ZYA omna munte ah pawlpi dang poimawhlou - ZRO President
Khawdo Pawi 2012 zatna leh ZYA Tunkhopum Block honna om
Lamka, Oct-29: Zomi Youth Association(ZYA) Gen. HQ inntekna in Singngat sub-division sung Panglian khua ah ZYA Block thak ‘Tunkhopum Block’ honna leh Khuado Pawi 2012 zatna tuni’n om a, huai hun ah zatna ah CCpur district sunga MLA-te kipahpihna (felicitation) programme tawh kithuah hi. ZYA Tunkhopum Baite Block honna ah Chief Guest in Phungzathang Tonsing, Minister(Health & FW, GAD&CADA) pang a, Khuado Pawi Pa in Thanglianpau Guite, President, Zomi Re-unification Organisation(ZRO) pang hi.

Thanglianpau Guite in ZYA Tunkhopum Block hongkhe kawm in a thugenna ah chibing leh nambing a kikhentuamnate paihkhiak hunta a, tuni chiangin Thanlon area telin Sinzawl leh Lungthul banah Singngat area ah ZYA unit tamtak honkhiak ahih kipahhuai ahihdan gen hi. ZYA kichi Zomi sunga khuam poimawh leh Philantrophic organisation khat ahihbangin ZYA omna munte ah chibing-nambing a kivaipuakna pawlpi dang poimawhlou ahihdan gen hi. Aman a genzelna ah Nampi vai a lianpen dingin Zomi Council om a, student lam ah ZSF om in, philantrophic organisation ah ZYA om ahihman in Zomi a pai i hihleh huaite mah poimawhpen chi’n gen hi. I minam in kigensiatnate tawpsan poimawh a, makaite phat dinga akilawmna tan a pahtawi siam poimawh hi’n gen a, kigensiatna in gah hoih suanglou in, a gensetu leh gensiat a omte adia phattuamna bei hi’n leng ZRO President in gen hi.

Chief Guest apang Phungzathang Tonsing, Minister(Health &FW, GAD &CADA) in a genna ah Tunkhopum Baite in gam leh nam it mahmah a, government in sepna hoihtak piak dinga zol mahleh huaite nialin gam-leh- nam adinga kipia in mipite tawh nasemkhawm a gentheih telzaw a, a sih tanpha in gam adin nasem a, mi hangsan leh thupi ahihdan gen hi. Aman a genzelna ah heutute leh makaite thuap theihdan tenga thuap poimawh a, i gam in a poimawh midangte adia thilhoih tunthei ding pumkhatna neih kul hi’n gen hi. Pau kitheituahlou Naga-te laka kipumkhatna alet bangin eilak ah leng huaite omsak poimawh hi’n leng gen hi.

ZRO President in ZYA Tunkhopum Baite Block honna a neihzawh in T. Goukhomang, President, ZYA Gen HQ in makai thakte kichiamsakna nei a, Rt. Rev Dr. Ginkhanmang Zou, Bishop MELC in amaute thumsak hi.Huai ah ah Guest of Honour in T. Manga Vaiphei pang hi. Guest of Honour dingte laka khat Langkhanpau, Chairman,ADC ahawh theihlouh ziakin asik in S. Kamsuanlun, EM/ADC pang a, Vungzagin Valte, MLA leh Ginsuanhau, MLA leng a teltheihlouh ziakun amau sik-le-tang in mi sawl uhi.

