KNO leh UPF in joint meeting nei
Lamka, Nov-6: India govt leh Manipur govt tawh Suspension of Operation (SoO) neilel KNO leh UPF te’n tuni in Lamka ah joint meeting tak nei ua, huai ah maban ah KNO leh UPF in political demand a neihkhawm theihdan ding leh kipumkhatna om theihna dinga panlak dingdan tawh kisai genkhawm uh hi’n kigen hi. Huai dingin Core Committee khat bawlkhia uh a, huai ah KNO leh UPF apan member 5 tuak guang uh chihthu om hi. KNO leh UPF in Lamka a joint meeting aneih uh tuni apen a 2veina hita hi.
Int’l School of Music flag-off uh
Lamka, Nov-6: Synod Super market building a 1st Floor ah tuni zinglam in ‘International School of Western Music’ kichi Music chituamtuam zilna ah flag-off progamme om a, huaiah Bible for the World President Rev Dr. Pudaite-te nupa leh L. Mangkhogin, IPS, SP/CCpur telna in flag-off(pan) uhi. International School of Western Music kichi July 5, 2005 in Gurgaon khawpi ah patkhiak hi a, James T etkolna nuai ah tuni in Lamka leh asehvel apan music zilnuamte’ adia zil theih ding in mi bangzah hiam in sinsak uh hi’n kigen hi.
Electoral Roll thu genkhawm ding
Lamka, Nov-6: Electoral Roll tulela Special Summary Revision om tawh kisai in Ccpur district incharge apang R. Muivah,IAS, Principal Secretary(Works/Tpt/Health & FW) in Nov 7, 2012 in Lamka hongpha ding a, sunning dak 1.15 in DC office ah DC leh SDO teng tawh joint meeting neiding uhi. Huai ah Special Summary Revision of Electoral Roll a om nailoute min khumlut leh behlapna form 6,7,8 & 8A tawh kisai in claims & objection thu genkhawm ding uh hi’n thusuak kingah hi.
MDC- te’ Chairman makaih in meeting
Lamka, Nov-6: Chairman ADC/CCpur makaih in tuni sun dak 12:00 in MDC te’n meeting nei uh a, Dist. sung a development nasepna tawh kisai genkhawm uhi. Meeting ah district sung a DRDA nuai a development work-te genkhawm uh a, na kisemsate ban ah maban a nasep dingte hoihzawsem a sepkhiat danding gen uhi. Huaiban ah Dec 8, 2012 in Public Leader te’n Seminar a neihding uh telin thutuamtuam genkhawm uhi.
Bank PO sepna muthak
Lamka, Nov- 6: Chinghoihvung d/o Mangpu Tonsing of Mission Road, Hiangtam Lamka in Punjab & Sind Bank ah tunaizek in Probationary Officer (PO) muthak a,Nov 19, 2012 in Guwahati ah join ding hi’n kigen hi.
Entrepreneurship Skill Program
Lamka, Nov-6: Manipur Industries Deve Council (MIDO), Manipur State AIDS Control Society (MACS) leh United Nations Dev Program pangkhawm in Oct 26, 2012 in Dist Hospital a Medical Supt office Conference Hall ah ‘People Living with HIV/AIDS’ te ading in “Entrepreneurship Skill Dev Program” kipan a, huai paitou zelin Nov 7 in zouding uhi. Training sungin Ms. Narola in Dish Wash leh detergent tuamtuam bawl dan sinsak a, Themchin in pak(flower) bawldan sinsak hi. Training zawh ni 3 nungin a thil bawlkhiakte uh zuak khiakdan ding tawh kisai sinsakna om lai ding hi’n kigen hi.
PREPAK hidia ginlelh jail ah
Lamka, Nov-6: India leh Mynmar gamgi jula Pillar No.43 gei ah Oct 29, 2012 in 39-Assam Rifles te'n Prepak helpawl atel dia ginlelh S Macha @ Prem Kumar/Marging (40) s/o S.Pramo of Wangkhei Thambalkhong, Imphal East a matkhiak uh Police-te khut ah pekhia uh a, CJM in judicial custody(jail) ah omdia a thutan khum ziakin Police te’n Jail ah koih uh a, FIR No. 118 (10) 2012 SGT-PS U/S 16/20 UA (P) A. Act & 25 (1-C) A.Act registered uhi.
Mimang a innkuante’n la
Lamka, Nov-6: Moirang Police te’n zan in pasal pautheilou, bilngong leh laigelh theilou khat CCpur mi hidia gintakziak in Imphal hawhte kianga pekhia in Lamka Police Station a koih din theisak uhi. Lamka PS te’n Police Station tuamtuam contact uh a, tuni’n mimang pen Senapati apan a innkuante hongpai in lakhia uh hi’n Police thusuak kingah hi.
