ZRA te’n pimang a om hunkhia.
Lamka, Oct-29: Tunitak lam dak 5:00 velin Bible Hill, Rengkai ah Nepali nungaknou Romila (19) of Sapermaina mi 4 in a pimang uh ZRA te’n hunkhia in, pimangtu mi 4 leng ZRA te’n mankhia in CCpur Police ah pekhia uhi. Thukizadan in, Romila ahihleh Damdei Christian College, Motbung ah Class XII zillel hi a, school uniform tawh exam khin innlam pailai mi 4 te’n pimang in, Van (MN-03/A 2228) zangin Lamka lam ah taipih uhi. Amah hutkhiak ahih in khua phawklou a, ZRA te’n Zomi Mothers’ Assn(ZMA)-te khut ah pekhia in, nitaklam in Dist Hospital, CCpur puaklut in om hi. Mat a om mi 4 te ahihleh Letkhogin Haokip (35) s/o Doukhojang Haokip of M. Jangnomphai, Senapati dist; Letkhotinthang Haokip (26) s/o (L) Paosat of M. Jangnomphai; Letkhohao Haokip (21) s/o (L) Paosat of M. Jangnomphai leh Van driver Seiminlun Haokip (21) s/o Jamthang of Vengnom, Sapermaina hi uhi. Mi 4 te kipuandan in Romila pen zi dia aguk uh hi’n gen ua, tuzan dak 10:30 velin OC/CCpur Police makaihin numei lam insungmite leh pasal lam insungmite’n Dist Hospital ah kihouna nei mahle uh zan sawtnung tan inleng thuchian theih hinailou hi.

NKT Junior H/S kumthak ah H/S a upgrade hiding.
Lamka, Oct-29: Nghathal-Kawnpui-Thingkangphai(NKT) V/A leh makaite’n kum 2009 a a patkhiak uh NKT Junior High School kumthak 2014 bullam in Health Minister’ panlakna in High School a upgrade hiding chi’n School Managing Board apan kiza hi. Tuni in NKT Jr H/S ah Prize Distribution Programme om a,Chief Guest in Health Minister Phungzathang Tonsing pang hi. Huai ah Functional President in B. Zodingliana, MDC pang a, Chief Host in K. Laldawngliana, Chairman, School Managing Committee pang hi.

Chief Guest in a thugenna ah siamsinna(education) in laizilna, omdan leh gamtatdan tanpha uap a, lam chi tuamtuam a siamna poimawh vek hi a genkawm in siamsin kawm in nu-le-pate’ thuman poimawh hi’n gen hi. Student-te’n teacher leh nu-le-pate thu mang dingin hasuan a, teacher-te’n leng RTE Act dungzui a student-te soisa thei nawnlou ahihman un deihsakna tawh student-te’ laihilh a sinsak dingin hasuan hi. Minister in NKT Jr H/S panpihna dingin Rs. 20,000 pia hi.Minister’ tapa Khanthang Tonsing in leng huai hun ah thugen a, education kichi hinkhua kibulphuhna hi a, education tungtawn in mihing hinkhua in lam-etna piangsak thei ahihdan gen hi.

Molnom-Tollen kal mun 6 ah ‘Accident prone zone’ road sign tak uh.
Lamka, Oct-29: Kuki Senior Citizens Welfare Forum (KSCWF)/CCpur pawlin tuni in Molnom leh Tollen khua kikal mun tuamtuam 6 ah‘Accident Prone Zone’ kichi road sign board takkhia uh a, Molnom khua ah zinglam dak 11.00 in honna om masa hi. Huai ah Donor te ban ah TN Haokip, MLA (Saikot A/C) leh mi poimawh tuamtuam in uap uhi. Molmon khua a hun masa zatna ah Rev Dr JL Songate, Executive Secretary ICI in Molnom leh Tollen khua kikal a gari accident ziaka mi 18 site suunna thugen hi. Aman agenna ah miteng in mahni innkuan sung ah sihna kichi hongtun ding deih omlou a, hileleng Pathian sehkholh bang in hongtungzel hi’n gen hi. Mihingte sithei keilehang Pathian kiang ah ikha tungtheilou ding hi’n gen a, Imphal, Moirang telin Lamka apan hihding poimawh nei a hawhte lampi ah accident a sihna atuah uh mah bang in mihingte chiklaipeuh a sithei gige ihihman un Pathian tuakding a mansa a om kuapeuh adin poimawhpen hi’n gen hi.

