Lamka-Imphal telin main highway 6 ah Nov. 15 akipan Blockade om ding
KSDC in ‘Quit Kuki Lands’ kichi movement patsawm
Lamka, Nov-12:Kuki State Demand Committee(KSDC) in Kuki mite ading kivaihawmna tuam bawlkhiakna dinga govt. kianga ngetna abawl uh tunitan a lawhchinlouh ziakin November 15, 2012(Thursday) nitaklam dak 5.00 akipan Manipur a Kuki mite tenna mun in a huamkhakna sunga main National Highway leh State Highway 6 ah blockade kipan ding chi’n puang uhi. Kuki State Demand Committee(KSDC) makaite’n Manipur Press Club ah tuni’n Press Conference nei uh a, huai ah Govt. tunga lungkimlouh thu taklang kawm in kum 60 vingveng Kuki mite nelhsiah a om hi’n leng taklang uhi. KSDC in Indian union nuaiah Kuki mite kivaihawmna ding state tuam bawlkhiak lunggulh uh hi’n gen uh a, huai ngetna in Central leh State government ah tamveitak theihsakna leh ngetna piak himahleh tuni tan govt in muhtheih dia bangmah sepkhiak a neihlouh ziakin November 15, 2012(Thursday) nitaklam dak 5.00 akipan Blockade pat hiding chi’n puang uhi.Kuki State ngetna ahun taka limsak ahihtuan kei lai leh KSDC makaihna in Kuki mite’n India tungah ‘Quit Kuki Lands’ movement leng pan ding hi’n taklang uhi.
KSDC thusuakin a taklatdan in Kuki mite’ tenna in a huamkhak Imphal-Ukhrul road telin Imphal-Tamenglong, Imphal-Moreh, Imphal-Chandel, Imphal-Senapati, Imphal- CCdpur ah Blockade om ding a, India govt in Kuki State tungtang a kihouna ding gelhthawh a a bikhiah masiah blockade sutzop hiding chi’n leng taklang uhi. KSDC thusuakin a taklat zelna ah KSDC tungtawn a Kuki mite leh Kuki helpawlte tawh India govt in kivaihawmna ding state tuam tungtang genkhawm dinga kithukimna a bawl masiah political demand paipih hiding a, huai dungzui in blockade leng lakkhiak hilou ding chi’n taklang uhi. Kuki State Demand Committee(KSDC) in a taklatzelna uah Kuki mite adinga democratic demand kibawl pen ahuntaka ngaihsak ahihkeileh KSDC makaihna tawh Kuki mite’n India tungah ‘Quit Kuki Lands’ movement leng pan ding hi’n taklang uhi.
KSDC te’n tuni’n Manipur Press Club a Press Conference a neihna uah KSDC a Chairman Hejang Haokip; Secretary Benjamin Mate; Vice Chairman S. Haokip leh Info & Publicity Secretary S. George Guite telin KSDC makai hunkhop tel uhi.
Chairman, HAC in Album hong
Lamka, Nov-12: Muolvaiphei a Bethesda School of Nursing music video album abawl masakpen uh “Instrument of Peace” kichi zan sunnung in Rengkai ICI biakinn ah Dr. Chaltonlien Amo, Chairman,Hill Areas Committee khuallian apang in hongkhia a, Rev. Dr. JL Songate, Executive Secretary, ICI in Pathian kiang ah thumna in lan hi. Chairman,HAC in music video album bawlkhiak kipahhuai sakthu genkawm in music in hindan nasatak in khekthei a, maban ah hibang thilhoih bawlkhiak sunzom zel dingin hasuan hi. Aman Album bawltute kithuahpihna in Rs 5,000/- pia hi.
TET exam hun ding bikhiah thak
Lamka, Nov-12: Nov 18,2012 in Imphal ah Teacher Eligibility Test(TET) om ding chih himahleh Nov 27, 2012 a ding in BSEM thusuak in taklang a, Exam centre tuamtuam dingte leng tunung zekin puankhiak hiding chihthu om hi. CCpur district apan exam ding admit card muhlouh ziakin kallui tana ZEO/CCpur office a complaint bawlte’n ZEO office ah admit card laktheih ding a, tukal sunga complaint bawlte’n bel amau mimal in Board of Sec Education Manipur(BSEM) office ah amau a kisai uh ngai ding chihthu om hi
SSC saina nuai ah examna om
Lamka, Nov-12: Staff Selection Commission(SSC) saina in zan in CCpur govt College ah FCI nuai a Asst Grade III post tuamtuam sem ding lakna din examination om hi. Huai ah CCpur district apan candidate mi 716 om lak ah 577 in exam uh a, mi 139 vel absent uh a, examna a telzah 80.58% tung hi’n kigen hi. Exam hunsung in Ms. Jacintha Lazarus, IAS, DC/CCpur leh CDSU makaite’n exam centre pha in enkhia uhi.
