CM makaih delegate mi 40 tuni’n Myanmar ah zin uh
Imphal, May-25: Chief Minister O. Ibobi makaihna in Minister,MLA,Officer leh business community kigawm delegate mi 40 in May 28 & 29, 2013 sung Myanmar gam a Moniwa leh Mandalay ah North East India-Myanmar Business Conclave a tel ding in tuni sunnung in zinkhia uhi. Indian Chamber of Commerce vaisaina a Business Conclave a tel dingin Chief Minister in azi Mrs O. Landhoni Devi,MLA leh atapa O. Suraj Kumar tonpih a,tuni nitaklam dak 3.00 in Kolkata flight ah lengkhia uh a, May 26, 2013 zingsang dak 2.00 in Kolkata akipan Bangkok zuan in lenna in leng ding uh a, Bangkok akipan Mandalay tan lenna in leng nawn ding uhi.

Tuni nitaklam dak 3.00 in Commerce & Industries Minister Govindas Konthoujam, Education & CAF & PD Minister M. Okendro, PHED Minister I. Hemochandra, Works Minister Dr Kh. Ratankumar, Parliamentary Secretary M. Prithviraj, MTDC Chairman T. Manga Vaiphei leh DK Korungthang,MLA makaihna in official team hunkhop tawh aki gawm in mi 33 velin Moreh zuan in gari in pai uh a,tuni nitakin Moreh a International Trade Centre ah Myanmar tawh kala business thil leh kisumdawntuahna bangchileh hoihzawsem thei ding hiam chih Business Conclave a genkhawm ding agenda tuamtuam buaipih uh hi’n kigen hi.

Chief Minister makaihna Manipur apan delegate team mi 40 te Sagaing Division a Chief Minister in a chial ziaka Myanmar a zin uh hi’n kigen a, Chief Minister leh a teamte Myanmar a a om sungun Tourism, Imphal-Mandalay Bus Service, Manipurt in Myanmar ah electric/Power a supply ding tungtang leh trade tawh kisai a kizopna hoihsem om theihna ding thil tuamtuam leng genkhawm ding uh hi’n thutut kingahna in gen hi.

Champion Trophy lopna tuni’n om
Lamka, May-25: All Manipur Football Association(AMFA) saina in Imphal a Artificial Turf Football Ground ah May 21, 2013 in ‘24th Inter Dist under-16 yrs boys football tournament’ final kimawlna ah CCpur team in Champion hihna la uh a, tuni nitaklam dak 3:00 in Hiangtam Lamka ah CDSA office ah trophy lopna om hi. Huai ah Michael Ginzasuan, DSO (CAF & PD) khuallian in pang a, Guest of Honour in G.Thangkhosuanmung, Chief of Hiangtam Lamka atel theihlouh ziak in asik in V/A Secy Siamchinkhup pang hi. Special Guests in Sumlianthang, MDC & President, VSAC leh Kiamlou, Chairman, BOT (ZFC) pang uhi.

Chief Guest M.Ginzasuan in a genna ah AMFA saina a CCpur district in U-16 yrs ah champion trophy alak lamdang leh kipahhuai mahmah hi’n gen a, player-te ziak in nu-le-pa, coach, CDSA leh Dist minhoih hi’n gen hi. Tournament om dek chiang in CDSA makaite’n alanglang ah sum kaikhawm in khutdawh mah banghial uh a, tuailaite itna ziakin azumhuai hun ah leng kuhkaltaka pan alakna tung uah pahtakthu gen hi.CCpur district ah sports tawh kisai facilities omte a phatuam theipen a zangding in tuailaite hasuan a, maban ah National leh International level a kimawl theiding bawlkhiakna ding a panla dinginCDSA makaite leh player-te’ hanthawn hi.

Felicitation-cum-Thangks giving program
Lamka, May-25: New Lamka a St Peter's School ah tuni zinglam dak 10:00 in huai School apan HSLC passed-te kipahpihna leh kipahthu genna (Felicitation-cum- Thanks giving) program nei uhi. Huai ah L.Liankhanlal, Principal in School tawh kisai thugen a, huaizawh in Khupsuanthang, Vice Chairman, Managing Board makaih in Award hawmna om hi. Rev. V.Thangkhangin , Director (I), EBC in hasotna thu a gen banah school leh student-te adin thumsak a, St Peter's School wepsite thak http://spsest 2005.wix.com/sps 2005 hongkhia hi.