Road sign board mun 6 kibawlte donor te’n hongkhia uh a, Langkhanpau Guite, Chairman, ADC/CCpur in Molnom ah hongkhia a, Demmang Haokip, Vice Chairman, ADC/CCpur in Salbung a hong hi. Ms Jacintha Lazarus, IAS, DC/CCpur in Koite cemetary gei ah hong a, L.Mangkhogin Haokip, IPS, SP/CCpur in Khengjang ah hong hi. N.Guite, EE/PWD in Vajing ah hong a, Lamkhosiem Khongsai, DTO/CCpur in Tollen khua ah hong hi. Road sign kihongte ah “Accident Prone Zone” donated by chih ban ah Organised by- Kuki Senior Citizens Welfare Forum, CCpur chih kigelh vek hi.
Tollen khua ah hun 2na zat hi a, huai ah donor-te lak ah Langkhanpau Guite, Lamkhosiem leh N.Guite in saulou thugen uh a, Kuki Senior Citizens’ Welfare Forum/CCpur te’ saina a accident prone zone kichi road sign board honkhiat theih a om kipahthu gen uh a, sun hunkia hilou in gari taite’n nitak in leng baihlam taka simtheih ding in nitak hun a vaaktheite a kigelh hithei leh chihban ah road sign leng gelhtel hileh chih deihthu gen uhi.

DRDA Governing Body Meeting.
Lamka, Oct-29: Langkhanpau Guite, Chairman ADC/CCpur & DRDA makaih in Oct 30, 2013 zinglam dak 11:00 in DC’s office a BRGF Resource Centre ah ‘DRDA Governing Body Meeting’ leh ‘Dist Level Vigilance & Monitoring Committee’ meeting om ding hi. DRDA governing Body meeting ah Dist sunga Rural Development scheme tuamtuam a nasep te power point presentation om ding a, IYA scheme leh MGNREGS scheme sepsuahdan(implementation) leh DRDA administration telin thu tuamtuam genkhawm ding uhi. DRDA Governing Body ah MP, Minister/MLAs, MDC, SDO, BDO ban ah line Deptt tuamtuam-te tel uhi.

ADRA makai in Lamka pha ding.
Lamka, Oct-29: German gam a NGO- Advantage Development & Relief Agency(ADRA) a makai lianpen Nicolas in Oct 31, 2013 in Manipur hongpha ding a, Imphal a Hotel Classic ah Manipur a ADRA tungtawna nasepna tuamtuam a kihelkhate tawh meeting neiding uhi. Huai hun ah Widows’ Welfare Assn.Asia(WWAA) apan mi 9 telding uh a, Nov. 1, 2013 in Nicolas in Lamka hongpha ding hi.Nocolas in Lamka ah WWAA tungtawn a ADRA te’n toilet leh water pipe a bawlte uh enkhe ding a, Lajangphai khua a WWAA office ah seminar uap ding hi’n kigen hi.

ICI programme poimawh 3 om.
Lamka, Oct-29: Rengkai ICI biakinn ah December 10-15, 2013 sung ahun kibang in Independent Church of India(ICI) 64th General Assembly, 30th ICI Central Youth General Conference leh ICI Central Choir Silver Jubilee Celebration om ding hi.ICI General Assembly a Moderator leh General Secretary in denomination leh association tuamtuam in huai hun tawh kituak Conference leh meeting dang neilou ding a ngen kawm in ICI General Assembly, Central Youth General Conference leh ICI Central Choir Silver Jubilee lopna hun uap chiat dingin kuapeuh chial uhi.

Dist Hospital ah Social Work.
Lamka, Oct-29: YPA Gen HQ panlakna nuai ah Nov 1, 2013 zinglam dak 10.00 akipan in District Hospital ah joint Social Work on ding a, huai ah YPA Gen HQ, Lamka Block leh New Lamka Block a Executive member teng banah Block huamsunga Unit member tamtheipen kuan dingin theisak uhi.Huai ah pasal te’n tupi/bawngtu, tem leh suahdul tawi ngai ding a, numeite’n tui tawina ding bel/baltin leh tuang/bang notsiangna ding puansia tawi dingin theisak uhi.

Dist Food Security Mission.
Lamka, Oct-29: National Food Security Mission Rice tungtawn a Dist Food Security Mission Rice Executive Committee te’n tuni in DC/CCpur office ah meeting nei uhi. Huai ah DC in verification bawllai ding in thupuk uh a, Oct 31, 2013 zing dak 8:00 apan in Kotlian khua apan Yaiphakol khua kikal a tuilou omte DC makaih in spot verification bawl dingin thupuk uhi.

