Dist Hospital campus ah Healthy Baby Contest om
Lamka, Nov-11: Lamka a Dist Hospital campus ah tuni zinglam dak 9:30 apan in Healthy Baby Contest (HBC) om a, Kamsuanlun, EM/ADC khuallian a pang in hongkhia hi. Aman agenna ah Healthy Baby Contest ah mi tamtak tel a, nu-le-pa te’n mahni tate’ damtheihna ngai poimawh uh a, huai in changkang sem hihdan kilangsak chi’n gen hi. Naungek apian ma apan nute’n damdoi hoihtak ne a, immunisation hoihtak a kikapte naupang hong pian khiat hun in chidam leh lungsim hat hi’n gen a, tate hoihtaka etkol poimawh hi’n gen hi. Tuni a HBC ah naupang 186 vel tel uh a, kipahman lakha louteng leng consolation prize piak in om uh a, kipahman lakha tengin Nov 12, 2013 in DFWO office ah laktheih ding hi. Healthy Baby Contest hun ah Dr David Gangte, MO Dist Hospital; Dr Zarzolien, Sr MO Dist Hospital; Dr Ding Tombing, MO, Zezaw PHC leh Dr Bina Kumari, PPPC te’ makaih in nurse leh DFWO staff te’n enkhia uhi.

Category-I (6-11 months) ah 1st in Veinunhoih d/o Thangsangvung of Chiengkon; 2nd ah mi 2-Hentinthang @ Robert s/o Lalboi of K.Khomunnom leh Paumuansang s/o Kamlianlal of Gangpimual ; 3rd in Daniel Thangmuansiam s/o Kamchinhau of Sim Veng leh Laldinglien s/o Gentinkhup of New Bazar pang uhi. Category -II (12-23 months) ah Selina Lhingneingah d/o Benjamin of Chiengkon in 1st la in, 2nd ah Ms. Jeanie Lalumpui d/o James Lalthuoilen of Sielmat leh Khupzolian s/o Chinlianpau of New Zoveng banah Niangneikim d/o Henry Thangminlun of New Zoveng pang uh a, 3rd ah Ngaizemhoi d/o Lamsangmuan of Salem Veng pang hi.

Category-III ah 1st in Muonlallien s/o Sasang of Bijang, Tuibuong leh Pauzothang s/o T.Lunchinkhai of Mission Veng, 2nd in S.Lampiaklal s/o S.Lalkhanlian of Elim Veng, New Lamka pang uhi. Caterogy teng a kipahman bel 1st in Rs 5000/-, 2nd in Rs 3000/- leh 3rd in Rs 2000/- ngah ding uh a, kipahman ngahte 2 leh 3 omkhate’n sum kihawmlual ding uh a, Category –III(24-35 months) a 1st la 2 omziak in Imphal a hawhding lottery dokding uh hi’n thusuak kingah hi. Category tenga 1st prize late Nov 14, 2013 in Imphal ah State Level Healthy Baby Contest ah CCpur ai-oh in kuan ding uhi.

Football Tournament hunkhakna
Lamka, Nov-11: Kholmun Playground ah Oct 5, 2013 akipan ‘6th Seikam Memorial Open Football Tournament 2013’ pailel Nov 14, 2013 sun dak 12:00 in hunkhakna leh final kimawlna om ding a, Chief Guest in Health Minister Phungzathang Tonsing pang ding hi. Huai ah Functional President in Langkhanpau Guite, Chairman ADC/CCpur pang ding a, Guest of Honour in D.Khaipao Haokip, MDC pang ding hi.

Addl DC/CCpur hongtung
Lamka, Nov-11: Maniram Sharma, IAS, Addl DC & Project Director DRDA in Nov 3, 2013 a suty la in Rajasthan a atenna khua vapha a, tuni sunnung in Lamka hongtung kiknawn in office kai hi. Ms Jacintha Lazarus,IAS, DC/CCpur leng Nov 8, 2013 in Tamil Nadu state a, a tenna khua uh pha tuni a hongtung kik ding hi’n kigen mahleh hongtung nailou hi.