L.Kamsuanpau Ngaihte in ‘(late) Khup and Niang Memorial Award’ (over all topper) Rs 2000/- , (late) Amzathang Memorial Award (Maths topper) Rs 1000/- ban ah Match teacher pa' apan Match subject ah letter mark muhziak in kipahmah Rs 1000/- ngah hi. Science subject ah Y.Niangsankim in letter marks a muhziak in kipahman Rs 1000/- ngah hi. St Peter's school ah tukum a HSLC Exam ah 1st division in mi 6 leh 2nd division in mi 19 passed uhi.

Khanthang in Mohammedan SC zom ding
Lamka, May-25: CCpur dist. apan football siam a minthang Khanthang Paite in Pune Football Club ah kum bangzah hiam atel nungin season thak ah Kolkata Mohammedan Sporting club ah kum khat sung tel dingin zan nitakin contract ah suaikai hi’n kigen hi. Khanthang Paite in seasion beisa ah Pune FC ah kimawl a , Indian League ah 2nd Position in pang hi. Aman tutung Pune leh Goa club tuamtuam apan offer mu mahleh a sepna pen Kolkata based ahihman in Kolkata teamte offer la hi’n gen hi. Mohamedan Sporting ahihleh tukum a I-league adia 2 division apan promote a om uh hi’n kigen hi.

Songtal gam ah Vompi khat kaplum
Lamka, May-25: Thanlon sub-divn sung Songtal leh Kangkap kikal ‘Suangdawh tang’ kichihna kimlak ah sabeng pawlkhat in vompi tal(wild bear) liantak khat kaplum uhi. Thu kizadan in Songtal apan sabeng dinga gamvak Vungzapau, Songliankap leh Tungin te’n zan in gamlak ah vompi tuk 5 vela lian, a awm(chest) a ‘V’ liantak kigelh tuakkha uh a, Vungzapau in kaplum in Songtal khua ah pawtung uhi.

Tulai in natna hii leng om
Lamka, May-25: Tuktui luan kipatdek ban ah nisat hun ah khua lumlua, vuahzuk hun in a votpah guihguih ban ah theigah nektheih chi tuamtuam omziak in tulai in Lamka khawpi leh ah singtanglam ah natna hii leng om hi. Naupangte lakah luna leh khawsik hii leng a, piching lak ah santen leh sungkhawh hii leng hi. Theigah chituamtuam nektheih panpan a, mahni damtheihna kuapeuh in kepbit poimawh a, adia in theihai (mango), theimul leh theigah tuamtuam a min nailoute leh bazar leh lampi geia nektheih kizuakte mawk neklou ding leh tui suansousa/filtered kia dawn dingin mipi theisak uhi.

Nehru Marg junction ah gari kiphutuah
Lamka, May-25: Nehru Marg -IB road kisuktuahna Tedim road ah tuni nitaklam dak 3.30 velin Activa leh Van kiphutuah kha uh a, a liamna omlam bel theih hilou hi. Gari kiphuttuah phet in traffic police te’n enzui pah uh hi’n kigen hi.

Mid-Day Meal tungtang training
Lamka, May-25: CCpur dist a school tuamtuam Mid Day Meal tangkha teng ading in June 3, 2013 inIB Road a Synod Hall ah 'Mid Day Meal Implementation & Capacity Building' training program om ding hi. Huai ah block teng apan Mid Day Meal tangkha, govt H/S, Aided School ban ah Dist Council nuai a school te apan Head-te telding uh a, Directorate of Education(S) apan mi 6 in sinsak ding hi. Training atellou a om leh Directorate of Education (S) in action lading hi'n kigen hi.

Voknou 2 in lu(head) 1 kikop
Lamka, May-25: Tuibuong apan gamlalou Bethel khua ah Khupzapao in vokpi a vulh in tuni zingsang dak 1.30 velin nou nei a. voknou(piglet) piangkhe phet 9 laka 2 in lu(head) khat kikop uh a, a taksa kahiang(organ) uh leng atamzaw kikop uhi. Huai voknou 2 lu kikap khawmte’n khe 8 leh mei 2 nei uh a, bil 3 nei mahle uh a 3na pen leng 2 kigawmkhawm hi. Voknou pen anu(female) tuak hi a, rong kibang ahihbanah khat neuzaw a, voknou dang 8te bangmah chilou hi. Vok neitu Khupzapao in a gendanin vokpi in nou 3vei neikhin mahleh a lamdang om nailou a, tuni zingsang in sisa in voknou dangte kiangah mukhia hi

Tedim Road hahsiang
Lamka, May-25: Rayburn College a National Social Service pawlin tuni zingsang in Rayburn College apan Tedim Road zui in lampi a ninneng tuamtuam omte hahsiang uh a, akhop khiat tenguh pick-up gari zang in bawkhe zel uhi

