DC in Cyclone thu ah Press/Media-te kimuhpih
Lamka, May-17: Maniram Sharma, IAS i/c DC in tuni nitaklam dak dak 3:30 velin DC’s office a Conference Hall ah Press/Mediate kimuhpih a, huai ah S.Khaikhopau Ngaihte, BO HQ, DC’s office leh LT Puii, SDO/CCpur in leng ual uhi. i/c DC in a genna ah Tropical Cyclone (Mahasen) tulel dinmun in CCpur district adia lauhuai louin khua (weather) omdan leng hoih a, mipi kuapeuh patau leh lauthong louding in ngen hi.
Biometric Census tawh kisai DC in agenna ah tulelin CCpur Sub divn. ah SDO tawh kithuah in MANITRON teamte’ 16 akisuah in mun (location) 6 ah Bometric photo lakna la leMeeting tanungpen ah CCpur dist sung a Biometric census percentage 33 % kia tunglel hi’n gen a, Manipur govt in June 30, 2013 tan in Biometric census teng zawhsiang sawm hi’n gen hi. Aman agenbehna ah tunung sawtlou in sub-divn teng ah Biometric census photo lakna pat hiding a, zawh nailouh 67 % atamtheipen zawh kisawm hi’n gen hi. Biometric census photo lakna poimawh mahmah hi’n gen a, govt apan scheme tuamtuam muhnang in Biometric photo tungtawna AADHAR No. poimawh petmah leh hamphatna tuamtuamte’ govt in direct in bank account tungtawna peding hi’n gen hi. Biometric photo lakna tawh kisai May 17, 2013 apan Kangvai-Mata, Pearsonmun-Saikot ban ah khawpi sung ah mike tungtawn public awareness neih hiding in gen a, a kuapeuh Biometric photo kilakha nailoute’ tunung hun ah AADHAR No. poimawh semsem ding ahihziak in akilakha ngeiloute kila teitei ding in ngetbeh hi.

Cyclone thupi lua omlou
Lamka, May-17: Pingpei hattak leh huihpi kithuah ‘tropical cyclone’ Mahasen kichi dakkal khat a km. 55-56 ahat in zan nitaklam ahihkei leleng zankimlai akipan Bangladesh apan tumlam nawktou in NE India bial nawk ding chih hi a, CCpur district ah siatna a tut khak ding patauhhuai chih thuthang om mahleh tunitan in CCpur distic ah Cyclone thupilua tunglou hi. Zan nitak in Thanlon sub-divn. leh Tipaimukh sub-divn. ah Mahasen cyclone omzek mahleh hatlou a,mihing adia lau huailou ban ah thil hihsiat bangmah omlou hi’n SDO te’n DC’s office report pia uhi. Tuni zinglam in Tropical cyclone tawh kisai thiltung leh asia leng omlou hi, Dist Administration in khawpi sung leh akimlak ah mike zang in mipi pilvang in theihsakna bawl uh a, himahleh tuni nitan dak 11.00 tan in leng cyclone in Lamka khawpi nawk hiallou hi.
Thu kizadan in zan in Pherzawl telin Tipaimukh area ah vuahzu mahleh huih hatlou a, vuah bel nitum tan phial zu hi’n kigen hi. Tuni’n thuthank bangmah omlou a,vuah leng zu lou hi. Thanlon Sub-Division sungah leng bangmah omlou hi. Sinzawl ah May 16 in vuahzu mahleh huihnung lou a, vuah bel tamlou in zuden sim hi. Singngat Sub-division sung Kangkap ah May 16 in huihnung mahleh huchitel in hatlou a, Songtal ah bel huih hat a, lou kuante’n sunnung dak 2:00 in nasem thei nawnlou uh a, loubuk bangzahhiam leng kisia hi. Huaiziakin sunnung dak 2:30 in nasem theilou chi in innlam pai ua, Ni Mual a chihna mun uah innlam zuan a pailai Manzaching huih in mut leng a, akianga om Lianching kichi in ana mankha hi. Lianching in ana mankha keileh kawl ake ding hidan inleng thu kiza hi. Mizoram ah leng Cyclone Mahasen thu zak hilou a, North-East state lam hon nawk khalou hidan a theih in om hi.

