a Japan-te monument mun vapha ding uh a,huaikhit in Delhi apan Manipur hong tungkik ding a lam-et Sericulture Minister K. Govindas a office ah sawtlou vamu ding uh a,sunnung in Imphal apan Delhi zuan in kiknawn ding uh chihthu om hi.

Chibing-Nambing paidante khahkhiak poimawh – Hangshyan Thang; ZYA Block 12na Lentang Block honna leh lopna om
Lamka, April-29: Zomi Youth Association(ZYA) Gen HQ panlakna nuaiah tuni’n Khuga ringroad a T. Daijang khua ah ZYA Block 12na ‘Lentang Block’ honna leh lopna kithuah om a,mipi tamtak paikhawm uhi. Huai ah Ginsuanhau,MLA(Singngat A/C) khuallian in pang a, Functional President in Langkhanpau Guite, Chairman, ADC/CCpur pang hi.Tuni a Chief host ding Thanglianpau Guite, President ZRO HQ a tel manlouh ziakin ama sikin Hangshyan Thang, GAD & Co-ordinator, ZRO HQ pang a,aman a thugenna ah Zomi a omte’n chibing-nambing paidan leh kivaipuakdante awl-awl a khahkhiak poimawh chi hi.

Tuni zinglam dak 11.30 in T. Daijang Public Ground a ZYA Block thak honna leh lopna ah Guests of Honour in Minboi Vaiphei, MDC leh Hrila, MDC pang uhi. H. Kham Suan Lun, Secy ZYA Gen HQ in vaidawnna thugen in, T. Goukhomang, President, ZYA Gen HQ in Block honna leh makai thakte kichiamsakna nei a, Rev. Thangkhanlal, NTBC in amaute thumsak hi. T.K. Mang, Asst. Info Secy in ZYA Lentang Block tawh kisai report pia hi.

Chief Guest in a genna ah Lentang block mipite adia poimawh tuamtuamte sepkhiak theihna dinga panlakna paizom zel a, huai kawm in khawpi tawh kikawmna dinga kizang lampi leh lei(bridge) bawlthak theihdan om hiam en ding hi’n gen hi. Aman a genzelna ah Khuga canal tungtawn a tuilou omte’n tukum sung ngei a tui ngah ding uh hi’n gen a, ZYA Lentang Block honkhiak theihna dia kithuahpih khaw 13 a hausate puansan silhsak in, ZYA Gen HQ leh Block-te huhna pia hi.

Hangshyan Thang in a genna ah Zomi sunga philantrophic organisation poimawhna liantak om ziakin ZRO makaite’n Bungmual khua ah kum 15 paisa in ZYA phutkhia uh a, Zomi a i pai bangin nambing-chibing paidante khahkhia a, maban sauzaw en in lungsim liantak pukawm a ZYA a kikhaikhawm ding lungput neih poimawh chi hi. ZRO national policy laka poimawh India leh Myanmar a Zomi omte gawmkhawmtu ding ZYA hi’n gen a, khekhat ah dinkhawmna omthei naikei mahleh UPF leh KNO kikhen tuamlou hi a gen in kituahna ding ngaihtuahna in kihouna leng nei zel uh hi’n gen hi.

Langkhanpau Guite in a genna ah khaw hausate poimawhna liantak om man in khat-le-khat kitheihsiam poimawh a, ‘Kuki State leh Autonomous Hills State’ ngetna ah leng amaute mawhpuakna lian hi’n gen hi. Nambing ngaihnat nate’n kigawm khawmna neusak i a, ZYA hamphat huaina i theihsiam leh khantouhna hoihtak omthei ding chi hi. Aman a genzelna ah singtangmite haksatna sukveng theihna dingin KNO leh UPF tawh political talks nei un chi’n Delhi ah Centre govt. makaite nawhna bawl uh hi’n gen a, mipi leh govt. nasemte’n i sepkhiak zahzah apan ngah ding hilehang nek piangkhe ding hiam chihte kivel tuak mahmah chi in, diktatna tawh kuhkal suah a nasep ding hi’n gen hi. ADC/CCpur te’n ZYA Gen HQ, Block leh Unit panpihna dingin sumtang pia uhi.

ZYA Lentang Block ah Unit 13 om a, tuni a block honna hunah ZYA Gen HQ in Guest-te kiangah Zomi puan pia uhi. Special Guest in MDC-te pang uh a, Special Invitees in Zomi frontal orgn makaite leh khaw hausate pang uhi. ZRO HQ apan council of cabinet, executive member leh worker tuamtuamte’n office khak in telkim uh a, khaw 13 akipan mipi tamtakin uap uhi. Lentang ahihleh social worker Tonglal in a phuah hi’n kigen hi. Programme zawh in MDC Minboi leh hausa 13 banah Chief Guest in a thawh uh bawng 3 kigou nekhawm uh a, nitak dak 6.00 akipan lasiam tuamtuamte’n musical nite hunah lasa uhi.

