ZYA Annual Assembly 2013 om ding
Lamka, May-10:Simveng a SYO Hall ah May 15, 2013 in ZYA Gen HQ Annual Assembly 2013 om ding a, Chief Guest in Vungzagin Valte,Parliamentary Secretary(Hort & CA,CADA) pang ding hi. Huai hun ah Chief Host in S. Kamsuanlun, EM/ADC pang ding a, Functional President in M. Guzamang Guite,EM/ADC pang ding hi.Guests of Honour in Suanchinpau Guite, MDC(Lungthul); M. Ginzapau, MDC(Ngazam); Jamkhanpau, MDC(Thanlon); Sianzadong, MDC(Singngat); Minboi Vaiphei, MDC(Haopi) leh Ms Grace Zamnu, MDC(Muallum) pang ding uhi.
Session masa zinglam dak 10.30 in kipan ding a, Block teng akipan in Secretary te’n report pe ding uhi. Huaizawh in H. Kham Suan Lun, Gen. Secy ZYA Gen HQ in report pe dinga, Business Session in zui ding hi. Session nihna sunning dak 1.30 in kipan ding a, T. Goukhomang, President, ZYA Gen HQ apan Presidential address peding a, huaizawh in Niangdeihnuam, Finance Secy, ZYA Gen HQ in Finance Report pe ding hi. Huai khit in Chief Guest, Chief Host, Functional President leh Guests of Honour te apan thugenna om ding hi. ZYA Gen HQ nuaia Constituent Unit a Cabinet teng, Block Cabinet member-te akipan delegate 7 chiat banah ZYA Gen HQ a Cabinet member teng telkim chiat dingin ZYA Gen HQ in theisak uhi.

India leh Myanmar palai 55-te’n Moreh ah Zoulai Seminar nei ding uh
Lamka, May-10: Zou Literature Soceity(ZLS) saina in Moreh a Indo-Myanmar Border Trade Centre ah May 15-16, 2013 sung Zoulai Seminar om ding a, huai ah India leh Myanmar a Zou tate lakah laipau(literature) a kipumkhatna omtheihna ding in Seminar neikhawm ding uh chihthu kiza hi. Huai hunah Lamka leh India gamsung mun tuamtuam akipan palai(delegate) 30 vel tel ding uh a, Myanmar apan mi 25 vel tel ding uh hi’n kigen hi.
Myanmar akipan ZLS seminar a tel dingte lakah Roman Catholic siampu(priest) Rev. Father Goulian( Tamu Parist Priest) leh ZBA, Zou Synod leh Zou Ministers Fellowship apan member-te tel ding uhi. Huai tawh kisai Rev. Thang Khan Khai (Missian Director of ZBA), Kaleymyo (Kawlpi) in a gendanin Kawlgam(Myanmar) lamte’n Zo chih zang uh a, huchihlai in India a omte’n Zou chih zang uh ahihman in laipau zatdan ah kilamdanna om a, Zoulai Seminar poimawhna liantak a om ziakin Seminar neih hiding chi’n gen hi.

Lehkha(pamphlet) thehdalh om nawn
Lamka, May-10: Kuate hiam chih theihkhiak nailou pawlkhat in tuni sun dak 12:30-1:00pm kikal in Khumujamba Meitei Leikai leh Rengkai Bible Hills kikal ah pamphlet ah thu hoihloupipi gelh in piece 100 vel alom in koih uh a, huihnung in mutdalh hi'n kigen hi. Leikai mipite'n lai kithehdalh teng kaikhawm uh a, L.Mangkhogin, IPS SP/CCpur makaih in Inspector Elvy Tunglut, OC/CCpur PS leh Police-te ban ah CT Lian, Social Worker te'n Khumujamba Meitei Leikai pha in lai kitheihdalh teng la uh a, Police te’n kuate thilhih hiam chih suikhiak banah matkhiak sawmin hahtsakin panlal touzel uhi.

