Manipur Trinamool makai te’n Press te kimuhpih
Lamka, April-24: Manipur Pradesh Trinamool Congress(TMC) President Ms Kim Gangte,ex-MP makaihna in TMC party leader khenkhat in tuni in Imphal apan in Lamka hong pha uh a,M. Songel khua a CCpur District Trinamool Congress office (Thangkhomang Haokip tenna inn) ah sunnung dak 1:00 in Press-te kimuhpih uhi. Kim Gangte in a genna ah zan zek in Mizoram ah Mizoram Trinamool Congress unit honkhiak hi a, huai zawh in Aizawl apan Guite Road tawn in ni 2 sung gari in 2 hong pai uhi. Aizawl apan Tuivai-lei kikal pucca road hoihtak in kibawl a, himahleh Tuivai apan Manipur state hongtun takun Mizoram tawh tehkak vual louh in lampi sia hi’n gen hi.

Kim Gangte in agenbehna ah Sinzawl khua pan Guite road tawn in hongpai uh a, lampi siat kia hilou in Guite road in a totkhak khuate ading in development fund tuamtuam tamtak om mahleh nasep khiat muhding omlou hi’n gen a, siamsinna lam leh damtheihna lam (education & health care) tawh kisai leng muh ding omlou hi’n gen hi. Manipur govt in singtangmite hon nelhsiahdan uh kilang chiang mahmah a, singtangdawn a omte’n haksatna tawpkhawk tuak uh chi’n gen hi. Manipur ah O. Ibobi makaih in Congress in govt bawl a, dan leh thupiak (law & order) enkai zoulou ahihdan leng chiang mahmah a, niteng in kithat, kimat chihte om gige ahihman in Manipur ah law & order omlou banah development bang mah omlou tawh akibat ziakin mipite leng lungmuang taka om theilou hi’n gen hi.

Aman agenzelna ah Manipur a Congress govt ginatlouh ziakin mipi leh hausate’n IAY, BRGF leh fund tuamtuam mukhalou hi’n gen a, Central tungtawn a DoNER in fund hong piakte koilam tung hiam chi’n govt ah dotna bawl hi. Chiklaipeuh in kuate hiam lungkimlouh ziakin JAC kibawl in ‘bandh’ leh ‘strike’ omden phial a, mipi a thuaktu mah hizel chi’n gen hi. Manipur ah kikhekna omna ding in Hill district alianpen CCpur district a kipatkhiatna ding mun hi’n gen a, Trinamool Congress in vai ahawm hunhun in Mizoram tawh kibang in CCpur district ah development om pan phet ding hi’n gen hi.

Ceasefire kum khat sung behlap uh; India govt leh GPRN/NSCN in Delhi ah kihouna nei
New Delhi, April-24: GPRN/NSCN leh India govt in New Delhi ah meeting poimawh mahmah nei uh a, huaiah hun sawttak Cease-fire Ground Rules (CFGR) tungtang genkhawm uh a, kithukimna kichiantak om theilou in May/June 2013 sungngei in India govt leh GPRN/NSCN in CFGR tawh kisai etthak dingin thupuk uh chihthu om hi.

GPRN/NSCN’s Cease-fire Supervisory Board (CFSB) a supervisor C.Singson in News saite kianga a gendanin, ceasefire ground rules tawh kisai kuapeuh in ngaikhawk mahmah a, India govt in a ngaihkhok bangbangin Nagate’n leng ngaikhawk ahihman in kuam’an hibang ‘issue’ poimawh chiamnuih bawltheilou ding chi hi. National capital New Delhi a zanhala India govt leh NSCN kihouna hun ah NSCN/GPRN lam ah C. Singson makaihna in mi 6 tel uh a, Hotel Ashoka ah kihouna nei in ceasefire kum 1 sung behlap uhi.