DLO te’n Awareness Program zang.
Lamka, Oct-29: Dist Administration saina in Nov 2, 2013 zinglam in Tuibuong a Dist Training Centre ah Dist Level Officer te’n ‘Development/Strengthening of Agriculture, Marketing Infrastructure, Grading and Standardization’ tawh kisai in Awareness Programme zang ding uhi. Huai hun ah DC/CCpur in Awareness program hongkhe kawm in thugen ding a, KS Lal Guite, DDM/NABARD in leng thugen ding hi. Technical Session ah banker-te leh DDM, NABARD in sinsak ding uhi.

Akisaipih document submit ngai.
Lamka, Oct-29: Director of Education (S) in Manipur a school omteng final list bawlkhiat sawm a, CCpur dist ah govt recognition ngah private school tengin akinlam in Director of Education (S) ah govt recognition certificate/document xerox copy submit ngai chi’n ZEO office apan thusuak om hi.

Capacity building on Social Security.
Lamka, Oct-29:Widows’ Welfare Assn. Asia (WWAA) leh Northeast India Humanitarian Assistance & Livelihood Support Project Contral Arms Foundation of India pangkhawm in zan apan Lajangphai a WWAA office ah ‘2-days capacity building of beneficiaries on Social Security’ kichi om a,huai tuni’n zou uhi. Huai ah W.Joy Kumar Singh, Human Rights Activitist in ‘Basic entitlement under PDS & National Social Assistance Funds (IGNOAP, NFBS, Mid Day Meal)’, ‘Your rights under Flagship Progrome including MGNREGS, IAY, RSVY, JSSK, JSY& other Health Schemes’leh ‘How to use RTI Act’ chih pansan in sinsak hi.

Dist Level Sc Exhibition om ding.
Lamka, Oct-29: ZEO/CCpur office a Science Unit saina in Oct 30, 2013 zinglam dak 10:00 in ZEO/CCpur in Thengra Leirak a Gandhi Centenary govt Aided Jr H/S ah ‘Dist Level Science Exhibition for school children’ hong ding hi. Huai dintuni’n registration om a, Science Exhibition ah student 12 leh Written Science Quiz ah student 36 tel ding uhi. Inauguration program zawh in kidemna om ding a, Oct 31, 2013 zinglam dak 11:00 in Dist Level Sc Exhibition hunkhakna leh kipahman hawmna om ding hi. Dist Level Science Exhibition ah mi 7 leh Written Quiz competition ah mi 3 select hiding a, mau State Level Exhibition leh Manipur State pawlam a Eastern India Science Seminar ah kuan ding uhi.

Auto leh Activa kiphutuah.
Lamka, Oct-29: New Lamka a Zamsuan Rd ah tuni nitaklam dak 4.00 velin Bajaj Auto leh Activa kiphu kha uh chihthu om hi. Lampi a Auto atailai in amalam pei(wheel) lengkhia in lampi ah khawl a, tua laitakin Activa in phukha a, activa driver liamzek hi’n kigen hi.

KSO Gunpi Block election.
Lamka, Oct-29: Kuki Students Orgn(KSO) Gunpi Block in block makai ding tel uh a, President dingin Jangkholam Guite, Vice President in Seikholal Touthang, V/P External in TD Khupvungminthang Zou, General Secy in Thangjalun Baite, Jt. Secy in Felix Lhungdim, Finance in Thangminlun Haokip, Edn in P Nicky Mangminlian Zou, Publicity in T Paumuonthang Zou, Info&Pub in Douthanglian Khongsai telching uh chihthu om hi.

Shillong ah Chavang KUT 2013.
Lamka, Oct-29: Shillong a NEHU Convocation Hall ah Nov 2, 2013 in Chavang KUT 2013 zang ding uh a, KUT Pa in Fr. Peter Tongmang Haokip, Oriens Theological College, pang ding hi. Huai hunah KUT Pa in KUT 2013 hongkhia in dakpi tum ding a, KWS (S) Church Choir telin namlam tuamtuam 9 lahna leh Cultural Extravaganza programme om ding hi’n kigen hi.

SUUNNA:
Vungzamuan Hauzel(57) s/o (late) Thanglun Hauzel of Mualveng,Hiangtam Lamka tuni zinglam dak 9.55 velin Imphal a Shija Hospital ah zunkhum leh kalna ziakin si hi. Aluang tuni nitaklam in a tennna inn puaktung hi a, Oct 30, 2013 in Lamka hanmual ah kivui ding hi. Vungzamuan Hauzel bel Range Officer/CCpur Forest Range asem hi a,Dr H. Chhawnvung @ Dr Ch. Hauzel’ sanggam(younger brother) ahi hi.