HCFC, EBC leh PBCDC te’n prize la
New Delhi, Nov-11: Hmar Christian Fellowship, Delhi (HCFD) te’n 2nd NE India Choral Singing Competition 2013 om ah First Prize la uh chihthu om hi. New Delhi a Thyagaraj Stadium ah Tangkhul Christian Charitable Trust (TCCT) te’ inntekna in itna lamdang ‘Amazing Grace’ kichi thupi a zangin lapawl sak kidemna om a, saptuam tuamtuam apan in lapawl team tamtak tel uhi. Nortth East a lasiam (singer) minthang tuamtuam Fiona Pachuau, Aching Shaiza, David Mate, Maggie Lhouvum, Amongbi Jamir, Lemo Jamir leh Epistles te’n lasa uhi. Kumlui 2012 in HCFD Choir te’n 1st runners up hihna la in Rs 2 lakh sang uhi. Tutung in HCFD te’n lapawl ah khatna alak ziakun Rs 3 lakh sang uh a, second prize ahihleh Evangelical Baptist Convention Church Delhi (EBC) Delhi Choir te’n sangin Rs 2 lakh ngah ua, Poumai Baptist Church Delhi Choir te thumna a pang in Rs 1 lakh ngah uhi.

Dec 29 in SSC exam om ding
Lamka, Nov-11: Staff Selection Commission (SSC) saina in Dec 29, 2013 in Stenographer Grade ‘C’ & ‘D’ semding lakna dingin Combined Hr Sec Level (10+2) Examination 2013 om ding hi. Lamka ah candidate 421 vel a om ziakin candidate teng adin CCpur College kia exam centre a kizang ding hi’n kigen hi.

Dist Level Youth Festival om ding
Lamka, Nov-11: District Youth Affairs & Sports office (DYASO)/CCpur saina in Nov 20 & 21, 2013 in Hiangtam Lamka a Indoor Hall ah Dist Level Youth Festival om ding hi. Huai ah Folk Dance, Folk Song, Guiter, Extempore Speech, One Act Play leh Flute kidemna om ding a, kidemnate a 1na late'n CCpur district sikin Nov 25, 2013 in Imphal a State Level Youth Festival ah tel ding uhi.Youth Festival telnuam Youth Club, Youth Centres, Assn leh Orgn te'n Tuibuong a DYASO office Nov 12-19, 2013 sung entry form lak theihi ding a, Nov 19, 2013 nitaklam dak 3:00 tan in submit theih ding hi.

Naupang mang 2 muhkik in om
Lamka, Nov-11: Zan nitak dak 5.00 velin Joseph Mangsuanlian (6) s/o G. Lianmuansang of Langol, Imphal leh a lawmpa Thangbiak(name changed) a omna uh theihlouh in mang uh a, YPA Imphal Block makaihin mipi’n a zon nung un Thangmeiband a Tarung Community te’n mimang nihte ana kem in amau apan mukik thei uhi. Tarung Youth Club te’n naupang 2te YPA khut ah pekhia uh a, YPA Imphal Block leh Unit President te’n Tarung Youth Club tungah kipahthu gen in, Langol a Upa G. Lianzagin quarter ah kikhopna nei uhi. Huai hunah Thangbiak pen a nu-le-pa’ soisak ziaka innsung a om nopsalou in pawtkhe sek chihthu YPA makaite’n a theih ziakun tunung in hibang thiltung a om nawn leh YPA in action khauhtak lakkhum ding uh chihthu gen uhi.

Toy-gun leh cracker zuak leh zang omlou din thupuan bawl
Lamka, Nov-11: Mang Zomi, Director(Info & Public Relations)ZRO in thaulem(toy-gun) leh bazaar bomb kichi puakthei(cracker) himhim ZRO operational area ah kuamah a zuak leh kimawlna a nei om theilou ding in thupuan bawl hi.Lemna leh muanna om ding deihna banah mipi vantang patausak thei thil ahih ziak a hibang khamna bawl uh hi a genkawm in thupuan bawsiate tungah khauhtaka thilhih hiding in puang hi.

MDC te’n aknou hawmkhia
Lamka, Nov-11: Veterinary & AH/CCpur te’n tuni sunnung dak 1:00 in Tuibuong a Dist Council office ah aknou(layer) 2520 pekhia uh a, ADC member te’n amau bial chiat a beneficiaries 126 te kiangah hawmkhia uh a, beneficiaries 1 in aknou 20 zel tangkha uhi.

