SBI/CCpur Branch ah ‘Local Clearing House’ kipan
Lamka, Nov-9:Lamka khua a bank tuamtuam om nunga masapen ding in bank a account nei customer-te adia thil kipahhuai mahmah thilthak khat ‘Local Clearing House’ kichi zan in SBI/CCpur Branch ah kipankhia hi.Huai Local Clearing House ah Lamka a bank tuamtuam omte kimukhawm in amau bank apan sum laktheih ding a bank dangin cheque a issued uh kizangte Imphal leh mundang a collection dinga thonkhiak ngaiselou in Lamka mun a sum laktheih ding ahih phot leh sum lakkhiakna ding branch pen in clearance bawl in azingchiang in cheque tungtawn a sum lakhe ding customer/account neitu in sum lakkhiak theih mai ding in hihfel zel uhi. Huai tawh kiton in ni tamkhop lut dinga muntuam ah collection bawl dia cheque thonkhiak ngaisek tamtakte ni 2/3 nungin Lamka mun mah a sum lakkhiak theih ding in hihfel uhi. S. Kaikhanthang,Chief Manager, SBI/CCpur in Local Clearing House House patkhiak theihna ding in Reserve Bank of India(RBI) ah proposal a thon RBI in lemsakpih a, huai dungzui in zan sunnung in Bank branch rtuamtuam omte SBI a kimukhawm in bank tuamtuam kala cheque kithontuah hiam muntuam apan collection bawl ding a thonkhiak ngai selou in sum piaktheih ding in hihfel kipan uhi. Local Clearing House a bank-member tuamtuamte SBI, UBI,Vijaya Bank, HDFC, Axix bank,MSCB, SBI/Tuibuong branch leh SBI/Pearsonmun branch hi uhi. Amau ni 1 hal zelin SBI/CCpur ah sunning dak 2.00 vela kimuhtuah in bank tuamtuam kala cheque hihfel ngaite Local Clearing House ah saifel zel ding uh hi’n Chief Manager/SBI apan thutut kingah hi. Chief Manager,SBI/CCpur in a gendan in, etsakna ding in kuahiam in SBI Imphal apan cheque a neih Lamka a SBI ah account a neihlouh ziakin account a neihna bank dang ah deposit leh tuma a paidan in Imphal apan collection bawl ding in thon ngai ding a, ni bangzah hiam hunlut ding hi.Hileleng SBI hilou bank dang a account aneihna branch ah deposit leh Local Clearing House ah SBI in clearance a bawl aleh cheque neitu in a cccount a neihna bank apan sum lakhe thei mai ding hi’n kigen hi. Huchimah bangin kuahiam khat in SBI cheque zangin van lei henla, dukan neitu kiang ah cheque pia hitaleh dukan neitu in SBI hilou bank dang khat ah account nei leh sum lakkhiakna ding in account a neihna bank in SBI ah sum piak theihna dingin collection bawl dinfin cheque a thon ngai ding a, ni bangzahhiam hunla ding hi. Hileleng Local Clearing House a om tak ziakin bank tuamtuam apan kimuhkhawm hun uah clearance a om aleh dukan neitupa’n ni 1/2 sung lelin sum lakhe thei ding chihna ahi hi.
Upa Zamlal Vaiphei in GFI kikhopna ding mun pekhia
Lamka, Nov-9: ‘Gospel for India(GFI)’ kichi gospel ministry te’n Hindu-Christian tamzaw te tawh Rayburn telin ECA biakinn leh CCpur Govt. College ah Sunday Worship Service neizel uh a, biakna mun ding lemtangzaw poimawh sak ziakin Upa Zamlal Vaiphei in Hill Town a inn-sawng tung Gerizim building a 2nd floor pen GFI adia pekhia in, tuni zingsang dak 7.30 Rev S. Vungminthang, Director of Missions,EBC in Pathian kianga latna neikawm in GFI nasepna adingin thumsakna hun zang hi. Huai hunzatna ah V. Dongzathang, IRS(retd) ex-President,Income Tax Appellate Tribunal leh azi Mrs Pari banah saptuam pawl tuamtuam a makaite leh GFI member-te tel uh a, Evan Mimin Simte in GFI panlakdan leh nasepdan tangpi pulakna nei hi. Thutut kingahdan in GFI saina a Hindi Worship Service om hunah tulel in mi 100 vel kikhawm zel uhi. Tuni a Resource Centre kihongthak ah administrative office telin Hindi worship hall, Guest room,Library, Children’s Refuel centre leh counseling neihna ding mun om hi.
