46-AR te’saina in Dental Camp om
Lamka, May-11: 27-Sector Assam Rifles nuai a 46-A/R-te saina in tuni zinglam dak 10:30 akipan Thingkangphai PHSC ah Free Dental Camp om hi. Huai ah Dr Manmohan Vishua Kumar, Asst Commandent, 14th Dental Unit, 27-Sector A/R leh Hav P.K Some, Nursing Asst. 27-Sector A/R te’n ha(teeth) buaina nei mi 70 val en uh a, damdoi leng manbei in pia uhi. Dental Camp a hihfel theihlouh mi bangzah hiam om a, huaite HQ Veng a 46-A/R Unit Hospital ah refered uh a, May 13, 2013 in huai munah amanbei in enkol ding uhi. Thingkangphai Ex-Servicemen Assn. te’ panlakna ziakin tuni a Free Dental Camp om hi’n kigen hi.

Lungthul(L) ah huihpi in inn 5 mutsia
Lamka, May-11: Singngat sub-divN a Lungthul (L) khua ah zan nitaklam dak 4:00 velin huihpi leh vuahpi kituah in tenna inn 5 mutsia chi’n Lungthul (L) Hausa apan kiza hi. Huihpi in tenna inn a mutsiat neitute Kamzalal s/o Pauzathang; Laloo s/o Ghori; Lalboi s/o Letjang; Doulianmang s/o Onzagin leh G.Hausiam s/o Nengsuan hi uhi.

Kuki Sr Citizens’ Welfare Forum
Lamka, May-11: Kuki Senior Citizens’ Welfare Forum, Manipur makaih in tuni zinglam dak 11:30 in Tuibuong a S.Ideal School ah Consultative meeting leh Kuki Senior Citizens’ Welfare Forum(Branch), CCpur Dist kichi honna program om hi. Huai hun ah Holkhomang Haokip, ex-MP & President Kuki Sr Citizens’ Welfare Forum, Manipur in Kuki Senior Citizens’ Welfare Forum (Branch) CCpur Dist hongkhia hi. KSCWF, CCpur Dist a executive member ding election om chih himahleh Convenor dingin Upa Holthang, Upa Lamkho leh Upa T.Haokip tel uh a, amaute Holkhojam Mate (retd Pastor) in thumsak hi.

Mi 2 te May 17 tan Police khut ah
Lamka, May-11: 1/11-GR te’n Feb 26, 2013 zingsang in Torbung a IED bomb hihpuakte laka tel UNLF cadre W Shanti Kumar @ Maimu (32) s/o Wangjam Kesho Kumar of Torbung leh Lalthanglien @ Kancha (27) s/o Dongvom Vaiphei of S.Bualjang zan zinglam dak 9:30 vel a mankhia in galvan khenkhat leng mukhia uh a, zan in Police te’ khut ah pekhia uhi. Police te’n tuni’n mi 2te JMIC/CCpur court ah pawkhia uh a, Court in May 17, 2013 tan Police khut a omdi’n phalsak a, Police te’n FIR No. 21 (2) 2013 CCP-PS U/S 121/121-A /302/307/326/34 IPC, 5 of Explosive Substances Act & 20 UA (P) Arms Act registerd uhi.

YPA Gen HQ in panpihnate hawmkhia
Lamka, May-11: May 1-2, 203 kawmtuah zankimlai leh May 3, 2013 zingsang baihtak a huihpi leh vuahpi CCpur district anuai ziakin inn-le-lou belh ding neilou innkuan tamtak om uhi. Olympic a bronze Medalist MC Mary Kom leh apasal Onler Kom in May 6, 2013 in inn-le-lou belh ding neilou innkuante adin Chairman, ADC/CCpur tungtawn in District Disaster Management Authority Committee a Chairman DC leh official-te khut ah antang bag 10, allu bag 2, ankamthau (mustard oil) tin 2, chana bag 1 ban ah Rs.10,000/-pekhia uhi. Panpihna thilpiakteng Committee te’n zan in YPA Gen HQ khut ah pekhia uh a, tuni zinglam in S.Chinngaihpau, President, YPA Gen HQ leh a Cabinet member te’n PT Sports Complex, New Lamka a Relief Camp a om innkuan 23te kiangah hawmkhia uhi.

Lanva-lui nasatakin khang
Lamka, May-11: May 1, 2013 nitak akipan avangkim in vuah a zuk ziakin Lamka khawpi sunga lui(river/stream) omte ah tui nasaktakin khang a, Chiengkon lui leh Lailam lui telin Lanva lui patauhhuai khopin khang hi. Lanva lui khan ziakin huai lui-kim a inn neite’ gam mun tuamtuam ah eukhia in kichim a, lui kianga inn nei khate tamtak patau uh chihthu kiza hi.

