Nomenclature a buai hun hi nawnlou - Sumand Kuki
KNLF/KPA in kituaka khawsakkhawm lunggulh
Lamka, Oct-12: Kuki National Liberation Front/Kuki People’s Army(KNLF/KPA) pawlin Burma a Sagaing division huamsung, Indo-Myanmar gamgi jula munkhat ah zanhal in News- saite kimuhpih uh a, tuma a thiltungte leh KNLF/KPA in tunung a panlak sawmdan telin party tawh kisai taklatna nei uhi. Huai ah Sumand Kuki, Secy(Info & Pub), KNLF/KPA in a genna ah gamsungah thil paidan diklou bawlhoih ding tamtak om a, KNLF in gamsung hoihna dinga panla chiat dingin government officials leh department tuamtuam-te kianga ngetna bawl kawm in diktat taka nasem dingin hasuan hi. Chin-Kuki-Mizo, Zomi leh Hmar tungtang a mi tamtak lung-apna tunglel poisakthu gen in nomenclature a buai hun hinawnlou ahihdan gen a, tribe tuamtuamte pu-leh-pa khat suan’ ngen i hihdan theithak ni chi’n gen hi.

KNLF/KPA makaite’n a genna uah Manipur phaizang helpawlte’ kizopkhawmna Manipur Peoples Army(MPA) tawh KNLF in kalsuankhawm mahleh amau deihdan zui dinga talkaih theih vual hilou hi’n gen uh a, nidanglai hun a i zalenna omsa ngahkik theihna dia amau pawl tawh kalsuankhawm mah poimawh ahihdan gen uhi. Amaute’n a genzelna uah, Myanmar gamsung ah democracy in malam nawt ahihman in huailam a Chin-Kuki-Mizo-Zomi leh Hmar namte adinga kivaihawmna tuam omthei ahi chi uh a, Manipur sung ah leng kituak taka gamtat sawm in singtangmite kuamah nomenclature a buai hun hinawnlou in, kituak taka khawsakkhawm hun ahihdan gen uhi.

KNLF/KPA pawlin News saite a kimuhpihna hun uah KNLF makai teng tel uh a, mipite laka sum demand kichi bawllou ding uh ahihdan gen in, demand sanga kipahman a piak ding uh kilam-en zaw hi’n gen uhi. Huailou in govt. officials khenkhat-te gamtatdan leh a nekgukdan teng uh pholhsuah ahihnung a amaute kianga panpihna ngen zel uh ahihdan taklang uh a, tuma in C. Hangshing, senior MCS officer huangsung a thiltung tawh kisai in poikhoihlou liamna tuakte kiangah ngaihdam ngetna nei uh a, thiltung tawh kisai omdan leng hilhchian uhi.

DC apa’ damlouh ziakin zinkhia
Lamka, Oct-13: Ms Jacintha Lazarus, IAS, DC/CCpur in a pa damlouh phut thu a zak ziakin tuzing dak 6:00 velin a sanggampa tawh Tamil Nadu state zuan in zinkhia uh chihthu om hi. Apa ahihleh BP sang ziaka stroke hi’n kigen a, bang dinmun hiam chih thuchian theih hi nailou hi. DC zinkhiak sungin C.Hangshing,MCS, Addl DC/CCpur in DC/CCpur mawhpuakna len ding hi.

SSPP Flag Day zang uh
Lamka, Oct-12: Siamsinpawlpi Gen HQ makaite’n tuni’n Bungmual a SSPP complex ah Siamsinpawlpi Flag Day zang uh a, huai ah SSPP Life, Patron Member leh makai lui hunkhop tel uhi. Lianzapau Samte, President, SSPP Gen HQ in SSPP Flag kaipalh a, SSPP Preamble simkhiakna neih zawh in SSPP Flag Day thuchah gen hi. Aman a genna ah, “Flag Day” zat ahih chiang in “Vualzou” chih etsakna in ‘SSPP Flag’ kaihpalh hizel a, 2nd week of October teng in ‘Flag Day’ zang in “Flag” zuakna neih din gen a, “SSPP Flag” zuakna a sum muh teng “Charity fund” dia zat hi a. tagah-gentheite panpihna a zat hidin gen hi. Pastor Dr. Thangminlun Mangte in Pathian kiang ah thumna hun zang hi.

Auto service flag-off
Lamka, Oct-13: Th Joel Haokip,Chief of Leijangkhopi in tuni zingsang dak 6.30 in Leijangkhopi khawsung apat in Leijangkhopi Diesel-Auto Service kipatna ding in sawlkhiak(flag-off) a, Thanghao Haokip,Local Pastor in Pathian kiang ah lan(dedicate)hi. Leijangkhopi Village Authority in HM English H/S student-te, nu-leh-pate leh khawsung mite khualna a pan alak uh gahsuah hi’n kigen hi. Tuni a Auto-Service kipanthak naupang leh student-te khualna ziak ahih mah bangin kuama’n hih buailou ding in Village Authority in ngetna bawl uhi.