******************************************************

IMPHAL NEWS:

CM in Football Exhibition Match hong.
Imphal, Oct-29:Chief Minister O. Ibobi in tuni’n Khuman Lampak ah Tribal Youth Council,Manipur-te saina a ‘2 day Tribal Friendly Football Exhibition Match’ om khuallian a pang in hong hi.Huai ah Guests of Honour in Rishang Keishing,MP(Rajya Sabha);I, Hemochandra,Minister(PHED);M. Okendro,Minister(Edn & CAF & PD); Md Abdul Nasir,Minister(Agri) leh M. Prthviraj,Parliamentary Secy(YAS) pang uh a,Functiobnal President in Francis Ngajokpa,Minister(RD & PR) pang hi.
CM in a thugenna ah state govt in singtanggam ah sports infrastructure lam puahsawm in panla hi’n gen a,singtanggam district 5 a District Sports complex leng kum 2014 sunga zawh dia bikhiah hi’n gen hi.Non-Lapsable Central Pool of Resources(NLCPR) nuaia Ministry of DoNER tungtawn in Special Plan Assistance leh Central Assistance fund zanga nasep hi’n leng CM in gen hi. 2 day Tribal Friendly Football Exhibition Match ah team 30 vel tel hi’n kigen a, tuni’n Tribal MLAs XI team leh Tribal ADC XI team kimawl uhi.

Mizoram Governor in Kut lopna uap ding.
Imphal, Oct-29:Mizoram Governor Vakkom Purushttaman in Nov 1, 2013(Sintawpni) in Manipur a state level KUT festival lopna hong uap ding chihthu om hi. Mizoram Governor leh azi Liy Purushottaman bel Oct 31, 2013 in Imphal hongtung ding uh a, Major Mayank Poonia in Governor leh azi hongzui ding hi.Mizoram Governor in Manipur a KUT lopna hong uap masakpen hiding in kigen a, Manipur govt in State Guest hiding in puang hi.

IED bomb puakzak: mi 5 liam.
Imphal, Oct-29 : Imphal a Veirodan Maxwell High School kiangah tuni zinglam dak 5:45 vel in IED bomb khat puakzak a, huai ah mi 5 vel liam hi’n thusuak in gen hi. Thutut kingah dan in City Police station apan metre 50 vela gamla Veirodan Maxwell High School kiangah meltheihlouhte’n IED bomb a kam uh puakzak ziaka liamte A. Arun (26) s/o Achou of Heirok Part 3 Kabow Leikai; Raghunath Madap (28) s/o Ruplal of Bihar tulel a Khoyathong a om; Sambhu Saha (45) s/o Sarju of Bihar; Kishan Chakraverty (17) leh Rajdiv Sharma (17) of Serou hi uhi. Aliamte laka Kishan leh Rajiv Sharma bel BIMS a student hi uhi. Arun ahihleh Tata Magic driver hi a, Raghulal Madap bel lampi kianga van zuak hi’n kigen hi.
Huai IED bomb puak in Veirodan Maxwell High School bang(wall) mun bangzahhiam hihsia a, huaima in MG Avenue ah leng bomb ana puak ngei a, tuaziakin bomb hihpuakte kibang ding un gintak hi’n Police te’n gen uhi. Huai kimlak bel City Police leh Police Commando-te omna mun hitangpi in kigen.

Morung Makunga in NPF zom.
Imphal, Oct-29: Naga People’s Front(NPF) a General Secretary (Organisation) Athuan Abonmai in tuni’n Press-te kimuh in a genna ah Minister-lui Morung Makunga in NPF zom a, NPF President Soso Lorho in namkip hidan in gen hi. Morung Makunga bel Congress ticket in 2vei hial MLA telching in om a, tuazawh in independent in telching in om hi. Athuan Abonmai in a genzelna ah Morung Makunga in NPF azop ziakin NPF hattak masawn ding in kinephuai sakthu gen hi.

MU teacher te’n Vice-Chancellor boycott ding.
Imphal, Oct-29 : Manipur University Teachers Asson (MUTA) pawlin Nov. 1, 2013 akipan Vice-Chancellor Prof. HNK Singh boycott hiding in puang uhi. MUTA in tuni a press statement a suahna uah Vice-Chancellor a thil chiamte bangmah tangtunlou hi’n gen uhi. Vice-Chancellor in MUTA te kiangah HAG scale in implement ding, Pro-Vice-Chancellor lak thak ding banah Finance Officer, Controller of Examinations leh Director tuamtuam lakthak ding chiam a, himahleh tunitan bangmah tangtunlou hi’n gen uhi.
MUTA te’n Oct. 22, 2013 tan a hihfel din Vice Chancellor ngen mahle uh tunitan bangmah sepkhiak omlouh ziakin Nov. 1, 2013 apan Vice-Chancellor boycott puang uhi. Amau boycott a puan utawh kiton in Vice Chancellor telna a Heads, Deans, Directors meeting leh function tuamtuam ah kuamah tellou dingin theisak uh a, tua banah Chief Guest leh Guest of Honour dana a pinnate ah atel omlou ding hi’n taklang uhi.

