CBYF Golden Jubilee lopna paitou zel
Lamka, Feb-01: Chin Baptist Youth Fellowship(CBYF) Golden Jubilee lopna January 30, 2014 akipan Lanva TCCC Hall a om sunzom zel uh a, huai ah Rev.Dr JM Ngul Khan Pau,Sr Consultant,Deve Associates International in thugen hi. Tuni zinglam a mipi kikhopna ah Upa Dr H.Thang Khan Piang, founder Recording Secretary CBYF HQ in Golden Jubilee suang hongkhia a, Rev Dr Sut Khan Thang, Executive Secy, CBA in Pathian kiang ah lan hi.

Rev.Dr JM Ngul Khan Pau in a thugenna ah khawtang leh saptuam ah khangnoute e poimawh mahmah in, amaute’n biakna limsak dingin hasuan a, huailou in makaite kichi zahtakna tawh tuailaite’ leh kuapeuh in itsiam ding ahihdan gen hi. Aman agenzel dan in eimite thilpiak leh midangte kianga panpihna piak kitasam in, huchihlai in panpihna i piakte leng midangte adia noplou thei ding khop in kisialna om zel chi a, saptuam makaite bang ka vaksa chipeuh a kousia ki-om a, amaute Pathian in a makaih a, avak ahihlam theilou ihiam chi hi. Feb 2, 2014 zinglam dak 10.00 in Golden Jubilee lopna hunnanung kipan nawn ding a, makai masate suunna banah amau innkuate adia thumsakna om ding hi. Sun hun ah ‘Khangnote Kristian dan tawh kituak a koppih zonzia ding’ chih thupi zangin Ms Lucy Dimnu, Director, Elim Resource Centre in Seminar ah sinsak ding hi.

NTBC Biakinn thak hongkhia
Lamka, Feb-1: V.Munhoih, New Lamka a New Testament Baptist Church kibawl thak tuni zinglam dak 10:30 in Rev T.Dongjadou in hongkhia a, Pastor Sh Jamchinkhup in Pathian kiang ah thumna in lan hi. Huai hun ah Rev. Dr. HC Stephen, President BPM in Pathian thu gen a, mipi tam mahmah in biakinn sung ah tazoulou uhi. NTBC biakinn thak kihongkhia ahihleh April 13, 2013 in Rev S.Kaikhanmang, Executive Secy NTBC in ground breaking a neih ahi hi. Biakinn thak ah innkuan 68 (Sim Veng apan innkuan 27 leh Rengkai Bible Hills apan innkuan 41) kikhawm ding uh a, NTBC Saptuam pumpi ading in tuni a Biakinn kihongthak 29 a chinna hi’n kigen hi.

Phaitong Gospel Centenary lopna kipan
Lamka, Feb-1: Thanlon sub-divn Phaitong khua ah Pathian thu a tun kum 100 chinna (Gospel Centenary) lopna zan nitakin kipan a, Feb 3, 2014 tan sunzom ding uhi. Tuni zingsang in Langkhanpau Guite, Chairman, ADCC in Waiting Shed hong a, Rev S Vung Minthang, General Secretary, EBC in Centenary suangphuh hongkhia in latna nei a, centenary hunsung thugenpi in pang ding hi.

Tuni’n Phaitong khawkiang a mualtung ah Centenary cross honna om a, mipite’n Phaitong biakinn kilam masakna, tu a gamlak hita ah kikhopna hun zang uhi. Feb 2, 2014 zingsang dak 7.00 in Vungzagin Valte, Parliamentary Secretary in Centenary gate hong ding a, Pastor N.Dalkhanlian in thumna in lan ding hi. Zinglam dak 10.00 a mipi kikhopna ahHealth Minister Phungzathang Tonsing, in Centenary Souvenir hong ding hi.

