Behiang khua ading solar hawmkhia
Lamka, Oct-12: Singngat sub-divn sung Behiang khua ading solar home light 40 banah solar street light 7 leh a khuam (post) kithuah tuni’n DC office a Store room apan Behiang hausa Jubilee Mawi leh khawmi bangzah hiam kiang ah piakkhiak hi a, DC/CCpur, Addl DC/CCpur leh SDO/Singngat te’n beneficiary-te lakah solar light hawmkhia uhi. DC/CCpur tuni a solar light kihawmte BADP 2011-2012 tungtawn a hawmkhiak hi'n gen a, Singngat sub-divn a Model town ding in Behiang leh Thanlon sub-divn ah Mualnuam khua telkhiat hi'n gen hi. Solar light ngah innkuan 40te’n a phatuam theipen a zang ding leh khawkim leh khawkiangte etton theihdia zang din leng theisak hi. Solar light teng Oct 13, 2012 in SDO/CCpur leh staff te’n Behiang pawtung ding uh a, Thanlon sub divn sung a Mualnuam khua ading solar home light 40 leh street light 7 ban ah akhuam (post) apaisa June 7, 2012 in DC office apan hawmkhiat hita hi.

Activa leh Vespa kiphutuah
Lamka, Oct-12: Tuni nitaklam dak 6:40 velin Tipaimukh Road-IB Road junction (CCpur College kong) ah Activa (No. MN- 02A-5123) a tuang K. Pauthianlal (30) s/o (late) Dongkhoson of Lower Chapellane leh Vespa Scooter (No. MN- 02/7383) a tuang Laldinthar (45) s/o C. Kapliana of Rengkai Edenthar kiphutuah uh a, Dist Hospital puaktung ahihnung un Laldinthar pen RIMS a etkol dingin refered in om hi. Vespa ah Laldinthar leh a nung ah azi leh tanu (kum 2) tuang ua, Tipaimukh road apan IB Road zuan a Dist Hospital a anaute damlou veh kuan uh hi’n kigen a, Pauthianlal ahihleh Tipaimukh Road a taisuk hi’n kigen hi. Laldinthar in anung a apuak azi leh atanu alu leh khuk lak liamtuak uh a, adang bangmah chilou uhi. Laldinthar a mittung leh lulak liam a, a ngawng guh mun khat atan ziakin RIMS a etkawl di’n doctor in refer uh hi’n kigen hi. Pauthianlal alu lak liam a, dist hospital ah admit in om hi. Gari 2 te naksiat mahmah a, Vespa mailam pei(tyre) lengkhia a, Activa maiteng leng ton gai hi. Gari te Police te’n la in PS ah kem uh chihthu kiza hi.

Sahang in gamlak ah Siaktinsing keilum
Lamka, Oct-12: Henglep Sub-division sung Lungchuang khua ah Oct. 6, 2012 in gamvak dinga kuan Siaktinsing(51) h/o Kimneihat of Lungchuang gamlak ah sahang hidia gintak gamsa lauhuai khat in sual in naktaka khoihliam nungin kol (gorge/cliff) ah khesuk hi’n kigen hi. Thu kizadan in Oct. 6, 2012(Kiginni) zinglam dak 9.00 velin gamlak ah Siaktinsing in naang(seng bawlna ding) lak sawm in thau tawh kuankhia a, himahleh inn apan gamla sim, gamlak a tun in gamsa lauhuai tuak hidan in a gal a meihol halte’n gen uh a, Siaktinsing ngaihtaka kikou ahihdan za chiaichiai uh hi’n gen uhi. Gamlak a meihol halte’n innlam kintakin delh uh a, khawsung a tangval leh papite’n huai lak zong mahle uh mu zou pahlou in, mualtung lak a et nung un huai mun apan kesuk ahihdan thei ua, feet 50 vela sang munkhat ah nasataka liam leh sisa in muhkhia uh a, azing Pathianni in vui uhi.
Mit a mukhate gendan in Siaktinsing in sahang kisualpih hidin gintak hi a, sahang in mun gamla tak a tuahtou in huai ah kawltung apan lawnkhia hidin gen uhi. Huai thiltung ziakin Mualdak, D. Khozim leh V. Munlai khaw mipi te’n a tuahsiatna munte zong uh a, seppatni in siluang omna akipan mun gamla takah Siaktinsing vanzat te mukhia uh hi’n kigen hi.

RTE Awareness tawh kisai meeting
Lamka, Oct-12: DC/CCpur makaihna in tuni in DC office a BRGF Resource Centre ah RTE Awareness Campaign tawh kisai joint meeting om hi. Huai ah students organsation tuamtuam a makaite, ZEO/CCpur leh DYC, NYK/CCpur tel uh a, RTE Awareness Campaign adin tanvou kihawm uhi. Huai dungzui in Tipaimukh block ah HSA te’n monitor ding uh a, Thanlon & Singngat block ah ZSF te’n monitor ding uhi. Henglep & Samulamlan block ah KSO te’n monitor ding uh a, CCpur block ah CDSU te’n monitor ding uh hi’n thusuak kingah hi.