Gospel Music Vedio honna om
Lamka, Oct-13: L.Thiembawi in abawl ‘Sapna Aw’ kichi Gospel Music Video Album thak tuni in Chiengkawnpang Community Hall ah honna om a, Siempee Gangte, NPS/SP(red) khuallian a pang in hong hi. Huai ah Guest of Honour in Royal Academy neitu B.Kamkhanthang Ngaihte pang a, Functional President in HD Gangte, MSF, DFO/CCpur pang hi. Rev K. Mawia, Secretary, Women & Education, GBA in Video Album thak thumna in lan hi. Videl Album a late Biakkim, Neiboi leh Nunthar in a sak uh hi a, la kisa teng producer L.Thiembawi in a phuah ngen hi’n kigen hi.

‘Rorelna Dik’ khawmpi pailel
Lamka, Oct-13: Tuithaphai Presbyterian (MPCS) nuai a om Lamka Presbyterian, Lamka Chiim Presbyterian leh Tuibuong Presbyterian te'n "Rorelna Dik" chi thupi a zang in zan nitak akipan in IB Road a Lamka Presbyterian biakinn ah Khawmpi 44veina zang uhi. Tuni zinglam dak 10:00 apan in vaihawmna leh report ngaihkhiakna hun zang uh a, khaw chih a Secretary teng in amau saptuam in activitiesa neihte uh report pia uh a, maban a sep ding a neihte uh taklang uhi. Khawmpi sung in Upa Ch.Dozama, Upa Sanglianthanga leh Upa JR Rozika te'n Pathian thu gen uh a, Oct 14, 2012 nitak in zouding uhi.

MU a Pol Sc ah top 9 in pang
Lamka, Oct-13: Manipur University (MU) nuai a MA result tuma zeka suak ah Dongthianmuan Tonsing s/o Vungzakap of Hebron Veng, New Lamka in Pol Sc. deptt ah Manipur University nuai ah top 9na in zou(passed) chihthu kiza hi.

Pearsonmun ah ‘eye testing camp’
Lamka, Oct-13: District Blindness Control Society saina in tuni’n Pearsonmun khawsung mite ading in Pearsonmun Community Hall leh Thangkhai Govt. High School ah ‘Eye Testing Camp’ om a, doctor leh nurse-te’n mitlam a buaina neite’ a thawn in en uh hi. Tuni a Eye Testing Camp ah Pearsonmun khawsung apan mitlam haksatna nei mi 400 vel ki-en sak uh hi’n kigen hi.

Activa gari kigu mang
Lamka, Oct-13: Zan nitak in Mission Road a om Ms Chinnu te'n inn compound sung a, akoih uh Honda Activa (No.MN-02A- 6305) guta pawlkhat in gumang uh a, Gari neite'n Police-te kiang ah report bawl in Police te'n suizui lel uhi.

Army te’n KNLF 2 mankhia
Lamka, Oct-13: Police apan kizasawn dan in 1/11- Gorkha Rifles te’n Oct 10, 2012 nitaklam in M. Semoul area apan KNLF active member 1 mankhia uh a, huaizawh in Sainoh area a KNLF mah 1 mankhia uh chihthu kiza hi. Matkhiak a omte Thangsanglun Haokip @ Sasang @ Kolphe (26) s/o Tunlal Haokip of Molbungjang(Singngat sub divn) leh Tongkholun Khongsai (38) s/o (late) Longkholun Khongsai of T.Moldang (Leimakhong) area hi un kigen hi. Army te'n amau apan KNLF round seal 1, KNLF Finance Secy seal 1, KNLF letter blank pad 2 leh demand letter 2 mukhia uh a, Imphal Police ah pekhia uhi. CCpur Police te'n a case lasawn in CJM court ah dingsak uh a, CJM in Oct 17, 2012 tan Police custody a omding in phalsak hi. Police te’n mi 2te tung ah FIR No. 110( 10) 2012 CCP-PS U/S 400/384 IPC registered uhi.

Block Cultural Exchange om
Lamka, Oct-13: NYK/CCpur leh GSO Gen HQ saina in tuni zinglam dak 11:00 in Khousabung Community Hall ah “Block Cultural Exchange program” om a, Thangmang Haokip, MDC/Khousabung khuallian in pang hi. Huai ah Functional President in Khulen Gangte, Gen Secy GSO Gen HQ pang a, Gangte Namlam tuamtuam lahna leh Gangte Nam etsakna thil tuamtuam lahna leng om hi.

IMPHAL NEWS

A/R te ziakin thiltung ding pumpelh
Imphal Oct-13: 9-Sector Assam Rifles nuaia 28- Assam Rifles te’n civilian banah Manipur Police leh Police a bomb expert team tawh a pankhawm ziakun National Highway No. 102 in a totkhak Ushoipokpi ah tuni zinglam dak 9.00 in IED mukhia in hihsia(defused) uh a, huai in thil mulkimhuaitak tung ding lai kikhelsak hi’n kigen hi.Tuni zingsang in Ushoipokpi khawmi khat in Lilong Post a om Assam Rifles te kiang ah lei(bridge) bul ah thil ginlelhhuai khat om ahihdan theisak a, huai phet in A/R te’n huaimun delhpah in a velchet ua leh buannoi laka thil kikoih mukhia uh a, aluminium kawm ah 2.5 kg agik RDX, cadmium 9 volt battery leh remote activation circuit mukhia uhi. (UNA Agency)

