DC makaih in bank thu meeting om
Lamka, April-25: DC/CCpur makaih in tuni zinglam in DC’s office a BRGF Resource Centre ah Bank tawh kisai meeting om a, huai ah Chief General Manager, RBI, Gauhati; Lead Bank Manager, CCpur; Lead Bank Manager, UBI, Keishampat; DDM, NABARD/CCpur ban ah distict a Bank tuamtuam a Manager- te, BDO/SDO teng, KVIC leh KVIB, Imphal a incharge teng tel uh a, bank tuamtuamte’n 2012-2013 report pia uhi. PMEGP tawh kisai govt in bank-te kianga allocation a piakte May kha tan a a hihfel ding in DC in thupia a, huai hunsung a hihfellou a omleh govt in deposit a bawlte withdraw sak ding hi’n gen hi. Annual Credit Plan, 2013-2014 dingin Rs. 16423 crore bikhiak uhi.

AGM,RBI in RBI adopted Village, Pearsonmun tawh kisai Pearsonmun a SBI manager kiang ah KCC loan bangzah pekhia hiam chih dotna a bawl SBI Pearsonmun Branch in KCC loan piakkhiat omlou ahihdan gen a, tuni apan kha 1 sunga Kissan Credit Card, KCC loan 10 beek a piak khiak ding in genkhawm uhi. Weavers Credit tawh kisai allocation 90 omte lak ah HDFC in 25% apiak ding leh adang 65% te SBI ten apiak ding uh chi’n DC/CCpur in akisaipihte theisak hi. Singngat khua a Central Bank of India(CBI) in KCC loan 100 val hawm a, a CD Ration uh leng hoih mahmah ahihdan report dungzui in govt deposit leng a tamthei lam Singngat a CBI ah piak hiding in DC/CCpur in chiam hi’n thusuak kingah hi.

Consumer Awareness Campaign
Lamka, April-25: CAF & PD (civil supply deptt) leh Consumer Club saina in April 27, 2013 zinglam dak 11:00 in Dist Training Centre, Tuibuong ah Consumer Awareness campaign om ding hi. Huai ah Ms. Jacintha Lazarus, IAS, DC/CCpur in introductory speech nei ding a, Chinlunthang, Advocate, Legal Adviser to Consumber Club, CCpur leh George Jangpu, Advocate, CCpur te’n thupi tuamtuam pansan in sinsak ding uhi.

CoHSEM official te’n Blue Star enkhia
Lamka, April-25: Blue Star Academy kum 24 sung H/S tan ahih nungin Hr Sec School a upgrade tukum bul akipan panla uh a, huai tawh kisai in tuni sunnung dak 12:30 velin Council of Hr Sec Education Manipur (CoHSEM) a Chairperson S.Geeta Devi makaih in Th.Ranabir Singh, Joint Secretary(Admn) leh Babudhon Sapamcha, Joint Secretary(Academy) te’n Blue Star Academy enkhia uhi.

CoHSEM official te’n a gendan un Hr Sec School hithei ding in building kiningching leh staff kiching banah qualified teacher leh adangdang poimawh om hi’n gen uh a, Blue Star Academy ahihleh kum 2013-2014 a dingin etkhiat thak hidin gen uhi. Blue Star Academy kiphuhkhiat nung kum 25 chinna ‘Silver Jubilee’ kum 2014 in thupitakin lopsawm uh hi’n kigen hi.

SSA Residential thu genkhawm
Lamka, April-25: DC/CCpur & Chairperson, School Management & Development Committee, SMDC, SSA Residential School, New Lamka makaih in ama’ office ah tuni nitaklam dak 3:30 in meeting om a, Committee member lam apan M.Gouzamang Guite, EM/ADC, Khumi Gangte, DIC, SSA Girls Education leh Thanglalmuan Hauzel, MBA, Local Educationist-te tel uhi. Huai ah SSA Residential School, New Lamka a provision omdan in seat 100 chih himahleh tunitan in student 100 val a, State govt ah akinthei bangpen a provision ngetbeh ding in thukim uhi.