Biakinn, police’ building leh Anganwadi building hawi in om; Gam kituh ziakin Saikhumphai ah inn 45 haltum
Aizawl, April-29: Mizoram govt. in Indo-Myanmar gamgi a Saikhumphai Bawk village suksiat(demolish) dingin thutan khum a, huai dungzui in inn 45 omte mei a haltum in om hi. Gauhati High Court in Mizoram govt. panlakdan mawhpaihthu puang in, gamgi jul a om Saikhumphai Bawk village suksiat louh ding ahi chi a, huai dungzui in tenna inn suksiat a omte compensation pe ding leh thagum a nawhsuah a omte huhna kilawm huntawk pe dingin theisak hi. Hibangkalah, thudang kizadanin kum paisate ah leng gam kituhna ziakin Saikhumphai leh Vaphai khawte’ kalah buaina ana om muh mahmah a, siluang tanpha kikham khinta chihthu om hi.

Thusuakin agendanin, tuni zingkal baihtakin Vaphai khua a tangngau in mipite samkhawm in pasal kum 15 apan kum 60 tan leh numei kum 15 apan kum 50 kikal te’n Saikhumphai khua zuanvek dingin theisak a, Saikhumphai khua tunma a kingak khawm ding leh mipite ban luhding tanpha in theisak chi uhi. Saikhumphai khua ah police duty om den in, tuni ngialin Champhai Police Station OC banah officer dang 2 leh Police platoon khat (mi 30) vel om ua, ahihziakin Vaphai khawmite a tam mahmah ziakun buaina hih veng zoulou in ut le dahin gamtang thei veve uh chih hi. Mipite khouhdaih zawh vual ahihlouh takin 2nd IRB company 2 te’n Saikhumphai khua zuan uh a, huchih lai in police te’n teargas a kapna lam uah numei 3 in liam uh a, police-te tawh kinawktuahna ah pasal khat liam chi uhi.

Saikhumphai khua a tengte nawhkhiakna ding tawh kisai Guwahati High Court-in Mizoram government thupiak a nawlkhin ziakin Vaphai khaw mipite thangpai in Saikhumphai khua ava buhal uh hi’n kigen hi. Vaphai khawmi tamtak kipunkhawmte’n tu zingkalin Saikhumphai buluh in tenna inn- le-lou ban hal uh chi uhi. Vaphai khawmite’n Saikhumphai khua ah inn 45 haltum ua, school leh hospital tanpha haltum in om chi uhi. Hospital ahihleh 7th Day Adventist-te’ a hi a, sap (United States) te’n a bawlsak uh chih hi a, khawmite leh khawkim-khawkiangte tanpha in a hamphatpih mahmah uh ahi chi uhi. Champhai Police Station thusuakin a genna ah inn kang ah Biakinn, Anganwadi building leh Police Duty te’ omna building 2te kangkha lou ahi chi uhi. Tuni a thiltung tawh kisai thuchian kimzaw ngak hilel lai hi.

LOCAL NEWS
CCpur Mela & Trade Fair
Lamka, April-29: CDSA, YPA Lamka Unit leh NE Trade Fair Assn. pangkhawm in April 25- May 15, 2013 sung daih ding in Lamka Public Ground ah ‘CCpur Mela Trade Fair 2013’ kichi om hi. Huai ah Shopping & Entertainment, kimawlna tuamtuam, Handloom & Handicraft tuamtuam leitheih ding ban ah naupangte kimawlna ding thil tuamtuam ahunkhop om hi.

Lamka ah Diabetes OPD
Lamka, April-29: Hill Town a CCpur Govt College square a Nazareth Nursing Home ah tuma zek akipan in Seppatni leh Nilaini(Monday & Wednesday) tengin Diabetes OPD om gige a, zunkhum(diabetes) veite’n zinglam dak 9.00 akipan sunma dak 11.00 tan ki-etsak theih gige hi’n kigen hi.Appointment(booking bawlte) adingin Seppatni & Nilaini teng sunnung dak 1.00 akipan nitaklam dak 3.00 kikal in ki-etsak theih ding hi’n thutut kingah hi.

Singngat bial ah free TB camp
Lamka, April-29:MLA(Singngat A/C) apan thupiak dungzui in Dist TB/RNTCP leh DAO/DAPCU kigawm in Singngat biala Guite Road line mun 2 ah ‘Free TB Detection Camp & Free Medical camp’ nei ding chi’n Dr T. Pumzathang, Dist TB Officer/CCpur apan thutut kingah hi. April 30, 2013 in Maukot/Tuivel khua ah ‘Free TB Detection Camp & Free Medical camp’ om ding a, kalnawn sungin Suangdoh khua ah om ding hi. Huai camp omna mun ah TB veite leh kimuanmawhna neite ki-ensak ding in Dist TB Officer in theisak hi.

