District Level Officer(DLO) teng telkim dingin DC in theisak
Manipur Governor VK Duggal in Lamka pha ding
Lamka, January-30: Manipur Governor Vinod Kumar Duggal in dakkal 2:00 vel om ding in January 31, 2014(Sintawpni) in Lamka hongpha ding a, azi in leng hongzui ding hi’n kigen hi.Governor leh amah zuite zinglam dak 11.30 in Tuibuong a DC/CCpur office tung masa ding uh a, huai ah DC/CCpur makaihna District Level Officer(DLO)te tawh DC office a BRGF Resource Centre ah kimu in thil omdan genkhawm ding uhi.Ms Jacintha Lazarus,IAS, DC/CCpur in huai hun ah DLO teng kimtaka tel dingin theisak a,DLO te’n amau deptt tawh kisai thil omdan tomkim pulak thei dinga kigingkhol chiat dingin leng DC in theisak hi. Governor Vinod Kumar Duggal in Dec 31, 2014 akipan Manipur Governor hihna alet nunga Lamka hongphak masakna hi’n kigen hi.

Governor in DC/CCpur office akipan sun dak 12.00 velin Tuibuong a District Council office pha ding a, huai ah Chairman,ADC leh ADC member-te tawh kimu in thil omdan ngenkhawm ding uh hi’n official thusuak in gen hi. Huai zawh sunnung dak 12.30 in Governor in Tuibuong a Mini-Secretariat complex mun enkhe ding a, huai akipan sunnung dak 1.00 in District Hospital pha ding hi. Governor leh azi in sununng dak 1.30 in DC/CCpur tenna inn(residence) ah lunch ne ding uh a, huai apan Imphal ah kiknawn ding uh chih ahi hi.

Manipur Governor in Lamka hongphak hun ah azi(Lady Governor/First Lady) in leng hongzui ding a,Governor makaihna a official meeting leh programme tuqamtuam om sungin azi in zinglam dak 11.30 in Bijang a tagahte kepna mun Sangga Muon Inn pha ding a,huai akipan sun dak 12.00 in Pangzawl a Happiness Home pha ding hi. Huaikhit sunnung dak 1.00 in Rengkai a Marie Gold SHG-Dry Flower mun vapha ding a, huaizawh sunnung dak 1.30 in Rengkai Muolhum a SHG-Handloom mun leng vapha in huai muna nasepdan va enkhe ding hi’n kigen hi.

Zo laibu leh 3WZC DVD Cassette hongkhia
Lamka, Jan-30: ‘Prism of the Zo People’ kichi laibu thak tuni zinglam in Nehru Marg a Zomi Council office ah Health Minister Phungzathang Tonsing in hong a, huaizawh in Ginsuanhau,MLA(Singngat A/C) in ‘The 3rd World Zomi Convention’ zat lai a coverage kibawlna DVD Video hong hi. Zomi Council Working Committee meeting in zui a, The 3rd World Zomi Convention(3WZC) Organizing Committee phiat uhi.

Health Minister in SoO group-te leh govt. in Political Dialogue aneih theihna ding un poimawh banga panla in huai dinga mansa ahihdan gen hi. Development tawh kisai in district dangte tunglam ah Ccpur district khangtou zaw himahleh Education lam ginalou in gen a, district sunga Education tawh kisai bangchi panlak ding hiam chihte Zomi Council in ngaihtuah dingin leng ngen hi.

Tuni a session 2 zatkhawmna ah Vungzagin Valte, Parliamentary Secy; Langkhanpau Guite, Chairman, ADC; Zomi Council makaite leh 3WZC Convener banah vaisaite leh makai tuamtuamte tel uhi.

Nature Education & Wildlife Awareness
Lamka, Jan-30: DFO/Southern Forest Divn saina in EBC Dorcas Hall a Mini Auditorium ah zan in ‘One Day Workshop on Nature Education & Wildlife Awareness’om a, Langkhanpau Guite, Chairman ADC/Ccpur leh ADC member-te’ banah Forest official hunkhop tel uhi. Huai huna Technical Session-Ina ah Th. MP Singh, IFS, Conservator of Forests (Wildlife) in ‘Importance of Wildlife’ thupi zang in thugen a, Technical Session – II ah L. Joykumar Singh, IFS, Dy. Conservator of Forest(Park & Santuary) in ‘Wildlife Protection’ chih thupi zangin gen a, Technical Session – IIIna ah ‘Nature Education’ thupi zangin Kham Suanmung Tawmbing, IFS, DFO(Southern Forest Divn) in sinsak hi.CCpur district ah Forest tawh kisai in ADC poimawhna alet ziakin amaute tawh hun zatkhawm a om hi’n leng kigen hi.

