Vungzagin Valte in Parliamentary Secretary a let lopna om
Lamka, Oct 27: Vungzagin Valte, MLA (Thanlon A/C) in tuma zeka Parliamentary Secretary (Horticulture & CADA) a ngah kipahpihna program zan nitakin a pianna khua Mualnuam (Thanlon Sub-Division) ah om a, huai ah Imphal apan CADA leh Horticulture official tamtak in zui uh a, Lamka apan in Dr Liensang, CMO makaihin medical team leh K Ngulkhanthang DO/Horticulture makaihin official hunkhop in zui uhi. Zan nitaklam in Mualnuam khua a mi kiphal 4te’ banah V/A te’ thawhkhawm bawng 2 leh vok 4 gou in mipi’n nitaklam in ankuang umkhawm uhi.

Mualnuam a ZYA Hall ah zan nitak dak 6 apan V/A te’ makaihin kipahpihna program zang uh a, huai ah Langkhanpau Guite, Chairman/ADC & MDC (Tuivai ADC), Thanglianpau, President ZRO banah Zomi civil society leader tuamtuamte’n thugen uhi. Pastor L Thang Guite in Vungzagin Valte adingin vualzawlna ngetsak hi. BYF/EBCC Mualnuam te’n Hall meeting ah lapina nei ua, BDF te banah Lamka apan lasiam hunkhop in lasa uh a, Hall sunga talou khop in mipi tamtak kikhawm uhi.

Mualnuam hausa Khamkhansuan Guite makaihin Parliamentary Secretary kipahpihna om in, khawsung a Zomi frontal organization tuamtuam omte leh mimal tuamtuamte’n kipahpihna thilpiak banah saliang khaina nei uhi. Chairman/ADCC in a genna ah MLA leh MDC-te pangkhawma gam puah taktak sawm ahihna ah mipite’n MLA leh MDC te’ tunga kinepna tuamtuamte sepkhiak theihna dingin kipanpihtuah ngai ahi chi hi. Elected representative te’n telching a i omna bial ah tenna inn-le-lou neih poimawh mahmah chi hi.

ZRO President Thanglianpau Guite in a genna ah hausa leh mipite’ kalah ‘gap’ bangmah a omlouh ding ahi chi a, hausate’ ginatlouh ziaka khawmite’n khawsung nusia a pem khiakhia leng hithei ahihna ah pilvanna ding tamtak om chi hi. Huailou in khawmite leng phunchiaklua kichi omthei ahihman in pilvan poimawh a, khawsung leh i area khantouhna ding a pan lakkhawm poimawh chi hi. Aman Vungzagin Valte in Minister of State tawh dinmun kikim ‘Parliamentary Secretary’ amuh kipahpih mahmah ahihdan genkawm in, mipite’n amah ah kinepna liantak nei ahihthu leng gen hi.

Vungzagin Valte in agenna ah, i gam puahna dingin kuapeuhin mawhpuakna nei a, tutung election ah mimal deihtelna siangthoutak tawh vote khekhin ihih tawh kiton in “khekhat suanin pan lakhawm ni” chi’n mipi chial hi. Kuapeuhin hun paisa suikikkik lou in, ‘Thanlon A/C ah khantouhna taktak omna ding leh i gam loihsa tunding thaknawnna dingin kuapeuh in kal I suankhawm ding’ chi’n chial hi. Electricity tawh kisai a genna ah, i tenna mun gammial-buppi pe’n light continent suah dingin i vek in pan lakhawm ni chi hi. Mimal takah ka chitlouhna tamtak a om ngei ding, tuaziakin, constituency mipite’ thuhilhna ka poimawh gige chi hi. Aman khaw hausa tuamtuamte puansan silhsak a, ZYA leh philanthropic organization tuamtuamte football, volleyball, net leh thilpiak tuamtuam pia a, maban ah a constituency sung a khaw tuamtuam vehkual ding ahihdan leh mipite’n development fund-te a zarzou khakpih uhiam chih a mun mahmah ah enkhe ding ahihdan gen hi. Thuangtam V/A makaihin leng Vungzagin kipahpihna in tuni zingkalin bawng leh vok gou in mipi’n ankuang lui uhi.