Hibangkalah Singson in gendan in May 2013 sung ngei in Ministry of Home Affairs (MHA) in CFSB Chairman thak ding a guangding chi hi. MHA in Naga helpawlte’ lakah kithah, kimat leh kisoisakna ngaikhawk mahmah uh chi’n Singson in gen a, lemna, muanna leh khantouhna taktak omna dingin Naga helpawlte khekhat a dinkhawm poimawh mahmah chi’n home ministry official te’n hah gen mahmah uh chi hi.

Damloute panpihna sum hawm  
Lamka, April-24:Manipur govt nuaia Tribal Affairs in District Council tungtawn in singtangmi(ST) damloute etkolna ding panpihna sum(financial assistance) a sanctioned zangin tuni zingsang dak 8:00 in Langkhanpau Guite, Chairman ADC/CCpur, S.Kamsuanlun. EM/ADC; H.Mangchinkhup, EM/ADC leh Mannuamching, CEO in Med Supdt Dr N. Paulginthang,Dy Med Supdt Dr Kim Simte leh Dr HL Liensang, CMO tawh kizui in Ward tuamtuam a damlou 99te lakah panpihna sum hawmkhia uhi. Huaite category ‘A’ a mi 39 te Rs 2000/- chiat pia uh a, category ‘B’ a mi 60 kiang ah Rs 1000 chiat pia uhi.

Consultative Meet om ding  
Lamka, April-24: Zomi Human Rights Foundation(ZHRF) inntekna in April 27, 2013 zinglam dak 10.00 akipan nitaklam dsak 3.30 tan New Lamka a Grace Bible College campus ah ‘One day Indigenous Tribal Peace Process Consultative Meet on Peace and Tranquility in the hill areas’ kichi om ding hi. Huai hun ah Siamzading Valte, Chairman,ZHRF Executive Council in keynote address gen masa ding a, Resource person Dr Leban Serto, Asst Professor of Martin Luther University, Shillong; Rev Th. Mangthianlal, Convenor of Glocal Volunteer leh Dr Sonthang Haokip, Asst Professor of Moirang College pang ding uhi.

April 31 tan sutzop hiding
Lamka, April-24:Singngat sub-divn a mipite adingin Zougal Hall, Zou veng a Biometric Census om April 30, 2013 tan sutzop hiding a, niteng in zinglam dak 10.00 akipan nitaklam dak 4.00 tan kihong ding a, Singngat bial mipiteng in alou theilou in Biometric Census la chiat dingin SDO/Singngat in theisak hi.

Trinity Centre(Rehab) mun enkhia  
Lamka, April-24: Derek Peterson, Chairman, Hope Foundation Trust in UK akipan India gam hongpa in April 16, 2013 in Pearsonmun a Trinity Centre (Drug Rehabilitation Centre) nasepdan enkhia a, tulelin huai mun ah inmate 6 om lel hi’n kigen hi. Derek Peterson in April 26, 2013 in Lamka nusia in New Delhi zuan ding a, huai apan UK ah kiknawn ding hi’n kigen hi.

IWDP tawh kisai meeting om
Lamka, April-24: Chairman ADC/CCpur makaih in ama' office chamber ah tuni in IWMP meeting om a, huai ah DC/CCpur & Executive Director,DRDA; Addl DC & Project Director, DRDA banah Agri, Horti, Fishery,Forest officer-te leh Watershed Development team apan engineer-te tel uh a, IWMP project hoihtak sepsuah theihna ding thu gen hi. Meeting ah kum 2013-14 in IWMP project nuai ah gam hectare 12000 alian zat hidin gen uh a, project 2 a khen in Project 1 ah gam hectare 5000 sang alianzaw hidin thupuk uh a, Thanlon sub division ah project 1 ban ah Henglep leh Samulanlan block kikop dingin project koih hidin kigen hi.

Dist Level Literary hun kisuan  
Lamka, April-24: Block Level Literary competition neihzawh hita a, Block Level apan Dist Level Literary competition a teldingte adin April 26 & 27, 2013 bikhiah himahleh lemtanlouhna omziak in July 12 & 13, 2013 a neih ding in ahun kisuan chih thutut kingah hi.

