Lamka a Agency 2 ah LPG Gas re-verification buaipih mi tam
Lamka, Nov-8: Lamka khawpi sung a Liquified Petroleum Gas (LPG) agency 2 – M/s Sialngenthang and Sons (SaS) leh M/s Kim Joe Gas a consumer teng in LPG(gas) book re-verification a bawlchiat uh a poimawh ziak in huai Agency 2te ah tulai in mipi tamthei mahmah hi. Thusuak kingah dan in Nov 14, 2012 tan in LPG(gas) consumer tengin re-verification abawl kei ualeh Company te’n a bawllou zahzah a cut ding uh hi’n leng kigen hi. Consumer khat in Gas Agency 2 te ah gas book neikhawm theilou ding hi’n leng kigen hi. Gas tawh kisai re-verification bawlna ding in driving licence ahihkei leh Electoral roll I-Card xerox copy submit ngaiding hi’n kigen hi.
MDC pawlin Minister kipahpih
Lamka, Nov-8: India gama small states category-te lakah Manipur in Health sector ah a hihhoihpen ziakin Award piak hi a, huai tawh kisai in Chairman,ADC/CCpur makaihna in tuni’n Lamka apan MDC hunkhop in Imphal vapha uh a, Phungzathang Tonsing, Minister(Health & FW, GAD/CADA kipahpihna hun va zatpih uh hi’n thutut kingah hi.
Central teamte’ kiknawn
Lamka, Nov-8: Ministry of Health & Family Welfare apan official 5 in CCpur district sung a medical institution omte leh National Rural Health Mission(NRHM) tungtawn a nasep khiakte enkhe ding in Nov 4, 2012 in Lamka hongtung uh a, mun tuamtuam a phak nung un zan nitak in athil muhdan uh DC/CCpur tawh genkhawm uh a, huaizawh nitak nung in Imphal ah kiknawn uhi. Thukizadan in Central teamte’n Dist Hospital leh mun tuamtuam a CHC, PHC leh PHSC omte a etkhiakna uah a tamzaw lungkimhuaisa uh hi’n kigen a, hoihzaw ding a a theihte uh CMO/CCpur leh a staff-te genkhawmpih zel uh hi’n kigen hi.
SSC saina in exam om ding
Lamka, Nov-8: Staff Selection Commission saina in Nov 11, 2012 zinglam dak 10:00 apan sun dak 12:00 sung CCpur govt College ah FCI nuai a Asst Grade III post tuamtuam sem ding lakna ding in exam om ding hi. Joseph Lalrothang, Centre Co-ordinator, SSC Examination 2012 apan kiza dan in CCpur dist ah candidate 716 vel exam ding uh a, siangthou taka sai ahihtheihna ding in candidate leh invigilator teng zinglam dak 9:00 in examna mun tunkim ngaiding a, gate frisking om din gen hi. Canditate-te’n exam hall ah electronic device puaklut phal hilou ding a, pencil, erazar, ball-pen leh correcting fluid kia tawilut theih hiding hi.
GFI Resource Centre honna leh latna
Lamka, Nov-8: Hill Town a Gerizim building(2nd floor) ah Nov 9,2012(Friday) zingsang dak 7.30 in Gospel for India(GFI)te’ Resource Centre honna leh Pathian kianga latna programme om ding hi.Huai ah Rev S. Vungminthang, Director of Missions,EBC in honna leh latna thumna nei ding a,huaizawh in Evan Mimin Simte in thil omdan genna hun sawtlou nei ding hi. GFI Resource Centre mun ding Elder Zamlal Vaiphei’ inn ( building a 2nd floor) hi’n kigen a, huai ah administrative office, Hindi worship hall,Guest room,Library, Children’s Refuel centre leh counseling mun om hi’n thutut kingah hi.
Ground breaking ceremony om ding
Lamka, Nov-8: Simveng a SYO Hall compound ah Nov 10, 2012 zingsang dak 6.30 in SYO Gen HQ inntekna in Latrine leh Toilet bawlna nasep kipatna ding in Ground Breaking ceremony om ding hi. SYO Gen HQ apan thusuak kingah dan in latrine leh toilet bawlna ding in namsung a mi kiphal leh phatuamngaite’n a thawhkhawmte uh zang in nasep pan ding uh uh hi’n kigen hi.
