Chairman, ADC in Press/Media-te kimuhpih
Lamka, May-4: Langkhanpau Guite, Chairman ADC/CCpur in tuni sunnung in Press/Media-te kimuhpih a, April 1 & 2, 2013 a huihpi, vuahpi, gial leh pingpei in Lamka khawpi leh mun tuamtuam ah siatna thupitak tun a, inn-le-lou belhtheih nonlouh a omte panpihtu mipi, pawl tuamtuam, village authority, MDC-te, MLA ban ah Health Minister’ tate Khanthang leh Lulun tungah kipahthu gen hi. Aman abial veh akuan himahleh DC/CCpur omlouh ziakin ama’ level ban ah ADC Chairman ahihziak in a zinna lama giakmanlou in , Lamka hongzan delh hi’n gen hi. Huihpi leh vuahpi ziaka haksatna tuakte an-ngawl a kuamah koihlouh banah silh-le-ten bei aleng kuamah koihlouh dingin MDC teng tawh thupukna bawl uh hi’n gen a, MDC te’n mahni bialsung chiatah inn-le-lou kisiate ahithei tana panpih ding hi’n gen hi.
Aman agenbehna ah Sub-divn teng ah inn-le-lou kisia tamtak om a, tuni’n Vungzagin Valte, Parliamentary Secy; TN Haokip,MLA leh Ginsuanhau, MLA te’n amau bial pha in antang leh panpihna tuamtuam hawmkhia uh hi’n gen a, MDC bangzahhiam in leng inn kisiate kiangah langva pia uh hi’n gen hi. IAY mudingte’ waiting list ngai himahleh DC/CCpur tawh kithuzakin tu le tu a poimawh te kiang ah piakding in thupuk uh hi’n gen hi.
Inn leh lou kisia a belh ding neiloute’n bialtu MDC kiang ah report bawl a, MDC leh SDO-te tawh kithuzak a sub-divn tenga inn leh lou kisiateng list kimtak amah kianga pe ding in theisak a, Minister, MLA, MDC leh SDO te tawh inn-le-lou kisia tungtang haksatna neite’n ama’ kiang mahmah a theisak din ngen hi. Vangsiatna tunga mipite pankhawmna thupi sa ahihdan gen a, maban ah leng kuapeuh pangkhawm a, inn-le-lou belh theihlouhte panpih zel din ngen hi.

Chief Justice in Lamka hongpha

Lamka, May-4:Manipur High Court a Chief Justice A.M Sapre leh azi’ Ashlesha Sapre, Justice N.Kotiswar Singh leh azi’ Vijaylakhsmi Brara te'n tuni zinglam in Bishnupur Court enkhia uh a, huai apan Lamka hongpha uhi. Chief Justice in Tuibuong a Court complex enkhe a, mun awng ah CCpur Court complex bawlna mun ding leng enkhia hi. Sun dak 12:00 in Chief Justice in official-te meeting neihpih a, tunung sawtlou in Tuibuong a Court fencing, court-te deihdan in Court complex sawng 3 a bawl ding thu kikum uhi. Chief Justice leh a teamte’n sunnung in Khuga Dam IB ah an ne uh a, huaizawh in Imphal ah kiknawn uhi.

Relief camp a omte veh
Lamka, May-4: Langkhanpau Guite, Chairman ADC/CCpur in tuzing in May 1 zankim leh zan zingkal a huihpi, vuahpi, gial leh pingpei in anuai ziaka inn- le-lou kisia tulela PT Sports complex leh SSA Residential school a Relief camp a innkuan 30 val omte veh hi. Aman haksatna thuakte kiangah kuamah an-ngawl a omlou ding leh silh-le-ten beia om lou dingin govt in panla chi’n khamuan hi. Tusun in SSPP Gen HQ makaite’n leng Relief camp a omte ven uhi.

Mipi'n social work nei uh
Lamka, May-4: Zan zingkal a huihpi, vuahpi, pingpei leh gial in CCpur dist a nawkziak in siatna thupitak tung a, New Lamka ah YPA Khominthang Unit, YPA Vengnuam South Unit leh YPA Kanan Unit makaih in tuni’n mipi’n social work nei uhi. Mipi’n inn kisia bawltheih teng bawl uh a, bawltheilouhte leng phelsia in hemkhia uhi.