Khua 128 ah thousilen diah hiding
Lamka, May-25: Dist Malaria deptt saina in Saikawt PHC nuai a khaw tuamtuam ah June 2013 khasung in ASHA member te'n Bednet Implegnation (damdoi a thousilen diah) ding uhi. Saikawt PHC nuai a Tuaitengphai PHSC bial ah khua 9, Khuga Dam PHSC nuai ah khua 9, Saipum PHSC bial ah khua 12, Alfa PHSC bial ah khua 14, Khuangkhai PHSC nuai ah khua 21, Khaukual PHSC nuai ah khua 29 leh Tuining PHSC nuai ah khua 34 ah damdoi in thousilen (mosquito net) diah ding uhi.

Neihoiching’ pasal train apan kia in si
Lamka, May-25: New Zoveng a om Ms. Neihoiching’ pasal Const. Raj Shekhar Palke zanhal(May 23) in Assam a Kokrajhar ah train apan kia in si hi’n thutut kingah hi. May 2, 2013 a huihpi hat in a inn uh amutsiat ziaka thil omdan enkhe din ni 30 sung suty la in hongpai a, nasep zawh nailouh ziakin suty ngetbeh dinga kuanlai si hi’n kigen hi. Aman North Bengal Frontier BSF a Raiganj ah a om 140-Bn BSF sem a, nidang in 160 Bn-te Lamka a hong omma 140-Bn te omlai in azi tawh kum 5 paisa in saptuam danin kiteng uh a, atanu uh Sneha leng kum 2 val in upata hi. Accident ziaka a sihnung in post-mortem bawl hi a, azi in a contact chiangin govt. record dana a omlouh man in BSF heutute’n azi kianga puak sawmlou in Karnatak a a innkuante kiangah puaktung sawm uh hi’n kigen a, azi leh a tate patau takin koih uhi. Raj Shekhar in govt. record ah azi Ms. Neihoiching khumlut kha nailou ahihman in azi mangbang takin koih uh chihthu kiza hi.

SUUNNA
Zoramthar(37) s/o (late) Hnginglou of Tedim Road, UBI building tuni nitaklam dak 3:30 velin sungna in si a, May 26, 2013 in Lamka hanmual ah kivui ding hi.

IMPHAL NEWS
Assembly session July 1 tan om ding
Imphal, May-25: Manipur Assembly a Business Advisory(BAC) pawlin June 10, 2013 akipan Assembly Budget Session om ding July 1, 2013 tan sutzop ding in bikhiah uhi. Assembly session ni 21 om sung in Kiginni leh Pathianni teng sitting omlou ding hi.Huaiziakin June 10, 2013 akipan July 1,2013 sungin Assembly session ah ni 16 sung sitting om ding hi.

High Court in Chief Secretary sam
Imphal, May-25: Manipur govt nuaia Administrative Secretaries/Heads of deptt tuamtuam in Manipur High Court apan thupiak(direction) ahuntaka a ngeingaihlouh sek ziakun Manipur High Court a Chief Justice in Manipur Chief Secretary sapna(summon) pia hi’n kigen hi. Thu kizadan in Chief Justice Abhay Manohar Sapre in May 21, 2013 in Chief Secretary DS Poonia sam a, bangziakin Administrative Secretaries leh Head of deptt te’n Court apan thupiak omte nelhsiah a koihdap sek uhiam chih tanpha dotna bawlkhum hi’n kigen hi.

Court apan thupiakte ni 30 tana suizui ding hitangpi mahleh huai sepzuilouh a koih hisek a, huaiziakin Court thupiak zahlou chi a ngawhna tawh kithuah Contempt case tamkhop om hi’n kigen hi.

Eviction thuakte’n kiphinna pan ding
Imphal, May-25: State govt in Kabo Leikai ah 5-Star Hotel bawlsawm in apaisa Pathianni akipan in innkuan 28-te eviction a bawl ziakun huaite maban ding a lungkhamhuai banah a tate’ uh exam dingte’ awlmawh huai mahmah hi’n kigen hi. Eviction thuakkhate’n patta piak ahih ban uah dan tawh kituaka teng uh hi’n gen uh a, revenue department te’n leng kum 50 paisa in amau apan tax la uh a, court in leng Kabo Leikai a eviction bawl ding panlou ding in thupe mahleh court thupiak zuilou a eviction kibawl hi’n gen uhi. Eviction ah Irong Tangkhul Baptish Church, Naga River Fellowship leh Gorkha Baptish Church leng hihsiat in om hi. Eviction drive mawhpaihna in Kabo Leikaite’n May 27, 2013 ni’n Rally pai ding ua gintak ahi hi.

