UBI a Manager(op) in hilhchian
Lamka, Oct-10: K.Lalbiaksanga, Superintendent, Management Board, Destitute Children’s Home, Muolvaiphei in Integrated Child Protection Scheme tungtawn a sum hongpai UBI/CCpur branch a A/C No. 15266 akipan Rs. 16,01,550 kigumang chi’n Police ah complaint abawl tawh kisai in UBI/CCpur branch a Manager (Op) Sri Jotin Singh in hilhchetna bawl hi.

Jotin Singh in a gendan in July 27, 2012 in Salvation army nuai a social board meeting om a, ICPS scheme tawh kisai a genkhawmna uah govt apan fund laklouh din thupuk uh chi hi. Govt apan fund lak hileh Juvenile protection Act dungzui a nasep ngaiding ahihziakin laklouh lemsa uh a, himahleh kuatehiam in Salvation army heutute’ theihpihna tellou in sumte draw khiak sawm uh chi hi. Manager (Op) in agenbehna ah, a sumte bel UBI Imphal branch apan hong pai in Account ah bittak a kep in om a, mimal account a transfer sawm om mahleh bank in kiphallou a, firm account pen mimal account a koihlut ding chih bank paidan hilou chi hi. Destitute Children home account (a/c No 15266) ah sum hong pai a, huai A/c operator midang hi a, K Lalbiaksanga pen account operator hilou chi hi. Bangchidan a aman sum hong lakkhiak sawm hiam chih dotna bawl in district mipite adia UBI in pan naktaka alak lai a hibanga kihih minsiat sawmna pen kipom theilou chi hi.

CoPTAM in Panchayat Election tawh kisai thusuah
Lamka, Oct-10: Manipur singtanggam ah Panchayati Raj institution a kivaipuak louh ding chih hi a,himahleh state govt in singtanggam mun khenkhat ah Panchayat election a sai teitei un constitution kalh ahih banah singtanggam ahithei zahzah phaijang biala laklut tupna hizaw chi’ CoPTAM thusuak in gen hi. Hiai tawh kisai in Oct. 6 in KBC Conference Hall, Imphal ah pawl tuamtuam tamtak paikhawm in joint meeting om a, Panchayat election a telching a om singtangmi teng October, 2012 sung in a kitawp ding uh chih thupuk uhi.

Tua banah, telching a omte leh aki-candidate kha khempeuhte leng liausak hiding ua, tua tawh kiton in Saikul block sung Phouwaibi area ate Kuki Inpi Saikul in mawhpaw ding uh a, Saikul Block sung mah Nongmaiching Naga Area ahihleh United Nongmaiching Area Tribal People Orgn. In mawhpaw ding uhi. CCpur District sung Samulamlan Block sung Khodang village ate CDSU in buaipih ding in thukim uhi. Thil bangkim October,2012 sunga hihfel vek ding in bikhiah uh a, Panchayat election tawh kisai in Oct 2012 tawpkuan in tribal organization tuamtuam in joint meeting neih ding in thukim uhi.

Central official te’n mun tuamtuam enkhia
Lamka, Oct-10: Guwahati a Regional Resource Centre apan Monitoring- cum-Supervision support team a makai Dr. Joydeep, Advisor Public Health, RRC, North East makaih in mi 7 te’n CCpur district ah National Rural Health Mission (NRHM) tungtawn a nasepkhiak tuamtuam omte enkhia uhi. Amau zan in Saikot PHC enkhia uh a, tuni’n Dist Hospital enkhia uh a, huai zawh in Thingkangphai PHSC, Singngat PHC leh Sagang PHC enkhe in Imphal ah kiknawn uhi.Guwahti apan official teamte’n NRHM tungtawn a nasepte lungtun huaisa mahmah uh hi’n kigen hi.

DC in CCpur H/S inspection bawl
Lamka, Oct-10: Ms Jacintha Lazarus, IAS, DC/CCpur in tuni zinglam in CCpur Govt H/S inspection bawl a, staff-te omdan lungkimhuai salou hi’n kigen hi. Huai school a teacher 11 te’ attendance ginatlouh ziakin ZEO/CCpur kiang ah Show cause notice bawl ding leh CCpur govt H/S function dan detail report peding in ZEO/CCpur theisak hi’n thusuak kingah hi.