Aibulon ah huihpi in inn 2 mutsia
Lamka, May-10 : Thanlon sub-divn sung Aibulon khua ah tuni zingsang baihtak dak 2-3 kikal in huihpi leh vuahpi kithuah in tenna inn 2 mutsia in mi 1 liam hi. Thutut kingah dan in G. Zamkholun(70) s/o (late) Khupkham leh T. Paukhenkap @ Kaplian s/o (late) T. Chinkhohau’ tenna inn huih in mutsia in tuah a,segawp hi’n kigen hi. Huailou in T. Paukhankap leng azi leh tate tawh damdawi inn quarter a om a ihmut lai un huihpi in a omna inn uh feet 40 vel dingah tuahkhia a, azi leh tate tuahkhalou in T. Paukhenkap tuah a, amah leng liam hi’n kigen hi.Aman an ne theilou a, tuni zingsang in Aibulon apan in Sinzawl puaktung hi a, Sinzawl ah doctor te’n en uh a, May 12 in Lamka puaktung hidin thutut kingah hi. Huihpi hatin a mutsiat inn 2te tuni in khawsung mipi’n social work nei in tung ding nawn uhi.

Papak lianpi khat mukhia
Lamka, May-10: New Lamka a 11/33-KV Power Sub Station campus ah tuni zingsang in Thangboi of Khominthang(New Lamka) in peteh(mushroom) chikhat Papak kichi lianpi 1 kia pou mukha in Sialching of Khominthang kiang ah thil omdan gen a, Sialching in Papak bawt in kem hi. Huai papak lian mahmah a, akung 8 inches pha in papak kimkawt feet 3 square phazou a, aletna pen(diameter ) feet 1 leh inche 1 pha hi. Papak mukha peuhin lian sa uh a, mi tamtakin en hial uhi.

Torbung a bomb puaksak mi 2 matbeh
Lamka, May-10: Police apan kizadan in in tuni zinglam dak 9:30 velin 1/11-GR te’n Feb 26, 2013 zingsang a Torbung a IED bomb hihpuakte laka tel UNLF cadre (Army No. 1009 GP) W Shanti Kumar @ Maimu (32) s/o Wangjam Kesho Kumar of Torbung leh Lalthanglien @ Kancha (27) s/o Dongvom Vaiphei of S.Bualjang mankhia uhi. Army te’n Shanti Kumar M-16 rifle tang 5 mukhia in mi 2 te tuni’n Police te’ khut ah pekhia uhi. CCpur Police te’n mi 2te tungah FIR No. 21 (2) 2013 CCP-PS U/S 121/121-A /302/307/326/34 IPC, 5 of Explosive Substances Act & 20 UA (P) Arms Act registerd uhi.

SYO Simveng Unit makai thakte
Lamka, May-10: Tuni zinglam dak 7.30 in Simveng a SYO Hall ah SYO Simveng Unit makai ding tel uh a, telching thakte T.Goukhomang, Adviser SYO Gen HQ in kichiamsak hi. SYO Simveng Unit makai dinga telching thak a omte President-H. Tongzamuan; Vice President-S. Kamlunthang; Secy-L. Kamchinhau; Asst Secy -T. Khamlianmang; Fin Secy- T. Tongkhomang leh Treasurer -Niangzahau hi uhi.

ZFC meeting hun kisuan
Lamka, May-10: Zomi Football Club makai te’n May 11, 2013(Kiginni) nitak dak 6:30 a meeting ding in lai hawmkhia uh a, himahleh meeting hun sunnung dak 1:30 hiding in ahun suan uh a, meeting neihna ding mun kisuan tuanlou hi’n thutut kingah hi.

Baby Khoneimuong sisa in kimu
Lamka, May-10: Tuni zingsang dak 7.00 velin Baby Khoneimuong (17) d/o Ginkholal of Phuoisanphai near Kangvai, tulela a omna Gangpimuol ah sisa in mukhia uhi. Thu kizadanin aneu apan Gangpimuol ah a gang(uncle) Siakkhai’ inn a om in laizil a, tu in Rayburn College ah Class-XII(Science) zil hi’n gen uhi. Tuni zinglam in a innkuante omlouh kal in buhbuk gei ah awklum hi’n kigen hi.Baby in kingaihtuah siatna nei hiding a gintak hi a gen pawl om hi. Siluang Phuoisanphai puaktung hi a, tuni mah in kivui hi.