Bomb paihkhum 1 kimatbeh
Lamka, Oct-12: Lower Chapellane a om C Hangshing, Addl DC/CCpur & Project Director/DRDA tenna inn ah Aug 25, 2012 nitak dak 7:30 vela hand grenade paihkhum mi 2 zan in Police te’n a matkhiak nung un tuni zingsang in midang khat mankhe nawn uh hi’nPolice apan kiza hi. Matkhiak a om Lunkhongam @ Ngangam (28) s/o (late) Ngakholun of Ukha Tampak hi a, Police in mi 3te tuni’n CJM court ah dingsak uh a, CJM in Oct 17, 2012 tan Police custody a om ding in phalsak a, Police te’n mi 3te tung ah FIR No. 86( 8) 2012 CCP-PS U/S 400/307/326/34 IPC & 3 of Explosive Substances Act registered uhi.

DC in inspection bawlnawn
Lamka, Oct-12: Ms Jacintha Lazarus, IAS, DC/CCpur in zanhal in CCpur Govt H/S inspection bawl a, tuni’n leng huai school mah inspection bawlnawn hi. Thusuak kingah dan in CCpur H/S staff-te’ attendence hoihlouh ziak in DC lungkim hetlou hi’n kigen hi. ZEO/CCpur in a gendan in CCpur H/S a Headmistress in ZEO apan leave lalou in zinkhia a, hongtun hun in explanation bawl hidin kigen a, huai zawh in DC’ ngaihdan hidin gen hi. Headmistress bel a pasal’ upa tapa a sih ziakin zinkhe phut hi’n kigen hi.

“Eye Testing for All’ kipan
Lamka, Oct-12: District Blindness Control Society saina in tuni apan Oct 19, 2012 tan daihding ing "Eye Testing for All" chih kipan a, tuni’n Bungmual a L.Foundation School, Hermon English School leh BYC office ah om hi. Huai ah nupi-papi kia leng mitlam buaina nei mi 200 val in mit test sak uh a, Bungmual khua apan mit test teng 500 val hi’n kigen hi. Oct 13,2012 in Pearsonmun a Thangkhai Govt H/S leh Pearsonmun Community Hall ah om ding hi.

Seminar on Environmental issue
Lamka, Oct-12: EAC saptuam a Relief & Dev deptt leh Indira Gandhi National Tribal University,Regional campus-Manipur,Imphal pangkhawm in tuni apan Rengkai-Nehru Marg a ECT Chapel ah ‘Environmental Issues in North East India’ chih thupi zangin Seminar om a, Oct 13, 2012 tan sunzom ding hi.Tuni’n Resource person in Rev Dr Lalhmuoklien,Dr Lal Dena leh Mumai Pheiga in sinsak uh a, Oct 13 in Dr Immanuel L. Varte, Dr Benjamin Gangmei, Pranab R leh Choudhury in sinsak ding uhi.

ZYA CEC meeting om
Lamka, Oct-12: ZYA Gen HQ a Central Executive Committee pawl in tuni’n Zomi Council office ah meeting uh a, huai ah ZYA Rengkai (Bethlehem, Bible Hill leh Zion Veng) Oct 18, 2012 nitak program hun a laklut ding, Panglian khua ah Tunkhopum Block honna leh Khuado Pawi kithuah Oct 29, 2012 a om din thupuk uhi. ZYA tour report ngaih khiatna hun ah Singngat apan Leijangphai kikal a ZYA Unit & block omteng kiang ah ZYA Gen HQ constitution thak hawm in receipt leng hawmkhia uh a, unit fund kumteng in innlusi ah Rs 50 dawn zel ding, ZYA membership fee kum 18-50 kikal mi 1 ah Rs 10 zel term 1 sung a dawn ding, Sinzawl & Thanlon Unit leng block a koih ding banah Tuivel ZYA area leng Tuivel ZYA block a koih ding in proposal om hi’n kigen hi.

SSPP Puanlap Ni zatsawm
Lamka, Oct-12: Siamsinpawlpi Gen HQ makaite’n Oct 13, 2012 zinglam dak 10.00 akipan in Bungmual a SSPP complex ah ‘re-affirming 65-years old commitment to nurture the Siamsinpawlpi’ spirit –Learn, Labour and Service ; chih thupi a nei in Siamsinpawlpi Flag Day zatsawm uh a, huai ah President, SSPP Gen HQ in thugenna a neihkhit in Pastor Dr Thangminlun Mangte in thugenna saulou leh thumna hun zang ding hi.

KSU in mawhpaihthu puang
Lamka, Oct-12:Komrem Students’ Union/CCpur district in Oct 1,2012 in 28-Assam Rifles a Havilder M. Hmunerthang Kom (44) s/o (late) Rengba Kom of Khoirentak Khuman village a motorcycle(No. MN-01B/2750) a tailai Thinungei ah Winger gari(No. MN-02A/3603 tawh kiphukha mahle uh Winger te’n tutan limsaklou a om ziakun lungkimlouh thu puang uh a, Hav Kom gim mahmah in Shija Hospital a om hi’n leng taklang uhi. Winger neitu in kintaka panla dingin theisak uh a, huchi ahihkei leh KSU in kul leh poimawh a sak bangbang in nasem ding uh a, winger neitu in mawhpaw ding chi’n puang uhi.