Access-125 gari accident:mi 1 si, 1 liam
Lamka, Jan-30: CCpur PS apan km 9 vela gamla Tedim Road in a totkhak Torbung Bangla a New Life Drug De-Addiction Centre kong ah tuni zinglam dak 11:30 velin Imphal zuan Access-125 (white colour) No.MN02A-6197 in lampi nawla om 407 gari (No. MN02A-4712) khawllai phukha a, Access gari a tuang mi 2te lakah anung a tuang Robin (18) s/o Naobi of Bijang amun ah si a, driver Premjit (25) s/o Bihari of Patsoi, Imphal alu liam in Dist Hospital ah admit in om hi. Gari accident thu zakphet in Police te'n delh uh a, misi leh Access gari la in siluang pen Dist Hospital a morgue tuh uh a, Access gari bel Police station ah koih uhi.

KIC President Thangjang Haokip of Tuinom apan kizadan in Premjit ahihleh JCB driver a, a zatlel hi a, JCB a kisiat ziakin Imphal ah a part leidia kuanlai tuahsia hi'n gen hi. Aman JCB part lading in a driver uh Premjit sawl a, hileleng Premjit’ tuanpih Robin bel theikha ngeilou leh a tenna inn uh leng phakha ngeilou hi’n gen hi.

JCB neitute’n Robin’ innkuante kiang ah panpihna in Rs.1 lakh pia in kihoulem thei uh a, tunitak mah in Dist Hospital morgue apan Robin luang a inngkuante’n pawkhia uhi. Torbung Bangla a Access gari in a phutkhak 407-gari leng zan nitak dak 6:30 vel in Imphal zuana tailai Shaktiman tawh kiphu kha sia hi’n kigen hi.

H.Thangliankhum sisa in kimukhia
Lamka, Jan-30: Tuzing baihtak in New Bazar area a Super Market kianga Red Cross Rd a nullah ah H.Thangliankhum (33) s/o H.Thangmang of Lamlian Veng, Bungmual sisa in muh hi a, Police te'n siluang la in Dist Hospital morgue ah koih uhi. Tuni sun in postmortem bawl hi a, huai zawh in a innkuante kiangah pekhia uhi. Misi innkuante gendan in zan zinglam in inn akipan pawtkhia a, inn tungkiklou hi'n gen uhi. H.Thangliankhum tuni mah in Bungmual hanmual ah kivui a, Police te'n FIR No.18 (1) 2014 CCP-PS U/S 302/34 IPC registered uhi.

Lanva lei ah Auto lengkhia
Lamka, Jan-30: Tuni zinglam dak 8.00 velin Pearsonmun a Lanva lei(bridge) bul ah Diesel Auto (No. MN02A/6777) lengkhia in Lanva-lui kianga puansawp lai Ningngaihlian (40) w/o Luanzakham of Vengkhang, Pearsonmun delhkha in alu, akawng leh atong liam hi. Auto ahihleh Pearsonmun a Parking zuan a driver kia tuanga taitou hi a, gari hektu Joshua L Sungte (35) s/o Malsawm Sungte of Sielmat gim mahmah hi’n kigen hi. Auto leng kise nak mahmah a, YPA Pearsonmun makaih in khawsung mite’n luidung apan lampi ah kaikhetou uh a, huchih lai in YPA Pearsonmun Unit President, Thangte Tonsing in Auto a kaihkhiak touhlai in suang tawh kihettuah kha in a khuttal mong kitan hi.

