Chairman makaih in meeting
Lamka, April-30: Langkhanpau Guite, Chairman ADC/CCpur makaih in ama’ office chamber ah tuni’n EM/ADC-te,MDC-te leh CEO/ADC CCpur in joint meeting nei uhi. Huai ah DRDA nuai a development scheme tuamtuam tungtang, Council nuai a education thu ban ah teacher-te’ transfer & posting tawh kisai genkhawm hi.

Get-together & Study Tour
Lamka, April-30: Excelsior Spoken English Centre, Salem Veng a English & Hindi trainee pawlin May 1, 2013 in ‘Get together & Study Tour’ paiding uh a, May 1, 2013 zingsang dak 7.00 in L. Mangkhogin,IPS, SP/CCpur in Spoken English Training Centre mun akipan in sawlkhia(flag-off) ding hi,

T. Thangzalian in CBI Award sang
Lamka, April-30: T.Thangzalian s/o T. Nengchin of Chapel Lane, Addl. SP, CBI, Economic Offence Wing tulela Kolkata sem in New Delhi a CBI HQ ah April 25, 2013 a CBI Golden Jubilee Celebration om ni in ‘India’s Best Investigator Award’ sang a, huai award bel All India level hi’n kigen hi. T. Thangzalian leh a innkuante tulelin Kolkata a Salt Lake ah khawsa uhi.Aman CBI a Inspector a sepma in YPA Lamka Unit ah Secretary len ngei hi.

Medical camp ah mi 200 val en
Lamka, April-30: Dist TB/RNTCP leh DAO/DAPCU kigawm in Singngat biala Guite Road line C.Tuivelzang khua ah tuni in ‘Free TB Detection camp & Free Medical camp’ om a, G.Suanchinpau, MDC khuallian apang in hong hi. Huai ah Dr T.Pumzathang, Dist TB Officer ; Dr Khenzamung Samte, MO/TB Office leh Dr Hegin, MO i/c Behiang PHC te’n damlou mi 250 val en in damdoi leng manbei in pia uhi. Huai hunsung mah in mi 50 te’ khaksuah (sputum) test uh a, DAPCU staff te’n mi 15 vel HIV/AIDS test uh hi’n thusuak kingah hi.

PTC, SSPP leh YPA joint meeting
Lamka, April-30:Hiangtam Lamka a PTC office ah tuni nitaklam in PTC HQ, YPA Gen HQ leh SSPP Gen HQ makaite’n kimeltheih tuahna in joint meeting nei uhi. Mizoram a Mimbung ah SSPP HQ Mizoram saina in April 25-26, 2013 sung Siamsin Conference, Career Guidance Seminar leh Block Election ah SSPP Gen HQ makaite vatel uh a, amau vaidawnna kawm leng hi’n kigen hi. Huai hun ah PTC, YPA leh SSPP te’n nam leh gam, society adia hihtheihna lamlam ah kituaktaka sepkhawm ding in thu genkhawm uhi.

June 23 in SSC exam om ding
Lamka, April-30: Staff Selection Commission(SSC) saina in Lamka a exam centre ah June 23, 2013 zinglam dak 10:00-12:00 sung Delhi Police nuai a SI sem ding, Central Armed Police Forces semding, CISF nuai a ASI semding leh NCB nuai a Intelligence Officer sem ding lakna din examination om ding hi. CCpur district ah candidate 810 vel om ding hi’n kigen a, Exam centre ding tunung sawtlou in hihfel hiding chi’n kigen hi.

Gul ft 5 sanga sauzaw mankhia
Lamka, April-30: Bungmual a Goukhanmang te’ ngakul gei ah tuni sunnung dak 1:30 velin ui(dog) in banghiam khat na(bauh) a, naupangte’n a et chet ua leh gul khat mu uh a, huai ngakul geia singbul hawmsung ah lut hi. Ngakul neitute’n kawhawm sung a gul om dotlum in huaizawh in kaikhia uh a, ‘sawkpuang (cobra)’ kichite feet 5 leh inches 3 asau hi’n gen uhi. Huai gul thahma in huai kimah gulsik kang 1 leng khenlum uhi.