Dr Liensang makaihin Mualnuam khua ah free medical camp om a, huai ah Sinzawl PHC apan Dr Tunlalmuan leh nurse te’ banah Mualnuam leh Thuangtam area a posting kha medical staff te kimtak a telin damloute en uhi. Tuni in medical team in Mualnuam a Tualkhohau Govt H/S ah damlou en uh a, manbei a damdoi a hawm zawh un Thuangtam a nei nawnin, nitak dak 6 velin Lamka tungkik nawn uhi.

‘Road Safety Awareness Campaign-cum-2 wheeler Rally’
Lamka, Oct-27: District Police team leh Lamka Business Community kithuahkhawmte saina in tuni sunnung dak 1:00 in Lamka Police Station apan ‘Lamka Road Safety Awareness Campaign-cum-Two wheeler Rally-2012’om a, L. Mangkhogin Haokip, IPS, SP/CCpur in sawlkhia (flag-off) hi. SP/CCpur in a genna ah accident hun a mahni hinna humbit theihna din awareness ngai hi’n gen a, awareness hun a telteng kiang ah kipahthu gen hi. Dist Administration in traffic regulation tawh kisai danthak a bawlte kuapeuh in zui chiat ding leh khawpi sung lamlian awngthawl sak leh siangthousak din a kithuahpihna pe chiat ding in ngetna bawl hi. Tuni a rally ah mi 500 vel in registration bawl uh a, amau teng kiang ah helmet khat chiat piakhi uhi.
Two wheeler Rally-te Police Station apan kipankhia in Tedim Rd-MC Mary Kom Rd-Tedim Rd-Sugnu Rd-Rengkai-Nerhru Mar-Tedim Rd-Dorcas Road- Bungmual-Tipaimukh Rd zui in Police Station kong a tunkik hun uah kikhen uhi.

DC makaih in rehearsal om
Lamka, Oct-27: Lamka ah Oct 28,2012 in Staff Selection Commission(SSC) saina in Data Entry Operator leh LDC lakna ding a exam om ding tawh kisai in DC/CCpur makaihna in Lamka college ah Superviser leh invigilator teng in rehearsal nei uhi.DC in a genna ah tutung a SSC examna ding pen CCpur district adia masa ahih dungzui in maban ah a hoihzaw i deihleh tutung apen a siangthou theipen a neih ngai hi’n gen hi. Lamka College a reheasal om zawh in CCpur Govt College ah leng om hi.

CBF Conference-31st Anniversary
Lamka, Oct-27: CCpur Baptist Fellowship pawl in zan nitak in New Lamka(G) a CYA Hall ah Annual Conference-cum-31st Anniversay zang uh a, zan nitak in Rev T.Gangte, Executive Secy GBA in flag kaipalh in khawmpi hong hi. Khawmpi sung in Rev. Enn Za Sian, Exe Secretary, CBA; Rev. Dr. L. Liankhanlal Simte, Exe Secy, EBCA; Rev. Thongkholun, Pastor, KBC, Tuibuong leh Rev. Douthong Touthang, Pastor, Ch.B.A. ten thugen uh a, Oct 28, 2012 in khawmpi zou ding uhi.