CBYF Golden Jubilee lopna kipan
Lamka, Jan-30: Chin Baptist Youth Fellowship(CBYF) kiphuhkhiat nung kum 50 chin Golden Jubilee lopna tuni nitakin Lanva TCCC Hall ah kipan a, Upa H.Thang Khan Kham in Golden Jubilee Souvenir hong in, Pastor S.Lang Kho Gin in Pathian kiang ah lan hi. B.Siing NK Thang in Jubilee Music Album hongkhia in Pastor Nang Khan Suan in Pathian kiang ah thumna in lan hi.
Golden Jubilee lop sungteng thugentu in Rev.Dr JM Ngul Khan Pau,Sr Consultant,Deve Associates International pang ding a,Ms Lucy Dimnu,Director Elim Resource Centre in seminar ah sinsak ding hi. Rev Dr Sut Khan Thang in Bible study makai ding a, Feb 1,2014 zinglam dak 10:00 in mipi kikhopna hun ah Upa Dr H.Thang Khan Piang, Founder Rec.Secy, CBYF HQ in Golden Jubilee suang hong ding a, Rev Dr Sut Khan Thang, Executive Secy, CBA in Pathian kiang ah lan ding hi

Pangmual-Kangkap gam ah accident
Lamka, Jan-30: Thu kizadan 407-Shaktiman khat in tuni zingsang dak 8.00 velin sing pawkawm in Pangmual akipan Kangkap zuanlai Pangmual gama Tuikui mun ah accident a, Shaktiman driver Suanlian leh a gari neitu Nengkhankhup of Lailam Veng, Central Lamka liam uh a, mahajon-pa pen liam nasa sim mahmah hi’n kigen hi.Driver-pa halh zawdeuh in thil omdan theisak kawmdin Pangmual delhkik mahleh amah leng aliam ziakin chau a, hun sawtkuamtak lut hi’n kigen hi. Thil omdan zak phet in Kangkap akipan pawlkhat in thil tunna mun delh uh a, hiai thu sut ahihtan in thuchian ngak hilai hi.

Hospital campus ah gari kigu
Lamka, Jan-30: Tunitak dak 6:30 velin Dist Hospital campus ah Activa (White) Number om nailou khat kigumang a, gari neitute’n hospital a damlou an pe dinga alut kal uh minute 5 sunga kigu mang hi’n gen uhi. Gari neitu bel Joseph hi a, gari a leithak ahihbanah registration kibawl nailou leh Activa sungah a Gari Chassis Number- te omkhawm hi’n kigen h. Gari mukha leh a gutu theikhate’n contact no. 9862779420 theisak dingin a neitu in kuapeuh ngen hi.

Haokip hilou in Khongsai hizaw
Lamka, Jan-30: KIC complex, Tuibuong ah January 28, 2014 in kum 2014-2017 sung Kuki Inpi/Ccpur vaipaw ding telna ah Vice President(Admn dinga telching a om H. Lettinkhai Haokip chi a zan issue a kisuah pen H. Lettinkhai Khongsai chih ding hizaw ahihdan thutut kingah hi.

RKS Governing Body meeting om
Lamka, Jan-30: Dr N. Paul Ginthang, Med/Suptd Dist Hospital makaih in tuni zinglam in Medl Suptd' Conference Hall ah RKS Governing Body meeting om a, huai ah Dist Hospital New building luah hun ah Children ward leng building thak a a om theihna dingin govt ah ngetna piak ding chih telin Dist Hospital etkoldan ding genkhawm uhi.

CCpur ai-oh in kuan ding
Lamka, Jan-30: Rajasthan state sung Jaipur a Police Academy ah Feb 3-14, 2014 sung Police Officer-te' ading in ‘Investigation of Cyber Crimes’ training om ding a, huai ah CCpur district a Police-te ai-oh in Lamka Police Station a om SI Paulianthang vatel ding a, amah Jan 31, 2013 in kuankhe ding hi.

Malaria positive 2 mukhia
Lamka, Jan-30: Dist Malaria deptt te'n Jan 2014 sungin damlou mi 553 sisan test uh a, malaria positive 2 mukhia in huaite lak ah Malaria PF 1 om hi'n gen uhi

SUUNNA
Mrs. Hoihlianmawi(31) w/o Thangkhankham of Gangpimuol zan nitak dak 11.30 velin sinna ziakin District Hospital ah si a, tuni’n Gangpimuol hanmual ah kivui hi.
Upa Zamtuan (90) f/o Pastor Chinkhanlian of Vengnuam, New Lamka, tuni sunnung dak 12.30 velin teknat in si a, Jan 31, 2014 in YPA Hanmual New Lamka ah kivui ding hi.
Mangtinlal Haokip (27) s/o Jangkholun Haokip of Molnom(West) tuni sunnung dak 1.00 velin a innsung ua lupna tungah sisa a muhkhiak hi a, Jan 31,2014 in Molnom hanmual ah kivui ding hi.

