Chairman HAC in puahthak a om Zo-gam Tribal Museum hong
Lamka, Nov-7: Dr Chaltonlien Amo, Chairman, Hill Areas Committee (HAC) in tuni zinglam dak 11.30 in khuallian a pang in Thangzam Road, Hill Town a om Zo-gam Tribal Museum kipuahthak hon khia hi. Huai ah Functional President in Dr K. Sobita Devi, Director (Arts & Culture) pang a,Guest of Honour in Dr L. Dhanapati Devi, Curator, Manipur State Museum pang hi.
Dr. Chaltonlien Amo in agenna ah ipu-ipate’ hunlai a thil tuamtuam a zatte uh T.Dongzakai in Museum ah hoihtaka akoihziak in kipahhuai sakthu gen hi. Mihingte'n ihatlai leh damsung a thil sepsuah theihte atamtheipen khangthakte adia sepkhiat poimawh hi'n gen hi. Wales gama halhthakna thupitak tungziakin eite lak ah Christian sahkhua honglut nung kum 100 bang chingta a, Christianity honglut ziak in khantouhna thupitak hong tun a, sum leh pai hauhziaka Pathian mangngilh khakding thil lauhuai petmah hi'n gen hi. Wales gam ah sum leh pai hauhluat ziakin mi tamtakte'n Pathian phawk nawnlou in biakinn 700 val bang kikhak a, poi petmah hi'n gen hi. Mihingte’n i damsung a thilhoih hi'n thil sia hitaleh i sepsuahteng Pathian in hoihtaka record bawl ahihlam kuapeuh in theithak dingin ngen hi.
Zo-gam Tribal Museum ahihleh Zo-gam Arts & Cultural Development Assn etkolna nuai a om hi a, Jan 29, 1991 in govt ah registration kibawl a, Ministry of Tourism and Culture, Govt of India, New Delhi in fund sanction bawl in kum 1991 a nasep kipan in Jan 11, 2002 in Dr M.Nara Singh, Minister (Art & Culture) in hongkhia hi. March 2010 in building thak bawlna dingin Phungzathang Tonsing, Minister in ground breaking bawl hi. Zo-gam Tribal Museum ah thil tuamtuam tamtak ettheih dingin om a, naupangte kimawlna ding vanzat tuamtuam leng om in Pathianni(Sunday) chihlouh zinglam dak 9:00 apan nitaklam dak 4:00 tan chiklaipeuh in huai museum ettheih gige hi’n kigen hi.

Sangai Festival tawh kisai Awareness
Lamka, Nov-7: Konung Mamang a Hatta Kangjeibung ground ah Nov 21-30, 2013 sung Sangai Festival 2013 omding tawh kisai Tourism deptt saina in Royal Riders Manipur pawl in Distict 9 ah Royal Enfields (Bike) zang in Promotional & Awareness Campaign nei uhi. Tuni'n Imphal West apan mi 55 vel in Royal Enfields bike zang in Bishnupur pha uh a, huai zawh in Lamka hongpha uhi.
RK Tombishana, President Royal Riders Manipur in a genna ah Nov 13, 2013 in Ukhrul Dist phading uh a, Nov 14-16, 2013 sungin Tamenglong leh Senapati phading uhi. Nov 21, 2013 in Imphal East, Thoubal leh Chandel phading uh a, Manipur mipite kiangah Sangai Festival om ding tangkoupih ding uh hi'n gen hi. Sangai Festival ah Dist teng apan in Cultural Troup ban ah Manipur ateng nam tuamtuamte'n mahni tawndan, ngeina ban ah thil tuamtuam lahna neiding uhi. Nov 21, 2013 in Royal Riders, Manipur te'n Manipur Chief Minister kiang ah Flag pekhe ding uh hi’n kigen hi.

Pension sum Rs. 3000 chiat muding
Lamka, Nov-7: Manipur govt nuaia Home deptt in kha 1 a Rs. 500/- zel kha 6 ading Rs. 3000 chiat State Freedom Fighter leh Nupilal Freedom fighter mi 10 kiangah piak dia a puan dungzui in DC/Ccpur in April 1,2013-Sept 30, 2013 ading akigawm in Rs. 30,000 fighter piakkhiak ding in order suah hi.Pension sum ngah dingte 1)Smt Zamneng w/o(late) Holmang of Tuinom village; 2)Haojathang s/o(late) Ngamhao of Bethel village; 3)Smt Ngaijaneng w/o(late) Otjang of Dopkon village; 4)Letkhothang s/o(late) Thanghao of Molnom village; 5)Smt Chungkhonem w/o(late) Nungkhopao of Gangpimual village; 6)Smt Hoivah Haokip w/o (late) Mangkhup Haokip of Geljang village; 7)Smt Nemkhothem w/o(late) Thangzavung of Belam Veng HQ; 8)Smt Tingkholhing w/o(late) Ngullet of Ukha Gate village(Henglep Sub-divn); 9)Smt Onkhoneng w/o(late) Semkhohao Haokip of Changlei village(Singngat Sub-divn) leh 10) Smt Nemjalhai w/o(late) Onngam of Lancha village(Singngat Sub-divn) hi uhi.