Parle Company in hunbei item tamtak haltum
Lamka, Oct-27: India a food product bawltu minthang ‘Parle company’a sem Nahush Nene, Account Manager, Parle Products Pvt. Ltd leh Anand Jaishwal, Area Sale Manager, Parle Products Pvt Ltd te’n Kolkata apan Manipur hongpha in tuni’n Lamka khawpi sung a Parle product zuakna mun tuamtuam akipan in hun beisa (expired) nektheih leh thil tuamtuam 407- truck 1 dim sum atuat in Rs 1.5 lakhs vel man ding mihing adia nektak nawnlou chi a pawkhia in V.Munhoih, New Lamka ah haltum uhi. Lamka a Parle distributor, JK Store, New Bazar te’n kha 6 paisa apan dukan hunkhop apan Parle product hun beisate khonkhawm uh a, tuni a hongzin Kolkata apan Parle Company official te’n check bawl in a phazah chiamteh uh a, company te’n compensate ding uh hi’n gen uhi. Zan inleng Imphal ah Parle product item tuamtuam 407-truck 2 dim haltum uh hi’n kigen hi.

Candidate 1770 vel exam ding
Lamka, Oct-27: Staff Selection Commission saina in Lamka ah Oct 28,2012 in ‘Combined Hr.Sec Level Exam’ om ding a, Lamka College a exam centre ah candidate 762 exam ding uh a, CCpur Govt College ah candidate 1008 exam ding uhi. Huai ah invigilator 142 vel duty ding uh a, examna zinglam dak 10:00 a kipan ding himahleh candidate teng zinglam dak 9:00 in exam centre tun ngai ding chihthu om hi. Gate bul ah body search tanpha omding hi’n kigen a, zinglam dak 9:20 in candidate-te lak ah question paper hawmkhiat hi ding chihthu om hi. Examna hall sung ah electronic device tawilut phal hilou ding a, pencil, erazer/rubber kia tawilut theihlel ding hi’n kigen hi.

Kuki Chiefs’ Assn Manipur meeting

Lamka, Oct-27: Kuki Chiefs' Assn, Manipur pawl in tuni in B.Vengnuom Community Hall ah emergency meeting nei uh a, huai ah member tamtak tel uhi. CCpur dist sung ah zan apan Village Authority election kipan deihlouh thu genkhawm uhi. Village authority election in singtangmite kivaipuakdan bawhsia ahi chi’n gen uh a, ahitheitan in mahni hauhsakna khua chiat ah Village Authority election boycott ding in thupuk uh hi’n thutut kingah hi.

BSF te’n thaukap sunzom ding uh
Lamka, Oct-27: STC BSF CCpur a training te’n Oct 16,2012 zingsang dak 5.00 akipan in nitak zansawt tanpha Mission compound suahlam, Pearsonmun,Mualkoi leh Gangpimual apan simtum(south-west) lam a firing range ah long/short/grenade leh 51-mm mortar a kap(firing ) uh Oct t 31, 2012 tan ding himahleh Nov 15,2011 tan sutzop hiding in ahun behlap uhi. Huai hunsung in a kimnai a khua omte apan mihing kuamah huai area a lutlou ding leh ganvulh leng huaimun a lut dia kuama’n khahzanlou ding in DIG, STC/BSF in theisak hi.

Workshop on Right to Food Act
Lamka, Oct-27: ICDP/CCpur leh KSO/CCpur saina in tuni zinglam dak 7:30 in Tuibuong a KIC office ah ‘Workshop on Rigth to Food Act’ om a, Neovy Mangboi Mangte, T.Ngamkhopao Haokip leh MK Lian, Field Coordinator, ICDP te’n sinsak uhi. Huai ah Henglep, Singngat, Thanlon, Shillong, Delhi, Samulamlan leh Sangaikot Block a KSO makai te leh GSO/CCpur-te tel uhi.

ZRO in ngetna bawl
Lamka, Oct-27: Kenneth, Secretary, MI & PR/ ZRO apan thusuak kimu dan in khawpi sung ah mi khenkhat in business thanghuai leh deih huailou thil ah kigolh uh a, huaite’n mipite damtheih leng hihsia ahihman in Nov 1, 2012 akipan in sa siangthoulou bawngsa leh lawisa kihelkhawm leh sa luisa(decomposed meat) himhim a zuak omlouh ding, toy pistol/gun leh crackers kuaman zuaknawn louh ding banah zuzuakna (vendor) munte leng nitak dak 5:00 nung in kuaman honglou ding in mipi leh akisaipihte kiang ah ngen hi.