Painting competition om ding
Lamka, Nov-12: Universal Childrens’ Day lopna tawh kiton in “Think health, not drugs” chih thupi a nei in Nov 14, 2012 zinglam dak 10.00 in Dist Social Welfare office ah Painting Competition om ding a, huai ah Class V akipan Class X tan student kuapeuh a lunglutte telthei ding uhi.Thuchian kimzaw Dist Social Welfare Officer/Ccpur kiang ah kantheih ding hi.
Lamlian kuakna munte vuk uh
Lamka, Nov-12: Lamka khawpi sunga lamlian lunpen Tedim Road mun tamtak vuak in Gari tamzaw in a kuakna munte a pelhna lam uah kihet tuah leh accident tanpha om sek hi’n kigen a, BRTF pawlin tuni’n New Lamka lam apan Police station lam manawh kawmin lamlian kuakna munte vukdim in nasem uh a, tuni’n New Lamka lam apan Hmuia Veng tan tung uhi.
1st phase Larva Elimination zou
Lamka, Nov-12: District Malaria deptt te’n Oct 29, 2012 apan town area ah Larva Elimination Programme 1st phase a pat uh Nov 3, 2012 in zousiang uhi. Thu kizadan in 1st phase ah group 13 a kikhen in town area sung dappi bawl uh a, thoukang nou tamtak that uh hi’n kigen hi. Tunung sawtlou in 2nd phase pan ding uh hi’n kigen hi. 1st phase ah Dengue natna omthei ding a ginlelhna munte ah larva elimination neihthak hidin gen uh a, huai zawh in mundang ah pan ding uhi.
Khawpi sung ah fogging kap
Lamka, Nov-12: Lamka khawpi ah thoukang ziaka khawsik natna lauhuai Dengue apan kivenna ding in Malaria deptt in zan in khawpi sung mun tuamtuam a Dengue omna dia gintakna munte ah fogging kap uhi. Police station kong kipan Rengkai Road zui in, Simveng, Ngathal, Hebron Veng, Dorcas Road, Bungmual, Phailian, Chiengkonpang, Thengra Leirak, Red Cross Road, Headquarter Veng, DC quarter, IB Road, Mission Road, Mualveng, Chapel Lane, Sielmat, Zoveng, Zenhang Lamka, SA Road leh District Hospital campus sung ah fogging kap uh hi’n gen uhi.
CCpur apan mi 10 kuanding
Lamka, Nov-12:Meghalaya state sung Umzaw mun a North Eastern Police Academy (NEPA) ah Manipur a Police deptt a Inspector apan Head Constable te ading in Nov 15-17, 2012 sungin Traffic Management Workshop 1st phase om ding hi. Huai ah CCpur dist apan in SI Tualsonmung Tonsing, Traffic Control Police; SI Lutminthang Kipgen, CCP/PS; SI G.Jangkholal Kipgen, Parbung PS; Women SI, Chiinneilam Gangte, ARO/CCp leh Women SI Sandy Lalhmingsang Tonsing, CCP/PS tel ding uhi. Nov 19-21 sungin 2nd phase-te kuan ding uh a, CCpur dist apan in Women SI, Ngaihoikim Tungnung, Drugs Cell; Women SI, Lamneihoi, CCP/PS; ASI, T.Kamzagin, Traffic Cotrol Police; ASI, S.Lamthang, Parbung PS leh Head Constable, Thangkhokam Neihsial, Traffic Control Police tel ding uhi.
ZYA Gen HQ CEC meeting
Lamka, Nov-12: ZYA Gen HQ a Central Executive Committee pawl tuni zingsang in Nehru Marg a Zomi Council Office ah meeting nei uhi. Huai ah ZYA Guwahati Region honkhiat ding, ZYA Tuivel Block puahthak tungtang leh ZYA Mata Unit hon ding thu tel in thu poimawh tuamtuam genkhawm uh hi’n thusuak kingah hi..
Suunna
T. Thongkhanpau (58) f/o T. Ginbiakmang of Vengnuam, New Lamka zan nitak dak 10.00 velin BP stroke ziakin JN Hospital Imphal ah si a, tuni in kivui hi.
