Christmas ma in ni 20 thaman hawm hiding- Chairman DRDA
Lamka, Dec-6: Kha tamlou paisa in MGNREGS 2012-2013 a 1st Phase a ni 40 ading Job Card holder te’ nasepna thaman dan in Centre apan sum hongpai a, buaina khenkhat om ziak in Manipur govt in ni 30 ading sanction bawl in hawmkhiak khit hita hi. Christmas leh Kumthak 2013 thawhlawm ding mipi in MGNREGS thaman ni 20 ading sum alak theihna ding un Executive Director /DRDA, Project Director/ DRDA ban ah, ADC Chairman te’ pan lakna ziak in Job Card holder te’n MGNREGS 2012-13 a 2nd Phase ni 20 ading Christmas ma teitei a hawmkhiak theih ding in process pailel chi’n Langkhanpau Guite, Chairman DRDA/CCpur in gen hi.
Chairman, DRDA/CCpur in a genbehna ah NREGS 2012-2013 a 2nd phase ding tawh kisai State govt in state share sum honpiak kei leh Centre govt in fund hong pe nawnlou ding a a omziak in state share tungtawn in Christmas ma in ni 20 thaman ding hawmkhiat hidingin gen hi. Chairman DRDA in a genzelna ah Job Card holder teng in Christmas ma a ni 20 thaman a muh theihna ding un BDO te’n panla in hihfel vek ding uh hi’n gen hi. Ni 20 thaman lak ah MDC ten 25% work proposal a piak pen uh khawsung/ veng sung ah a phatuam theipen a zang leh semkhe chiat ding in Chairman/DRDA in Hausa/Village Authority te’ ngen hi.

ICI 63rd General Assembly pailel
Lamka, Dec-6: Independent Church of India (ICI)General Assembly 63veina zan in Muolvaiphei ICI Biakinn ah kipan a, tuni’n ICI Centenary Building ah Executive Council makai te’n Dec 7, 2012 a General Assembly agenda dingte kikum uhi. General Assembly om sung in Rev HB Hluothang, Elder Dr Zawlthanglien Changsan, Pastor Lalrohlu, Rev Rosung Sinate,Rev HP Runremthang leh Rev D.Ruolngul in thugen ding uhi. Dec 9,2012 in Pastor3 ordination leh ICI worker pension 7 service om ding a, nitak in General Assembly programme zou ding uhi.

Sepna zong mi 65,220 om
Lamka, Dec-6: CCpur district Employment Exchange ah October,2012 kha beitan in sepna deih ziaka min pelut teng kigawm 65,220 pha a, huaite pasal 47,892 leh numei 17,328 hi uhi. September,2012 tanin sepna deih a min pelut(ki-registered) pasal 47,816 leh numei 17,262 kigawm mi 65,078 hi uhi.

Meithai Khawmpi leh Advent Christmas
Lamka, Dec-6: Lajangphai a Widows Home ah Dec 7-9, 2012 sung Meithai Khawmpi leh Advent Christmas zatna program kithuah omding hi. Dec 8, 2012 in Seminar leh Free Medical Camp om ding a, Dec 9, 2012 in Advent Chritmas zatna omding hi. Huaia telding teng in puansilh ding kipuak chiat ngaiding chi’n Camp Committee a heutu Ruth N.Singson apan kiza hi.

ESC 59th Council kipan
Lamka, Dec-6: Evangelical Synod Church, Secretariat ah tuni in 59th Council Programme kipan hi Tuni zinglam dak 9:30 in Seminar om a, Rev Thangkhosiem, Rev Khaigin Gangte leh Upa LS Gangte in sinsak uhi. Dec 7, 2012 zinglam in business session om ding a, 2013 sung a ESC budget ding genkhawm in pass ding uhi. Council hunsung in Upa LS Gangte,Chairman ESC, Rev GS Gangte, Area Pastor, PB; Pastor Th Henlalmawi, Area Pastor,Tuilangkuol; Rev Mangkhokam, Directore M& E leh Rev L.Sata, Executive Director ESC te'n Pathian thugen ding uhi. Dec 9, 2012 zinglam dak 10:00 a kikhopna ah Rev L.Sata, Executive Director, ESC in Pro Pastor 3, Upa 1, Missionary 1, Pastor 1 ordination in peding hi. Dec 9, 2012 nitak in Rev T.Selluoi (Sr Most pastor) in thumna in hunkhak ding hi.