July,2012 a JSY sum kihawm ding
Lamka, Oct-27: District Hospital ah July,2012 kha sunga numei naunei( ta masapen leh 2na tan) nei a condition bikhiah omsa zuite lak ah October 29 akipan Nov 3,2012 sung in District Hospital ag JSY sum(incentive money) hawmkhiak hiding chi’n Medical Superintendent in thusuah hi.

SSPP in pahtakthu puang
Lamka, Oct 27: Khawpi a lamlian zuihdan nawngkai taka omlai DC/CCpur leh SP/CCpur panlakna ziakin Traffic Rule thak khauhtaka zat hi a, nuamtuam petmah hi a taklang in DC leh SP pan alakna Siamsinpawpi(SSPP) Gen HQ in pahtakthu puang uh a, kuapeuh in traffic rule thak zuichiat ding in ngen uhi. CDSU in Lamka ah SSC exam centre omna ding a pan alak uh lawhchin ziakin Oct 28, 2012 in Lamka adia masapen ding SSC nuaia examna om ding hi.Huai tawh kisai SSPP in CDSU te tunga kipahpihthu gen kawm in exam a telding teng lawhching chiat din deihsakthu puang uhi.

IMPHAL NEWS

National Dedication Day zat hiding
Imphal, Oct-27 : Manipur government saina in hongtungding Oct. 31, 2012(Nilaini) nitaklam dak 3:00 in 1st Manipur Rifles Banquet Hall ah Rashtriya Sankalp Diwas (National Dedication Day) zatna om ding hi. Huai ah Chief Guest in Manipur Chief Minister O. Ibobi pang ding a, Functional President in Home Minister Gainkhangam pang ding hi.

Tata leh Activa kiphu: mi 1 si
Imphal, Oct-27 : Imphal East PS huamsung a om Ngarianching mun ah tuni zinglam dak 11:30 in Tata leh Activa kiphukha uh a, huai ah mi 1 si in 1 liam hi. A kigendan in Activa bel Ngarianching lam manawh a tai hi a, alehlam apan tai Tata tawh Ngarianching mun ah kiphukha uh hi’n police ten gen uhi. Tua ah Activa a tuang Wahengbam Suresh (27) s/o Ibocha of Nongpok Sanjenbam Khudel amun ah si a, Sagolsem Kumari (27) d/o Babita of Ichal Mayai Leikai liam in JNIMS ah etkol in om hi.

‘Miss Manipur-2012’ contest om ding
Imphal-27: Kanglei Indigenous Martial Arts & Cultural Society(KIMACS) leh Universal Friendship Organisation kigawma saina in Palace compound a Bheigyachandra Open Air Threatre(BOAT) ah October 29, 2012 in ‘Miss Manipur-2012’ contest om ding chih ahi hi. Huai a tel ding nungak 30 velin zanlam zekin Palace compound ah social service nei uh chihthu kiza hi.

Police te’n Maruti car la uh
Imphal, Oct-27 : North AOC ah zan nitak in aneitu theihlouh Maruti 800 (No. MN-04P/1487) khawl a, tuni zingsang tan in leng kuamah a lakia omlou in a khawl lailai ziakin police te’n bomb om ding a muangmawh in police bomb siamte tawh check a bawlna uah bangmah mulou uhi. Tua phet in Maruti Car pen police te’n la in kem uh chihthu om hi.

Imphal News-te suaklou ding
Imphal, Oct-27 : India gamsung pumpi a Muslim-te ni poimawh ‘Id-Ud Zuha’ ziakin tuni’n Manipur govt nuaia office leh educational institution teng kikhak a, Imphal pansan Newspaper office teng leng a khawl ziakin Oct. 28, 2012 in Imphal Newspaper-te a suak omlou ding hi.