Canal nasepna kichim
Lamka, May-11: Khuga Dam Left-side canal tumalam deuh akipan pucca a bawlna nasep pailel a, hilelenf zan nitak in Kawmpui khawsung ah pucca canal bawlzawh sa, nasep zawhnung kalkhat pai manlou in kichim hi. Thu kingahdan in Kawmpui khawsung a pucca canal nasepna metre 200 vel contractor Thoi of Thingkangphai in sem a, huai lak ah metre 15 vel ding kichim hi’n kigen hi. Kawnpui khawsung a Zoremi-te’ inn kiang ah khoubang memchim in pucca a kibawl canal hihchim hi’n kigen hi. Huai munlak a khoubang a chip touhzel leh Zoremi-te’ inn leng lauhuai ban din kigen hi.

Y/C athak leh renewal affiliation
Lamka, May-11:CCpur Dist Sports Assn (CDSA) Gen Secy Ch Lhunchon apan kizadan in CDSA nuai a Youth Club omte’n May 15-31, 2013 sung in kum 2013-14 ading in renewal affiliation/registration bawltheih a, huai hunsung in fresh Y/C te’n leng bawltheih ding hi. Inter District leh Inter Club Players ading transfer period June 1- 7, 2013 leh June 8 -14, 2013 sung hiding a, thuchian kimzaw CDSA office ah kantheih ding hi.

Gamvakna ah mupi liantak man
Lamka,May-11: Zawlkhamlien of Ngurte in zanhal in Nurte gamsung a gamlak a vakna ah mupi liantak khat singkung a tuanglai mukha a, a thautui single barrel in kapkhia a, huai mupi a sihnung in leng kg 1 valin gik lai hi’n kigen hi.

SUUNNA
T.Haudong (82) f/o T.Kamlianmang of Vengnuam, New Lamka tuzing in zunkhum ziaka damlou in si a, YPA Hanmual, New Lamka ah kivui hi.
T.Suanzagin (45) s/o (late) Thuangzathang of Vengnuam, New Lamka tuni zinglam dak 10:30 vel in sinna in si a, YPA Hanmual, New Lamka ah kivui hi.
Lhinglam Neihsial w/o Kama Neihsial, Chief of Neihsial Veng zan nitak dak 6.00 velin damlou in si a, tuni’n Neihsial Veng hanmual ah kivui hi.
Khomminthang Thomte (60) f/o Lamsei of Enpum village, tulel in Bungmual a innluah a om tuni zinglam dak 11.00 velin hospital ah cancer in si a, May 12, 2013 in Enpum khua ah kivui ding hi. Aman a pension tanpha NAP asem in boxing championship hihna leng la ngei a, a tapa in tulelin SAI ah boxing training hi’n kigen hi.
Tv. Thangsiamlian(29) s/o Zelthang Hauzel of Daido( Mizoram) tuni zinglam 10:30 velin Aizawl ah Taxi accident in si, aluang Daido khua a vui dingin puakin om hi. Aman taxi ah bazar kai ding numei 2 pua a, numei 2te laka khat pen leng si hi’n kigen hi.

IMPHAL NEWS
Dy CM in Sadar hills pha
Imphal, May-11: Deputy CM banah Home Minister Gaikhangam in tuni’n Senapati district a Sylvan ah Krishi Vigyan Kendra(KVK) a Hatchery Unit hongkhia hi. Huai ah Functional President in D. Gangmei Addl. Dist Magistrate pang a, Guests of Honour in Industries Minister Govindas Konthoujam; SP/Senapati Pushpanjali leh ex-MLA Haokholet Kipgen pang uhi. Dy CM in Henbung a Check post leh Taxation deptt a Supdt office va enkhia a, helpawlte’n a sukbuai theihlouhna dingin Integrated Check post bawlkhiak dingin Cabinet meeting ah pawlut ding hi’n gen hi. Integrated check post bawlkhiak hileh revenue dan in van pua gari khat apan Rs.700-800 kikal muhkhiak hiding chi’n gen a, mipite’ kiangah bandh leh blockade bawllou din leng ngen hi.

