Presidency & Damdei College founder si
Lamka, Nov-9: Motbung a Presidency College leh Damdei Christian College phutkhetu Henkholen Sitlhou of Tamdei Taloulou Village teknat ziakin tuni’n si a, tuni mah in kivui hi. Amah July 1, 1972 in Sempang village, Tamenglong dist ah piang a, Calcutta Scottist Church College apan B.Sc(Hons) zou in Guwahati University ah M.A. B.T. LLB zou hi. Laisiam masa ahihdungzui in Sadar Hills district sunga singtangmite makai poimawh in pang a, kum 1973 in Motbung ah Presidency College phutkhia in Principal hihna len a, tu in huai college pen govt. college hita hi. Huainung kum 1987 in Damdei Christian College phutkhe nawn a, huai college leng full-fleged Degree college hita hi.

Centre 3 ah mi 1813 exam ding
Lamka, Nov-9: SSC saina in Nov 10, 2013 in LDC leh Data Entry Operator (DEO) semding lakna ding Combined Hr Sec Level (10+2) Examination 2013 om ding a, Lamka ah exam centre 3 zat hiding hi. Huaite - CCpur govt college ah candidate 720 exam ding a, Lamka College ah candidate 517 exam ding banah Rayburn College ah candidate 517 exam ding uhi.

RBI Assistant sepna muthak
Lamka, Nov-9: Miss Ruthi Guite d/o G Thawngkhenthang (sis/of Dr. Chinkhanlun Guite) of Zenhang Lamka in Reserve Bank of India ah Assistant post mu hi. Aman kum 2009 in Hindu College, Delhi University nuaiah UG zou a,kum 2011 in Indira Gandhi Institute of Development Research Graduate School, Mumbai apan Master degree zou hi.

Hepatitis ‘B’ & ‘C’ Screening om
Lamka, Nov-9: Nazareth Nursing Home leh Ranbaxy Pvt Ltd pangkhawm in tuni in Tuibuong a SP office ah Hepatitis ‘B’ & ‘C’ Screening-cum-Awareness camp om a, Police Officer, Police leh VDF personel 103 te’n sisan test uhi. Huaizawh sunnung in Lamka Police Station ah sunzom uh a, Police, VDF leh IRB personel 58 te’n sisan test uhi.

TC in ZNP candidate-te gumding
Aizawl, Nov-9: Thusuak kingahdanin, Nov 25, 2013 a Mizoram Assembly Election om ding ah Zoram Nationalist Party (ZNP) leh Paite Tribe Council, Mizoram HQ in semkhawm a pankhawm sawm uh chihthu kiza hi. Tua tawh kitonin PTC Mzr HQ in Paite mipi kuapeuh in kitel hunah ZNP a vote khe hiat dingin ngetna leh theihsakna bawl uh chihthu om hi.

Agriculture scientist muthak
Lamka, Nov-9: Agriculture Scientist Recruitment Board, KAB-I,PUSA, Delhi nuaia Agriculture Research Scientist 2012 result suak ah Mathew Seikholen Baite s/o (late) Jamlim Baite of Jangnom veng,Moreh lawhching hi. Aman M.Sc. (Plant Pathology) zou in IARI, Pusa ah Ph.D sinlel a, ICAR-JRF, Rajiv Gandhi National Fellowship (RGNF) leng ngah hi.

Tawldamna Khawpi ‘Album’ kihong
Lamka, Nov-9:Mungbawi Neihguk in a bawl Gospel Video Album ‘Tawldamna Khawpi’ Vol - II kichi tuni zinglam in YPA Hall, New Lamka ah Rev. L. Kham Kho Lun, Director of Mission, EBC in hongkhia in Pathian kiang ah thumna in lan hi. Aman a thugenna ah
Tawldamna Khawpi kichi ‘Van-gam’ (Paradise/ Pathian kiang) genna hi a, huai mun ah lungkham mangbat omlou ding a,hichi zawdeuh leh chih leng omlou hi’n gen hi. Mungboi leng apianna nu-le-pa adi’n buaihuai bang mahleh Pathian in a thupina latna dinga a telkhiat hizaw hi’n gen a, Mungboi in Pathian mu gige leh phok gige ahih ziakin Mission nasemte ngaina mahmah hi’n gen hi.Mungbawi Neihguk in a genna ah sum-le-pai neikei mahleh deihsaktute leh mi kiphalte ziaka Album bawlthei hizaw in gen hi.

