Chairman ADC/CCpur in ZFC teamte khahkhia
Lamka, Nov-8: 7th All India Chief Minister Gold Cup kichi Namchi Ground,Jorethang, Sikkim state ah Nov.12-22, 2013 sung om ding a, huai atel ding in Zomi Football Club te tuni zingsangin New Lamka a Hebron PCO akipan kuankhia uhi. Tuni zingsang dak 6:30 in Pastor H.Jamkhanpau, Local Pastor, EBC Mualkoi in thumsak a, huai zawh in Langkhanpau Guite, Chairman ADC/CCpur in khahkhia (flag-off) hi.
ADC Chairman in agenna ah player- te mahni kithunun chiat ding, pawtkhiat hun aleng Coach-te thu a omding, vualzawh kia hilou in vualzawh hun ah leng puakdan siam ding, kimawl hun ah midangte etton hithei dia kimawlding in hasuan hi. Pastor Jamkhanpau in banglam peuh ah Pathian tellou a vualzawhna omlou ahihdan player te'n theithak ding in ngen a, ZFC te' midangte etton hithei ding a kimawl ding leh National Player tanpha a Pathian in a dopsang deihsakthu gen hi. ZFC-te bel Manager Khupsianmung leh Coach Lemlal Guote makaih in official 5 leh player 17 tawh Sikkim zuan uhi.
Nov. 12, 2013 in opening ceremony om ding a, Sikkim Chief Minister in uap ding a, opening match ah Zomi Footbal Club (ZFC) leh All India SAI-te kimawl ding uhi. Huai tournament bel India gam a tournament thupipen telkhiak a omte laka 4na hi a, champion club in Rs.3 lakh ngah ding a, tournament a tel club-te giahna leh paiman teng Organizing board te'n sengvek ding uhi. Huai hun ah Nepal apan club 3, Kolkata apan club 2 banah India a football club minthangpen pawl a kigen Air India, ONGC, All India SAI leh Shillong apan Royal Wahingdoh teamte tel ding uhi.

M.Chungkhosei’ accident thu ah JAC kibawlkhia
Lamka, Nov-8: M. Chungkhosei Haokip (65) s/o (late) Onkhothang Haokip of Happy Valley, Tuibuong apaisa Nov. 1, 2013 nitak dak 6:15 vel in Dr Ginniang kiang a ki-ensak khinphet innlam zuanlai a inn uh tunma deuhin Tedim Road ah Alto Car 1 in phukha a, Dist Hospital puaklut in om hi. Doctor te’ refered ziakin Imphal a Shija Hospital ah puaklut a om in ICU ah etkol a omden hi’n kigen hi. M.Chungkhosei phukhatu tunitan akipuan louhziak in tuni zingsang in atenna inn ah innsung mi leh oganisation bangzah hiam paikhawm in JAC kibawlkhia hi. JAC te’n Alto gari neitu in JAC ma a kipuang dingin ngen uh a, Alto gari neitu akipuankhiat leh ngaihdam hiding a, akipuan kei aleh theihkhiak ahih hunhun in action khauhtak lak hiding in gen uhi. M.Chungkhosei tuahsiatna tawh kisai Alto neitu thei a om leh kipahman piakding in leng JAC te'n chiam(promise) uh a, Mobile No. 9612381261 leh 872990781 ah JAC te thuzak theih ding hi.
JAC makaite-Daniel Gangte (Secy KIC); Kamthang (Inf Secy KKL); TL Haopu (President KSO/CCpur); Paokai Haokip (Inn sungmi) leh Jamkhogin (inn sungmi) hi uh a, amaute Dr Lunkhohao @ Haopu in Pathian kiang ah thumsak hi. M.Chungkhosei, ex-Minister tuahsiat thu ah Police te'n FIR No.87 ( 11) 2013 CCP-PS U/S 279/338/427 IPC registered uh a, Alto gari neitu leng suizui lel uhi.

Folk Dance & Music Festival
Lamka, Nov-8: Directorate of Arts & Culture, Govt of Manipur leh Northeast Zone Cultural Centre, Dimapur kigawmna saina in Manipur ah ni 3 sung Folk Dance & Music Festival om ding a, Nov 15 in Lamka ah, Nov 16 in Kakching leh Nov 17, 2013 in Imphal ah om ding hi.
Huai ah Manipur leh state tuamtuam akipan folk dancer leh musician 200 val tel ding uhi.
Lamka ah Nov 15, 2013 nitaklam dak 3.00 in Hiangtam Lamka a YPA Gen HQ Hall ah zat hiding a, huai ah Chief Guest in Langkhanpau Guite,Chairman, ADC/CCpur pang ding a,Guest of Honour in Ms Jacintha Lazarus,IAS, DC/CCpur pang ding hi.Huai ah Nagaland,Assam,Arunachal Pradesh,Meghalaya,Tripura,Manipur,Sikkim,Mizoram,Andhra Pradesh leh Eastern Zone Cultural Centre,Kolkata akipan artise tuamtuam in folk dance lahna nei ding uhi.

