ZC, ZSF leg CDSU in mawhpaihthu puang
Lamka, May-8: Kuatehiam chih theihlouh pawlkhat in May 7, 2013 nitakin khawpi sung mun tamtuam ah namkal kituahlouhna omsak thei ding lehkha(pamphlet) a thehdalh uh Zomi Council(ZC), Zomi Students’ Federation(ZSF) leh CCpur District Students’ Union(CDSU) pawlin mawhpaihthu atuam chiat in puang uhi. ZC thusuak in a taklatdan in namkal kituahna hihse thei ding hibang thilchin tulai hun adia thil haihuai tawp hi a, Zomi Council in community tuamtuamte ki-it leh kituaktak a khawsak khawm a tup leh deihpen hi a genkawm in CCpur ah muanna leh lemna omna din theihtawp suaha panla touzel ding uh hi’n taklang uhi.Huaiziakin doilok leh taise kawma gamtangte ziakin kuamah patau leh lauthong tuanlou din kuapeuh theisak uhi. ZSF thusuak in namkal kitheihsiamlouhna tunthei dingn lehkha thehdelhte mawhpaih uh a,Lamka khawpi ah namteng khawsa a tengkhawm ahihman in kuama’n hibang chindan hoihlou sunzom nawnlou dingin theisak uhi.Namkal buaina leh kituahlouhna bangmah a omlouhna ding in mipite’n kituahna leh kingaihnatna lenkip chiat dingin ngen uhi.ZSF in hibang thilhihte’n tununga leng hihthei nawnlou ding in akisaipihte’n zongkhia a mankhe ding in leng ngen uhi. CDSU pawlin namkal buaina piangsakthei ding lehkha thehdalhte leh New Bazar a Khelemba Hotel halsawmte mawhpaihthu puang uh a,tuban CCpur district sung ah kuaman’n hibang chinhan hoihlou tawpsawn chiat dingin theisak uhi.Dan enkoltute’n hibang mite kintaka mankhia in dan tawh kituak in a tung uah gawtna pe dingin leng CDSU pawlin theisak uhi.
DC makaihin Oil Pump-te enkhia
Lamka, May-8:Maniram Sharma, IAS i/c DC/CCpur makaih in S.Khaikhopau Ngaihte, SDC/HQ, DC’s office, M.Ginzasuan, DSO (CAF& PD), CT Lian, Social Worker te’n tuni sunnung dak 2:00 in Lamka khawpi a Oil Pump omte enkhe kawmin petrol leh diesel stock omzah leng enkhia uhi. Amau Tuibuong Oil Pump, Suakhun & Sons Oil Pump- Bijang leh New Lamka a enkhia uhi. Tuibuong Oil Pump ah petrol 7000 litres, diesel 4000 litres stock om a, thautui siang leh sianglou etna machine omlou leng officialte’n ngai poimawh mahmah uhi. Bijang Oil Pump ah petrol 926 litres, diesel 14000 litres stock om a, New Lamka a Oil Pump ah petrol 1000 litres leh diesel 14700 litres stock om hi. DC in Oil Pump 3 a petrol leh diesel om bangbang May 9, 2013 in mipi laka hawm din thupia hi.
Electric ngeina bangin vak nawn
Lamka, May 7: Huihpi leh vuahpi in May 1-2, 2013 kikal zankimlai leh May 3, 2013 zingsang in Lamka khawpi leh akimlak anuai banah electric post hunkhop mut puk a, huailou in singkung kipuk in electric high tension gui hunkhop hihsia hi. May 3, 2013 apan Khampu Hatzaw, AE leh Lhuna, AE makaihna in staff te’n buaipih mahle uh vuah a zuksek ziak in deihbang in nasem theilou uh a, tuni’n IB line bawlhoih zou in Lamka khawpi sung ah ngeina bangin electric vak nawnta hi.
Auto-pu tu’n Shija a ICU ah om
Lamka, May-7: Zomi Colony lutna bul Tedim Road ah zan nitak dak 8.10 vela kapliam a om Diesel auto driver Liansonmung (25) s/o Chinzakai of Gangpimual zan nitak nungin Imphal a Shija Hospital puaktung hi a, a dinmun kichian tuanlou in gim mahmah hi’n kigen hi. Liansonmung’ lenuai a thautang lut in a tuap(lung) leh spinal cord khoihkha a, a dinmun a serious mahmah ziakin Intensive Care Unit(ICU) ah etkol hi a, houpih theihlouh dinmun a om hi’n kigen hi.
