Lamka mi numei 2 akipan RP tablet tamtak mukhia
Dimapur, April-27: Nagaland a Chumukedima check gate ah zan zingkal in Imphal zuan a pailai Winger van atuang Lamka mi numei 2 apan in state excise personnel te’n tulai a damdoi tang(tablet) khamtheih kithang mahmah Relipen (RP) tablet tamtak mukhia uh a, huaite a sum atuat in Rs 2 lakh val man ding hi’n kigen hi. Northeast India(India malsuah) bial ah damdawi khamtheih ‘Relipen tablet’ RP kichi ‘ banned’hi a, Nagaland Excise personnel-te’n numei 2 apan a matkhiak uh RP tang ahihleh gap(strip) 34,400 hi’n kigen hi.
Excise official-te’ gendanin mat a om mi 2 te Mary (28) leh Chingboi (27) of New Lamka, Churachandpur district, Manipur hi’n gen uh a, ahihziakin amaute’n ahihna taktak uh im hizaw danin thusuak khenkhat in gen hi. Superintendent of excise (Narcotics) Kevisetuo Angami in a gendan in numei 2 te’ kipuanna apan thu tamtak theihkhiak hi a, Bangalore a om numei khat akipan in huai khamtheihte Rs. 1,30,600 in a leisawn uh hi a, Imphal ah Rs. 2,23,600 a piakkhiak sawm uh ahihdan kipuang uh chi uhi.
Excise official te’n a genbehna uah numei 2 te’n Dimapur apan Winger van hire uh a, Imphal zuanlai Chumukedima check post ah mat a om ahi uh chi uhi. Thudang khat kizadanin mat a om numei 2 te’n amin uh Mary leh Chingboi chi’n police leh press te’ ma ah gen mahle uh ataktak hiding hiam chih theihchet haksa mahmah lai hi’n kigen hi.

Edu-Expo 2013 zousiang 

Lamka, April 27: Bheema Education Assess leh TL Kom, Education Consultant saina in Donbosco Hr Sec School ah zan akipan Edu-Expo, 2013 om a,huai ah ah South India a Andhra Pradesh akipan medical institute minthang 12 te’n amau’ institute paidan hilhchetna ding in cabin a bawl uh hi’n kigen hi. Zan a Expo kipatma in student te’n District Level English Grammer Competition nei uh a, tuni’n result puanna, kipahman hawmna leh program hunkhakna om hi. Huai ah T.Manga Vaiphei, Chairman, MTDC khuallian apang in kipahmante pekhia hi.
Chief Guest in tulai competition world ahih dungzui in hibang competition in gah hoih tak a suah deihthu gen a, competition atel student te’n maban ah lawhchinna hoihtak a ngah uh deihthu gen hi.District Level English Grammer Competition ah Ginlalsiam s/o Thualthianmang of Bethel Veng (Rayburn College) in 1st la in kipahman Rs. 25,000/ ngah hi. C.Lianthianlun of Rayburn College leh Rebecca Nianbiakkim of Don Bosco Hr Sec School te’n 2na la in amau Rs. 10,000/- kikim hawm uhi. Edu-Expo 2013 atel student-te lak ah lucky draw nei uh a, Liansuanthang in mankha in kipahman in Nokia Handset 1 ngah hi.

One Day Peace Process Consultative Meet
Lamka, April 27: Zomi Human Rights Foundation (ZHRF) saina in New Lamka a Grace Bible College ah tuni in "One Day Manipur Tribal People Peace Process Consultative Meet" om hi. Siamzading Valte, Chairman, Executive Council, ZHRF in keynote address gen a, Th.Mangthianlal, President & CEO Glocal Volunteer in ‘Roadmap to Peace and tranquility in the context of Manipur Hill Areas’ chih pansan in sinsak hi. Dr Leban Serto, Asst Professor, Martin Luther University, Shillong in ‘Building Peace in Manipur and Northeast India’ chih thupi pansan in sinsak a, Dr Sonthang Haokip, Asst Professor, Moirang College in ‘Suspension of Operation (SoO): Will it bring Permanent Peace’ chih thupi pansan in sinsak hi. Program ah student leaders, public leaders, church leaders,philantrophic leaders leh community leaders hunkhop tel uhi.