Career Guidance Seminar
Lamka, April-30: HSA CCpur Jt HQ saina in May 4, 2013 dak 10:30 am in HL Daka Memorial Hall, HSA campus, Rengkai ah ‘Career Guidance Seminar’ om ding a, Dr Rosiem Pudaite, Prof. Hist Deptt, CCpur College in hong ding hi. Seminar ah Lalramsang Infimate, SDO/Thanlon in ‘Civil and Allied Services’ chih pansan in sinsak ding a, Dr Olivia Joute, MD in ‘Medical’ tungtang sinsak ding hi. Maj Vikas Kundu, 46-Bn A/R in ‘Career in the Armed Forces’ chih leh Nelson L.Khawbung, Ruonglevaisuo Education Society in ‘Getting through the Staff Selection Commission’ chih pansan in sinsak ding hi.

Malaria positive mulou
Lamka, April-30: Dist Malaria deptt/CCpur te’n April 2013 kha sungin damlou tuamtuam 941 sisan test uh a, huai lak ah malaria positive khat leng mulou uh hi’n thusuak kingah hi.

Teachers’ training pailel
Lamka, April-30: SSA-RTE/CCpur saina in zan zinglam in IB Road a Synod Hall ah ‘4 days Special training program for selected teachers/instructor and SMDC members of Residential training centre’ kichi kipan a, Joseph Lalrothang, ZEO in hong hi. Training sungin Gojendra Singh, DPM-SSA; RK Roshan Singh, Account Officer; N.Biren Singh, DIC/Planning; Kh Ramacharan Singh, DIC-out of school children leh Lorence Thangjom, Accountant te’n sinsak uh a, May 2, 2013 in zouding uhi.

SUUNNA
Mrs. Ngemdouching (65) m/o Paukhanpiang of C.Tuivelzang tuni nitak dak 6:00 velin cancer in si a, May 1, 2013 in C.Tuivelzang hanmual ah kivui ding hi.
*******************
IMPHAL NEWS
Tuni’n Cabinet meeting om
Impphal, April-30: CM Cabinet Hall ah tuni nitaklam dak 3:00 in National Population Register Project nuai a Bio-Matric enrolment tawh kisai in Cabinet meeting om a, huai ah Deputy CM leh Cabinet Minister-te banah Chief Secretary, Addl. Chief Secretary( Home), Home deptt Official-te, Census Director, DC-te leh MANITRON te’ leng tel uhi. Enrolment ah Iris,Finger print leh photo lak hiding a, June 30, 2013 tan a zawhsiang dingin gen uhi. In-Media leh MANITRON in enrolment sai ding uh a, In-Media in Ukhrul, Bishnupur, Senapati leh Thoubal huam ding a, MANITRON in Imphal West, Imphal East, Chandel, Tamenglong leh CCpur huam ding hi.Minister/MLA te banah Public representative te’n mipi teng ki-enroll dia panla ding uh hi’n kigen a, July 31, 2013 tan in data leh authentication banah thil tuamtuam’ zawhsiang hidin gen uhi.

Airport puahna July in zawh hiding
Imphal, April-30: Chief Minister O. Ibobi in tuni zinglam in Imphal Tulihal Airport puahna nasep va enkhia a, huai ah CM in media-te’ dotna a dawnna ah Aiport puahna nasepna pailel June a zawhding himahleh buaina khenkhat ziakin zekai zek ding a, July kal masa sungin zawhsiang hidin gen hi. Airport upgrade na dingin state govt. in gam 690 acre lak beh a, tulelin Airport mun acre 1100 in lian a International flight (lenna) in leng bawhthei ding hi’n gen hi. CentralPWD te etkaina nuai ah upgradation bawl hi a, fencing leh mun khenkhat agency 3/4 tungtawn i Police Housing Corpn in bawl hi’n kigen hi. Deputy CM Gaikhanngam, Works Minister Kh. Ratankumar, RK Anand, MLA, Chief Secretary DS Poonia leh DGP Y. Joykumar te’n CM zui uh a, CM in huaimun apan Naoriya Pakhang Lakpa A/C a development work tuamtuamte enkhia hi.

