Ni 3 sung daihding Seminar om
Lamka, Nov 5: Partners in Discipleship International (PDI) saina in New Lamka a Dorcas Jubilee Hall, Mini Auditorium ah zan zinglam in Rev K.Kamchinkhup, Director of Ministries, EBC in ‘Seminar on Deaconship and Christian Counselling’ hong hi. Seminar om sung Pastor Gary Chaffins, USA leh Buch Stall, USA te’n sinsak uh a, PDI apan in Director Gary Brewer, PDI Co-ordinator Suresh Singh ban ah Brock Schewren te’n leng uap uhi. Huai Seminar ah EBC Pastor 20 vel tel uh a, Nov 7& 8, 2013 in PDI te’n Zimthiang Baptist Church, Loktak Project ah Seminar nei nawn ding uhi. EBC nuai a Baptist Children deptt te’n tulelin PDI-te bawl Sunday School sinlaibu zang uhi.

GBC ah 31st Commencement service
Lamka, Nov 5: New Lamka a Grace Bible College ah Dec 7, 2013 zinglam dak 11:00 in 31st Commencement service om ding a, Rev.Dr.Kamkhanthang, Principal, GBC in student graduate thakte degree peding hi. Huai hun ah Rev.S.Vungminthang, General Secretary, EBC in graduate thakte adi’n thumsak ding a, Rev Dr Chichard Howell, General Secretary, EFI in Pathian thu gending hi. Tutung in GBC ah akigawm in mi 54 graduate ding uh a, huai te Master of Divinity 17, Bachelor of Theology 32 leh Diploma in Theology 5 hiding uhi.

Bethel ECA Sunday School Building
Lamka, Nov 5: Tuni zinglam apan in Bethel ECA a Local Chairman Lalhmachhuana makaih in mipi 100 velin Bethel ECA campus ah Sunday School building ding atung sungin social work nei uhi. Sunday School building bawlzawh hun in ground floor ah Conference Hall leh Sunday School a Superintendent room om ding a, 1st floor ah Sunday School naupang te’n room 6 zang in class nei ding uhi. Tuni’n Bethel ECA Sunday School building nasepna ah Bethel ECA saptuam mi hilou ban ah khawkim khawkiang apan phatuamngai tamtakte social work a telin nasem uh a, amauteng tungah Lalhmachhuana, Local Chairman Bethel ECA in kipahthu gen hi.

UGC NET ah lawhching
Lamka, Nov-5: UGC NET Examna result puankhiak a omte ah lawhching thak Mrs. Biakching Tonsing d/o T Chinkhopau of Hausa Veng, Bungmual in June-2013 a UGC-NET Exam ah ‘International and Area Studies’ subject ah lawhching hi. Aman kum 2010 in Jesus & Mary College (JMC), Delhi University ah UG zou in, kumlui 2012 in JNU apan Master degree zoukhia a, tulelin JNU ah M.Phil degree sunzom hi.

TAYC panpihna in Housie Bumper

Lamka, Nov 5: Tuibuong Area Youth Club panpihna dingin Tuibuong a Tedim Road, Canara Bank kong ah tuni zinglam akipan Housie Bumper om hi. Huai ah mi tamtak tel uh a, nitaklam in Full House Bumper nei uhi. Housie Bumper ah 1st, 2nd leh 3rd line ah kipahman Rs.500 chiat; Four Corner leh Quick 5 ah Rs 500 tuak, TAYC Star in kipahman Rs 1000 ban ah Full House Bumper ah kipahman in Lenovo A2107 (Tablets) hi a, Full House Bunper ah mi 2 in kipahman a matkhak ziak un Tablets value Rs 15,000/- vel sumtang in kihawmsak uhi.