DWWA makaihna in khawsung apan nawhkia
Lamka, Feb-1: D.Phailian Women Welfare Assn (DWWA) pawl in D.Phailian khawsung ah khamtheih doudal in panla uh a, zan nitak dak 8:00 velin inn luah a om Leichao(42) s/o (late) Tomba of D.Phailian, Tipaimukh Road in local zu litres 9 vel azuak mukhia uhi. DWWA pawl in Phailian V/A, PWC, KKL, YPA, YMA leh YVA makaite’ theihpihna telin tuni zinglam dak 10:00 in D.Phailian khua akipan Leichao nawhkhia uh a, Leichao’ innkuante’n a van teng uh pawkhia uhi. DWWA leh Phailian Welfare Committee lamte gendan in Leichao in zan nitaka a kichiam ban ah khawsung a dan kibawlte bawhsiat ziakin a innluahna apan nawhkhiat hi’n gen uh a, maban ah zu leh khamtheih doudalna ah kuapeuh in kithuahpih l dingin ngen uhi.
VSAC in Press Conference sam
Lamka, Feb-1: Veteran Sports Assn, CCpur(VSAC) pawlin tuni’n Press-te kimuhpih in ‘3rd Integrity Leaders Veteran Football Tournament, 2014’ tawh kisai pulak uhi. T. Sumlianthang, President, VSAC in a genna ah huai tournament pen Feb 3, 2014 sunnung dak 1.00 in Final Match-cum- Closing Ceremony om ding a, Chief Guest om tuanlou in Tribe leader tuamtuam leh khawtang makaite’n Special Guests hihna tawh uap ding uh chi hi.
Final match ah Kom Tribe Union(KTU) leh Vaiphei People’s Council(VPC) kimawl ding uh a, KTU Fans te’ South lam ah tuding uh a, North lam ah VPC fans-te tuding uh chi hi. Huai ah Oldest Player leh Heaviest Player banah Most Lean Player-te Award piak hiding uh a, Tournament ah Winner in Rs. 15,000 ngah ding a, runners-up team in Rs. 10,000 ngah ding uh a, KNO leh UPF in award-te pekhe ding chi hi.

Numei pawlte thumkhawm ding
Lamka, Feb-1: Gamsunga siatna tuamtuamte awlmawhna ziakin Lamka khawpi sunga numei pawl ‘Women Prayer Fellowship/CCpur-te’ makaihna in tukum adia masapen ding in Feb 5, 2014 zinglam dak 10.00 akipan sunnung dak 2.00 tan Lamka Public Ground ah thumkhawmna om ding hi. Huai hun ah gamsung a siatna tuamtuamte awlmawh a vei numei- pasal kuapeuh tel dingin chial uhi. Women Prayer Fellowship/CCpur thusuak kingah dan in tuma a CCWF leh LPF(numei pawlte) kiichisek tuma zekin min khat a kigawm in ‘Women Prayer Fellowship/CCpur’ chih kiminvuah uhi.

Guite-Doungel innkuante kikhawm
Lamka, Feb-1: Guite-Doungel Inkon Kiloikhom(GDIK) kichi pawl tuni’n Tuibuong a Zion Veng ah kimukhawm uh a, Pastor Henjalen Doungel, KBC Centre Church, B. Vengnom in
Pathian thugen a, huaizawh in Rev Thangkholun Touthang,KBC Tuibuong Centre Church in Guite-Doungel innkuante’ tate Pathian kiangah vualzawlna ngetsak hi.

Bye- law leh Bio-data honna
Lamka, Feb-01: M/s Civil Officer Pensioners’ Society/CCpur pawlin Feb 5, 2014 zinglam dak 8.00 in Eden huan, Hiangtam Lamka a a office mun uah Bye-law leh Bio-data a bawl uh honna function om ding hi.Huai ah Langkhanpau, Chairman, ADC khuallian a pang in Bye- law leh Bio-data a hon banah thugenna hun zang ding hi,

Cabin Crew sepna ngah
Lamka, Feb-1: Miss Amber Boishi Haokip d/o (late) Dongkhogin Haokip of Sapormeina, Senapati district tulela New Delhi a om in Jan.21, 2014 in Indigo Airlines ah Cabin Crew sepna ngah in tu’n training lel lai hi’n kigen hi.

Gutate’n Activa gari gu
Lamka, Feb-1: Soson (42) s/o Seikhongam of Tollen village in Dec 30, 2014 nitak dak 8:20-9 kikal in K.Salbung khua a Dongminlien Haokip’ inn kiang ah Activa gari (avom) No. MN-02A-9043, Chesis No. ME4JC448LB8615324 , Engine No. JC44E1726231 a koihlai guta te’n gumang uhi. Gari neitu in Jan 31, 2014 nitaklam dak 5:30 in Police ah report bawl a, Police te’n suizui in FIR No. 22 (1) 2014 CCP-PS U/S 379/34 IPC registered uhi.