Soikholal Ideal school ah Parents’ Day
Lamka, Nov-9: Tuibuong Canan Veng a Soikholal Ideal H/S ah tuni zinglam in Annual Parents’ Day 20 veina zang uh a, Chief Guest in TN Haokip, MLA (50-Saikot A/C) pang hi. Huai hun ah student nu-le-pa nei nawnloute ading in Elder D. Paokholun, Board Chairman in thumsak hi. Chief Guest in agenna ah khawvel changkang in nasatak in masawn zel a, mobile phone leng computer chikhat ahi a, a khoihdan i siam kei leh education buchinglou hi’n gen hi. Nu-le-pa te'n leng tu apan eduction lam ah ta-leh-naute naksem a panla thei dinga makaih ngaita hi’n gen hi. Chief Guest in Class A apan Class X kikal tunitan pha exam hun a lawhching toudente lak ah kipahman hawmkhia hi.
Knowledge Sharing Consultation
Lamka, Nov-9: UN Women South Asia Sub-Regional office saina nuai ah Rajasthan state sung Udaipur ah Nov 19-20, 2012 sung ‘Regional Knowledge Sharing Consultation’ kichi ni 2 sung meeting om ding a, huai ah Mrs Niangpi Singson,founder Director,Widows Welfare Assn Asia leng vatel dinga chial in om hi.Huai meeting ah India, Nepal leh Sri Lanka gam tawh kisai in ‘Empowerment of widows and their coalitions’ tungtang genkhawm ding uh chih thutut kingah hi.
Dist Criminal Injuries Relief & Rehab
Lamka, Nov-9: Ms. Jacintha Lazarus, IAS, DC/CCpur makaih in tuni sunnung in a office chamber ah District Criminal Injuries Relief & Rehabilitation Board meeting om hi. Huai a member paikhawmte’n CCpur District mi adiakin state dang a om bawlsiatna tuamtuam tuakte govt in panpihna sum a piakding a telsak a omte tawh kisai genkhawmuh hi’n kigen hi.
Ngaihte Innkuan Thumkhawmna
Lamka, Nov-9: D.Phailian a Royal Academy ah Nov 10,2012(Kiginni) zinglam dak 9.00 akipan nitaklam dak 3.00 tan ‘Ngaihte Innkuan Thumkhawmna’ kichi “Hong pai un na khelhnate uh kikumkhawm dih ve ni” chih thupi a nei in thumkhawmna programme zang ding uhi. Huaiah mimal kisiansuahna, thupha tawina, kipahthugenna leh thilnget tuamtuam nei in thumkhawm ding uh a, hun kalzeh ah Rev L. Kham Kholun, Rev S. Kaikhanmang leh Rev Dr Luaichinthang in thugen ding uhi.
Police te’n guta mi 2 mankhia
Lamka, Nov-9: Police te’n tuni sunnung dak 2:30 vel in guta 2 mankhia uh a, a van guk uh Gas Cylinder 1, inverter battery 1 leh 24” LCD TV 1 a zuakna mun uah Police te’n mukhia uh hi’n kigen hi.Guta 2 matkhiak a omte Ginlalson(25) s/o Amkhanthang of Songtal village, tulelin Ngathal a om leh Thangthianlal (32) s/o (late) Doukhanthang of Songtal village, tulel in New Lamka Vengnuam New a om akibukna uh Lamka Cemetry apan matkhiak hi uh a, Police te’n Nov 10, 2012 in CJM court ah dingsak ding uh hi’n kigen hi.