Diesel pua DI gari accident in kuang
Lamka, April-25: Tuibuong a stone crasher kiang ah tuni zingsang dak 4.30 velin Diesel pua DI truck (No. MN 03W 0245) accident in lamkhang ah kilep a, diesel a puak ziakin kuangzak hi’n kigen hi. Huai kiangnai Mini-Secretariat muna duty VDF te’ gendan in Imphal apan Lamka zuan DI gari tuni zingsang in Tuibuong a Stone Crasher mun atundek in Tuibuang Downtown lam zotna mun ah kilep a, amau leng accident chih a theih phet un delh mahle uh, gari driver kihemkhe man a, gari kuangzak hi’n gen uhi.

DI Gari in Sintex 1 (1000 litre) leh barrel 2 dim diesel pua a, sintex a pen kuangzak in adangte bel hemkhe man uh hi’n gen uhi. VDF ten a genbehna uah Gari ah meikang om chih theihphet in Fire Brigade- te sam uh a, fire-brigade te leh VDF te panlakna ziakin gari kiang a om tenna innte bangmah chi manlou hi’n gen uh a, gari neitu kua hihiam chih kitheikei mahleh diesel barrel 2 te bel Lamka Police Station ah koihtou uh hi’n gen uhi.

Rock Concert om ding
Lamka, April-25: Revenge Against Violence (R.A.V) pawlte saina in April 28, 2013 nitaklam dak 3:00 in Hiangtam Lamka a YPA Hall ah “Developing and Promoting the Underground Music and artist in Lamka” chih thupi a zangin Rock Concert om ding hi. Huai ah khawpi sunga rock band, Hate Blood, 3rd Reich leh lasiam tuamtuam in lasa ding uh a, huai hun atel ut ten Rs 30/- pia in ticket muhtheih ding hi’n kigen hi.

Chief Committee in theisak
Lamka, April-25: Chief Committee on MGNREGS/CCpur dist a General Secy Th Thangboi Baite apan kizadan in April 24, 2013 a Chief Committee on MGNREGS cabinet thupukna dungzui in April 28, 2013 ma in kuaman block thu tawh kisai bangmah bawllou ding in theisak hi. April 28, 2013 sunnung dak 2:00 in Tuibuong Haosapa’ inn ah CCpur dist sung a Block makaite leh Chief Committee on MGNREGS Cabinet meeting neih hun ah genkhawm a final bawl ding chih ahihziak in Block Level a Chief Assn makaiteng telding in ngen hi.

SUUNNA
Mrs. Sangkhawl (41) w/o S. Goukhansiam of Kanan Veng, New Lamka tuni zinglam in damlou in si a, YPA New Lamka hanmual ah kivui hi.
********************
IMPHAL NEWS
Blockade ziak in vanman khang
Imphal, April-25: Zeliangrong Student Union pawlin RPF khut a om Alice Kamei(14) khahkhiak dia phutna in April 21, 2013 apan National Highway 2 (Imphal-Jiribam-Silchar leh Imphal-Dimapur-Guwahati) lamlian ah blockade apat uh ni 5 chingta a, state pawlam apan niteng vanzat poimawh tamzaw puaklut theihlouh ziakin Imphal area ah van man khang hat mahmah hi’n kigen hi.

RIMSONION Re-union,2013
Imphal, April-25: RIMS a Jubilee Hall ah April 27, 2013 nitaklam dak 3.00 in RIMSONION Re-Union,2013 honna function om ding a Dr Chaltonlien Amo, Chairman, Hill Areas Committee khuallian a pang in Re-Union honna khonvak(lamp) a detkuang banah Souvenir hong ding hi. Huai ah Functional President in Dr Y. Manihar Singh, President, ARIMSA pang ding a, Guests of Honour in Dr S. Sekharjit Singh, Director RIMS; Dr O. Ibomcha Singh, Mission Director NRHM & Director, Family Welfare leh Dr L. Fimate, former Director RIMS pang ding uhi.
Sewerage pipe sungah mi 2 si

Imphal April-25: North AOC a Kekrupat gei a Imphal Sewerage Project kibawl a underground pipeline hahsiang dinga pipe sunga lut E Ranjit Singh (45) s/o (late) E Birchandra leh E Indra Singh(35) s/o. E Tomba of Tentha Mayai Leikai a potkhiak nawn louh ziakun Imphal Fire service te’n hutkhiak sawm in pan alak ua leh sisa in mukhia uhi. Police-te’ gendan in pipe hahdia lut masa Ranjit hun sawttak nungin leng a pawt khiaklouh takin Indra valut a, anih un a potkhiaklouh takun Police te’n Manipur Fire service-te theihsak uh a, mi 2te’ lakkhiak zawh in RIMS tut himahle uh si tuak uh a, doctor te’n pipe sungah huihsiang omlouh ziakin methane gas diklut ziak ua si hi’n gen uhi. (UNA)