Central palaite’n Lamka pha

Lamka,May-17:Balwinder Kumar, IAS, Development Commissioner (Handloom) Govt of India in tuni in Lamka hongpha a, Handloom tawh kisai a nasepdan mun bangzah hiam ah enkhia hi. Dev Commissioner in Lamka hong phakna Imphal akipan John B.Tlangtinkhuma, IAS, Director of Commerce & Industries ; V.Tualthang, Addl Director (Handloom); K.Lamlee Kamei, Dy Director (Handloom); Ravinder , Dy Director (WSC); Y.Santi Kumar Singh, OIC, NHOC; M.Saty Bhama Devi, President Apex Society; Y.Shushila Devi, Vice President Apex Society te'n hong zui uhi.
Lamka akipan G.Hanghal, General Manager, DIC/CCpur makaih in Bijang Self Help Group; Handloom and Sale depot, New Lamka leh New Lamka Handloom Industry, Sahei Road enkhia hi. Huai zawh in Sauliim Restaurent, New Lamka ah sun-an ne a, huaizawh in Imphal ah kiknawn hi.

Kipahpihna thil pia uh (PHOTO )
Lamka, May-17: BSI/Chandel Branch a Deputy Manager Pumzahau in kum 31 val etton tham chinga na asep nungin Feb 28, 2013 in retired hi.Pension tan nasemthei a a om kipahpihna ah State Bank of Officers’ Association in cheque in Rs. 10,000/- thon uh a, S. Kaikhanthang, Chief Manager, SBI/CCpur Branch in a chamber ah zan in Pumzahau khut ah pekhia a, huai zawh in staff-te tawh singpi dawnpih uhi.

Women SHG thu genkhawm

Lamka, May-17: Maniram Sharma, IAS, i/c DC makaih in DC office a Conference Hall ah tuni sun dak 1:00 apan Women Self Help Group tawh kisai meeting om a, bank tuamtuam apan official-te leh NABARD-te tel uhi. CCpur Dist sungah tulelin Women Self Helf Group bangzah kibawl (form) khia? WSHG kibawlkhia te'n Bank account hong uh hiam? account kihongkhia te' ah Credit linkage om hiam chihthu kikum uhi.

Toilet (kumut) vanzat hawmkhia
Lamka, May-17: Khaipao Haokip, MDC in tuni’n a tenna inn New Boljang ah a Constituency a khua 5 apan beneficiaries 160 te’ kiang ah ekbukkuang (kumut) leh langva hawmkhia hi. Khaipao in a gendan in kumlui 2012 in IAY langva hawmkhia a, tukum in Torch Light, Pump set, Medical Financial Assistance sum, Knapsack Sprayer, Singnou (agriculture sapling) leh Kumut hawmkhia hi'n gen hi. Thil kihawmkhia tawh kisai beneficiaries te'n bazar ah zuaklou a, mahni inn chiat ah a phatuamtheipen a zangding in theisak hi. Hamphatna tuamtuam kihawmkhia hileleng atangkha nailoute'n atankhak theihnang un govt ah panlak hilel chi'n gen a, tukum leh kumnawn 2014 tan in mi tuamtuam hamphatna tangkha nailoute'n tangkha ding uh hi'n gen hi.

46-AR te’ saina in Dental Camp

Lamka, May-17: 27-Sector Assam Rifles nuai a 46-A/R-te saina in tuni zinglam in Lailam Veng a Old Age Day Care Centre ah Free Medical-cum-Dental Camp om a,huai ah Dr Manmohan Vishua Kumar, Asst Commandent, 14-Dental Unit, 27-Sector A/R, Dr Lalrinpuia, Asst Commandent, 46-AR leh K.Mazit Rongmei, Nursing Asst. 27-Sector A/R te’n damlou leh ha (teeth) buaina neite en uh a, manbei in damdoi leng pia uhi.

One month MBBS Crash Course kipan
Lamka, May-17: Dr Liangoumuan leh Paukhenkhup saina in St Pauls’ Institute, New Lamka ah tuni sunnung in kha khat (one month) daihding Special Crash Course for Manipur MBBS Entrance Exam kipan hi. Crash Course hunsung in Dr Liangoumuan Samte, Ginsuanmung, MSC (Physics) leh Ruth Nemlian, MSC (Chemistry) ten sinsak ding uh a, nitaklam dak 3:00 in class awm gige ding hi’n kigen hi.