MDC, SDO leh Staff te’n enkhia
Lamka, May-4: Zanhal leh zan zingsang in huihpi, vuahpi, leh gialin CCpur dist anuai ziakin Singngat sub-divn ah in-leh-lou kisiate tuni zinglam in bialtu MDC P.Sianzadong, Rachel N.Guite, SDO/Singngat, N.Thuamkhansuan, SDC/Singngat leh Lalthanzam Sinate, SDC/Singngat te’n Singngat area en khia uhi. Singngat area ah inn 20 vel kisia hi’n kigen hi.

SHG 4 kiang ah subsidy pia

Lamka, May-4: Ms Grace Zamnu,MDC(Muallum) a bialsung a khaw tuamtuam ah Self-Help Group(SHG) 22 dinkhia a,Lamka khawpi ah 6 phutkhia hi.Aman DRDA SGSY a revolving fund (subsidy) Rs 10,000 chiat Self Help Group 4 kiang ah pekhia hi.Huai SHG te Muallum ‘A’ Women SHG; Ruth SHG, Panglian; S.Belbing Women SHG leh Chahnou Nute Lom SHG hi uhi. SHG 28 omte lak ah tunitan in SHG 7 te’n govt apan loan subsidy muzou nailou uh hi’n Grace Zamnu, MDC apan kiza hi.

Thinglhangphai ah Kuki Nampi taona

Lamka, May-4: Kuki Nampi Taona(KNT) Executive Committee saina in Chandel District sung Chakpikarong area a L. Thinglhangphai biakinn ah April 26-29, 2013 sung Kuki Nampi Taokhomna 46vei chinna nei uh a, "Pakai mitmu'n kisunem un" (Jacob 1:10) chih thupi zangin mun tuamtuam apan saptuam, khawtang makai leh mipi tamtak pikhawmte’n thum khawmna nei uhi.

Tuhtu omlou in ching uh
Lamka, May-4: Kum 2013-16 sung CCpur Dist Sports Assn (CDSA) vaipaw ding telna ding a nomination file teng April 29, 2013 in CDSA office ah nomination paper- te scrutiny om a, huai ah paisuak vek uhi. Scrutiny a paisuak teng a ki-withdraw omlouh ziakin avek un tuhtu omlou in ching uhi. Huaite ahihleh President in Lalvullien Joute (RACC,Rengkai); Vice President in Lallawmthanga (Ngathal Y/C); T.Thangzasong (Bungmual Y/C), L.Dongzapau Simte (Simveng Y/C), Kamjathang Haokip (M.Songgel Y/C) ban ah Treasurer in Thangchinhau (LUS) ching uhi.

Gate bul ah gari driver’ lu tang
Lamka, May-4: Seikhojang @ Jangpu, Chief of Muntha, tulela Gangte Veng a omlel’ Shaktiman gari na semzou inn a tailut deklai tuni nitak dak 7:00 velin gate bul ah driver Samu of Belam Veng a gari hek apan dakkhelai gate bul ah tang hi’n kigen hi. Driver-pa ngawng(neck) ah gate bul leh gari in gawituah a, gari mai taklam pei puannawi a tankhak ziakin driver leng gate leh gari in a ngawng (neck) ah teptuahkha a, tangkha hi’n kigen hi. Gari in masawntheilou, nungkin theilou in driver pa tangden a, alakkhiat ding dan buai huai mahmah a, phatuamngai te’n nitak dak 8:30 vel in gate lakhia in huaizawh in driver Samu’ lakhe thei uh a, gim mahmah in Dist Hospital ah etkol in om hi.

SDO 3 in report pia
Lamka, May-4: April 1 & 2, 2013 a huihpi lrh vuahpi in inn-le-lou tamtak a hihsiat thu ah tunitan in SDO 3 in Dist Administration ah report bawl uh a, SDO 2 akipan leng report ngak lel uh hi’n kigen hi. SDO te’n report a piakdan un CCpur sub-divn ah tenna inn 100 kise dimdem a, inn 300 sia (partially damaged) a, Singngat sub-divn ah tenna inn 5 se dimdem a, inn 15 sia (partially damaged) a, Parbung sub divn ah inn 39 sedimdem a, inn 126 sia (partially damaged) hi.

