Leitung gam tuamtuam apan makaite hongtel ding uh
Lamka ah 3rd World Zomi Convention om ding
Lamka, Aug-3:Lamka khawpi ah October 25-27, 2013 sung ‘ the 3rd World Zomi Convention’ om ding a, huai hun uap dingin United States, Canada, Australia, Myanmar leh Europe gam tuamtuam banah India gama khawpi tuamtuam apan makaite paikhawm in hong tel ding uhi. Thanglianpau Guite, President, ZRO in zanhal in ZYA Lamka Block laklutna hun ah huai tawh kisai gen a, World Zomi Convention om hun chiangin biakna leh salam-khalam a makaite hong paikhawm ding uh a, muntuam-gamtuam a om Zomite khekhat a ding ahihdan langsak dingin khawmpi ah makai tuamtuam hong tel ding uh chi hi. Aman a genzelna ah ni 3 khawmpi om sungin nitak hunte biakna(worship service) hun a zat hiding a, zingsang leh sun hunte Zomi tawh kisai Seminar in kizang ding chi hi. Huai ding tawh kisai in Co-ordination Committee mawhpuakna piak hi’n gen a, amaute saina a programme om ding tawh kisai tunung in Manipur a Zomi sunga makaite leh elected member-te’n genkhawm ding uh chi hi. Zomi Convention ahihleh ZORO te’n Champhai leh Aizawl ah 2vei neita uh a, Lamka a kizang ding pen a 3veina hiding chi’n gen hi.
Chairman,ADC/CCpur in film hong
Lamka, Aug-3: New Lamka a Rayburn College Auditorium ah tuni zinglam in ADC Chairman khuallian a pang in Kaihlam Helooo, Comedy & the Paite Legendary Love Story of Salmatpa kichi Film hong hi. Aman a genna ah hibang a film bawlkhiak a om ei singtangmite tangthute kepbitna hi a gen in a saite pahtakthu gen a, singtangmite tawndan leh tangthute kep bitna ding a film tamsem bawl a deihthu gen hi. Xxxxx
Post-Matric Scholarship form
Imphal, Aug-3: Deptt. of Tribal Affairs & Hills, Govt of Manipur in academic session 2013-14 a ST student-te adin Post Matric Scholarship form laktheih di’n tuni in notification suah hi. Thusuak kingahdan in application form www.tahmanipur.gov.in ah leng download theih ding a, legal paper both side a print-out ngai ding hi. Application form ah bank account leh detail kimtaka fill zawh in November 30, 2013 tan in submit ngai ding chi’n Direcor, Tribal Affairs & Hills thusuak in gen hi
CJWO in CS thak kipahpihna nei
Lamka, Aug-3: CCpur Joint Women’s Orgn(CJWO) pawlin tuni’n Sanjenthong(Imphal) ah Chief Secretary thak PC Lawmkunga,IAS kipahpihna chibai vabuk uhi. Chief Secretary leh CJWO te’n houlim kawm in kipawlkhawm uh a, CJWO in Lawmkunga kiangah vaphual (hornbill) lim kibawl pia uhi.
Elimination of Rural Poverty Service
Lamka, Aug-3:Tuibuong a KIC Hall ah tuni zinglam dak 11.00 in K.S. Guite, DDM, NABARD/CCpur in ‘Elimination of Rural Poverty Service’ kichi hongkhia hi. Huai hun ah Janglal Mate, Secretary, ERPoS in keynote address gen a, Evan. Khuplet in thumna in lan hi. Elimination of Rural Poverty in ‘Serve to Transform’ chih thupi zangin nasem ding hi’n kigen hi.
HES in lawhchingte lawm
Lamka, Aug-3: EBCC Bungmual ah tuni zinglam in Hermon English School student lawhchinna ngahte kipahpihna nei uh a, Pastor M. Ginzatun, Local Pastor, Bungmual in BSEM saina a HSLC a lawhching mi 31te thumsak hi.Hermon English School ah tukum in HSLC candidate 31 passed uh a, amaute lakah mi 6 in 1st divn a passed in , 2nd divn ah mi 25 passed uhi.
KWU nuaia Block thak honna om
Lamka, Aug-3: Kuki Women Union/ CCpur nuai a Block thak ding Kuki Women Teiseng Block tuni’n B.Vengnuom Community Hall ah honkhiak in om a, vaipaw ding telna leng nei uhi. KWU Teiseng block a vai pawte, President -Lhingkhokim, Vice President- Hatkho, Secretary- Nenei, Assistant Secretary- Jamchong, Finance-Tingneilhing, Treasurer- Chongjalam leh Information secretary-Olivia hi uhi.