G. Khamzalian(77) s/o(late) G. Vungkai of Zenhang Lamka kalna ziakin zan nitak in si a,tuni’n kivui hi.
Mrs Nemzakhawl(75) w/o(late) Kaizadong of Mission Veng,Lamka zan zingsang baihtakin cancer natna ziakin si a, zan in Lamka hanmual ah kivui hi.Mrs Nemzakhawl mi tamzaw in a theihdan un S. Nengsuanmang’ nu chih ahi hi.
T. Lamchin Paite (43) s/o (late) Khupkhansem of Sinjol tulel a 1st MR Family Lane, Imphal ah om, zan nitaklam dak 2:20 vel in sungna in si a, tuni'n Chingmeirong a Christian Cemetry ah kivui hi.
Dy CM in Passing out parade uap
Imphal, Nov-12: Deputy Chief Minister banah Home tawh pawkhawm Gaikhangam in tuni’n Pangei a Manipur Police Training College ah Chief Guest a pang in Passing out Parade va uap hi. Aman a thugenna ah Manipur Police te’n amau khut ah dan(law) ut dandan in kitawi theilou ding uh a,dan kalh a mi mankhia in amau thuthu a that chihte om theilou ding chi’n gen hi. India in a thiltup ‘Look East policy’ hun ah Manipur in dinmun poimawhtak la ding a,huai hun ah Manipur police kichi force hoihtak hithei ding in tu akipan panla a kisak kholh ngai hi’n gen hi. Tuni a Passing Out parade ah Havilder telin police personnel 436 tel uhi.
IED 1 puakzak nailou mukhia
Imphal, Nov-12: Thoubal district sunga Lilong Tairenpokpi a Imphal-Moreh lamlian(NH- 2) jul ah tuni zinglam dak 8.30 velin naupang khat lamlian a pai in lamlian sik a om IED(bomb) kikoih khat mu a, thil omdan khawsung mite a theihsak nungin Lilong a om Assam Rifles post ah report pia uhi. Assam Rifles-te leh Lilong police te’n bomb omna mun delhpah uh a, police a bomb expert-te lemg sam uh a, huchi’n zinglam dak 11.20 velin muntuam ah bomb hihsia(defused) a om hi’n kigen hi. Huai IED bomb pen Russia a kibawl hi’n kigen a, battery 6 tawh kibulkhawm a, remote control device zanga puahsakzak theih dia om hi’n kigen hi.(UNA)
Estimates Committee in Moreh pha
Imphal, Nov-12: Manipur Assembly a Estimates Committee pawlin tuni’n Myanmar tawh gamgijul Manipur gamsung a om Moreh khua vapha uh a, huai ah ADC complex mun, water supply,Hospital leh mun poimawh tuamtuam pha in thil omdan ngentel takin enkhia uhi. Committee Chairman Dr Ng. Bijoy Singh in a gendan in tuni a a thil muhkhiak dan uh govt ah report pelut ding uh chi’n gen hi. Estimates Committee a member -Yamthong Haokip.MLA; Karam Shyam, MLA; Nunghlung Victor,MLA leh Th Biswajit Singh,MLA in Chairman Ng Bijoy Singh zui uhi.
Electoral tawh kisai hearing
Imphal, Nov-12: Kshetrigao, Thongju,Yaiskul leh Wangkhei Assembly Constituency a Electoral Roll ah min khumlut ding leh paihkhiak ding tawh kisai in hearing om ding hi. SDO/Porompat office ah Nov 22, 2012 in Wangkhei A/C tawh kisai hearing om ding a, Nov 23 in Thongju A/C tawh kisai in hearing om ding hi.Nov 24 in Kshetrigao A/C tawh kisai hearing om ding a, Nov 26 in Yaiskul tawh kisai in hearing om ding hi. Huai hun ah elector te’n document poimawhte tawikawm in mahni taksa va kilat ngai ding chi’n SDO/Porompat in thusuah bawl hi.
Examination form laktheih ding
Imphal, Nov-12: Council of Hr Sec Education Manipur(CoHSEM) in Class XI leh Class XII(Hr Sec Exam) 2013 ading Examination form hongtung ding Nov 17, 2012 kipan in akisaipih Institution tuamtuam a Head te’n Council office apan lathei ding in puang uh a, Hr Sec Examination form bel Dec 14, 2012 tan in piaklut theih ding a, Class XI examination form bel Dec 17, 2012 tan in submit theih ding chihthu om hi.