Student 11 te’n account hon ngai
Lamka, April 27: Central Sponsored Scheme ‘Inclusive Education for Disabled at Secondary State (IEDSS)’ tungtawnin CCpur dist ah mi 11 in panpihna ngahding uh a, amau akinlam in Bank account hong ding in Maniram Sharma, IAS, Addl DC/CCpur in theisak hi. Govt in bank account tungtawn in student 1 zel kha 1 in Rs 600/- panpihna peding hi’n kigen hi. Panpihna ngahding te -Rengkai Hr Sec School apan Laltapui, Naumnielam (Nuamneilam), N.Lalkumkin leh W.Bemben Devi hi uhi. CCpur govt college apan Moins Lalpingmol leh Grace Lalpuigroul (Grace Lalpuiruol) ban ah Vimala Raina H/S apan Rozy Lalthari, Vungangaihsang (Vungngaihsang) , Khual Joseph Guite , Lamningai leh Niangngaihlian hi uhi.

Consumer Awareness Campaign om
Lamka, April 27: CAF & PD (civil supply deptt) leh Consumer Club saina in tuni in Dist Training Centre, Tuibuong ah ‘Consumer Awareness campaign’ om hi. Huai DC/CCpur sikle tang in Maniram Sharma, IAS, Addl DC/CCpur & Project Director, DRDA in introductory speech nei hi. Awareness campaign hun ah Chinlunthang, Advocate, Legal Adviser to Consumer Club/ CCpur leh George Jangpu, Advocate, CCpur te’n thupi tuamtuam pansan in sinsak uh a, khawpi sunga dawr kai mi tamtak tel uhi.

PHSC 13 a staff te’n meeting nei
Lamka, April 27: Dr Lalremruati, MO i/c Singngat PHC makaih in tuni in CMO office campus ah Singngat PHC nuai a PHSC 13 a staff te’n meeting neikhawm uhi. Huai ah Singngat PHC ah JSY leh JSSK kihawmkhiat dan report uh a, bialtu MLA Ginsuanhau leh Dr HL Liensang, CMO/CCpur te’ panlakna ziakin Singngat PHC a semdin Dr.Mellory leh Dr.Gyaneshyam (Ayush Doctor) te’n joined in thanuam tak a na asep ziak un bialtu MDC, CMO leh Doctor-te tung ah kipahthu leng gen uh hi’n thutut kingah hi.

47th Administrative Council nei
Lamka, April 27:ECCI pawlin zan nitak apan Hill Town a EOC Church ah ‘47th Administrative Council’ nei uh a, Elder LS Gangte, Chairman BOT, ECCI in hongkhia hi. Tuni a vaihawmna hun ah kum 2013-14 sung a Budget zatding in Rs 70, 60, 523/- pomkip uhi. Admn Council ah Rev. Fimchawnthang, Vice Chairman, Mission deptt/ ECCI; Rev. D.Jangkholam, Exe Director, ECA; Rev. Dr.Kh.Khaizakham, retd. Principal ECT leh Rev. Lamkhawsat, Exe Director, ESC te’n Pathian thugen uhi. Huai ah ECCI nuai a saptuam 6- EAC, ECA, EOC, ESC, EUC leh BBEC apan saptuam member tamtak tel uh a, April 28, 2013 in zou ding uhi.

Sinzawl V/A in mawhpaih
Lamka, April-27: Sinzawl village Authority apan thu kizadan in Thanlon sub-division sunga om Sinzawl khua adingin kumlui a PHED/water supply department in tuilakna ding a pipe (tuilong) apiak uh April 24, 2013 (Nilaini) in pawlkhat in long 50 vel ding Lamka lam ah gari zangin pawsuk uh chi uhi. Sinzawl khua ah tui haksa gige ahihna ah, hibang a gamtangte Sinzawl Village Authority in mawhpaihna sangpen pia uh ahihdan puang uhi.

Old Age Pension sum laktheih
Manipur Old Age Pension Scheme(MOAP-Green & Black card holders ) bank a account hongsate adin March 2012 akipan February 2013 sung ading pension sum Rs. 2,400 chiat amau account ah koih(deposited) hi a,bank account hongkhin pensioner te’n account a honna uh bandh branch akipan sum la(withdraw) thei ding uh chi’n District Social Welfare Officer/CCpur apan thutut kingah hi.Pensioner-te leh account a honna uh bank banah account number leng District Social Welfare Office a Notice Board a kitak et-theih ding chihthu om hi.