Bijang Oil pump ah mi tam
Lamka, April-29: Nagaland ah April 21, 2013 a Oil Tanker Driver S Surjit Singh kidnap hi a, April 22, 2013 in All Manipur Petroleum Tankers Drivers’ Unon (AMPTDU) pawlin strike a pan uhi. April 23, 2013 in S.Surjit khahkhiat ziakin strike khawlsak mahleh uh strike sung in Oil Pump teng kikhak a, strike beinung adia masapen di’n tuni zinglam apan Bijang a Oil Pump M/S Suaknun & Sons ah Diesel leh Petrol hawmkhia uh a, thautui deih mi tam mahmah in Tedim Road lampi zulah gari sautak in kivual hi.

PMEGP Loan JAC bawlkhia
Lamka, April-29: CCpur dist. a PMEGP Loan beneficiary 2013-2013 tuni tana lian mulou tengin JAC bawlkhia in tuni’n akisaipih local bank(Axis, HDFC leh Vijaya Bank) ah memorandum pia uh a, PMEGP piak dinga allocation omsa teng May 7, 2013 tan a hihfel dingin nawhna bawl kawm in alawhchin keileh kiphinna patsawm uhi. JAC thusuakin a gendan in dist. a govt. development programme kibawlte pending ziakin dist. a sum honglut ding Rs. 2,34,500 block kha ding hi’n leng mipi theisak uh a, bank-te’n huai hamphatna a piak nuamkei ding ualeh dist. pawtsan dingin leng theisak uh hi’n taklang uhi. Mipite’n leng kithuahpih chiat dingin JAC te’n ngen uhi.

Khanthang Paite in Pune ZCF kiangah Award pia
Lamka, April-29: Pune Balewadi ah zan nitaklam in India League match kimawlna om a, Pune Football Club te’n Air India te zintun in 4-0 in zou uh a, huai ah Pune FC apan Zomi footballer Khanthang Paite in hihhoih mahmah in "Man of the Match" award piak in om hi. Khanthang Paite in cash prize award Rs. 5,000/- amuh Pathian tunga kipah etsakna in Pune Zomi Christian Fellowship(ZCF) kiangah ahi bangbang (envelop honlouh in) pia hi’n kigen hi. Huailou in match kimawlna hunah leng Khanthang in Pune ZCF te kiang ah VVIP ticket 30 pia a, Pune ZCF te mi 29 in va uap uhi. Khanthang Paite ahihleh Hebron Veng, New Lamka akipan ahi hi.

BSF te’n thaukap sunzom ding
Lamka, April-29: STC BSF CCpur a training te’n April 16,2013 zingsang dak 5.00 akipan in nitak zansawt tanpha Mission compound suahlam, Pearsonmun,Mualkoi leh Gangpimual apan simtum(south-west) lam a firing range ah long/short/grenade leh 51-mm mortar a kap(firing ) uh April 30, 2013 tan ding himahleh May 1- 15,2013 tan sutzop hiding in ahun behlap uhi. Huai hunsung in a kimnai a khua omte apan mihing kuamah huai area a lutlou ding leh ganvulh leng huaimun a lut dia kuama’n khahzanlou ding in DIG, STC/BSF in theisak hi.

Lamka ah vok natna om
Lamka, April-29: Manipur leh Mizoram a vok natna ‘swine flu’ om ziakin vok(pig) tamtak si uh a, huchihlai in Lamka leh asehvel ah vok natna kigen nasa sim hi. Thutut kingah danin veng tuamtuam ah ganvulh adiakin vok damlou leh asi hunkhop om a, damdoi zanga etkol himahle uh damzou tuanlou in an nelou uh a, dinmun hoihlou hiaihiai in om uh chihthu kiza hi.

Scrutiny ah paisuak vek
Lamka, April-29: Kum 2013-16 sung CCpur Dist Sports Assn(CDSA) vaipaw ding telna ding in nomination file hun beita a, tuni zinglam in Hiangtam Lamka a CDSA office ah nomination paper- te scrutiny hun ah akia omlou in paisuak vek uhi. Scrutiny a paisuak teng May 4, 2013 tan in ki-withdraw thei ding uhi. Scrutiny a paisuakte President di'n Lalvullien Joute (RACC, Rengkai); Vice President di'n Lallawmthanga (Ngathal Y/C); T.Thangzasong (Bungmual Y/C), L.Dongzapau Simte (Simveng Y/C), Kamjathang Haokip (M.Songgel Y/C) ban ah Teasurer di'n Thangchinhau (LUS) hi uhi. May 4, 2013 tana ki-withdraw a om kei leh tuhtu omlou a ching a puan hidin kigen hi.

