DC/CCpur makaihna in DLCC meeting om
Lamka, Aug-2: DC/CCpur office a BRGF Resource centre ah tuni in District Level Coordination Committee(DLCC) meeting om a, huai ah deptt tuamtuam a District Level Officer te’n deptt tawh kisai reprt pia uh a, Aug 15,2013 a Independence Day lopna ding tawh kisai leng genkhawm uhi. Independence Day athupi theipen a lop ding chi’n gen uh a, kisakkholhna ding tuamtuam leh mawhpuakna kigotna leng nei uh hi’n kigen hi. Tutung a Independence Day pen ‘Clean & Green CCpur’ chih thupi a zangin lop hiding a Forest, Agriculture, Horticulture, PHED, IFCD leh Sericulture ten Green chih thupi azang in Stall 1chiat bawl ding ua, Clean chih thupi azang in Vety, leh NYK ten stall 1 tuak leh, Health department in Stall 4 bawl ding uhi.
Huai ban ah Fishery, ICDS, CAF&PD leh DSWO ten Stall 1chiat leh NABARD in Stall 2 bawl in, a vante uh zuak ding uhi. Independence Day lopna ding tawh kisai mah in August 14 in Lanva nak ah singnou suan hiding a, August 14 zingkal dak 8:00 in Foundation School ah MDC te, School tuamtuam leh DLO te telin a honna om ding hi. August 14, sunnung in Stall te a honna om nawn ding a, huai ni mah in DLO te leh public leader te’n Independence day Badminton tournament nei ding uhi. August 14 nitak dak 5:30 in Independence Day lop kipan ding a,huai ah ni kum adan mahin fire works tuamtuam ban ah kipolhlimna programme leng om ding hi. Transport deptt leh Traffic lamten Traffic awareness dan in special item lahna nei ding ua, Best Performing Govt School leh Best Performing Private school telkhia in award leh red-blanket piakna leng om chih hi.
Khaw kumlui Saihenjang khawthak honna om
Lamka, Aug-2: Chin Hills a khawsa unau leh innkuan bangzah hiamte’ tenna Saihenjang kichi om nawnkei mahleh huai khua a teng ngei khaw hausapu Helun in a khaw min mah zangin leh amah suangtute theihgigena ding in tuni zinglam in CCpur dist. ah Saihenjang khua a satthak honna om hi. Saihenjang khua ahihleh Tuibuong TD block nuai ah om ding a, Bualjang kianga Kaprang khua apan lamkhang lam gamlalou a om hi’n kigen hi.
Saihenjang khua honna Chief Guest Pauminthang Guite (Mibul Lamjangpa) in Songthu suante phung kigelhna suang tawh Saihenjang khua honna nei in Pastor Doujalal Kipgen, ECA in thumna in lan hi. Chief Guest in agenna ah huai suang in kitheihtuahna, ki-ittuahna, leh kipumkhatna ensak hi’n gen a, Saihenjang hausa in phung a khang kivolhdan a upa zawte zahtakna a Chief Guest dia a seh kipahthu gen a, u-le-nau kalah kizahtakna poimawh ahihdan ge kawm in nau in u a zahtak dia, u in nau a it poimawh, chi hi.
Tuni a khawthak honkhiakna ah Langkhanpau Guite, Chairman, ADC/CCpur; Khaipao Haokip, MDC; D. Paokholun Haokip, President, Haokip Peoples Council(HPC); Thangkhup Kipgen, Kipgen Phungpi Kiloikhom(KPPK);Tamenglong apan Hatlhing Doungel, MDC leh khaw tuamtuam apan hausa tamkhop banah mipi tamtak paikhawm uh a, khaw hausa tungtawn a min a kivawhdan uh dungzui in Lamjangpa, Aisanpa, Leikotpa, Chasat pa, Jangnoipa, Vongjangpa, Jampipa leh khaw hausate’n dakpi tanpha tum ging uhi.
ZYA Secy General damlou in si
Lamka, Aug-2:ZYA Gen HQ a Gen Secy lenlai H.Kham Suan Lun @ Lunpi Hatzaw(43) s/o (late) Lian Cin Do of Go Cin Khup Veng, New Lamka sinna ziakin Delhi a AIIMS a ki-enkol dam zoulou in tuni zinglam dak 9.55 in si hi. Aluang Aug 3, 2013 zinglam dak 9.45 in Indigo flight in Imphal Airport tan hong pawtung ding a, ZYA, KKL, HYA, YMA leh pawl tuamtuam kigawm Joint Philantropic Orgn(JPO) te’n KKL-te’ Ambulance zang in Imphal airport ah na vaidawn ding uh a, ambulance in Lamka hong pawtung ding uhi.
