Chairman,ADCC in Peon-cum-Chowkidar lak tungtang ah Press-te mu
Lamka, Nov-12: ADC/CCpur nuai a Peon-cum-Chowkidar lakna ding tawh kisai in Langkhanpau Guite, Chairman, ADC/CCpur in tuni sunnung in Press-te kimuhpih in thil omdan genchian hi. Aman a gendan in kum 20 val MDC omlouh nungin singtanggam district tengah ADC member hong om nawn in teacher-te a post mun uah pai mahle uh school leh infrastructure omlouh ziakin sepna mun ah omthei lou uh a, MDC tengin amau bial chiat ah Model school bawl in school tamtak function hi’n gen hi. ADC nuai a Peon leh Chowkidar taksap ziakin MDC te’n Central govt ah nawh in Manipur Cabinet in leng kum 2011 in Peon-cum-Chowkidar lak dingin thupukna bawl a, ADC Act 32, Rule 45 dungzui in Grade III & IV semtu lakna ah Chairman te’n approve bawlding chih himahleh Manipur govt a utlouh ziakin ADC nuai a Peon-cum-Chowkidar lakna leng Manipur govt in approved bawlding hi’n gen hi.
Tulelin ADC/CCpur nuai ah school 170 om a, chowkidar post 5 kia om in huai lak ah 3 sikhin a, ADC/CCpur nuaia om school te’n chowkidar 2 kia neilel hi’n gen hi. DD Thaisii in Education Minister alet lai in CCpur dist a ADC school 170 te’n chowkidar 163 poimawh a, school omna khuate apan semtu ding lak hileh chih proposal piak himahleh govt in pomlou hi’n genbeh hi. Tutung in ADC/CCpur nuai ah Peon-cum- chowkidar post 165 lakna ding thu ah Rs. 5,000 val zek lawh dingin contract basis a sem ding lak hiding a, interview a lawhching a laka omte’n appointment order leh appointment letter mulou in bond sign ngai ding a, bond signature ah regular ding a fight theilou ding chih om hi’n gen hi. Mi khenkhat te’n inn-le-lou zuak a Rs.2/3 lakh sensawm om a, kuahiam sum seng om a, govt in fund a neihlouh hunhun a topsak ahih ua leh kuamah mawhsak theihlouh ding uh hi’n gen a, Rs 2/ 3 lakh sengte’n khalawh akipan sum senzah mukhe manlou ding hi’n genbeh hi. Tutung a ADC nuai a Peon-cum-chowkidar lakna dinga apply mi 1432 te tungah leng Chairman in kipahthu gen hi.

SPA nuaia nasepna munte enkhia
Lamka, Nov-12: Planning Commission a Sr Consultant apang Vikram Srivastava in tuni sun dak 12:00 in Lamka hongpha a, Special Plan Assistance (SPA) fund zanga mun tuamtuam a nasepte enkhia hi. Vikram in Tuibuong a Mini-Secretariat building kibawl lel, leh Mini Sports complex banah Lingsiphai a Lanva TD block nasepna leh Dist Hospital building enkhia hi. Maniram Sharma, IAS, Addl DC & Project Director DRDA; S.Khaikhopau Ngaihte, SDC HQ leh Nengkhanpau Guite, EE/PWD te’n kithuahpih uhi. Vikram ahihleh Imphal apan Planning deptt a Liaison Officer Rajendra Singh in hong zui a,DC’s residence a sun-an nekzawh in Imphal ah kiknawn hi.

Philantrophic Ogn-te tawh meeting
Lamka, Nov-12: DC/CCpur makaih in Nov 14, 2013 sun dak 12:00 in DC’s office a BRGF Resource Centre ah Dist AIDS Prevention & Control Committee makaite leh Philantrophic Organisation tuamtuam makai te’n joint meeting neiding uhi. Huai ah AIDS doudalna tawh kisai leh Dec 1, 2013 a ‘World AIDS Day’ tawh kisai telin thu tuamtuam genkhawm ding uhi.