Chief Guest in ZYA panpihna dingin Rs. 50,000 pia a, T. Manga Vaiphei, Chairman MTDC in Rs. 15,000 pia a, President ZRO in Rs. 10,000 pia hi.Huai huna telthei MLA te kiangah ZYA in kipahpihna in memento pia uh a, huaite ZRO President in pekhia hi. Special guests in district sunga MDC te pang uh a, lasiam Benny Khongsai, B. Muan Ngaihte, Joycee Vaiphei, James Arjun, Lhingboi, Nenei te’n siamtak in lasa uh a, M. Tanglian UZO Cultural Troupe leh ZYA Panglian Unit te’n namlam lahna nei uhi. Special invitees in Zomi sunga pawlpi tuamtuamte apan President leh Secretary- te pang uhi

SSC exam siangthou takin zou uh
Lamka, Oct-29: Staff Selection Commission saina in Data Entry Operator leh LDC lakna dingin zan in CCpur Govt College leh Lamka College exam centre ah ‘Combined Hr.Sec Level Examination’om a, candidate 3381 om lak ah 2777 exam uh a,exam zah 82.07 % tung hi.Huai examna CCpur district adia masapen ahihman in DC/CCpur in leng awlmawh in Exam centre 2te pha thithe hi.
Exam ding candidate teng gate bul ah body search tanpha om a, exam hall sung ah kuaman electronic device tawilut theilou in pencil, erazer/rubber kia tawilut thei uhi.
Vungzagin Valte, MLA & Parliamentary Secy in leng DC/Ccpur tawh kizui in Exam centre 2te enkhia hi.

Zogam Today News hon hiding
Lamka, Oct 29: Zoveng a Zogal Memorial Hall Complex Oct 30, 2012 zinglam dak 10:30 in “Zogam Today” kichi niteng a suak ding Newspaper honna om ding a, Ginsuanhau Zou, MLA (Singngat A/C) khuallian apang in hong ding a, Fr Mark Thangkhanai, Program Co-ordinator RVA Zomi-Chin Service in Pathian kiang ah lan ding hi. Huai hun ah Guest of Honour in Langkhanpau, Chairman, ADC/CCpur pang ding a, Functional President in Ms. Jacintha Lazarus, IAS, DC/CCpur pang ding hi. Chief Hosts in Michael Ginzasuan, DSO/CCpur, S. Kaikhankap, ARCS leh Mrs. Mannuamching,CEO, ADC/CCpur pang ding uhi.

Free Medical Camp kipan
Lamka, Oct-29: Jewish Voice Ministry International saina in Sielmat Christian Hospital ah tuni pan Nov 2, 2012 tan daihding ‘Free Medical Camp’ kipan a, huai ah USA leh Africa apan Gynea, Opthalmologist leh Dental Specialist mi 40 val te’n numei lam, mitlam leh ha tawh kisai a buaina neite en in damdoi leng manbei in pia uhi. Jewish Voice Ministry Intenational te’n hibang a free medical camp a neih uh Lamka ading in 3veina hita a, gam dang a pan CCpur mipite panpihna dinga hibang Free Medical hongsai uh hi’n gen uhi.

Sikdai gu mi 2 mankhia
Lamka, Oct-29: Pangzawl khawsak a Sericulture farm a fencing, barbed wire (siik dai) saupi kigu mang a, Oct 27, 2012 nitaklam dak 4:00 velin sikdai gutu David Chanmawia (30) s/o Lalhmangaiha of Thingkangphai leh Lalduhawma(28) s/o Lalhmachhuana of Thangkangphai matkhiak hi uh a, amau apan in sikdai kg 10 leng muhkhiat in om hi. Huai tawh kisai in Police te’n FIR No. 117(10) 2012 CCP PS U/S 379/ 341 IPC registered uhi.

Rev CS Sitkil in Jubilee suang hong
Lamka, Oct-29: Lamka Presbyterian Church, IB Road kiphuhkhiat kum 60 chin lopna Oct 25, 2012 in kipan a, zan zinglam in teltuam mi 60 te’n Jubilee dak 60 khen uhi. Huai hun ah Rev CS Thanga Sitkil, former Pastor in Jubilee suang hong in latna leng nei a, Jubilee lop hunsung in mi tuamtuam 7 in Pathian thu gen uh a, zan nitakin zou uhi.

