Dev & School thu genkhawm
Lamka, April-19: Chairman ADC/CCpur makaih in tuni sunnung dak 2:30 in ama’ office chamber ah Vice Chairman ADC leh Executive Member te banah CEO te’n Dist Council nuai a development works leh school tungtang genkhawm uhi. Huai ah ADC nuai a development works tungtang, Council nuaia school omte ban ah maban a nasep leh panlak dingdan genkhawm uhi.
Engineer te’n EVM test ding
Lamka, April-18: DC/DEO, CCpur apan thusuak kingahdan in April 20, 2013 zinglam dak 11:00 apan in DC’ office ah BEL Engineer te’n EVM machine diagnostic test nei ding uhi. Huai hun ah CCpur dist a recognized political function teng telding in DC/DEO in ngen hi.
Dialkhai Jr H/S thu report pia
Lamka, April-19: Thanlon sub- divn a om Dialkhai khua ah April 15,2013 in vuah leh huihpi kithuah in govt Jr H/S building mutpuk a,student 12 liam uhi. Huai thu ah ZEO in photo telin Director of Education (S) ah report bawl a, akintheipen a Dialkhai Govt Jr H/S building bawl ding in ngen hi. Dialkhai govt Jr H/S thu ah tuni’n Pumsong Hangshing, DI of schools, Thanlon in spot enquiry bawlding in Dialkhai khua zuan a, thil amuh bangbang ZEO/CCpur ah photo tawh report ding hi’n kigen hi.
Singngat Block ASHA Day ah vanzat hawmkhia
Lamka, April-19: Singngat Community Hall ah tuni zinglam dak 11.00 akipan in Singngat Block ASHA Day zat in om a, Singngat block sunga om ASHA 74, ASHA facilitator 4, ANM(NRHM) leh GNM (NRHM) 13 te kiangah Mobile handset, ASHA uniform leh pass book piak hi uhi. Huai hunah Rev. Ngilzakhup, DS/MELC, Singngat in thumna hun zang a, Dr. HL. Leinsang, CMO/MD, DHS leh Dr. Hegin Lhungdim, MO i/c Behiang PHC te’n leng thugen uhi. Huaisianvung, DCM, NRHM in handset leh uniform hawmkhiakna makaih in heutu paikhawmte’n aban ban in hawmkhia uhi.
Exam dingte frisking bawl hiding
Lamka, April-19: SSC saina in April 21, 2013(Sunday) zinglam dak 10:00-12:00 sung CCpur College leh Lamka College ah Combine Graduate Level (Tier-I) Examination 2013 om ding a, invigilator teng zinglam dak 8:45 in exam centre tungkim ding uhi. SSC exam ding teng gate ah frisking bawl hiding a, candidate te’n exam hall ah mobile, electronic device leh laibu tawilut theilou ding uhi. CCpur college ah candidate 864 exam ding uh a, Lamka college ah candidate 464 exam ding uhi. CCpur dist a candidate teng 1328 hi uhi.
Doctorate Degree muthak
Imphal, April-19: Ngaineilam Haokip @ Neneo w/o Seikholen Haokip, Deputy Commandant CRPF of B. Vengnuam/CCpur in Dr. Manidipa Sen etkaina nuai ah ‘Subjective and Moral responsibility: Contemporary Debates on the Concept of Person’ chih thesis zang a research a bawl tungtawn in New Delhi a Centre for Philosophy, School of Social Sciences, Jawaharlal Nehru University (JNU) in Doctorate Degree(Ph D) pia uh hi’n thutut kingah hi.
Chairman in program cancel
Lamka, April-18: Central Water Commission (CWC) Chairman Rajesh Kumar in Delhi apan Manipur hongpha a, tuni zinglam dak 8:30 in Khuga Dam enkhe ding chih himahleh program cancel in Lamka hong phalou hi’n Police thusuak kingah hi.
Mulberry lungnou laktheih ding
Lamka, April-19: Singtheimin (Mulberry) lungnou khoi ut kuapeuh in Bualjang a Tasar Farm ah April 20-22, 2013 sung in mulberry lungnou laktheih ding chi’n Dy Director( Seri)/CCpur apan kiza hi. April 20, 2013 zinglam sak 10.00 akipan kihawm ding chihthu om hi.