KIC leh Meetei Society in Press-te mu
Lamka, May-8: Tuibuong a KIC office ah tuni sunnung in Kuki Inpi CCpur leh Meetei Society/CCpur te’n joint press conference sam uh a, zan zingsang a Khelemba Hotel a thiltung leh pamphlet kithehdalh tungtang taklang uhi. KIC Gen Secy in Khelemba Hotel a thiltung KIC leh KSO in joint condemnation bawl a, khawpi sung mun khenkhat ah kuate hiam chih theihlouh in namkal kituahlouhna ding a pamphlet a thehdalh uh Kuki community minsiatsak tupna ahihman in poisakthu leh mawhpaihna sangpen puankhum ahihdan gen hi. Meetei Society a Adviser in mun tuamtuam apan phone call ngah hi’n gen a, Khelemba Hotel a thiltung leh pamphlet kithehdalh tungtang dotna tamtak ngah a, ama’n dist a thiltung ahihman in dist levela hihfel hiding a genkawm in kuama’n buaina bawllou ding a ngen ahihdan gen hi. Aman a genzelna ah CCpur dist ah nam teng kituakin tengkhawm a, kuate hiam in kituahlouh ding deihna ziaka a thilhih uh hidia ginthu gen hi.
Director(Sc & Tech) hongzin ding
Lamka, May-8: UC Laishram, Director (Science & Technology) in May 9, 2013 dak 10:30 am in Lamka hongpha ding a, New Lamka a Siktui Workset & Farm leh SSA Residential school enkhe ding hi. SSA Residential school gei leh Lamjang khaw kiangah Science Centre munding enkhe ding a, selection bawl ding hi’n kigen hi. Director( Sc & Tech) in tuni a Lamka hong phakna ah Imphal apan official 10 velin hong zuiding uh hi’n kigen hi..
CTDA Annual General Body Meet-cum-Freshers Meet
Lamka, May-7: CCpur Tribal Doctors Assn. pawlin May 10, 2013 sun dak 12:30 in Dist Hospital a Seminar Hall ah ‘Annual General Body Meet-cum-Freshers Meet, 2013’ neiding uhi. Member sisate suunna hun leh programme tuamtuam om ding a, omding a, Dr L.F. Tusing, MD (Physician) & Adviser, CTDA in special short message gen ding a, Dr Chinkholal Thangsing in CDTA Directory hong ding a, Prof Lallukhum Fimate, retd Director RIMS in Specialist thakte hasotna thugen ding hi. General Body meeting ah CDTA member site galna Rs 40,000/- khansak ding hia? Chih lleh CTDA pen Societies Registration Act 1989 a dungzui in registration bawl ding hia? chih telin thu tuamtuam genkhawm ding uhi.
OC in office aluah kum 1 ching
Lamka, May-7: Inspector Elvy Tunglut, OC in CCpur Police Station in Officer inchagre (OC) a let nung leh office a luah nung kum 1 chinna tuni sunnung in CCpur Police Station ah staff teng tawh lopna nei in singpi dawnkhawm uhi.
May 9 in Screening om ding
Lamka, May-7: May 1-2, 203 kawmtuah zankimlai leh May 3, 2013 zingsang baihtak in huihpi leh vuahpi kithuah in CCpur district nuai a, inn-le-lou, school leh biakinn tamtak hihsia hi. CCpur sub-divn a inn-le-lou kisiateng May 9, 2013 sun dak 12:00 in Maniram Sharma, IAS, i/c DC makaih in ama’ office chamber ah Dist Disaster Management Authority Committee member te’n screening bawl ding uhi. SDO/CCpur in report abawl dungzui in CCpur sub-divn ah inn 100 kise dimdem a, inn 300 sia (partially damaged) a, school 5 leng kisia hi.
Biometric operator dingte’ ki-report ngai
Lamka, May-8: Bio-Metric Enrolment zawhsiang theihna dingin District Administration in Data Entry Operator 30 lathak a, amaute’n May 9,2013 zinglam dak 11.00 a DC office a ki-report dingin Maniram Sharma, DC incharge in theisak hi.
Court in bail in pawtsak
Lamka, May-7: Sinzawl khua a om 38-Bn Assam Rifles te'n April 30, 2013 zingsang in Mizoram apan Manipur lut Tata Sumo (No.MZ-01G-4730) a kipua Gelatine (Neogel) stick 90 (13.6 kg) leh akep (detonator) 599 mukhia in gari driver Lalbiekthang (27) s/o Hrangkaphnuna of Rengkai tawh mankhia in Thanlon OC pekhia uh a, Thanlon Police te'n court a dingsak in 5 sung Police khut a om nung in CJMIC/CCpur in bail in pawtsak chihthu om hi. Police te’n FIR No.3 (5) TLN-PS U/S 5 explosive substances Act register uhi.
SUUNNA
Th. Paukhup h/o Dimnu of Simveng apaisa May 5, 2013 nitak dak 8.30 velin cancer ziakin si a, zanhal in Simveng hanmual ah kivui hi.
IMPHAL NEWS
CM leh Dy CM zinkhia uh
Imphal, May-8: Chief Minister O. Ibobi leh Dy Chief Minister banah Manipur Pradesh Congress Committee(MPCC) Presdent Gaikhangam in Lok Sabha election tawh kisai a Manipur dinmun genkhawm ding in zan in Imphal apan Delhi ah zinkhia uhi.Chief Minister leh Dy CM in kumthak 2014 a Lok Sabha election om ding ah Inner Manipur Parliamentary Constituency leh Outer Manipur Parliamentary Constituency ah Congress(I) candidate dingin kuakua hoih ding hiam chih Congress High Command tawh genkhawm ding uh hideuh chi’n kigen hi. Thudang kizadan in Manipur ministry kileptakna(reshuffle) om guih maithei chih tawh kisai leng Lok Sabha election om ma in bangmah thilthak omlou ding dinmun ah om chih ahi hi.