DC leh Addl DC zinkhe tuak uh
Lamka, Nov-8:Ms Jacintha Lazarus, IAS, DC/CCpur in tuni sunnung in Lamka apan Imphal pha in nitaklam dak 3:30 flight in Tamil Nadu state a, a tenna khua uh zuan in zinkhia a, Nov. 11, 2013 vela hongtung ding hi’n kigen hi. Huailou in Maniram Sharma, IAS, Addl DC & Project Director DRDA in leng Nov. 3, 2013 a suty la in Rajasthan a atenna khua uh zuan in zinkhia a, Nov 11, 2013 in Lamka hongtungkik ding hi’n kigen hi.

Lampi kuakna bawlhoih ding
Lamka, Nov-8: DC/CCpur makaih in Nov. 6, 2013 in DC office ah CCpur district sung a lampi dinmun tawh kisai in EE/PWD, OC 80-RCC BRTF leh OC 84-RCC BRTF te’n review meeting nei uh a, khawpi sunga lampi hoihloulua tungtang genkhawm uhi. Tedim Road a Police Station kong zero point akipan Lanva lei (bidge) tan lampi kuakna teng ni 16 sung a BRTF te’n minor repairing bawla hudim dingin thupuk uhi. Huailou in Tedim Road a drainage/footpath tawh kisai Nov. 16, 2013 in DC/CCpur leh SDO/CCpur in joint inspection bawlding in thupuk uhi.

EE akipan SE in kaisang
Lamka, Nov-8: Velngunmuan Hauzel,IRSE s/o Dr H. Kamkhenthang of Paite Veng,Imphal in hun bangtanhiam Jiri-Imphal Railway Project construction a Executive Engineer(EE) a sep nungin November 4, 2013 in Superintending Engineer(SE) ah kaisang a, huai tawh kiton in Northeast Frontier Railway, Assam ah posting chih thutut kingah hi,

Kha 1 sung in gari 164 kibehlap
Lamka, Nov-8: CCpur district ah Oct. 2013 kha sungin gari chi tuamtuam 164 kibeplap in Dist Transport office ah register hi uhi. Huai te Truck 5, Jeep 1, Taxi Cab 1, Car 19, Taxi 1, Diesel Auto Rickshaw 16, Bike/Activa 119 leh adang 2 tel hi. Huailou in DTO staff te’n Oct. 2013 khasung in revenue Rs 14,77,752/-mukhia uh a, April-Oct 2013 sung in Rs 77,01,159/-mukhia in govt ah challan in submit uhi.
Huaiban ah April-Oct. 2013 sungin gari tuamtuam 968 kibehlap in Transport office ah register thak in om hi. Huaite lak ah Truck 12, Jeep 6, Taxi Cab 1, Car 116, Taxi 1, Diesel Auto Rickshaw 50, Motor cycle (Bike/Activa) 780 leh adang 2 tel hi.

Ex-gratia leh panpihna sum
Lamka, Nov-8: Lamka Police station ah Jue 30, 2013 nitaka thiltung tawh kisai ex-gratia leh aliamte panpihna sum amau mimal’ bank account chiat a laktheih ding in hihfel hita a,aliamte’n Grace Medico,IB Road(opposite Dist Hospital) a pharmacy neitupa’ deihna bangin damdoi man a piak ding zahzah uh kipiak ding in CDSU thusuak in theisak a,huai thil tawh kisai in CDSU in mawhpuakna nei nawnlou ding chi’n leng puang uhi.

Hill House Counting kipan ding
Lamka, Nov-8: SDO/CCpur apan thusuak dungzui in CCpur Sub-divn a khua(village) om teng ah tunung sawtlou in bialtu Lambu tengin Hill House Counting operation nei ding uh a,huai hun ah hihkhelh leh a diklou omlouhna ding in village Chief/Chairman tengin ana kithuahpih chiat dingin ngen hi.