Kinship H/S te’n fasting prayer nei
Lamka, Nov-11: Tuibuong a om Kingship H/S student te’n tukum adia 3veina din Prayer Mountain leh Jacob Taona mual ah fasting prayer nei uh a, school a student te’n tupguhna, laisiamna neihna ding, saptuam leh nam nasemte’n thudik leh thutak a nasepna ding un thumna nei uhi. Fasting prayer lawhching taka zawh ahih ziakin Kingship H/S a Principal in Pathian leh mipi tungah kipahthu gen hi.

Block 3 te U-DISE training ding
Lamka, Nov-11: CCpur Block sung a Headmaster teng in Nov 12 &13 2013 zinglam dak 10:00 apan in Vimala Raina H/S a Block Resource Centre ah ‘Unified Data Information System on Education’ (U-DISE) tawh kisai training ding uh a, DI of schools/ CCpur in hong ding hi. Thanlon block sunga Headmaster tengin Nov 15 &16, 2013 in ZEO office kong a Synod House ah training ding uh a, Singngat block a Headmaster teng Nov 13, 2013 in Singngat ah training ding uhi.

SUUNNA
Lallungmuan (36) s/o (late) Thongkhenmang of Lamphelpat tuni zinglam dak 2.30 velin sungna in si a, tuni mah in Chingmeirong a Christian Cemetry ah kivui hi.

IMPHAL NEWS
Sangai Festival ziakin security review
Imphal, Nov-11 : CM Secretariat ah tuni in Nov 21, 2013 a kipan ding Sangai Festival tawh kisai in High Level Security Reviews meeting om hi. Huai ah Chief Minister makaihna in Imphal khawpi ah tulai a dan leh thupiak (law & order) tawh kisai genkhawm uh a, Principal Secretary(Home Secy) J. Suresh Babu;Manipur DGP MK Das; IG/AR South leh Para-military force a top official tamtak tel uhi. Sangai Festival bel Nov. 21-30, 2103 sung Hatta Kangjeibung ground ah om ding hi.

NE India History Conference kipan
Imphal, Nov-11: Manipur University(MU) a deptt of History-te saina in tuni’n MU Centenary Hall ah ‘34th Annual Conference of the North East India History Association (NEIHA)’ kichi kipan a, Nov. 13, 2013 tan sunzom ding uhi.Huai ah Chief Guest in Dy. CM Gaikhangam in pang a, Guest of Honour in Works & Transport Minister Dr. Kh. Ratan Kumar pang in Functional President in MU Vice-Chancellor Prof. HNK Sharma pang hi.
Chief Guest in a genna ah History kichi khangthu sutna ahihbanah hunpaisa etkikna leng hi a, huaiziakin poimawh petmah ahi chi hi. Mi khenkhat in history a dikloupi in gelh sek ua, huaiziakin NEIHA ten hoihtak a enchian a hih dingin ngen hi. Functional President in Social Science leh History promote na ding leh encourage-na din April 27, 1979 in NEIHA patkhiak hi a, Manipur University in hiai conference 4vei a zintunna hita, chi hi.Tuni a kipan Conference om bel researcher- te adia poimawh mahmah hi’n kigen hi.

Pallel a bomb puak a kigolh pipen Thoubal Police te’n tuni’n mankhia
Imphal, Nov-11: Thoubal District Police te’n tuni nitaklam dak 4.15 velin Kuraopokpi mun ah Prepak(Pro) a self-styled Lance Corporal Angrung DS @ Arun Maring @ Khununglakpa(31) s/o Modun DS of Langol Khunou mankhia in amah akipan IED 3 leh detonator 10 mukhia uh a, Nov 6, 2013 in Pallel bazaar a bomb hihpuak a kigolhpipen hi’n gen uhi. Amah akipan IED 3 muhkhiakte leng Pallel bazaar a IED puakzakte tawh kibang mah hi’n police thusuak in gen hi.