IMPHAL NEWS
GM Hall ah Martyrs Day zatna om
Imphal, Jan-30: Manipur government saina in tuni’n GM Hall ah Martyrs’ Day zat hi a, huai ah Chief Guest in Manipur Governor Vinod Kumar Duggal pang a, Functional President in Chief Minister O. Ibobi pang hi.Tuni a hun zatna ah India in zalenna ngahna ding in British govt a suallai a mihangsan hinna piate banah ‘Father of the Nation’ chih a om Mahatma Gandhi lim(statue) ah pak piakna om hi. Martyrs’ Day bel Mahatma Gandhi theih gigena din kumteng a Jan. 30 in zat ahi hi.

Muslim pawl in Modi boycott sawm
Imphal, Jan-30: Jamiatul Ulama Manipur (Arshad Madani) leh Muslim Social Workers’ Union pawlin tuni’n mipi kikhopna sam in Manipr a political dinmun a genkhawmna uah BJP Prime Ministerial candidate Narendra Modi in Feb 8, 2014 a Manipur hongphak hun ah boycott ding in thpukna bawl uhi. Tuni a mipi kikhopna ah Jamiatul Ulama Manipur (JUM) President Moulana Moinuddin, JUM Working President Moulana Hesamuddin leh Advocate Md Abdul Kayum, Advisor, All Manipur Muslim Orgn Coordinating Committee in makai uhi.
Meeting a paikhawmte’n Congress Party in MP(Rajya Sabha) hiding in Md Abdul Salam a recommend ziakun kipahthu puang uh a,UPA Chairperson Sonia Gandhi, AICC Vice President Rahul Gandhi, Prime Minister Dr Manmohan Singh, AICC Political Secretary Ahmed Patel, Manipur Chief Minister O Ibobi, MPCC President Gaikhangam leh Congress leader te’n Rajya Sabha member din Md Abdul Salam a recommend ziakun amaute tungah Muslim pawlpite’n kipahthu puang uhi. .

Accident ah mi 1 si: midang 1 liam
Imphal, Jan-30 : Thoubal district a Khongjom War Memorial Gate kiangah zan nitak dak 8:40 velin Maruti Van leh Tata Tipper khat kiphukha ua, huai ah mikhat si in khat liam hi. Akigendan in Maruti Van (AS-01 AA/2829) a tuang Md. Farooque @ Ibothem (33) s/o Islauddin of Sangai Yumpham Cherapur amun ah si a, amah tawh tuangkhawm Md. Ithem (38) s/o Atoja liam hi. Maruti van ahihleh kisenak mahmah hi’n kigen hi.

Unaided Pvt School-te tungah case
Imphal, Jan-30: Unaided private school khenkhat -Nirmala Bas, Catholic School of Canchipur, Little Flower School leh St Joseph school in Class I & II zil dinga admission bawlthei ding student lakna din aniampen in mark 60% a bikhiah ziakun Manipur Alliance for Child Rights te’n Right to Education Act kalh hi a taklang kawm in Manipur Commission for Protection of Child Rights ah thutun kawmin unaided private school-te tung ah case file uh hi’n thusuak in gen hi. The Rights group te’n a taklatdan un admission process ah huchibang dan chituam zat in screening procedure zatlouh ding chih kalh hi’n taklang hi.

Manipur ah mihing 1540 adin doctor 1
Imphal, Jan-30: Manipur ah mihing 1540 zel adingin doctor 1 om chih ahi hi. Mihing 791 zel adin Hospital ah lupna 1 zel om dan in leng Data kaihkhawm akipan in bikhiah theih hi’n kigen hi. Thusuak in a taklatdan in India gama naungek piang 100 laka 42 vel dam zoulou a gen ahihlai in Manipur ah huaisanga niamzawtham in 10 vel hilel in kigen hi. India gam pumpi etin govt hospital leh private hospital a naunei 47% lel himahleh Manipur ah sangzawtham in 68.3% tung hi.Thusuak in a taklatdan in medical doctor,dentist leh Ayush doctor kigawm State Health Department nuaia sem teng 966 hi uh a, huaite lakah National Rural Health Mission nuaia sem 114 hi uhi. Doctors omzah ding a sanction post 1740 banah nurses omzah ding a sanction post 1435 hi a, hileleng tulelin nurse 1019 om uh a, huaite banah NRHM asem nurse l 715 om uhi.
Manipur ah tulelin medical specialist omte lakah RIMS ah 160 om uh a, JNIMS ah 119 om uh a, State Health leh Family Welfare ah 143 om uhi.Huaite banah tulelin 133 vel training in omlel uhi. State Health and Family Welfare Dept nuai ah tulelin District Hospital 7, sub-district hospital 1, Community Health Centre 17, Primary Health Centre 85 , Primary Health Sub-Centre 421, Allopathic Dispensary 20, AYUSH Dispensary 1,district hospital tuamtuam a attach AYUSH Wings 9 om hi’n thusuak in gen hi.