CTDA Annual Meet-cum-Freshers Meet
Lamka, May-10: CCpur Tribal Doctors Assn. pawlin tuni Dist Hospital a Seminar Hall ah ‘Annual General Body Meet-cum-Freshers Meet, 2013’ nei uhi. Dr VC Pau Tonsing, President CTDA in vaidawnna thugen a, member sisa 9 suunna leng om hi. Dr L.F. Tusing, MD (Physician) & Adviser in saulou thugen a, Dr Chinkholal Thangsing in CDTA Directory hong hi. Prof Lallukhum Fimate, retd Director RIMS in CTDA member thak mi 30 valte laklutna leh amaute hasotna thugen hi. General Body meeting ah member site galna Rs 40,000/-apan Rs 60,000/- a khansak din thupuk uh a, CTDA pen Societies Registration Act 1989 a dungzui in registration bawl ding tungtang office bearer-te khut ah ngai uhi.

Nghathal hausa in hilhchian
Lamka, May-10: Pearsonmun khawsak a om Salem Farm a building luh matkhiak a om Paulalmuan Munsong s/o M. Chinzalian in Canan Veng,Nghathal a om in kigen mahleh Nghathal hausa apan kizadan in Nghathal khua ah Paulalmuan Munsong kichi omlou a,Canan Veng kichi leng Nghathal area hilou in New Lamka huamsung hizaw chi’n hilhchian hi.

SUUNNA
Khamthang f/o (late) S. Neihsial of Gangpimuol tuni nitak dak 7:20 velin a damlouh ziakin Dist. hospital a puaklut himahleh dam zoulou in si a, May 11, 2013 kivui ding hi.

Chairman leh EM te’n genkhawm
Lamka, May-10: Chairman, ADC/CCpur makaih in ama' office ah tuni in Vice Chairman, EM teng leh CEO telin meeting uh a, huai ah Council te'n Songpi area a niin abuak uh tukum sung in mundang ah buak dingin genkhawm uh a, mun lemchang dang et dingin thupuk uhi. Huailou in tuma in Tribal Affairs apan Knapsack Sprayer 800 hongtungte tunung sawtlou in MDC te'n amau area chiat a hawmkhiat dingin thupuk uhi.

Makai Seminar kipan
Lamka, May-10: EBC saptuam a Baptist Dorcas Fellowship, Lamka North Divn saina in EBCC Zenhang Lamka ah tuni in ‘Makai Seminar 2013’om hi. Rev Paukhanmang Guite, DS, EBC Lamka North Divn in Seminar hong a, Miss Liankhoman, Dorcas Co-ordinator, EBC in seminar ah sinsak hi.

Managing Committee tawh meeting uh
Lamka, May-10: New Lamka JB School a Managing Committee leh huai akai student-te’ nu-le-pate’n tuni’n joint meeting nei uhi. Langkhanpau Guite, Chairman ADC/CCpur leh bialtu MDC H.Mangchinkhup, EM/CCpur leng tel uh a,amau school hoihna ding ban ah student-te laisiamna ding in teacher- te banah nu-le-pate' mawhpuakna lian ahihdan gen uhi. Mahni tate lai i hilhtheih kei leleng awlmawh a, laisimna gei a tutpih a, panlakpih theih ahihdan gen uhi. Teacher te'n mihing bawltu hihdan mangngilhlou in missionary nasepna ahihdan theihthak dingin ngen uhi.

IMPHAL
Tuni’n Cabinet meeting om
Imphal, May-10: CM Cabinet Hall ah tuni nitaklam dak 3:00 apan nitak dak 8:00 tan Cabinet meeting om a,agenda 11 vel genkhawm uhi. Manipur Assembly term 10na adia session 5veina ding June 10, 2013 apan full budget session om dingin Cabinet in lemsa uhi. Planning deptt in Plan 2013-14 dungzui a sum zatdan ding Plan Sectorial Allocation proposal a bawl Cabinet in approved hi. Thoubal commando te’n Pallel ah khamtheih Rs. 3.5 crore vel man ding pua Moreh Commando 11 leh Moreh Commando OC matkhiak ahih uh suizui dingin CBI khut a piak Cabinet in lemsa uhi. Assembly Budget session om hun ah khamtheih a sumdawnna omte’ dalna ding leh gawtna ding Dan bawlna dia Bill puaklut ding tungtang leng genkhawm uhi. Manipur a VDF 10,500 te’ kha lawh leng Rs. 1000 a pung dingin Cabinet in lemsa uhi. Cabinet in Category A – Hr Sec a Part-time lecturer mi 355 te’ lawh leng Rs. 8000 akipan Rs. 21,600 a khang dingin lemsa uh a, Category B – Partime lecturer mi 76 te’ lawh Rs. 4,500 leng Rs. 12,600 a khang ding banah Category C – Guest Lecturer mi 53 te’ lawh leng Rs. 21,600 a khang dingin lemsa hi. Cabinet in Manipur Forest Service Rule 1986 leh Manipur Junior MCS Service Rule 2007 te’ leng amendment bawl ding telin thu tuamtuam leng genkhawm uhi.