Annual General Body meeting om
Lamka, April-19: Civil Officer Pensioners Society pawlin tuni in YPA Hall, Hiangtam Lamka ah Annual General Body meeting nei uhi.Huai ah S.Vungsing, Secy in 2012-13 Annual Report bawl a, tulelin member 151 om a, 2012-13 sungin member 3 si hi’n gen a, Dr S.Ngulzadal makaih in suunna nei uhi.Kum 2012-13 sungin member thak 10 kibehlap a, Secy in member thakte mellahna nei hi. Civil Officer Pensioners Society te’n 2012-13 sung in Rs 6,39,898/- mukhia uh a, kum 2013-14 sung a Budget dingin Rs 6,76,000 bikhiah uhi.
Kansau Baptist Church Centenary
Lamka, April-19: Kansauzang village ah tuni akipan ‘Na makai masate uh phawk un’ chihthu a nei in Kansau Baptist Church Centenary lopna om a,Rev Tual Lun Pau in Centenary lopna hong hi. Centenary lopna om sung in Evan Langh Do Khup, Rev Go Mun Thang, Rev Dr HS Hatzaw leh Rev Gin Lian Tuang in thugen ding uh a, April 21, 2012 in Centenary lopna zou ding uhi. Centenary lopna om sung nitengin Dr T. Hatzaw, Dr Didim leh Sia Kapno makaihna in free medical check-up om ding hi.
2nd Hindi Gospel camp 2013
Lamka, April-19: M.Songel a Gethsemane Counseling Hall ah April 21, 2013 zinglam dak 9:00 apan in “The Way, the Truth and the Life” (John 14:6) thupi anei in “2nd Hindi Gospel Camp 2013” om ding hi. Rev LB Angam, General Director ECCI in thumna in Camp hong ding a, Kedar Das, Old Bazar apan Pathian phatna la ngaihkhiat hiding hi. Camp sungin Elder Babulal Paswan of M.Songgel in Pathian thu gending a, nitaklam in Sanjay Gupta, M.Songel in thumna in camp khak ding hi.
Thumkhawmna om ding
Lamka, April-18: CCpur Christian Women Fellowship (CCWF), Ladies Prayer Fellowship leh Prayer Organising Committee saina in April 20, 2013 zingsang dak 7:00 apan sunnung dak 1:00 tan MELC, biakinn, Zomi Colony ah Numei pawl thumkhawm ding uhi. Rev S.K Manlun, Lamka DS, MELC in progam hong ding a, biakna leh kipumpiakna Mrs.Chingngaihlun, CBWS makaih in om ding a, gamsung damna dingin Miss May Rose, EFCI makaih in thumna om ding a, Pathian’ kha vehna ngetna thumna hun ah Rev JF Lalropuia, Presybterian Church Lamka bial Pastor makai ding a, Upa Khamzathawng, Local Chairman, MELC in thumna in program khak ding hi.
Ccpur centre-te ah 5th leh 3rd Semester result hoih
Lamka, April-19:Manipur University nuaiah BA/B.Sc/B.Com/B.Sc(Bio-Technolgy) 3rd Semester & 5th Semester examna result apan etin Ccpur dist. apan exam-te’n hihhoih uhi. 5th Semester examna ah Ccpur Govt. College a Science leh Arts subject examte laka 90% passed uh a, Lamka College a Arts subject examte laka 91.8% in passed uhi.Rayburn College apan BA examte lakah 74.91% in passed uh a, B. Com a exam teng pass in 100% tung hi. Huailou in 3rd Semester Ccpur Govt. College apan BA examte laka 61.99% in passed uh a, B.Sc examte lakah 83.3% in passed uhi. Lamka College a BA examte lakah 70.2% in passed uh a, Rayburn College apan BA examte lakah 60.65% in passed in, B.Com examte laka 84.44% in passed uhi. Kumdang sangin Ccpur dist. apan TDC(3-yr degree course) zilna College-te ah result hoihzaw hi’n kigen hi.
SUUNNA
Kamkhanlun Samte(27) s/o Gindoulian Samte of Zabellei village zan sunnung dak 2:30 velin T-Nagar, Chennai ah damlouhna ziakin si a, tuni’n Chennai ah ZYA leh ZSF inntekna in kivui hi. Aman azi leh ta 2 sihsan hi’n kigen a, April 21, 2013 in Zabellei ah suunna hun zang ding uhi.