MDC te adi’n Sensitization
Lamka, Oct-10: Dist Water & Sanitation Mission, CCpur Dist saina in Oct 11, 2012 zinglam dak 10;30 in Tuibuong a Dist Training Centre ah MDC member te ading in "1-Day Sensitization on Nirmal Bharat Abhiyan (NBA) and Operation & Mainatenance(O & M) of NRDWP Sheme" omding hi. Huai ah L.Swamikanta Singh, Director. CCDU/Manipur; L.Ibomcha Singh, SE/R-I PHED/Manipur; Ph Yaima Singh, SE, Planning & Monitoring PHED te'n thupi tuamtuam pansan in sinsak ding uhi.

Core Committee in guta man nawn
Lamka, Oct-10: Zenhang Lamka Core Committee te’n tuni zinglam in Mangminlian Taitom (27) s/o (late) Lunkhokam of Meitei Leikai, Phailian leh Genlunthang (31) s/o Thienkhogen of Kangvai mankhia uh a, amau apan in langva pek 2 ban ah akisatsia pek 1 mukhia uhi. Core Committee pawl mahin Zenhang Lamka Cemetry ah Lalhmingliana (20) s/o Dimphara of Field Veng, Saikot leh Lalrosang (18) s/o Lalhmuklien of Field Veng Saikot mankhia uhi.Huai mi 2 te’n a lawmpa uh Lalzira tulel in Assam Regiment a panglel suty bei a kiknawn tuni a khazou in No. 4 kikap sawmlai matkhiak hi un kigen hi.

EBC Zoan biakinn hon in om
Lamka, Oct-10: Tuni sunma dak 11:30 in Bungmual, D.Phailian leh Dorcas Veng( New Lamka) tehtuah a om EBC Zoan biakinn thak Rev L. Kham Kho Lun, Gen Secy EBC in hongkhia a, Pathian kiang ah latna banah thugenna leng nei hi. Huai hun ah Upa B.Chinkhansuan, Chairman, Building Committe in biakinn tawh kisai report bawl hi.

V/A election hun ding hihsau
Lamka, Oct-10: Ms jacintha Lazarus, IAS DC/CCpur in Manipur Chief Secy order dungzui in CCpur district sung a SDO teng in recognised khua/veng om teng ah Oct 22 apan Nov 9, 2012 sung Village Authority election neiding in notice suah a, himahleh ahun hihsau in Oct 22 apan Nov 21, 2012 sung a neihding in bikhiah thak hi. Village Authority election zawh nung Nov 27, 2012 tan in election result teng submit ding in DC in SDO teng theisak hi.

‘Eye Testing for All’ omding
Lamka, Oct-10: District Blindness Control Society saina in Oct 12-19, 2012 sung mun tuamtuam ah "Eye Testing for All" chih thupi anei in kuapeuh ading in mit test-na omding a, huai hun ah mitlam buaina omte govt in mitbulh pe ding chih ahi hi. Oct 12, 2012 in Bungmual a L.Foundation School, Hermon English School leh YPA Hall/Bungmual ah omding a, Oct 13, 2012 in Thangkhai Govt H/S, Pearsonmun leh Pearsonmun Community Hall ah om ding hi. Oct 15, 2012 in LM Academy/Lingsiphai leh Vungzagen H/S Mata ah omding a, Oct 16, 2012 in St Mary H/S, Tuibuong leh Tuibuong Community Hall ah om ding hi. Oct 17 in St Pauls Hr Sec School, New Lamka leh YPA Hall, New Lamka ah om ding a, Oct 18, in Rengkai govt Hr Sec School leh Rengkai Community Hall ah om ding a, Oct 19, 2012 in Chinkham Modern H/S, Zomi Colony leh Phungkhothang Govt H/S, Hiangtam Lamka ah omding hi.

Annual Plan meeting om
Lamka, Oct-10: Ngamhao Touthang, MDC/Tuibuong in ama bialsung a Hausa/ Village Authority member teng tuni sun dak 12:00 in Bijang Community Hall ah MGNREGS 2013-2014 tawh kisai Annual Plan meeting neihpih hi. Huai ah Hausa/ Village Authority member hunkhop paikhawm uh a, houlimna leh ngaihdan genkhawnna nei uhi.