Mi 2 te bail in pawtkhia
Lamka, May-17: 1/11-GR te’n Feb 26,2013 zingsang in Torbung a IED bomb hihpuakte laka tel UNLF cadre W Shanti Kumar @ Maimu (32) s/o Wangjam Kesho Kumar of Torbung leh Lalthanglien @ Kancha (27) s/o Dongvom Vaiphei of S. Bualjang May 10, 2013 zinglam dak 9:30 vela mankhia in galvan khenkhat leng mukhia uh a, Police te’khut ah pekhia uhi. Police te’n mi 2te JMIC/CCpur court ah pawkhia uh a, ni 7 sung Police khut a om in tuni’n JMIC/CCpur court in mi 2te bail in pawtsak a, Police te’n FIR No.21 (2) 2013 CCP-PS U/S 121/121-A /302/307/326/34 IPC, 5 of Explosive Substances Act & 20 UA (P) Arms Act registerd uhi.

Life saving drug man kiam ding

New Delhi, May-17: Damdawi chituamtuam 348 vel aman kiam a, tunung sawtlou in Drug Price Control Order akipan theihsakna bangin 80% vel kiamsuk dinga gintak hi’n kigen hi Huai tawh kitonin Industry expert te’n new drug policy kizang hileh anti-cancer leh anti-infective drug te leng 50-80 % a kiamding hi’n gen uhi. Government in Drug Prices Control Order (DPCO), 2013 kichi suahkhia a kum 1995 a thupiak omsapen khekkhiak hi a, zanhal akipan hiai thusuah leh thupuan zatpat hita hi. Order thak zat ahihtawh kiton in tunung in state tuamtuam ah zat hidinga, National Pharmaceutical Pricing Policy (NPPP) 2012 tngtawn a essential drugs 348 leng kiamsak hiding hi.
SUUNNA
Daikhanthang (76) f/o Kamenmang of Hebron Veng, New Lamka tuni zing dak 2:00 velin awmna in si a, YPA Hanmual, New Lamka ah kivui hi.
Thangchawisang (36) s/o Upa Jangkhawgin of Hmar Veng tuzing dak 3:30 velin sungna in si a, Hmar Veng hanmual ah kivui hi.

IMPHAL NEWS
Manipur adia masapen dingin
Everest tang ah numei kal

Imphal, May-17: NEC leh State Planning deptt, Manipur sponsored na in Mount Everest tangdawn a kalsawn ‘The 1st North East India Mount Everest Expedition Team’ ah Manipur apan N Bidyapati, Arunachal Pradesh apan Nima Lama leh Sikkim apan Anand Gurung te’ tuni zinglam dak 9:30 in Everest summit tung uh hi’n kigen hi. Bidyapati ahihleh Manipur apan Mount Everest tang dawna numei kal masapen hi’n kigen hi. Team member dangte leng zingchiang in summit kal ding uh a, Expedition team in May 12-14, 2013 sung in summit kal ding chih himahleh khua a siat siat banah huih leng 70-80 miles per hour in nung a, temperature leng -30 degree Celsius tungsuk in Base Camp zuankik mai uh hi’n kigen hi. Mount Everest ah kallui in ussian climber Sergey Ponomarev in a hinna tan a, helicopter zangin a climber hunkhop leng hutkhiak a om in, Mount Everest ah kum 1953 apan tuni tan in climber mi 300 si hi’n kigen hi.

North AOC ah Truck in mi 1 gawilum

Imphal, May-17: North AOC a Imphal Hotel kong ah tuni sunnung dak 1:00 vel in Chingmeirong apan North AOC zuan tuak Truck (No. MN-01-7661) in Kinetic Honda ( No. MN-1H/0743) a nunglam phukha in Kinetic Honda a numei tut atuang Phuritshabam Sobita Devi (36) d/o Ph. Subol of Thangmeibang Hijam Dewan Leikai kia in Truck in alu gawi phei in a mun mah ah si n hi’n kigen a, Honda Driver bel bangmah chilou hi’n kigen hi. Thiltun zawh phetin Tuck driver leh handyman-te’ taimang uh hi’n kigen a, Police te’n thiltung tawh kisai case file uhi. Sobita Devi ahihleh Chingmeirong a City Hospital ah Nurse semlel hi’n leng kigen hi.