SUUNNA
Chiinkhanniang (61) w/o (late) Donggin of Pearsonmun vengsak, tumalam a khawlai pawtlai gari phutkhak ziaka Shija hospital a etkol hoih taktak thei nawnlou in zanlam deuh apan inn a etkol hi a, tuni zingsang dak 3.15 velin si a, tuni mah in Pearsonmun Hanmual ah kivui hi.
Sianzaching (80) m/o Langzatun of Kanan veng, New Lamka tuni nitaklam dak 4.30 velin teknat in si a, Oct 13, 2012 in YPA Hanmual New Lamka ah kivui ding hi.

IMPHAL NEWS
Governor kiang ah Memorandum pia
Imphal, Oct-12: BJP Manipur Pradesh a Mahila Morcha pawLPG(Cooking gas) man pung thithe control ding leh LPG cylinder kum 1 sung a 12 tan ngah theihna ding a phu in tuni’n Keishampat Junction ah sit in protest tu uhi. National BJP Mahila Morcha a Vice President A. Sharda in a gendan in LPG mankhang dalna ding leh LPG cylinder quato tawh kisai in Manipur Governor kiang ah memorandum piaka om hi’n taklang hi. Huai memorandum ah BJP in UPA government policy kalhna in India gam pumpi ah kiphinna pat ding in kisakholh hi’n leng taklang uhi. (UNA Agency)

Imphal east dist ah 144 Cr PC
Imphal, Oct-12: Jiribam sub-divn telin Imphal East district pumpi ah Oct 8, 2012 zingsang dak 6.00 akipan in 144 Cr PC koih hi a, Nov 7, 2012 zingsang tan koih hiding chihthu om hi.District Magistrate/Imphal East in thusuah a bawl dungzui in Imphal East district sung ah dankalh a buaina bawlsawm a om banah mihing hinna adia lauhuai leh thilsia bawlsawm a om ziakun 144 Cr PC puan ngai hi’n gen hi. 144 Cr PC koih ahihsung un pawlam mun khat ah mi 5 leh 5 sanga tamzaw omkhawm phal hilou a, Police duty leh security chihlouh kuamah hiamhei leh galvan tawikhia a om phal hilou chi’n thusuak om hi.

11-KV Feeder 5 ah mei pailou ding
Imphal, Oct-12: Electricity deptt thusuak dungzui in Imphal East district a Khuman Lampak a om 33/11-KV Sub-station apan electric meivak ngah 11-KV outgoing feeder tuamtuam 5 in electric meivak a piakna munte ah October 13, 2012 zingsang dak 6.00 akipan in Oct 14, 2012 zingsang dak 6.00 tan Indoor 11 KV Control leh Relay panel bawlthak a ngaih ziakin elecvtric meivak pailou ding chihthu om hi.
11 KV outgoing feeder-te ahihleh 11-KV Sports feeder, 11-KV Sainik School feeder, 11-KV STPI feeder, 11-KV TV feeder leh 11-KV Mantripukhri hi uhi.

Khamtheih zuak 1 leh UG cadre 2 man
Imphal, Oct-12: SP/Imphal West in tuni’n thusuah a bawlna ah Imphal west police commando te’n khamtheih zuak mi 1 leh helpawl cadre 2 mankhia uh hi’n taklang hi. Imphal West Narcotic cell te’n khamtheih zuak a kipei S Chinglensana Singh (29) s/o Kulla Singh of Andro Kharam Leikai, Imphal east district man uh a, amah apan Heroion No. 4(25 gram) mukhia uhi.
Police thusuak in ataklat sawnna ah Oct 10, 2012 a Keishampat a CCpur parking leh Sekmai bazar ah search operation neihna ah KCP-MC cadre K. Icha @ Ibemcha Devi (37) d/o (late) K. Hera of Moirang Pansang Lamkhai leh PLA a Sgt. Major Th Ahanjao @ Tomba @ Thambou (36) s/o Th. Theba Singh of Irengbam Awang Leikai, Bishnupur man khia uhi. (UNA Agency)

Lokchao lei (bridge) zuih theihlouh ding
Imphal, Oct-12: National Highway No. 39(Imphal-Moreh road) a Lokchao lei bawlhoih a poimawh ziakin Oct 14, 2012 nitaklam dak 4.00 akipan azing nawn zingsang dak 8.00 tan Gari leh mihing in zui theilou ding a, huai lei bawlhoih ahih masiah nitaklam dak 4.00 leh azing nawn dak 8.00 tan kikhak gige ding chi’n Manipur govt a PWD National Highway Divn No. 2 Executive Engineer in thupuan bawl hi.