MU in exam hun ding bikhiah
Imphal,Oct-27: Manipur University in Nov 29,Dec 1,Dec 3,Dec 7,Dec 10,Dec 12,Dec 15,Dec 17 leh Dec 19, 2012 in LL.B. 1st/2nd/3rd yr Examination,2012(Nov) om ding in bikhiah a,examination form submit hun leng fine tellou in Nov 14,2012 tan hithei ding a, fine telin Nov 16,2012 tan hithei ding hi.Huailouin LL.B. 1st/3rd/5th Semester Examination,2012(Dec) leng Dec 10,11,13,14,15,17,18,19,20 & Dec 21,2012 sung om ding in bikhiah hi a,fine tellou in Nov 26,2012 tan exam form sibmit theih ding a, fine telin Nov 28, 2012 tan submit theih ding hi.

Petrol leh diesel man khang
New Delhi, Oct-27: Govt in petrol pump dealer-te ngah ding commission a punsak ziakin zan nitak akipan in petrol litre 1 ah paisa 29 in aman khang a, diesel leng litre 1 ah paise 20 in khang hi. Petroleum Ministry in zan nitak a Order a suah dungzui in dealer-te commission khansak hi a, huai dan in petrol litre 1 tunga dealer commisskon leng Rs 1.49 akipan Rs 1.78 tung tou a, diesel leng dealer commission 17.7 paise in pung a, huaiziakin 91 paise akipan Rs 1.08 tungtou hi.
Huaiziakin Delhi ah petrol litre 1 in Rs. 67.90 man lai Rs 68.19 man a, diesel leng litre 1 in Rs.46.95 man lai Rs 47.15 mantou hi. Imphal ah petrol litre 1 in Rs. 67.30 man mahleh tuni apan Rs. 67.59 man a, diesel in litre 1 a Rs. 46.85 man lai tuni apan Rs. 47.05 man hi. State tuamtuam ah Local Sales Tax leh VAT bikhiahdan tawh kizoiton in petrol leh diesel man kibanglou thei ding hi’n kigen hi.

Chairman, ADC/CCpur in Society thak ‘LBS’ hongkhia
Lamka, Oct-15: Langkhanpau Guite, Chairman, ADC/CCpur in tuni sunnung in a office chamber ah ‘Lamka Building Society (LBS)’ Society thak kibawlkhia hong hi. ADC Chairman in a genna ah CT Lian Guite in India leh UK ah MBA zilin a siamnate’ mahni mi leh sate laka a zat kipahpihthu gen hi. LBS in tenna ding inn neilou leh khawsakna haksate khualna in inn hoihtak tamkhop a bawlkhiak uh deihthu leng Chairman in gen a, makaite’n chitak, gin-om leh kuhkal taka na sem ding in hasuan hi. Society khat peuh ah sum leh pai thil a transparency nei in audit leng bawltheih dia record hoihtak neih poimawh hi’n leng Chairman,ADC in gen hi. Autonomous District Council lam in leng panpih theihna om liaite ah panpih dinga mansa hi’n gen hi.

LBS a Manager CT Lian Guite in a genna ah inn-mun khat in Rs lakhs bangzah hiam man a, nektom zongte ading in leizawhh vual ahihlouh ziakin khawsakna niam leh dinmun haksazawte tanpha in leng inn-mun a leizawh ua, tenna ding inn a neihtheihna ding uh ngaihtuahna ziakin LBS kipankhia hi’n gen hi. LBS in inn-mun a leikhiak zawh chiang in tawm bei theitawp a inn lam hiding a, a tung pehtou zelin inn 1 Rs 3-5 lakhs kikal bei a bawlkhiat sawm hi’n gen hi. LBS in mimal kuahiam inn-mun leh lougam tawh kisai loan neu chikchik adiak in ekbuk, fencing, gate leh adangdang a din leng panlak sawm hi’n gen a, Manipur adingin a hoihpen, chitakpen, mite’ muanpen leh a detdoupen ban ah society laklak aleng akhang hatpen hiding chih thiltup anei hi’n gen hi. LBS ah amasapen adinng in tulelin member 7 om uh hi’n leng CT Lian in gen hi.

