MLA(Singngat A/C) in langva hawmkhia )
Lamka, May-18: Ginsuanhau @ GS Haupu, MLA(Singngat A/C) in tuni sun dak 12:00 in Lailam Veng a Hauminlian’ inn ah Singngat A/C sunga huihpi hat in inn a mutsiat 60 neitute lak ah 0.30mm langva bundle 300 hawmkhia hi.Aman a thugenna ah election ma in Singngat A/C sungah bi-inn(thatches) omte langva a khenkhiak vek hiding chih a thugen sepsuah vek zawh hi naikei mahleh BRGF 2013-14 fund akipan govt in 20% asum in Rs 10 lakhs a sanction zang in langva kilei hi’n gen hi.
MLA in a genbehna ah BRGF, IAY leh Housing Scheme fund hongpaite langva leina dia zatzel hiding in gen hi. Langva tangkhate’n bazar a zuak mailou in mahni inn adia zangchiat ding in theisak a, a zuak teitei a om leh Police matsak hiding in gen hi. Mipi’n langva kihawm chi a mawt nget mailou ding in theisak a, Committee member te’n piakdia select a bawlte kia piak hiphot in gen a, huihpi’n a mutsiat inn 22 te lemlak(photo) ama’ kiang a omte tuni a kipe phot hi’n gen a, adangte tunung in awla hawmkhiat hidin gen hi.

DC office a Computer room plaster-na chimkhia
Lamka, May-18: May 3, 2013 zingsang in huihpi’n DC’s office top floor khuhna langva teng tuahkhia a, huai nung in room tuamtuam ah vuahtui omziak in room bangzah hiam ah tui kehthei a, plaster- na khenkhat leng kia hi. Nibangzahhiam paita in DC to PA room tung(floor) plaster- na kia a, vangphathuai takin kuamah deng khalou hi. Tuni sunnung dak 3:30 vel in Commputer room tung plaster- na lian simtak chimkhia a, agei zeka staff om khat dengkha dektak hi. DC office building kibawlna kum tamlua pai naikei mahleh room bangzah hiam a plaster- na kia a, tulela Mini Secretariat building kibawl lel leng quality hoihtaka maintain ahih keileh bawlzawh nung in a plaster-na a chipkhiakpah ding lauhuai a, quality maintain poimawh sakthu DC office staff khenkhat in gen uhi.

Lal Hossan, EM/ADC leh teamte hongtung
Lamka, May-18: Vangai bial MDC Lal Hossan, EM/ADC makaih in May 14, 2013 in Dr HL Liensang, CMO/CCpur; Dr Romeo Sanate, MO; Dr Robinson MO leh Gangmei, Finance Officer, NRHM/CCpur ten Lamka apan Vaingai area ah zinkhia uh a,mun tuamtuam pha in May 17, 2013 nitak in Lamka hong tungkik uhi.
May 15, 2013 in Dist Council leh CMO saina in Tuisen khua ah Medical Camp om a, khaw tuamtuam apan damlou tamtak en in dandoi leng manbei in pia uhi. Ankhasuo ah Vangai area a khua 35 akipan ASHA member-te kiang ah Mobile handset, Uniform leh damdoi pia uh a, ASHA member te’n a nasepna uh report pezel ding in EM leh CMO in theisak hi. EM/ADC in huai khua a private students’ hostel 2 ah LED-LAMP hunkhop pia hi.
May 16, 2013 in Savawmphai khua ah May 16 in HYA Jiri-Barak Valley Jt HQ saina in Hmar Martyrs’ Day lopna hun ah Lal Hossan, EM khuallian in pang a, pasal phate theih gige nang in suang lianpi hongkhia in thugenna hun nei hi. EM/ADC in HYA Jiri-Barak Valley panpihna in Rs 10,000/- pia a, Khangbor leh Savawmphai cultural troup-te’ ah Rs 1000/- tuak pia a, lasate Rs 1000/- chiat pia in mi 3 kiang ah red blanket pia hi. Ankhasuo area a khaw tuamtuamte’n EM leh CMO teamte damsawt ding in deihsakthu gen uh a, gari lut theih hunhun in Vangai tangdung a khaw tuamtuam ah programme saizel ding in ngen uhi. Lal Hossan, EM/ADC leh ateamte’ May 17, 2013 nitak dak 7:00 in Lamka hongtung nawn uhi.

Student Career Guidance Seminar
Lamka, May-18: EBCC Mualkoi ah tuni’n Students’ Career Guidance Seminar om a, M.Gouzamang Guite, EM/ADC in sinsak a, Local Pastor H.Jamkhanpau in student-te adingin Pathian kiangah vualzawlna ngetsak hi.
M.Gouzamang in agenna ah student-te’n tupguh tak leh tup kichian nei dingin hasuan a, a poimawhpen laisim hi a, Pathian laukawm a laisim din hasuan hi. Eimah siamna, lunglutna leh talent theikawm a, huai lama pai lamzanhuai leh nuam hi’n gen a, subject hoih chihziaka lunglutlouhna subject laksang in mahni lunglutna subject mah lak hoihzaw hi’n gen hi. student-te’n pichin hun ah mahni kitoudelh sawm a, midangte panpih thei dinga laisim dingin student-te hasuan hi.

