Parliamentary Secy in hong
Lamka, May-31: Pearsonmun a ICAR mun ah tuni zinglam dak 11:00 in Krishi Vigyan Kendra,CCpur Administrative building honna program om a, Health Minister Phungzathang Tonsing a hawh theihlouh ziakin Vungzagin Valte, Parliamentary Secy(Hort & SC,CADA) khuallian apang in hong hi. Huai ah Chairman in Dr J.S Samra, CEO, National Rainfed Area Authority, Planning Commission pang a, Guest of Honour in Maniram Sharma, IAS, i/c DC leh Functional President in Dr. S.V. Ngachan, Director ICAR, Umiam, Meghalaya pang hi. Program zatna ah Baljit Singh Kasana, DIG/BSF; Dr N.Praksah, Jt Director ICAR, Manipur Centre tel in Dist Level Officer hunkhop in uap uhi.

Vungzagin Valte in agenna ah India gamsung pumpi ah ICAR centre 99, Agriculture University 53 ban ah ICAR branch KVK tamtak om hi’n gen hi. ICAR, KVK, Agriculture University pankhawmna ziakin India gam ah Agriculture products leh Horticulture product tamtak kibehlap hi’n gen hi. Pearsomnum a KVK centre ah thil poimawh tuamtuam omte Dr JS Samra, CEO in etkaipih dingin ngen hi.

Dr JS Samra in a genna ah mundang a KVK building kibawlte tawh Pearsonmun a building kibawl kikhelua ahihdan gen a, thil kisamlaite head of institution in hihfel ding in theisak hi. Central Govt in Look East Policy tungtawn in NE adia phatuam ding thil tamtak semkhiak sawm hi’n gen a, mi tengin energy leh tui poimawh petmah hi’n gen hi. KVK Pearsonmun a Scientiest-te’n mipi phattuamna ding leh gam khantouhna dingin gin awm, kuhkal leh chi taktaka pang dingin ngen a, Pearsonmun a KVK building midang ading hilou in mipite a ahihziak in hoihtaka kembit a, i tate, i tute un ahamphatpih theihding un building kembit ding in mipite ngen hi. Program hun ah khualliante’n laibu (booklet) hongkhia uh a, loubawl mi bangzah hiam kiang ah haichi tang (seed) tuamtuam chituamtuam leng hawmkhia uhi.

Class X te kipahpihna leh Award hawmna
Lamka, May-31: Tuni sunnung in Salt Brook school ah BSEM saina a HSLC (class X) pass te kipahpihna leh Award hawmna om a, huai ah special guest in Manga Singson, Chairman, Managing Board leh Dr. D.S. Haokip, Vice Chairman, Managing Board pang in award hawmkhia uhi. Tutung in Salt Brook school ah 1stdivn ah 58 leh 2nd divn ah 5 in passed uh a, Zoui Neihsial in All Round Topper hihna la hi. Rev. Lamkhohen Meritorious Award hawmkhiat hi a, mark 80 % tunglam mu mi 3 kiangah kipahman in Rs. 3000 + Citation;marks 70 % tunglam mu mi 14 kiangah kipahman Rs 2000 + Citation leh marks 60 % tunglam mu student 41 kiang ah kipahman Rs 1000/ chiat ban ah letter marks produce subject teacher 6 te kiang ah M.Sheipu Excellency Award Rs 2000 + citation piak in om uhi. Tutung class X examination 2013 ah Salt Brook school apan student 78 in subject tuamtuam ah letter mark mu uhi.

Ni 6 nungin sikkilh thakhia
Lamka, May-31:Ngaisonkim(6) d/o N.Songbiaklian of Songtal, tulela Zuihnuam road, New Lamka a om in kal paisa Kiginni in sikkilh(R-pin kichite) amuam laitakin valhkha a, a innkuante patau taka omlai ni 6 nungin thakhe thei chihthu om hi. Ngaisonkim gilsung a sikkilh om ahihdan x-ray tungtawn in doctor-te’n theikhia uh a, Imphal a puaktun nungin operation ding ngaklai a gilsung apan liamna omlou in a pawtkhe thei nawn hi’n kigen hi. A innkuante gendan in agilsung a sikkilh omlai in leng gim lawlou in ngeina bangin om veve hi’n gen uhi.