Culvert tuang concrete in bawl
Lamka, April-29: New Lamka huamsung a om Tedim road in a totkhak Simveng zotna lampi bul ah BRO/BRTF a 84-RCC te’n March 2013 kha bullam in culvert bawlna ding lamlian thuktak adung-avai kimkot feet 12, athuk lam leng feet 12 toukuak uhi. Nasemtute’n tuni'n culvert tuang ah cement leh suanghum sung uhi. Tedim Road lampi poimawh laitaka BRO/BRTF te nasepdan zekailua a, gari taite ading in nawngkaina thupitak tun a, March 10, 2013 nitak in leng huai lampi kuak ah Bolero khat kia hi. Huaiziakin BRO/BRTF 80- RCC nasep zawhsiang kin ahih deihthu tamtak in gen hi.

Feet 8 vel asau gulpi mankhia
Lamka, April-29: Liangoumung of Bethel Veng, Singngat in tuni’n a lou kuanna lam ah gulpi feet 8 vel a sau dia gingtak man hi’n thusuak om hi.

Final Selection ah mi 6 telkha
Lamka, April-29: AMFA saina in pasal kum 15-18 yrs kikal mite'n May 1- 6, 2013 sung Artificial Turf Football Ground, Khuman Lampak(Imphal) ah 2-months coaching ading final selection om ding a, Stephen David Darby, Coach of England leh a team te'n final selection bawl ding uhi. Coaching ading final selection hun ah Manipur a Dist teng apan kimawlmi 60 tel ding uhi. CCpur dist apan in John, Thongzathang, Vincent Pauchungnung, Jedidi Haokip, Muansang leh Lalmingmawia tel ding uhi.

Trial-cum-Selection ah 100 val tel
Lamka, April-29: Zomi Football Club (ZFC) in PT Sports complex, New Lamka ah tuzing apan May 4, 2013 tan sutzop dingin Trial- cum- Selection nei uh a, tuzing in football kimawl lunglut mi 100 tel uhi. ZFC in selection a bawl te uh Junior player apan Senior player lutthei ding player bawlkhiat sawm uh hi’n kigen hi.

SUUNNA
Khaigin Guite(72) f/o Zamkhochin of Zion Veng, New Lamka hun sawttak cancer natna a thuak nung tuni zingsang dak 5:30 vel in si a, YPA Hanmual, New Lamka ah kivui hi.A,mah Thanlon sub-divn a Lawibual khaw hausa(chief) ahi hi.
*******************
IMPHAL NEWS
CM leh AAI official-te kihou
Imphal, April-29: Tulihal Airport akipan gamdang tawh lenna tungtawn a kikawm theihna dinga International flight kipat theihna ding genkhawm in Chief Minister leh Airport Authority of India(AAI) official-te tuni’n CM office ah meeting uh a, huai ah Airport ah Customs leh Immigration banah security tawh kisai infrastructure dinmun genkhawm uhi. Infrastructure tuamtuam ahiding banga zawhfel hun ah International flight pat theihna ding in genkhawm nawn ding uh hi’n kigen hi. Tuni a meeting ah AAI lam akipan Regional Executive Director,Engineer leh technical expert teamte tel uh a, state govt lam ah CM banah Revenue Minister Th. Debendra, Chief Secretary DS Poonia,Manipur DGP Y. Joykumar, Manipur Police Housing Corpn Managing Director leh Revenue official khenkhat tel uhi.

Commando-te’ custody ah om ding
Imphal, April-29: Thoubal Police commando te’n zan zinglam dak 6:00 in Pallel Police Station New Building gate kong a frisking a bawlna uah Moreh Post a Manipur Police Commando te’ Maruti Gypsy (MN-O1X/3392) (White) leh Gypsy registration no. omlou sung atuang Police uniform silh mi 10 apan Air bag (Olive Colour) sunga Pseudoephedrine strip 5880 ( strip 1 ah tablet 10 om) a “RESPIFED” kigelh leh Air bag (Deep purple) sunga Plastic packet 23 a kituam Pseudoephedrine tablet 4,41,100 tablet matkhiak ziakin Sub-Inspector khat leh Jamedar 1 telin matkhiak hi uh a, tuni’n Thoubal CJM court ah dinsak in om uhi. CJM court in May 6, 2013 tan police custody a om ding in thutankhum hi’n kigen hi. Court ah tuni a hearing omlai in mat a omte’n tulela Moreh Police Commando unit incharge RK Binod thupiak dungzui in April 28, 2013 zing dak 5:00 in Papal Lamkhai mun a Md Ali s/o Md. Kasim of Lilong Leihaokhong tulel a Papal Lamkhai ah om apan Moreh a Md. Ali kichi kianga piak dingin khamtheih vala uh hi’n gen uhi. Khamtheih matkhiak a om a sum a tuat in Rs. 3.6 crore man hi’n kigen hi. Mat a om police te’ B Debson, Sub-inspector, Imphal East CDO Unit tulel a Moreh Police Commando a posting, Jamedar H Premananda of 1st IRB Thoubal Police Commando a attached tulel a Moreh Police Commando Unit a posting, Constable – N Priyokumar, S. Opendrajit, Ph. Bijendro Singh, Th Pouthang, Henik, Ng Premjit, N Sukumar leh S Ranbir hi uhi.