Indefinite Bandh ding ahun suan uh
Imphal, May-10: Seitinlal Kipen (52) s/o (late) Haokholam Kipgen of Bongbal Kholen village leh Tongsat Haokip (37) s/o (late) Tongkholun Haokip of Masenjang village/ CCpur in April 29, 2013 in Nongpok Keithelmanbi area ah lawi(buffalo) mang zonga kuanlai zanhal zinglam in Nongpok Sekmai kianga Kamuching tang bul ah sisa in a luang uh muhkhiak hi a,huai lungkimlouh ziaka kibawl JAC te’n tuni nitaklam dak 4:00 apan hunchiam omlou din bandh puang mahle uh Deputy CM in tualthatte’ ni 7 sunga matkhiak dia a chiam ziakin bandh ding ni 7 sung postpone uh hi’n kigen hi. JAC leh KSO Sadar Hills member te’n tuni zinglam dak 9:00 in Deputy CM Gaikhangam office ah kihou uh a, huai ah Deputy CM in tualthat te’ ni 7 sung a matkhiak ding, misi 2te’ innkuan te’ ex-gratia piak ding banah Manipur Police ah misi inkuan apan mi 1 tuak sepna piak a chiam ziakin kihou lem thei uh a, JNIMS a misi luang post mortem bawl zawh a la uh hi’n kigen hi. KSO Sadar Hills President Tanglien Kipgen in govt. in a thilchiamte’ hun bikhiah sunga a pichinsak kei leh bandh pan ding uh hi’n gen hi.

CJM court ah tuni’n dingsak
Imphal, May-10: Sub-Inspector 1 leh Jamadar 1 makaih Moreh Commando mi 11 in damdoi khamtheih Rs. 3.5 crore man a puak ziak un April 28, 2013 in Thoubal Commando te’n Pallel ah mankhia uh a, huaite kipuanna akipan Moreh a Police Commando OC Sub- Inspector R.K. Binorjit matkhiak ahih banah Thoubal Police te’n zan in khamtheih neitu a kigen Lalmingsang Mizo @ Menshang (30) s/o Khamkhuma of Moreh Ward No. 2 a inn apan matkhia uhi. Tuni’n Thoubal CJM court ah dinsak hia, court in May 17, 2013 tan police custody ah om ding in thutan khum in, a tunga case om leng NDPS court ah transfer bawl hi’n kigen hi. Menshang in a gendan in Moreh mun ah Sub-Inspector R.K. Binorjit posting ahih apan kitheikha uh hi’n gen a, Md. Ali tawh kum 10 vel paisa apan kithei kha mahle uh , tuni tan a kimu khalou uh hi’n gen a, Md. Azad ahihleh theikha ngeilou hi’n gen hi. Aman a genbehna ah Zarda, Khaini chihte’ in business bawl ahihdan gen a, khamtheih neitu a ngawh a om leng thu bulbal omlou leh thei khalou hi’n gen hi.

Imphal area a Pharmacy-te’ kikhak
Imphal, May-10: Central Govt. in New drug pricing policy tawh kisai in pharmacist te’ trade margin a hihkiam sawm lungkimlouh latsakna banah Spurious drugs tawh kisai a amendment law bawlthak dia phutna in India gamsung pumpi a All India Organisation of Chemists & Druggist (AIOCD) te’n tuni a Nationwide strike a bawl uh tawh kizawi tawn in Manipur ah leng All Manipur Chemist and Druggist Assn(AMCDA) te’ saina in Imphal area a Pharmacyte’ kikhak a, himahleh mipite’ khualna in Hospital leh Nursing home gei a pharmacy omte’ kihong hi’n AMCDA te’n gen uhi.