Journalist-te’ pension sum pungsak .
Imphal, Oct-29 :All Manipur Working Journalists Union(AMWJU)te leh CM tuni’n a meeting na uah AMWJU te’n journalist-te pension kha khat a Rs. 2000 zel hilai Rs. 4000 a khansak ding leh widow pension leng Rs. 1000 akipan Rs. 2000 a khansak dia as nget uleng Chief Minister in AMWJU ngetna banga khansak ding in lemsa chihthu om hi.

Part-time Lecturers te’n regularized phu.
Imphal, Oct-29 : All Manipur Govt College Guest Lecturer Assn te’n tuni’n State Govt ah part-time lecturers-te regularized ding phu uhi. Thu kizadan in part-time lecturer khenkhat in kum 10 bang semta uh a, himahleh govt in tunitan in regular hinailou uh a, tuaziakin part-time lecturer- te’n state govt ah regularised din phut uhi. Athil phut uh student union pawl tuamtuam in leng hoihsa in support uh chihthu om hi.

Siluang khat kimukhia.
Imphal,Oct-29:Imphal police station a OC in tuni a press statement a suahna ah tuni sun dak 12:10 velin Lamphel a MACS office kianga nullah(drain) ah meltheihlouh numei khat kum 40-45 kikal vel ding mikhat sisa in muhkhiak a om hi’n taklang hi. Siluang bel police te’n vala in RIMS morgue ah koih uh a, Nov. 1, 2013 tana kuamah a claim a om kei leh Police in siluang koihkhe ding hi’n gen hi.

‘Promised Land’ chih hial a om Isreal in mi tamtak hip
Juda sahkhua zui mi 899 vel Israel ah pemlut ding
Aizawl/Imphal,Oct-28: Israel govt in Juda sahkhua zui(Jews) mi 899 vel Manipur leh Mizoram akipan Israel gama pemlut dingin lemsa uh a, huchih dungzui in Bnei Menashe (Menashe’ tate) community kiminvuah Mizoram akipan mi 160 leh Manipur akipan mi 730 vel tukum 2013 tawpkuan ahihkeileh kumthak 2014 bulin Israel gam ah pemlut ding uh hi’n thusuak in gen hi.Israel cabinet in kal beisa in India gam Northeast a Bnei Menashe community-te Israel gam ah group bangzah hiama khenzak in laklut lemsa uh a,batch masate tukum tawp kuan hiam ahihkeileh kumthak 2014 bulin Israel ah pemlut ding uhi.
Manipur akipan Israel a pemlut dingte Mizo, Paite, Kuki leh Hmar kampau zangte hideuh un kigen a,Mizoram akipan pemlut dingte atamzaw Mizo Jews hi un kigen hi.Mizoram a om Bnei Menashe leader-te laka khat Jeremiah L.Hnamte in a gendan in Mizoram akipan Israel a pemlut dingte a zinkhiakna ding uh fel hunhun a mansa ahih theihna ding un document poimawh tuamtuamte buaipih lel lai uh hi’n gen a, Mizoram Jews 160 pemkhia dingte lakah naupang leh naungekte leng tel uh hi’n gen hi.
Kum paisa in Israel a pemlutkhinte laka tamtak ‘Mikveh’ kichi spiritual pond ah rabbis(priest) in a baptised hi uh a,Mizo rabbi omsun leh a masapen Gurion Sela leng spiritual pond a baptised a om khinsa ahi hi.Jeremiah L. Hmante in a genzel dan in rabbi-te’n Mizoram a phak ding uh govt in a dal nungin spiritual baptism leh Juda sahkhua zui dinga kikhekna(conversion) leng bangtanhiam khawl hi’n gen hi. Israel a pemlut dinga telkhiaka omte’n tulai in Hebrew, Talmuh, Halakha leh Torah zil uh a,Aizawl a Republic Veng a om Shavey Israel Hebrew centre ah Juda-te’ tawndan(culture & tradition) tanpha zil uhi.
Manipur leh Mizoram a Bnei Menashe te’n akibul patna in Menashe’ ta Juda-nam 10te laka tribe khat hi in kikoih uh a, Assyria kumpi in kum 2700 paisa a hawlkhiak(exiled) leitung gam tuamtuam a kithehdalhte hi’n kikoih uhi.Juda(Jews) nam mangthang leitung gam tuamtuam a kithehdalhte Israel gama pilut dinga panla Shavei Israel kichi NGO-te panlakna ziakin Northeast bial adiakin Manipur leh Mizoram akipan Bne Menashe community atel mi tamtak Israel gam ah pemlut uhi.NGO Shavei pawlin Juda nam(Jews) leitung gam tuamtuam a kithehdalhte Israel gam pilut vek sawm in panla uh a, huaite ziakin mihing tamtak Israel ah pilut in om uhi.

