MSF te’n Relief Camp a omte panpihna pia
Lamka, May-5: May 1-2, 203 kawmtuah zankimlai leh May 3, 2013 zingsang baihtak a huihpi, vuahpi, leh gial (hailstorm) kithuah in CCpur district nuai a, adiakin Lamka khawpi sunga Khominthang area ah siatna thupitak atut ziakin inn-le-lou belh ding neilou innkuan tamtak om hi. District Disaster Management Authority Committee emergency zanhal(May 3, 2013) a meeting thupukna bangin tuni sunning in Maniram Sharma, IAS,i/c DC/CCpur makaihna nuai ah tuni sunnung dak 1.30 in Relief Camp a kizang New Lamka PT Sports complex leh SSA Residential school vapha uh a, huai ah ‘Doctor without Borders’ kichi MSF pawlin panpihna pia uhi.
MSF te’n Relief Camp a om innkuan 32te kiangah blanket 2, thousilen (mosquito net) 2, nawtkuang packet 2, candle packet 1, towel 2, sahbon (soap) 2 leh carpet net 2 chiat pia uhi. Relief camp a panpihna thilpiak hun ah Maniram Sharma, IAS i/c DC; S.Khaikhopau Ngaihte, SDC/BO HQ,Social worker CT Lian, S.Chinngaihpau, President YPA Gen HQ leh a cabinet member pih tamtak te’n kithuahpih uhi.

June 2013 tanin draft Mizo customary law zawh hiding
Aizawl, May-5: Mizoram State Law Commission Chairman R Lalrinawma makaihin I&PR Conference Hall ah tuni’n Mizoram state law commission meeting 17 veina om a, June 2013 tan a zawhsiang sak sawmin panlak ahi chi uhi. Mizo-te’ lak ah kitenna(marriage), kikhenna (divorce) leh khang/gou kiluah (heir-ship) tungtang danthak (new customary laws) a bawl lelte uh commission in etkhiakna nei uhi.
Commission member RC Thanga leh Member-Secretary Zahmingthanga Ralte kiangah hiai dan thak 3 kibawlte tawh kisai draft hihfel dingin mawhpuakna piakin om chi uhi. Mizo customary law zawhfel ahih chiangin, Assembly ah luikhiak hiding chih ahi hi.
Mizoram State Law Commission apaisa April 21, 2009 in dinkhiak hi a, R. Lalrinawma, MLA in Chairman hihna len in Zahmingthanga Ralte, Dy. Secretary, Law & Judicial deptt, in Member-Secretary hihna len hi. June 2, 2011 in Commissioner member dingin midang 3 lakbeh hi ua, Chairman leh Member-Secretary telin member 12 pha uhi.
Mizoram State Law Commission phuhkhiak ahihnungin na tamtak semkheta ua, huaite laka poimawh diakte ‘The Scheduled Tribes and Others Traditional Forest Dwellers (Recognition of Forest Rights) Act, 2006 (Central Act No. 2 of 2007)’, ‘The Motor Vehicles Act, 1998’, “The Mizoram Swimming Pool Regulation Bill, 2011′, The Gram IMyayalayas Act, 2008 (Central Act5. No. 4 of 2009)’ leh a tuamtuam hi a, Mizoram Legislative Assembly in leng pompihna bawl hi. Commission in Central Young Mizo Association (CYMA) te tawh kithuzak in thil omdan enkhawm zel uh chih ahi hi.

DC in Hospital surprise visit bawl

Lamka, May-5: Maniram Sharma, IAS, i/c DC leh S.Khaikhopau Ngaihte, SDC, BO HQ DC’s office te’n tuni sunnung dak 2:30 in Dist Hospital surprise visit bawl uh a, casualty, medicine ward, children ward, gyanea & maternity ward leh surgical ward enkhia uhi. Huai hun ah damloute dinmun, hospital sianthouna, doctor leh nurse-te nasepdan leng enkhia uhi.