BSNL employee-te’ kiphin ding
Imphal, May-17: BSNL Management leh Forum of BSNL Union/Association in June 12, 2012 in BSNL employee- te’ adia 78.2% IDA fixation piak ding a kihoulem in suai a kaih banuah BSNL employee te’n June 13, 2012 a Indefinite strike a neih uleng khawlsan uh hi’n kigen hi. BSNL Management te’ kiangah tam veitak theihsakthak himahleh employee te’ 78.2% IDA fixation piak ding a Order a suah ngei louh ziak in May 9, 2013 in New Delhi ah Forum of BSNL Union/Assn te’n meeting nei uh hi’n kigen hi. Meeting hun ah thupukna a lak dungzui un May 22, 2013 in SSA/Circle HQ leh BSNL ah demonstration nei ding uh hi’n kigen a, June 5, 2013 in Dharna nei ding uh a, huai nung tanpha ah 78.2% IDA fixation order a suah tuankei leh June 12, 2013akipan Indefinite strike pat hiding in Forum of BSNL Union/Assn thsuak om hi.

Adoption of the 5th Village Chief

Imphal, May-17: Sadar Hills a Saikul-Sub Division in a huamkhak Utoulok Village ah tuni’n “Ceremonial Adoption of the 5th Village Chief of Utoulok Village” om a, Village Chief hihna R. Kashongkoire khuksak in om a, huai hun ah Y. Nabachandra, President, UCM, Thangngam Lupheng, Kuki Innpi Manipur(KIM), Saikul leh makai tuamtuam in va uap uh hi’n kigen hi. President Saikul KIM in a genna ah Village Chief in thilhih theihna tuamtuam nei mahleh a zatkhelh louh ding in gen a, UCM President in leng Manipur a kipum khatna leh ki-itna banah kituak tak a omkhomna ding in sahkhua leh Nam chihte’ ah kisim mawhlouh ding hi’n taklang a, Hills leh Valley kal a kituahlouhna omte’ paihkhiak ahih chianga ki-itna leh muanna om ding hi’n taklang hi.

State govt. kiangah ngetna bawl
Imphal, May-17: Imphal area a Street Vendor pawlin tuni’n thusuah a bawlna uah State govt. kiangah ngetna bawl uh hi’n kigen hi. Street Vendor te’n meh (vegetable) leh thil tuamtuamte’ zuakna ding mun kizentak a neihlouh ziak un, niteng nekzonna lam ah buaina nasatak atuah banuah lamgei a thil azuak ziak ua, police te’ khut thuak mun mahmah uh hi’n taklang uh a, vante’ uh zuakna ding mun kizendeuh bawlsak dingin State govt. ah ngetna bawl uhi.

Best Yoga Teacher Award sang
Imphal, May-17: Kh Biradhaja s/o Khawirakpam Gukul Chandra of Ningthoukhong Ward No. 11 in New Delhi a May 9, 2013 in ‘1st International Gold String Yoga Marathon’ hun ah, “Best Yoga Teacher Award” vala hi’n kigen a, huai hun ah mun tuamtuam apan Yoga Guru tamtak tel uh hi’n leng kigen hi.

Mamtaj sih ziakin kiphinna om; Union hingthak sak din ngen
Imphal, May-17: Urup mun a Mamtaj(17) d/o Md. Angou Khan in a ngaih zawngpate’ inn ah poison don in kithat a, hiai thu ziakin tuni’n Yairipok ah Meira Paibi leh Phoudel club member te’n sit-in-protest nei uhi. Huai hun ah Mamtaj ngaihzawngpa ziak a kithat hi’n gen uh a, amah matkhiak banah dan tawh kituak a gawt dingin demand uhi.
Manipur University a student leh research scholars te’n kum 2005 a University act dungzui in University Student Union hihbei a om, hinthaksak tupna in Coordinating Committee leng bawlkhia uh a, Chancellor kiangah demand point 16 piak hiding in taklang uhi.

Cyclone ‘Mahesen’ in mi tamtak subuai
Imphal, May-17: Manipur Govt. in Scientist te’ suikhiak dan in Cyclone “Mahasen” n zan nitaklam apan Manipur nuaikha maithei chihziak in mipite’ pilvang ding leh tuni’n state pumpi a school leh college omteng khak ding in thupia a, himahleh cyclone in Manipur nuai khalou in district tuamtuam ah khua niim in vuah tamlou a zuk ban ah huih leng a ngeina bang a nung hi’n kigen hi. Imphal area ah leng kivenna dan in zinglam in dawr hong om kei mahleh sunnung in ngeina banga dawr leh establishment-te’ hon in om nawn a, JNIMS Hospital ah leng nidang tawh teh in OPD a kiensak leng tawm mahmah a, Government office te’ ah leng office kai mi tamlou in office hours beima in staff tamzaw in innlam zuan chiat uh hi’n kigen hi. UNA