Hmar Students’ Assn in kipahpih
Lamka, Aug-3: Hmar Students’ Association(HSA) Jt. Hqtrs, CCpur in Manipur Chief Secretary PC Lawmkunga, IAS kipahpihthu puang uh a, Manipur govt leh CM O. Ibobi Singh vaihawm siam ziakin kipahthu gen uhi. Lalrobul Fimate, MCS leh Joel G. Haokip, MCS, SDO/BDO Parbung kipahpihthu leng puang uhi.
Huihchim 1st anniversary lopna om
Lamka, Aug-3: Vimala Raina H/S ah tuni sunnung in Gangte pau a monthly magazine kisuah ‘Huihchiim’ kum 1 chinna 1st anniversary lopna leh website honnaom hi. Dr.Gin Gangte, IIS in Huihchiim magazine editorial board-te website bawl www.huihchiim.com honna a, S.Thienlaljoy, MCS, SDO/BDO, Thanlon in Huihchiim 1st anniversary issue honna nei hi.
Paite Nampuan puahphat sawm uh
Lamka, Aug-3:Paite nampuan kembit dinga kibawl Paite.org saite leh YPA Gen HQ makaite’n tuni zinglam in PTC office ah meeting uh a, huai ah Paite.org makaite’n a nasepdan uleh paizia pulakin nampuan tuamtuam graphic kibawlte leng PTC makaite ensak u a, nampuan puahphatdan ding genkhawm uhi. .
Civil Service(Prelims) result suak
Lamka, Aug-3:UPSC nuaia Civil Services(Prelim) Exam 2013 result suakta a, huai a lawching singtangmi tutan a kithei phate anuai bang hi uh a, akul-leh-poimawh bangin theihkhaklouh a om leleng suah touhzel hiding hi.
1. Vungngaihlian
2. Teresa Hoihniang
3. Thangchinlian Ngaihte
4. S Benjamin Vaiphei
5. Samuel S. Vaiphei
6. Salvador Baite
7. Kamlalbel Neitham
8. N. Shohkhongam Baite
9. Satlianjoy Neitham
ZYA Gen Secy luang kivui
Lamka, Aug-3:ZYA Gen HQ General Secretary H. Kham Suan Lun @ Lunpi Hatzaw (43) s/o (late) Lian Cin Do of New Lamka damlouh ziaka New Delhi a AIIMS a ki-enkol dam zoulou in zan in si a, aluang tuni’n Lamka hongtung a nitaklamin CYA Hanmual, New Lamka ah kivui hi.
Siluang tuni a Imphal’ Airport hongtun in Vungzagin Valte,Parliamentary Secy leh Ginsuanhau, MLA in nampuan in tuam uhi. Imphal apanin gari 40 velin hongzui a, Kangvai ah gari lian leh aneu kigawm 135 velin ana dawn uh a, Kangvai hausa(Chief) te’n Nam puanin tuam uh a, Joint Philanthropic Orgn makaite leh JPO constituent unit tuamtuamte’n abanban in puandum in tuam uhi.Lamka ah Zomi nuaia civil orgn tuamtuam a makai te’n siluang tuam uh a, tribe based orgn tuamtuamte’n leng mahni Nampuan chiatin tuam uh a, nitaklam in zahna liantak tawh siluang vui in om hi.
SUUNNA
Tuankhankhup(39) s/o (Late) Daizathang of Zellang Veng, Hiangtam Lamka tuni zingsang dak 4.10 in sungna in si a, tuni mah in Lamka hanmual ah kivui hi.
&&&&&&&&&&&&&&&&&&&&&&&&&&&&&&&&&&&&
IMPHAL NEWS
North-east a lamliana leh lei bawlna din Centre in Rs. 33,000 crores bikhiah
Imphal, August-3: North-east region ah lamlian leh lei(bridge) bawlna ding leh puahna ding Ministry of Road Transport & Highways in Rs. 33,000 crore zat dingin bikhiah chihthu om hi. Union Minister of Road Transport and Highways, Oscar Fernandes makaihna in zan in Guwahati ah meeting om a, huai ah Manipur akipan Chief Minister O. Ibobi vatel hi.Rs. 33,000 beia Project tuamtuam sepkhiak dingte lakah Manipur ah khat kia tel a, huai bel Imphal-Jiribam lamlian(NH No. 37) in a totkhak Barak-lui tunga lei bawlna ding lel telkha hi’n kigen hi.
