57-Henglep A/C adi’n Seminar leh mass-enrolment

Lamka, May-6: T. Manga Vaiphei,MLA(57-Henglep A/C) & Chairman, MTDC tenna inn Red Cross Road ah tuni sunnung dak 1.00 in Henglep A/C Youth Congress saina in ‘One day Seminar-cum-Mass Enrolment of Youth Congress 57-Henglep A/C’ kichi om a, huai hunah resource person khat in T. Manga Vaiphei, MLA pang a, aman Congress history, ideology & value chih pansan in thugen hi. Aman a genna ah India adia party lian leh detdou pen Congress hi a, Congress sungah chi-le-nam a kikhen tuamna omlou in, mipite’ masawnna ding ngaihtuahna mah paipih zel uh hi’n gen hi. Resource Person dangte Rohoso, Vice President, MPYC in ‘UPA Govt. Achievement programme and Act’ tawh kisai gen a, Thanglet Baite, President, MPYC(Outer Manipur) in ‘Role and Responsibilities of Office Bearers, Team work election preparation’ tawh kisai gen a, Chungsei Haokip, President, Youth Congress, Saikul A/C Sadar Hills in ‘Pehchaan’ tawh kisai gen in, Miss Sunita, Enrolment Gen. Secy, Manipur, in ‘Enrolment of Indian Youth Congress’ chih thupi pansan in thugen hi. Tuni a hunzatna ah Congress sunga makai hunkhop in leng uap ua, Henglep biala MDC-te’ leng tel uhi.

MC Mary Kom akipan in inn-le-lou kisiate’n panpihna ngah

Lamka, May-6: May 1-2,2013 kawmtuah zankimlai leh May 3,2013 zingsang baihtak a huihpi leh vuahpi kithuah in CCpur district nuai a, Sub divn teng ah siatna thupitak atut ziakin inn-le-lou belh ding neilou innkuan tamtak om uhi. World Boxing Champion banah Olympic a bronze Medalist MC Mary Kom leh apasl Onler Kom in inn-le-lou belh ding neilou inn kuante khualna in amau leng CCpur district mi ahihna ziakua ngai poimawh in tunni zinglam dak 11:00 in Chairman, ADC/CCpur tungtawn in District Disaster Management Authority Committee a Chairman DC leh official-te khut ah panpihna pekhia uhi.
MC Mary Kom honghawh theihlouh ziakin apasal’ Onler Kom in pekhia hi. Onler Kom in a genna ah a zi’ taksa hatlouh ziakin hong hawh theilou a, CCpur district mi-le-sa ahihziak un inn-le-lou belhding neiloute amau’ level a hihtheih bangbang panpihna hong pia ahihdan gen a, tuahsiatna tuakte thuakpih thu leng gen hi. MC Mary Kom te’ nupa in panpihna a piakte uh antang bag 10, allu bag 2, sathau (oil) tin 2, chana bag 1 ban ah sumtang (in cash) in Rs 10,000/- pekhia uhi.
Huailou in Langkhanpau Guite, Chairman ADC/CCpur in leng March 2013 khalawh (pay/salary) advance a lahial in saptuam a piakkhiak ding sawma khat (tithe) a lakkhiat zawh in inn le-lou belhding neiloute panpihna dingin a kha 1 lawh tuni’n District Disaster Management Authority Committee a Chairman apang DC i/c Mani Ram,IAS khut ah pekhia hi.

Chairman makaih in meeting om

Lamka, May-6: Langkhanpau Guite, Chairman ADC/CCpur makaih in tuni sunnung dak 1:00 pm in meeting om a, huai ah Maniram Sharma, IAS, i/c DC; CEO/ADC; SDO/BDO teng, Addl CEO leh MDC khenkhat tel uhi. Huai ah May 1-2 kawmtuah leh May 3, 2013 zingsang a huihpi leh vuahpi kithuah in inn tamtak a hihsiat tungtang genkhawm uhi. MDC te’n amau quota akipan ah inn-le-lou kisiate panpihna IAY langva a piak uleh piakding teng SDO leh Chairman ADC kiang ah a list piaklut a, IAY muthei ding waiting list himahleh tu-le-tu a poimawh innkuante kianga piak a poimawh thu gen uhi. MGNREGS tawh kisai BDO te’n haksatna tuak uhiam chi’n leng Chairman ADC/CCpur in dotna bawl hi.