Lunpi Hatzaw ahihleh Zomi Youth Assn(ZYA) Gen HQ a Secretary General ahihbanah CBYF, TCYA,TCSA leh ZYA telin saptuam leh khawtang a pawl tuamtuam a kihel in makai dinmun len a, sepna lam ah Minor Irrigation dept ah Mohorrir sem a, azi Hau Za Cing tawh tapa 2 leh tanu 2 nei uhi. Anatna ziakin July 13, 2013 in Lamka nusia in Delhi ah etkol in om hi. Tuni nitak dak 7.00 Zomi Christian Fellowship(ZCF), Delhi te’n I-4,Palika Niketan, Sector 10, RK Puram, Opposite Mohan Singh Market, New Delhi ah suunna programme zang uhi.ZYA Gen HQ in tuni nitaklam dak 3:00 in emergency meeting nei uh a,Gen Secy suunna hun zang uhi.
Imphal apan thautui hongtung kihawm
Lamka, Aug-2:Bijang a oil pump ah tuni zinglam in Imphal apan thautui hongtung a,oil pump mun mah ah hawmkhiak in om hi. Thutu kingah dan in Bijang a M/s Suakhnun & Sons oil pump ah thautui 4,000 kilo-litre hongtung a, 4-wheeler te litre 10 leh 2-wheeler te litre 5 zel piak hi uh a,thautui deih in oil pump ah gari in mi tamtak kivual dim uhi.
Kangvai leh PS kikal keklet dingthu
Lamka, Aug-2:DC/CCpur in Kangvai leh Lamka Police Station kikal (NH-150) keklet ding thu a show cause notice a suah tungtang genkhawm dingin huai kikal a gam neitu(land owner) tengin Aug 9, 2013 zinglam dak 10.00 in Radha Krishnan Foundation School, Tuibuong ah meeting nei ding uh a, July 19, 2013 a DC order suah(No. DC(CCP)LA/NH-150/2013) tawh kisai genkhawm ding uh a, huai ah akisaipihte telkim chiat dingin convenor-te’n theisak uhi.
Pearsonmun ah Immunization programme
Lamka, Aug-2: Ministry of Health & FWe, Govt of India nuai a Universal Immunisatoin Programme guideline dungzui in July 31, 2013 in District Immunization Officer/ CCpur saina in khawpi sunga school tuamtuam ah immunization nei in naupangte damdawi in kap uhi. Asaite apan kizadan in immunization hun ah naupang kum 5te DT kap uh a, kum 10 te TT a kap ban uah kum 16te leng TT mah kap uh a, immunization pen August 8, 2013 tan a zawh hidin gen uhi. Tuni in leng Thangkhai Govt. H/S ah naupangte DPT leh TT free injection neihpih uhi.
Tuni in CHV training kipan
Lamka, Aug-2: Caritas India, DSSS Imphal leh State vector Borne Disease Control Programme, Christian Medical Assn of India leh Voluntary Health Assn of India-te saina in tuni akipan Zomi Colony a MELC biakinn ah Community Health Volunteer Training om hi. Huai ah HL Khai, Male Health Supervisor, S.Zamkhanpau, Field Supervisor leh Mangkholal Field Supervisor ten ‘Role of Community Health Volunteers’ leh ‘Intensified Malaria Control Project’ in atup le ngim tawh kisai sinsak uh a, khua 25 apan Community Health Volunteer 25 tel uhi. Training ahihleh Aug 3, 2013 in zou ding uhi.
&&&&&&&&&&&&&&&&&&&&&&&&&&&&&
IMPHAL NEWS
CISF te’n frisking bawllou ding
Imphal, Aug-2: Manipur Chief Minister’ bungalow duty CISF personnel te’n tuban Cabinet Minister-te frisking bawl nawnlou ding uh hi’n kigen hi. Home deptt thusuak in a gendan in CM bungalow a lut ding Dy. CM, Speaker, Dy. Speaker, Vice-Chairman leh Chairman( Hill Areas Comm),Minister-te, Parliamentary Secretaries leh MP te check hi nawnlou ding uhi. Amaute’n nidang a mobile phone a tawilut theihlouh uh leng tuni akipan in tawilut theita ding uhi. Hibang a Cabinet Minister te’n hamphatna a tante uh MLA leh VIP te’n tanglou ding uh a, MLA te’n mobile phone tawilut thei tuanlou ding uhi. CM bungalow a om CISF duty te’n Cabinet Minister- te leh mi poimawh tuamtuamte checking a bawl zel ziakun buaina omsek a, huaiziakin Home deptt in hibang thupukna bawl hi’n kigen hi. MLA te a pumpi uh check ahih ding ban uah mobile phone leng CM Bungalow ah tawilut theilou ding uhi.