State Level Tribal Festival 2014 tuni’n hunkhakna om

Lamka, Jan-29:Chingmeirong a Tribal Research Institute Auditorium ah January 27, 2014 akipan ‘the 3rd State Level Tribal Cultural Festival’ om tuni zinglam dak 9.00 in programme zat tawpna hun kipan a, Chief Guest in Deputy Chief Minister Gaikhangam pang hi.Huai ah Functional President in Hill Areas Committee Chairman Dr Chaltonlien Amo pang a, Guests of Honour in Assembly a Dy Speaker MK Preshaw Shimray leh T. Manga Vaiphei, Chairman/MTDC pang uhi.
EBC Choir, Langol(Imphal) te’n ‘Ka Mang Lenna’ chih lapawl asak zawh un S.K Dev Verman, IAS, Principal Secretary(Tribal Affairs & Hills/TRI) in mipi paikhawmte vaidawnna thugen a, khuallian tuamtuamte’n leng thugen uhi. Tuni a hunzatna ah folk dance tuamtuam banah State Level Kut 2013 Cultural Dance a 1st hihna la Vaiphei Cultural Troupe te’n namlam lahna nei uh a, huailou in Moyon folk song, Zemei Folk dance,Vaiphei Cultural Troupe(Leilon Vaiphei), Saa Lu lam(Taphou Kuki), Liangmei Folk Dance, Khurkom lam(Molen Youth Club),Mao dance, Hip-Hop in traditional attire, Mizo Cultural dance(Centre Lamka), Simte Cultural dance(Simveng Ccpur)leh Zou Cultural dance leh namlam tuamtuam lahna om a, Rev. Ginmalsawm, D.S, EBC/Imphal Division in thumna in hunkhak hi.Khawmpi a tel mipite’n programme zatzawh in ankuang umkhawm uhi.

Lok Sabha election adin Security force company 150 poimawh –CEO
Imphal, Jan-29: Chief Electoral Officer(CEO),Manipur O. Nabakishore,IAS in tuni nitaklam dak 3.00 in Directorate of Information & Public Relations(DIPR) a Director Room ah press-te kimuhpih in April-May 2014 kimlaka Lok Sabha election om ding ah Manipur dinmun tawh kisai in press-te briefing bawl hi. Chief Electoral Officer(CEO) in a gendan in Manipur a law & order dinmun ziakin Manipur state sung a security force tulela om teng Lok Sabha election hun a security lam adin kizang vek theilou ding uh ahihdan genkawm in election a zat dingin Manipur in security force company 150 vel poimawh ding hi’n gen hi. Aman a genna ah Central Para-Military Forces company 150 a gente muntuam leh state dang akipan laklut ngai ding hidan in gen hi.Aman a genzelna ah Lok Sabha election phase 2a khen ahih lebel para-military force companies 75 poimawh ding hi’n gen a, huaite kithuahpih ding in state police leh armed police-te leng zat hiding uh, chi hi.Lok Sabha election ding phase 1 kia ahih lebel Security force a tawmpen in leng company 150 tan alou theilou a poimawh ding ahihdan gen hi.
CEO in a gendan in Election Commission of India in Lok Sabha election tawh kisai in Feb. 10, 2014 in State teng a Chief Electoral Officers-te meeting neihpih dingin Delhi ah sam hi’n gen a, huai hun ah O. Nabakishore in Manipur state in haksatna tuamtuam a tuahte ahithei tana chiang huntawk in ECI ma ah taklang ding ahihdan gen hi. Tua ding tawh kisai in district tenga Deputy Commissioners ten Feb. 31, 2014 tan in CEO Manipur kiang ah a thil omdan kimtak report pe dingin inleng theisak khin hi’n gen hi.

