C.Hangshing’ inn a bomb paihkhum mi 2 mankhia
Lamka, Oct-11: Lower Chapellane a Chinkhokam @ C Hangshing MCS, Addl DC/CCpur & Project Director/DRDA tenna inn ah Aug 25, 2012 nitak dak 7:30 velin pawlam apan hand grenade kipailut puakzak ziakin C. Hangshing’ naupa H.Nengkhanpau (50) leh a nau donlai C.Hangshing’ tunu baby Thiankim (1yr 3 months) liam uh a, Police te’n thil omdan suizui zelin tuni sunnung dak 2:00 vel in hand grenade paihkhum hidia a suikhiak uh mi 2 mankhia uhi.

Mastkhiak a om mi 3 te amin uh Thanghao Haokip (37) s/o (late) Thangmang of Soungphal village, tulel a Laijon Veng,Tuibuong a om leh Lunminthang Kipgen (32) s/o (late) of Ngampao of T. Champhai hi uhi. Police apan mi 2te kipuanna thu kizadan in KNLF makaite'n Rs.10,000 leh Diesel-auto piak dia a chiam ziakun C.Hangshing’ tenna inn huangsung ah bomb paihkhum uh hi’n gen uh a, KNLF te’n huaiziakin Rs 10,000 pekhin uh a, hileleng Diesel Auto bel pe nailou uh hi’n gen uh ahihdan Police thusuak kingah hi. Police te’n mi 2te tung ah FIR No. 86( 8) 2012 CCP-PS U/S 400/307/326/34 IPC & 3 of Explosive Substances Act registered uh a, Oct 12, 2012 in Imphal a JCM court ah ding sak(produce) ding uh chihthu leng kiza hi.

MLA in kipahpihna ankuang umpih
Lamka, Oct-11: Ginsuanhau, MLA (Singngat A/C ) in Thanlon A/C apan MLA ching Vungzagin Valte in State Minister tawh dinmun(rank & status) kikim Parliamentary Secretary a ngah kipahpihna in Ginsuanhau,MLA(Singngat A/C) in zan in Lamphelpat a Vungzagin Valte’ ah programme zatpih hi. Huai ah TN Haokip,MLA & ex-Minister; Mangi Babu, MLA; Tongkai Baite, MDC; P.Sianzadong, MDC leh Manglianthang, President UZO Gen HQ leng tel uh a, nitaklam in ankuang umkhawm uh a, Ginsuanhau in huai dingin vok tuk 5 alian leh ngasa kg 30 lei chihthu kiza hi.

MDC te adi’n Sensitization om
Lamka, Oct-11: Dist Water & Sanitation Mission/ CCpur dist saina in tuni zinglam dak 10:30 in Tuibuong a Dist Training Centre ah MDC-te’ ading in ‘1-Day Sensitization on Nirmal Bharat Abhiyan (NBA) and Operation & Mainatenance(O & M) of NRDWP Sheme’ tungtang sinsakna zang uhi. Huai ah Chairman, ADC/CCpur telin MDC-te leh PHED official hunkhop tel uhi. Technical session ah L.Swamikanta Singh, Director, CCDU/Manipur; L.Ibomcha Singh, SE/R-I PHED/Manipur leh Ph Yaima Singh, SE, Planning & Monitoring PHED te'n thupi tuamtuam pansan in sinsak uhi.

BSF te’n thaukap hun ding behlap
Lamka, Oct-11: STC BSF CCpur a training te’n October 0l-15, 2012 sung zingsang dak 5.00 akipan in nitak zansawt tanpha Mission compound suahlam, Pearsonmun,Mualkoi leh Gangpimual apan simtum(south-west) lam a firing range ah long/short/grenade leh 51-mm mortar a kap(firing ) uh a, ahun behlap in Oct 15,2011 akipan Oct 31, 2012 tan hiding in ahun behlap uhi. Huai hunsung in a kimnai a khua omte apan mihing kuamah huai area a lutlou ding leh ganvulh leng huaimun a lut dia kuama’n khahzanlou ding in DIG, STC/BSF in theisak hi.