General Strike 2 kizom ding
Imphal, Oct-13: Manipur phaijang biala helpawl tuamtuam kigawm ‘CorCom’ pawlin Oct 15,1949 in India a Manipur a belh(Merger Agreement) pomlou uh a, Manipur in huaini apan a zalenna mansuah chi’n ‘National Black Day’ chih minvuah a, huai tawh kiton in Oct 14, 2012 beitawh kiton zankim lai akipan dakkal 18 sung Manipur pumpi ah General Strike puang uhi.
Huailou in Amom Rajen Singh(46) of Kumbi Terakhong,Bishnupur district, West Bengal a Howrah Railway Station ah Oct 2, 2012 a thahsa a kimukhia tungtang leng a sihdan ginlelhhuai sak ziaka JAC kibawlkhiate’n Chief Minister O. Ibobi leh Home Minister Gaikhangam mu in thil omdan genpih mahle uh govt in limsaklou chi a lungkimlou in Oct 17, 2012 zingsang dak 5.00 akipan in Oxct 18, 2012 zingsang dak 5.00 tan Manipur pumpi ah General Strike puang uhi.

FCI antang pua Truck 1 hijack in om
Imphal, Oct-13: Senapati PS in a huamkhak Henbung leh Changoubung kikal ah tuni’n FCI antang bag 300 pua Truck (No. AS01-DC/9743) helpawlte’n hijack uhi. Kangpokpi Police leh 43-Assam Rifles te’n thiltung a theihphet un delh pah uh a, Changoubung ah Truck leh antang mukhia uhi. Hileleng helpawl in gari zui Sunil pikhia uh a, combined teamte’n Sunil mukhe lou uh hi’n gen uhi.

AIDS Awareness campaign
Imphal, October-13: Moreh a Ward No. 7 bial sung Kongdong Leiharaubuy Lampak ah zan in 9-Assam Rifles-te panlakna ziak in ‘AIDS Awareness Campaign’ om a, huai ah damlou 150 val et ahih ban uah AIDS akipan kiven dingdan sinsakna leng om hi. Huai ah Information Education Communication (IEC) tawh kisai vanzat tuamtuam leng hawmkhia uhi. Medical Officer in HIV tawh kisai hilhchetna a gen banah HIV/AIDS natna apan kiveng bit ahunlou a misi om pumpelh theihdan ding leng gen hi. (UNA Agency)

Kidoupi IIna lai a bomb mukhia
Imphal, Oct-13: Wakha Khongnang mun ah tuni zingsang dak 6.10 velin bomb 1 mukhia uh a, Imphal East police te’n va lakhia uhi. A vengmite gendan in zan in mi 1 in huai kim a lei a tawhna ah bomb dan khat mukhia a, police-te theihsak ahih dungzui in zingkal in police te’n a va et ua leh Kidoupi IIna hunlai a bomb ahihdan theihkhia uh a, Police te’n mun thoveng deuh ah hihsia uh chihthu om hi.

JAC te’n DA/DR khangsak di’n ngen
Imphal, Oct-13: JAC of AMTUC & AMGEO te’n Oct 11, 2012 in CM kiang ah memorandum pia uh a, huai ah India govt in January 1, 2012 akipan Central govt employee leh pensioner-te’ DA/DR January 1,2012 apan 58-65% in a khansak ban ah July 1, 2012 apan 65-72% in khangsak a, Manipur govt. in leng tukum apan employee-te Dearness Allowance(DA) leh pensioner-te Dearness Relief(DR) khangsak di’n ngen uhi. JAC leh govt. in MOU thukimna a bawl bangun state govt. in 6th centre pay bangtak a zang ding in leng ngen uhi.

Opium kg 4 mukhia
Imphal, Oct-13: Kangpokpi PS in a huamkhak Kanglatongbi ah zan nitaklam dak 4.30 vel in Excise te’n numei 1 in a puak opium kg 4 vel agik leh aneitu mankhia uhi. Mat a om Hevei Doungel of Kanglatongboi hi a, opium matkhiak local market ah Rs. 2 lakhs man hi a, international market ah Rs. 10 lakhs man hi’n kigen hi.

A tupa in apu gamsa sa in kaplum
Aizawl, Oct-13: Zan nitaklam dak 3:15 velin Saichal khawmi kum 70 a upa Kapmawia kichi a tupa (atanu’ tapa) kum 18 a upa Lalsena in a gamvakna uah gamsa sa in kaplum kha hi. Lalsena taangpanna mun ah Kapmawia va suak a,tua phet in a tupa Lalsena in ngal sa in thau in kap a, apu leng amun ah kipuk in si chih ahi hi.

Kapmawia leh a tupa Lalsena zan in Saichal apan km 2 vel a gamla gammang lak ah Ngal chang in om uh a, huchih laitakin Lalsena in theihkhelh ziakin apu kaplum kha hi. Saichal khua kichi Saitual leh Hliappui kikal a khua om om hi a, Saitual apan km 21 in gamla hi.