Governor in Lamka phading
Lamka, Jan-29:Manipur Governor Vinod Kumar Duggal in azi tawh January 31, 2014 in Lamka hongpha ding chihthu om hi. Governor in January 31,2013 zinglam dak 10:00 in Imphal a Raj Bhavan akipan Tedim Road tawh in Lamka hongzuan ding a, zinglam dak 11:30 in Tuibuong a ADC office ah Chairman, ADC/CCpur leh MDC-te tawh houlimna (interaction) neiding hi. Governot in Lamka a Dist Hospital leng phading a, sunnung 1:30 in an(lunch) ne ding a, huai zawhin Imphal ah kiknawn ding hi.

Rev S.Vungminthang in hongkhia

Lamka, Jan-29: EBC-LRRC saina in tuni’n New Lamka a EBCC Hebron' Sunday School Hall ah Rev S.Vungminthang, General Secy, EBC in ‘PLHIVs Care and Support Program’ hongkhia in Pathian kiangah lan a, PLHIV te’ adi’n thumsak hi. Aman agenna ah EBC Saptuam in Tear Fund tawh pangkhawm in hunsawttak PLHIV-te panpih a, hileleng Tear Fund te'n tukum apan panpihna hong piak nawnlouh ziak un EBC Saptuam in PLHIV Care and Support Program sunzom a, LRRC in enkai hi'n gen hi.
Tuni a Saptuam apan panpihna ngahte amau utthu a panpihna ngah hilou ahihdan gen a, PLHIV midang tamtak te'n panpihna ngah khalou ahihdan leng theithak dingin ngen a, Saptuam mipi'n kiphal bangbang apiak khawmte kihawmkhia hi'n gen hi. Huai ah Rev K.Kamchinkhup, Director of Ministries, EBC leh Ms Liankhoman, Dorcas Co-ordinator, EBC te’n leng thu gen uhi. Nutrition Support mi 62- Nutrition mi 38, Mother Baby 13 leh Education 11 kiang ah hawmkhiat hi a, khateng in Saptuam in LRRC tungtawn in mi 62-te kiang ah panpihna hawmkhe touzel ding hi’n kigen hi.

Laibu leh Disc honna om ding
Lamka, Jan-29: Nehru Marg a Zomi Council office ah Jan 30, 2014 in session 2 om ding a, zinglam dak 11.00 a 1st session ah Health Minister Phungzathang Tonsing in ‘Prism of the Zo People’ kichi laibu hong ding a, Ginsuanhau,MLA(Singngat A/C) in 3rd World Zomi Convention program kizangte akipan Disc kibawl hongkhe ding hi. 2nd session ah Zomi Council Working Committee meeting om ding a, Zomi Council Assembly 2013-14 neihding thu, 3rd World Zomi Convention Organizing Committee hihbeina leh thu tuamtuam genkhawmna in zui ding hi.

YMA Manipur Annual Conference
Lamka, Jan-29: Young Mizo Assn:Manipur inntekna in Feb 4-6, 2014 sung ‘YMA Manipur 29th Annual Conferencer,2014’omding a,YMA Thingkangphai Branch in zintun ding uhi. Feb 5, 2014 nitak dak 7.00 a mipi kikhopna ah Chief Guest in PC Lawmkunga,IAS, Manipur Chief Secretary pang ding hi. Huai ah Functional President in JC Ramthanga,IAS, Commissioner pang ding a, Chief Host in B. Zodingliana,MDC pang ding hi.Special invitees in Ms Laltanpuii,MCs, SDO/CCpur leh Thienlaljoy,MCS, SDO/Thanlon pang ding uhi. YMA Manipur Annual Conference om sung in member sisate suunna,khuallian leh mi poimawh tuamtuamte akipan thugen ngaihkhiakna, kidemna tuamtuam, cultural programme, vaihawmna leh lasiamte apan lasak ngaihkhiakna tewlin item tuamtuam om ding hi.

Minister in Guite kual phading
Lamka, Jan-29: Health Minister Phungzathang Tonsing in January 31, 2013 in Imphal apan Tipaimukh Road tawn in Thanlon khua tungsuak ding hi. Feb 1, 2014 in Thanlon khua apan Phaitong khua tung ding a, Feb 1- 2, 2014 sung Phaitong Gospel Centenary lopna hun uap ding hi. Feb 2, 2014 in Phaitong pan Sinzawl zuanding a, Sinzawl apan Songtal khua zuan in huai ah lunch ne ding hi. Songtal apan Mualnuam khua zuan in huai ah singpi (tea) dawn kawmin tawldam ding a, Mualnuam khua apan Lamka tungsuak ding chihthu om hi.