HAC Chairman in album hong ding
Lamka, Oct-15: Mary Lun in asak music video album ‘Zolei Lunggel’ kichi Oct 18, 2012 (Sintawpni) zinglam dak 11:00 in Simveng a SYO Hall ah Dr Chaltonlien Amo, Chairman HAC in Chief Guest hikawm in hong ding hi. Huai hun ah Functional President in T. Khanthang, Social Worker pang ding a,Special Guest in Langkhanpau Guite, Chairman ADC/CCpur pang ding hi. Guest of Honour in Vungzagin Valte, MLA pang ding a, Chief Host in Ginsuanhau MLA pang ding hi. Lasiam Lianlunching, C Thianngai leh Ngaihlun te’n lasa ding uh a, hun khakna ah Rev Khen P Tombing in thumna neiding hi. Huai album thak Sia Pau in a sponsored hi’n kigen hi.

Bakery kumkhat chinna lawm uh
Lamka, Oct-15: ‘Hanghal Bakery’ chih a om ‘A tout le Monde for everyone’ kichi sang leh nektheih chituamtuam bawlna a neitu H. Gouzathang @ G. Hanghal tenna inn Hiangtam Lamka, Tipaimukh Road ah tuni sunnung in kum 1 chinna lopna om a, huai ah Rev V.Zamkhanthang, Pastor EBC Upp Lamka in Pathian kiangah kipahpihthu genna leh vualzawlna ngetna thumna nei hi. Huai Bakery bel Air India a sem ngei H. Gouzathang in a patkhiak hi a, vanzat hoihtak tawh kithuah in sang leh nektheih chi tuamtuam siangthou tak in bawl uhi.

Army te’n mi 2 mankhia
Lamka, Oct-15: Police apan kizadan in 46-Assam Rifles te’n Misao Lhahvom khua ah galvan zuak(weapon dealer) om chihthu zak ziakin Oct 13, 2012 zingsang dak 3:00 in Mr Henkholen Khongsai @ Liena (49) s/o (late) Chinkhokhai Khongsai of Misao Lhahvom mankhia uh a, amah apan thudotna akipan huaini mah zingsang dak 6:45 vel in Khupmang Khongsai (50) s/o Khupthang of Henglep, CCpur mankhia uhi. A/R te’n Khupmang Khongsai apan in 9mm pistol 1, magazine 1 leh atang 3 mukhia uh a, mi 2 leh galvan teng Imphal Police-te pekhia uhi. CCpur Police te'n a case lasawn in CJM court ah dingsak uh a, CJM in Oct 17, 2012 tan Police custody a omding in phalsak a, Police te’n mi 2te tung ah FIR No.111 (10) 2012 CCP-PS U/S 25 (1-C) Arms Act registered uhi.

Khawpi sung Traffic regulation
Lamka, Oct-15: L.Mangkhogin, IPS, SP/CCpur makaihna intuni zinglam in meeting om a, huai ah Oct 17, 2012 apan khawpi sung a traffic regulation thak zatdan ding tawh kisai genkhawm uhi. Huai ah Dist Transports Officer, SDPO/CCpur, OC/CCpur PS leh OC Traffic Police-te tel uhi.

Activa gari kigu mang
Lamka, Oct-15: N.Ibomcha Singh s/o N.Membor Singh of Chiengkonpang in Oct 13, 2012 nitaklam dak 3:00 velin Khuga Dam a ngakuai khai a a omlai in a zatlai Honda Activa angou (white) MN 02A-3709 gutate’n gumang uhi. Gari neitu in Police-te kiang ah report bawl a, Police FIR No. 112)10) 2012 CCP-PS U/S 379 IPC registered uhi. Tulai in khawpi sung leh asehvel ah gari nei (2-wheeler) mang zeuhzeuh a, kuapeuh pilvan poimawh hi’n kigen hi.