‘National Press Day’ zat hiding
Imphal, Nov-11: Directorate of Information & Public Relations(IPR) saina in Nov 16, 2013 zinglam dak 9.00 akipan in Majorkhul a Manipur Press Club ah ‘National Press Day’ leh ‘Manipur State Journalist Awards, 2013’ piakkhiakna kithuah om ding a, Chief Guest in K. Meghachandra Singh,Parliamentary Secretary(IPR) pang ding hi.Huai ah Functional President in Letkhogin Haokip,IAS, Commissioner(IPR) pang ding a, Guest of Honour in W. Shamjai, President, All Manipur Working Journalists Union pang ding hi.Programme zawh sun dak 12.00 in ‘Role of Media in Serving public interest’chih thupi a nei in Workshop om ding hi.

Ni 3 daih ding Farmers’ Fair kipan

Imphal, Nov-11:Lamphelpat a Indian Council of Agricultural Research(ICAR) complex ah tuni in ni 3 sung om ding Farmers’ Fair kipan hi. Huai ah Chief Guest in Agriculture Minister Md Abdul Nasir pangkawm in Farmers’ Fair hong a, ICAR North East Region Director Ngachan leh official tamtak leng tel uh a, district tuamtuam a KVK Centres akipan loubawl mi(farmers) tamtak leng tel uhi.

BJP ten tuni’n Press-te kimuhpih
Imphal, Nov-11 : Indo-Myanmar border fencing tawh kisai in Manipur CM makaihna a All Political Parties meeting om hun ah BJP te atellouh ziak a CM in mawhsakthu a gen tawh kisai in BJP Manipur State Unit President Th. Chaoba makaihna in a office uah press-te kimuhpih uhi. Huai hun ah Th. Chaoba in Indo-Myanmar border fencing pen India PM Dr. Manmohan Singh thupiak dungzui a Chief Minister O. Ibobi tawh kithutuak a bawl a om hi’n gen hi. Kum 2006 in fencing bawl pat hi a, huai hun leng Ibobi makaihna in Manipur ah Congress in govt bawl ahihdan leng gen hi. State Wildlife Advisory Board a Chairman hihna len O. Ibobi Singh in Yangoupokpi Lokchao Wild Life Sanctuary km. 10 vel alian lahek in Manipur gamsung ah fencing bawlsak hidan in gen hi. Thilteng ahi ding banga om zawh in CM in theikhalou ahihdan gen a, huaiziakin, Manipur a political parties te leh mipite naktak a khem hi’n Th. Chaoba in ngawh hi. Huai tawh kisai in BJP te’n Central leader-te kiang tun khin uh a, maban a Parliament Session ah BJP in tangkoupih ding uh hi’n gen hi.

JCILPS te’n CEO ah memorandum pia
Imphal, Nov-11 : Joint Committee on Inner Line Permit System (JCILPS) ten tuni in Manipur Chief Electoral Officer(CEO) ah memorandum pia uh a, Manipur state a Non-Manipuris a honglut thakte electoral roll ah khum nawnlou dingin ngen uhi. JCILPS ten a gendan un Manipur a mihing om sehthum suah sehkhat Manipur state pawlam mi hi uh a, huaiziakin, tu dinmun dana a paitouh zel leh Non-Manipuris te’n tunung sawtlou in Manipur opkhum ding uh, chi uhi. Amau a genzelna uah uah Non-Manipuri 4- Jaleshor Prashad, Ghanashyam Prashad, Indu Devi leh Bimola Prashad tunaizek a Manipur honglut hi uh a, amau mi’ lem(fake) zang in Kakching A/C a electoral roll ah Huirem Jaleshor, Huirem Ghanashyam, Huirem Ongbi Indu Devi leh Tonjam Ongbi Bimola Devi kichi in kikhum uh, chi uhi. Huai tawh kisai hoihtaka enzui ding in CEO ngen uhi.