Hebron ah Veng V/A election
Lamka, Nov-8: YPA Hall, New Lamka ah tuni’n Hebron Veng Villagae Authority election om a, telchingte lakah vaipaw ding guang uh a, Chairman in T.Dongpi, Vice Chairman in Khamzavung, Secretary in Thangmuanlal, Asst Secy in Thuamthansang, Finance Secy in Khupzatawn leh Treasurer in G.Gouthiansiam hi uhi. Member-te Khupkhanmung, S.Manlian, K.Nengdouthang, L.Pauchinthang, S.Pauzalian leh N.Thangkhangin hi’n Chairman Hebron Veng, V/A apan kiza hi.
TKSU CCpur College Branch election om
Lamka, Nov-8: Thadou Kuki Students Union (TKSU) Gen HQ saina in tuni in CCpur College ah kum 2012-13 sunga TKSU CCpur College Branch vaipaw ding tel uhi. Huai ah President in Doujathang Lhungdim, Vice President in Thangboi Kipgen, General Secretary in Daniel Haokholal, Jt Secy in M.Robert Haokip, Finance Secy in Melody leh Treasurer in LH.Margarate telching uhi. Huai ban ah deptt tuamtuma a Secretary dingin mi 4 leng tel uhi.
ZTS vaipaw thak ding tel ding uh
Lamka, Nov-8: Zomi Theological Students(ZTS) pawlin Nov 10, 2012(Sunday) sunnung dak 1.00 in Grace Bible College campus,New Lamka a Jelshyam Chapel ah kum 2013-2014 sung a ZTS vaipaw ding tel ding uh a, huai ah pasal 10 leh numei 5 telkhe ding uh chihthu om hi.
Zomi nam sunga Theological student teng huai huna telchiat ding in a saite’n theisak uh a, state danga omte’n leng Online tungtawn in vote khethei ding uh chih thupuan bawl uhi.
IMPHAL NEWS
Central Sector Project-te ngai poimawh
Imphal, Nov-8: Manipur ah central fund zanga Central Sector Project tuamtuam sepkhiak a omte nawngkaina bangmah omlou a sepkhiak ahih theihna dinga enzui ding in state govt in High Level Co-ordination Committee bawlkhia hi. India govt apan thusuak om ziakin Nov 3,2012 in Chief Minister O. Ibobi makaihna nuai ah Centreal Sector Project Co-ordination Committee bawlkhiak hi’n kigen hi.Manipur ah Central sector project poimawhtak adiakin Railway Project leh project dangdang nasepna pailel zawhsiang nailouh hunkhop om hi.Huchibang project tuamtuam nasepna lamzang taka apai theihna ding in High Level C-ordination Committee in enzui ding uh hi’n kigen hi.
Indo-Myanmar Border Trade Committee pawl meeting om
Imphal, Nov-8: Indo-Myanmar Border Trade Committee meeting khatveina ni 2 sung om ding in tuni’n Moreh a Trade Centre ah om a, huai ah India leh Myanmar kal sumdawn kituahna(trade) omdan enkhawm masa uh a, huaizawh in trade item omzah behlap ding tungtang leng genkhawm uh hi’n thutut kingah hi. Huai meeting ah Delhi apan Ministry of Trade & Commerce a Joint Secretary in makai a, Manipur apan Principal Secretary(Commerce & Industries) leh official hunkhop tel uhi. Myanmar akipan in Border Trade deptt a Director General makaihna in mi 10 hong tel uh hi’n kigen hi.