Mid-day meal kihawm ding
Lamka, Oct-15: ZEO/CCpur leh Dist Council nuai a Mid-day Meal ngah schoolte ading in Oct 16-18, 2012 sung CCpur H/S ah July, Aug leh Sept. 2012 quota ni 50 ading kihawm ding hi. Oct 16, 2012 in CCpur block , Tipaimukh block leh Henglep block a hawmkhe ding uh a, Oct 17, 2012 in Singngat block, Henglep block leh Thanlon block a hawm ding uhi. Oct 18, 2012 in Samulamlan block leh Henglep block-te ading hawmkhiak hiding hi.

Van leh meh zuakte’n cross theilou ding
Lamka, Oct-15: Lamka khawpi ah Oct 17, 2012 apan traffic regulation thak zat ahih hun ah Tedim Road, Red Cross Road leh Thangzam Road a vanzuak/mehzuak (roadside vendors/vegetable vendors) leh shopkeeper teng in footpath sukha (encroach/crooed) thei nawnlou ding uh a, huai bawhsiate a permit uh cancelled hiding chi’n S.Khaikhopau Ngaihte, Branch Officer, DC/CCpur office in theisak hi.

JNV application form laktheih
Lamka, Oct-15: JNV, Tuinom ah academic session 2013 akipan Class VI simding lakna ding in tunung in Entrance Test om ding a, huai a telnuamte adingin ZEO/CCpur office ah Oct 31, 2012 tan application form laktheih ding chihthu om hi.

SUUNNA
Francis Aikhanthang Tungdim(35) s/o T. Semkholun of Nehru Marg tuni zingsang dak 2.00 velin naktheilou a buaisia in si a, tuni mah in kivui hi.
S.Thiangin (30) s/o Donzapau of Dorcas Veng, New Lamka zan nitaklam in cancer in si a, tuni’n kivui hi.
Kapliansiam (26) s/o Khanniang of Vengnuam, New Lamka zan nitak dak 7:30 velin sungna in si a, tuni’n kivui hi.

IMPHAL NEWS
General Strike in hindan nawngkai sak
Imphal, Oct-15: Manipur phaijang helpawl tuamtuam kigawm CorCom te’n Indian Union ah Manipur alut deihlouh latsakna in dakkal 18 sung General Strike puang uh a, huai in tuni’n hindan nawngkai sak mahmah hi. General Strike ziakin Imphal ah private gari tai tamlou a, Inter-State Bus-te leh Inter-district passenger buses-te leng a tailouh ban uah institution leh dawr teng leng kikhak hi. Buaina om khak din venna in Imphal khawpi sung mun tuamtuam ah security khauh mahmah a, buaina leh thiltung gen ding thupilua bangmah theih lrh zsk omlou hi. Imphal ah general strike khauh mahleh hill district-te ah nawngkaina thupi omlou hi’n kigen hi.(UNA Agency)

IED bomb puak ah JCO 1 liam Imphal, Oct-15: Mayang Imphal Police station in a huamkhak Arong Nongmaikhong mun a Iron bridge gei ah tuni sunning dak 12:30 velin 33-Assam Rifle-te patrolling pailai takin IED bomb puakzak a, huai ah Army a JCO khat liam hi. Huai a liam Negi Bora(52) JCO no. JC3300132P of Almora, Assam hi a, akhe leh a nung lak liam a, Leimakhong Army hospital ah etkol hi’n kigen hi. Thiltung tawh kisai CorCom te’n Black Day leh General Strike a puanni uh ahihman in amau amau khutnung hiding a gintakthu police te’n gen uhi.
(UNA Agency)

Minister-lui Allaudin damlou in si
Imphal, Oct-15:Rural Dev & Panchayarti Raj leh MOBC Minister-lui Md. Allaudin Khan(54) of Kyamgei Muslim Awang Leikai hun bangtanhiam paisa apan Laxmi Nagar,New Delhi a Dharamsala Cancer Hospital a etkol a om hoihthei tuanlou in tuni nitaklam dak 5.00 velin si hi. Aluang Oct 16, 2012 in Lenna(flight) in Imphal Airport hong tun ding hi’n kigen hi.