Kum 7-12 mite adi’n painting competition
Lamka, Dec-6: Axis Bank, CCpur Branch saina in tuni sunnung in Axis Bank ah naupang kum 7-12 mite ading in “Let your child express their idea of progress” chih thupi zang in painting competition om a, mi 45 tel uhi. Painting competition ah Songlunmang s/o Vungsuan of Hiangtam Lamka (Young Learners’ school); Jangneiching d/o Mamang of Laizon Veng, Tuibuong (Salt Brook school) leh Songdinglian s/o B.Nengkhozam of Mission Veng, (Donboco H/S) te’n 1st, 2nd leh 3rd la in Medal ngah uh a, kidemna a telteng in participant certificate ngah vek uhi.

YPA Diamond Talk 2nd phase om ding
Lamka, Dec-6: YPA Gen.HQ kiphuhkhiat nung kum 60 chinna kum nawn 2013 in lopna om ding a, huai tawh kisai Diamond Jubilee Celebration Committee saina in Dec 9, 2012 sunnung dak 1:00 in Dorcas Hall Mini Auditorium, New Lamka ah YPA Motto lak atel “Panpih ngaite panpih” chih thupi pansan in Diamond Talk 2nd Phase omding hi.

New Bazar a Gambling kimawlna ah
Public Gambling Act 1867 palsat uh
Lamka, Dec-6: New Bazar area ah tulai in sum a kimawlna(Gambling) chituamtuam thang mahmah a, zingsang baihtak apan nitak khawmial tanpha Lagao, Munda, Chirya, Chithe leh kimawlna mun 6 vel ah om hi. Huai munte ah naupang kum chinglou muh ding om gige a,. huai in Public Gambling Act 1867bawhsia hi’n leng kigen hi.

Aircel leh Airtel kalah SMS kikhak theita
Lamka, Dec-6: Northeast circle a Telecom giant chih a om Airtel leh Aircel in thubuai khenkhat ziaka Short Messaging Service(SMS) kikhak tuah ding khamna abawl uh ni bangzah hiam nungin ngeina bangin hoih nawnta hi. Thutut kiza dan in zan nitak nungin Airtel customer te’n Aircel zangtute kiangah SMS khak thei uh a, tuni zingsang akipan Aircel customer te’n Airtel kiangah ngeina bangin SMS khak theita uhi. Airtel leh Aircel kal buaisungin mi tamtak in nawngkaina tuak uh hi’n kigen hi.

Gari neite leh misi lamte kihoulem
Lamka, Dec-6: Zan zinglam in Kwakta lutna bul Tedim Road ah Lamka apan Imphal zuan passenger direct bus No.MN- 01/1824 accident ziakin gari handyman Thianmuanlal @ Lalboi (16) s/o Lienkhup of Go Cin Khup Veng, New Lamka amun ah si hi. Huai thu ah gari neite leh misi innkuante’n kihouna nei uh a, gari neite’n siluang puandum atuam in vok(pig) 1 gou uh a, sigalna in Dec 12, 2012 tana Rs. 50,000/-piakfel di’n kihoulem uh hi’n thusuak kingah hi. Thianmuanlal’ luang tuni’n YPA Hanmual, New Lamka ah kivui hi.

SUUNNA
G.Vungzaneng (84) f/o G.Tualzakhup of Vengnuam, New Lamka tuni zingsang baihtak in teknat in si a, tuni’n YPA Hanmual New Lamka ah kivui hi.