CCpur Mahila Block Congress pawl tamtak kikhawm
Tuni in ‘Workshop-cum-Mass Enrolment’ om

Lamka, Oct-28: CCpur Block Congress Committee saina in tuni zinglam dak 11.00 akipan in YPA Hall, Hebron Veng (New Lamka) ah CCpur Mahila Block Congress Committee a Office Bearer leh Executive Committee lepthakna banah Workshop-cum-Enrolment om hi. Huai ah Chief Guest in Phungzathang,Minister (Health & FW) pang a, Guests of Honour in Smt RK Ranisana Devi, President, Manipur Mahila Congress Committee leh Kamsuanlun, EM/ADC pang ding uh a, Functional President in T. Chongbiak, President,CCpur Block Congress Committee pang hi.
Health Minister in agenna ah AICC ah leng President numei mah Sonia Gandhi hi a, Manipur Mahila a President leng numei ahih ban ah CCpur district a Dy Commissioner leng numei mah hi’n gen hi. India gam pumpi ah Congress hatsemna ding in numeite’ panlak poimawh hi’n gen a,maban a Lok Sabha election om ding ah leng Outer Manipur ahihkeileh Inner Manipur ah Congress ticket a candidate ding numei ahihna ding in pang tinten hi’n gen hi.
CCpur Mahila Block Congress Committee a Office Bearer leh Executive Committee member teng Manipur Mahila Congress ah approval lak masak ngaiding hi’n kigen hi. Tuni program hun ah YPA Hall, Hebron Veng (New Lamka) dim in numeite paikhawm uhi.

K.Moses Chalai, IAS in Lamka pha
Lamka, Oct-28: Special Summary Revision 2014 a CCpur leh Bishnupur district adia observer dinga guan a om K.Moses Chalai, IAS, Commissioner in tuni in Lamka hongpha a, DC/CCpur office chamber ah DC/CCpur, Election deptt-te leh SDO-te tawh meeting nei uhi. Huai hun ah aman Sub-division ahihkei leh district dang apan hong kisuante deletion certificate a tawi ualeh delate bawl a, a omna mun uah Electoral Roll a khumlut ding, kum 18 ching kuapeuh adik ahihziak un Electoral Roll ah khumlut hiding in leng gen hi. Aman a genbehna ah deletion tawh kisai min neitu in signature a bawlkei leh mawk maia delete lou ding in akisaipihte theisak hi.
Thusuak kingahdan in sub-division 1 apan sub-division danga kisuante’n deletion certificate a ua leh electoral roll apan baihsamtak in delete pah theih himahleh athaka min khumlut haksa a, electoral roll lui pen alah min delete khin, a thak pen ding a kikhumlut zawhlouh ziak in electoral roll ah kum 2/3 sung min om khalou mi tamtak om hi’n thusuak kingah hi.

Khamtheih zuaktu’ inn kalhsak

Lamka, Oct-28: Bijang Women Welfare Assn pawl in Bijang khawsung ah khamtheih ban ah azuakte doudalna nasep sunzom zel uh a, Oct 20, 2013 in Bijang a khamtheih(No.4) zuak Sonchiin warning pia uh a, tuni zingsang in Bijang khua a teng thei nawnlou ding in Sonchiin’ tenna building inn chabi kalhsak(lock) uhi. BWWA pawlin warning a piak dungzui un Sonchiin in atenna inn pawtsan a, maban ah Bijang khawsung ah teng thei nawnlou ding a, hileleng Sonchiin’ in atenna building inn ahihleh midang kiangah zuakkhe theiding hi’n gen uhi. BWWA pawlin Bijang khawsung ah khamtheih zuak ziak in khawsung a tengthei nawnlou dingin innkuan 6 nawhkheta uh hi’n kigen hi.

CCpur dist ah sepna zong 69,090 om
Lamka, Oct-28: District Employment Exchange/CCpur ah September, 2013 khabei tan in sepna deih ziaka min pelut mi 69,090 pha a, huaite lakah pasal 51,236 leh numei 17,854 om uhi. September,2013 khasung a min pelut thak 80 om uh a, huaite pasal 40 leh numei 40 hi uh chih thutut kingah hi.