Khuga IB renovation pailel
Lamka, Nov-9: Khuga Dam IB building a hoih nawnlouh ziakin ni bangzahhiam paisa apan in renovation nasep kipan a, nasemtute’n building plaster siatnate leng bawl uh hi’n kigen hi. Building sung kia hilouin atung leh apawlam teng hoihtaka bawlthak leh rong nuhthak vek hidin kigen hi. Ginsuanhau,MLA(Singngat A/C) in tuni sunnung in nasepna va enkhia a, nasemte’n a hoihtheipen a semding in theisak hi.
DHS Executive Committee
Lamka, Nov-9: Dr HL Liensang, CMO/CCpur makaih in a office chamber ah Nov 14, 2012 zinglam dak 10:30 in Dist Health Society Executive Committee meeting om ding hi. Huai ah meeting masa a thupukna et-thakna, Central team te’n Nov 4-7, 2012 sung CCpur district hongphak sung ua a muhdan uh kikupna, Dist Health Action Plan 2013-14 leh thu poimawh dang omte genkhawm uhi.
SSPP Jt HQ Conference om ding
Lamka, Nov-9: YPA Hall New Lamka ah Nov 10, 2012 zinglam dak 11.00 akipan in Siamsinpawlpi Jt HQ Lamka ‘2nd Annual Conference,2012’ om ding a, Chief Guest in Langkhanpau Guite,Chairman,ADC/CCpur pang ding hi.Huai ah Functional President in Thangzamuan Tombing,President, ATSUM; Guest of Honour in M. Gouzamang Guite,EM/ADC pang ding a, Chief Host in Lianzapau Samte, President,SSPP Gen HQ pang ding hi.
‘Computer Lam Hil’ kichi hongkhia
Lamka, Nov-9: Mahni a computer kisin theihna ding ngimna a T. Paokholam Haokip @ Paocha in laibu a bawl ‘Computer Lam Hil’ kichi tuni sunnung dak 2:00 in Chunnu Inn, B.Aijalon ah TN Haokip,MLA (Saikot A/C) in hongkhia a, Rev. D. Jangkholam, Executive Director, ECA in Pathian kiang ah lan hi.
IMPHAL NEWS
BRTF in lamlian a bawlte kum 2014 sunga zawhsiang tup ahi –DG,BR
Imphal, Nov-9: Lt General S Ravi Shankar, PVSM, VSM, Director General, Border Roads in tuni’n Aizawl a phakna in Imphal a 25-BRTF HQ mun pha masa a, aman BRO/BRTF in Manipur, Nagaland leh Myanmar a lamlian a bawlna nasep uh lungtunhuai sakthu genkawm in lamlian kibawlte kum 2014 sunga zawhsiang tup ahihdan gen hi. DG,BR in a gendan in km. 170.88 asau Yaingangpokpi leh Jessami kikal double lane a bawl hidin gen a, Ukhrul leh Yaingangpokpi kikal km. 21 asau phase masa nasepna leng kipan khin a, tuban kum 3 sunga zawh hiding in gen hi. Aman a genzeldan in Indo-Myanmar gamgi km. 10 asau border fencing kibawl leng nasepna 40% zawh hita chi’n gen hi. Huailou in CCpur-Tipaimukh kikal lamlian km. 125 leh 185 kikal leng nasepna paitou zel hi’n gen a, Singngat-Sinzawl-Tuivai lamlian leng BRO in pan alak ziakin tunung sawtlou in nasep kipan thei ding hi’n gen hi. DG,BR tuni’n Imphal Airport hongtun in Brig Arun Joshi, Chief Engineer (Project) Sewak in Airport ah ana dawn a, Imphal a sawtlou a om sung in . 25-BRTF HQ nasepdan tangpi enzui hi’n leng kigen hi. (UNA)
Dy CM in Symposium uap ding
Imphal, Nov-9: Red Shield Division nuai a om Senapati Brigade-te saina in Nov 10, 2012 in Senapati ah student-te maban ding khualna in Symposium programme om ding a, huai ah tulela Manipur dinmun leh Senapati ah kituaktak a khantouhna om thei ding hiam chihthu genkhawm ding uhi. Student-te maban hoiha theihna ding genkhawmna hun ah Dy CM Gaikhangam, GOC Red Shield Div. a Maj.Gen. KK Sinha, SM leh govt. official hunkhop in huai hun uap ding uhi.