RTE Awareness tawh kisai meeting
Lamka, Oct-11: Ms Jacintha Lazarus, IAS DC/CCpur makaihna in Oct 12, 2012 sunnung dak 2:00 in DC office a BRGF Resource Centre ah RTE Awareness Campaign tawh kisai joint meeting om ding hi. Huai hun ah students organsation tuamtuam a makaite, ZEO/CCpur leh DYC,NYK/CCpur tel ding uh a, RTE volunteer list submit kimloute’n huai hun a submit ding in DC/CCpur in theisak hi.

Gospel Music Vedio honna
Lamka, Oct-11: ‘Sapna Aw’ kichi Gospel Music Video Album thak Oct 13,2012 zinglam dak 10.30 in Chiengkawnpang Community Hall ah om ding a, Siempee Gangte,NPS/SP(red) khuallian a pang in Gospel Music Vedio Album thak hong ding hi. Huai ah Guest of Honour in Royal Academy neitu B. Kamkhanthang Ngaihte pang ding a, Functional President in HD Gangte,MSF, DFO/CCpur pang ding hi.

ZYA CEC meeting om ding
Lamka, Oct-11: Zomi Youth Assn (ZYA) Gen HQ a Central Executive Committee pawl in Oct 12, 2012 sun nung dak 2:00 in Nehru Marg a Zomi Council office ah meeting nei ding uhi. Huai ah ZYA Rengkai (Bethlehem, Bible Hill leh Zion Veng) laklutna ding thu, Grace Zamnu, MDC in Khuado Pawi leh ZYA Block honsak ding a ngetna tawh kisai a detail programme bawl ding tungtang a genkhawm ding ban uah leh ZYA tour report ngaikhe ding uh hi’n kigen hi.

13th World Sight Day zang uh
Lamka, Oct-11: District Blindness Control Society/CCpur saina in tuni in CCpur Govt College ah ‘Eye testing for all’ chih thupi anei in 13th World Sight Day 2012 zang uh a S.Kamsuanlun, EM, ADC khuallian in pang hi. Huai ah Functional President in Dr H.L Liensang, CMO/CCpur leh Guest of Honour in Ricky L.Guite, Principal CCpur Govt College pang uhi. Dr VC Pau, Distt Prog Manager/Dist Blindness Control Society in report tomkim pia a, Bethesda School of Nursing leh Female Health Worker Training School a student tamtak tel uhi. Khawvel pumpi ah 90 % velin mitlam buaina nei uh a, huai lakah 80 % a huntaka etkol ahihnak leh hihdamtheih hi’n Chief Guest in gen hi. Mitlam buaina ziaka khua mulou tamtak om a, huaite dinmun pumpelh theihna dingin ‘eye testing’ poimawh hi’n gen hi.

Voluntary blood donation
Lamka, Oct-11: State Blood Transfusion Council/ Manipur leh Blood Bank/ Dist Hospital saina in tuni in Synod Hall ah ‘Somewhere someone needs you, your blood donation is precious’ chih thupi zang in ‘1-day voluntary blood notation campaign’ om hi. Huai ah Dr LR Kom, Director/ SBTC leh AK Dibshwar Singh, Consultant, VBD/MACS in sisan thawh(donate) poimawhdan, midangte adia sisan piakkhiat lauhuailou ahihdan leh sisan in midangte hinna humbit ahihdan sinsak uhi.

Inteview hun ding kisuan
Lamka, Oct-11: Dist Health Society/ CCpur nuai a semding Block HMIS Asst post 2, Block Finance Manager post 1, Block Data Manager post 1 leh AYUSH Pharmacist post 5 lakna ding Oct 13, 2012 zinglam dak 10:00 apan DC office a BRGF Resource Centre ah in ‘Walk in interview’ om ding chih himahleh buaina khenkhat ziak in Oct 17, 2012 a dingin ahun kisuan chi’n Dr HL Liensang, CMO/Dist Mission Director, DHS/NRHM apan thutut kingah hi.