Non-manipuri khat sisa in kimu
Imphal, May-10: Senapati district a Sapermeina P/S apan km ½ vel a gamla Motbung leh Saikul kikal a lei(bridge) nuai ah tuni’n non-Manipuri hidia gintak khat sisa a muhkhiak hi’n kigen hi. Police-te’ gendan in misi kum 40 vel mi hi a, a gawl lak ah temta hidia gintak a dawtna ma muhtheih a, siluang RIMS morgue ah identification bawl ding a koih hi’n leng gen uhi.

Headmaster dana kigen khat mankhia
Imphal, May-10: Education deptt te’n Govt. school tuamtuam ah Headmaster dan kineih a nasem om chihthu a zak ziak un school tenga Head Master-te’ kiangah Education deptt a ki report dingin theihsakna abawl dungzui un tuni’n Haureibi Lairakhong Madrashi LP School apan Headmaster a kigen Ziaur Rahman s/o (late) Tomba of Lilong Haureibi Turel Ahanbi va ki-report a, Education deptt te’n a I-Card hoihtak a a check ua leh seal kitat-te’ amah kibawl tom dia muangmawh in Police ah report uh a, police te’n Ziaur Rahman mankhia uh hi’n kigen hi.

IMPHAL GAS NEWS
MM Gas booking 13.03.13 valid from 04.03.13 stock 612
Hrangchal Gas Old Lambulane booking 02.04.13 valid from 11.03.13 stock 612
IMphal LPG booking 16.04.13 serial upto 3630 valid from 06.04.13 stock 612

Planning Department in
Sectorial Allocation Plan a
bawl (in terms of Lakhs)
1. Agriculture & allied activities dia Rs. 22876.00
2. Rural development dia Rs. 19350.00
3. Special area programme dia Rs. 3346.00
4. Irrigation & Flood Control dia Rs. 90560.00
5. Energy dia Rs. 13000.00
6. Industry & Mineral dia Rs. 8270.00
7. Transports dia Rs. 6206.00
8. Sc & Technology and Environment dia Rs. 2534.00
9. General Economic Service dia Rs. 106281.80
10. Social service dia Rs. 89734.20
11. General Service dia Rs. 2542.00
12. Others dia Rs. 300.00
Grand Total : Rs. 365000.00

Singngat A/C’s Youth Congress Seminar om
Lamka, May-9: Tuni in Zogal Memorial Hall complex, Zoveng ah 60-Singngat A/C a Youth Congress saina in ‘One Day Youth Congress Seminar-cum-Mass Enrolment’ om a, Huai ah Ginsuanhau, MLA in ‘Reliability of Indian National Congress’ tawh kisai thugen a, Indian politics adia kingakna tham ching omsun Congress ahihdan gen hi. Aman agenzelna ah kum 2014 a MP telna General Election om ding ah a Congress in maban hoihtak nei hi’n gen a, party hoihtak ahihdan leng gen hi.
Seminar hunah Sunita Konthoujam, General Secretary, MYCC, Membership In-Charge, Manipur State in ‘Enrolment in Indian Youth Congress’ chih thupi zangin thugen a, Thanglet Baite, Outer President, MYCC in ‘Team Work & Election Preparation’ tawh kisai gen in, Sheitabrata, Inner President, MYCC in ‘Pehchaan; Role & Responsibilities of Office Bearers’ tawh kisai gen a, Chitrashen Singh, Gen. Secretary(Adm), MYCC in ‘How to run the Committee’ tawh kisai gen hi. Rohoso Singh Yumkham, Vice President, MYCC in ‘Identification of issues and development of action plan; Why to join IYC’ chih thupi zangin thugen hi. Singngat A/C a tuailai mi tamkhop in tuni’n Youth Congress member dingin min khum(enrolled) uhi.

Director (Sc&Tech) in Lamka pha
Lamka, May-9: UC Laishram, Director (Science & Technology) in tuni’n Lamka hongpha a, New Lamka a Siktui Workset & Farm leh SSA Residential school enkhia hi. SSA Residential school gei leh Lamjang khaw kiangah Science Centre munding leng enkhia a, tunung in amun ding telkhiak hiding in kigen hi. Science & Technology deptt a Sr Scientific Officer Kh Brinchikumar Singh, Scientific Officer Homila Hongrei, Project Director Ng Briren Singh, Scientific Officer E.Ebochao Singh, Scientific Officer M.Ramo Singh, TD Curator Kom, Investigator KC Romesh, RK Geeta Devi, AE leh Goihkhoching, Head Clerk te’n Director hongzui uhi.