Miss Lina Lamneilhing Chongloi in Miss India North East hihna la
Imphal, Aug-2 : Guwahati a ITA Machkhuwa Hall ah July 28, 2013 in ‘the 4th Miss India North East’ kidemna om a, huai ah Manipur kipan Miss Lina Lamneilhing Chongloi in ‘Miss India North East’hihna la hi. Amah Kangpokpi sub-divn a Haijang khawmi hi a, tuni in Haijang Village Authority leh Haijang Youth Club in kipahpihthu puang uhi. Amau a taklatna uah Lina Lamneilhing Chongloi ‘Beauty with Brains’ hi a, hibang lawhchinna a ngah pen Haijang khaw mite adin thil kipahhuai mahmah hi a, tua banah Kuki mite ading a kisaktheihpih tham hi’n gen uhi. Aman huai ma June 24, 2013 in Bhopal a Hotel Ronak mun ah ‘Miss Bharat 2013’ ah leng hihhoih mahmah hi’n kigen hi.
Imphal khawpi ah security khauh
Imphal, Aug-2 : Independence Day ding tawh kisai in Imphal khawpi sung ah security hihkhauh in om a, tuni in Imphal West police te’n DSP Dr. S. Ibomcha Singh makaihna in Masjid Road leh Paona bazaar area lak ah combing operation bawl uhi. Tua hun in ginlelh huai sak ziakin mi 50 vel kaikhawm uh a, hoihtak a velchet nungin khahkhia uhi. Maban a Independence Day lopna ding helpawl tuamtuam 7 velin boycott sawm uh hidan in kigen hi.
Illegal University akipan degree-te govt in theihpihlou, pomlou ding
Imphal, August- 2: University Grants Commission(UGC) guideline kalh a kibawlkhia Illegal Private University leh Study Centre te’n a piak uh M.Phil/ Ph.D banah degree leh diploma himhim theihpih leh pom hilou ding chi’n Manipur govt a Hr Education deptt in thupuan bawl hi. Illegal University leh Study Centre a pass student te’n degree leh diploma a muhte uh zang in Manipur govt nuai ah sepna mu theilou ding uh chihna suak hi. Hiai thu tawh kisai in Under Secretary(Higher & Technical Education ) Y. Dimbajit Singh in zan in order suah kawm in student leh kuapeuh in hibang University kibawltomte apan pilvang ding leh huaite naihlou ding in leng theisak hi.
Rs. 30 lakhs demand ziakin sit-in-protest
Imphal, Aug-2 : Ram Krishna Hir Sec School te’n tuni’n a school main gate kiang uah sit in protest tu uhi. Thu kizadan in KCP (Lamyanba Khuman) te’n huai School ah sum Rs. 30 lakhs demand bawl uh a, huai mawhpaih in sit-in-protest tu uh hi’n kigen hi.School Authority thusuak in a gendan in July 1st week in school ah mikhat vapai in demand letter va pia a, Principal kiangah a mobile phone No. ngen a, huai akipan in phone tungtawn in sum demand uhi. Demand letter pen Principal in mukhalou ahihdan gen mahleh KCP (Lamyanba Khuman) ten phone tungtawn in Rs. 30 lakhs pe ding in phut uhi. Huaitak in Principal in a phone no. khek a, tuni in meltheihlouhte’n huai school main gate ana kalh uhi.
Disable pawlin action la din ngen
Imphal, Aug-2: Thangmeiband Polem Leikai ah July 26, 2013 a vualphalou numei khat sualluih a om tawh kisai in tuni’n State Plarform of Disable People’s Orgn pawlin Keishampat Leirembi Community Hall ah lungkimlouh latsakna in sit in protest nei uhi. Huai hun ah President Dr. Sapam Jashobanta in thiltung tawh kisai police in FIR bawl ou in a mi sualtu leng thei uh a, himahleh tunitan matkhiak hi nailou chi’n gen a, mi sualtu a kinlam a mankhia a action lading in govt phut uhi.
Jiribam Students’ Union te’n regular teacher ngen
Imphal,Aug-2 : Students’ Orgs of Jiribam te’n tuni in Education Minister M. Okendro kiangah memorandum pia uh a, Jiribam Govt. Hr Sec School a semte part-time leh contract lecturers ngen hi uh a, govt in akinlam a regular teacher leh lecturer pe din ngen uhi. Amau ADC Jiribam kiangahmemorandum pia uh a, , huai thu akin lam a hihveng dingin phut uhi. Amau a gendan un huai Hr Sec school ah contract lecturer 3 leh regular teacher khat om a, amau kumkhat bang absent ua, himahleh a tung uah action bangmah lak hilou, chi uhi.