Opposition te’n Manipur thu pawlut ding
Imphal, Nov-9: Manipur a opposition political party tuamtuam 7 omte’n Parliament Winter session om hun ah Manipur a corruption leh dan tawh kituaklou a state govt in appointment a bawlte Parliament a genkhawm dinga puaklut theihna ding a ngetna Lok Sabha Speaker kiang ah memorandum pia uh chihthu om hi. Opposition party 7-CPI, CPI-M, BJP, JD-U, JD- S, MPP leh AITC kigawmte Convenor Dr. M Nara Singh tuni’n Babupara a Janata Dal(United) office ah media-te kimuhpih kawm in gen hi. Dr Nara in a genzelna ah Manipur Assembly kichi Manipur adingin democratic institution sangpen ahih dungzui in Assembly Secretariat in a thil ahihkhelh aleh kivaipuakna ah saupi hihse pha a, hibang kalah Assembly Secretariat ah deihsaktuam neia nasepna om ahihdan theihkhiak ahih dan genkawm in huai in thil saupi poisak ban ding hi’n gen hi. Manipur ah Inner Line Permit koih dingin Lok Session session om hun ah opposition leader-te’n panla ding uh hi’n leng Dr Nara in gen hi. (UNA)
Pathianni in dukan kihong ding
Imphal, Nov-9: Diwali festival(Nov, 13,2012) leh Ningol Chakkouba (Nov 15, 2012) ding ziaka vanlei nuamte khualna in Imphal Municipality huamsunga dawr/dukan omteng Nov 11, 2012(Pathianni) in hongthei ding uh hi’n thupuan a, huai ni a dawr hongte’n hun lem tang masapen ah anasemte uh suti peding in leng theihsak hi uhi.
HSA te’n kipahpihna nei ding
Imphal, Nov-9: Hmar Student Association(HSA), Imphal block te’n tutung a MPSC saina a Manipur Civil Services a lawhching HSA member-te Nov 13, 2012 in Lamphel a Hmar Community Hall ah kipahpihna programme nei ding uhi. HSA te’n Manipur singtangdawn a miphawk khaklouh haksatak a khawsate hindan leng lawhchinna ngahte genkhawm ding uh hi’n thusuak in gen hi
Buaina kalah commando 3 liam
Imphal, Nov-9: Lilong Bazar ah sum demand bawlte matkhiak sawm in civil dress a kichei Commando pawl duty uh a, tuni sun dak 12.15 velin Lilong ah Alto Car (No. omlou) khat khawl in Gari apan mi 2 kumkhia in bazaar lai a Muslim-te thumna Masjid lam manawh in pai uh a, Commando te’n ginlelhhuai a sak ziakun khawlsak sawm in blank fire 2/3 vei kap uhi. Huai husa ziakin Muslim-mi thumna neite thangpai in police tawh kinawktuah uh a, commando-te man tang uh a, Lilong Police te’n atheih phet un DI Tata khat a tuang in delh uh a, mipi thangpaite’n DI Tata leng hihsia uhi. Huai phet in Police team kuan beh uh a, tear gas tanpha kap in commando-te hunkhe thei uhi. Kinawk tuahna kalah suang in a denkhak commando 3 liam uh a, teargas kap ziakin mipi lam leng liam uh chihthu kiza hi.