SAS booking upto 30 Aug Stock 306
Kimjoe booking upto 8 Sept Stock 306
IMPHAL NEWS
Rs. 1.5 crores vel man khamtheih haltum
Imphal, Nov-6: Manipur a Custom department te’n Shillong apan hongzin Deputy Commissioner of Custom leh Supdt of Custom, Manipur pua R.K. Bhuminjoy uapna nuai ah tuni’n Heingang Police Station(Imphal East) kiang a Waiton Lamkhai mun ah Ganja leh khamtheih tang tamtak Rs. 1.5 crores vel man ding haltum uhi. Huaite Gangja kg. 2892.5 agik sum a tuat in Rs. 1,44,62,500 vel man leh Mithamine Tablet, packet 600 a kitun sum a tuat in Rs. 6 lakhs vel manding haltum uh a, kum 2009 apan tukum tan in Manipur gamsung mun tuamtuam apan khamtheih a matkhiak(seized)te uh hi’n kigen hi.
Free Eye Care camp om ding
Imphal, Nov-5: Lions Eye Hospital & Services Trust in November,2012 kha adia masapen ding in District Blindness Control Society, Imphal tawh pangkhawm in November 11,2012 (Sunday) in Sangaiprou, Airport road a Lions Eyes Hospital ah Free Eye Care Camp sai ding uhi. Mitlam buaite leh mit natna tuamtuam neite’n zinglam dak 10.00 akipan sun dak 12.00 tan in vanaih theih ding hi’n kigen hi.
PREPAK member 1 mankhia
Imphal, Nov-6: Imphal West Police Commando pawl in zan sunnung dak 2.00 velin Singjamei Sapam Leikai a Community Hall gei lak a search operation a bawlna uah PREPAK(Pro) active member khat mankhia uh chi’n SP/Imphal West in gen hi. Matkhiak a om amin Sapam Bobin @ Bimol @ Bocha (40) s/o Tombi of Singjamei Sapam Leikai hi’n kigen hi.
Block 27 puah dingin Rs. 424.45 crores
Imphal, Nov-6: Manipur govt in singtanggam district tuamtuam a Block 27 puahna ding in Planning Commission ah Rs. 424.45 crores zat dinga proposal a thon Planning Commission in lemsakpih hi’n thusuak kingah hi.Chief Minister O. Ibobi makaihna in Oct 19, 2012 a meeting ah Chandel district a Block 3, CCpur district ah Block 8, Tamenglong district ah Block 4, Ukhrul district ah Block 4,Senapati district ah Block 8 akigawm a Block 27 puahna ding in phase 2 a kikhen in SPA(Special Plan Assistance) nuai ah Rs. 424.45 crores bei ding in bikhiah uh a, huai dungzui in Union Planning Commission ah proposal thon uh hi’n kigen hi.
Commando te’n PLA 2 mankhia
Imphal, Nov-6: Imphal East Police Commando te’n Nov 5, 2012 nitaklam 6.45 velin PREPAK cadre 1 mankhia uhi. Mat a om H. Rupachandra @ Naosek (20) s/o Shyam of Lakhipur (Patchou Village) hi a, amah apan handset 1 mukhia uhi. Aman mipi, govt. official leh private farms te apan party sum ding khon hi’n kigen hi.
Imphal East Police Commando-te mah in tuni zing dak 7.17 velin PLA cadre Seilal Khongsai (33) s/o Yamsei Khongsai of Shongathel mankhia uh a, amah apan .38 pistol 1, magazine 1 leh atang 2 mukhia uh chi’n Police thusuak in gen hi.
Noise Pollution Rules, 2000 zatsawm
Imphal, Nov-6: Imphal khawpi leh a kimlak ah gari leh engine tuamtuam ging ngaihtakte leh engine apan huihhoihlou potkhia hihkiamna ding in state govt in Noise Pollution Rules,2000 zatsawm in panla hi’n kigen hi. Imphal khawpi sung leh akim ah Gari leh engine tuamtuam apan ging(sound) volume level tu dinmun ah mihing damtheihna ading leh environment ading mahin leng siatna tunthei ding khop in nasa a,huai ziakin state govt in Noise Pollution Rules,2000(Regulation & Control) zat sawm hi’n kigen hi. Noise Pollution Rules zatna ding tawh kisai a semkhetu ding Police deptt leh District Magistrate te’ hi’n kigen hi.Police ah DSP rank sanga niamzawlou in a etzui a ngai a, Nodal Agency ahihleh Manipur Pollution Control Board hiding uh chih ahi hi.
Moreh Road ah indefinite bandh
Imphal, Nov-5: KSO Chandel, Naga Students’ Union Chandel, Kuki Chiefs’ Association Chandel leh Naga Chiefs’ Association Chandel in L. Saratchandra,EE/DRDA, Chandel suankhiak ding phutna in Nov 4,2012 akipan in dakkal 48 sung bandh puang mahle uh akisuan masiah bandh paitou ding chi’n indefinite bandh puang uh chihthu om hi.