Florence Nightingale Award sang ding
Lamka, May-5: Ministry of Health & FW, Govt. of India leh Indian Nursing Council saina nuaiah May 12, 2013 in New Delhi ah India adia Nursing Award sangpen ‘National Florence Nightingale Nurses Award – 2013’ hawmkhiakna om dinga, huai ah Lady Hardinge Hospital, New Delhi a Chief Nursing Officer sem Ms. Agnes Niangneikim Simte d/o (late) T.Thongzalian Simte in award sang ding hi’n kigen hi. Thu kingahdan in a naunu Jacintha Chiin Kim Simte in kum 2011 in huai award sang ngei hi. National Florence Nightingale Nurses Award ngahte kiangah Rs. 50,000 tawh certificate leh medal piakkhawm hisek uhi.

51mm mortar bomb mukhia

Lamka, May-5: Thingkangphai khawsung Tongdam veng ah naupang kimawlte’n bomb puak nailou khat mukhia uh a, thutut kingahdanin huai bomb 51mm ‘mortar bomb’ apuak nailou hi’n kigen hi. Naupangte’ gendanin hun sawttak loupa(bush) kawm ah huai bomb om in a lakhe ngam omlou uh a, huchihlai in naupang khenkhat in lakhia in a inn uh pawtung uh hi’n kigen hi.

‘Vontawi Zaideih’ honna om
Lamka, May-5: Khuppu in music vedio album a bawl “Vontawi Zaideih-Vol.-I” kichi tuni sunnung in Family lane a Bethany Christian College ah Ms Mangnu khuallian a pang in hongkhia a, Rev Dr Sut Khan Thang, Gen Secy CBA in Pathian kiang ah thumna in lan hi. Huai hun ah Functional President in Grace Zamnu, MDC pang a, Guests of Honour in President, Kuki Women Union, Manipur leh Secretary, Zomi Mothers Assn pang uhi.

SYO Gen HQ in inn kisia bawlsak

Lamka, May-5: Simte Youth Organisation(SYO) Gen HQ in zan in SYO member inn kisia-te bawlsak uh a, Lamka area a SYO member tenna inn 44 vel kisiate lakah V. Munhoih ah 6 bawlzou uh a, mun danga omte leng sunzom lai ding uhi. Huihpi thuakkha inn kisiate panpihna dingin SYO Delhi in Rs. 10,000 leh KZP Delhi in Rs. 5000 thon uh a, mun tuamtuam apan panpihna sum leh niteng poimawh tuamtuam a donkhawmte uh zanhal in mun tuamtuam ah hawm uh hi’n thutut kingah hi.

Kuki Inpi 6 makaite’n thumna nei ding
Lamka, May-5: Kuki Inpi Manipur (KIM) in May 11, 2013 in Gothol/CCpur district a Elijah Prayer Mountain ah Retreat-cum-Fasting Prayer ding uhi. Huai ah Rev. S. Prim Vaiphei, President, AMCO in thugen ding a, zinglam dak 8.30 akipan nitaklam dak 2.00 kikal anngawl thumna nei ding uhi. Kuki society adinga thumna hunah Kuki Inpi Manipur (KIM) Cabinet member teng banah Kuki Inpi (CCpur, Sadar Hills, Tamenglong, Ukhrul, Chandel leh Imphal) apan makaite banah Kuki Inpi block makaite leng tel ding uhi. An-ngawl thumna a tel ding District leh Block Inpi President te’n gamsunga tulai dinmun awlmawhhuai diakte thumna point dinga telkhia in hunzang ding uh a, programme zawh chiang in Thangting Part-II ah Kuki Chiefs Assn saina nuai ah programme dang zang ding uhi.

IOC Topper Award ngah

Lamka, May-5: Lianmuansang Ngaihte s/o Dr. S. Lianzathang Ngaihte of Hebron veng, New Lamka in ‘Indian Oil: All India Field Sales Officer Topper Award for the year 2012-13’ sang chihthu kiza hi. Aman tulelin Ahmedabad ah M/s IOC Ltd ah Assistant Manager sem hi. Student ahih lai in Donbosco H/S apan Class X passed in Rayburn College apan Class-XII zou a, huai nungin National Institute of Technology(NIT), Silchar a kai in IOC Ltd Ahmedabad ah sepna ngah hi.

Traffic rule bawhsia 13 mankhia
Lamka, May-5: Lamka khawpi sunga kizang ‘One way traffic rule’ leh ‘Gari parking’ bawhsiate Police, traffic Police leh VDF kithuahte’n mankhe zel uh a, April 29-May 4, 2013 sungin leng traffic rule bawhsia mi 13 mankhia uh a, TR-5 receipt cut in fine sakl uhi.