Financial Literacy Awareness
Lamka, Feb-1: NABARD, Anchor NGO, WSHG leh Relief & Development deptt, EAC saina in Rengkai Community Hall ah Feb 4, 2014 zinglam dak 11:00 in ‘Financial Literacy Awareness Camp’ om ding a, S.Khaikhopau Ngaihte, Jr MCS, BO/DC’s office khuallian apang in hong ding hi. Huai ah Awareness Camp ah UBI/CCpur branch; LIC/CCpur leh Indian Postal Service/ CCpur te’n sinsak ding uhi.

Police te’n Jail ah mi 2 koih
Lamka, Feb-1: Thanglianmang (23) s/o Vumzathang of Zion Veng, New Lamka in Jan 27, 2014 in UBI/CCpur Branch ah midang suaigu in Bank A/C No.16650 akipan Rs 7000/-draw khiat sawmlai matkhiak in om a, Sangmuanlian Guite (23)s/o (late) Lalzui Guite of Saikham Road,New Lamka leng Jan 27, 2014 in UBI/CCpur a ATM booth ah midang ATM card 1 zang in Rs 5500/- draw khia in aneitu kiang ah ATM omlou chi’n khem a, Jan 28, 2014 in mankhiat in om hi. Police te’n zan in mi 2 te CJM Court ah dingsaknawn uh a, CJM in Judicial Custody (Jail) a omding in thutan khum in Police te’n mi 2 te Jail ah koih uhi

Tuahsiat ziakin liam uh
Lamka, Feb-1: Khupliansang (5) s/o Khaipi of Tangpijol tuisa a kibuakkha in a khe langnih liam a, Khupkholun (18) s/o Haomang of Molkon(near Kholmun) a nasepna ah suang in hetkha in a veilam khuguh kitan a, Hoihching (42) w/o Holkhomang of Luikhai (Henglep) zan in innsung a munphiah lakhe dinga kisalai singkhuah in delhkhum kha in a nungjang liam a, amaute hospital ah etkol hi uhi.

HPC(D) pawlin thupuan bawl
Lamka, Feb-1:Jacky Hmar, Secretary(Info & Publicity),Hmar People’s Convention(D) @ HPC(D) in thupuan a bawl danin Hmar kichi India constitution a recognised tribe ahih dungzui in India constitution in a theihpih 6th Schedule a kivaipuak poimawh a,
Hmar People’s Convention leh Mizoram in kilemna a bawl uh Hmar mite adia a lungkimhuailouh ziakin kum 1994 nungin HPC(D) bawlkhiak a om hi’n taklang hi. Huchih lai in HPC(D) ziaka haksatna thuak tamtak om a,huai tawh kisai in HPC(D) President Lalhmingthang Sanate in mawhpaw khalou a, HPC(D)in self-styled Chairman H. Zosangbera leh a army chief Lalropui ngaidam theilou ding hi’n thusuak in taklang hi.

Thusuak in a taklat danin HPC(D) founder President Lalhmingthang Sanate mah HPC(D) President hi a taklang kawm in Zosangbera leh Lalropui banah anungzuite uh a kisik taktak ua leh a thilhih khelh uh ngaihdam hiding a,amau leh a nungzuite uh a kisik kei ua leh ngaihdam hilou ding chi’n thusuak in taklang hi.Mimal hi’n civil society hile uleng Zosangbera leh Lalropui kithuahpih a om leh huaite’n kuamah mawhsa theilou ding chi’n thusuak in taklang hi.

IMPHAL NEWS
Palace compound ah Photo Exhibtion
Imphal, Feb-1 : Palace compound a Lamyanba Shanglen mun ah tuni’n ‘Manipur through Ph Santosh’s Lens’ chih tungtawn in ni 5 daih ding photo exhibition kipan hi. Huai photo exhibition honna ah Dy. CM Gaikhangam khuallian a pang in uap a, Functional President in All Manipur Working Journalist Union President W. Shyamjai pang hi. Chief Guest in photo journalism kichi human civilization ading a poimawh mahmah hi’n gen a, tua tungtawn in thildik leh diklou muhkhiak a om hi’n gen hi. Etsakna dingin USA ten Hiroshima leh Nagasakhi ah atom bomb a khiakkhum uh alem a muhtheih ziakin gentam ngailou in thiltung mah ahihdan kichian chi hi. Tuni a photo exhibition a lemlatu Ph Santosh pahtak-huai sakthu Dy CM in gen hi.