Zillai Day 2013 zang uh
Lamka, May-31:Tuni’n Zillai omna mun tuamtuam ah Zillai Day 2013 zang uh a, MPC Newlambulane Church a Conference Hall ah Zillai Imphal Block te’n Election nei uhi. Election hunah member paikhawmte’n President dingin S. Pauneihlal telching uh a, Vice President dingin S Kamminlun, Executive member dingin Lalboi Khaute, Lempi, Thangneu, Mercy leh Thangmohan telching uhi.

Road Rules & Regulation Awareness
Lamka, May-31: Environment Friends, CCpur saina in June 2, 2013 sunnung in YPA Hall, Hiangtam Lamka a YPA Hall ah ‘One Day Awareness Programme on Road Rules & Rugulations and Motor Vehicle Act 1988’ i om ding hi. Huai ah Demmang Haokip, Vice Chairman, ADC/CCpur in Booklet kibawl hong in thugen ding hi. Program hunsung in Lamkhosem, DTO/CCpur; Khaikhopau Ngaihte, SDC HQ, DC’s office; L.Mangkhogin, IPS, SP/CCpur; Traffice Officer/CCpur leh Special Invitees-te a pan thugen ngaih hiding hi.

Awareness Programme hun ah H.Sinzalam,Project Co-ordinator, Lamka Driving School in ‘Road Rules & Regulations’ chih pansan in sinsak ding a, Dr R.Sanga in Motor Vehicle Act, 1988 chih pansan in sinsak ding hi.

ZYA Unit 2 laklutna om
Lamka, May-31: ZYA Gen HQ in tuni zing dak 7.00 in ZYA D. Phailian Unit leh ZYA HQ Veng Unit laklutna nei uhi. Ph. Minlian inn, Compound Veng ah D. Phailian Unit laklutna om a, T. Goukhomang, President, ZYA Gen HQ in laklutna leh kichiamsakna nei a, Upa Kaikhokam, L/Secy, MPCS in makai thakte thumsak hi. ZYA D. Phailian Unit makaite-President-Tualzachin, Vice President-Chinlal; Secy-Sonthang ; Jt Secy-Doupi; Finance Secy -Paukhanmuan; Treasurer-Kappao; Inf Sedy-Ginbiaklian leh Asst Inf Secy-Sangpu hi uhi. Zing dak 8.30 in HYO Hall, HQ Vengah unit thak laklutna om a, President, ZYA Gen HQ in kichiamsakna leh laklutna nei a, Upa Vailal in makaithakte’ thumsak hi. ZYA HQ Veng Unit makai te- President-V.Tunzamang; Vice President-SK Guite; Secy- in G.Thiauthianmung; Jt Secy-cum-Inf in Thianminlian; Fin Secy in Lalcha; Treasurer in Khaizakap uhi.

YPA te’n naupang guta mankhia
Lamka, May-31:New Lamka a YPA Zion Veng Unit te’n tuni sunnung in naupang guta Kamsuanmung(8) s/o Chinkhanlian of V.Munhoih, New Lamka mankhia uhi. Thusuak kizadan in Kamsuanmung leh alawmte mi 4 vel tulelin Sanctuary of God’s Children Home, Zion Veng, New Lamka ah oml uh a, nitak in warden theihlouh kalin pawtkhe zel uh a, mun tuamtuam ah thil guzel uh hi’n kigen hi. Tuni sunnung in Kamsuanmung in Niangkhozam of Zion Veng, New Lamka tenna inn luhsawmlai matkhiat in om a, ama’ kipuanna apan alawmte leng theihkhiak hi uh a, May 26, 2013 in alawmte tawh Rs 6700 man ding leh zan nitak in Rs 5000 man thil tuamtuam gukhia uh hi’n kigen hi. YPA Zion Veng Unit te’n naupang nu-le-pa telin naupangte’ thuhilh in khahkhia uhi.