Army dia gintak te’n student khat soisa
Lamka, Oct-10:Army uniform silh mi 7 velin tunitak dak 6:30 velin Lamka College, New Lamka ah BA-II sinlel tulela Hostel a om Thangkhohao@Haopu Guite (32) s/o Sonkhopau of D. Leikot a omna hostel apan samkhia in, soisa uh chihthu om hi. Thu kizadan in uniform Gyspy ngou (white) atuang uniform silh mi 7 in Haupu a omna apan samkhia in, a maituam sak in pawkhia uh a, naktaka a soisak khit uh nitak dak 8:00 velin Damkam Bazar ah nusia uh a, huai apan phatuamngaite’n Dist Hospital pawtung uh chihthu kiza hi. Amah aliang leh a khe lak liam a, damdawi inn ah etkol in om hi.

Vaiphei Innsung Maicham
Lamka, Oct-10: Vaiphei Insung Maicham (VIM) te saina in Oct 20-21, 2012 sung Abraham Maicham, Moreh ah "Maicham mei chu a mitlo ding ahi" (Lev. 6:8-13) chih thupi a zangin a 3 veina Vaiphei Innsung Maicham thumkhawmna om ding chihthu kiza hi. Huai hun uap chiat dingin Secretary, VIM in chialna bawl hi.

Hilhchetna thusuah bawl
GL Sang, Secretary, CCpur Dist Lower Primary Teachers’ Assn-2012 in Oct 8, 2012 nitaka ZEO/CCpur office halsawmte recruited Primary Teacher-te hilou uh chi’n hilhchian a,ZEO office ah joining report leh document tuamtuam a omlai a huchibang thilhih thil hitheilou hi’n taklang a, huchibang thilhih sawmte mawhpaih kawm in tunung in kuaman trumlou ding in ngetna thusuah bawl hi.

SUUNNA
Ms Varsangmawi(52) w/o (late) Laldawngliana of SA Road zan nitak dak 10 velin awmna in si a, tuni nitaklam in Lamka hanmual ah kivui hi. Amah IFCD/Khuga Dam ah UDC semlel ahi hi.
V. Thangkhanson (47) s/o (late) Tualgou Valte of Elim veng, New Lamka tuni zing dak 10 velin kalna in si a, nitaklam in YPA hanmual, New Lamka ah kivui hi. Amah CMO office a Pharmacist semlel ahi hi.
Praful Bra (35) h/o Mary of Bungmual a sepna mun Dialkhai (Thanlon sub-divn ) ah mei a kihalkhak ziaka si aluang RIMS ah postmortem bawl ahihnungin tuni in Bungmual hanmual ah kivui hi.

IMPHAL NEWS
JNIMS ah lupna 50 om ding Mental Hospital bawl hiding – Health Minister
Imphal Oct- 10: State Mental Health department leh Manipur State Mental Health Authority saina in tuni’n JN Dance Academy ah ‘20th World Mental Health Day’ zatna a Chief Guest apang Phungzathang Tonsing in a genna ah state govt in lupna 50 om ding Mental Hospital bawlkhiak sawm hi’n gen hi. Huai ding in North Eastern Council(NEC) sum Rs. 8.73 crores bei nasep sawm hi a, NEC ah Detaild Project Report(DPR) tanpha thonkhit hita chi’n gen hi.Rs. 8.73 crores lak ah construction adding in Rs. 7.68 crores bikhiah hi a, vanzat poimawh tuamtuam adding in Rs. 1.5 crores bikhiah hi’n leng Minister in gen hi.
(UNA Agency)

DA dose 2 arrear pe dingin govt ngen
Imphal, Oct-10: Manipur Electricity Employees’ Union pawlin thusuah a bawlna uah state govt in employee-te’ 6th pay a piak bang un tutung in leng Puja ma in Dearness Allowance(DA) dose 2 pe dingin state govt ah ngen uhi. Huai thusuak in a gendan in Central employee-te’n market price khan tawh kituak in DA 72% ngah uh a, Manipur a employee-te’n dose 2 a ngahlouh ziakun tulelin DA 58% lel ngah uh a,14% in sam hi’n gen uhi. Manipur govt employee-te’n January 1, 2012 leh July 1,2012 a muh ding DA 7% tuak piak hile uh DA 72% tungthei ding chih hi a, huaiziakin akin lama pekhe ding in govt ah ngen uhi.