ZYA Lentang Block honna leh lopna  
Lamka, April-24: Singngat sub-divn a T. Daijang khua ah April 29,2013 zinglam dak 11.30 akipan in ZYA Lentang Block honna leh lopna kithuah om ding a, Chief Guest in Ginsuanhau, MLA pang ding hi. Chief Host in Thanglianpau Guite @Sia Pau, President ZRO pang ding a, Functional President in Langkhanpau Guite, Chairman/ADC CCpur pang ding hi. Huai ah Guests of Honour in Minboi Vaiphei,MDC leh Hrila,MDC pang ding uhi.EM/ADC leh MDC pawlkhat banah Zomi Council a Frontal orgn tuamtuam apan President/Secretary-te special guests hiding uh a, khawkim a hausa 13te special invitees in pang ding uhi.

KSO in makai 2 guangthak
Lamka, April-24: KSO/CCpur district a General Secy Lamminlun S.Gangte in Maharashtra a sem dingin Bank a Probationary Officer a muhthak ziakin kitawpna pia a, huai pomsak nung in ama’ mun ah Robert Paoboi Haokip guan in om hi. Huaibanah Secretary R & R lending in K.Lunthang Kipgen guan in om chih thusuak om hi.

Vanman khangsaklou di’n theisak
Lamka, April-24: Phaijang helpawl in numei naupang Alice Kamei(14) pimang in helpawl a teldia a lak uh khahkhe dia phutna in Naga community a civil orgn tuamtuam in April 21, 2013 akipan hunchiam omlou din National Highway 2 a bandh a bawl uh suanlam a nei in Lamka khawpi ah kuaman mahni utdan a vanman khangsak omlou ding leh Distrct admn theihpih a vanman bikhiahdan kuapeuh in zui dingin leng CCpur Consumers’ Club(CCC) te’n ngen uh a, mahni ut dan a mawk khansak a om leh CCC te’n gal-et lou ding chi’n puang uh a, huai hun ah kuama’n CCC mawhsak theilou ding in leng theisak uhi.

HPC (D) in thupuan bawl
Lamka, April-24: KT Hmar, Town Commander HPC (D) apan thusuak in agendan in tukum 2013 akipan in HPC (D) area a lui(river) omte ah mihing damtheihna adia hoihlou damdawi leh poison) kuama’n zanglou ding in puang a,thupuan bawhse teitei a om leh akituahpih bang action khauhtak lak hidingin taklang hi.

H. Mangchinkhup,EM/ADC’ pa si  
H.Lianzamang Guite(93) f/o H. Mangchinkhup, EM/ADC,CCpur tuni nitak dak 7:30 velin teknat in si a, April 25, 2013 in YPA Bungmual hanmual ah kivui ding hi. H. Lianzamang Guite bel "Guite Khangthu Bu" kichi labu bawltu ahi hi.
GAS NEWS

Kimjoe: Booking upto Jan 31. stock- 306. Time: 10am
********************
IMPHAL NEWS
Chief Minister tuni’n zinkhia
Imphal,April-24:Chief Minister O. Ibobi tuni’n New Delhi ah zin a, Deputy Chief Minister Gaikhangam leng tuni in Delhi ah zin hi.Chief Minister O. Ibobi leh Planning Commission a Deputy Chairman Montek Singh Ahluwalia in April 25,2013 in Yojana Bhavan, New Delhi ah meeting ding uh a, kum 2013-2014 sung a Manipur Annual Plan ding zah bikhiah(finalised) ding uh hi’n kigen hi.Manipur Chief Secretary DS Poonia,IAS leh Planning deptt a official te ni bangzahhiam pasa akipan in Delhi tungkhin in panla uh hi’n kigen hi. Manipur in kum 2012-2013 a Annual Plan Rs. 3500 crores mudia bikhiah lakah 30% a lehkik(refund) ngai a, tutung adin Rs. 4200 crores ngahsawm in Planning Commission ah hahtakin delhzui uh hi’n kigen hi.