Huai photo exhibition ah Ph Santosh in kum 30 sunga lem alak hoih asak tungtuan 1100 lahkhiak in om hi.Huaite lakah Khwairamband Keithel a tuichim a tunlai,kum 1991 a Thangjing a lenna accident, kum 2001 June Uprising leh AFSPA mass protest telin lemlak tamtak takkhiak ahi hi. Huai tawh kiton in Feb. 3, 2014 in spot essay writing competition om ding a, tua ah Class VIII-X kikalte’n huai mun mah ah kidemna nei ding uhi.

Zu zuakna ah mikhat thah in om
Imphal, Feb-1 : Imphal Khuman Lampak kianga Inter State Bus Terminus a zu zuakna mun Gaipuinam kichi ah tuni sunnung dak 1:30 velin mikhat kaplup in om hi. Thusuak in a gendan in Gaipuinam mun ah mi 3 va ut in zu dawn uhi. Anung sawtlou in zu zuakna neitu’n thauging za a, tuaphet in room khat akipan in mi 2 taikhia uhi. Huai room sungah zu zuaktu ava lut leh mikhat thau a kaplupsa mukhia hi. Kaplup a om bel Apam (33) of Somtal village hi a, azu dawnpih Azik @ Ngazek of Thashar village, Ukhrul district matkhiak in om hi. Amau mi 3 hi uh a, khat ahihleh a omna theih hinailou chih hi.

Namo chai party neih in om
Imphal, Feb-1 : BJP Manipur Pradesh te’n Gujarat CM Narendra Modi in Manipur a hongphak sawm tawh kiton in tuni in Imphal khawpi sung mun tuamtuam ah ‘Namo Chai Party’ kichi nei uhi. Huai hunsung in mipite lakah singpi a manbei in hawmkhia uhi. Keishampat a Nityapat Chuthek mun a BJP Manipur Pradesh office ah main function om a, huai mun ah State President Th. Chaoba leh Lok Sabha election a candidate dinga gen a om Dr. RK Ranjan ten uap uh a, BJP deihsak mipi tamkhop tel uhi.

Consultation on Electoral Reforms ah CPI leader Dr M. Nara vatel
Imphal, Feb-1: Law Commission of India saina in Rafi Marg a Constitution Club ah ‘One-day National Consultation on Electoral Reforms’ om a, huai ah Manipur akipan in CPI National Executive Member y Dr M. Nara,ex-Minister vatel hi. Justice BP Jeevan Reddy, former Chairman, Law Commission of India huai hun ah khuallian hi a, consultation hun ah a genkhawm tangpi pen uh politics zat diklouh tawh kisai leh casndidate khenkhat disqualify tungtang leng hi’n kigen hi.

Power deptt tuni apan Corpn hita:operation kipan uh
Imphal, Feb-1: Manipur ah electricity dinmun hoihzawksemna ding gelna in power deptt leng tuni akipan Corporation a khenkhiak hi a, Keishampat a power deptt office mah office a zangin operation kipan uhi. Huai dungzui in electriry deptt leng seh 2 a khen hi a, huaite the Manipur State Power Company Limited (MSCPL) leh Manipur State Power Distribution Company Limited (MSPDCL) chih in om hi. MSCPL in transmission leh generation lam saideuh ding uh chih hi a, MSPDCL in distribution lam tuni akipan sai uh chih ahi hi. Power deptt a Chief Engineer-lui N Sharat in MSPCL ah Managing Director hikawm in Keishampat office ah tuding a, R. Sudhan,IAS in MSPDCL ah Managing Director len ding chih ahi hi.

Tuni in Chief Secretary PC Lawmkung a office chamber ah Boatd of Directors meeting om a, delegation of power, organisational structure leh corporation staff-te transfer & postings tungtang genkhawm uh chihthu om hi.