DC in Free Coaching hong ding
Lamka, Jan-29: SSPP Joint HQ, Lamka saina in Jan 31, 2014 zinglam dak 11:00 in IB Rd a Synod Hall ah DC/CCpur in khuallian apang in Free Coaching hong ding a, Pastor D. Kamchinmang, Local Pastor, EBCC Hiangtam Lamka in thumna in lan ding hi. Huai ah kikhopna uktu in ZEO/CCpur; Inntekpa in President, SSPP Gen HQ; Khualzahtak huai in DI of Schools/CCpur leh Zindeihthawh in Principal, CCpur govt college pang ding hi.

Phaitong Gospel Centenary
Lamka,Jan-29:Thanlon sub-divn sung Phaitong khua ah Pathian thu(Gospel) a lut kum 100 ching(1914-2014) ‘Phaitong Gospel Centenary’ lopna January 31-Feb 2, 2014 sung om ding a, huai hunsung in Rev S. Vungminthang, General Secretary,EBC in Pathian thu gending hi.Jan 31, 2014 in Senvon khua akipan Phaitong gamah Centenary meivak a tun hun in mipite’n ana vaidawn ding uh a,Centenary lopna mun ah lutpih ding uhi.
Feb 1, 2014 zingsang dak 7.30 in Langkhanpau Guite,Chairman, ADC in Centenary Waiting Shed hong ding a,zinglam dak 8.00 in Rev S. Vungminthang in Centenary suangphuh hong ding hi.Feb 2, 2014 zingsang dak 7.00 in Vungzagin Valte, Parliamentary Secretary in Centenary gate hong ding a,Pastor N.Dalkhanlian in thumna in lan ding hi.Zinglam dak 10.30 a sun kikhopna ah Phungzathang Tonsing,Minister(Health, FW & GAD) in Centenary Souvenir hong kawmin lan ding hi.

Lab Technician-te training ding
Lamka, Jan-29: State Health Mission Society/Manipur saina in Imphal a Family Welfare Conference Hall ah Lab Technician te'n Reproductive Track Infection/Sexually Transmitted Infection training neiding uhi. 1st batch ah mi 30 te'n zan leh tuni in training uh a, 2nd batch mi 30 te'n Jan 30 & 31, 2014 in training ding uhi. 2nd batch lak ah CCpur dist akipan Sanjit Meitei, PHC/Singngat; K.Kadamjit, PHC/Sagang; Niangngaihnem, UHC/Thingkangphai; Chingngaihhau, DMMU/CCpur leh Rodi, CHC/Parbung telkha uhi.

IMPHAL NEWS
Tuni’n Cabinet Meeting om
Imphal, Jan-29:CM Cabinet Hall ah tuni nitaklam in Cabinet meeting om a, huai ah
Manipur Legislative Assembly term 10na hun a assembly session 7veina Feb. 24, 2014 akipan om ding in lemsa uh a, huai tawh kiton in Governor kiangah phalna lak dinga thon dingin thukim uhi.Mizoram in ‘New Land Use Policy’ a zatsiam ziakun singtanggam a lou neih ziaka gam lianpipi halsiat hihkiam ahih Manipur in leng lunglut-huai sa mahmah a, huai dia govt in panlak hoihsa in Consultant ding in Union Home Secretary-lui GK Pillai’ zi Ms Suda Pillai,IAS(retd) Amah Union Planning Commission ah leng member poimawhtak hingei hi.
Cabinet in NRHM nuai ah contract basis a sem ding mi 251 lak thak lemsa uh a,huaibanah Govt. Aided Lecturer-te pension kum 60 apan 65 hitou din leng thukim uhi. Film tawh kisai a National Award ngahte leh Mt. Everest tangdawn kaltungte sepna piak lemsa uhi. Huailou in Police outpost 4 honkhiak beh lemsa uh a, huaite Lilong PS huamsung Chingkham leh Oinam Swombung hiding a, Thoubal PS huamsung Yuaithou leh Kakching PS huamsung Sorakhomundo telin thu poimawh hunkhop pass uh chihthu om hi.