Thathang Hangshing in Ph.D mu
Lamka, Nov-12: H. Thangtungnung @ Thathang Hangshing s/o H. Thonzagin (AFO/Medics SSB) of Zoar Veng, Bungmual in Manipur University a deptt of History nuai ah Ph.D (Doctor of Philosophy) degree mu hi. Aman Prof. N. Joykumar Singh makaihna nuaiah ‘Anglo-Lushai Relations, 1890-1947’ thesis a gelh tungtawn a Ph.D. mu hi’n kigen hi. Dr. H. Thangtungnung in research abawl sungin national, international leh book chapter te ah paper 8(giat) g suahkhia a, huailou in Research Project tuamtuam tawh national seminar leh conference 6 ah tel hi.

State Level Review Meeting om ding
Lamka, Nov-12: State Mission Director, State Health Society, Manipur makaih in Nov 16, 2013 zinglam dak 10:00 in Classic Hotel, Imphal ah NRHM nasepna leh Physical & Financial progress tawh kisai State Level Review meeting om ding hi. Huai hun ah Dist tuamtuamte’n power point presentation nei ding uh a, Dist teng apan CMO-te, DFWO/DIO-te, Dist Finance Manger-te leh Dist Program Manager teng telding uh a, Lamka apan Dr Liensang, CMO/CCpur makaih in akisaipihte telding uhi.

Peon-cum- Chowkidar admit Card
Lamka, Nov-12: ADC/CCpur nuai a Peon-cum- Chowkidar lakna ding tawh kisai in Nov 13, 2013 in office hunsung in Tuibuong a ADC office ah Rs 100/- pia in admit card laktheih ding hi. Poen-cum-chowkidar post adin applicant 1432 om a, Nov 14-16, 2013 sung interview om ding a, Nov 14, 2013 zinglam dak 9:00 apan in Sl.No 1 apan interview kipan ding a, atamthei pen zawh tantan interview om ding chih ahi hi.

ZYA te’n thaulem tamtak khawmkhia
Lamka, Nov-12: ZYA Lamka Block te’n khawpi sung ah thaulem leh puakthei(toy-pistol/gun & cracker) kuaman zuaklou dingin kham uh a, tuzing in New bazar leh old bazar lak a dukan tuamtuam check in toy-gun leh pistol lem 30 vel mukhia in New Bazar ah haltum uhi. Maban ah leng kuaman toy-gun/ pistol leh cracker zuaklou din ngen uhi. Huailou in Joint Philantrophic Orgn te’n Nov 16, 2013 in khawpi sung ah thaulem leh cracker zuak omhiam chih etkhe ding uh a, zinglam dak 10:00 in Lamka Public Ground a kingakkhawm in huai apan Tuibuong area, Rengkai area, Old Bazar, New Bazar leh New Lamka area a dukan tuamtuam check ding uhi.

Rengkai Hr Sec School ah exam 3 omding
Lamka, Nov-12: ZEO/CCpur saina in Nov 17, 2013 in Rengkai Hr Sec School ah class IX simlel-te adi’n State Talent Search(STS) exam 2013; class X simlel-te adi’n State Level National Talent Search(SLNTS) exam 2013-14 leh class VIII simlel-te adi’n National Means-cum-Merit Scholarship(NMMS) exam 2013-14 om ding hi. STS ah candidate 194, SLNTS ah 172 leh NMMS ah 140 om hi.

Dist. pawlamte telsaklou di’n ngen
Lamka, Nov-11: KSO/ CCpur makaite’n Chairman, ADC/CCpur kiangah District Council nuaia sepna awng omte hukdimna ding in CCpur dist. mite kia la dingin ngen uh a, CCpur dist. hilou mundang akipante apply saklou dingin leng ngen uhi. KSO thusuak in a gendan in pawlam mite hiai adin CCpur district mipite’n pom theilou ding a, recruitment tawh kisai in chitna-siamna lam ah dist. mipite’n chitna leh siamna nei ahihman in dist. a sepna omte ah pawlam mi telsaklou din ngen uhi.