July, 2012 a JSY sum kihawm
Lamka, Oct-29: District Hospital ah July, 2012 kha sunga numei naunei (ta masapen leh 2na tan) nei a condition bikhiah omsa zui mi 108te lak ah tuni apan Nov 3, 2012 sung daihding in District Hospital mun ah JSY sum(incentive money) hawmkhiak kipan hi.

Tipaimukh A/C ading antang pawkhia
Lamka, Oct-29: Tipaimukh MLA nominee Samson in HQ Veng, Lamka West a FCS Godown apan Oct. 2012 quota ding BPL leh AAY antang kigawm quintal 370 leh khua 5 a ding chini(sugar) tuni in Tipaimukh A/C adding in hawmkhia hi’n kigen hi.

DPC in mi 2 recommend
Lamka, Oct-29: PTC Gen HQ a sem ding lakna ding in tuni zinglam dak 10.30 in DPC om a, huai ah President in appointment a bawl ding in Office Assistant sem din Minthang s/o V. Ginsuan of Pearsonmun(Sl No. 5) leh Chowkider(Sweeper)-cum-Peon ding in T. Thongzatuan s/o T. Jamtun of Pearesonmun(Sl. No. 5) recommend uh hi’n thutut kingah hi.

Kel(goat) khat mankhia
Lamka, Oct-29: District HQ Welfare Committee te’n vengsung a kel(goat) long oklou khahzan khamna abawl nungun tuni in munkhat ah kel long oklou mankhia uh a, huaite kel neitu diktak in ni 3 sung ngei in News a suahman pia a laktheih ding hi’n gen uhi. Ni 3 nungin kuaman bangmah gen thei nawnlou ding chih ahi hi.

IMPHAL NEWS
Fish Fair-cum-Competition
Imphal, Oct-29 :Fishery deptt thusuak dungzui in Nov 14, 2012 in Palace compound ah Hapta Kangjeibung ah ‘Fish Fair –cum-Fish crop competition 2012’ om ding a, huai ah Manipur ah nga vul(fish farmer)te tel ding in theihsak hi uhi. Huai a telding fish farmer te’n a tawmpen in nga kg. 400 puaklut uh ngai ding a, deptt in a zuakna zah ding uh a bikhiahsak ding a zuakna mun ding Stall leng piak hiding uh a, nga puak velna dia sennate deptt in piaksak ding chih ahi hi.
‘Fish Fair –cum-Fish crop competition 2012’ ah 1st prize Rs. 50,000 hiding a, 2nd prize Rs. Rs. 40,000/-leh 3rd prize Rs. 30,000/- hiding hi. Indigenous Fish piangsak tampen kipahman Rs. 15,000/-piak hiding a, mi 25 kiang ah consolation prize Rs. 5,000/- chiat piak hiding uhi. Huailou in singtanggam leh phaijang bial district a kikhen in ngasa piangsak tampen tuak kipahman Rs. 10,000/- tuak piak hiding uhi. Atel nuamten Nov. 7, 2012 tan in mahni omna district a District Fishery Officer leh Chief Executive Officer- te kimuhpih ngai ding a,amau apan thuchian leng kantheih ding.

Tuni’n govt office-te suti ding
Imphal, Oct-29: Manipur adia festival poimawh leh minthang ‘Mera Houchongba’ ziakin Oct 30, 2012(Sepnawnni) in Manipur govt nuai a office teng suti(General holiday) hi ding a, state govt nuai a om educational institution tuamtuam leng kikhak ding hi. Hileleng bank leh financial institution tuamtuamte bel suti hilou ding chihthu kiza hi.