Police te’n khamtheih hunkhop mukhia
Imphal, May-11:Thoubal district sung Lilong Bazar a Mashajit Lamkhai ah tuni zinglam dak 9:30 in Lilong Police’n Honda City Car No.(MN04-A/5623) ginlelh huaisa in frisking a bawl ua leh polythene bag 15 sunga kitun SP capsule tang 4000 mukhia uh hi’n kigen hi. Gari driver banah khamtheih neitu Md. Shauddin @ Abo (35) s/o Md. Mijauddin of Lilong Tera Makhong leng mankhia uhi. Khamtheih matkhiakte a neitu tu’n police custody ah om hi’n kigen hi.Police te’n khamtheih a matkhiak uh neitu in kua khut a piak sawm hiam chih leng bangmah puang nailou uhi

Tonsil operation bawlzawh in si
Imphal, May-11: JN Hospital ah zan zinglam dak 9:30 velin K Bishorjit (40) s/o K. Rajo of Kongba Kshetri Leikai in a tonsil na asak ziakin minor operation bawl hi a, hileleng operation zawh dakkal 1 nungin si hi’n kigen hi. A innkuante’ gendan in operation zawh nungin oxygen piak ahihlouh banah specialist-te’n a etkol louh ziaka si hi’n gen uhi. Tuni’n Kongba Kshetri Leikai ah Youth Guidance Club-te makaihna in kihouna om a,JN hospital a doctor-te kizenlouh ziak hiding in gingta uh a, doctor-te’ gamtatdan mawhpaih in amau ziak a Karam si hi’n taklang uhi.Club member-te, Meira Paibi leh misi innkuante’n JN Hospital vapha in Medical Supdt office kongah huai ni a duty a om doctor tunga action lak dingin ngen uhi. Thongju A/C MLA Th. Bishorjit in leng JN Hospital vapha a, Medical Supdt leng va mu in Bishorjit sihna suizui dingin JN Hospital thuneite’ thupia hi’n kigen hi.

Artificial limb camp om
Imphal, May-11:Red Shield Divn-te’ saina in tuni’n Leimakhong ah “2nd Phase of Free Artificial Limb Transplantation Camp” om hi. Lt. Gen AK Sahni, SM, VSM, GOC, Spear Corps in camp hongkhia a, Spears Corps a AWWA President Vineeta Sahni in a genna ah Jaipur apan Expert teamte’ saina in March 18, 2013 in 27-Sector HQ ah 1st phase pat hi a, huai hunah artificial limb piak dingin mi 19te’ measurement lak hi uh a, tuni’n artificial limb thuahsak hi’n gen hi. Huai artificial limb cap lawhching mahmah a, mi 30 te’ measurement lak hi’n kigen a, amaute Aug 13, 2013 a artificial limb piak hidin kigen hi.

Tamlou sengin stone lakkhiak theih
Imphal, May-11: RIMS a Neurology deptt te’ saina in tuni’n “2 day EZ-USI midterm Workshop on PCNL & Prostate Surgery” om hi. Huai ah RIMS Director Shekharjit in a genna ah Private Hospital leh state dang ah sum tamtak senga kidney(kal) a suang(stone) om lakkhiak kichi hunlui hita ding chi’n gen a, RIMS in kidney a suang om,atkhiak ngai lou in lakkhiak nang vanzat a neihtak ziakin sum tam senglou in gen lakkhik theih ding chi’n gen hi. Workshop ah Professor Mohendro, RIMS Superintendent Arun Kumar banah NE state tuamtuam apan doctor tamtak tel uhi.

Auto atuang accident in si
Imphal, May-11: South Delhi a RK Puram a om Amonbi Nita d/o A. Ishingchauba Singh of Wangoo, Thoubal district leh Sugnu apan Matthew, James, Richoi leh Francis te’ tuanna auto rickshaw in traffice signal ngaklai, bus in a nunglam apan phu in auto rickshaw nasatakin sia a, huaikim a om mipite’n auto atuang te’ hunkhia uh a, Amonbi leng damdawi inn tut himahleh nitak dak 10:30 vela si hi’n kigen hi. Police te’n thiltung tawh kisai case file uh a, truck driver koi a om hiam chih suizui lel uh hi’n kigen hi.

Tuni’n Science Meet 2013 kipan
Imphal, May-11:Student-te khualna in Manipur Science & Technology Council (MASTEC) leh deptt of Science & Technology, Govt. of Manipur saina in “Genetically Modified Crops and Food Security” chih thupi zangin tuni apan ni 5 sung daih ding Palace compound a Lamyanba Shanglen ah “Science Meet 2013” honna om a, huai hun ah Chief Guest in Professor IS Khaidem pang hi. Functional President in MASTEC Director Surendranath pang a, Guest of Honour in Professor G. Tomba Sharma pang hi. Huai hun ah private school tamtak tel mahle uh govt. school lamte’ atel omlou hi’n kigen hi.