Career Guidance Seminar om

Lamka, May-4: HSA CCpur Jt HQ saina in tuni in HL Daka Memorial Hall,HSA campus, Rengkai ah ‘Career Guidance Seminar’om a, Dr Rosiem Pudaite, Prof. Hist Deptt, CCpur College in hong hi.Seminar ah Lalramsang Infimate, SDO/Thanlon in ‘Civil and Allied Services’ chih pansan in sinsak a, Dr Olivia Joute, MD in ‘Medical’ tungtang sinsak hi. Maj S.L Haokip, 46-Bn A/R in ‘Career in the Armed Forces’ chih leh Nelson L.Khawbung, Ruonglevaisuo Education Society in ‘Getting through the Staff Selection Commission’ chih pansan in sinsak hi.

Thadou Students Assn kiphutkhia
Lamka, May-4:Kum 2002 vel apan CCpur dist ah Thadou Students’ Assn. A omlouh ziakin tuni’n Thadou Students’ Assn. Gen HQ makaite’n Lamka hongpha in Demmang Veng ah Tonlen , Returning Officer & Speaker TSA Gen HQ leh Paominlun Lhouvum, Presiding Officer, Speaker TSA, Sadar Hills makaih in TSA/CCpur dist phutkhia uhi.Kum 2013-15 sunga TSA/CCpur dist makai dingte President in Ngamkholen Haokip; Vice President in Ginminlal Lhungdim; General Secy in Thongminthang Baite; Joint Secy in D.Thangboi Baite; Secy Finance in L.Samuel; Secy Social & Culture in Nemneilhing; Secy Games & Sports in Thangkhopau Thadou leh Treasurer in Hatneilam Haokip hi uhi.

Army-te’n PLA 1 mankhia
Lamka, May-4: Police thusuak kingahdan in 1/11-Gorkha Rifles te’n May 1, 2013 nitaklam dak 5:30 velin Loklaiphai khua ah PLA member S.Amit Kumar Singh(27) s/o S.Ibochou Singh of Loklaiphai mankhia uh a, amah akipan 7.65 mm pistol 1, 9mm pistol tang 2 leh 5.56 mm tang 10 mukhia uhi. Army te’n Imphal police ah Amit Kumar Singh pekhia uh a, CCpur Police te’n a case lasawn uhi. Amit Kumar Singh kipuanna tungtawn in August 13, 2007 kum in CCpur Police Station kong lak Old Bazar, a grenade hihpuakna atel kha leh Feb 26, 2013 in Torbung a IED bomb hihpuakte lak a telkha hi’n kigen hi. CCpur Police te’n zan in JMIC/CCpur court ah Amit Kumar pawkhia uh a, Court in ni 7 sung May 9, 2013 tan Police custody a om ding in phalsak a, Police te’n FIR No. 39 (5) CCP-PS U/S 121/121-A IPC, 16.20 UA (P) A.Act & 25 (1-C) A.Act registerd uhi.

SUUNNA
Indira Hoihnu (52) w/o S.Chingzagin of Vengnuam, New Lamka tuni zingsang in awmna in si a, YPA Hanmual, New Lamka ah kivui hi.

IMPHAL NEWS
CM in Myanmar pha ding
Imphal, May-4: Indian Chamber of Commerce leh Republic of the Union of Myanmar saina in May 26-28, 2013 sung in Myanmar a Saigang Division ah North East India-Myanmar Business Conclave om ding hi’n kigen a, Myanmar thunei te’n Manipur Chief Minister kiangah chialna a piak dungzui un Chief Minister O. Ibobi in huai hun va-uap ding in Myanmar gam ah a zinkhiak gintakhuai hi’n kigen hi.

BJP te’n kiphinna nei

Imphal, May-4: Prime Minister Manmohan Singh in 2G leh Coalgate scam ah kigolh hi a ngawh ziakin BJP pawlin Prime Minister hihna apan kitawp dinga phut kawmin tuni’n India gamsung pumpi ah kiphinnanei uh a, huai dungzui in Manipur ah leng tuni’n BJP National Secretary Tapir Gao leh BJP Manipur Pradesh President Th. Chaoba makaih in Keishampat, Singjamei leh mun tuamtuam ah Manipur Pradesh BJP te’n kiphinna nei uhi.