Imphal east dist ah 144 Cr PC
Imphal, April-29: Imphal east district ding ah mihing hinna adia poithei ding leh thil tuamtuam hihsiat sawm om hi a theihziakin District Magistrate/Imphal East in Jiribam sub-divn telin Imphal east district pumpi ah 144 Cr PC puang a, huai dungzui in pawlam mun khat ah mi 5 sanga tamzaw omkhawm phal ahihlouh banah police leh security-te chihlouh kuamah hiamhei leh galvan tawikhethei omlou ding chih ahi hi. District Magistrate thusuak dungzui in 144 Cr PC tuni zingsang dak 6.00 akipan in May 28, 2013 tan koih hiding hi.

Written test om hun ding kisuan
Imphal, April-29: Manipur Police deptt a Constable(Male/Civil) lakna ding ah PET zoute adingin May 1, 2013 in mun 3 ah written test om dimg a bikhiahsa himahleh pumpelh theihlouh khenkhat ziakin May 4, 2013 a om ding in ahun kisuan chi’n Manipur DGP in theihsakna bawl hi.
Channa zuakte’n kiphin uh.

Sit-in-protest nei uh
Imphal, April-29: Samu Makhong a ‘channa’ zuak numei pawlte’n tuni’n Maharani Thong Makhong mun ah sit-in-protest nei uh a, huai ah numei pawlte’n Samu Makhong a market thak bawl ding ziaka nawhkhiak a om uh hi’n gen uh a, huai munah hun sawtpek apan ‘channa’ zuak a om uh ahihman in market dang bawlkhiak hileleng amau ‘channa’ zuakna ding ngaihtuahsak dingin ngetna bawl uhi.

Combined team in UG 1 mankhia
Imphal, April-29: Imphal West leh Imphal East Commando kigawm combined team in tuni sunnung dak 1:30 in Awang Leikenthabi a Birbal workshop kiangah KYKL active worker Maibam Ibomcha(38) s/o M. Angou of Sagolmang Mamang Leikai mankhia uh a, amah kipuanna tungtawn in a inn akipan Glock 17 9mm pistol 1, magazine 1 leh atang 10 mukhia uh hi’n kigen hi. Maibam thudotna ah amah leh Mayanglambam Ibomcha (29) of Heirangoithong Maibam Leikai in self-styled Capt L. Dinesh (35) s/o I. Hemochandra Meetei of Sagolband Moirang Hanuba Leirak apan thupiak dungzui in April 25, 2013 sun dak 12:00 velin sum demand tawh kisai in W. Manibabu Singh (75) of Wahengbam Laikai innluahna mun ah Chinese handgrenade va pai uh hi’n kipuang a, tuni in leng Moirang Leirak a Mother Care Hospital te’n sum demand zah a piaklouh ziakun hospital khaksak ding a kuan, security- te om ziak in lut theihlou uh a, Tourist Bus neitu Angou of Kwakeithel Soibam Leikai, Lamphel Pharmacy, Shija Hospital, Langol View Clinic leh Maipakpi Maternity Hospital ah ni 2/3 nunga sum vala ding uh hi’n vagen hi.

Students leh teacher -te kiphin

Imphal, April-29: Pundongbam a Lamlai High School a student leh teacher te’n sum demand a om banah a Principal vau a om ziakin tuni’n school campus ah sit-in-protest nei uh hi’n kigen hi. Principal Thangzam Rashi in a gendan in KCP a Tayai kichi in Dec 2012 in kihou dingin sam ngei a, Lamlai teacher-te ziakin KCP cadre bangzah hiam police te’n man uh chi’n KCP te’n ngawhna uhi. KCP(MC) a Noyon group te’n April 13, 2013 in Moreh ah a kihou ding in Lamlai teacher te’ sam uh a, hibang a buai vengvung kalin URF pawlin March kha in Principal inn ah Rs. 1.5 lakhs demand bawl uhi. School thuneite kianga piak dingin April 24, 2013 in Rs. 1.5 lakhs demand letter tawh thautang khat kitunkhawm student 1 kiang ah piak hi a, huai ah deadline April 28, 2013 bikhiah uh hi’n kigen hi. Hibang thute’ ziakin student leh teacher -e’ buai mahmah uh a, student te’ khualna in demand bawl helpawlte’n a thilnget uh zukkik dingin student te’n ngen uhi.