Canada Ambassador di’n Hau Do Suan
Lamka, April-27: Myanmar govt. in Canada embassy a Ambassador(palai) dingin Hau Do Suan sawl chihthu om a, aman tukha sungin Canada ah join ding chihthu kiza hi. Thu kizadan in Hau Do Suan in Myanmar govt. a Ministry of Foreign Affairs (MOFA) ah Director General (Political dept.) sem a, UN Secretary General in Myanmar aveh hunin kam lettu(translator) dingin leng kizang hi. Myanmar gamsunga singtangmi adiakin Zomi sunga Ambassador masapen Za Hre Lian leh amah zom a Vum Khua Haute khit in kuamah om nawn nailou a, Hau Do Suan in amaute zom hi’n kigen hi. Hau Do Suan ahihleh Tedim huamsung Cingpikot khawmi hi’n kigen hi.

APSC ah tamkhop lawhching
Lamka, April-27: Assam Public Service Commission saina a Civil service leh Police service lakna ding a examna result zan in suak a, huai ah singtangmi Ms Niengkhodei Singson d/o Letjahao Singson of Groveland, NC Hills in Assam Police Service (APS) ngah in, Ms. Rebecca Lalnunngil Changsan d/o Sankhomang Changsan in Assam Civil Service (ACS), Lalrohlu Khiengte s/o Vanlalruot of Saisel in ACS, Oswin Nampui of Haflong in ACS, Ruthi Hmar d/o Vanlalruot of Saisel in Inspector of Tax, Jehova Lalthlamuon Hekte in Inspector of Tax ngah uhi. Lalrohlu Khiengte leh Ruthi Hmar unau hi un kigen hi.

Moupi akuan bangzahhiam electric current in man
Lamka, April 27: Joseph Xaviour Bus zanga Pearsonmun apan moupi akuan innlam zuanlai tuni nitaklam dak 4:30 velin Lamka hanmual ah Bus tunga tuangte’n Awnchinkap Veng te’ electric lakna high tension gui hetkha uh a, mi bangzah hiam electric current in man a, aliamte la ah mi 4 tu’n Hospital ah admit in om uhi. Thu kizadan in Bus tungah mou vanken almirah, dunlop ban ah van tamtak gari in pua a, huai tungah mi 10 val tuangin electric gui a niamluatna mun ah gari tunga tuangte’n hetkha uh hi’n kigen hi. Aliamte a gimsia kuamah omlou hi’n Hospital a duty-te apan kiza hi. Electric current ziaka liamte ahihleh Lianlal John (19) s/o (late) Thangbiaklal of SA Road, H.Thangkhankhual (18) s/o (late) H.Ginhauthang of Mission Veng, Nemngaihkim (11) d/o Thanghau of Elim Veng, New Lamka leh Mary Chiinlalmuak (16) d/o Paukhanlian of Zion Veng, New Lamka te hi uhi.

DC tuni’n Imphal ah giaklut
Lamka, April 27: Uttarakhand state sung Mussoorie a ‘Lal Bahadur Shastri National Academy of Administration’ah April 29- May 29, 2013 ‘Carreer Training’a telding Ms Jacintha Lazarus,IAS tuni’n office kai manlou in a tenna inn ah poimawh bangbang nasem a, tuni nitaklam in Imphal ah giaklut a, April 28, 2013 in Imphal apan Mussorie zuan ding hi’n kigen hi.
Chiengkonpang ah ‘khekhap’ lamdang tak om
Lamka, April-27: Chiengkonpang bazar a ‘T O furniture works’ sungah tuni zingsang in ‘khekhap’ lamdangtak muh in om hi. Furniture house neitute’n a gendanin tuni zingkalin a dawr (furniture house) uh a hon phet un, table neu (side stool) kibawlte’ tungah naungek khekhap tawh kibang abanban in om deudou a, tualou in, singpek khenkhat tung tanpha ah leng kilang ban in khekhap tamtak kimu chi uhi. Amau leng a dawr uh ahon tung un table 2/3 ah khekhap lem mu mahle uh bangpi a ngailou in puansia in nulkhia ua, ahihziakin mihing (naungek) khekhap tawh kibang mun tuamtuam ah tamkhop amuh tak un lamdangsa mahmah uh hi’n gen uhi. 
A mukha leh theikha mi tamtakin leng tuamun vadelh in mobile leh camera in ban lak uhi. Huai furniture house nitak tung apan kikalhin zingkal in kihong pan zel hi. Zan nitak zankhang leh tuni zingkal baihtak kawmtuah velin dawr sung ah naungek kapging za leng om hi’n a gen pawl om a, ahihziakin inntek/dawr neite’n bel tua bang thawmging bangmah zalou uh ahihdan gen leuleu uhi. Mi tamtakte’n dawi neu chikhat ‘Keuhthang’ khaap hidingin muanmawhhuai sa uh chi’n leng kigen hi.