DDMAC in screeing bawl
Lamka, May-9:Dist Disaster Management Authority Committee member te'n tuni’n Maniram Sharma,i/c DC makaih in meeting nei uh a, huihpi leh vuahpi in CCpur dist sunga tenna inn-le-lou ahihsiat tawh kisai Sub-divn tuamtuam apan report omte screening bawl uhi. Tulela Relief fund omsa kidaihlouh ziakin CCpur sub-divn a case 158 ading in Rs 18,45,000/- sanction uh a, sum piakkhiat theihna dingin Ms Jacintha Lazarus,Dc/CCpur hongtun ngaiding hi'n gen uhi. Committee in state govt ah fund ngetbeh ding uh a, fund om hunhun in CCpur sub-divn. telin sub divn dang ate screening bawl in sum sanction zel hidin gen uhi.

Sahou koihna bawlin innkuan enkol
Lamka, May-9:Zouveng a om Tingngaihniang @ Niangboi in sahou bawm leh ngari emna ding sikdal bawlin a tate leh innkuan vak in khawsa a, a pasal tawh a om nawnlouh nungin a tate 4 vak in school kaisak hi. Aman a gendanin, innkuan khawsak haksat ziakin ni 3 sung an-ngawl in Pathian kiangah kivakna ding ngen a, huai khutsiamna piak a om hi’n gen hi. Inn bahara Rs. 1200 khateng in pia a, tu in kha khat sungin a thilbawl khiakte apan Pathian vualzawlna Rs. 12,000/- vel mukhe zel hi’n gen hi. Nikhat in ngari emna ding 40 vel zou zel a, sahou bawm 3 vel zou hi.Lamka a dawr 15 ah a thilbawlte supply zelin Imphal ah leng kalkhat in 2vei pe zel a, mipite poimawhzah bawlkhe zoulou lai hi’n gen hi.

Career Guidance-cum-Counselling
Lamka, May-9: Kuki Khanglai Lawmpi(KKL) D.Phailien Unit saina in D.Phailian Community Hall ah tuni’n ‘Career Guidance -cum- Counselling’ program om a, S.Kamsuanlun, EM/ADC khuallian apang in hongkhia a,Rev Thangzakap in thumna in lan) hi. Tuni'n Dr Jangkholun Mate, Pastor Ngamkholal Haokip, Dr Lalzagou Neihsial leh H.Zamkhogin te'n thupi tuamtuam pansan in sinsak uhi.
May 10, 2013 in L.Mangkhogin, IPS, SP/CCpur; Khupminthang Khongsai; Dr Jangkholun Mate leh Ms Esther, Shalom te'n sinsak ding uhi. Sunnung dak 2:00 in closing program omding a, Limkholet Haokip, President, KKL GHQ khuallian apang in hun khak ding hi.

Salem Farm luhtu mankhia
Lamka, May-9: Paulalmuan Munsong (26) s/o M. Chinzalian of Canan Veng, Nghathal in tuni sunnung in Health Minister Phungzathang Tonsing’ huan, Pearsonmun khawsak Salem Farm building a tukvelh susia in vanzat khenkhat gukhia a, huaimun enkolte’n theikhia in mankhia uhi. Aman building sunga almirah hihsia in electric gui leh vanzat chituamtuam 12 vel gukhia hi’n Salem Farm Manager Siannou in gen hi. Police Station a OC Inspector Elvy Tunglut makaih in Police te’n thiltunna mun delh in amau custody ah guta koih uhi.