Public awareness om ding
Imphal, Oct-29 : Ukhrul a Mini-Secretariat a Multi-purpose hall ah Nov 1-3, 2012 sung ‘Public Information Campaign on the flagship programme of the central govt’ om ding hi. Huai ah National Rural Health Mission(NRHM), SSA, MGNREGS, Rural Roads, Rural Housing, Rural drinking water supply, telephone, sanitation campaign, ICDS, Right to Information Act, Pension Scheme tawh kisai in Public Awareness om ding hi. Huai ah Ministry of Information & Broadcasting nuaia DAVP-te saina in photo exhibition leng om ding hi.

Diktat taka sem din hasuan
Imphal, Oct-29: Home Minister Gaikhangam in MGNREGS nasepna diktatna tawh ahiding bang taka sep hileh singtanggam a khua(village) omte leng nasataka khangtou ding hi’n gen hi. Tuni’n Porompat a Panchayat Bhavan ah tuma a election ah Panchayat member telching a omte kipahpihna leh General Body meeting masapen uap kawm in a thugenna ah MGNREGS nasepna lungsim siangthoutak kawm in ahi ding banga sepkhiak hileh Manipur singtanggam a khua tamtak omte leng muhtheih a masawn in khangtou ding uh hi’n gen hi. Huai kikhopna ah Rural Dev & Panchayati Raj Minister Francis Ngajokpa leng tel hi.

MU in exam hun ding bikhiah
Imphal,Oct-29: Manipur University in Nov 29,Dec 1,Dec 3,Dec 7,Dec 10,Dec 12,Dec 15,Dec 17 leh Dec 19, 2012 in LL.B. 1st/2nd/3rd yr Examination,2012(Nov) om ding in bikhiah a,examination form submit hun leng fine tellou in Nov 14,2012 tan hithei ding a, fine telin Nov 16,2012 tan hithei ding hi.Huailouin LL.B. 1st/3rd/5th Semester Examination,2012(Dec) leng Dec 10,11,13,14,15,17,18,19,20 & Dec 21,2012 sung om ding in bikhiah hi a,fine tellou in Nov 26,2012 tan exam form sibmit theih ding a, fine telin Nov 28, 2012 tan submit theih ding hi.

Beauty Contest ‘ban’ puang
Imphal, Oct-29: Manipur a numei pawl tuamtuam kigawm in ‘Beauty Contest’ kichi himhim hunchiam omlou ding in ‘ban’ puang uh chi’n zan in Manipur Press Club ah Press-te kimuhpih in a thak in puang uhi.Huai tawh kiton in ‘Miss Manipur’ leh ‘Beauty Contest’ tuamtuam leng phal hilou ding in puang uh a, community tuamtuam in beauty contest a bawlte uleng block level hi’n village level hileleng hitheilou ding chi’n puang uhi.

SSPP Block Conference
Imphal, Oct-29 : SSPP Imphal Block in tuni sunning dak 1.00 in Palace gate a Manipur Film Development Corporation auditorium ah ‘53rd Annual Conference-cum-Annual Prize distribution and SSPP Siamsin Lampi releasing Function-2012’nei uhi. Chief Guest dia chial a om Health Minister Phungzathang Tonsing tel mankei mahleh panpihna Rs. 20,000/- pia hi.
Huai ah Guests of Honour in Vungzagin Valte,Parliamentary Secy leh PC Lawmkunga, IAS, Addl. Chief Secretary pang uhi. Vungzagin Valte in a genna ah award ngahte’n hunsa mailou in a sangzawsem tum dingin hasuan hi. Aman SSPP Imphal Block panpihna in Rs. 2000/- pia hi.
PC Lawmkunga, IAS in saptuam leh society paidan hoihthou mahleh deihkhop huai nawnlou hi’n gen hi. Tuailaite’n sepna hoihtak aneih theihna ding un Saptuam leh society ah kihel tam hoihlou a, huaite ziakin officer ding tamtak lawhsam sek uh, chi hi. Aman SSPP Imphal Block panpihna in Rs. 1500/- pia hi. Tuni a programme zatna ah Imphal Block sung a Nursery apan a tunglamte kiangah topper award pia uhi.