IFCD official-te kidnap ziakin kiphinna om
Imphal, Aug-3: IFCD official khenkhat zan zinglam in meltheihlouhten a pimang ziakun tuni in Imphal khawsung mun tuamtuam ah kiphinna om hi.Officials pimang a omte zan in Imphal apan km. 30 vela gamla Dolaithabi Multipurpose Project veh a kuan a kiklam un, meltheihlouhten Imphal East district sung munkhat ah khawlsak in pimang uhi. Huai thu zak phet in Imphal khawpi sunga mun tuamtuam ah mipi kikhawm in kiphinna pan uhi. Pimang a omte bel N Karuna Acharya Singh, Supdt Engineer; N Surchandra Singh, Executive Engineer; Sanayaima Sharma, contractor; Debjit Sinha leh Abhijit Sinha of RN Sinha Kolkata based company; L Saratchandra Singh, Driver leh midang driver mah hi a, kuate’n pimang uhiam chih theih hinailoui hi.
Police te’n operation sunzom zel
Imphal, Aug-3 : Independence Day ding tawh kisai in Imphal khawpi sungah Security vehihkhauh in om a, tuatawh kiton in tuni in Imphal West District Police te’n Kangjabi Meisnam Leikai leh Lalambung Khoirom Leikai mun lak ah combing operation bawl uhi. Huai hunsung in vengsung a omte Thingel Maru Community Hal ah samkhawm in etchetna nei uhi. Huai ah police te’n local mi 16 leh non-locals mi 60 kaikhawm uhi.
USA a laizil din Manipur mi 1 telkha
Imphal, Aug-3 : India a Community College Initiative (CCI) Program tungtawn in USA ah athawn a laizil dingin mi 9 telkhiak hi uh a, amaute lakah Manipur mi 1 leng telkha hi. Nagaland apan leng mikhat telkha a, amau kumkhat sung athawn in USA ah laizil thei ding ua,tua banah khateng in Rs. 42,000 sang ding uhi. Telkhiak a om bel Jenit Lairikyengbam of Khurai Lamlong,(Imphal East district) hi a, Nagaland mi ahihleh Weipune Sara hi a, amah leng Imphal ah omlel hi. Hiai mi 2 te bel Guwahati a Darwin School of Business a kaituak hi uhi.
Board in thupua poimawh bawl
Imphal, Aug-3:Board of Secondary Education Manipur(BSEM) in HSLC examination, 2014 ah private candidate a exam nuamteng aingin Eligibility Test a ding application form submit hun ding ahun behlap a om hi’n kigen hi. Huai dungzui in August 7, 2013 tan application form issued hiding a, Aug 12, 2013 tan submit theih ding hi. Aug 12, 2013 nungin application form submit hun ding behlap hilou ding chihthu om hi.
Sepna peding a mikhem kimankhia
Imphal, Aug-3: RIMS a sepna piak ding chi a mi tamtak khema kipei numei 2 tuni in matkhiak in om uhi. ACOAM-LUP kichi pawlin mat a omte a office uh Lamphelpat mun ah media-te ma ah lakkhiak uhi. Mat a omte Wangkhem Bijaya Devi (23) d/o W. Manichandra Singh of Chingmeirong Mamang Leikai leh Nongmaithem Sandhyarani Devi (34) d/o Late Biramangol Singh of Leimakhong hi ua, amau akigawm in sum Rs. 7 lakhs val mi 2 akipan in khonkhe man uhi.
Huai numei 2 te’n RIMS administrative block asem Y Brajakishor @ Bishorjit of Moirang thupiak dungzui a gamtang uh hi’n kipuang uhi. Bijaya in a genna ah Binu Moibungkhongbam s/o (L) Muhindro of Naoremthong Laishram Leikai kiangah Rs. 3, 70,000 la a, tuazawh in Yumnam Sanjaobi w/o Ingobi of Mayang Imphal, Yangbi kiangah Rs. 4 lakhs lanawn hi. Aman huaite kiang ah RIMS ah sepna awng om hi’n gen gen a, tua ziakin a sum laknaten leng gingta in pia uhi. Amau a kipuanna uah Yumnam Brajakishor @ Bishorjit tanu Seema leng kigolh kha hi’n gen uhi. ACOAM-LUP President in hibang a gamtang tampi om a, amaute akipan kuapeuh pilvang dingin ngen hi.
Prepak khat ki-surrender
Imphal, Aug-3 : PIB Defence Wing thusuak in a gendan in PREPAK (PRO) atel Army No. 41926 SS L. Cpl Khangebam Athoi Singh @ Ibomcha of Kumbi Uchalungmang kichi tuni in Red Shield Division-te kiangah ki-surrender hi. Amah 7.62mm pistol khat leh magazine khat tawh kipekhia hi.