Court in UG 1 jail ah khumsak
Lamka, May-9:1/11-GR te’n May 1, 2013 in Loklaiphai khua ah PLA atel S.Amit Kumar Singh(27)s/o S. Ibochou Singh of Loklaiphai mankhia in amah akipan 7.65 mm pistol 1, 9mm pistol tang 2 leh 5.56 mm tang 10 mukhia uh a, Army te’n Imphal police ah a piakkhiak nung un CCpur Police te’n a case lasawn uhi. Amah kipuan dan in August 13, 2007 in Lamka Police station kong lak Old Bazar a grenade hihpuakna ah telkha a, Feb 26, 2013 in Torbung a IED bomb hihpuakte lakah leng telkha hi’n kigen hi.Police te’n JMIC court ah pawkhia uh a, ni 7 sung Police khut a om nung in court in Jail ah omdi’n thutankhum a, Police te’n tuni’n Jail ah koih uhi.

Recruitment Rally om ding
Lamka, May-9:Tuibuong Peace Ground ah 46-Assam Rifles-te saina in June 2- 8, 2013 sung zingsang dak 7.00 zelin Army Recruitment Rally om ding a, huai ah Assam Rifles a General Duty (Riflemen) bangzahhiam lak hidin kigen hi. Physical test ah minures 24 sungin km 5 taitung ngai ding a, long jump ah 11 feet, high jump ah 3 ½ feet zawh ngai ding hi. Long jump leh high jump ah candidate-te chance 3 vei piak hiding uhi. Laisiamna lamah ST/SC candidate-leh General candidate-te’n recognized institution khatpeuh apan HSLC/Class-X zawh ngai ding hi.

JPO te’n mawhpaihthu puang
Lamka, May-9: HYA, KKL, YMA leh ZYA kigawm Joint Philanthropic Organisation(JPO) pawlin May 7, 2013 a New Bazar ah namkal buaitheihna ding placard bawlkhiate leh Khelemba Hotel halsawmte mawhpaihthu puang in tunungin hibang thil hoihlou kuama’n ching nawnlou ding in theisak uh a, JPO pawlin CCpur district ah lemna leh muanna omna dingin hahtaka panla gige ahihdan uh puang uh a,kuapeuh kituaka khawsak a deihthu uh ahihdan taklang uhi.

Court in mi 2 bail in potsak UG
Lamka, May-9: Police apan kizadan in 46-Assam Rifles te’n May 2, 2013 in Bungmual area ah ZRF cadre 2-Khamkholun (38) s/o Kamzachin of New Lamka leh Rig Valte @ Ringson (30) s/o Ginzalian Valte of Dorcas Veng, New Lamka mankhia uh a,amau apan .22 tang 47; 9mm tang 31, single barrel tang 15, hand grenade 1, country made revolver 1 leh detonator 36 mukhia in Police ah pekhia uhi. CCpur Police te’n a case lasawn in court ah dingsak uh a, court in ni 5 sung Police khut a omding in phalsak a, tuni’n JMIC/CCpur in mi 2 te bail in pawt sak a, Police te’n FIR No.41(5) 2013 CCP-PS U/S 400 IPC, 25 (1-C) A. Act & 5 of Explosive Substances Act registered uhi.

Bawldikna: Manipur Express May 8, 2013 issue a "Meltheihlouh te'n Auto-pu khat kapliam" leh May 9, 2013 issue a "Auto-pu tu'n..." kichihna ah theihkhel ziakin "Zou Colony" kichi kha a, "Zomi Colony" chih ding hizaw hi. Sukkhelh poi a kisa. ~by Editor

IMPHAL NEWS
Court ah Moreh Commando OC ding
Imphal, May-9: Sub-Inspector 1 leh Jamadar 1 makaih Moreh Commando mi 11 in damdoi khamtheih Rs. 3.5 crore man a puak ziak un April 28, 2013 in Thoubal Commando te’n Pallel ah mankhia uh a, huaite kipuanna ah Moreh a Police Commando OC Sub- Inspector R.K. Binorjit in khamtheih pawdia a sawl hi’n kipuang uh a, huai dungzui in zan in Thoubal Police te’n R.K. Binorjit mankhia uh a tuni’n Thoubal CJM court ah dingsak uhi.CJM court in May 15, 2013 tan police custody a om dingin pekhia a, May 15, 2013 in a Narcotic Drugs & Psychotropic Substance (NDPS) court ah kilak dingin thupia hi. NDPS court in May 6, 2013 in khamtheih pua Commando 11 te jail a tang dingin thutankhum hi’n kigen hi.