EBC Kumsim Khawmpi 65na om ding
Lamka, Nov 5: Evangelical Baptist Convention (EBC) Kumsim Khawmpi 65veina Dec 7-10, 2013 sung Hiangtam Lamka a EBC biakinn ah om ding a, Dec 7, 2013 nitak dak 5:30 in Rev L. Kham Kho Lun, Director of Missions in Khawmpi hong ding hi. Khawmpi sungin Rev Dr Richard Howell, General Secretary, EFI leh Rev Dr Ginnei Thang Ngaihte, OMF, International, Bangkok in thugen ding uh a, Bible study hun ah Rev Dr Ginnei Thang Ngaihte in makai ding hi Dec 8, 2013 sunnung dak 1:00 a Ordination Service ah Pastor 7 leh Upa 26 te Rev S.Vung Minthang, Gen Secy EBC in ordination pe ding a,Upa T.Langzathang, Khawmpi Chairman in certificate pekhe ding hi. Dec 9 nitak kikhop hun ah EBC apan semtu pensioner 6 te kiang ah Upa G.Thangchinlian, Chairman BOT in pahtakna hawmna(Meritorious Award) neiding a, Dec 10 nitak in Upa 14 te kiang ah Upa T.Langzathang in Upa Pahtakna lai hawmkhe ding hi. Dec 9 & 10, 2013 zinglam apan in Khawmpi palai (delegate) te’n business session neiding uh a, EBC sum zatding a propose budget genkhawmna, Khawmpi 66 na ding a Uliante telna leh thu poimawh tuamtuam genkhawm ding uh a, Dec 10, 2013 nitak kikhop hun ah Rev V.Thangkhangin, Director of Institution in Khawmpi khak ding hi.

Sumkong Bazar bawlna pailel

Lamka, Nov 5: B.Vengnuom Community Hall ah Aug 30, 2013 in mi 150 vel paikhawm te’n kihouna nei in Socio-Economic Dev Orgn (SEDO) kichi phutkhia uhi. SEDO te’ panlakna ziakin Oct 25, 2013 akipan in Tuibuong bazaar a KSO complex ah ‘Sumkong Bazar’ kichi bawlkhia in nasep pailel hi. SEDO leh KSO Gen HQ apan kiza dan in Sumkong Bazar kichi public donation tungtawna kibawlkhia hi a, Nov 2013 khasung a nasepna teng zawh siang a, Sumkong Bazar ah Christmas shopping lap man teitei hidin gen uhi. Sumkong Bazar zawh chiangin room 28 om ding a, ground floor teng shopping hiding a, 1st floor ah KSO Gen HQ Administrative block leh Auditorium om ding hi’n gen uhi.

BYF-te’n biakna neikhawm ding
Lamka, Nov-5: BYF New Lane, BYF Bethany leh BYF Bungmual te’n Nov 28-30, 2013 sungin EBCC New Lane, EBCC Bethany leh EBCC Bungmual ah biakna neikhawm (joint worship service) ding uh chihthu om hi.

SUUNNA
Henzapau (86) f/o Upa Laltinthang of Kangvai zanhal nitak dak 11:05 in teknat ziakin si a, zan in Kangvai hanmual ah kivui hi.
B.Lalsangliana (25) s/o (late) Ngena of IB Road tuni zing dak 7:00 velin sungna in si a, Lamka hanmual ah kivui hi.
Mani (50) w/o S.Vaikham of Zion Veng, New Lamka zan nitak dak 11.00 velin cancer ziakin si a, tuni’n New Lamka YPA Hanmual ah kivui hi.
L. Donggin (90) f/o L. Thangzapau of Zogam Road, New Lamka tuni zinglam dak 8:30 in teknat ziakin si a, tuni mah in Simveng hanmual ah kivui hi.
V. Vungkhozam of College Veng, New Lamka tuni sunnung dak 2.30 in cancer ziakin si a, Nov 6, 2013 in New Lamka YPA Hanmual ah kivui ding hi. V. Vungkhozam bel EBCC Singngat a DS Rev. V Khamvum’ u ahi hi.
Kimliansiam (38) d/o (late) Ngamlianlal of Soitin, Hq Veng tuni sunnung dak 2:00 velin sungna ziakin si a, New Christian Cemetery ah Nov 6 in kivui ding hi.

IMPHAL NEWS
International Airport hihsak teitei sawm
Imphal, Nov-5:Chief Minister O. Ibobi makaihna zan in CM Secretariat a Conference Hall ah high level discussion om a,huai ah Sangai Festival kipatni Nov 21, 2013 in Myanmar’ gam Sagaing Region a Chief Minister U Tha Aye leh Mandalay Chief Minister U Ye Myint in lenna in Imphal Airport a bawh hun uah Manipur govt lam apan bangmah a fellou leh hihkhelh omlou himhim dingin huai hunma a bangkim hihfel ding thu genkhawm uh a, Imphal Airport puahna a sep-le-bawl ding omlaite leng ahun lap a zawhsiang ahih theihna ding in akisaipih authorities khut ah mawhpuakna piak dingin genkhawm uh chihthu om hi.