State Level ah kihel ding uh
Lamka, Nov-6: National Children’s Science Congress 21veina MPCOST, Bhopal(Madhya Pradesh state)ah Dec 27-31, 2013 sung om ding a, huai ah Harbir Kaur of Don Bosco Hr. Sec School, CCpur tel dinga telkhiak in om a, Nov 11-16, 2013 sung Epica Garden, Saramsa, Gangtok, Sikkim ah 40th Jawaharlal Nehru National Science, Mathematics and Environment Exhibition(JNNSMEE) for Children- 2013 hunah Rajesh Sen of Don Bosco Hr. Sec School, CCpur tel ding a, amah makaih dingin Teacher khat Th. Priyokumar leng tel ding hi. Huailou in Donbosco Hr Sec School a Class XII(Arts) zillel lai Lucy Lhinghoikim Kom d/o L. Akhup Kom of Lower Kom Keirap tulela Hmar Veng a om in Oct 31, 2013 in Imphal a State Level Debate Competition 1st la hi’n kigen hi.

Common Service Centre adin apply theih
Lamka, Nov-7: DC/Ccpur akipan thusuak in a taklatdan in National E-Governance Plan(NeGP) nuai ah Village Level Entrepreneur(VLE) dana Common Service Centre(CSC) kihongte laka 27 a function nawnlouh ziakun huaite sik-le-tang adia a lunglut te’n Nov 16, 2013 tan in mahni bio-data telin DC/Chairperson, Dist e-Governance Society/CCpur ah apply theih ding hi. CSC mun-awngte leh a omna sub-divn uh anuai abang hi. 1)Tolphei(cCpur); 2)Songpeh(Saikot); 3)Hengkot(CCpur); 4) Songdo(Samulamlan); 5)Gelzang(CCpur); 6)CiC CCpur(CCpur); 7)Moirang Mantak(Samulamlan); 8)CIC Saikot(Saikot); 9)Ukha Loikha(Henglep);10) Thangsi(Henglep); 11) T. Gangpijang(Henglep); 12) Henglep(Henglep); 13) 14)CIC Leimatak(Henglep); 14) Tongjang(Henglep);15)Teijang(Henglep); 16) Lhangjang(Henglep);17)K. Lhangnom(Henglep); 18) Mongjang(Singngat); 19) Zalenphai(Singngat); 20)Kolchung(Singngat); 21) T. Singtam(Singngat); 22) Suangdoh(Singngat); 23)Maokot(Singngat); 24) Sumtuk(Thanlon); 25)Pamjal(Thanlon); 26)Saikulphai(Tipaimukh); 27)Savomphai(Tipaimukh) leh 28) Tuolbung(Tipaimukh) hi uhi.

BRP & CRP te’n training nei
Lamka, Nov-7: ZEO office kong a Synod House ah tuni'n CCpur district sunga Block Resource Person leh Cluster Resource Person te'n ‘Unified District Information System on Education’ tawh kisai training nei uhi. BRP leh CRP te'n tunung sawtlou in Block teng a Headmaster-te training pesawn ding uhi.

UDISE training om ding
Lamka, Nov-7: CCpur Block sung a Headmaster tengin Nov 12, 2013 zinglam dak 10:00 apan in Vimala Raina H/S a Block Resource Centre ah ‘Unified District Information System on Education’ tawh kisai training neiding uh a, akisaipih teng telding in DI of schools, CCpur in theisak hi.

M.Express zan issue zekai
Manipur Express zan issue ki-print laklawh laitakin a part khat hongbuai a,Imphal a bawlsak a ngaih ziakin tuni issue tawh hong kihawmkhawm a, mun tuamtuam ate leng tuni issue tawh hong kithonkhawm hi.Niteng in zingsang baihtaka hawmkhiak hawmkhiak man hi gige dingin pan kila mahleh machine leng abuai hun leh nawngkai hun om thei ahihna ah deihsakna leh ngaihnatna ziaka News latute’n non theihsiampih uh kon ngen uhi.
-Manager, Circulation
Manipur Express
SUUNNA
Upa Nguldam (90) f/o Evan Teacher Vungkhanmang of Bukpi(Thanlon sub-divn) zanhal Nov 5, 2013 in teknat in si, huaini mah in Bukpi hanmual ah kivui hi.
N. Ginsum(55) s/o (late) N. Sanggou of Bukpi leng zan zingsang baihtak dak 2:30 velin gilgumna in si a, nitaklam in Bukpi hanmual ah kivui hi.
Miss Zenhatching(31) d/o (late) Tuangou of Hebron Veng, New Lamka zan in LNJP Hospital, Delhi ah kalna in si a, tun’n aluang Lamka puaktung hi a,sunnung in YPA Hanmual, New Lamka ah kivui hi.