KUGAA 1st Gospel Icon 2013
Lamka, Oct-28: Kuki Gospel Artist Assn. (KUGAA)‘1st Gospel Icon 2013’kichi Aug 17, 2013 in B.Vengnuom Community Hall, Moreh, Letan leh Kangpokpi ah kipan a. Oct 31, 2013 zinglam dak 11:00 in Bijang Playground ah KUGAA top 10 apan 1st Gospel Icon 2013 telkhiat hiding hi. Huai ah Gospel Icon 2013 Donor Ngamthang Haokip, Minister (IFCD) in KUGAA 1st Gospel Icon 2013 kiang ah kipahman Rs.1 lakh pekhe ding hi’n kigen hi.

Rayburn College ah Biometric Attendence

Lamka, Oct-28: CCpur district a private college/institution omte laka masapen ding in Oct 23, 2013 in Imphal apan Hadron Tech Pvt Ltd te’n New Lamka a Rayburn College staff te zatding in Biometric Attendance System (BATS) installed uhi. Huai machine bel Nov 1, 2013 akipan Rayburn College staff te’n zang ding uh a, office kuan leh kik hun in computer in record ding hi.

Remedial Teaching thu genkhawm
Lamka, Oct-28: ZEO/CCpur makaih in a office chamber ah tuni sunnung in ZEO nuai a Govt H/S a Headmaster/Headministress tengin kum 2014 a class X board exam dingte ading Remedial Teaching neihding thu genkhawm uhi. ZEO nuai Govt H/S omte laka student tam neideuh school-te tawh Remedial Teaching neih ding thu Director of Education (S) ah proposal piakding tungtang genkhawm uhi.

Entrance test ni Kiginni hiding
Lamka, Oct-28: JNV/Tuinom a class VI zilding lakna ding in kumteng in Pathianni(Sunday) in entrance test om sek mahleh kumthak 2014 akipan in Kiginni(Saturday) a neih hiding in DI of Schools/CCpur & i/c JNV Entrance Test apan kiza hi.

CCpur Dist Private Centre Committee
Lamka, Oct-28:Kum 2014 in Board of Secondary Education Manipur(BSEM) saina in HSLC examination 2014 om ding tawh kisai in ZEO/CCpur office ah Nov 6, 2013 zinglam dak 11:00 in meeting ding uh a, huai ah CCpur Dist. Private Centre Committee phuhkhiat hiding chihthu om hi. .

SUUNNA
Kaizamuan (29) s/o (late) Siamhnun of Nehru Marg tuni zingsang dak 6:30 velin sinna in si a, Lamka Hanmual ah kivui hi.
Mrs Dimnou(65) w/o(late) H. Phungtual of Jion Street, Central Lamka tuni zing dak 8.00 velin zunkhum(diabetes) ziak in si a, tuni mahinLamka hanmual a kivui hi.

IMPHAL NEWS
CM in ni 3 sung training om ding hong

Imphal, Oct-28 : Chief Minister O. Ibobi in tuni’n Imphal a MFDC Auditorium ah ‘3 days training programme for capacity building amongst the heritage managers of Northeastern Region’ kichi hongkhia hi. Aman a genna ah Northeast state a mun khenkhat India tawh kibatna om mahleh South East Asia lamte tawh kinaihna nei tamtak om hi’n gen hi. Aman a genzelna ah, structural conservation leh monuments tungtang ah North East lamte’n state dangte kipha zoulou a, state dangte phak theihna ding in technologies lam hahbawl poimawh hi’n gen hi. Manipur ah kum 1930 in W. Yumjao Singh tungtawn in archaeology patkhiak in om a, ama tungtawn in Manipur ah Archaeology exploration om, chi hi. Huai hun ah RK Nimai,IAS, Commissioner(Arts & Culture) Dr SS Biswas,Vice Chairman, Indian Archaeological Society,Delhi leh Director(Arts) Dr. K. Sobita leng tel hi.

General Strike in hindan nawngkaisak

Imphal, Oct-28 : ‘JAC Against the missing and subsequent killing of JCB driver’ pawl te’n JCB driver M. Devaraj thatte matkhiak vek ding phutna in tuni zingsang dak 5:00 akipan in dakkal 36 sung Manipur pumpi general strike puang uh a, Khura Area ah bandh khauh mahmah in dukan kihong a omlouh banah gari tai leng muh ding omlou hi. JCB driver M. Devaraj tenna Singjamei area leng bandh khauh mahmah hi’n kigen hi. Imphal khawpi sung a school-te kikhak vek a, dukan tamtak leng kikhak hi. Imphal-Ukhrul, Imphal-Saikul, Imphal-Tinsid lampi ah gari tai muh ding omlou a, Lamlong market leng kikhak hi. Bandh in Oct. 29, 2013 tan huamlai ding hi.