Meritorious Award pekhe ding
Lamka, May-31: TN Haokip Foundation(TNHF) Trust saina in 59-Saikot A/C bial apan ‘HSLC Examination, 2013’a Topper mi 3 leh Best School telkhiak kiangah June 1, 2013 zinglam dak 11.00 in Bijang Community Hall ah ‘TNHF 9thMeritorious Award-2013’ piak hiding hi. Huai ah Chief Guest in Vungzagin Valte, Parliamentary Secy (Hort & SC, CADA) leh Functional President in Demmang Haokip, Vice Chairman ADC/CCpur pang ding uhi. Special Guests in Mannuamching, CEO; Rev Lalrosiem Songate, Principal, ECT leh Isaac Pakhuongte, Principal, Sielmat Christian Hr Sec School hiding uhi. Rev Lalrosiem Songate, Principal ECT in Award ngah leh student lawhchingte thumsak ding a, Mannuamching, CEO in Career Guidance leh student-te hanthawnna thu gending a, khualliante a pan thugen ngaihna om ing hi. Award hawm hun ah All round Topper in Rs.20,000 + citation + certificate ngah ding hi. Maths Topper in Rs.15,000 + citation + certificate ngah ding a, Science Topper in Rs.15,000 + citation + certificate ngah ding hi. Saikot A/C a School of the year dia telkhiak School in cash award Rs.10,000 banah citation & certifcate ngah ding hi.

Admission bawl kipan ding
Lamka, May-31: New Lamka a om Lamka College ah June 1, 2013 akipan in academic session 2013-14 adin Class XI, Class XII, BA(1st, 3rd & 5th Semester) ading in admission kipan ding a, Examination Section ah office kaihun sung in admission form leh prospectus ngahtheih ding chi’n Principal apan thusuak in gen hi.

Mid-Day Meal training hun kisuan
Lamka, May-31:CCpur dist a Mid-day meal tangkha school tuamtuam in June 3, 2013 in IB Road a Synod Hall ah 'Mid Day Meal Implementation & Capacity Building' training program om ding chih himahleh ATSUM bandh ding tawh a kituahkhak ziakin training hun kisuan hi’n kigen hi.

IMPHAL

MLA te’n education sector adin, Local Area Dev Fund thawh din ngen
Imphal, May-31: Manipur a school omte tulai hun tawh kituak a puah tup himahleh sum-le-pai dinmun ginatlouh ziakin haksatna lianpi om a, huaiziakin MLA te’n education sector adingin Local Area Development Fund akipan 50% chiat thawhkhawm chiat ding in Education Minister M. Okendrona in ngen hi. Huchi ahihkei leleng MLA te’n amau Constituency a om school-te puahna ding in MLA Local Area Dev Fund zang dingin chial hi.
Education Minister in tuni’n Council of Higher Secondary Education, Manipur saina in tuni’n Imphal a JN Manipur Dance Academy ah tutung a Class XII/HSE examna ah Arts, Science leh Commerce stream a mark mutampente, subject tuamtuam a mark mutampente adin doner tuamtuam in Award leh Gol Medal a thawhkhawmte uh hawmkhiakna hun ah gen him Education Minister in a genna ah singtanggam leh phaijang biala sem teacher-te transfer/posting tungtang leng transparency om policy bawlkhiak hiding chi’n Minister in gen hi.

Common candidate neih din thupuk uh
Imphal, May-31: Imphal Hotel ah tuni’n Non-Congress political party te’n kihouna nei in thupukna tuamtuam bawl uh a, kum 2014 a Lok Sabha election ah common candidate khat neih dingin thupuk uh chihthu om hi. BJP Manipur Pradesh Presdident Th. Chaoba in a gendan in Naga Peoples’ Front (NPF) telin Non-Congress political party 13 te’n candidate dinga mi 1 telkhiak dingin thukim mahle uh candidate telkhiak a om ding pen party 13te lak a pan hiding hiam ahihkeileh Independent candidate dana dinsak hiding hiam chih tungtang finalize hilou hi’n gen hi. Huai hun ah Non-Congress political party 13 in ‘United Opposition Alliance’ kichi party thak bawlkhia uh chihthu om hi. UNA