IMPHAL NEWS
Pallel a bomb puak: mi 1 si; 6 liam
Imphal, Nov-7: Thoubal district sung Pallel bazaar ah zan nitak dak 10:30 velin bomb hattak 2 puakzak a, huai ah mikhat si in 6 liam uhi. Huai bomb puak ziaka si Lalit Kumar(30) of Silchar hi a, aliamte Jiten Robidash (29) of Silchar Palorband Bagan, Dayal Das (18) of Silchar, Miwalal (22) of Silchar, Nirmal Robidash (18), Arup Robidash leh Santosh Robidash hi uh a,huai mi 6te RIMS hospital ah etkol hi uhi.

Sangai Festival ni 5 dung zat hiding
Imphal, Nov-7:Kum paisate ah Sangai Festival a kizat chiangin ni 10 sung kizang sek mahleh Nov 21, 2013 akipan Palace compound a Hatta Kangjribung a Sangai Festival kizang ding bel security tawh kisai in ni 5 sung lel zat hiding in kigen hi.Manipur Chief Secretary PC Lawmkunga makaihna in zan a High Level Meeting ah Nov 21-25, 2013 sung lel Sangai festival zat hiding in thukim uh a,huai festival zat hunsung teng security kichingtak duty gige ding hi’n leng genkhawm uh chih om hi. Hibang thil omna ziak bel tulai in Imphal khawpi sung leh akimlak mun khenkhat ah tulai a bomb puakzak ziaka misi leh liam om sek ziakin security dinmun tawh kisa govt in leng bangtanhiam patauhna nei uh hiding gintakthu kigen hi.

State dang apan nga Truck 12 dim Manipur adingin hong kipawlut
Imphal, Nov-7: Manipur ah Nov 5, 2013 a kizang festival minthang ‘Ningol Chakkouba’ hunlai in Imphal khawpi sunga ngasa zuak pawlin Manipur pawlam akipan Truck 12 dim ngasa hong pawlut uh chihthu om hi. State dang akipan ngasa hong kipuaklut dan mi khat in a gendan in gari pei(tyre) 10 kithuah Truck 8 in a puakkhop leh gari pei(tyre) 12 kithuah Truck 4 in a puakkhop ngasa hong kipawlut hi’n kigen hi, Truck tyre 10 kithuahte khat in ngasa box 250 tan pawthei a, Truck a tyre 12 tan kivuah khat in ngahsa box 300 pua hi’n gen hi.Ngasa kithunna box 1 ah ngasa kg. 40 vel om hi’n leng kigen hi.

Mikhat in apu that: a inn hihsiat in om

Imphal. Nov-7: Imphal West district a Singjamei PS huamsung Lilong Chajing Chingkhong Leikai ah tuni zinglam dak 10:30 velin Ningthoujam Penao @ James (35) s/o Iboton in apu (uncle) Ningthoujam Birchandra(96) s/o (late) Sajou a tenna inn uah tem in dawtlum chihthu om hi. Akigendan in Ningthoujam Birchandra in tuni a zing an nelai Penao in temta in va dawt a, tuaphet in Penao leh a innkuante’n a vek un a inn uh nusia in taikhia uhi. Thil omdan theih nungin Lilong Chajing Chingkhong Leikai a om mipi thangpaiten Penao-te tenna inn hihsia uhi.

Tourist bus ah bomb khat kimukhia
Imphal, Nov-7: Imphal-Guwahati kikal a tai Tourist Bus(No. MN-01/1998) sungah tuni zinglam dak 9:30 in bomb khat muhkhiak in om hi. Akigendan in Network Travel Agency bus in Imphal apan Guwahati zuan a taikhe deklai seat no. 20 leh 21 ah passenger khat in bomb kikoih mukhia a, huai theih phet in passenger-teg kumkhia uhi. Huai phet in City Police te’n a delhpah in bomb pen thovengtak in lakhia uhi. Huai bomb kimukhia kuate koih hihiam chih kitheilou a, helpawlte thilhih hiding in Network Travel Agency te’n gintakthu gen uhi.

Sangai Festival Campaign kipan
Imphal, Nov-7 : Sangai Festival ding tawh kisai a mipi lak a awareness campaign dan in tuni in Royal Riders of Manipur-te saina in Hotel Imphal ah ‘Royal Riders Campaign for Sangai Festival’ kichi patkhiak in om hi. Royal Riders pawl in Bullets gari hunkhop zangin Manipur a district 8 phasuak ding uhi. Amau a phakna munte uah street corner meeting leh Sangai Festival bangchidan a poimawh hiam, chihte thehzak kawmin hilhchian ding uhi.