Bialtu MDC in langva pia
Lamka, May-5: Kamsuanlun, EM/ADC in amah bialsung Hiangtam Lamka Constituency a huihpi leh vuahpi ziak a inn-le-lou kisia innkuan 9 te zan in veh a, amaute ading in langva bundle 20 pekhia hi’n thusuak kingah hi.

Samu’ in hoihlam nawt
Lamka,May-5: Seikhojang, Chief of Muntha, tulela Gangte Veng a om’ Shaktiman gari zan nitak dak 7:00 velin driver Samu h/o gate bul ah driver Samu (45) h/o Chongzakim of Belam Veng in Gari neite’ inn a heklut dia kisalai a dakkhiak zenzen leh gari in gate tawh gawituah kha in hun sawtpi tang hi. Nitak dak 8:30 velin JCB zangin gate leh akikhaina khuampi lakkhiat hi a, Samu leng Hospital etkol a om in a dinmun in hoihlam nawtzel a, tuni in thoukhia leh zuntha in omzou nawnta hi.

ZRF Chief in lungkimlouh thu puang, Army te’n ZRF cadre 2 mankhia
Lamka, May-5: Police apan kizadan in 46-Assam Rifles te’n May 2, 2013 nitak dak 11:30 in Bungmual area ah ZRF cadre 2- Khamkholun (38) s/o Kamzachin of New Lamka leh Rig Valte @ Ringson (30) s/o Ginzalian Valte of Dorcas Veng, New Lamka mankhia uhi. Army te’n mi 2 apan .22 tang 47; 9mm tang 31, single barrel tang 15, hand grenade 1, country made revolver 1 leh detonator 36 mukhia in Imphal Police ah pekhia uh chih ahi hi. CCpur Police te’n a case lasawn in JMIC/CCpur court ah dingsak uh a, court in May 9, 2013 tan Police custody a omdin phalsak hi.Police te’n FIR No. 41 (5) 2013 CCP-PS U/S 400 IPC, 25 (1-C) A. Act & 5 of Explosive Substances Act registered uhi.
Hibang kalah Ps Hangshing,C-in-C,ZRF in thusuah a bawlin a taklatdan in hun sawttak paita akipan in KNO nuai ah ZRF om nawnlou in UPF nuaia constituent member khat hi a,govt tawh kala SoO tawh kisai ah leng signatories khat hi’n taklang hi.Huai kawmin Maj. Vikash Kundu makaihna 46-Assam Rifles(A/R)te gamtatna lungkimlouh thu puang hi.
Thusuak in a gendan in A/R te’n May 2, 2013 in ZRF cadre 1 leh civilian khat mankhia uh a,Maj Kundu in KNO Chongkhojou camp a koih sawm hidan in taklang hi.Maj in ZRF cadre-te Chongkhojou camp a koih taktak a sawm leh huai camp a omte nawhkhe masa dinga deihthu ZRF chief in taklang hi.

SUUNNA
Ginkhanlian (35) s/o H.Zamkham of Central Road, Hiangtam Lamka tuni sunnung dak 2:30 in Dist Hospital ah sinna ziakin si a, May 6, 2013 in Lamka hanmual ah kivui ding hi.

IMPHAL NEWS
CM in Football Dev programme hong
Imphal, May-5: Chief Minister O. Ibobi in tuni’n Khuman Lampak a National Sports Academy a Indoor Hall ah Manipur Development Society (MDS) leh All Manipur Football Association (AMFA) saina in ‘Two month residential football development programme’ hongkhia a, Functional President in M. Prithiviraj, Parliamentary Secretary(Youth Affairs & Sports) pang a, Guests of Honour in DS Poonia, IAS, Chief Secretary leh Dr. R.K. Nimai, Commissioner( Youth Affairs & Sports) pang uhi.
CM in a thu genna ah Consultant General of the republic of Germany in kumlui a Manipur hong phak apan foreign coach nuai ah sports lam adiak n football puahphat sawm in state govt. leh AMFA kithuzak in tu’n huai tangtung thei a coach ding leng England mi experience hoihtak nei Stephen David Darby hi’n gen hi. AMFA in football development programme a tel dingin kum 15-18 mi 60 telkhiak hiding in taklang uh a, coach in mi 30 telkhiak beh ding hi’n kigen hi.Kha 2 sunga sum bei ding zah Rs. 35 lakhs hi a, MDS in avek a seng ding hi’n kigen hi.