State Health Society te’n tuni’n mobile phone tamkhop hawmkhia
Imphal, Nov-8: State Health Society, Manipur-te saina in Imphal Hotel a Banquet hall ah tuni’n ASHAs, ASHA facilitator, staff nurse leh ANM-te kiang ah Mobile phone tamtak hawmkhiakna function om hi. Huai ah Chief Guest in Phungzathang Tonsing, Minister(Health & FW) pang a, Functional President in R Muivah, IAS, Principal Secretary (Health & FW) pang hi. Guests of Honour in Devesh Deval, IAS, State Mission Director/ State Health Society Manipur, Dr. Pradeep Haldar, Deputy Commissioner (Child Health) Ministry of Health & FW, Govt. of India leh Padam Khana, Senior Consultant PHP, NHSRC, Govt. of India pang uhi. Huai function ah Health Minister in ASHAs-te kiang ah mobile phone 3,878 pekhia a, ASHA Facilitator-te kiang ah mobile phone 194, Staff Nurse-te mobile lak ah 124 leh ANM-te lak ah 470 pekhia hi. ASHAs te’n singtanglam a zin chiang ua azat ding ua piak hi uh a, tunung in raincoat, niliap, uniform leh torch light piak hiding un kigen hi.
Lawyer-te’n judicial proceeding boycott
Imphal, Nov-8: Manipur a High Court tuam om hun ah Judge dingte deputation in hong pai ding uh chihthu om lungkimlouh ziakin High Court Bar Association (HCBA), Manipur thupukna dungzui in Manipur a lawyer te’n tuni akipan in Gauhati High Court Imphal Bench a judicial proceeding atel omlou in boycott uh hi’n thutut kingah hi.Manipur adding High Court tuam om hun ah muntuam apan deputation a Judge hong om ua leh huaite’n Manipur apan Judge hithei dingte maban dal uh suak ding ahihman in Manipur a lawyer-te maban ding dalna suak a, huai lungkimlouh ziakin Manipur a lawyer pawlin tuni akipan in judicial procceding ah tellou uh hi’n kigen hi.
Tamenglong ah Public Hearing om
Imphal, Nov-8: Jubilant Oil & Gas Pvt Ltd, Noida (Uttat Pradesh state) te’n Tamenglong leh CCpur district sung mun khenkhat ah leinuai apan thautui zonna dia leivuh a sawm uh tawh kisai in Tamenglong a Indoor Stadium ah Manipur Pollution Control Board saina in zan zinglam dak 11.00 leh sunnung dak 2.00 in mipite apan ngaihdan lakhawmna leh ngaihkhiakna(public hearing) om a,a boycott pawl om ziakin security khauhtak nuai ah hearing om hi.Nov 21, 2012 sunnung dak 1.00 in Tipaimukh sub-divn sung Sibapurikhal Community Hall ah lehg public hearing om ding hi.
1st Annual North East Choral Singing Competition om ding
Imphal, Nov-8: Tangkhul Christian Charitable Trust (TCCT)te saina in New Delhi a Thyagaraj Stadium ah Nov 11, 2012 in ‘the 1st Annual North East Choral Singing Competition’ om ding a, huai ah Chief Guest in Delhi Chief Minister Mrs Sheila Dixit pangding a, Guest of Honour in Rishang Keishing, MP(Rajya Sabha) pang ding hi.Huai North East Choral Singing Competition ah Delhi a om North East state tuamtuam apan lapawl(choir) 12 omte’n “God is Love” la in kidem ding uh a, individual singing banah musical talent show leng om ding hi. Huai competition ah 1st prize Rs. 3 lakhs, 2nd Prize Rs. 2 lakh, 3rd Prize Rs. 1 lakh banah choir teng kiangah consolation prize piak hiding hi.
Lamlian bawllouh ziakin bandh
Imphal, Nov-8: Imphal-Jiribam lamlian(National Highway No. 37) bawlna tawh kisai in lamlian jula gam omte lakna dingin gam neitute apan gam leikhiakna(land acquisition) tawh kisai process zekai theilua chi’n Border Road Task Force(BRTF) pawlin Manipur govt theisak uh chihthu om hi. Alehlam ah BRTF pawlin Imphal-Jiribam lamlian a nasepna nelhsiah uh chi a lungkimlouh latsakna in Joint Forum for Transport Welfare,Tamenglong district pawlin Nov 6,2012 akipan in Imphal-Jiribam road(National Highway No. 37) pumpi ah bandh puang uhi.