Ningol Chakkouba kizang
Imphal, Nov-5:Manipur ah tuni’n Ningol Chakkouba kizang a,pasalte’n a sanggam numeite uh pasal neisate banah a tate uleh a pasal uh chial in nekkhawmpih uh a, neihdandan deihsakna thilpiak leng pia uhi. Sports Authority of India(SAI) NERC office te’n leng tuni’n Takyelpat ah nam tuamtuam akipan sports person-te Ningol Chakkouba neihpih uhi.
Huailou in Manipur Baptist Convention leh Tangkhul Church Charitable Trust-te saina in tuni’n MBC Church ah ‘Celebrating the honour of sisters’ chih thupi a zang in Ningol Chakkouba zatna om hi. Huai hun ah Manipur singtangmite phaijang mi pasal a neite pahtawina piak in om uh a, Dy. CM Gaikhangam leh Rajya Sabha MP Rishang Keishing ten uap uhi. Huai hun ah nupi leh numei kigawm mi 300 kiangah thilpiakna om hi.

YPA Imphal Block Silver Jubilee

Lamka, Nov-5: YPA Imphal block kum 25 chin (Silver Jubilee) lopna Nov 9, 2013 a om ding tawh kisai in tuni’n Laimanai mun Paite Colony a YPA Hall ah kidemna tuamtuam leh lottery draw-na hun zang uhi. Huai ah Chief Guest in Langkhanpau Guite, Chairman, ADC/CCpur pang a,Functional President in Vungzathang, Chairman CEC YPA GenHQ Functional President in pang in Chief Host in N. Zatawn,ex-Minister pang hi.
Chief Guest Imphal block YPA kum 25 tan a tunna dinga panla, makaite phat-huai a sakthu gen a, programme tangkhate kipahman pia hi. Huai ah kidemna tuamtuam-Nau awih la, Chingzit(guitar) bottle a zuut, zawlla kumlui sak, suktum kihek, nah mutging, tamngai (flute) mut, Rock band leh unit chih apan lapawl om a, YPA Imphal block in a sai Lottery draw leng om hi. Tuni a kidemna tuamtuam leh lottery draw a kipahmante Nov 9, 2013 in YPA Hall, Paite Colony, Laimanai, Imphal West a Silver Jubilee lop hun ah piakkhiak hiding uhi. Lottery ah 1st prize (Tata Nano) winner Book no. E, Ticket No. 861; 2nd prize (Honda Activa) winner Book no. E, Ticket No. 602; 3rd prize (LED TV) winner Book no. E, Ticket No. 265 hi'n kigen hi.

Numei 1 thah ziakin mipi’n vawlum
Imphal, Nov-5 :Patsoi PS huamsung Moidangpok mun ah zan nitak in pasal khat in numei khat sual(rape) sawm a, a sual zawhlouh ziakin that hidan in kigen a, mipi kipunkhawmte’n tualthattu kivuak huan in vawlum uh hi’n kigen hi. Thu kizadan in zan nitak dak 6:30 velin N. Samananda s/o Inaobi of New Keithelmanbi in Moidangpok mun ah numei khat sual a sawm lawhsam in that hidan in kigen a, mipi thangpaite’n a vuakna uah that kha uh hidan in police thusuak in gen hi. N. Samananda bel numei a sualsawm tawh kitanau uh hidan a gen in om hi. UNA

HPF-M Sadar Hills Consultative Meeting
Imphal, Nov-5: Tuni in Kanggui(Kangpokpi) ah Hill People’s Forum, Manipur in Consultative Meeting nei uh a, huai hunah District Working Committee, HPF-M, Sadar Hills makai dinga telching mi 5 te Rev. Thangkholet Kipgen in thumsak hi.

Ningol Chakkouba a kiklam accident
Imphal, Nov-5: Imphal-Moreh lampi Lilong PS a Usoipokpi ah tuni nitaklam dak 4.00 velin Truck khat leh Active khat kiphu kha in huai ah Activa atuang pasal naupang kum 1 vel mi leh anu amun ah si a, numei naupang khat leh apa liam uhi.Thu kizadan in Singjamei Naorem Leikai a om innkuan khat Ningol Chakkouba atel Activa a tuangkawm a innlam zuan a kiklam Truck tawh kiphukha in amun ah naupang khat leh anu si a, Activa hektu apa uleh a tanu uh numei naupang khat liam chihthu om hi.