Thoubal Commando te’n Pallel a bomb hihpuaka tel mi 2 mankhia
Imphal, Nov-10: Thoubal district sung Pallel bazaar ah Nov 6, 2013 nitak dak 10:30 velin bomb hattak 2 puakzak a, huai ah mikhat si in 6 liam tawh kisai a Thoubal Police te’n thil omdan suizui zel uh a,tuni zingsang baihtak in Langol Khunou ah Prepak(Pro) atel mi 2 mankhia in huaite akipan kg 4 agik bomb khat leng mukhia uh a, huai mi 2te bel Pallel a bomb hihpuakte laka tel hi’n kipuang uh chihthu om hi.
SP/Thoubal office ah tuni in K. Meghachandra,MPS, SDPO/Yairipok in a gendan in tuni zingsang baihtak dak 2.30 velin muanhuaitak akipan thuguk a zak dungzui un Pallel bazaar ah Nov 6, 2013 nitaka bomb puakzaksakte laka tel Prepak(Pro) pawla self-styled Capt Thoudam Jiten s/o (late)Thoubam Nabadweep of Maibam Leikai leh Angrung DS @ Arun Maring @ Khununglakpa(36) s/o Modun DS of Langol Khunou in IED tawikawm in Langol Khunou ah om uh chihthu za uh a,Thoubal Commando team in kintaka huaimun delh in search operation a bawlna uah zinglam dak 3.30 velin Angrung DS tenna inn ah meltheihlouh mi 1 mu uh a,huai in Commando-te a muh in taikhiak sawm mahleh Commando te’n pummat uhi. Amah kuaham chih suichet nungin Modarsim DS @ Naphal(41) s/o Modun DS of Langol Khunou, Chandel district hi a,Prepak(Pro) pawl ah anaupa self-styled Lance Corporal Angrung DS @ Arun Maring @ Khununglakpa(36) s/o Modun DS tungtawn a lut hi’n kipuang hi.
Modarsim DS @ Naphal a kipuanzeldan in a naupa leh self-styled Capt Thoudam Jiten thupiak dungzui in Khudhei Khullen akipan IED bomb 4 vala in kha 2 paisa akipan in kem a, Pallel area a non-local omte target-na ding hi’n gen a,kha 1 paisa in a naupa Angrung DS in 3 lakhia in Nov 6, 2013 in Pallel ah puakzak sak a, 1 omlai pen Pallel area a non-local-te tunga zat ding in Morungpham s/o(late) Korang of Minou khut a pekhia hi’n gen hi.Huaitak in Commando team in Modarsim tonpih in Minou a om Morungpham inn tunpih uh a,search a bawlna uah nitaklam dak 4.20 velin Morungpham lupna room a sing singlem(wooden box) sunga kiselgu polythene bag vom a kitun kg. 4 vela gik IED 1 leh remote control device tawh kithuah mukhia uhi. Commando te’n Modarsim DS leng Morungpham inn akipan IED muhkhiak ahih tawh kiton in matkhiak in om chi’n SDPO/Yairipok in gen hi,

Pawlpi tuamtuam tamtakin suunthu puang
Lamka, Nov-10: Motbung a Presidency College leh Damdei Christian College phutkhetu Henkholen Sitlhou(86) of Tamdei Taloulong Village teknat ziakin zan zinglam dak 6 in Shija Hospital, Imphal ah si a, zan mahin thupitakin Taloulong Village (Sadar Hills) ah vui in om a, aman a zi Lewish banah tapa 3 leh tanu 2 nusia hi. Amah July 1, 1927 in Sempang village, Tamenglong dist ah piang a, Calcutta Scottist Church College apan B.Sc(Hons) zou in Guwahati University ah M.A. B.T. LLB zou hi.
Henkholen Sitlhou ahihleh laisiam masa ahihdungzui in Sadar Hills district sunga singtangmite makai poimawh hi a, Manipur adingin eminent scholar khat ahi hi. A pianpih sanggam (anaupa) Seikholam Sitlhou in tu in Damdei Christian College ah Principal hihna len hi. Siluang vuina ah IFCD Minister Ngamthang Haokip, ADC Sadar Hills Chairman Haokholal Hangsing leh Kuki Inpi banah Kuki society tuamtuam apan heutu tamtak paikhawm uhi.KIM, KSO leh society tuamtuam 10 valte’n suunthu puang uh a, Thadou-Kuki Literature Society te’n MG Avenue, Imphal ah suunna hun zang uhi. Henkholen Sitlhou ahihleh Manipur Express a Patron member S. Phungzakham adinga a sung’ pa (azi u’ pa) ahi hi.