COTA in post extend din ngen
Imphal, April-25: Council of Teachers’ Association(COTA) pawlin Directorate of Education(S) nuaia teaching leh non-teaching staff-te’ post extention order suah dingin govt ah ngen uhi. COTA thusuak in a gendan in govt in kumteng in teacher-te’ post extention order suah gige mahleh tukum in tu April kha beipah ding dinmun himahleh govt in a post uh extend-na order suah nailou hi’n gen uhi. Kum 2005 a MGEL updation ahih akipan in teacher te’n mumal taki lawh lalou uh a,huaiziakin teacher tamtakin haksatna tuak uh hi’n COTA thusuak in taklang hi.Govt in tuban ahuntaka lawh pekhe zel dingin COTA pawlin ngen uhi.

Assam ah Khongjom day zang

Imphal, April-25: 122-Khongday Celebration Committee 2013 saina in tuni’n Assam a Hojai village a Manipur Shahitya Parishad Bhawan ah Khongjom Day zat in om a, huai ah Chief Guest in Works Minister Dr. Kh. Ratan Kumar pang hi. Functional President in MSCP President W. Kunjabihari pang a, Guest of Honour in UCM President N. Chandra Yumnam leh Organisation Secy. Y. Cheetry pang hi’n kigen hi.

Kum 1 sung lawh lalou maithei
Imphal, April-25: All Manipur Minor Irrigation deptt Employees Assn pawlin tuni a thusuah a bawlna uah Irrigation dept. a casual, muster roll leh work charge dan a semte’n kum 1 sung kha lawh mulou maithei uh hi’n gen uh a, employee- te’ haksatna a zangkhai deuh theihna ding leh kha lawh ahun taka lak theihna dingin Chief Minister O. Ibobi leh Parliamentary Secretary (Minor irrigation) kiangah 2013-14 budget ah Irrigation department te adingin sum hunkhop bikhiah a telsak ding in ngen uhi.

Mun 2 ah siluang mukhia
Imphal, April-25: Chandel district a Unapal Hills ah tuni zinglam in Sarangthem Ongbi Santibala Devi (40) w/o S. Sanaton Singh of Pallel Mayai Leikai sisa a muhkhiak hi’n kigen hi. Police te’n bangziaka si hiam chih theikei mahle uh amah leh amah kithat hidin gintak thu gen uhi.Thudang kizadan in Heirok Water Supply Scheme tungtawn a Heirok a water reservoir tank kibawl lel sungah April 24, 2013 zinglam in L Shyam Singh (40) s/o L. Ibomcha of Heirok Thokchom Leikai sisa a muhkhiak hi’n kigen hi.

ILP zat dingin phunawn
Imphal, April-25: Federation of Regional Indigenous Societies(FRIENDS) office, Keishampat ah tuni’n President J. Sapamcha in Manipur ah non-Manipuri te tatsiatna(crime) in khanlam nawt hi’n gen a, Inner Liner Permit (ILP) zat din demand uh hi’n gen hi. Non-Manipuri Gajendra Yadav(36) s/o (late) R. Saga Yadav of Samastipur(Bihar) apan sumlem Rs. 1000 leh fake driving license 1 matkhiat hi a, mipi ma ah lakkhia hi. Hibang thilte dalna din Manipur ah ILP zat poimawh hi’n leng gen a,kumlui 2012 July kha in Manipur Assembly session ah ILP tungtang genkhawm uh a, state govt. in Central ah ILP zat dingin ngen mahle uh tunitan in a gahsuahlou hi’n FRIENDS te’n taklang uhi. Myanmar apan Moreh, Nagaland apan Mao leh Assam apan Jiribam ah phalna neilou in non-Manipuri tamtak honglut uh a, huaite’ enkai dingin Jiribam ah check post 1 lel om hi’n leng gen hi. UNA