Screening bawl hi nailou
Lamka, May-6: Huihpi leh vuahpi kithuah in CCpur district ah inn-le-lou tamtak hihsia a, tuni in District Disaster Management Authority Committee te’n sceening bawlding chih himahleh SDO te apan report kimtak om nailouh ziakin screening bawl theilou uhi.SDOte apan tuni tana report kimu dan in CCpur sub-divn ah inn 100 kise dimdem a, inn 300 sia (partially damaged) a, huaite lakah school 5 tel hi. Singngat Sub-divn. ah inn 5 se dimdem a, inn 15 sia hi. Parbung sub divn ah inn 39 se dimdem a, inn 126 sia a, Vangai area ah inn 26 sia (partially damaged) hi. Henglep sub divn ah inn 29 kise dimdem a, inn 29 sia a, Thanlon sub divn. ah inn 25 kise dimdem a, inn 14 sia hi.

Police- te’n 51mm mortar bomb la uh

Lamka, May- 6: Thingkangphai khawsung Tongdam veng ah naupang kimawlte’n zan in 51mm 2-inch mortar bomb a muhkhiak uh tuni’n Police te’n vala in kem uh hi’n kigen hi. Huai bomb puak nailou pen BSF/STC te’ kap hiding a ginthu kigwn hi.

Proxy teacher-te’ FIR bawlkhum ding
Lamka, May-6: Director of Education (S) in May 3, 2013 in Hills district a ZEO teng meeting neihpih a, ZEO tengin DI of schools leh AI of schools te tungtawn in school omteng inspection bawldin thupia hi’n kigen hi. Inspection hun ah student te’n free textbook, free uniform leh mid-day meal hoihtaka mu uhiam chih ban ah proxy teacher om hiam chih te suichian ding in thupia a, proxy teacher omteng FIR register khum ding chih ahi hi. DI/AI te’n nspection bawlna teng grading bawl ding, block wise a inspection team bawlkhiat ding, block level a short term & longterm planning bawl a, ZEO ah submit ding chih hi a, ZEO ten Director of Education (S) a submit ding in Director in ZEO te theisak chih ahi hi.

Knapsack Sprayer 800 hongtung

Lamka, May-6: Agriculture deptt tungtawn in Dist Council nuai a MDC member te’n amau bialsung chiata hawmkhiat ding Knapsack Sprayer (tuilou a ganhing thahna damdoi kapna machine) 800 hongtung a, MDC te’n huaite kihawm ding uh a, tunung sawtlou in amau bial chiat ah hawmkhe ding uh hi’n kigen hi.

SP/CCpur in office aluah kum 1 ching
Lamka, May-6: L.Mangkhogin Haokip, IPS, SP/CCpur in CCpur district ah SP a honglet nung leh office aluah nung kum 1 chinna tuni zinglam dak 11:00 in ama’ office chamber ah Police Officer teng tawh lawm in singpi dawnkhawm uhi

Bungmual ah Missions khawmpi
Lamka,May-6: Bungmual a EBC biakinn 3 (EBC Bungmual, EBC New Lane leh EBC Bethany) te’n amau biakinn chiat ah zan apan in Missionary Day 2013-cum-Tualsung Mission khawmpi neichiat uhi. Rev L Khaikhansong Field Suptd, EBC Manipur Mission field in EBCC Bethany ah thugenna hun zanglel a, Bungmual EBCC Biakinn ah Mrs Remi Hauzel in thugen hi. EBCC New Lane missions committee inntekna mah in May ni 6 apan ni 8, 2013 sung Missionary day leh Missions khawmpi kithuah om in, Mrs Gouzavung in thugenna neilel hi.

MDC in damloute panpihna pia

Lamka, May-6: Grace Zamnu, MDC(Muallum) in abial sunga damloute veh in a gimdeuh mi 5 kiangah panpihna Rs. 2000 chiat pia a, midang 3te Rs. 1000 chiat pia hi. Grace Zamnu in govt apan medical assistance hongpaite apan akigawm in mi 25 te kiangah pekheta hi’n kigen hi. Huailou in huihpi leh vuahpi'n a hihsiat inn 9 leh Community Hall khat leng enkhia a, govt apan IAY piaksawm in panla lel hi’n kigen hi.