IMPHAL NEWS
KNO makaite tuni’n hongkik ding
Imphal, Dec-6:Kuki National Organization (KNO) makaite’n India govt leh Manipur govt tawh zan a kihouna(tripartite talks) a neih uh a lawhsap(failed) ziakin Dec 7,2012 a hong kiknawn ding uh hi’n KNO spokesperson Dr. Seilen Haokip in gen hi. KNO makaite’n tuni tan pha hungaih mahle uh govt apan lungtunhuai dawnna leh panlakna a omlouh ziakin KNO member-te Dec 7 flight in Manipur ah hong kiknawn ding uh chi’n KNO spokesperson in gen hi. India govt in political dialogue kipat ding thu gelhthawh a a piak masiah KNO in kum 1 sung SoO hun behlapna ding in suaikai ngeilou ding hi’n leng gen Dr Seilen Haokip in gen a,KNO in a poimawh aleh kha 3 tan SoO hun behlapna ding in suaikai phet ding hi’n gen hi.KNO in genthawh(verbal assurance) lel pomlou hi’n leng KNO spokesperson in gen hi. (UNA)

Congress Legislature Party meeting
Imphal, Dec-6: Tuni nitaklam dak 3:00 akipan in Chief Minister’ Secretariat ah Congress Legislature Party (CLP) meeting poimawhtak om a, huai ah Dec. 10, 2012 in AICC General Secretary Rahul Gandhi in Manipur a hongphak ding tawh kisai kikumkhawm uhi. Tua hun ah Rahul Gandhi in Manipur a hongphak hun a vaidawn dingdan leh thil tuamtuam banah public meeting feltak a sai dingdan telin thu poimawh tuamtuam genkhawm uh a, programme lawhchin theihna ding gelna in Sub-Committee tuamtuam a hunkhop guang uhi. Huai meeting ah CLP member 42 laka 35 vel paikhawm uh hi’n kigen hi.

UNC in PM kiang ah ngen
Imphal, Dec-6: Indo-Naga Peace talk ah Naga mite maban ding sautak kinga ahihman in kihouna thutawp(final settlement) tan tun theihna dinga panla ding in United Naga Council(UNC) pawlin Prime Minister Dr Manmohan Singh kiang ah ngetna(memorandum) pia uhi. UNC te’n Prime Minister kianga memorandum a piakna uah Indo-Naga Peace Talk ah Naga mipite’n kinepna liantak nei in ngaklah takin ngak uh a, Naga mite hihna(identity), chituamna(uniqueness) leh politics dinmun sautak kinga ban ding ahihman in Prime Minister in Naga mipite deihdan theihpih kawma Indo-Naga Peace talk in zawhkin theihna dia panla ding in ngen thakthak uhi.

Class XII leh XI exam hun ding
Imphal, Dec-6 : Council of Hr. Secondary Education, Manipur(CoHSEM) Secretary in tuni a notice a suahna ah Higher Secondary(Class XII) Examination,2013 leh class XI Examination hun ding puang hi. Huai dungzui in Feb 25,2013 akipan March 26, 2013 tan Class XII(Hr Secondary) examination om ding a, Class XI examna pen Feb. 28, 2013 akipan March 25, 2013 kikal om ding hi.

Hospital ah candle zangin nasem uh
Imphal, Dec-6: Manipur a District Hospital bangzahhiam omte laka vanzat(infrastructure) hoihpen omna hi a kigen District Hospital, Thoubal ah electrician omlouh ziakin doctor leh nurse te’n candle(mombati) zangin nasem uh a, damloute etkolna a leng candle mah zang uh chihthu om hi. Huai Hospital a om vanzat hoih hunkhop omte leng zat theihlouh in koihdap mai uh chih ahi hi. District Hospital,Thoubal a pawlam a etin kilawm petmah mahleh vanzat omsate zatlouh a om a tam banah akisam tampi omlai hi’n leng kigen hi.Huai Hospital ading in un-interrupted supply line om mahleh zan in wire bangtanhiam kangsia a, reparing bawel ding electrician tuam a omlouh ziakin a semte’n candle(monbati ) zangin nasem uh hi’n kigen hi.

Class X leh IX list laktheih hita
Imphal, Dec-6 : Board of Secondary Education, Manipur (BSEM) a Controller of Examination thusuak dungzui in Class X leh IX students list bawl a om zawhsiang hita a, school chih in BSEM office apan laktheih ding hi’n taklang hi. Akigendan in Class X leh IX te application form leh statement of candidate hi a, school thuneitute’n Dec. 10, 2012 tan in BDRM office ah va lak theih ding hidan in thusuak in gen hi.