Road Transporter te’n mawhpaih
Imphal, April-29: Imphal-Silchar Road Transporters Welfare Society Secretary W. Sarat in tuni a thusuah a bawlna ah NH-37 (Imphal-Silchar) a economic blockade pailel in mipite’ a hihbuai banah sum dawnna teng a buaisak lai in Zeliangrong te’n a kizoppih deuhte’ uleh a deihsaktuamte’ uh blockade a kala leng taithei dingin permit pia uh hi’n gen a, blockade in mi deihsak tuamte’ leh kizawpna neihpihte’ huamlou hiam chih mipite’n ngaikhawk mahmah hi’n gen hi. Blockade in miteng huam ding a, blockade lakkhiak matan Imphal-Silchar road ah kuamah tailou ding in theisak a, thupiak limsaklou a gari taite’n tuahsia a tuah leh mawh pawlou ding uh hi’n leng taklang hi.

ZYA Block honna leh lopna
Lamka, April-28: Singngat sub-divn a T. Daijang khua ah April 29, 2013 in ZYA Lentang Block honna leh lopna kithuah om ding a, Chief Guest in Ginsuanhau, MLA pang ding hi. Chief Host in Thanglianpau Guite @ Sia Pau, President ZRO pang ding a, Functional President in Langkhanpau Guite, Chairman/ADC CCpur pang ding hi. Huai ah Guests of Honour in Minboi Vaiphei, MDC leh Hrila, MDC pang ding uhi. EM/ADC leh MDC pawlkhat banah Zomi Council a Frontal orgn tuamtuam apan President/ Secretary-te special guests hiding uh a, khawkim a hausa 13te special invitees in pang ding uhi.

Traffic rule bawhsia 13 mankhia
Lamka, April-28: Lamka khawpi sunga ‘One way traffic rule’ leh ‘Gari parking’ dan Police, traffic Police leh VDF kithuahte’n enzui zel uh a, April 22- 27, 2013 sungin traffic rule bawhsia mi 13 mankhia uh a, TR-5 receipt cut in fine sakzel uhi. Traffic Police lam apan kiza dan in tuma lam tawh teh in tunai deuh akipan mipi’n traffic rule theisiam in zui siausiau uh a, traffic rule bawhsia tawm hiaihiai hi’n gen uhi.

Lamka Rock Concert om
Lamka, April-28: Revenge Against Violence (R.A.V) pawlte saina in tuni nitaklam dak 3:00 in Hiangtam Lamka a YPA Hall ah ‘Developing and Promoting the Underground Music and artist in Lamka’ chih thupi a zangin Lamka Rock Concert om hi. Huai ah khawpi sunga Rock band, Hate Blood, 3rd Reich leh lasiam tuamtuam in lasa uh a a, mipi hunkhop tel uhi.

Director makaih in meeting
Lamka, April-28: Dr O. Ibomcha Singh, State Mission Director/NRHM makaih in April 29, 2013 zinglam dak 11:00 in Imphal a Family Welfare Conference Hall ah State Health Society tawh kisai ‘State Level Review meeting’ om ding hi. Huai ah Physical & Financial Performance 2012-13 genkhawm ding uh a, District teng akipan CMO, DFWO, Dist Program Manger (NRHM) leh Dist Finance Manager (NRHM) teng tel ding uhi.

Ni 2 sung TRI/STI training
Lamka, April-28: Dr HL Liensang, CMO/Dist Mission Director, DHS/CCpur saina in May 3 & 4, 2013 in Nurse leh ANM te ading in "Reproductive Tract Infection/Sexually Transmited Infection" training om ding hi. Group ‘A’ ading mi 30 te'n CMO office campus a Mini Conference Hall ah training ding uh a, Group ‘B’ a mi 30 te CMO office campus mah a FHW Training School ah training ding uhi.

Self Help Group Awareness meet
Lamka, April-28: Ms Grace Zamnu,MDC(Muallum) makaihna in tuma zekin Singngat sub-divn a Muallum khua ah numei pawlte tawh ‘Self Help Group(SHG)’ tawh kisai Awareness meeting nei uh a, huai ah SHG member tamkhop paikhawm in maban a nasepdan ding leh thu tuamtuam genkhawm uhi.