Rs 3 crore beiin nasep hiding
Imphal, May-4: O.Nabakishore,IAS Principal Secy(Sericulture) Govt of Manipur tuma zek in Delhi ah meeting di’n kuan a, Ministry of Textile nuai ah Manipur Sericulture Project Phase-II adingin Centre govt in Rs 3 crore sanction bawl chi hi. Ministry of Textile in Manipur ah Rs 3 crore zangin nasep ding buaipih lel uh a, tukum sunga nasepna kipat zawh lam et-huai hi’n kigen hi.

Manipur ah oil excavation pat hi ding

Imphal, May-4: ‘The Jubilant Oil and Gas Pvt. Ltd te’n Tamenglong leh CCpur district ah thautui zonkhiakna dia nasep taktak pan ding in Ministry of Petroleum and Natural Gas (MoPNG), Govt. of India in phalna pia hi’n kigen hi. Heavy machinery te’ puaklut theihna ding in Union Minsitry for Road Transport and Highway kiangah phalna leng ngen uh hi’n kigen hi. Manipur in leng van puaklutna ding in Imphal-Jiribam road a zat mahmah lai in hiai lampi ah van 14tons sang a gikzaw puak phallouh hi’n kigen hi. Private Company taklat dan in rig equipment te’ 4.65m x 4.65m alian hi a, 59 tons agik, July/August kha a puaktung hi dingin taklang uhi. Initial survey tungtawn in Lungthulien (Well 14 A), Lower Karkublen ( Well 16 A), Pherzawal (Well 9), Oinamlong (Well 1), Nungba ( Well 2) leh Tuaitengmun (Well 12A) te’ ah Nov 15, 2013 a drilling operation pat hi din leng taklang uhi.

VDF te’n non-Manipuri 17 mankhia

Imphal, May-4: Nongmeibung kiangnai a Ananda Academy gei a om VDF pawlte’n tuni’n huai kimlak ah document kichiantak neilou non-manipuri mi 17 mankhia uh a, hoihtak a suizui nungin Bangladesh apan hi uh a, tulelin Assam a Dhubri district a om hi un kigen hi. Amau lakah makai a kigen Abdul Ratiz Sheikh s/o Abdul Manaz Sheikh in Langol NIT complex leh JNIMS complex bawl dinga labourer dan a hongkuan uh hi’n gen a, R.K. Industries neitu R.K. Rameshwor of Changangei in amaute’ a hire hi’n leng gen hi.

IED bomb mukhiak
Imphal, May 4: Thoubal district a NH-2 gei a Sora Chingjing mun ah zan nitak dak 6:00 vel in 27 A/R a Road Opening Party (ROP) pawl in IED bomb khat mukhia uh hi’n kigen a, tuni zinglam dak 8:00 vel in bomb expert te’n amun mah ah susia uh hi’n kigen hi.

Gari Accident ah mi 1 si
Imphal, May 4: Moreh College gei a NH-2 mun ah tuni zinglam dak 10:00 velin tuipua DI Truck (No MN-06L/0524) leh bike(registration no. omlou) kiphutuah in bike atuang mi 1 amun ah si hi’n kigen hi. Misi ahihleh Chingkhullun Haokip (65) of Chikingveng village of Chandel district hi’n kigen hi.

CWC Chairperson thahsam
Imphal, May-4: Thoubal district a Social Welfare deptt nuai a CWC Chairperson Molanissan d/o L. Chandra Kishore of Thoubal Haukha Maning Leikai in tuni’n Alto Car (No. MN-06L/1042) atuang in Thoubal DC office ah meeting dia kuanlai pasal khat in Hyundai i10 car in nungzuih a, Thoubal Haukha Heibi Makhong mun ah pasal pan phatou in pistol in kap a, a thautang in CWC Chairman gari pailet in a seat kha hi’n kigen a, pasal pa’n Thoubal Mela ground tan a delh in kihemkhia hi’n kigen a, CWC Chairperson leng Thoubal P/S ah tailut in case file hi’n kigen hi. Aman Garo i10 gari no. thei hi’n gen a, Police te’n thiltung suizuina ah gari no. a poimawh ziakin puangkhelou uh hi’n kigen hi.