DI of Schools/CCpur in hongkhia

Lamka, Nov-12: Kaikhanlian Guite, DI of Schools/CCpur in tuni in Vimala Raina H/S a Block Resource Centre ah CCpur Block sunga Headmaster teng adin ni 2 sung om ding ‘Unified Data Information System on Education’ (U-DISE) hong hi. Aman a thugenna ah U-DISE kichi poimawh petmah a, private school khenkhat U-DISE list a telkhaklouh ziakin govt in school recognisation zukkik a, maban ah leng private school-te U-DISE list a omlou teng govt in recognition hihbei ding ahihziak in private school te adin poimawh diak hi’n gen hi. Training ah ZEO nuai a staff P.Khamminlun , Lianzagou Zou, Chinzakham Hangshing leh Nang Sian Pau Shoute in sinsak uhi. Tulelin CCpur block ah Govt & Aided school 75, ADC nuai ah 41 leh private school 77 kigawm 193 om hi.

Promotion adin ACR submit ngai
Lamka, Nov-12: Education deptt nuai a sem Under matric/Matric/Primary leh Physical education teacher-te Oct 1, 2012 tan a kum 5 sung regular service leh graduate/degree neite’n graduate teacher a promotion theih ding in kum 5 sunga ACR chiat Nov 14, 2013 tan in ZEO/CCpur office ah submit ngai ding hi.

SUUNNA
Zamngaihching(58) w/o H.Hauzakap of Dorcas Veng, New Lamka tuni zingsang in kalna in si a, YPA Hanmual, New Lamka ah kivui hi.
Niangkhongai (85) m/o K. Pauzachin of Dorcas Veng, New Lamka tuni zingin teknat ziakin si a, YPA Hanmual, New Lamka ah kivui hi.
Mangsuanlian(30) s/o (late) Hauchinthang of GS Road, New Lamka(G) tuni zing in sungna in si a, YPA Hanmual, New Lamka ah kivui hi.
Sangmawi (33) w/o Gokhokam of Santing (L), tuni nitak dak 7.00 velin akhuak a sisan lut ziakin District Hospital ah si a, Santing a vui dingin tunitak mah in kipua hi.
Khamthanglian @ Khama Vaiphei s/o (late) Doulam of Leisang Village tuni zingsang dak 4.00 in Devanahalli, Karnataka a govt Hospital ah damlou in si a, KSO-B leh
TSA-B makaihna in a luang innlam ah hong kipua hi.

IMPHAL NEWS
DoNER Minister in hong ding
Imphal, Nov-12: Hatta Kangjeibung ah Nov 21-30, 2013 sung Sangai Festival,2013 om ding Union Minister DoNER Pawan Kumar Singh Ghatowar November 21. 2013 nitaklam in hong ding a, Myanmar a Sagaing region leh Mandalay Chief Minister te makaihna in Myanmar akipan delegate mi 100 velin ni 10 sung Festival om ding hong uap ding uhi. Huailou in China akipan official 7 telin India a om Chinese embassy official te’n leng huai hun uap ding uhi.Myanmar akipan hong zinte Chief Minister U Tha Aye leh Chief Minister U Ye Myint makaihna in Golden Myanmar Airlines flight in Nov 21, 2013 zinglam dak 9.30 in Imphal airport hong bawh ding uhi.Huai pen International Airport status a Imphal airport puan ahih nunga international flight hong bawh masapen ahih ding ziakin Manipur khangthu adin poimawh tungtuan hiding chi’n kigen hi.

Border fencing thu genkhawm uh
Imphal, Nov-12:Manipur Assembly a Hill Areas Committee(HAC) vaisaina in zanzek in Moreh Trade Centre a Conference Hall ah Indo-Myanmar border fencing leh border pillar tawh kisai meeting om a, huai ah Moreh a om community tuamtuam apan makaite tel uhi.Huai ah Dr Chaltonlien Amo, Chairman,HAC in a genna ah border fencing leh border pillar thu ah singtanggam a thil om ahihna ah HAC in leng panlak ngai hi’n gen a, huai kikhopna a thupukna leh thil omdan kigente Nov 13, 2013 in Hill Areas Committee meeting ah leng genkhawm hidin gen hi.