SSC saina a examna lawhching
Lamka, Nov-10: Staff Selection Commission(SSC) saina in tuni zinglam dak 10:00 apan in LDC leh Data Entry Operator semding lakna dingin Combined Hr Sec Level (10+2) Examination 2013 om a, Lamka ah CCpur college, Lamka college leh Rayburn College kizang a, exam siangthoutak a zawh in om hi. CCpur govt college ah zinglam in candidate 578 om uh a, sunnung in 578 mah om uhi. Lamka College ah zinglam dak candidate 576 om uh a, sunnung in 449 om uhi. Rayburn College ah zinglam in candidate 406 om uh a, sunnung in 188 om uhi.

Hallelujah Vol-III honna om

Lamka, Nov-10: Leivom Lucy Lhinghoikim Kom in abawl Gospel Visual Album a bawl thak ‘Halleluijah Vol-III’ kichi tuni sun dak 12:00 in Loktak Project a Lower Keirap Baptist Church ah Mrs Phalboi Vaiphei w/o T.Manga Vaiphei, Chairman MTDC in hongkhia a, Rev Dr Pachung Serto, Youth Secy, KRBCA in Pathian kiang ah thumna in lan hi. Huai hun ah Guest of Honour in L.Kailun, IPS, IG (Law & Order-I) pangding chih himahleh official duty ziakin tel theilou a, Functional President in L.Benjamin Kom, Associate Professor; Chief Host in Dr LR Kom, Dy Director, MACS leh Special Guest in K.Onler Kom, social worker pang uhi.

Cornerstone 1st Anniversary

Lamka, Nov-10: Daniel Singson in Family Lane,Bijang leh Hebron Veng New Lamka ah Corner Stone zuakna business establishment nei a, tuni sunnung inhuai kum 1 chin (1st Anniversary) lopna a tenna inn Family Lane, Bijang ah nei uhi. Huai hun ah Pastor Lamkhosei Singson, ECA, Bijang in Pathian kiang ah kipahthu genna thumna nei a, programme zawh in ankuang umkhawm uhi.

National Guitar Contest ah 2nd position

Lamka, Nov-10: VH1 leh Sky Entertainment saina a National Level Guitar Contest 2013 ah Ginkhankhual @ Deuel Khual s/o (late) Liankhanchin of Bungmual in 2nd position ngah in Rs. 10,000 telin certificate leh Epiphone Electric guitar sang hi. Zan nitakin Agri Expo, Dimapur, Nagaland ah competition final om a, Deuel Khual in classical guitar ah 2nd position la hi. 1st position ah Kohima mi Atso Chasie pang a, aman Rs. 1 lakh, certificate leh Epiphone Acoustic guitar ngah a, 3rd position ah Haryana mi Theophilus Benjamin in Rs 10,000 leh certificate sang hi. Huai competition a judge-te America mi guitar siam Jennifer Batten, India blues guitar minthang Rudy Wallang leh guitar teacher Joey Woch hi uhi.

Joy Food Processing Company

Lamka, Nov-10: ‘JOYFOODS-Foods for Joy’ kichi Joy Singsit of Tuinom/CCpur in abawl nasepna pat hita a, mun tuamtuam ah zuakkhiak in omta hi. Aneitu Joy Singsit in India a Food Preservation Technologies zilna hoihpen pawl a kigen GKVK Bangalore leh CFTRI Mysore apan zousa hi’n kigen hi. JOYFOODS in a bawlkhiakte Passion Fruit Squash, Pineapple Squash, Aloevera-Ginger Squash, Orange Squash, Aloe-Pineapple Drink, Guava Drink, Mixed Fruit Drink, Mango Drink, Lemon Drink, Orange Drink,Aloevera Juice leh Aloe-Amla Drink hi a, huailou in Food Safety Standard Authority India leng neikhin hi’n kigen hi.
K.Dongzasuan in JNV exam enkai ding
Lamka, Nov 10: JNV/Tuinom a class VI zil ding lakna dingin kumteng in entrance test om a, huai leng Pathianni (Sunday) in om sek hi. Hileleng kum thak 2014 akipan in Kiginni(Saturday) a neih hita ding chih ahi hi. Kum 2014 akipan JNV entrance test tawh kisai K.Dongzasuan, DI of schools/Thanlon in enkai ding chi'n ZEO/CCpur office apan thusuak kingah hi.