Awareness-cum-Medical Camp
Lamka, April-28: Dist.TB officer/CCpur saina in Singngat sub divn a C.Tuivelzang/ Maukot khua ah April 30, 2013 in ‘One Day TB Awareness Campaign –cum-Free Medical Camp’ om ding a,Dr T.Pumzathang, Dist TB Officer, Dr Khenzamung Samte, MO/TB Office, Dr. Lalremruati, MO i/c Singngat PHC; Dr Hegin, MO i/c Behiang PHC; Dr F.Thienkhogin, DACO te ban ah Dist TB Office staff te’ telding uhi. Huai hun ah TB Deptt leh DACO in TB leh HIV/AIDS awareness nei ding uh a, doctor te’n damloute en in manbei in damdoi hawm ding uhi.

IMPHAL NEWS
UN Special Rapporteur in Civil society tuamtuamte kimuhpih
Imphal April-28: Ms. Rashida Manjoo, UN Special Rapporteur on violence against women (UNSRVAW) in Manipur ah numeite bawlsiatna tawh kisai thil omdan suizui dinga ni 2 sung om dingin zan sunnung dak 2.00 velin Imphal hongtung a,aman Manipur Chief Secretary DS Poonia,IAS leh Manipur DGP Y. Joykumar,IPS a kimuhpih banah Imphal Secretariat a Conference Hall ah govt a top official-te tawh meeting neikhawm in Manipur ah numei leh naupangte tunga tatsiatna(crime against women and children) tungtang genkhawm uhi. Tuni zinglam dak 9.00 in North AOC a Classic Hotel ah civil society organization tuamtuam, women human rights defender-te leh bawlsiatna thuak numeite’ innkuanpih(victim)te tawh thil omdan kikupkhawmna(consultative meeting) nei uhi.

Tuni a meeting ah North-east bial leh West Bengal a numei bawlsiatna thuak leh thah a omte innkuante apan mi 200 val tel uh a, International organisation tuamtuam, National NGOs, International Committee on the Red Cross (ICRC) leh Child Rights and You (CRY) akipan palai tamtak leng tel uhi. Rashida Manjoo in a genna ah UN in India gam mun tuamtuam a numeite tunga tatsiatna leh bawlsiatna thiltungte independent a suidia a guan uh hi’n gen a,Manipur a thil omdan UN tun ding hi’n gen hi. Aman a genzeldan in May 1, 2013 in Delhi a Press Conference ah Manipur a thil omdan a suikhiakte puangkhe ding hi’n gen hi. UN a report a piak pansan in UN in govt ah thupe ding hi’n gen a, huaite sepkhiak ahih theihna ding in civil society tyamtuam in mawhpua hi’n leng gen hi.
Civil Society Coalition on Human Rights in Manipur (CSCHR) pawlin March 13, 2013 in
Ms Rashida Manjoo kiang ah Manipur hongpha ding a chialna a thon uh pomsak in April 22, 2013 akipan official mission in India hongpha a, May 1, 2013 tan om ding hi’n kigen hi. Tuni a consultative meeting ah civil society leh organisation tuamtuam akipan thusun 40 val lut hi. Meeting ah Ms Jarjum Ete, Secretary ,National Alliance of Women (NAWO) leh the Arunachal Pradesh State Women’s Commission a Chairperson-lui pitu in pang hi.

CSCHR a Convenor Dr Laifungbam Debabrata Roy in vaidonna thu a genna ah welcome Rashida Manjoo in hibang meeting poimawhtak Imphal a a neihpih Manipur khangthu adia chiamtehtham ching hi’n gen a, Manipur ah numei tunga tatsiatna leh hiamgamkhumna thilthak hinawnlou in ngeina banga ngaihsut theih phial thil mulkimnhuai tawpkhok ahihdan gen hi. Tuni a paikhawmte lak ah (late) Miss Thangjam Manorama’ nu leng leng tel a,aman a tanu mulkimna bei a Assam Rifles te’n soisak leh a sual(rape) tungtang uh a genlai in kidek zoulou in kapkhia a, UN Special Rapporteur Manjoo leng kapkhe hial hi’n kigen hi. Miss Irom Chanu Sharmila in leng UNSRVAW kiang ah khut a kigelh lehkhe pelut chihthu om hi.
Ms Rashida Manjoo in Imphal a om sungin Irom Sharmila muh sawm mahleh phalna piak hilou chihthu om hi.