Cleft Lips/Palate children-te panpih ding
Lamka, May- 6: SSA State Mission Authority, Manipur leh Shija Hospital, Imphal pangkhawm in student kum 6-18 kikal vangsiat ziaka mukka/muk-hem (Cleft Lips/Palate children) te panpih in bawlhoih sawm uhi. Huai thu ah nu-le-pa te’n amau biala DI of schools kiangah May 10, 2013 tana min pelut ding a theihsak hi uhi.

Auto leh Activa kiphutuah kha

Lamka, May-6: Tuni sunnung lam dak 2.00 velin Red Cross Road leh Tedim Road kisuktuahna ‘junction’ ah tuni sunning dak 2.00 velin Activa leh Auto kiphutuah kha uh a, gari 2 a tuangte alia mom kei mahle uh Activa mailam kise zek hi. Tulai in lampi kisuktuahna munte ah gari a tam ziakin pilvan poimawh mahmah hi’n kigen hi.

ZC Cabinet meeting omding
Lamka, May-6: Nehru Marg a Zomi Council office ah May 7, 2013 zingsang dak 7:30 in Zomi Council Cabinet member te’n meeting neiding uhi. Huai ah Simveng a SYO Hall ah April 23, 2013 a Zomi Council (ZC) Annual Assembly etkikna ban ah thu poimawh omte genkhawm ding uhi.

D. Phailien ah Career Guidance Seminar
Lamka, May-6: Kuki Khanglai Lawmpi(KKL) D. Phailien Unit saina in May 9-10, 2013 in D. Phailien Community Hall ah ‘Career Guidance cum Counselling’ om dinga, Resource Persons dingte L. Mangkhogin Haokip IPS, SP/Ccpur; Dr. Lalzagou Neihsial, Asst. Professor, CCpur Govt. College; Dr. Jangkholun Mate, Asst. Professor, CCpur Govt. College; Ms. Esther, SHALOM leh Khupminthang Khongsai, Lecturer te’n student paikhawmte lakah thupi tuamtuam zangin sinsak ding uhi.

Leisen area ah DDT kap
Lamka, May 6: Malaria Deptt. te’n malaria positive tamna diak area telkhia in DDT kapzel uh a, tukum adia 1st DDT kapna mun ding Leisen area a kap dingin May 2, 2013 in Lamka apan kuankhia in tulai in DDT kaplel uhi. Leisen PHSC nuai ah Leisen khua, Parvachawm PHSC nuai ah Tuivum khua leh P.Sihtam khua ban ah Sipuikawn PHSC nuai ah Rovakawt khua leh Tipaimukh khua ah DDT kap uh hi’n kigen hi.

IMPHAL NEWS
Goveror in Shumang Leela festival hong
Imphal, May-6: Manipur State Kala Akademi saina in tuni’n Palace Compound a Th. Iboyaima Shumang Leela Ashanglen mun ah ‘The 41 Shumang Leela Festival 2013’ kipan a Governor Gurbachan Jagat in hongkhia hi. Governor in function honkhiakna hun ah atel khak kipak hi’n gen a, nikum festival a award late’ kipahpih thu leng gen hi. Governor in agen zelna ah tukum in group 20 tel ding uh a, huai ah group 8 pasal leh group 12 numeite’ kalah kidemna om dingte’ nikum sang etnop huaizaw ding hi’n leng gen hi.

Commando-te’ ni 15 judical remand

Imphal, April-6: Thoubal Commando te’n April 28, 2013 in Pallel ah Moreh Commando a Sub-Inspector leh Jamadar telin Commando 10 in Moreh ah Pseudoephedrine tablet puaklut sawmlai a matkhiakte uh tuni’n Lamphel a NDPS court ah dinsak in om uhi.Innkuan 6 in mat a om Commando 6 bail a khah dinga ngetna a khiak uh, document kimlouh ziakin mi 6 te’ bail ngetna court in nial hi’n kigen hi. Court in Commando 10 te ni 15 sung police custody ah om dingin remand a, Commando- te khamtheih pawding a sawl senior officer matkhiak thu omlou hi’n kigen hi. Khamtheih matkhiak teng International Market ah sum a tuat in Rs. 3,64,02,000 vel man hi’n kigen hi.Thudang kizadan in Aug 5, 2002 in Ganja kg 100 tawh matkhawm a om Md. Riya Uddin(33) s/o Md. Baziruddin of Jiribam tulela Hatta a om leng tuni’n NDPS court ah dinsak hi a, court in kum 10 sung jail tang ding in thutankhum hi’n kigen hi.