NSCN-IM leh ZUF-te kikap:1 si, 3 liam
Imphal, Nov-12:Tamenglong district sung Bhalok Part-1 ah tuni in NSCN-IM te leh Zeliangrong United Front (ZUF) cadre te kikaptuah uh a, huai ah mi 1 si in midang 3 liam chihthu om hi. Thusuak kingahdan in tuni sunnung dak 1.00 velin NSCN(IM) te leh ZUF te kikaptuah uh a, Bhalok Part-1 a khawsung mipite lau in gamlak ah taizak uhi. Thiltung tawh kisai zak phet in 15-Assam Rifles te’n amun delh uhi. UNA thusuak in a gendan in NSCN(IM) cadre 1 kaplup in om a, pasal naupang 2 telin mi 3 liam uhi. Kapliam a omte Tamenglong district hospital ah etkol in om uhi.

Manipur in IITF ah Stall 31 hong ding
Imphal, Nov-12: Pragati Maidan, New Delhi ah Nov 14-27, 2013 sung India International Trade Fair,2013 om ding a, huai ah Manipur akipan stall 31 hon hiding chihthu om hi. Huai stall 31 honkhiak dingte lakah deptt tuamtuam 5 akipan leng tel ding chih hi. Tukum a India International Trade Fair,2013 zatna ding in ‘Inclusive growth’ chih thupi a nei in zat hiding a,huai ah gam tuamtuam 28 akipan exhibitor 6,000 val leh company tuamtuam 350 tel ding uhi. Huai Trade Fair ah Nov 20, 2013 in ‘Manipur Day’zat hiding a,Lal Chowk a Open Theatre ah zat hiding hi.

National project work ginatlou ziaka kiphinna pat hi’n gen
Imphal, Nov-12: Muan Tombing makaih All Tribal students’ Union Manipur (ATSUM) pawlin govt. project-te sepsuahlouh a om puaknat thugen in hill district tengah kiphinna pan uh hi’n tuni’n gen uhi. Nagaram a ATSUM office ah tuni nitaklam in ATSUM Speakers Majabung Gangmei in ROTO (Reckoning Of The Other) pansan a National project-te tungtang ah nasep hiding chi a, Chief Minister kiang ah Nov.27, 2012 in theihsakna pe mahle uh sepsuah thupi omou hi’n gen a, June 4, 2013 a kiphinna om hun ah leng dawnna kichiantak omlou hi’n gen hi.

RIMS a Dental 1st block hongkhia
Imphal, Nov-12: RIMS a 1st block Dental College building tuni in RIMS Director Prof. Sekharjit in hong hi. Huai hun ah SK Srivastava, Addl. Secy. & Financial Adviser; Ms. Sakuntla Gamlin, Joint Secy leh Director Finance RP Meena ten uap uhi. Ms Gamlin in student-te pahtakthu genkawm in infrastructure sangin character poimawhzaw hi’n student te hasotna thu gen hi. RIMS ah staff behlap hetlouh in Dental College honkhiak hi a, huaiziakin maban ah bangchibang haksatna kituak ding hiam chih gen theih hilou chi’n Prof. Dayamanti in gen hi.

Mun 2 apan helpawl 5 mankhia
Imphal, Nov-12: Thoubal Police Commando leh 15-Assam Rifles kigawm combined team in zan nitak dak 11.15 in in Heirok Part-III a Ngarongthen Leikai ah search operation a bawlna uah KYKL cadre khat mankhia uh a, amah taksa tung akipan 7.65mm Pistol 1 tawh atang 3 mukhia uh chihthu om hi. Huailou in zan mah in Imphal West Commando pawlin Kangla-pat leh BT Park lak ah Prepak(Pro) pawla tel 4 mankhia uh chi’n Police thusuak in gen hi.

An-ngawl sawm: govt thutawp pia
Imphal, Nov-7: Education(S) deptt a Undergraduate leh Primary teacher sem graduate zousate’n Graduate post a upgrade dingin kum 2007 akipan govt ah ngetna pia in hahtakin buaipih mahle uh govt in tunitan a pichinsak tuanlouh ziakin govt ah thutawp(ultimatum) pia uhi.Demand Committee for the Promotion/Upgradation of Undergraduate/Primary Teachers to Graduate(PUUPGTA) pawla General Secretary T. Khogendra in Press-te kimuhpih in a genna ah a thilnget uh govt in Nov 20, 2013 tana a tangtunsak kei leh Nov 21, 2013 akipan in sih tanpha an-ngawl dinga nuakna(fast unto death) pan ding uh chi’n gen hi.