Truck accident ah mi 1 si
Lamka, Nov-9:Truck(No. MN-02A/6219) in zan nitak dak 11.30 velin Serou leingoi pawkawm a Lamka lam zuanlai Saikot play ground khenzek ah steering fail in accident a, huai Truck kilep(tyre-te vanlam nga) in a delhkhak ziakin 2nd handymen Thangkhanlal (18) s/o Khamminthang of Zoveng amun ah si hi.Huai Truck ah nasemtu mi 6 vel tuang uh a, midang aliam omlou hi’n kigen a, accident laitak in 2nd handymen pen Gari tukvelh bul a tukawm in ihmu laitak hi’n kigen hi.
Truck accident chih theihphet in Saikot khawmite’n buaipih in HYA te’n hankuang ah siluang nampuan atuam in pekhia uhi. Truck neitu’ Kaizathang of Zoveng te’n siluang puandum in tuam uh a, voktal tuk 5 gou in innsung dawngta in kihouna nei uhi. Huai ah thunung thuma omlou din kihoulem uh a, gari’ neite’n Rs.50,000/- in sigal uh hi’n kigen hi. Misi bel tuni’n Zoveng hanmual ah kivui hi.

1st Class in M Phil degree ngah
Lamka, Nov-9: Manthianching Guite d/o Pumkhanmang Guite of Vengnuam, New Lamka in 7.37 CGPA (First Class) in JNU apan M.Phil degree ngah hi. A dissertation Topic ‘Nepalese ethnic identity and the formation of Darjeeling Hill Council’ hi a, aman Miranda House apan UG zou in JNU ah Master degree sunzom a,tu’n Prof Mahendra P Lama nuai ah PhD sunzom hi’n kigen hi.

School Vehicle Assn Annual Meet om
Lamka, Nov-9: CCpur Dist School Vehicles Assn.(CDSVA) pawlin tuni in Chiengkonpang Community Hall ah Annual Meet nei uh a, huai ah Special Guests in Lamkhosiem Khongsai, DTO/CCpur leh Michael Ginzasuan, DSO (CAF&PD) pang uhi. DTO in agenna ah student pua gari himhim CDSVA pawla registration bawlloute’n student paw theilou ding uh hi’n gen a, student a puakte’ uh hinna gari driver ah kinga ahihdan thei gige dingin ngen hi. Member paikawmte’n bussiness session leng nei uh a,kum 2014 apan member site Rs.10,000 a gal ding, student puakman Rs.100/- a khansak ding leh March kha a Annual Meet neihzel dingin thupuk uhi.

Gospel Video Album hong ding
Lamka, Nov-9: Lingsiphai KSP biakinn ah Nov 10, 2013 zinglam in ‘Ginna'n Ka Han Thil’ kichi Gospel Video Album thak hon hiding hi. Huai album bel D.Siaklam in azi (late) Ms. Kimkholian theih gigena dinga a bawl hi a, SKKP Choir te’n lapawl a sak uh hi’n kigen hi.

SUUNNA
Miss Esther Nianglunman @ Esther Samte (27) d/o Thawngkhenmang Samte of Imphal, zan nitak dak 8:30 velin Downtown Hospital, Guwahati ah si a, tuni’n Guwahati ah kivui hi.

IMPHAL NEWS
North-East Festival ah Mary Kom tel
Imphal, Nov-9 :New Delhi a Indira Gandhi National Centre ah tuni’n ni 2 sung daih ding North East Festival kipan a, huai ah Olympic bronze medallist MC Mary Kom tel a, Ratan Thiyam, Adil Hussain, Andhi Jamsenpa, Prayot Debbarma leh Zubin Garg te’n leng uap uhi. Tuni in ‘tourism potential and entrepreneurship’ tawh kisai session om a, huai ah resource persons in MS Ahluwalia, Meghalaya CM leh Arnab Goswami pang uhi.
Tuazawh in ‘Look East Policy session’ om a, huai ah speaker mi 200 vel tel uhi. Tuate lakah Myanmar a India Ambasssador leng tel a, GK Pillai, PC Haldar leh Ranjan Mathai in leng huai hun uap uhi. Nitaklam in Rock Music Concert hun ah Zubin Garg in mipi paikhawmte su thathou mahmah a; lasiam minthang Guru Reuban, Omak Kamut leh Mami Varte te’n leng lasa uhi.