National Highway-te bandh ding
Pic thoudang
Imphal, May-8: Nongpok Keithelmanbi area ah April 29, 2013 in Nongpok Keithelmanbi IB area lak a lawi(buffalo) mang zonga kuan Seitinlal Kipen (52) s/o (late) Haokholam Kipgen of Bongbal Kholen village leh Tongsat Haokip (37) s/o (late) Tongkholun Haokip of Masenjang village/ CCpur tuni zinglam in Kamuching village gei a Ngarelpat mun ah sisa in aluang uh muhkhiak hi a, siluang 2te muatdia kisa in puak gawpta hi’n kigen hi. Thiltung tawh kisai in tuni nitak dak 7:00 in Kuki Innpi, Sadar Hills thupuangtu Thangminlen in a genna ah govt in tuni apan dakkal 48 sungin tualthat te a matkhiak keileh KSO Sadar Hils leh Chingmi Tammi Lup kigawm in National Highway 2 ah total bandh/blockade pat hiding in gen hi.
NHRC Chairperson hongzin ding
Imphal, May-8: Loktak dil(lake) a nga-man(fishermen)te’n haksatna a tuah uh bang dinmun hihiam chih thil omdan enkhe ding in National Human Rights Commission(NHRC) a Chairperson KG Balakrishnan,retired Chief Justice of India in tunung sawtlou in Manipur hongphas ding chihthu om hi. Thusuakin a gendan in ‘All Loktak Lake Areas Fishermen Union Manipur ’ pawl leh ‘All Manipur Thanga People’s Welfare Asnn’kigawm in April 29, 2013 in Delhi ah NHRC Chairperson kimuhpih in amau haksatna etzuipih dinga ngetna memorandum pia uh a, huai hun NHRC Chairperson in thil omdan enkhe ding in tunung sawtlou in Manipur hongpha ding chi’n ana genpih chihthu om hi.
Mi tamtak patau man
Imphal, May-8: Manipur Secretariat gei ah tuni nitak dak 6:00 velin SBI bank fencing gei a footpath ah bag san(red colour) 1 kinusia om a, bomb hidia gintak ziakin police te’n nasatak in buaipih uhi. Bangtanhiam khit in Police a bomb expert te’n a etkhiak ua leh huai bag sung ah puansilh leh thil tuamtuam mukhia uh hi’n kigen hi. Huai madeuh in mi tamtakin bomb kikoih hidia patau in lauthong chiat uhi.
Dist Magistate in 144 Cr PC puang
Imphal, May-8: RK Dinesh Singh, Dist Magistrate/Imphal East in Imphal East district dunga Seijang village leh Silent village kalah gam thu a kitheihsiamlouhna om in masawnlou dia panlak poimawhsak ziakin Seijang village gamsung pumpi ah May 7, 2013 zingsang dak 6.00 akipan in May 14, 2013 zingsang dak 6.00 tn 144 Cr PC puang hi. Huai hunsung in pawlam munkhat ah mi 5 sanga omkhawm phallouh ahih banah police leh security-te chihlouh kuamah galvan leh hiamhei tawikhia om theilou ding chi’n thusuak om hi.
Tui sianglou kizuak mukhia
Imphal, May-8: Lamphel a Medical Directorate te’n tuni’n Press conference sam uh a, huai ah Dy Commissioner of Food Safety Authority (FSA) T. Brojendro Khaba in Chingamathak Thokchom Leikai mun a RK Sana’ dawr akipan Luwangsangbam a N.E. Water Solution & Beverage te’ bawl Alpine drinking bottle sung ah tui sianglou hunkhop om chih muhkhiak leh theihchet hi’n taklang a, huai in mihing damtheihna hihse thei ding hi’n gen hi. Alpine packaged drinking water te’n Food Safety & Standard Act 2006 dan akalh ziakin atung uah dan tawh kituak a action lakkhum hiding in leng gen hi.
Semester boycott sawm
Imphal, May-8: Manipur a khaw tuamtuamte’n a phuhkhiak ‘Co-ordination Committee of College Students’ Union Manipur’ thupuangtu in tuni’n GP Women College ah media-te ma ah a gendan in Manipur a Education department ah Higher Secondary tawh kisai in buaina omlou ding a electric leh tui pua phat ding in ngetna bawl in, library ah laibu 100 tan bek koih ahih keileh May 22, 2013 ni a Semester exam boycott ding uh hi’n puang uhi. Manipur a hills district-te ah toilet puah ngai a, hun sawttak apan Director of Hr Education post luah louh a om leng chitna nei khat luahsak dingin ngen uhi.