Un-employment Allowance & Financial Assistance
Lamka, Nov-8:Kum 2012-2013 adia un-employment allowance & Financial assistance ngah dinga disable person telkhiaka omte(select list) Dist Social Welfare office a Notice Board ah kitak a,beneficiaries-te’n Nov 11, 2013 in allowance la dingin Dist Social Welfare Officer/CCpur in theisak hi.
Huailouin scholarship for disable students, schemes to regulate un-employment allowance with disabilities leh schemes for providing financial assistance to persons with disabilities under Economic Rehabilitation Programme kichi scheme tuamtuam leng nget theih laitak hi a,District Social Welfare office/CCpur ah application format laktheih ding a,Nov 20, 2013 tan in submit ngai ding hi.Bank account tellou application pom hilou ding chih ahi hi.

Ni 2 sung suty kizom ding
Lamka, Nov-8: Nov. 9, 2013 ‘Second Saturday’ ahihziakin Manipur govt nuaia office leh institution teng suti hiding a, huaizawh Nov. 10, 2013 leng Pathianni (Sunday) ahihziak in Manipur govt nuai a office leh institution teng akizom in ni 2 sung suty ding uhi.

Thumkhawmna hun ding kisuan
Lamka, Nov-8:Guite Nampi thumkhawmna Nov 9, 2013(Kiginni) a om ding chih himahleh lemtangzaw ding gelna ziakin ahun kisuan a, tunung hun lemtang masapen adin bikhiah thak hiding chi’n Maitam Committee a Info & Publicity deptt apan thusuak in gen hi.

Nov 24 in Scholarship exam om ding
Lamka, Nov-8: Class V passed a classVI zil leh class VIII passed aclass IX zil CCpur district apan candidate-te’ adin Nov 24, 2013 in Phungkhothang govt H/S leh Rengkai Hr Sec School ah scholarship examination om ding hi. Exam dingte lakah class VI zillel 360 leh class IX zillel candidate 417 om a, tunung sawtlou in admid card hawmkhiat hidin kigen hi. Scholarship exam a lawhching VI zilte’n khateng in Rs. 300 ngah ding uh a, class IX zilte’n kha in Rs.500/-ngah ding uhi. Examna a Dist Supervising Officer in ZEO/CCpur pang a, Liaison Officer in Pumsong Hangshing, DI of Schools/Thanlon; Central Suptd in T.Hanglamthang, Headmaster ,Phungkhothang govt H/S leh Asst Central Suptd in Lalthiangzo, Headmistress, Rengkai Govt Hr Sec school guan in om uhi.

CDDU ah theihsak ngai
Lamka, Nov-8: Tutung PMEGP 2013-14 tawh kisai a Disabled applicant/candidate omzah CCpur Dist Disabled Union (CDDU) te'n theih a utziak un akisaipih te'n CDDU Information Centre, Hebron veng ah kithuzakpih theih ding hi.

SUUNNA
Zamkhochin Mangte (53) s/o (late) Nengzagin Mangte of Salem Veng tuni nitaklam dak 3.00 velin gawlna ziakin RIMS, Imphal ah si a, Nov 8 in Hiangtam Lamka hanmual ah kivui ding hi. Zamkhochin Mangte bel Zomi Council Court Member Ngulchinthang’ sanggampa ahi hi.

IMPHAL NEWS
‘Miss Kut’ in Lodester Children Home veh
Imphal, Nov-8:Miss Kut Lhingjanei Kipgen in tuni’n Laipham Khunou a Khongsai veng a om Lodester Children Home veh a, huai Home a om naupangte kiangah puannak leh thil tuamtuam pia hi. Huai Lodester Children Home bel Lodester Public School te’n a etkol uh hi a, Home a om naupangte’n Miss Kut amau a veh ziakin kipaktak in ana vaidawn uhi.

Border fencing thu a BJP thugen nuamsalou
Imphal,Nov-8: CM Secretariat a Conference Hall ah tuni nitaklam in Chief Minister O. Ibobi makaihna in All Political Party meeting om a, huai ah border fencing tawh kisai a BJP Manipur Pradesh President Th.Chaoba in a thugen nuamlou sakthu puang uhi. BJP te’n tuma zekin a genna uah Manipur govt in border fencing ading in Centre akipan financial assistance ngah uh a, huaiziakin Manipur gam adia manna ding tanpha poisalou in border fencing lemsa uh chi’n soisel uhi. Huai thu ah CM in tuni a political party meeting zawh in Press-te kimuhpih in hil omdan taklang hi.
CM in a gendan in political party tuamtuam in border fencing thu ah ngaihdan kibang nei uh a, huai issue ah gamdang(Myanmar) leng atel ziakin state govt in thilteng hihfel theilou in huai thu a panla dingin Centre ah thil omdan tut ahihdan leng gen hi. Border fencing nasepna Ministry of Home Affairs in asai hi’n leng gen hi.CM in a genzelna ah Survey of India leh Survey of Myanmar in joint survey a bawl masiah India govt in border fencing khawlsak phot ding a nget din All party meeting thukim ahihdan leng gen hi. Tuni a All Political party meeting ah Trinamool Congress, CPI, NPF, NCP, MSCP, CPM, JD (U) a leader-te tel uh a, BJP te bel tellou hi’n kigen hi.