Zan nitakin mi 11 kaikhawm
Lamka, May-18: SP/CCpur makaihna in ni bangzahhiam paisa akipan Police leh VDF te zan khawvak in khawpi sungah patrolling pai in duty zel uh a, zan nitak in mun tuamtuam apan zanlai a vakkhia mi 11 kaikhawm uh a, tuni’n Court in PR Bond in khah hi. Lamka khawpi sung leh a kimlak ah guta, lata leh gitlouhna a sanluat ziakin Police leh VDF te’ zankhaw vak in patrolling paizel uhi.

Anti-Terrorism Day zang ding
Lamka, May-18: Maniram Sharma, IAS i/c DC makaih in May 21, 2013 sunnung dak 1:00 in DC’s office a BRGF Resource Centre ah ‘Anti-Terrorism Day’ zat h iding a, huai ah Dist Level Officers teng telding uhi. Huailou in SDO te’ makaih in Sub-divn HQ tengah leng Anti-Terrorism Day zat hiding in kigen hi.

Knapsack sprayer vanzat hawmkhia
Lamka, May-18: Kamsuanlun, EM/ADC in a tenna inn Hiangtam Lamka ah tuzing in Tribal Affairs & Hills tungtawn in lou nasemte adia hongpai Knapsack Sprayer hawmkhiak in om hi. Amah a zinkhiak ziakin asikin apa, azi leh Chief Agent te’n mi(benefiaries) 25 kiang ah hawmkhia uhi. Chief Agent L. Thathang a genna ah benefiaries aphatuam theipen a zangding in ngen hi.Kamsuanlun in kumlui in a mipi laka ah LED torchlight hawmkhia a, pitek-putekte lak ah Christmas gift in blanket pia a, IAY, Kumut leh singnou(sapling) hawmkhia hi. Tukum 2013 in LED torchlight, singnou(sapling), Medical Financial Assistance leh Knapsack Sprayer hawmkhia a,May 3, 2013 a huihpi in tenna inn ahihsiat-te ading in Khupluai Veng Committee te’ khut ah langva bundle 20 leh Rs 10,000/- pekhia hi’n kigen hi.

Joint meeting om ding
Lamka, May-18: Tuibuong a SP office ah May 20, 2013 sunnung dak 1:00 in L.Mangkhogin, IPS, SP/CCpur leh Lamkhosem, DTO/CCpur makaih in CCpur Dist sung a Auto Assn, Diesel Auto Assn. School Van Assn. leh Taxi Jeep Assn. a President/Secretary teng tawh joint meeting om ding hi’n kigen hi.

Biometric Awareness Campaign
Lamka, May-18:Singngat Community Hall ah May 22, 2013 zinglam dak 11.00 in ‘Biometric Awareness Campaign’ om ding a, huai ah Ginsuanhau,MLA(Singngat A/C) in mipi paikhawmte ma ah thugen ding hi. ‘Biometric Awareness Campaign’ kikhopna hun Singngat Sub-division sunga khaw tuamtuam a hausa(village chief)te leh mipi tamtheipen tel dingin SDO/Singngat in theisak hi.

Life Skill Education Training om
Lamka, May-18: All Lanva Youth Club (ALYC) te saina nuai ah SMILE, IDSSS te’n DKA Austria panpihna in tuni zing dak 7:30 apan Rayburn Integrated Home, Lanva ah ‘Taining on Life Skill Education –cum-Career Guidance’ om hi. Huai ah CT Lian Guite, MBA (UK); Ms Elina; Maj. C Tonsing, 27th Assam Rifles; Dr. S. Nengngaihlian B.Sc, PG (Serti) MRE, D.Min (US) te’n thupi tuamtuam pansan in sinsak uh a, class X apan atunglam student hunkhop tel uhi.
SUUNNA
Mrs.Dimzaching (65) w/o Pastor Khumvel of Saidan tuni nitaklam dak 3:00 velin cancer in si a, May 19, 2013 in Saidan hanmual ah kivui ding hi.

IMPHAL NEWS
Governor in Assembly session sam
Imphal, May-18: Manipur Cabinet in a recommend dungzui in Manipur Governor Gurbachan Jagat in Manipur Assembly Budget session hongtung ding June 10, 2013 zinglam dak 11.00 akipan om ding in sapna(summon) notification suah chihthu om hi. Thusuak in a gendan in tutunga Assembly session om ding pen ni 6 sung hiding a, Planning Commission in Manipur Plan sum zah ding a bikhiahfel sak nunga sia session om masa hiding a,huaiziakin Manipur budget ding nawngkaina omlou in bikhiah theih hita ding chihthu om hi.