DIG in dan leh thupiak enkai ding
Imphal, Nov-9 : Dy. CM Gaikhangam in tuni’n Lamphelpat a Officers Club ah Media-te tawh a kimuhna ah Dy. Inspector of General (DIG) makaihna in senior police officer te’n Imphal khawpi sunga muanna leh bitna dinmun(law & order) enkai ding uh hi’n gen hi. Huai tawh kisai bangchik huna pat hiding hiam chih Dy. CM in genlou a, tulai a mun tuamtuam a bomb puak ziakin dan leh thupiak lam etkai hoihsak ziak hidan in gen hi.

YPA Imphal Block Silver Jubilee
Imphal, Nov-9: YPA Imphal Block kum 25 a chinna ‘Silver Jubilee’ tuni zinglam in YPA Hall, Paite Colony, Laimanai, Imphal ah lopna om a, Chief Guest in Health Minister Phungzathang Tonsing; Chief Host in S. Chin Ngaih Pau, President, YPA Gen HQ; Functional President in H. Mangchinkhup, EM/ADC leh Guest of Honour in Vungzagin Valte, Parliamentary Secy pang uhi. Huai hunah Special Invitee-te telin khuallian te’n Jubilee dak khetna nei uh a, Chief Guest in Jubilee suang hong hi. L. Thangkhanlal Ngaihte, Chairman, YPA I/B in mipi paikhawmte vaidawnna leh Makpate presentation nei a, YPA I/B kipat tung in YPA Gen HQ in Unit dan in en a, himahleh Pathian vualzawlna tawh tuni in Block khat in omta chi hi. Chief Guest in agenna ah, gam-le-nam pen nang leh ke’n i zun kei leh kuan zundiing hiam chi a, mimal chih in mawhpuakna neichiat ahihdan gen hi.

AP akipan media-te Imphal hongtung
Imphal, Nov-9 : Arunachal Pradesh a Media te’n Annual External Conducted Tour dan in tuni in Imphal hongtung uhi. Arunachal a Echo News a senior Sub-Editor makaih in mi 7 hongzin uh a, ni 4 sung Manipur ah ding uhi. Amau tuni in Moreh leh Loktak lake pha uh a, tua zawh in Lamphelpat a Officer’s Club ah get-together hun uap uhi. Deputy Chief Minister Gaikhangam in leng kimuhpih a, nitaklam in Majorkhul a Manipur Press club mun veh uhi. Amau Nov. 11, 2013 in Imphal nuse ding uh hi’n kigen hi.

College 4 dinkhiak hiding -Edn. Minister
Imphal, Nov-9 : ATSUM ten tuni’n Hotel Imphal a 4th Academic Program a zatna uah Chief Guest in Education Minister M. Okendra pang hi. Aman a thugenna ah Manipur ah college 4 dinkhiak hidin gen a, huaite Tamenglong dist a Tamei ah khat, Ukhrul dist a Phungyar ah khat, CCpur dist sung Tipaimukh ah khat leh Thoubal dist sunga Sugnu ah khat hiding, chi hi. Tuaban ah hill district tengah B.Ed zil theihna leng koih hidin gen a, huaimai hilou in Chandel, CCpur, Senapati, Tamenglong leh Ukhrul district ah Polytechnics koih hiding in gen hi.

Jadonang Football Tourney kipan
Imphal, Nov-9 : ‘The IXth Jadonang Memorial Football Tournament-2013’ tuni in Imphal West district a Thangmeiband Athletic Union Ground ah kipan a, huai ah Chief Guest in Dy. Chief Minister Gaikhangam pang kawm in hongkhia hi. Huai tournament ah team tuamtuam 24 tel uh a, Dec 2, 2013 tan sunzom ding uh hi’n kigen hi.