Nupi khat sisa in kimukhia
Imphal, Nov-8:Lamlai PS huamsung Napet Palli mun ah tuni’n numei khat a inn luahna mun ah sisa in kimukhia hi. Thu kingahdan in Chandam Momon Devi (63) w/o Ch. Ibocha of Ikou bazar tulelin Napet Palli a Asoibam Naba’ inn luah a om a, tanu in tuni sun dak 12:30 velin vaveh a,hileleng anu lupna tungah sisa in va mukhia hi. Akigendan in kum 7 paisa in Chandam Momon Devi a pasal tawh kikhen in huai mun ah amah kia innluah in om hi. Siluang muhkhiak ahih in namse simta a, alu (head) ah liamna muh ding om a, ni 2/3 paisa a thah hiding a muanmawh in om hi. Lamlai Police te’n siluang vala uh a, RIMS ah postmortem bawl ding in pekhia uhi.

Co-op Bank-te sit-in-protest tu
Imphal, Nov-8 : Manipur State Co-op Bank Ltd(MSCB Ltd) ten tuni in Old Assembly Road a a office kong uah sit-in-protest tu uhi. Amau Chief Exective Officer thak pedin govt phut uhi. Amaute gendan in Central govt in a seh Prof. A. Vaidyanathan Committee in PACS leh Co-Operative Bank- te kianga recapitization assistance dan a Rs. 13,596 crores piak hiding in gen ua, bangkim hihfel mahle uh state govt huai hihfelna ding a Chief Executive Officer khat a guan ding tunitan guanfel om nailou chi uhi. State dangten Chief Exe Officer guang khin vekta ua, a sum muh ding uh leng mukhinta uh hi’n gen uhi. Manipur in advertisement suahkhin a,candidate 8 a apply-te lakah a criteria kipia danin mikhat kia ching hi. Himahleh state govt in tutan bangmah a hihfel nailouh ziakin Manipur State Co-Op Banks staff te lungkimlou in sit-in-protest tu hi uhi.

Kangpokpi ah Healthy Baby Show
Imphal, Nov-8 : Kangpokpi a District Immunization Officer in thusuah a bawlna ah Nov. 12, 2013 zinglam dak 1:00 in Community Health Centre Kangpokpi ah ‘Healthy Baby Show competition’ neih hiding in taklang hi. Huai competition bel category 3 a khen hi a, 6-11 months, 12-23 months leh 24-35 months hiding hi.

Blankets leh nektheih tuamtuam pia
Imphal, Nov-8 : Lifeline Center, Naoremthong Laishram Leirak leh Relief Center for the Welfare of Differently abled persons, Manipur ten tuni in mibangloute kiangah blankets telin nektheih leh van tuamtuam athawn in pia uhi. Senjam Khunou a om Khaidem Ongbi Tombi (50) in ta 8 a neihna lakah mi 5te mibanglou in piang ua, anu kia in nekzong thei hi. Huai ziakin Lifeline Center te’n Tombi in haksatna lianpi tuak ahihdan thei in thil tuamtuam vapia uhi. Relief Center President Chirom Opendro in Tombi leh innkuanten govt akipan PDS antang tel in panpihna bangmah mulou uh a, tuaziakin akisaipih thuneite’n ngaihven ding in ngen hi. Aman maban ah leng Tombi leh a innkuante panpih zel ding uh hi’n gen hi.

NSCN (IM) cadre 2 mat in om
Imphal, Nov-8 : Imphal West District Police Commando ten Nov. 6, 2013 nitak dak 10:30 velin Namching Gangmei of Thangmeiband Tharon tenna inn ah NSCN(IM) atel mi 2 mankhia uhi. Matkhiak a omte Kuituanang Panmei (23) of Tharon Thangmeiband leh Ganglanang Gangmei (36) of Tharon Thangmeiband hi uhi.