Khamtheih zuak mankhia
Imphal, May-25: Muslim Civil Society Body – Anjam Islah-E-Muaas-harha (ANJUMAN) volunteer te’n zan nitaklam dak 3:30 velin Lilong area ah khamtheih zuaka kipei Md. Nasir Khan(30) s/o Md. Abdul Hakim of Lillong Chingkha Makha akipan Spasmoproxivon capsule tang 2,347 mukhia uh a,amah leng mankhe pah in khamtheih muhkhiakte tawh Lilong Police ah pekhia uh hi’n kigen hi.

Tax sangtak phut ziakin dawr khak
Imphal, May-25: NSCN-IM te’n Japhou Bazar a dawr neite apan tax sangtak laksawm uh a, dawr nei te’n lungkimlouh latsakna in tuni’n Japhou Bazar a dawr omte sawtlou sung khak uh hi’n kigen hi. Akigen dan in kum dangin NSCN-IM te’n kum 1 a ding in dawr khat apan Rs. 300 la zel mahle uh tukum a Rs. 1000 lak sawm uh hi’n kigen hi.

RIMS doctor-te’ ziaka si hi’n ngawh
Imphal, May-25: Sagolband Tera Loukrakpam Leikai ah tuni zinglam dak 11:00 vel in Diesel auto (No. MN01Y/3888) leh Maruti Van (No. MN01X/3282) kiphukha uh a, huai a liam papi khat RIMS hospital puaktung himahleh damzoulou in si hi’n kigen a, atapa P Iboyaima (75) of Sagolband Pukhrambam Leikai in RIMS doctor- te ziaka apa si ngawh hi. A gendan in Sagolband Tera Loukrkpam Leikai mun ah Van sungah driver telin mi 5 tuangte leh Diesel auto ah numei 4 tuangte’ kiphukha in aliamte’ RIMS puaktung in om uh a, Casualty ward a kikhak ziakin OPD ward ah ticket lak ding banah buaipih ding tam mahmah a, accident a liamte’ etkol louh in om uh hi’n gen a, sunnung dak 1:00 in Casualty ward honpat hi a, huai hun ah apa in aliamna thuak zoulou in sikhin hi’n gen hi.

CBSE in Class XII result puangding
New Delhi, May-25: Central Board of Secondary Education (CBSE) official thusuakin a gendanin May 27, 2013 (Seppatni) zinglam dak 9:00 in Senior School Certificate Examination (Class 12) results puankhiak hiding hi. Tukum 2013 in CBSE nuaia Class XII exam-na ah India gam pumpi huap in candidate 9 lakhs val om hi. Student-te hi’n school authority hitaleh, CBSE websites www.results.nic.in, www.cbseresults.nic.in leh www.cbse.nic.in tungtawnin result lakhe theiding uh chi uhi. Tualou in, telephone numbers 011-24300699 leh 011-28127030 ah leng result kan theih ding a, service providers khat peuh kiangah leng SMS tungtawnin Roll Number thon in result ngahtheih ding chih ahi hi.

BJP leh AGP in RS poll boycott
Guwahati, May-25: Assam a Opposition parties BJP leh AGP te’n May 30, 2013 in Assam h Rajya Sabha member 2 telna ding ah kigolhlou ding uh ahihdan uleh BJP leh AGP in boycott uh ahihdan puang uhi. Rajya Sabha election dingah Prime Minister Dr Manmohan Singh leng candidate khat in tel hi.

MLA 1 suunna in Rs 10 lakh pia
Aizawl, May-25: Tuma deuh a damlouh ziaka si Congress MLA B Lalthlengliana innkuante’ kiangah sigalna dan in Mizoram govt in Rs 10 lakhs pia ua, Mizoram state kilchih dengsuak pah hi’n kigen hi. Lalthlengliana MLA ahihleh Aizawl Bethlehem Veng a om ahi hi. Mizoram Assembly Speaker R.Romawia makaihin MLA suunna program om hi.

Speaker in agenna ah, MLA suunna hun zat azekai ziak bel hun kibichilh luat ziak banah hun lemtang on pahlouh ziak hi a, suunna program kichi program kipahhuai ahihlouh ziakin kuamah a kithalawp omlou a, lungsim giktak tawh suunna hun neih ahih sek ziakin haksa mahmah chi hi. Speaker in agenbehna ah, MLA’ innkuante’ kiangah death gratuity dan a Rs. 10 lakhs piak a om thil lamdang hilou in govt in tulaitak a dan azat lel tawh kituak a piak a om mah ahi chi hi.