Parliamentary Standing Committee-te ni 2 omdin tuni’n Imphal hongtung uh
Imphal, Jan-29 : Parliamentary Standing Committee on Commerce apan teamte ni 2 sung Manipur a om ding in tuni’n Imphal hongtung uhi. Amaute bel Birendra Prasad Baishya, Rangasayee Ramakrishna, Shadi Lal Batra, Ishwarlal Shankarlal Jain leh KN Balagopal banah Rajya Sabha members KP Dhanapalan, Prof. SK Saidul Haque, P. Lingam, Putul Kumari leh Lok Sabha members J. Sundriyal Director, Dy. Director Narendra Kumar leh Senior Committee Assistant Jawaharlal Prasad hi uhi. Jan. 30, 2014 in department tuamtuam a Head-te tawh meeting nei ding uh a, huai ah thu poimawh tuamtuam ding uhi.

Congress nominee Abdul Salam paisuak
Imphal, Jan-29: Manipur akipan MP (Rajya Sabha) member khat telna din Feb. 7, 2014 a election om ding ah Congress nominee Md. Abdul Salam kia in nomination file a, tuni in Chief Electoral Officer O. Nabakishore telin nomination paper etchetna(scrutiny) om hi. Huai ah Returning Officer L. Indira Devi in Md. Abdul Salam’ nomination form a file dikvek ahihdan genkawm in scrutiny ah paisuak hi’n puang hi. Huaizawh in Md. Abdul Salam kia in nomination paper a file ziakin kuamah tuhtu omlo a ching(uncontest) hi’n kigen hi.

EPF tawh kisai Workshop om ding
Imphal, Jan-29: Employees’ Provident Fund Organisation-te saina in January 31, 2014 in North AOC a Hotel Classic ah zinglam dak 10:00 akipan sunnung dak 1.00 kikal banah sunnung dak 2.00 akipan nitaklam dak 4.30 sung Employees’ Provident Fund(EPF) banah MP Act 1952 tawh kisai leh facilities tuamtuam banah pensioner khat kiangah Pension Payment Order piakkhiakna tawh kithuah Workshop om ding hi. Huaia telding in media leh akisaipih tuamtuamte Regional PF Commissioner-II, Northeast Region, Guwahati in theisak hi.

‘No Due Certificate’ lak hun bikhiah
Imphal, Jan-29: Manipur govt nuaia Addl Secy(Finance) in Nov 8, 2013 in Office Memorandum a suahna ah Govt employee tengin kum 1 sung in 2 veichiat Electricity deptt akipan ‘No Due Certificate’ la in paybill tawh Treasury office ah submit khawmsek uh a, huai tawh kisai in deptt tuamtuam a semte adin ahun bikhiah thak hi. Huai dungzui in Home deptt te'n January & July; Education deptt te'n February & August; Autonomous Dist Council te'n May & November ban ah deptt dang tengin June & December kha in No Due Certificate la a, submit dingin tbikhiah hi.

Territorial Army(TA) kila ding
Imphal, Jan-29: Press Information Bureau(PIB) Defence Wing thusuak in a gendan in Leimakhong a Military Station ah March 4-6, 2014 sung Territorial Army kila ding a, Manipur mi pasal-te’ kia lak hiding hi. Candidate hithei ding in Class VIII apan a tunglam siamna nei, kum 18-42 kikal mi, din sanlam aniampen in 158 cms leh taksa gikdan kg 51 leh a tunglam ahih uh ngai ding hi. Candidate dingte Leimakhong ah March 4, 2014 zingsang dak 6.00 in original document teng leh latest passport lemlak tawi in ki-report ngai ding hi.
Soldier(General Duty) category adin km. 1.6 km tai hun ding bikhiah thak hi a,minute 5 leh second 40 hiam huaisanga hun tomzaw a tai tungte group 1na a koih ahih ban uah marks 60 piak hiding uh a,minute 5 leh second 41 ahihkeileh minute 6 sunga taitungte group 2na a koih ahih ban uah marks 48 piak hiding uh a,candidate dangte minute 6 leh second 1 hiam huaisanga hun sawtzaw late bel fail a koih hiding uh chih ahi hi.Atunga tai hunsung ding kibikhiah thak ahihleh April 1, 2014 akipan zat hiding chi’n PIB(Defence Wing) thusuak om hi.Thuchian kimzaw theihnuamte’n ‘M’ Sector, Imphal ah PIB(Defence Wing) Notice Board a kitak et-theih ding chihthu om hi.