IMPHAL NEWS
Para-military company 100 ngen
Imphal, Oct-11: Union Home Ministry in Manipur a Law & Order dinmun siatlam nawt hi a theihziakin kintaka panla ding in state govt theisak a, huai dungzui in tu kha bulin Chief Minister O. Ibobi makaihna in Combined HQ meeting om hi. Huai ah Manipur a helpawlte gamtatna dalna ding leh law & order dinmun in hoihlam a nawt theihna ding in Central Para-military Force company 100 vel hong sawl behlap din Union Home Ministry nget ding thukim uhi. Huai meeting ah Home Minister Gaikhangam, Manipur DGP Y. Joykumar, Principal Secy(Home) Dr J. Suresh Babu, GOC 57-Mountain Divn, IG/AR (South) leh GOC 3-Corps apan palaite tel uh a, Manipur a om BSF leh CRPF a DIG-te leng tel uhi.

NAB te’n SP tang tamtak mukhia
Imphal, Oct-11: Narcotics and Affairs of Border (NAB) te’n zan in Imphal airport ah SP (Spasmo Proxyvon) tang tamtak leh a pawtu mankhia uhi. NAB teamte’n thuguk a zak sawn ua pan zan zinglam dak 11.50 velin Imphal Airport ah Delhi a hong kipan Air India flight passenger -te lak ah ginlelhhuai sak ziakin check bawldia a khawlsak uh pasal 1 apan bag 2 dim a kikoih SP tang 60,000 mukhia uh a, huaite Rs. 3.5 lakhs vel man hi’n police thusuak in gen hi.

Mat a om MK Raj(21) s/o MK. Islauddin of Lilong Haoreibi Samukhong Mamei Leikai, Thoubal district hi a, aman sumpung amuh theihna ding in Dipawali, Durga Puja leh Ningol-Chakouba festival hunte a zuak dingin New Delhi a Pharmacy tuamtuam apan alei hi’n gen hi. NAB Inspector RK Bikramjit Singh in khamtheih pua a kipei omlou di’n mipite kiang ah ngen a, khamtheih doudal theihna dingin mipite’n kithuahpih ding in ngen hi. (UNA Agency)

JAC te’n dakkal 24 bandh ding
Imphal, Oct-11: A. Rajen Singh of Terakhong(Bishnupur district) sihdan lungkim huailou sak ziaka kibawlkhia JAC pawlin Oct 5, 2012 in Chief Minister O.Ibobi leh Home Minister Gaikhangam kiang ah memorandum pia in ni 5 sung hun pe mahle uh govt. in tuni tan in leng panlalou chi a lungkimlou in Oct 17, 2012 zingsang dak 5 apan Oct 18,2012 zingsang dak 5 tan dakkal 24 sung Manipur pumpi ah General Strikeom dingin puang uhi. Huai strike sung in academic institution, religious tawh kisai leh essential service- te khahkol hidingin puang uh a, mipi te’n kithuahpih di’n ngen uhi.

Hepatitis a damloute panpih sawm
Imphal, Oct-11:Manipur ah tulelin Hepatitis natna vei 313 vel om a, Directorate of Health Services in BPL card nei damloute Manipur State Illness Assistance Fund(MSIAF) zanga panpihna a piak bangin tukum akipan in Hepatitis ‘B’ leh Hepatitis ‘C’ vei damloute panpihna piak hiding chi’n Director of Health Services,Manipur in gen chihthu om hi.

Manipur State Illness Assistance Fund(MSIAF) akipan 1st phase dan in BPL card nei cancer a damlou, kidney transplant leh neurological operation kibawlte panpihna piak hi a, 2nd phase adingin Hepatitis ‘B’ leh ‘C’ natna vei a damlou Hospital a etkol a om BPL card neite panpihna piak hiding chi’n kigen hi. Akigendan in kum 2007 akipan tukum 2012 tan in Manipur ah Hepatitis ‘B’ a damlou 233 om a, Hepatitis ‘C’ vei 80 om hi’n kigen hi.