Addl DGP in International Day for Natural Disaster Reduction zatna uap .
Imphal, Oct-10: Tuni’n 1st Manipur Rifles Banquet Hall ah Department of Relief and Disaster Management, Govt of Manipur leh Royal Rider Manipur inntekna in ‘The International Day for Natural Disaster reduction’ zat hi a, LM Khaute, IPS, Addl DGP Manipur khuallian in pang hi. Aman a thugenna ah leitung mun tuamtuam ah ziinling 12 million, thunder storm 1 lakh val, tuilian(flood) 10,000 sanga tamzaw, menchim 100 tamtak banah huihpi hat leh thil mulkimhuai tamtak a om lai in Manipur in mihing bawltom hiamgamna thuak hi’n gen hi. Tuni a programme zatna ah Functional President in Dr Suhel Akhtar,IAS, Principal Secretary(Relief and Disaster Management) pang a, Guest of Honour in Ksh Janma, retd Addl SP pang hi. Chief Guest leh Functional President in spot painting competition leh essay writing competition a topper-te lakah kipahman pekhia uhi. (UNA Agency)

Medical exam report submit ngai
Imphal, Oct-10: MPSCC saina in Manipur Civil Service examna a MCS, MPS, MFS, SDC, MFF leh EO semdia mi 138 telkhiakte laka mi 129 in offer form submit ta uh a, a submit lou mi 9te sikin DP & AR te’n waiting list a mi 9 te min pelut di’n theihsakna bawl uh a, huai waiting list ah ST mi 3 tel uhi. Offer form submit khin mi 129 te’n Director, Family Welfare , Manipur ah Medical Examination Report submit dia theihsak hi uh a, Oct 11, 2012 zingkal dak 11 a Deputy Director, Family Welfare, Manipur kimuhpih di’n ltheihsak hi uhi.

Army te’n guk in a tuk hinna humbit
Imphal Oct-10: 9-Sector nuaia om 30-Assam Rifles te’n tuni’n gul(snake) in a tuk pasal kum 22 a upa hinna humbit uh chi’n IG/AR(South) office thusuak in gen hi.
Amarjit Singh of Khonghampat( Imphal (West district) tuni’n gul in a tuk ziakin gim mahmah kawm in A/R Unit Hospital a puaklut hi a, huai ah Medical officer in gulgu thahna damdoi(anti snake venom) in a kappah ziakin Amarjit dinmun lauthong huailou in hoihlam nawt theipah hi’n kigen hi. A dinmun etkhiak touhlai hi a, Assam Rifles medical team in pan alakpah ziakun a hinna humbit zawh hi a, huai in a theikhate kipaksak chiat hi’n kigen hi.
(UNA Agency).

PREPAK cadre numei 2 mankhia
Imphal, Oct-10: Thoubal Police Commando te’n tuni’n Usoipokpi Thongkhong area ah operation a neihna uah numei 2 apan IED leh Lethod bomb hunkhop mukhia uh ahihdan SP Thoubal in gen hi. SP in a gendan in tuni sunning dak 2:20 velin Commando te’n Usoipokpi Thongkhong area ah search operation a bawl lai un numei 2 muanmawhhuai sak ziakin verification bawl dia amat te uapan IED 4, lethod bomb 8 leh mobile handset mukhia uhi.
Mat a om numei 2te Th. Sunibala @ Abem (27) d/o Th. Mithoi leh Haobam Naobi @ Nanao (23) d/o H. Lalji of Khongjom Langthabal Khunou Mayai Leikai hi uh a, thudotna apan PREPAK active member ahihdan uleh PREPAK te IED expert self styled Sgt Major Laphoi of Lilong leh self styled Captain Ngongocha @ Nanao of Kakwa Bengul Makhong, Imphal West nuaia sem uh ahihdan kipuang uhi. (UNA Agency)

Manipur mi student numei soisak in om
Santiniketan, Oct-10: West Bengal state sung Santiniketan ah Manipur mi numei Ph D sinlai khat Professor in luppih sawmin soisa chihthu om hi. Visva Bharati a Professor in numei sualsawm chih ngawhna om ziakin University thuneituten thil omdan suizui lel uh chih hi. Numei nu’n kumlui 2011 in Central University, Sriniketan campus apan post graduation zou a, University thusuakin agendanin, Oct 4, 2012 in numei nu’n Agriculture department a Professor kiangah research paper submit dingin a room valut lai Professor in ana khoih chihthu om hi. Numei nu’n Vice-Chancellor Sushanta Dutta Gupta kianga complaint bawl a, /agriculture dept a Professor in a sianthouna sukbuahsak chi hi. University in thiltung sui dingin committee khat dinkhia a, amau a thil muh uh October 13, 2012 in University authority ah pelut ding uh chih ahi hi.