Preshow Shimray,MLA ambush in om
Imphal, April-30: MK Preshow Shimray,MLA(45-Chingai A/C) in tuni zinglam in Ukhrul district a Ngainu village ah Guest House hong dia kuanlai khaw mite’n ana phallouh ziak un Tolloi mun zuan a kiklam, helpawl hidia gintakte’n tuni nitaklam dak 3:00 velin Ukhrul P/S apan km 5 a gamla Tolloi junction mun ah na ambush uh hi’n kigen a, huai ah Manipur Rifle leh helpawlte’ bangtanhiam a kikaptuah nung un helpawlte kihemkhia uh a, kikaptuahna ah asi leh liam omlou hi’n kigen hi.(UNA)

CS service hun behlap himaithei
Imphal, April-30: DS Poonia,IAS, Chief Secretary tuni’n a sepna apan khawl(retire) ding chihthu om mahleh aman Officer khuamah khut ah mawhpuakna apiak thu zak hilou a, thuthang kizadan in Manipur govt in a sepna(service) hunk ha bangzahhiam behlap sawm hidan in kigen hi. Hibang kalah Manipur govt in tuni’n senior IAS officer 2 Principal Secretary akipan Addl Chief Secretary in kaisang dak a, huaite RR Rashmi,IAS leh LP Gonmei,IAS hi’n kigen hi.

BJP in Ibobi’ govt. mawhsa
Imphal, April 30: Nityaipat Chuthek a BJP Manipur Pradesh office ah tuni’n press conference om a, BJP Manipur Pradesh President, Th. Chaoba in Manipur ah O. Ibobi makaihna Congress govt. in drug smuggling a khamdaih zawhlouh ziakin smuggling tawh kisai thilte’n kiamlam sangin punlam nawt hi a gen kawmin govt mawsakthu gen hi. Minister leh MLA khenkhat te’ khamtheih puakgukna ah a kigolh ziakun state min se mahmah hi’n gen a, Police te’n khamtheih a matkhiakte’ uh tuni tan mipi ma ah apuankhiak louh ziakun govt. kigolh ahihdan langsak a, Police lakna tawh kisai a nekgu na ah leng govt. kigolh nasa mahmah hi’n gen hi.

Purana Market a numei pawlte’ buai
Imphal, April-30: Purana Market a 1st floor ah Manipur Keithel Nupi Marup (MKNM) pawl in Press Conference a neihlai un Khwairamband Keithel Sinpham (KKS) leh Saktam Kanba Lup(SKL) pawlin a sukbuai ziakun, Manipur Press Club ah Press Conference mun suan uh a, huai ah MKNM Secy. L. Memma Devi in UPA Chairperson Sondia Gandhi in Market 3 bawl thakna ding a Rs. 72 crores a sanction zat thelthang hih banah loan Rs. 44.80 lakhs leh state govt. in grant a Rs. 3 lakhs a bawlte leng thelthang hi’n gen hi. CM in hun paisa ah GM hall a vendor license diklou nei mi 3 Rs. 44.80 lakhs chiat cheque a piak, Co-operative Bank staff, Leima, ex-MLA leh vendor license diklou(fake) neite khem ziaka ahawmkhiak hi hiam chi’n dotna leng bawl a, Khangem (N) Rani devi in Purana Makert a nga (fish) zuakna vendor license lem No. 1137 nei in Rs. 13.65 lakhs loan la a, Krongbrailakpam (O) Pakpi Devi in vendor license lem No. 98, shed No. 14 tungtawn in Rs. 16.90 lakhs la a, RTI tungtawn in Laisram (O) Kiranmala Devi in kiangah vendor license No. 98 piak a om hi’n gen hi. MKNM President Yambem (O) Ibeni Devi in Chief Minister O. Ibobi in market thak 3 bawlna ding Rs. 72 crores thelthang sak ahihdan RTI tungtawn a theihkhiak hi’n gen hi.

Tpt deptt te’n kiphinna khawlsak
Imphal, April-30:Transport department a employee te’n A. Shivadas Sharma in Deputy Director (Transport) len ding a order suak phelkik dinga phutna in ceasework a neih uh govt in order thak a suah ziakin tuni akipan a kiphinna uh khawlsak uhi. Huai dungzui in A. Shivadas Sharma in Under Secy.(AR) & Dy Director (State Academy of Training T) len ding hi. A. Shivadas Sharma in Dy Director(Tpt) len dia order a suahma in aman SDO/BDO Chandel & TO/Chandel in addition len ahi hi.

LDC written test result suak
Imphal, April-30: Porompat a JNIMS ah LDC/Record Clerk/Coding Clerk lakna dingin January 2, 2011 a Written Test om tuni’n a result suak a, huai ah General 60, OBC 18, Physically Handicapped 4 leh ST 31 lak hi’n kigen hi. ST category a lawhchingte Roll no. 14, 129, 182, 193, 198, 230, 290, 321, 328, 368, 370, 392, 462, 474, 642, 736, 741, 770, 788, 802, 804, 807, 820, 900, 921, 925, 931, 950, 955, 982 leh 990 hi uhi.