JAC in Indefinite bandh puang
Imphal, May-9: Seitinlal Kipen (52) s/o (late) Haokholam Kipgen of Bongbal Kholen village leh Tongsat Haokip (37) s/o (late) Tongkholun Haokip of Masenjang village/ CCpur in April 29, 2013 in Nongpok Keithelmanbi area ah lawi(buffalo) mang zonga kuan zan zinglam in Nongpok Sekmai kianga Kamuching tang bul ah sisa in a luang uh muhkhiak hi a, KSO in tualthatte dakkal 48 sunga matkhiak ding in govt thutawp pia uh a,area mipite leng thangpai in JAC bawlkhia uhi. Govt in pan alak pahlouh ziaka mi 2te thah a om hi a puang kawm in JAC pawlin May 10, 2013 nitaklam dak 4:00 apan tualthat te’ matkhiak ahih matan Indefinite bandh puang uh hi’n kigen hi. Nongpok Keithelmanbi area a khua 25 te’ bawlkhiak Nongpok Keithelmanbi Chingmi-Tammi Apunba Lup, Sadar Hills a Kuki Students’ organisation (KSO) leh Kuki Innpi in indefinite bandh support uh hi’n kigen hi.(UNA)

FCS antang sia tungtang suizui din phu
Imphal, May-9: Nityapat Chuthek a BJP Manipur Pradesh office ah tuni’n press conference om a, huai ah BJP spokesperson Y Nilamani Sharma in Sangaiprou a FCS godown a antang tamtak asiat ziaka kiphum ahihthu CBI banga Independent body te’n suizui dinga deihthu gen hi. FCS godown ah antang leh chini matric tonnes 1114 vel kisia in innkuan 1000 vel kum 1 sung vakzou ding hi’n taklang uh a, CAF & PD Minister, Director leh Commissioner te’ ziak asia hi’n leng gen hi. Manipur State Human Rights Commission (MSHRC) functiona theihna ding in Chairman leh member 3/4 guang dinga thupiak leng Congress govt. in ngaihsaklou a, kum bangzahhiam apan MHRC zat taklouh hi’n leng gen hi. UNA

Police te’n drug neitupa mankhia
Imphal, May-9: Thoubal Commando pawlin April 28, 2013 in Sub-Inspector khat leh Jamedar 1 makaihna in Moreh Police Commando pawl mi 11 in damdoi khamtheih a puak ziakun Pallel ah mankhia uh a, huai damdoi neitu hi a kigen Lalhmingsanga (30) s/o Thankhuma of Moreh Ward No. 4 tuni zinglam in Moreh a a tenna inn ah Thoubal Police Commando pawlin va mankhia uh hi’n kigen hi.

Kiphinna patsawm nawn
Imphal, May-9: AMTUG & AMGEO kikhaikhawmna Joint Administrativre Council(JAC) a a Publicity & Information Secretary L. Priyobratta in tuni’n thusuah a bawlna ah Manipur govt. in employee leh pensioner-te’ kiangah 7% leh 8% a kigawm a 15 % DA/DR leh arrear piak ding tuni tan in pelou a, Central govt. in Central employee-te’ ahunhun in DA/DR pia in behlap zek lai hi’n gen hi. State govt. in employee-te DA/DR piak ding ngaihsaklou a, a koihdap lailai leh tunung zek chiang in employee-te’n kiphinna pan ding hi’n puang hi

27 Sector A/R te’n Aritificial limb pe ding
Imphal, May-9: Leimakhong ah May 11, 2013 in Jaipur apan expert team te’n March 18, 2013 ni a 27-Sector Assam Rifles HQ/CCpur ah artificial limb ngah dingte a measurement a lakte uh artificial leg fitting pan ding uh hi’n kigen a, huai ah measurement bawl khaloute’ a dingin May 11, 2013 zinglam dak 7:00 a 27 Sector HQ va naih theih ding hi’n kigen a, thuchian kimzaw mobile no. 8731863508 leh 9862092100 ah kantheih ding chi’n kigen hi.

Two day Edcuation fair kipan

Imphal, May-9: NEEC saina in tuni’n Imhal a Head Post office mun apan gamlalou Nupilal complex ah “2 Day Education 2013” kipan hi’n kigen hi. Student-te’ maban ding khualna a fair sai uh hi’n kigen a, huai ah career provider 13 tel uh hi’n kigen hi.