Healthy Baby Contest leh ORS Week
Lamka, Nov-10: Dist Hospital Campus ah Nov.11,2013 zinglam dak 9:30 apan in Healthy Baby Contest om ding a, category-1 ah 6-11 months,category-2 ah 12-23 months leh category-3 ah 24-35 months hiding hi. Category tenga 1st, 2nd leh 3rd te’n kipahman ngah ding uh a, kidemna tel kipahman ngahloute’n leng consolation prize ngah ding uhi. Document poimawh toikhaloute leng contest mun ah registration bawlin telthei ding hi’n DFWO/CCpur apan kiza hi. Category tenga 1st prize lateng Nov 14,2013 in Imphal ah State Level Healthy Baby Contest ah kuan ding uhi. Healthy Baby Contest neihsung zinglam dak 11:30 in Dr H.L Liensang, CMO in New Born Week leh ORS Week 2013 kichi hong ding hi.

UDISE training om ding
Lamka, Nov-10: CCpur Block sung a Headmaster teng in Nov 12, 2013 zinglam dak 10:00 apan in Vimala Raina H/S a Block Resource Centre ah ‘Unified District Information System on Education’tawh kisai training neiding uh a, akisaipih teng telding in DI of schools, CCpur in theisak hi.

Theihgigena hansuang honnna
Lamka, Nov-10: KNO a Home Secy Thangpao in June 21, 2012a si azi (late) Kimjalhing @ Chullounu theihgigena dinga a hansuang/mualsuang abawl Nov 12, 2013 zinglam dak 11:00 in M.Songgel khua ah Rev Thangsat Kipgen, Chairman KCLF in hongkhe ding hi.

SUUNNA
Mrs Manzaching (85) w/o (late) Thangkhothawn of Church Road, New Lamka tuni nitaklam dak 5.30 velin cancer ziakin si a, Nov 11, 2013 in Pangzawl khawsak a hanmual ah kivui ding hi.Mrs Manzaching bel M/s Thawnsaau Printing Works neitu GK Zalal’ pianna nu hi a,huaiziakin Thawnsauu Printing Works leng Nov 11 & 12, 2013 kikhak ding hi.

HOT SPOT

Leivom Lucy Lhinghoikim Kom’s in abawl Gospel Visual Album “Halleluijah Vol-III” kichi tuni’n honkhiatna hun ah Pathian phatna in la sa hi.

IMPHAL NEWS
Teacher-te’ promotion fel pahta ding
Imphal, Nov-10: Education Minister M. Okendro in hun sawttak pending a om teacher-te promotion ding tawh akin lama hihfel hiding a, huai sepkhiak ahih hun ah teacher 900 in hamphatpih ding uh chi’n gen hi. Minister in Imphal East a Kshetri Mayai Leikai ah MOBC saina in kha 6 sung om ding Remedial Free Coaching Class kichi Chief Guest a pang in a honna hun ah a gendan in RMSA nuai ah Hr Sec School 21 ah vocational education tunung sawtlou a pat hiding in gen a,SSA nuaia school building 500 kibawl dingte leng design kibang ahih banah a colour leng kibang ding chi’n gen hi. Education Minister in Remedial Coaching Class a honkhiakna ah Minority leh OBC Class VI-X kikal student-te free coaching piak hiding uhi.

Bus leh Maruti Van kiphu: 3 liam
Imphal, Nov-10: Thoubal district sung Tentha Lamkhai ah tuni nitaklam in Maruti Van leh Bus kiphukha a, Maruti Van atuang numei 2 telin mi 3 liam uh a,aliamte serous sim chiat uh hi’n kigen hi.Thutut kingah dungzui in tuni nitaklam dak 5.40 velin Tentha Lamkhai a Wangjing YK College kong ah Imphal akipan Maruti Van leh Kakching akipan Imphal zuan moupi mipite tuanna Bus kiphukha a, Van a driver leh numei 2 liam chihthu om hi.Maruti Van mailam pen Bus nuaiah a lutkhakzek ziakin Van gari hek driver lakkhiakna dingi hun sawtsimtak lut hi’n kigen a,aliam mi 3te Thoubal Dist Hospital puaktung in om uhi.