VOF in kipahpihthu puang

Imphal, May-5: UPSC saina a Civil Services Examna ah Samuel S. Vaiphei s/o Rev S. Prim Vaiphei of New Lambulane in UPSC saina a Civil Services examna 2012 ah dinmun sangtaka a lawhchin ziakin Vaiphei Officers’ Forum(VOF) pawlin kipahpihna thu puang uh a, a maban hun ah leng deihsakna hoihpen leh lawhchinna ngahtou zel dingin deihsakthu puang uhi.

RIMS campus ah bomb puak
Imphal, May-5: Lamphel a RIMS campus ah zan nitak dak 11:00 velin grenade khat puakzak hi’n kigen hi. Akigen danin RIMS complex a RCC fencing kianga electrical installation mun ah bomb puak a, fencing wall kisezek mahleh asi leh liam omlou hi’n kigen hi.Thiltung tawh kisai kuate’ khutnung hihiam chih a kipuang om nailou hi’n kigen hi.

Gari kiphutuah ah mi 1 si
Imphal, May-5: Khurai Sajor Leikai a Blooming English School kiangah tuni sunnung dak 2:30 velin Water Tanker (No MN-05/3624) leh TVs bike (No. MN-O5/2914) kiphutuah in huai ah bike hektu E Lokendrajit Meiteei (40) s/o E. Ibohal of Lamlai Chalou Mayai Leikai, a mun ah si hi’n kigen hi. TVs bike neitu ahihleh press a sem Tamarjit hi’n kigen hi.

FCS godown ah antang tamtak sia

Imphal, May-5: Sangaiprou mun a FCS godown ah mipi laka hawmkhiak ding antang kikoihte’ laka bag tamtak a siat ziakin tuni zinglamin JCB in a phumna ding mun liantak khuak hi’n kigen hi. Godown a nasemte’ gendan in antang tamtak a muat(decay) ziaka paihkhiak sawm uh hi’n gen uhi. State govt. nuai a Consumer Affairs, Food & Public Distribution department te’n mipi lakah man niamzaw( subsidiese rate) a a hawmkhiak ding uh hi a, antang bag asang asim phum a om hi’n kigen hi. FCS official khat in a gendan in FCI thuneite’n antang koihna dingin FCS godown hire sek uh hi’n gen a, antang bag bangzah kisia hiam chih bel gen tuanlou hi. Imphal East a Koirengei mun a FCS godown ah leng antang bag hunkhop a kisiat ziakin zan in phum a om hi’n kigen hi.

KCP a tel mi 3 mankhia
Imphal, May-5: Imphal West Commando te’n zan nitaklam dak 5:30 velin Samurou a Little Master English School kiangah KCP (Kesho Meitei Group) active member 3 mankhia uhi. Mat a om P Amuba Singh @ Amu (58) s/o (late) Ph. Leibakmacha Singh of Phumlou Mamang Leikai leh Moirangthem Ningol Khoirom Ongbi Manju Devi (33) w/o Kh. Shanti Singh of Mayang Langjing Mana Ingkhol hi uhi.
Thudang ah Jiribam a om Assam Rifles te’n tuni’n Cachar Sonai Village ah KCP (Noyon) cadre 1 mankhia uh hi’n kigen hi. Matkhiak a om Ksh. Kundon Singh (36) s/o Koiron of Jiribon Village hi a, Sonai Police te’ khut ah pekhia uh hi’n kigen hi.

Silent village te’ relief material pia

Imphal, May-5: : Senapati district a Saikul-sub-division sung a Silent village ah May 3, 2013 in gamgi thubuai tawh kisai in Seijang Village te’n tenna inn 36 haltum uh hi’n kigen a, tuni’n Imphal akipan pawl tuamtuam kithuahkhawm in Silent village vapha in innkang thuakte panpihna thil tuamtuam vapia uh a, mipite’ thuakgimnate’ thuakpih uh ahihdan leng gen in hindan ngeina a zat theih nawnna ding un lampi omthei tengah panpih ding uh hi’n leng gen uhi.