Manipur ah sepna zong 6,93,417 om
Imphal, Oct-10: Manipur a Employment Exchange tuamtuam ah September, 2013 bei tan in sepna deih ziaka min pelut teng kigawm 6,93,417 om a, huaite lakah pasal 4,95,356 leh numei 1,98,061 tel uhi. September 2013 khasung a min pelut thak teng 590 hi uh a, huaite lakah numei 285 leh pasal 305 tel uhi. Manipur district tuamtuam a sepna deih a min pelut zah tulelin Imphal west ah 1,81,631 (pasal 1,18,617 leh numei 63,014); Imphal East ah 1,10,721(pasal 78,827 leh numei 31,894); Thoubal ah 1,17,233(pasal 92,450 leh numei 24,783); Bishnupur ah 67,937(pasal 50,602 leh numei 17,335); CCpur ah 69,090 (pasal 51,236 leh numei 17,854) ; Ukhrul ah 27,171 (pasal 19,956 leh numei 8,115); Senapati ah 57,549( pasal 41,582 leh numei 15,967); Tamenglong ah 24,610( pasal 18,678 leh numei 5,932); Chandel ah 28,699 (pasal 19,749 leh numei 8,950); Physical Handicap registration kibawl teng 2,571(pasal 1,731 leh numei 840) banah UEI & GB a registration bawlteng 6,305(pasal 2,928 leh numei 3,377) hi uhi.

College Teachers te’n sit-in-protest nei

Imphal, Oct-28: Modern College a student te’n a teacher khat uh kilawmlou taka a vuak uh lungkimlouh latsakna in tuni’n huai College a Teacher ten College Multipurpose Hall kong ah sit-in-protest tu uhi. Tuni a sit-in-protest nei Modern College Teachers Assn-te bel All Manipur College Techers’ Assn, Federation of Govt Teachers Assn leh Govt College Part-Time Lectures Assn te’n leng zom uhi. Thusuak in a gendan in Modern College a lecturer Dr. R.Horam leh Y. Yaima te’n a students te un kilawmloutak in soisa ua, government in akinlam a panla a apawl min ahih leh leng ‘ban’ ding in ngetna nei uhi.

Assam Rifles te’n Inter-School Meet sai
Imphal, Oct-28: 26-Sector Assam Rifles nuai a om 6-DOGRA pawl in Khengjoi ah Inter-School Meet organized uh a, Khengjoi, Bailon leh L Bongjoi khua a school omte akipan student 125 tel uh a, huaite football, volleyball aleh kabaddi kimawlna ah kidem uhi. Huchibang mah in 9-Sector Assam Rifles a 30-Assam Rifles-te saina in zan in Cingmeirong a Sangakpham Football Ground ah NEROCA club tawh friendly football match kimawl uh a, Neroca Club in goal 3-2 in zou uhi. Assam Rifles te’n huai kimawlte pahtakna latsakna in thilpiak khenkhat pia uhi.

Album thak True Lies tuni’n honna om

Imphal, Oct-28: Manipur a Rock band minthang ‘ReCyle’ pawlin music video album a bawl masakpen uh ‘True Lies’ kichi tuni in Thangal Bazar a Imphal Movie Club ah honnei om hi. True Lies kichi bel Arnold panna Hollywood film akipan kilasawn hi a, Mnaipur telin North east state a nekgukna tawh kisai naktak in taklat in om hi. Huai album bel Ahmedabad-Imphal designer Rahul in National Institute Design tungtawn in a produce hi a, Album a late tunung sawtlou in YouTube tungtawn a khahkhiak hidin kigen hi.

A/R Archery team in kipahman mu

Imphal, Oct-28:9-Sector Assam Rifles mun a training a omlel Assam Rifles Archery Team, in 24-Senior Manipur State Archery Championship kipatni in hih hoih mahmah uh a, Medal 6 lkah 5 la uhi. Individual event a 50mtr Indian round ah Rfn M Sunder Singh in 336 pts mu in Gold Medal la a, Rfn H Bijendranath Singh in 325 pts mu in Silver medal la hi. 2nd event 30 mtr Indian Round ah Assam Rifles team in medal 3 om teng lavek uhi. Rfn M Sunder Singh leh Rfn Bijendranath Singh in Gold leh Silver medal la uh a, Rfn Ch Harichandra Singh in Bronze medal la hi. Maj Gen Rajeev Chopra, IGAR (South) in Assam Rifles teamte’n a hihhoih ziakun pahtakthu gen hi.