Sangai Festival ni 10 zat hiding
Imphal, Nov-10: Palace compound a Hatta Kangjeibung Ground ah Nov 21, 2013 akipan Sangai Festival om ding tulai Manipur a law & order dinmun a hoih khollouh banah mun tuamtuam a bomb puak om sek a, security tawh kisai ziakin huai Sangai Festival ni 5 sung om din Nov 21-25, 2013 sung hiding chi’n kigen mahleh Directorate of Tourism thusuak in a gendan in Nov 21-30, 2013(ni 10 sung) om ding chi’n thupuan bawl uhi.

Rs. 2 lakhs man ding vasa mukhia
Imphal, Nov-10 :Luwagsangbam a IRB omte leh All Manipur Poulty Farmer & Trader Assn (AMPFTA) kithuahte’n tuni in Dimapur apan Imphal zuana hong kipua vasa chikhat Rs. 2 lakhs man ding mukhia uhi. Huai vasa pawtute’n documents bangmah neilou uh a, a puakna uh Mahindra Bolera (No. AS 02AC/1568) ah ‘On Army Duty’ chih tak uhi. Vasa leh a pawtute Heingang PS ah piakkhiak hi uh a, AMPFTA te’n written complaint a bawl hun uah a tangtung uh ngaihtuah hiding kigen hi.
Tuni a muhkhiak a om vasa(fowl)te 660 hi a, local market a zuak hileh Rs. 2 lakhs vel man din kigen hi. Phalna lehkha tellou a pua mi 4te - Zafer-Ulla (28) s/o Aman Ulla, Rafic Ali (20) s/o Muslim Ali, Md. Mirza Sheik (20) s/o Surbul Sheik (driver) leh Md. Ali Hussein s/o Surub Udin hi ua, amau Assam a Naogaon district a Bhebheir mun a kipan ngen hi uhi. AMPFTA thusuak in a gendan in mi 4 ten vasa a puakte uh valid certificates omlou in Veterinary deptt ah piaksawm uh hidan in gen uhi.

Manipur team in Myanmar pha ding
Imphal, Nov-10: Sangai Festival kipatni Nov 21, 2013 in Myanmar a Sagaing Region Chief Minister U Tha Aye leh Mandalay Chief Minister U Ye Myint in lenna(airline) zang in Imphal Airport hong bawh ua leh Chief Minister in International Airport hithei dinga Imphal Airport pichinsak teitei a sawm lawhching thei panphet ding hi a a kilat ziakin Manipur apan delegate team khat in Myanmar gam vapha ding uh a,Sagaing region Chief Minister leh Manadalay Chief Minister in Sangai Festival uap kawma Imphal hong phak ding a taswpsan thak louhna ding i chialna va bawl thakthak ding uh chihthu om a, hileleng huai delegation team in bangchik hun a Myanmar vapha uhiam chih bel ani kichiantak fel nailou hidan in kigen hi.

Loubawlmite lakah haichi tang hawmkhia
Imphal, Nov-10: Agri Minister Md Abdul Nasir in tuni’n Heirok A/C a Bengi mun ah Rastriya Krishi Vigyan Yojna (RKVY) scheme tungtawna hongpai haichi tang hawmkhia hi. Aman loubawlmite laka haichi tang hawmkhiakna pat ahihtawh kiton in phaijang a district 4 ah Nov. 25, 2013 tan in hawmsuak hidin gen hi. Hill districts adin pat hinailou chi’n gen a, loubawl miten ma asawn theihna ding uleh a poimawh uh angah theihna dng un district chih a Agri Officer-te’n amah kimuhpihsek ding in ngen hi.

Kalachand Memo. Basketball tourney

Imphal, Nov-10:Model Club, Chingamakha-te saina in tuni’n Imphal a Chingamakha Basketball Ground ah ‘The 1st (late) Kh. Kalachand Singh Memorial Men’s Basketball Championships-2013’ kipan hi. Huai ah Sangai Express publisher Sapam Nishikanta in Chief Guest hihna tawh uap a, Guest of Honour in Manipur Basketball Assn. Secretary RK Sanatomna pang hi. Chief Guest in Chingamakha Basketball Court mun fiber court a upgrade hiding gen a, tua tawh kiton in kuapeuh in Basketball kimawlna uang bawl dia deihthu gen hi.