‘Corruption bulpi CM bungalow ahi’ - Tapir Gao
Imphal, May-6: BJP Manipur Pradesh office ah tuni’n BJP National General Secretary Tapir Gao in media-te’ kimuhpih a, Manipur a corruption, numerate tunga thangtatna leh hiamgamna in khanlam nawt hi a genin Congress party te’ mawhsak thu gen a, Corruption tuamtuam bulpi leng CM bungalow apan hi’n gen hi. Sum piak masiah office tawh kisai files-te khoih hilou a, Sub-Inspector sepna adin tuailai laisiam tamtakte’n Rs. 25-30 lakhs piak ngai hi’n gen a, staff-nurse ading Rs. 17-20 lakhs leh contract work muhna ding in a lakhs asim sun ngai hi’n leng gen hi. Aman a genzelna ah khutkhialte’ matkhiak ahihlouh ziaka sualna in khan lam nawt hi’n gen hi.

MPP pawlin sit-in-protest nei
Imphal, May-6: Polo Ground gei a Manipur Peoples’ Party (MPP) office kong ah tuni’n Manipur Peoples’ Party (MPP) pawl in sit-in-protest nei uh a, huai hun ah Veteran Politician banah MPP advisor Okram Joy in April 28, 2013 ni a Commando te’n bangziak a a sappa uh thupiak zui a khamtheih pua uhiam chih dotna bawlkawm in Home department leng kintaka suksiang ngai hi’n gen hi. Infracstructure tuamtuam kibawlte’ in govt hoihdan ensak mahleh khamtheih pua a police tanpha a kigolh ziakun Manipur ah govt puksia ahihdan ensak hi’n gen hi. Police te’n sualna a bawlte uh mipite’n chiamteh dingin O. Joy in ngetna bawl a, MPP in khamtheih pua a kigolh police te’ dan tawh kituak a gawtna piak ding ngetna in kiphinna pan ding chi’n leng gen hi.

Kuki Innpi in mawhpaih
Imphal, May-6: Kuki Innpi Manipur a General Secretary, Khaimang Chongloi in thusuah a bawlna ah May 3, 2013 a Senapati a gamgi thubuai ziakin Seijang khawmite’n Silent village khua valuh in tenna inn 36 a haltum ziakun innkuan bangzahhiamte tenna inn neilou a om uh hi a gen in innhaltute mawhpaihthu puang hi. Hibang huham taka gamtatnate dal ahihlouh ziakin mipi tamzawte’n amau khuta dan kitawi in amau sanga tawmzaw mite’ nelhsiah uh hi’n gen hi. Govt. in gamgi thubuai thei mahleh security a koihlouh ziaka hibang thiltung hi a, govt. in inn neiloute’ ading akin theilam a ngaihtuahsak ding a phut kawmin mipite’n thiltung tawh kisai nam thil a lalou ding leh bitna leh muanna om theihna dinga panla chiat dingin leng ngen hi.

Maoist pawlin amau thilhih in puang
Imphal, May-6: RIMS complex ah May 4, 2013 nitak dak 11:00 velin RCC fencing kianga electrical installation mun a grenade puak tawh Maoist Communist Party, Manipur pawl in amau thilhih hi’n puang uh a, mi gentheite’ en kailou a private hospital buaipihzaw Doctor te’ gamtatna enkai zel ding uh hi’n gen uhi. Doctor leh RIMS thuneite’ kiangah ah migentheite’ hoihtak a enkai dia a thupiak uh a zuihlouh ziak ua, grenade hihpuak a om hi’n gen uh a, mi a liam ding tupna a hihpuak hilou hi’n leng gen uhi. May 17, 2013 in Director RIMS kitawp dinga phutna in General Strike puang ding uh hi’n leng helpawlin taklang uhi.

Lei-Ingkhol JAC pawl in nial
Imphal, May-6: Lei-Ingkhol JAC pawlin tuni’n meeting nei uh a, huai ah state Govt. in Lei-Ingkhol gam lak tupna in SPA funding tungtawn in Capital project bawlkhiak sawm uh hi’n taklang uhi. Lei-Ingkhol ahihleh Chingmeirong leh Mantripukhri kal a om hi a, kum 2005 in leng hiai project dalna in Lei-Ingkhol village association leh civil society tuamtuam te’n kiphinna nei uh a, huai nitak in Union Minister Oscar Fernandez in kiphinna neite va mu in project in Lei-Ingkhol suse khalou ding in vachiam hi’n kigen hi.