Driver khahkhiak in om

Imphal, April-24: Nagaland ah April 21, 2013 a Oil Tanker Driver pimang a om S Surjit Singh zan April 23, 2013 sunnung dak 2:30 velin khahkhiak hi a, huai ziakin All Manipur Petroleum Tankers Drivers’ Unon(AMPTDU) pawlin April 22, 2013 akipan strike a pat uh leng tuni zinglam dak 10.00 akipan khawlsak uhi. Khuman Lampak a Inter State Bus Terminus (ISBT) ah tuni’n meeting om a, huai ah Surjit in a thil tuahte a genna ah April 21, 2013 in Kohima entry gate a lut dia a kisalai meltheihlouh pawlin khawlsak in Car(white) in pawkhia uh a, NNC camp zawtpih uh hi’n gen hi. Huai ah Truck neitu tawh kihou dinga thupiak in om a, amah pimangtute tawh a kihouna uah Truck neitu kiangah demand bangmah omlou chih theikhia a, a pimangtute kiang ah khahkhe dingin bangzah veihiam a kinget nung in amah pimangte’n khahkhe kawm in thilnget(demand) uh a pichin matan Manipur apan gari te’ kiveng dingin theisak uh hi’n gen hi.

KCP(MC) in peace talk zom
Imphal, April-24: KCP-MC (Nongdrenkhomba) pawla Gen. Secy. Taibanganba in tuni’n Manipur Press Club ah a gendan in security leh state govt. panlakna ziakin kihouna(peace talk) pan uh hi’n gen a, huai ah KCP(MC) pawl apan N. Nongdrenkhomba @ Romen, Chief of Army makaihna in L. Gunamani @ Guro s/o Rajen Singh; N. Jiten @ Yaimaba s/o Yaima; K. Binoy @ Kebi s/o Prafullo; C. Amuba @ Hohey s/o Ch. Romi leh H. Somen @ Thoungamba s/o Hongba tel uh a,amau AK rifles 2, Sten Carbine 1 leh Pistol 2 tawh kipe khia uh a, maban ah cardre bangzah hiam leng galvan tawh kipekhe ding uh gen chihthu om hi.

Leingoi luakte’n bomb khat mukhia

Imphal, April-24: Thoubal luipiau ah leingoi luak a om nupi pawlkhat in tuni zinglam dak 8:00 velin leingawi aluah lai un leingom lak a om bomb khat mukhia uh a, meltheihlouh pasal khat in huai bomb vapawkhia hi’n kigen hi. Nupite’n police a report a piakna uah bomb a muhkhiak uh sawtlou nungin a theih ngeilouh uh pasal khat in huai bomb va paw khia hi’n gen uhi.

MLA dia candidate 2 in BJP zom
Imphal, April-24: BJP Manipur Pradesh a President Th. Chaoba, ex-MP & ex-Minister in Nityaipat a BJP office ah Assembly election laia candidate mi 2- Raghumani Singh leh Sumatibala Ningthoujam tuni’n party adin lalut chihthu om hi. Raghumani Singh in Assembly election nunungpen ah Trinamool ticket in candidate a, Sumatibali in Heirok A/C ah MSCP ticket in candidate hi’n kigen hi.

CPI-ML in ‘May Day’ zang ding
Imhal, April-24: CPI(ML) saina in tuni’n RIMS Road a CPI office ah All Manipur Intellectual forum (AMIF), All Manipur Democratic women’s front (AMDWF), Student League Manipur (SLM), Irabot Research and Commemoration committee (IRCC) , People Struggle Committee (PSC), All Manipur Rickshaw drivers and Pullers Association leh All Manipur Inter-state Bus Association te’n joint meeting nei uh a, May 1, 2013 in Thangmeiband a Thau ground ah ‘May Day’ zangkhawm ding uh chi’n thupukna bawl uhi. CPI President S. Sunder in Lenin pian champha 100 chinna tawh kiton in khateng a suak ding ‘Anganba Thawanmi chak’ pankhe ding hi’n gen a, May 1, 2013 in AMRDPA leh AMISBA friendly football match kimawl ding uh hi’n leng kigen hi.