World Bank team in Manipur pha ding
Imphal, April-28: Mr.Deip Nguyen-van Houtte makaihna in World Bank team apan
Arnab Bandyopadhyay, Ashok Kumar, Charles Kunaka, Gerard Melinden leh Michel Zarnowieck (consultant) te’n India-Myanmar-Bangladesh trade leh Transport Project tawh kisai in May 20-31, 2013 in Manipur telin Northeast state tuamtuam-Assam, Mizoram, Meghalaya, Tripura banah West Bengal pha ding uhi.India govt in deptt of economic affairs tungtawn in Mizoram state road project bawlna 2nd phase adin World Bank apan sum a a nget dungzui in in Wold Bank team in NH-2 a Border post telin Pandu-Guwahati, Dawki, Moreh, Petrapole, Agartala leh Champhai-Khowthar enkhe ding uh a, Manipur a border trade official te banah Chief Minister leng kimuhpih ding uh hi’n kigen hi.

Commando-te apan khamtheih mukhia
Imphal April 28: Manipur Police Commando a Sub-Inspector khat leh Jamedar khat makaihna in Police Commando 11 in Gari 2 atuang in Imphal apan Moreh zuanlai Pallel Outpost a om Police Commando te’n khawlsak in a check ua leh Air bag 2 leh sai-ip 2 dim
Damdoi khamtheih (SP tablet leh psychotropic drugs) mukhia uh a, huaite sum a tuat in Rs. 30 lakhs vel man ding hi’n kigen hi. Commando duty pawlin SI, Jamedar leh commando personnel mi 11 te mantang uh chihthu om hi.

Tourist spot din Andro bawlsawm
Imphal, April-28: A. Shyam Kumar,MLA(Andro A/C) in Andro Sangthei gei a Nongmaijingching mun a Constituency mipite’n sepna amuh theihna ding un tourist spot dia bawlkhiak hidin a gen banah leh huai kim lakah Park bawl hiding in gen a, huai ding in State govt. leh Tourist department kiangah Andro mun pen Tourist destination hihna ding a panlak pih dingin ngen hi.

Bomb puak ah A/R 2 liam
Imphal, April-28: Imphal a Yairipok P/S sung a om Ngarian lampi ah tuni nitak dak 6:10 vel in bomb puak a, huai ah 40-Assam Rifles personnel mi 2 liam hi’n kigen hi.Aliamte’ Subedar NN Panday leh Rifleman Jakir Hussein hi’n kigen hi.

Electro-cum-Solar rickshaw
Imphal, April-28: Manipur adia masapen dingin China in a bawlkhiak electro-cum-solar rickshaw zat hita hi’n kigen a, huai rickshaw-te ah meikhu a omlouh banah deihdan a hat leh awltai saktheih hi a, a tunga solar panel tungtawn a taisak hi a, battery leng zat theih hi’n kigen hi. Thangmeiband Khuyathong a M/s Ganesh Enterprises te’n a khahkhiak uh hi a, New Delhi ah assembled bawl hi a, chi 2 om in huaite van puakna leh passenger puakna om tuak hi’n kigen hi.

Two days Free Health Camp
Imphal, April-28: Manipur Cultural Integration Conference leh INTEK, Manipur Chapter, HRI leh CSD saina in Ukhrul dist a Kasom sub-division sung a om Lairam Khullen ah 2-days Free Health Camp om a, Khullen khawmi tamtak in hamphatpih uh hi’n kigen hi. Health Camp organiser Raju Sharma in amau pawlin Manipur a mun gamlatakte’ ah health camp sai zel uh hi’n gen a, ,maban ah leng mun tuamtuam ah sai ding uh hi’n gen hi.

A/R leh mipi kihou lem
Imphal, April-28: Chandel district a Sehlong village ah Feb 15, 2012 in 36-A/R complex sunga dukan bawl non-manipuri khat non-manipuri mahin that a, A/R te’n athu theikhial in Sehlong mipite’ tamtak a soisa uh a, huai thu April 27, 2013 in Sehlong Community hall ah Kuki Customery anin kihouna nei uhi. Kihouna ah 36- A/R CO Ramkan Sharma, Major Mukesh Kumar leh A/R personnel bangzahhiam tel uh a, mipi lam ah KSO President Thangzalen Mate leh Kuki Chiefs Assn/Chandel dist-te tel uh a, Sehlong Chief in kilemna suaikai hi’n kigen hi. Kilemna dungzui in mipite’ tungah A/R te kheltat nawnlou ding ua, Feb 15, 2012 ni a liamte’ leng panpihna piak hiding in A/R te’n gen uhi.

MU in ahun hihsau thak
Imphal, April-28: Manipur University in BA/B.Sc/B. Com/B.Sc Biotechnology/BSW/FPT 2nd, 4th leh 6th Semester Examination,2013(June) ading exam form leh fee submih theih hun ding hihsau thak a, fine tellou in April 30, 2013 tan sunmit theih lai ding a, fine telin May 4, 2013 tan submit theih ding chi’n Controller of Examinations akipan thusuak in gen hi.