The 17th ASI annual conference
Imphal, Oct-11: Association of Surgeons of India(ASI) te’ inntekna in Oct, 13-14, 20012 sung in RIMS Jubilee hall ah ‘the 17th Annual Conference of the Association of Surgeons of India, Manipur State chapter’ om ding hi. Oct 13, 2012 nitaklam dak 3 in inaugural function om ding a, Chief Guest in Rishang Keishing, MP(Rajya Sabha) pang ding hi. Huai ah Functional President in Prof. H. Manihar Singh, President ASI pang ding a, Guests of Honour Prof. NG Bijoy, MLA (ASI Manipur state chapter founder president), Prof. S. Sekharjit, Director RIMS leh Dr. MG. Nariani, President ASI President pang ding uhi.

Border Areas ah Mobile Health
Services dinmun puahhoih hiding
Imphal, Oct-11: Gamdang(Myanmar) tawh gamgi kikop a omkha Manipur state sunga om Chandel, Ukhrul leh CCpur district a mun haksa leh kilkoi munte(interior parts) a om mipite’n govt akipan mobile health care tawh kisai hamphatna phattuamna tamzaw a ngah theihna ding un Manipur govt in Border Areas Development Programme(BADP) tungtawn in thil tuamtuam sepkhiak sawm hi’n kigen hi. District 3 a mipite’n Mobile Health Services a ngah uh behlapna ding in Fabricated Mobile Basic Life Support(BLS) leh 4X4 Advanced Life Support(ALS) Ambulance 1 chiat piak ding a, Manipur adia Border Town khat leng hi Moreh a Community Health Centre(CHC) adin leng 4X4 Advanced Life Support(ALS) Ambulance 1 piak hiding in kigen hi.

Army te’n gul in a tuk hinna humbit (Zan a talou)
Imphal Oct-11: 9-Sector nuaia om 30-Assam Rifles te’n zan in gul(snake) in a tuk pasal kum 22 a upa hinna humbit uh chi’n IG/AR(South) office thusuak in gen hi. Amarjit Singh of Khonghampat( Imphal (West district) zan in gul in a tuk ziakin gim mahmah kawm in A/R Unit Hospital ah puaklut hi a, huai ah Medical officer in gulgu thahna damdoi(anti snake venom) in a kap pah ziakin Amarjit dinmun lauthong huailou in hoihlam nawt theipah hi’n kigen hi. A dinmun etkhiak touhlai hi a, Assam Rifles medical team in pan a lakpah ziakun a hinna humbit zawh hi a, huai thu in a theikhate kipaksak chiat hi’n kigen hi. (UNA Agency).

PREPAK cadre numei 2 mankhia (Zan a talou)
Imphal, Oct-11: Thoubal Police Commando te’n zan Usoipokpi Thongkhong area ah operation a neihna uah numei 2 apan IED leh Lethod bomb hunkhop mukhia uh ahihdan SP Thoubal in gen hi. SP in a gendan in zan sunnung dak 2:20 velin Commando te’n Usoipokpi Thongkhong area ah search operation a bawl lai un numei 2 muanmawhhuai sak ziakin verification bawl dia amat te ua pan IED 4, lethod bomb 8 leh mobile handset mukhia uhi.

Mat a om numei 2te Th. Sunibala @ Abem (27) d/o Th. Mithoi leh Haobam Naobi @ Nanao (23) d/o H. Lalji of Khongjom Langthabal Khunou Mayai Leikai hi uh a, thudotna apan PREPAK active member ahihdan uleh PREPAK te IED expert self styled Sgt Major Laphoi of Lilong leh self styled Captain Ngongocha @ Nanao of Kakwa Bengul Makhong, Imphal West nuaia sem uh ahihdan kipuang uhi. (UNA Agency)