ATSUM in kiphinna tuamtuam pan ding
Imphal May- 31: All Tribal Students’ Union, Manipur (ATSUM) in govt ah a thilphut uh sepkhiak dingin govt in chiam mahleh bangmah sepkhiak ahih tuanlouh ziaka lungkimlou in kiphinna(agitation) tuamtuam pan uh hi’n puang uhi.ATSUM HQ makaite apan kizadan in June 3, 20-13 zingsang dak 5.00 akipan dakkal 38 sung govt in a nelhsiah theihlouh ding kiphinna khauhtak om ding a, huaizawh in ni 38 sung mah akul leh poimawh banga kintaka patguihtheih fing kiphinna in zui ding hi’n kigen hi.

ATSUM makaite’n Nov 27, 2012 Chief Minister kiang ah memorandum pia uh a, huai ah Manipur State Commission for the Scheduled Tribes bawlkhiak ding, singtanggam district tuamtuam ah B.Ed centre hon ding,singtanggam a educational institution omte ah teacher leh vanzat kiching koih ding,singtanggam a om PHSC, PHC leh DHC om teng ah specialist doctor leh vanzat(equipments) bukim tawh kithuahsak ding chih telin point tuamtuam tamkhop semkhe dingin theisak uhi.

Driver thatte’ van zuak mankhia
Imphal, May-31: Sekmai area ah May 9, 2013 in Truck (No. AS01CC/2206) leh driver Kumut Ali pimang hi a, May 11, 2013 in sisa in aluang kimukhia hi’n kigen hi. Kumut Ali in Truck sungah Uncle Chips cartoon box 170 vel a puakte’ tuni nitaklam dak 3:00 velin Imphal West Police Commando te’n Hatta Golapati Tari Makhong mun a Md. Nasir (40) s/o (late) Abdul Haq inn-mun ah innluah a om Md. Sanayai(45) of Keibung Mayai Leikai omna in ah Uncle Chips 50% vel muhkhiak hi’n kigen a, 50% vel zuak khinta hi’n kigen hi.

AMWJU vaipawthak te’n charge lading
Imphal, May-31: All Manipur Working Journalists’ Union(AMWJU) vaipaw dinga telching thaka omte’n June 1, 2013 zinglam dak 11.00 in Manipur Press Club ah vaipaw luite khut akipan in mawhpuakna(charge) lading uh chihthu om hi.

Thautawi te’n ADC’ zi delh uh
Imphal, May-31:Taret Khul a om a kigen Police Commando mi 2 in May 28, 2013 in Sadar Hills a ADC Chairman Paojalet Touthang’ zi Hahat Touthang leh atapa anungdelh ziakun liam uh hi’n kigen hi. ADC Chairman’ zi Hahat Touthang in a gendan in hilhkholhna bangmah omlou banah kiveng dinga hilhna omlou in civil dress a kichei mi 2 in delh uh ahihdan Shija Hospital a a lupna ah gen hi. Bungpi Area Gen. Secy. Helen Kipgen in thiltung tawh kisai in a gendan in mi 2te’ security ahihleh bangziaka amau duty hunsung a uniform tawh omlou a, pistol tawh buaina bawlsawm uhiam chi’n dotna bawl a, Women Union Block te’n leng thiltung tawh kisai mawhpaih uh hi’n kigen hi. Akigendan in Heibi Heikak Mapal mun ah ADC’ zi Hahat Touthang leh a tapa khawlsak sawm mahleuh nutate’n helpawlte’n nungdelh uh hiding a gintak ziakin khamkhawl theihlouh a om uh hi’n kigen hi. UNA

MPS Officer 3 in promotion mu
Imphal, May-31: Manipur govt nuaia sem MPS(Grade-I) Officer 3 in MPS(Junior Administrative Grade) (Non-functional) pay Band of Rs. 15,600-39,100 plus grade pay Rs, 7,600 ah promotion muthak uhi. MPS Officer 3te
1.M. Satrajit Singh, MPS i/c CO 8th IRB
2. Kamzapau Ngaihte, MPS, Asst. Director MPTC
3. A. Sarat Kumar Singh, MPS, i/c SP, SIT hi uhi