Md Allauddin sihthu zak phet in Parliamentary Secretary Amin Shah in a office chamber ah suunna(condolence service) nei a,Press-te kiang a genna ah Md. Allauddin Khan in mipite khualna in na tamtak semkhia hi’n gen a, adiakin Manipur a Muslim mite adingin masawnna ding leh khantouhna ding na semtak semkhia hi’n gen hi. Amah kum 2002 a Assembly election ah Congress ticket a ching in Minister(RD & PR/MOBC) len a, kum 2007 a Assembly election ah Congress ticket maha chingnawn in Minister(RD & PR,MOBC leh Science & Technology) len hi. Himahleh tukum bula election ah lawhsam hi. Md Allauddin Khan in azi Sufura Begum tawh tapa 4 leh tanu 2 nei hi. (UNA Agency)

Blockade ni 3 hungaih lai ding
Imphal, Oct-14: Joint Committee of Hill District Students Organization (JCHDSO) pawlin singtanggam a District HQ teng ah TET Exam centre koih dingin phutna in tuni zankim akipan in National Highway 2te ah hunchiam omlou din Economic Blockade puang mahle uh govt hun piak lemsa in ahun ni 3 suan uh a, huai hunsung a govt in duhthusam thupukna a bawl tuan kei leh October 18, 2012 zankim akipan in hunchiam omlou ding Economic Blockade kipan ding chihthu om hi.

Education Minister M. Okendro leh JCHDSO leader-te zan a kimu in thil omdan genkhawm mahle uh kihoulem theilou uh chihthu om hi. Minister in a gendan in tukum akipan singtanggam ah TET exam cente patkhiak lemtanglou din gen a, hileleng kumthak 2013 akipan in singtanggam district HQ teng Exam centre hon khiak hiding in gen hi. Education Minister in a gendan in Nov 11, 2012 in TET examna om ding hi’n gen hi. (UNA Agency)

Police te’n mi thattu mankhia
Imphal, Oct-15: Chandel district sung a Pallel kiang ah apaisa Oct 1, 2012 ni a mi’ thah hiding a gintak siluang kimu Miss Katherine Lamkang (15) d/o Kh. Simon Lamkang of New Lamkang Khunthak(Chandel dist) thattu hidia gintak police te’n zan in mankhia uhi. Md Umar Alam, SDPO Pallel makaih police team in zan nitaklam dak 5.30 velin Katherine ngaihzawng pa J.D. Wangtripe Lamkang(20) s/o J.D. Sephun Lamkang of Lamkang Khunou, Chandel dist. mankhia uh a, police te’n Katherine thattu Wangtripe ahihdan theichian in tuni’n Chandel CJM court ah ding sak uh a, CJM Court in Oct 22, 2012 tan police custody om ding in pekhia hi’n kigen hi.

Cultural exchange programme
Imphal, Oct-15: Thadou Student Assn, Sadar Hills- te saina in Oct 13, 2012 in Sadar hills a Presidency college Jubilee hall ah North East Zone Cultural Centre, Dimapur; Department of Arts & Culture, Govt. of Manipur leh All Colleges Tribal students Organisation, Manipur-te saina in “the 1st cultural exchange programme” zat hi a, Chief Guest in Dr. Chaltonlien Amo, Chairman Hill Area Committee pang hi. Functional President in Haokholal Hangshing, Chairman/ADC Sadar Hills pang a, Guest of Honour in Director, Arts & Culture, Govt. of Manipur pang hi. Chief Guest in a thugenna ah student-te tunung a maikaitu ding ahih dungzui un nam kalah lemna leh muanna omna dia panla ding ahihdan uh gen hi. Huai school leh college tuamtuam apan student tamtak, Sadar hills ADC member-te, hausa hunkhop leh Motbung mipite’n uap uhi.