Tuni’n Manipur Cabinet meeting
Imphal, May-18: CM Cabinet Secretariat ah tuni sunnung dak 2.30 akipan in Cabinet meeting om a, huai ah zanlam zeka govt tawh kihou ding ziaka galvan koihkhia UPPK tawh kihou ding dan genkhawm uh a,akinlam a peace dialogue neih ding in lemsa uhi. Huai banah Imphal area sunga lampi kawchikgawp leng keklet ding taw kisai MAHUD te mawhpuakna piak a om leng genkhawm uhi. Kharif session a hasichi tuamtuam chiinna dfing a zat dingin buffer stock ah leihoihna damhoi(Urea) 10,000 metric tonne koih kholh dfing in lerng thukim uhi.

Class XII result ah grading system
Imphal, May-18: Council of Hr Secondary Education,Manipur(COHSEM) saina in hun paisa a result suah hun ah position ngahte amin uh taklat himahleh tutung a result suak dinga akipan in a paidan kikheng ding a grading system zat hita ding chihthu om hi. COHSEM in academic session 2011-2012 akipan grading system zat a sawm himahleh tutung a zat kipan theipan ding hi’n kigen a, 9point scale dan in grade piak hiding hi. Huai dungzui in
mark 91-100 kikal ate A1grade; mark 81-90 kikal ate A2; mark 71-80 B1;mark 61-70 B2; mark 51-60 C1; mark 41-50 C2; mark33-40 D grade ni. Mark 33 akipan anuai lamte Grade piak hilou ding uhi. 10 point - grade A1 . point 9 -grade A2, point 8-grade B1, point 7-grade B2, point 6- grade C1, point 5-grade C2 , point 4-grade D hiding hi,

Govt. khut ah Sana Konung om ding
Imphal, May-18 : Palace Compound a Sana Konung (Royal Place) tunung sawtlou in state govt nuai a koih hiding chi’n tuni’n Chief Minister O. Ibobi in gen hi. Huai thu tuni’n Imphal a International Museum Day zatna ah CM in a gen ahi hi. Kum 1977 akipanInternational Museum Day zat ahi hi. CM in a genna ah Sana Konung tulela Manipur Kumpi(lengpa) in aluah hi a, govt in a lakzawh chiangin hoihtak a kemhoih ding hi’n gen hi. Govt in compensation kilawm huntawk leng peding chi’n CM in gen hi.

HAC makaihin Get-to-together
Imphal, May-18: Dr Chaltonlien Amo, Chairman, Hill Areas Committee(HAC) in tuni zinglam dak 11.00 in Classic Hotel ah HAC Member-te special joint get-together hun zatpih hi. Huai hun ah HAC Power leh functions telin ADC tawh kisai leng thu tuamtuam genkhawm uh a, nitaklam in an nekhawm uhi.

RIMS in ambulance thak nei
Imphal, May-18 : Regional Institute of Medical Sciences (RIMS) in tuni in Ambulance thak a neih uh RIMS Director Prof. S. Sekharjit in honna nei hi. Hiai Ambulance bel state-of-the-art ambulance hi a, asung ah Electric Suction, hand suction, BP Pulse, Oxygen CO2 monitor, Injection system, Walkie-Talkie, Spacious Interior leh Mobile trolley telin thil tamtak tawh kithuah ahi hi.

Thau a kaplup siluang 1 kimu
Imphal, May-18: Bishnupur PS bialsung Nongshai Sanmaru leh Paringba kiksl a luipang ah tuni sunning dak 2.00 velin thau a kaplupsa pasal siluang khat kimukhia a, Bishnupur Police te’n siluang la in post mortem bawl dingin RIMS a misi koihna morgue ah koih uhi. Police-te gendan in misi a lu ah thautang lutna ma om a, NSCN(IM) hidia gintak thu kigen hi. Huai misi amin Poushindai Golmei(22) s/o Dasalung Golmei of Khoupum(Senapati district) hi’n kigen hi.

Cl X leh Cl XII result suahhun ding
Imphal, May-18:: BSEM saina in Feb 27-March 20, 2013 sung HSLC examination, 2013 om a, huai result May 20, 2013 in puankhiak hiding a, COHSEM saina in
Feb 25-March 25, 2013 sung Class XII/Higher Secondary Examination,2013 om result lernfg May 22, 2013 a puankhiak hiding a, NIC tungtawn a khahkhiak hiding chi’n website
http://manresults.nic.in/ ah taklat in om hi.

Tuni’n ‘ Vitiligo day’ zatna om

Imphal, May-18 : Indian association of Dermatologists, Venereolgists & Leprologists (IADVL), Manipur state branch te’n tuni Vitiligo day ahih tawh kiton in Hotel Imphal mun ah zang uhi. Hiai hun ah“Please care for Vitiligo Patients: Do not discriminate or stigmatise them; Vitiligo, we fight together: To heal the sufferers” chih thupi in nei uhi. Dr. Karam Lokendro Singh, President IADVL; Dr. Yumnam Lokendro Singh, Secy. IADVL; Dr. Devendra Singh, ex-President IADVL; Dr. Ranjita Devi, Dermatologist JNIMS leh Dr. Julie Leisangthem, Dermatologist JNIMS te resource person in pang uhi.